Gannate Biittiyo

Yihooway Seexaanay oottido iitaba ubbaa muleera xayssana. Yihooway, saꞌa ubbaa haarana mala Yesuusa Kawo oottiis. I haariyo wode, biittiyaa gannate gidana.—Daaneela 7:13, 14; Luqaasa 23:43.

Yihooway kaallidi deꞌiyabata oottanau qaalaa geliis:

• KATTAY GIDIDI PALAHANA: “Biittai kattaa mokkiis; Xoossai, nu Xoossai nuna anjjiis.” “Biittan daro kattai mokko; dereti kattan kamettona.”—Mazamure 67:6; 72:16.

• OLAY DEꞌENNA: “Haa yiite; GODAA oosuwaa xeellite; i sa7an oottido garamissiya malaataa be7ite. I sa7aa gaxaa gakkanaassi de7iya olaa teqqees;”—Mazamure 46:8, 9.

• IITA ASAY DEꞌENNA: “Iitaa ottiyaageeti xoqollettidi xayana; . . . Iitaa oottiyaageeti guutta wodiyaappe guyyiyan de7okkona; neeni eta koyiyaakkokka eti beettokkona.”—Mazamure 37:9, 10.

• 

  HARGGEE, KAYYOY, WOYKKO HAYQOY DEꞌENNA: “He wode, qooqetu aifee dooyettana; tulletu haittaikka siyana. Wobbeti genessadan guppana; duudetikka ufaissan yexxana.”—Isiyaasa 35:5, 6. 

  “Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis” yaagiis.”—Ajjuutaa 21:3, 4.

Yihooway Seexaanaanne daydanttatu mala gidenna, i mulekka worddotenna. I qaalaa gelidobay ubbay polettidi tuma gidiyoogee attenna. (Luqaasa 1:36, 37) Yihooway nena siiqeesinne i giigissiyo gannatiyan neeni deꞌana mala koyees. Hegaa gishshau Xoossaa Qaalaa giddon deꞌiya malaalissiya tumaaba gujjada tamaaranau Yihoowa Markkatuura gaytta. Ne tamaarido tumaa ne deꞌuwan oosuwan peeshshikko, neeni wordduwaappe, malan ammaniyoogaappenne eeyyatettaa aylletettaappe kiyana danddayaasa. Takkada nagaraanne hayquwa aylletettaappekka kiyaasa. Yesuusi giidoogaadan: “Intte tumatettaakka erana; qassi tumatettai inttena ailletettaappe kessana”—Yohaannisa 8:32.