Yesuusi Guutta Naata Siiqees

YESUUSA hagan beꞌa; guutta naꞌaa qoommi uttiis. Yesuusi guutta naatuyyo tumuppe qarettiyoogaa erana danddayaasa. Hanettiyaabaa be⁠ꞌiiddi deꞌiya asati Yesuusi kiittidoogeeta. Yesuusi etau woygiiddi deꞌii? Ane beꞌoos.

Yesuusinne i kiittidoogeeti haahosaa biidi simmosaara deꞌoosona. Kiitettidaageeti yiiddi ogiyan issoy issuwaara palamettidosona. Yaatiyo gishshau, yi simmin Yesuusi eta: ‘Intte ogiyan deꞌiiddi palamettidobay aybee?’ yaagidi oychchiis. Tumuppe, eti aybin palamettidaakko Yesuusi erees. SHin i he oyshaa oychchidoy eti ayyo yootanaakkonne beꞌanaassa.

Kiitettidaageeti ogiyan deꞌiiddi, eta giddon ubbaappe aadhdhiyay oonakko palamettido gishshau, coꞌꞌu giidosona. Kiitettidaageetuppe issoti issoti haratuppe aadhdhidi beettanau koyidosona. Ubbaappe aadhdhi beettanau koyiyoogee likke gidennaagaa Yesuusi etau waati yootaneeshsha?

I guutta naꞌaa xeessidi, eta ubbaa sinttan essiis. Hegaappe ba erissiyo ashkkaratussi: ‘Intte laamettidi guutta naatudan hanana xayikko, Xoossaa kawotettaa mulekka gelanau danddayennaagaa, hagaa intte eranaadan koyayis. Xoossaa kawotettan ubbaappe aadhdhiyay ha naꞌaadan haniya ura’ yaagiis. Yesuusi hegaa aybissi giidaakko eray?

Keehi guutta naati haraatuppe gita gididi woykko aadhdhidi beettanau qoppokkona. Yaatiyo gishshau, kiitettidaageeti haraatuppe gitati woykko aadhdhi beettanau palamettiyoogaa aggidi, guutta naatudan hananau tamaarana koshshees.

Yesuusi guutta naatussi ay keena qarettiyaakko bessido hara wodetikka deꞌoosona. Guutta aginappe simmin, amarida asati bantta naata Yesuusakko ekki yiidosona. Kiitettidaageeti naati akko yeennaadan teqqana koyidosona. SHin Yesuusi kiitettidaageeta: ‘Guutta naati taakko yona; eta diggoppite; ayssi giikko, Xoossaa kawotettay eta mala asaassa’ yaagiis. Hegaappe Yesuusi naata idimmidi, anjjiis. Yesuusi guutta naata siiqiyoogaa eriyoogee loꞌꞌoba gidennee?