Bashsha Haattaa

MARKKABIYAAPPE kareera deꞌiya asay kaseegaadankka deꞌoosona. Bashsha Haattay yaanaagaa he wode gakkanaukka ammanibookkona. Ubba kaseegaappe aattidi qilliccennan aggokkona. SHin takkennan qillicciyoogaa aggibayidosona.

Qoppennan bollappe haattay gukkiyoogaa doommiis. Neeni balddiyaappe gussiyoogaadan haattay saluwaappe gukkiis. Nohebay likke giyoogaa! SHin hara ooninne markkabiyaa giddo gelanau wodee aadhdhiichchiis. Yihooway penggiyaa minttidi gorddiis.

Sohuwaara ziqqa soho ubbay haattan kamettiis. Haattay gita shaafa milatibayiis. Haattay gita mittaa sugi onggiiddinne wogga shuchchaa aatti yeggiiddi keehippe guummiis. Asay yayyiis. Eti xoqqa sohuwaa shibbidosona. ‘Markkabee dooya deꞌishin, Nohee giidobaa siyidi gelidaba gidorkkonii’ giidi ay keena amottidonaashsha! SHin haꞌꞌi hegau wodee aadhdhiichchiis.

Haattay kixxi kixxi biis. Haattay 40⁠u gallassaanne 40⁠u qammaa saluwaappe gukkiiddi takkiis. Haattay deriyaa miyyiyaa oyqqidi dari dari biisinne ubba keehi adussa deretakka sohuwaara kammibayiis. Yaatiyo gishshau, Xoossay giidoogaadan markkabiyaappe kareera deꞌiya asay, meheenne doꞌay ubbay hayqqiis. SHin markkabe giddon deꞌiya ubbay attiis.

Noheenne a naati markkabiyaa keexxiyoogan loꞌꞌo ooso oottidosona. Haattay denttin, markkabee haattaa bolli toohettiis. Iray bukkiyoogaa aggi simmin, issi gallassi away kiyiyoogaa doommiis. Hegee xeelliyo wode ayba loꞌꞌiyaabee! Ubbasaa walxxi gi kumida issi gita abbaa xallay deꞌees. Issi dummati beettiyaabay haattaa bolli toohettida markkabe xalla.

Haꞌꞌi he wogga wolqqaama asati xayidosona. Asaa haꞌꞌi qohana danddayokkona. Eti ubbay bantta aayetuuranne hara iita asatuura hayqqidosona. Eta aawatishin waanidonaa?

He wogga wolqqaama asatu aawati tumuppe nu mala asa gidokkona. Eti asaadan saꞌan deꞌanau saluwaappe wodhdhida kiitanchchata. Yaatiyo gishshau, Bashsha Haattay yiido wode, hara asaara hayqqibookkona. Eti asa ashuwaa maayidoogaa aggibayidi, kiitanchchadan saluwaa guyye simmidosona. SHin eti Xoossaa kiitanchchatuura deꞌennaadan digettidosona. Hegaa gishshau, eti Seexaanaa kiitanchchata gididosona. Geeshsha Maxaafan eti xalaheta woykko dayidanttata geetettoosona.

Xoossay carkkoy carkkanaadan oottin, he haattay wodhdhi wodhdhi biis. Ichchashu aginaappe guyyiyan, markkabee issi deriyaa huuphiyan uttiis. Keehi daro gallassay aadhdhi simmin, markkabe giddon deꞌiyaageeti kare xeelliyo wode, deretu xeeraa beꞌana danddayidosona. Haattay wodhdhi wodhdhi biyoogaa aggibeenna.

Hegaappe guyyiyan, Nohee quuruwaa giyo issi karetta kafuwaa markkabiyaappe kare yeddiis. Guutta wodiyau markkabiyaappe haakkidi paalli biikkonne, uttiyo giiga sohuwaa demmibeenna gishshau guyye simmiis. Quuroy zaari zaaridi hegaadan bi yiidi markkabiyaa bollan uttees.

Nohee haattay biittaa bollappe wodhdhi wuridaakko beꞌanau koyido gishshau, kaallidi haraphphiyo markkabiyaappe yeddiis. SHin haraphphiyakka deꞌiyo sohuwaa demmabeenna gishshau, guyye simmada yaasu. Nohee naaꞌꞌanttuwaakka o yeddin, wogaraa hayttaa doonan saxxa ekkada yaasu. Hegaa gishshau, haattay biittaa bollappe wodhdhidoogaa Nohee eriis. Nohee heezzanttuwaakka haraphphiyo yeddin, wurssettan deꞌiyo xiꞌꞌa biittaa demmaasu.

Xoossay he wode Noha azaziiddi: ‘Neeni ne soo asaa, mehetanne doꞌata ekkada markkabiyaa giddoppe kiya’ yaagiis. Eti markkabiyaa giddon issi layttappe dariya wodiyaa deꞌidosona. Eti ubbaykka bashshaappe attidi markkabiyaappe kiyidoogan ay keena ufayttidaakko qoppana danddayoos!