Yesuusi Kawo Gididi Yiis

YESUUSI naaꞌꞌu qooqe woosanchchata pattido wodiyaappe guuttaa takkidi, Yerusalaame matan deꞌiya issi guutta katamaa gakkiis. I ba erissiyo ashkkaratuppe naaꞌꞌata: ‘Intte, katamaa biidi hare maraa demmana. A birshshidi tau ekki yiite’ yaagiis.

Hariyaa ayyo ehin, Yesuusi a toggiis. Hegaappe i toggidi, matasan deꞌiya Yerusalaame biis. I katamaa matattido wode, daro asay a beꞌanau kiyiis. He asaappe dariya baggay ba maayuwaa qaaridi, ogiyan hiixxiis. Harati qassi zambbaa tashiyaa karidosona. He tashetakka ogiyan hiixxidi, bantta qaalaa xoqqu oottidi: ‘Yihoowa sunttan yiya kawuwaa Xoossay anjjo!’ yaagidosona.

Daro wodeppe kase, Israaꞌeelen kawotiya ooratta kawoti, banttana asaassi bessanau mara hariyaa toggidi Yerusalaame geloosona. Yesuusi oottiiddi deꞌiyooykka hegaa. Ha asatikka Yesuusi eta kawo gidanaadan koyiyoogaa bessiiddi deꞌoosona. SHin i kawo gidanaagaa koyiyay ubba asaa gidenna. Hegaa Yesuusi beeta maqidasiyaa biido wode hanettidabaappe beꞌana danddayoos.

Beeta maqidasiyan Yesuusi qooqetanne wobbeta pattiis. Yelaga naati hegaa beꞌido wode, bantta qaalaa xoqqu oottidi Yesuusa sabbidosona. SHin hegan qeeseti yiillotidi, Yesuusa: ‘Ha naati giyoobaa siyay?’ yaagidosona.

Yesuusi: ‘Ee, siyayis. Geeshsha Maxaafan: “Guutta naatu doonan Xoossay sabettana” yaagiyaagaa mulekka nabbabibeekketii?’ yaagiis. Yaatiyo gishshau, naati Xoossan sunttettida kawuwaa sabbiyoogaa aggibookkona.

Nuuni he naatu mala gidanau koyoos; koyokkonii? Issi issi asay, nuuni Xoossaa kawotettaabaa yootiyoogaa esissanau koyana danddayees. SHin nuuni Yesuusi asau oottana deꞌiyo garamissiyaabata yootiyoogaa aggokko.

Yesuusi saꞌan deꞌiyo wode, i kawo gididi haariyo wodee gakkibeenna. He wodee aude yaanee? Yesuusi erissiyo ashkkarati hegaa eranau koyidosona. Kaallidi hegaabaa nabbabana.