Wachtawur ONLAYN LAYBREERIYAA
Wachtawur
ONLAYN LAYBREERIYAA
Wolayttattuwa
  • GEESHSHA MAXAAFAA
  • XUUFETA
  • SHIIQOTA
  • kr shem. 17 sin. 182-191
  • Kawotettawu Haggaaziyaageeta Loohissiyoogaa

Ne dooridoogan biidoy baawa.

Atto ga, biiduwaa bessiyoode balay merettiis.

  • Kawotettawu Haggaaziyaageeta Loohissiyoogaa
  • Xoossaa Kawotettay Haariiddi Deꞌees!
  • Sima Huuphe Yohota
  • Issi Mala Qofaa
  • ‘Taani Ta Aaway Tana Tamaarissidoogaadan Haasayays’
  • Haggaaziyaageeti Mishiraachuwaa Yootiyaageeta Gidanaadan Loohissiyoogaa
  • Ishantti Bantta Aawatettan Koyettiyaabaa Polanaadan Loohissiyoogaa
  • Yihoowa Markkati Bantta Haggaazuwa Polanaadan Waani Loohiyonaa?
    Yihoowa Markkata Xeelliyaagan Asay Darotoo Oychiyo Oyshata
  • Intteyyo Danddayettida Keena Ubban Yihoowappe Tamaariiddi Deꞌeetii?
    Nu Kawotetta Haggaazuwaa—2011
  • Aqinyetuyyo Giigida Timirtte Keettati Awugeetee?
    Ha Wodiyan Yihoowa SHeniyaa Poliyaageeti Oonee?
  • Yihooway Loohissiyoobaa Kaallite
    Kiristtaanetu Deꞌuwaanne Haggaazuwaa—Xannaꞌiyo Xuufiyaa—2019
Gujjada Beꞌa
Xoossaa Kawotettay Haariiddi Deꞌees!
kr shem. 17 sin. 182-191

SHEMPPUWAA 17

Kawotettawu Haggaaziyaageeta Loohissiyoogaa

HA SHEMPPUWAA WAANNA QOFAA

Tiꞌokiraase timirtte keettati Kawotettawu haggaaziyaageeti bantta oosuwaa polanaadan waati maaddiyaakko yootees

1-3. Mishiraachoy darosan odettanaadan Yesuusi ay oottidee, hegee woygidi oychanaadan oottii?

YESUUSI Galiilaa biittan ubbasan naaꞌꞌu laytta sabbakiis. (Maatiyoosa 9:35-38 nabbaba.) I Ayhudatu woosa keettan tamaarissiiddinne Xoossaa Kawotettaa mishiraachuwaa yootiiddi, wogga katamatuuninne qeeri katamatun darotun yuuyiis. I sabbakanawu biido ubbasan, keehi daro asay akko yiis. Yesuusi “kattai daro” gidiyoogaa akeekiis; hegaa gishshawu, daro oosanchati koshshoosona.

2 Yesuusi mishiraachuwaa darosan yootanawu maaddiyaabaa oottiis. Waatidi? I erissiyo ashkkaratuppe 12ti ‘Xoossaa kawotettaabaa yootanaadan kiittiyoogaana.’ (Luq. 9:1, 2) Kiitettidaageeti he oosuwaa waatidi polanaakko oychennan waayi aggana. Yesuusi saluwan deꞌiya ba Aaway bana loohissidoogaadan, eta kiittanaappe kase siiquwan loohissiis.

3 Hegee issi issi oyshaa oychanaadan oottees: Yesuusa a Aaway aybin loohissidee? Yesuusi ba kiittidoogeeta aybin loohissidee? Qassi ha wodiyan shin—Mase Kawoy bana kaalliyaageeti bantta haggaazuwaa polanaadan loohissidee? Yaatikko, waatidi loohissidee?

‘Taani Ta Aaway Tana Tamaarissidoogaadan Haasayays’

4. Yesuusa a Aaway awude tamaarissidee, qassi awan tamaarissidee?

4 Yesuusi ba Aaway bana tamaarissidoogaa geeshshidi yootiis. Yesuusi saꞌan haggaaziyo wode, ‘Taani ta Aaway tana tamaarissidoogaadan haasayays’ yaagiis. (Yoh. 8:28) Yesuusi awude tamaaridee, qassi awan tamaaridee? Xoossawu bayra Naꞌa gidida i, merettosaara tamaariyoogaa doommennan waayi aggana. (Qol. 1:15) Naꞌay gita ‘asttamaare’ gidida saluwan deꞌiya ba Aaway yootiyoobaa siyiiddinne oottiyoobaa beꞌiiddi, zawi baynna daro layttawu aara deꞌiis. (Isi. 30:20) Hegaappe denddidaagan, Naꞌay ba Aawaa eeshshaabaa, a oosuwaabaanne a halchuwaabaa maalaalissiyaabaa tamaariis.

5. Aaway ba Naꞌay saꞌan haggaazanabaa a ay tamaarissidee?

5 He wode, Yihooway ba Naꞌay saꞌan haggaazanabaa a tamaarissiis. Gita Asttamaariyaanne a bayra Naꞌaa giddon deꞌiya dabbotaabaa yootiya hiraagaa qoppa. (Isiyaasa 50:4, 5 nabbaba.) Yihooway ba Naꞌay “maallado maallado” beegottanaadan oottiyoogaa he hiraagay yootees. Ha leemisoy ba tamaariyaa tamaarissanawu i guuran beegottanaadan oottiya asttamaariyaabaa qonccissees. Geeshsha Maxaafaabaa yootiya issi xuufee hagaadan gees: “Yihooway . . . i ay sabbakanaakko, qassi waatidi sabbakanaakko tamaaredan a timirtte keetti efiidi tamaarissees giyoogaa mala.” He saluwaa “timirtte keettan” Yihooway ba Naꞌay ‘gaanabaanne haasayanabaa’ tamaarissiis. (Yoh. 12:49) Aaway ba Naꞌay waati tamaarissanaakkokka tamaarissiis.a Yesuusi saꞌan deꞌiyo wode, ba haggaazuwaa poliyoogaa xalla gidennan, bana kaalliyaageeti bantta haggaazuwaa polanaadan loohissiyoogankka ba tamaaridobaa loytti goꞌettiis.

6, 7. (a) Yesuusi ba kiittidoogeeta aybin loohissidee, hegee eti ay oottanaadan maaddidee? (b) Yesuusi nu wodiyan bana kaalliyaageeti aybin loohanaadan oottidee?

6 Doomettan yootido, Yesuusi ba kiittidoogeeta loohissidobay aybee? Maatiyoosa shemppo 10y qonccissiyoogaadan, awan sabbakanaakko (paydo 5, 6), ay sabbakanaakko (paydo 7), Yihoowan ammanettana koshshiyoogaa (paydo 9, 10), keettaawaa waatidi haasayissanaakko (paydo 11-13), asay siyennan ixxikko waatanaakko (paydo 14, 15), qassi yedetay gakkiyo wode waatanaakko (paydo 16-23) yootidobaa gujjin, haggaazuwawu maaddiya kaaletuwaa i etawu odiis.b Yesuusi ba kiittidoogeeta loytti loohissidoogee eti koyro xeetu layttaa M.Ln mishiraachuwaa yootiyo oosuwaa sintta xeera gididi kaalettanaadan maaddiis.

7 Ha wodiyan shin? Xoossaa Kawotettaa Kawoy Yesuusi bana kaalliyaageeti ‘asa ubbawu markka gidana mala, kawotettaa wonggeliyaa mishiraachuwaa saꞌa ubban’ odanaadan etawu keehi gita oosuwaa immiis. (Maa. 24:14) Ha keehi gita oosuwaa oottanawu Kawoy nuna loohissidee? Ee, loohissiis. Kawoy saluwan uttidi, bana kaalliyaageeti hara asawu waati sabbakanaakkonne gubaaꞌiyan bantta aawatettan oottiyoobaa waati polanaakko loohissiis.

Haggaaziyaageeti Mishiraachuwaa Yootiyaageeta Gidanaadan Loohissiyoogaa

8, 9. (a) Tiꞌokiraase Haggaazo Timirtte Keettay eqqido waanna gaasoy aybee? (b) Tiꞌokiraase Haggaazo Timirtte Keettay neeni kaseegaappe loytta haggaazanaadan waatidi maaddidee?

8 Yihoowa dirijjitee beniisappe doommidi Xoossaa asaa haggaazuwawu loohissanawu gita shiiqotanne Haggaazo SHiiquwaa mala gubaaꞌe shiiqota goꞌettees. SHin, waanna biiruwan deꞌiya sintta xeera gididi kaalettiya ishantti 1940 heerappe doommidi, loohissanawu dumma dumma timirtte keettata essiyoogaa doommidosona.

9 Tiꞌokiraase Haggaazo Timirtte Keettaa. Nuuni hagaappe kase shemppuwan beꞌidoogaadan, ha timirtte keettay 1943n doommiis. Ha timirtte keettay eqqidoy tamaareti gubaaꞌiyaa shiiquwan haasayaa loytti shiishshanaadan loohissana xallaassee? Akkay. He timirtte keettay eqqido waanna gaasoy, Xoossaa asay haasayanaadan banttawu imettida imotaa goꞌettidi haggaazuwan Yihoowa sabbana mala loohissanaassa. (Maz. 150:6) He timirtte keettay an mazggabettida ishanttinne michontti ubbay Kawotettawu kaseegaappe loytti haggaazanaadan maaddees.

10, 11. Ha wodiyan Giiliyaade Timirtte Keettan mazggabettana danddayiyaageeti oonee, qassi he timirttee aybissi giigidee?

10 Giiliyaade Geeshsha Maxaafaa Timirtte Keettaa. Giiliyaade Geeshsha Maxaafaa Timirtte Keettay Saynno, Usuppune 1, 1943n doommiis. He timirtte keettay aqinyetinne kumetta wodiyaa haggaaziya harati misoonaawe gididi awanne biidi haggaazanaadan loohissanawu koyro eqqiis. SHin, Xiqimita 2011⁠ppe doommidi kumetta wodiyaa dumma haggaazuwaa haggaaziyaageetu, hegeetikka dumma aqinyetu, yuuyidi xomoosiyaageetunne eta maccaasatu, Beeteele keettaa yaratunne sabbakanawu maddabettida he timirtte keettan tamaaribeenna misoonaawetu xallay mazggabettoosona.

11 Giiliyaade Timirtte Keettaa timirttee aybissi giigidee? Yan daro wodiyawu tamaarissida asttamaaree hagaadan giis: “Tamaareti Xoossaa Qaalaa loytti xannaꞌidi bantta ammanuwaa minttanaadaaninne maddabettiyo sohuwan gakkiya metuwan genccanawu koshshiya eeshshay deꞌiyoogeeta gidanaadan eta maaddanaassa. Hegaa bollikka, he timirttee giigido waanna gaasoy tamaareti mishettidi mishiraachuwaa yootanaadan maaddanaassa.”—Efi. 4:11.

12, 13. Kumetta saꞌan sabbakiyo oosuwawu Giiliyaade Timirtte Keettay waati maaddidee? Leemisuwaa yoota.

12 Kumetta saꞌan sabbakiyo oosuwawu Giiliyaade Timirtte Keettay waati maaddidee? He timirtte keettan 1943⁠ppe doommidi tamaaridaageeti 8,500⁠ppe daro;c qassi Giiliyaaden tamaarida misoonaaweti kumetta saꞌan 170⁠ppe dariya biittan haggaazidosona. Misoonaaweti mishettidi haggaaziyoogaaninne haratikka hegaadan oottanaadan loohissiyoogan bantta tamaaridobaa loyttidi goꞌettoosona. Misoonaaweti Kawotettaabaa aassiyaageeti deꞌikkonne keehi darenna heeran, daroban oosuwaa sintta xeera gididi kaalettidosona.

13 Naaꞌꞌantto Alamiyaa Olaa wode maaran mankkan sabbakiyoogee attido Jaappaanen hanidabaa ane qoppa. Naase 1949n Jaappaanen deꞌiya aassiyaageeti tammaappe guutta. SHin, Giiliyaaden tamaarida 13 misoonaaweti he layttaa wurssettan Jaappaanen mishettidi sabbakiiddi deꞌoosona. Hegaappe simmin hara daro misoonaaweti yaa biidosona. Koyro, misoonaaweti gita katamatun haggaazidosona; guyyeppe qassi hara katamata biidosona. Misoonaaweti bantta xinaatetikka haratikka aqinye gidanaadan wozanappe minttettidosona. Misoonaaweti mishetti sabbakidoogee daro ayfiyaa demissiis. Ha wodiyan Jaappaanen Kawotettaabaa sabbakiyaageetu qooday 216,000⁠ppe daro; qassi xeetaappe 40 kushe gidiyaageeti aqinye!d

14. Tiꞌokiraase timirtte keettati ay qonccissiyoonaa? (Sinttaa 188n deꞌiya, “Kawotettawu Haggaaziyaageeti Loohiyo Timirtte Keettata” giya saaxiniyaakka xeella.)

14 Tiꞌokiraase timirtte keettata harata. Aqinyetettaa Haggaazuwaa Timirtte Keettay, Aqo Oyqqida Kiristtaanetuyyo Giigida Geeshsha Maxaafaa Timirtte Keettaynne Machibeenna Ishati Loohiyo Timirtte Keettay tamaareti ayyaanaaban minnanaadaaninne mishettidi haggaazanaadan maaddiis.e Ha Tiꞌokiraase Timirtte Keettati ubbay nu Kawoy bana kaalliyaageeti haggaazuwaa polanawu giigidaageeta gidanaadan maaddiyoogaa loytti qonccissoosona.—2 Xim. 4:5.

Ishantti Bantta Aawatettan Koyettiyaabaa Polanaadan Loohissiyoogaa

15. Aawatettay deꞌiyo attuma asati Yesuusa leemisuwaa waatidi kaallanawu koyiyoonaa?

15 Xoossay Yesuusa tamaarissidoogaa Isiyaasa hiraagay yootidobaa hassaya. He saluwaa “timirtte keettan,” Naꞌay ‘daafuridaagaa qaalan waatidi minttettanaakko’ tamaariis. (Isi. 50:4) Yesuusi tamaaridoogaadan oottiis; i saꞌan deꞌiyo wode, ‘daafuranchatanne deexuwaa tookkiyaageeta shemppissiis.’ (Maa. 11:28-30) Aawatettay deꞌiyo attuma asati Yesuusa leemisuwaa kaallidi, bantta ishanttanne michontta daafuraappe shemppissanawu koyoosona. Yaatanawu, aawatettay deꞌiyo ishantti bantta mala Kiristtaanetussi goꞌꞌiyaabaa loytti oottana mala maaddanawu dumma dumma timirtte keettati eqqidosona.

16, 17. Kawotettaa Haggaazuwaa Timirtte Keettay eqqidoy aybissee? (Tohossa qofaakka xeella.)

16 Kawotettaa Haggaazuwaa Timirtte Keettaa. Ha timirttee Laappune 9, 1959n, Niwu Yorken, Sawuz Lansing giyo sohuwan doommiis. Yuuyidi xomoosiyaageetinne gubaaꞌiyawu oottiyaageeti (ha wodiyan cimata shiishshiyaageeta geetettoosona) issi agina tamaaranaadan xeesettidosona. Guyyeppe, tamaarissiyoobay Inggilizetto qaalaappe hara qaalan birshshettin, kumetta saꞌan ishantti he timirtte keettan tamaariyoogaa doommidosona.f

Ishaa Loyd Baari Kawotettaa Haggaazuwaa Timirtte Keettan 1970n, Jaappaanen tamaarissishin

Ishaa Loyd Baari Kawotettaa Haggaazuwaa Timirtte Keettan 1970n, Jaappaanen tamaarissishin

17 Kawotettaa Haggaazuwaa Timirtte Keettay eqqido gaasuwaa Yihoowa Markkatu 1962 Laytta Maxaafay hagaadan giis: “Ha bichaarissiya alamiyan Yihoowa markkatu gubaaꞌe cima gidida uri gubaaꞌiyan deꞌiya ubbaa maara oyqqanawunne eta maaddanawu maaran mankkan oottiya ura gidana koshshees. Qassi i gubaaꞌiyaa maaddanawu giidi ba soo asaa sheneho gaana bessenna; shin i suure qoppana koshshees. Kumetta saꞌan gubaaꞌiyawu oottiyaageeti (ha wodiyan cimata shiishshiyaageeta geetettoosona) Geeshsha Maxaafay cimatuppe koyettiyaabaa yootiyoogaadan bantta oosuwaa polanawu maaddiyaabaa Kawotettaa Haggaazuwaa Timirtte Keettan tamaariyoogee gita maata!”—1 Xim. 3:1-7; Tii. 1:5-9.

18. Kawotettaa Haggaazuwaa Timirtte Keettay Xoossaa asa ubbaa waati maaddii?

18 Kawotettaa Haggaazuwaa Timirtte Keettay Xoossaa asa ubbaa maaddiis. Waatidi maaddidee? Cimatinne gubaaꞌiyawu oottiyaageeti he timirtte keettan tamaaridoogaadan oottiyo wode, etikka Yesuusaagaadan bantta mala Kiristtaaneti woppu gaanaadan oottoosona. Issi qarettiya cimay woy gubaaꞌiyawu oottiyaagee keha qaalaa haasayiyoogaa, loyttidi ezggiyoogaa woykko oychanawu yiidi minttettiyoogaa nashshikkii? (1 Tas. 5:11) Hegaa mala attuma asay ba gubaaꞌiyaa keehi maaddees!

19. Timirtte Konttee kaalliyo hara timirtte keettati awugeetee, he timirtte keettati aybissi giigidonaa?

19 Tiꞌokiraase timirtte keettata harata. Bolla Gididi Heemmiyaagaa Timirtte Konttee dirijjitiyaa giddon aawatettay deꞌiyo ishantta loohissiyo hara timirtte keettata kaallees. He timirtte keettati gubaaꞌiyaa cimati, yuuyidi xomoosiyaageetinne Macara Biiruwaa Konttiyaa yarati banttawu imettida daro oosuwaa loyttidi polanaadan maaddana mala giigidosona. Geeshsha Maxaafaappe tamaarissiyo he timirttee ishantti ayyaanaaban minnidi deꞌanaadan, qassi eti naaganaadan Yihooway immido wudiyaa Geeshsha Maxaafaa maaraadan heemmana mala maaddees.—1 PHe. 5:1-3.

Maalaawen Gubaaˈiyawu Oottiyaageeti Loohiyo Timirtte Keettan koyro tamaaridaageeta

Maalaawe biittan Gubaaꞌiyawu Oottiyaageeti Loohiyo Timirtte Keettay 2007n doommido wode koyro tamaaridaageeta

20. Yesuusi nuuni ubbay ‘GODAAPPE tamaaridoogaa’ yootidoy aybissee, qassi neeni ay oottanawu murttadii?

20 Mase Kawoy bana kaalliyaageeti loyttidi tamaaranaadan oottidoogee qoncce. Timirtte ubbaa pulttoy Yihoowa; hegeekka Yihooway ba Naꞌaa loohissiis; qassi Naꞌay bana kaalliyaageeta loohissiis. Yaatiyo gishshawu, nuuni ubbay ‘GODAAPPE tamaaridoogaa’ Yesuusi yootiis. (Yoh. 6:45; Isi. 54:13) Nu Kawoy tamaarissiyoobaa loyttidi tamaaranawu murttidaageeta gidoos. Ha timirtte ubbay giigido waanna gaasoy nuuni haggaazuwan nuuppe koyettiyaabaa polanawu ayyaanaaban minnidi deꞌanaadan maaddanaassa gidiyoogaakka hassayiyaageeta gidoos.

a Waatidi tamaarissanaakko Aaway ba Naꞌaa tamaarissidoogaa nuuni aybin eriyoo? Ane hagaa qoppa: Yesuusi tamaarissiyo wode daro leemisuwaa goꞌettidoogee i yelettanaappe daro xeetu layttaappe kase xaafettida hiraagay polettanaadan oottiis. (Maz. 78:2; Maa. 13:34, 35) He hiraagay xaafettanaadan oottida Yihooway ba Naꞌay leemisota goꞌettidi tamaarissanaagaa daro wodiyaa kasetidi yootiis.—2 Xim. 3:16, 17.

b Daro aginaappe guyyiyan, Yesuusi “hara laappun tammu asaa” dooridi, eti sabbakanaadan “naa77aa naa77aa” kiittiis. Qassi i eta loohissiis.—Luq. 10:1-16.

c Issoti issoti Giiliyaade Timirtte Keettan tamaaridoy issitoo xalla gidenna.

d Giiliyaaden tamaarida misoonaaweti kumetta saꞌan oottidobaa loytta eranawu, Xoossaa Kawotettaabaa Awaajjiya Yihoowa Markkata (Inggilizettuwaa) giyo maxaafaa shemppuwaa 23 xeella.

e Wurssettan odettida naaꞌꞌu timirtte keettati Kawotettaa Mishiraachuwaa Yootiyaageeti Tamaariyo Timirtte Keettan laamettidosona.

f Amarida layttaa takki takkidi tamaariyoonne dumma dumma wodiyan wuriya Kawotettaa Haggaazuwaa Timirtte Keettan tamaariyoobay ha wodiyan ubba cimata maaddees. Gubaaꞌiyawu oottiyaageetikka 1984⁠ppe doommidi ha timirtte keettan tamaaridosona.

Xoossaa Kawotettay Neessi Beettiyaagaa Keena Qonccee?

  • Yesuusa a Aaway ay tamaarissidee?

  • Mishiraachuwaa yootiyaageeta gidanaadan Kawoy bana kaalliyaageeta waati loohissidee?

  • Ishantti bantta aawatettan oottiyoobaa polanaadan Kawoy waati loohissidee?

  • Kawoy tamaarissiyoobaa nashshiyoogaa waata bessana danddayay?

KAWOTETTAWU HAGGAAZIYAAGEETI LOOHIYO TIMIRTTE KEETTATA

KIRISTTAANETU DEꞌUWAANNE HAGGAAZUWAA

Halchuwaa: Aassiyaageeti Kawotettaa mishiraachuwaa loyttidi sabbakiyaageetanne tamaarissiyaageeta gidana mala loohissanaassa.

Takkiyo Wodiyaa: Ubbatoo deꞌees.

Sohuwaa: Sohoy Kawotettaa Addaraashaa.

Mazggabiyoogeeta: Gubaaꞌiyaa ubbatoo yiya, Geeshsha Maxaafay tamaarissiyoobaa kaalliya, qassi Geeshsha Maxaafaa maaraadan deꞌiya ubbay mazggabettana danddayees. Mazggabettanawu, Deꞌuwaanne Haggaazuwaa SHiiquwaa xomoosiyaagawu yoota.

Goꞌꞌaa: Amayotrofik lateral skilarosis (ALS) giyo harggee i bollaa silissidaba gidikkonne, he timirtte keettan mazggabettida SHarena hagaadan gaasu: “[Saaminttawu gidduwan shiiqiyo shiiqoy] taani pilgganaadaaninne ta qofaa geeshshada yootanaadan maaddiis. Harati yootiyoobaa ezggiyoogaanne ta xallaassi gidennan, haratussikka ayyaanaaban koshshiyaabaa qoppiyoogaakka tamaaraas.”

Daro layttawu woradaa xomoosiyaagaa gididi haggaazida Arni hagaadan giis: “Taani deddotaysinne dungguuxa. Ha timirtte keettay taani xalanaadan maaddiis. Yihooway maaddin, taani waatada shemppanaakkonne waata yuushshada qoppanaakko ha timirtte keettan loohaas. Taani gubaaꞌiyaaninne haggaazuwan Xoossaa sabbana danddayido gishshawu a keehi galatays.”

Tiˈokiraase Haggaazo Timirtte Keettan Geeshsha Maxaafaa nabbabiya naˈaa

GUBAAꞌIYAA CIMATI TAMAARIYO TIMIRTTE KEETTAAg

Halchuwaa: Cimati ayyaanaaban minnanaadaaninne gubaaꞌiyan bantta aawatettan oottiyoobaa polanaadan maaddanaassa.

Takkiyo Wodiyaa: Ichashu gallassa.

Sohuwaa: Kuuyiyay macara biiruwaa; sohoy darotoo matan deꞌiya Kawotettaa Addaraashaa woy Gita SHiiquwaa Addaraashaa.

Mazggabiyoogeeta: Cimata macara biiroy xeesees.

Goꞌꞌaa: Amarkkan, Niwu Yorken, Pattersen giyo sohuwan 92tta kayan ha timirtte keettan tamaarida ishantti yootido issi issibaa beꞌa:

“Ha timirtte keettay taani ta hanotaa yuushsha qoppanaadaaninne Yihoowa dorssaa waata heemmanaakko akeekanaadan maaddiis.”

“Taani ha timirttiyaa ta deꞌuwan ubbatoo goꞌettana.”

AQINYETETTAA HAGGAAZUWAA TIMIRTTE KEETTAA

Halchuwaa: Aqinyeti bantta ‘oottiyo ooso ubbaa polanaadan’ maaddanaassa.—2 Xim. 4:5.

Takkiyo Wodiyaa: Usuppun gallassa.

Sohuwaa: Kuuyiyay macara biiruwaa; sohoy darotoo, matan deꞌiya Kawotettaa Addaraashaa.

Mazggabiyoogeeta: Baa giishin issi layttawu kumetta wodiyaa aqinye gididi oottidaageeta he timirtte keettan tamaaranaadan mazggabidi, woradaa xomoosiyaagee etawu yootees. He timirtte keettan tamaaroosappe ichashu laytta gidido amarida aqinyeti tamaaranawu xeesettana danddayoosona.

Goꞌꞌaa: Lilo giyo michiyaa hagaadan gaasu:“He timirtte keettay taani ta deꞌuwaaninne haggaazuwan gakkiya metuwan genccanaadan maaddiis. Taani kaseegaappe loytta xannaꞌays, loytta tamaarissaysinne Geeshsha Maxaafaa loyttada goꞌettays. Taani haratakka cimatakka maaddanawunne gubaaꞌee diccanaadan maaddanawu loytta loohaas.”

He timirtte keettan naaꞌꞌutoo tamaarida Brenda hagaadan gaasu: “He timirtte keettay taani kaseegaappe aaruwan ayyaanaabaa qoppanaadan, ta kahaa naaganaadaaninne harata maaddanaadan oottiis. Yihooway daro keha!”

BEETEELE GELIYAAGEETI TAMAARIYO TIMIRTTE KEETTAA

Halchuwaa: Ha timirtte keettay mati gelidaageetussi Beeteele haggaazoy ushachanaadan maaddanawu giigiis.

Takkiyo Wodiyaa: Saaminttan saaminttan 45 daqiiqaa tamaarin 16 saaminttan wurees.

Sohuwaa: Sohoy Beeteele.

Mazggabiyoogeeta: Mazggabiyoogeeti Beeteele keettaa asaa yara gididaageetanne daro wodiyawu simerettida bantta dosan oottiyaageeta (issi layttaa woy hegaappe daruwaa).

Goꞌꞌaa: Ha timirtte keettan 1980 heeran tamaarida Demitriyes giyo ishay hagaadan giis: “Ha timirttee taani kaseegaappe loyttada xannaꞌanaadaaninne Beeteelen daro wodiyawu oottanawu giigettanaadan maaddiis. Asttamaaretu hanotay, he timirtteenne maaddiya zoree Yihooway tana siiqiyoogaanne Beeteele oosoy tawu injjetanaadan i koyiyoogaa ammananaadan oottiis.”

KAWOTETTAA MISHIRAACHUWAA YOOTIYAAGEETI TAMAARIYO TIMIRTTE KEETTAAh

Halchuwaa: Kumetta wodiyaa haggaaziyaageeta (azinaanne machiyo, machibeenna ishanttanne azina gelibeenna michontta) Yihoowawunne a dirijjitiyawu loytti haggaazana mala tamaarissanaassa. He timirtte keettan tamaarida daroti bantta biittan aassiyaageeti keehi koshshiyo sohuwan haggaazanaadan maddabettoosona. Layttay 50 gidibeennaageeti haggaaziya uri baynna gaxariyan haggaazanawunne oosoy aakkanaadan maaddanawu guutta wodiyawu dumma aqinye gididi haggaazana danddayoosona.

Takkiyo wodiyaa: Naaꞌꞌu agina.

Sohuwaa: Macara biiroy kuuyees; sohoy darotoo Kawotettaa Addaraashaa woy Gita SHiiquwaa Addaraashaa.

Haggaaziya michiyo

Ishanttanne michontta tiꞌokiraase haggaazo timirtte keettay maaddees

Mazggabiyoogeeta: Mazggabiyoogeeti aassiyaageeti keehi koshshiyo heeran awaaninne haggaazana danddayiya, layttay 23⁠ppenne 65⁠ppe gidduwan deꞌiyo, payya gididanne “Hekko, tana kiitta” giya kumetta wodiyaa haggaaziyaageeta. (Isi. 6:8) Tamaariyaageeti ubbay, hegeetikka machibeenna ishantti, azinaa gelibeenna michonttinne azinaynne machiyaa baa giishin aggennan naaꞌꞌu layttawu kumetta wodiyaa haggaazana bessees. Azinaynne machiyaa aqo oyqqidi baa giishin naaꞌꞌu laytta takkana koshshees. Ishantti cima woy gubaaꞌiyawu oottiyaagaa gididi baa giishin aggennan naaꞌꞌu laytti haggaazidaageeta gidana bessees. Intte biittan he timirtte keettay deꞌikko, heezzu gallassaa gita shiiquwaa wode koyiyaageeti shiiqidosan mazggabettanaadan odettees.

Goꞌꞌaa: Machibeenna Ishantti Loohiyo Timirtte Keettaaninne Aqo Oyqqida Kiristtaanetuyyo Giigida Geeshsha Maxaafaa Timirtte Keettan tamaaridaageeti minttettiyaabaa darobaa yootidosona. Bolla Gididi Heemmiyaagee he naaꞌꞌu timirtte keettati walahettidi Kawotettaa Mishiraachuwaa Yootiyaageeti Tamaariyo Timirtte Keettaa geetettanaadan 2013n paqqadiis. Azinaa gelibeenna michontta gujjin, ammanettida hara daro aqinyeti haꞌꞌi he timirttiyan goꞌettana.

GIILIYAADE GEESHSHA MAXAAFAA TIMIRTTE KEETTAA

Halchuwaa: He timirtte keettan tamaaridaageeti yuuyidi xomoosanawu, misoonaawe gididi sabbakanawu woy Beeteele so asaa yara gididi oottanawu maddabettana danddayoosona. Eti bantta tamaaridobaa loytti goꞌettiyoogan, mishiraachuwaa yootiyoogaara gayttidabaaninne macara biiruwaa oosuwan keehi maaddoosona.

Takkiyo Wodiyaa: Ichashu agina.

Sohuwaa: Sohoy Amarkkan, Niwu Yorken, Pattersenen deꞌiya Wochtawur Ejjukeeshinal Sentter giyoosaa.

Giiliyaade timirtte keettaa asttamaaree tamaarissiyoobaa ezggiya tamaareeta

Giiliyaade timirtte keettaa—Niwu Yorken, Pattersenen

Mazggabiyoogeeta: Mazggabiyoogeeti kumetta wodiyaa dumma haggaazuwaa haggaaziya azinaanne machiyo, machibeenna ishanttanne azina gelibeenna michontta. Sabbakanawu maddabettida, Giiliyaaden tamaaribeenna misoonaaweti, dumma aqinyeti, Beeteele so asaa yarati woykko yuuyidi xomoosiyaageetinne eta machoti mazggabettanawu oychanaadan Macara Biiruwaa Konttee yootana danddayees. Mazggabettiyaageeti Inggilizettuwaa haasayiyaageetanne xaafiyaageeta gidana bessees.

Goꞌꞌaa: Amarkkan daro layttaa haggaazida Lade giyo azinaynne Monik giyo a machiyaa hagaadan giidosona:

Ladi, “Giiliyaade timirtte keettay nuuni awanne baanawu giigetti uttidaageeta gidanaadaaninne nu ishanttuura issippe oottanaadan maaddiis” yaagiis.

Monika qassi, “Taani Xoossaa Qaalaappe tamaaridoogaa maaran deꞌiyo wode, ta oosuwan keehippe ufayttays. Hegee Yihooway tana siiqiyoogaa bessiyaaba gidiyoogaa akeekays” yaagaasu.

KAWOTETTAA HAGGAAZUWAA TIMIRTTE KEETTAA

Halchuwaa: Yuuyidi xomoosiyaageeti, cimatinne gubaaꞌiyan oottiyaageeti maara heemmanaadaaninne dirijjitiyan oottiyo hara oosuwaa maara polanaadan loohissanaassa. (Oos. 20:28) Ha wodiyan gubaaꞌiyan deꞌiya hanotaa, hanana danddayiyaabaanne eesuwan koshshiyaabaa tamaaroosona. Bolla Gididi Heemmiyaagee kuuyidoogaadan ha timirttiyaa amarida laytta takki takkidi tamaaroosona.

Takkiyo Wodiyaa: Mata wodeppe haa simmin, he timirttiyawu maddabettiya wodee dumma dumma.

Sohuwaa: Sohoy darotoo matan deꞌiya Kawotettaa Addaraashaa woy Gita SHiiquwaa Addaraashaa.

Mazggabiyoogeeta: Woradaa xomoosiyaagee cimatussinne gubaaꞌiyawu oottiyaageetussi yootees. Macara biiroy yuuyidi xomoosiyaageeta xeesees.

Goꞌꞌaa: “He timirttee guutta wodiyan wuriyaabaa gidikkonne, cimati ubbatoo ufayssan Yihoowawu minnidi haggaazanaadan maaddees. Mata wode sunttettidaageetikka gamꞌꞌida cimatikka wudiyaa loytti heemmiyoogaanne maayettidi oottiyoogaa tamaaroosona.”—Kwin.

“Ha timirttee nuuni ayyaanaabaa loytti akeekanaadan, qohiyaabaappe naagettanaadaaninne wudiyaa waatidi heemmanaakko maaddiyaabaa eranaadan oottiis.”—Maykil.

WORADAA XOMOOSIYAAGEETINNE ETA MACCAASATI TAMAARIYO TIMIRTTE KEETTAAi

Halchuwaa: “Yootiyoogaaninne tamaarissiyoogan” daafuriya, woradaa xomoosiyaageeti bantta heemmiyo wudiyawu loyttidi oottanaadaaninne eta heemmanaadan maaddanaassa.—1 Xim. 5:17; 1 PHe. 5:2, 3.

Takkiyo Wodiyaa: Issi agina.

Sohuwaa: Macara biiroy kuuyees.

Mazggabiyoogeeta: Woradaa xomoosiyaageetanne eta machota macara biiroy xeesees.

Goꞌꞌaa: “Yesuusi dirijjitiyaa kaalettiyoogaa nuuni keehi nashshanaadan oottiis. Nuuni etawu oottiyo ishantta minttettana koshshiyoogaanne gubaaꞌiyaa issippetettay minnanaadan maaddana koshshiyoogaa akeekida. Yuuyidi xomoosiyaagee issi issitoo zoriyaabanne seeriyaaba gidikkonne, i halchiyo waannabay ishantti Yihooway banttana siiqiyoogaa akeekanaadan maaddiyoogaa gidiyoogaa nuuni loytti qoppanaadan he timirttee maaddiis.”—Joꞌelanne Kano, koyro kayaa, 1999.

MACARA BIIRUWAA KONTTIYAA YARATINNE ETA MACHOTI TAMAARIYO TIMIRTTE KEETTAA

Halchuwaa: Macara Biiruwaa Konttiyaa yara gididi oottiyaageeti, Beeteele keettaa asaaranne gubaaꞌiyaara gayttida oosuwaa akeekan kaallanaadan, qassi bantta biittan deꞌiya woradata loytti kaallanaadan loohissanaassa.—Luq. 12:48b.

Takkiyo Wodiyaa: Naaꞌꞌu agina.

Sohuwaa: Sohoy Amarkkan, Niwu Yorken, Pattersenen deꞌiya Wochtawur Ejjukeeshinal Sentter giyoosaa.

Mazggabiyoogeeta: Bolla Gididi Heemmiyaagaa Haggaazo Konttee Macara Biiruwaa woy issi Biittaa Konttiyaa yaratanne eta machota xeesees.

Goꞌꞌaa: Lolanne Karo giyoogeeti 25tta kayan tamaaridosona. Eti haꞌꞌi Nayjeeriyan haggaazoosona.

Loli, “Taani ay keena minnada oottikkonne woy tawu ay oosoy imettikkonne, ayyaanaaban tishsha gidiyoogee Yihoowa ufayssanawu keehi maaddiyoogaa akeekaas” yaagiis.

Kara he timirtte keettan tamaaridobaa hassayada, “Taani issibaa geliya ogiyan yootana xayikko, harata tamaarissanaappe kase he yohuwaa loytta xannaꞌana koshshees” yaagaasu.

g Ha timirtte keettay ha wodiyan deꞌiyoy ubba biittaana gidenna.

h Ha timirtte keettay ha wodiyan deꞌiyoy ubba biittaana gidenna.

i Ha timirtte keettay ha wodiyan deꞌiyoy ubba biittaana gidenna.

    Wolayttatto Xuufeta (2000-2025)
    Kiya
    Gela
    • Wolayttattuwa
    • Kiita
    • Dosiyoobata
    • Copyright © 2025 Watch Tower Bible and Tract Society of Pennsylvania
    • Goꞌettiyo Wogaa
    • Goꞌettiyaageetu Xuuraa Naagiyo Higgiyaa
    • Goꞌettiyaageetu Xuuraa Naagiyo Higgiyaa Giigissiyoobaa
    • JW.ORG
    • Gela
    Kiita