Kiristtaanetu Deˈuwanne Haggaazuwa Shiiquwa Xannaˈiyo Xuufiyan Odettida Xuufeta
© 2024 Watch Tower Bible and Tract Society of Pennsylvania
LAAPPUNE 3-9
XOOSSAA QAALAN DEˈIYA ALˈˈOBAA LEEMISO 3
Yihoowan Ammanettiyogaa Bessite
Yihoowan Ammanettada Paxa Deˈa!
5 Imbbaaqoomi Yihoowan ammanettiyoogaa aggidee? I Xoossay qaalaa gelidobaa ammaniyoogaa aggidee? Mule aggibeenna! I ba metuwaanne bana qofissidabaa asassi gidennan Yihoowawu yootidoogee I hidootaa qanxxibeennaagaa bessees. Xoossay keerido wodiyaa, woy qassi hegaa keena waayee A bolli gakkanaadan Yihooway eeno giidoy aybissakko I akeekana danddayenna gishshawu unˈˈettidoogee qoncce. Yihooway Imbbaaqoomi bana qofissidabaa xaafanaadan denttettiyoogan nuna keehi koshshiyaabaa tamaarissiis. Nuuni nuna qofissiyaabaa woy sirissiyaabaa ayyo yootanawu yayyana bessenna. Nu wozanaabaa woosan ayyo yootanaadan I nuna siiquwan minttettees. (Maz. 50:15; 62:8) Leemiso 3:5y ‘nuuni polo wozanan Yihoowan ammanettanaadaaninne nu akeekan zemppennaadan’ minttettees. Imbbaaqoomi ha qofaa ba deˈuwan oosuwan peeshshiis.
6 Imbbaaqoomi ba ammanettiyo Dabbonne Aawa gidida Yihoowakko shiiqiis. Imbbaaqoomi ba akeekan zemppiyoogan ba hanotan unˈˈettibeenna. SHin I bawu siyettiyaabaanne bana hirggissiyaabaa xeelliyaagan Yihoowa woossiyoogan nuussi leemiso gidees. Qassi woosaa siyiya Yihooway nuna qofissiyaabaa woosan ayyo yootiyoogan an ammanettiyoogaa bessanaadan nuna shoobbees. (Maz. 65:2) Yaatiyo wode nuuni Yihooway nu woosaa waati zaariyaakko akeekoos. I nuna minttettiyoonne kaalettiyo wode, siiquwan qoommiyoobadan nuuyyo siyettana. (Maz. 73:23, 24) Nu metoy ayba gidikkonne, nuuni A qofaa eranaadan I maaddana. Nuuni wozanappe woossiyoogee Xoossan ammanettiyoogaa bessiyo issi oge.
‘Wogga Gonddalle Mala Gidida Ne Ammanuwaa’ Naagay?
4 Beni wotaaddaratudan, neeni olawu ubbatoo giigettana mala gonddalle mala gidida ne ammanuwaa muletoo qorananne giigissana bessees. Nuuni Kiristtaaneti iita ayyaanatuura olettoos. (Efi. 6:10-12) Gonddalle mala gidida ne ammanuwaa neessi hara asi giigissana danddayenna. Ne ammanoy neeni paacettiyo wodekka minokkonne waata erana danddayay? Koyruwan, Xoossay maaddanaadan woossana bessees. Yaata simmada, ne ammanoy Xoossaa sheniyaara maayiyaakkonne, Xoossaa Qaalan qorana koshshees. (Ibr. 4:12) Geeshsha Maxaafay hagaadan gees: “Ne polo wozanan GODAA ammanetta; ne akeekan zemppoppa.” (Lee. 3:5, 6) Ne deˈuwan mata wode hanidabaanne hegaa xeelliyaagan neeni oottidobaa qoppa. Leemisuwawu, miishshay nena keehi metidee? Neeni he metuwaa xoonanawu baaxetido wode Ibraawe 13:5n, “Taani nena mulekka yeggikke woikko aggikke” giidi Yihooway qaalaa gelidobaa qoppadii? Yihooway gelido qaalay I nena maaddanaagaa neeni ammanettanaadan oottidee? Yaatikko, hegee gonddalle mala gidida ne ammanoy loˈˈo hanotan deˈiyoogaa bessees.
Samssoonaagaadan Yihoowan Ammanetta
13 Nuuyyo deˈiya eray woy nuuni Yihoowa haggaazuwan oottidobay ayba gidikkonne, nuunikka Yihoowa maaduwan ammanettana koshshees. Yihoowan ammanettiyo wode xallan nuussi tumuppe ushachchiyoogaa nuuni ashkketettan ammanana koshshees. Pulttanaadan Yihooway oottido haattaa Samssooni uyido wode bawu koshshiya wolqqaa demmiis. Samssoonaagaadan, nuuni Yihoowan ammanettidi deꞌanawu Yihoowa maaduwaa ekkana koshshees.—Maa. 11:28.
Ayyaanaaban Alˈˈobaa
Aggenna Siiquwaa Issoy Issuwawu Ubbatoo Bessite
1 AGGENNA SIIQUWAA nuuni issoy issuwawu bessanaadan oottiya gaasoti deˈoosona. Hegeetuppe amaridaageeti aybee? Geeshsha ayyaanaa kaaletuwan xaafettida leemiso maxaafay ha oyshaa waati zaariyaakko akeeka: “Aggenna siiqoinne tumatettai neeppe haakkoppona; . . . Yaatikko, neeni Xoossaanne asaa sinttan sabettananne nashettana.” “Aggenna siiquwaaninne ammanettiyoogan nagarai atto geetettees.” “Xillotettaanne aggenna siiquwaa koyiya uraa baree aduqqees.”—Lee. 3:3, 4; 16:6; 21:21.
2 Nuuni aggenna siiquwaa bessana koshshiyo heezzu gaasota leemiso maxaafay qonccissees. Koyroogee, nuuni aggenna siiquwaa bessiyo wode Xoossay nuna xoqqu ootti xeellees. Naaˈˈanttoogee, nuuni aggenna siiquwaa bessiyo wode goˈettoos. Leemisuwawu, nuuni haratuura duuxxenna laggetettaa medhdhoos. Heezzanttoogee, nuuni aggenna siiquwaa bessiyo wode, merinaa deˈuwaa gujjin, sinttappe loˈˈobaa demmana. Nuuni Yihooway yootiyoobata azazettanaadan oottiya gaasoti deˈoosona: “Asappe koyettiyaagee aggenna siiquwaa.”—Lee. 19:22.
Haasayaa
Cuccumaa: Asay Mishiraachchuwa Siyanawu Koyenna Wode Yihoowan Ammanettiyogaa Bessite
w11 3/15 14 ¶7-10
7 Nu ishatuppe daroti keehi metiya moottan haggaazoosona. Hananabaa yootiya Ermmaasi hegaa mala moottan, giishin bashshay gakkana haniyo, metoy kumido Yihudaa biittan oottiis. I azazettidi Xoossaa pirddaa kiitaa yootido gishshau, Yihoowan ammanettiyo hanotan galla galla a paacee gakkiis. Issi wode ayyo ammanettidi xaafiya Baarukikka xalalidoogaa yootiis. (Erm. 45:2, 3) Ermmaasi hidootaa qanxxidee? Issi wode ikka unˈˈettiis. I, “Taani yelettido gallassai qanggettidaagaa gido!” yaagiis. “Taani metonne azzano be7anaunne laittaa ubbaa yeellataidda wurssanau, aissi ta aayee uluwaappe kiyidanaashsha?” yaagiis.—Erm. 20:14, 15, 18.
8 Gidikkokka, Ermmaasi hidootaa qanxxibeenna. I ubbatoo Yihoowan ammanettiis. Hegaappe denddidaagan, ha ammanettidi hananabaa yootiyaagee, Ermmaasa 17:7, 8n deˈiya, hagaadan giya Yihoowa qaalay polettiyoogaa beˈiis: “GODAN ammanettiya asi, i ammanettiyoi GODAA gidiyo asi anjjettidaagaa. I haattaa lanqqiyan tokettidi, ba xaphuwaa goggiya haattau yeddida mittaa mala. Awaa suuluwaassikka i yayyenna. Aissi giikko, he mittaa haittai irxxi irxxashin de7ees. Irai bukkenna laittankka hirggenna; aifiyaa aifiyoogaakka dabarssenna.”
9 Ermmaasi “haattaa lanqqiyan” tokettida, woy haattaa ushshiyo, ayfiyaa ayfiya dalqqidalqqiya mittaadan ‘ayfiyaa ayfiyoogaa mule dabarssibeenna.’ A qilliicciya iita asatu sugettaa eqettiis. I deˈuwau koshshiya “haattaa” Pulttuwaa baxuuxiis; qassi Yihooway au yootiyo ubbabaa wozanan wottiis. (Mazamure 1:1-3 nabbaba; Erm. 20:9) Ermmaasi nuuyyo, ubba qassi waayissiya moottan Xoossau oottiyaageetuyyo ayba loˈˈo leemisoo! Intte hanotay hegaa mala gidikko, ‘a sunttaa’ haratuyyo yootiyo wode intte genccanaadan maaddiya, Yihoowan ubbatoo keehippe ammanettite.—Ibr. 13:15.
10 Ha wurssetta gallassatun nu bolli gakkiyaabata genccanau ayyaanaaban maaddiya daro loˈˈobaa Yihooway immiis. I immidobatuppe issoy, wodiyaappe wodiyan daro qaalan suure birshshettiiddi deˈiya Xoossaa Qaalaa kumettaa. I ‘ammanettida wozannaama ashkkaraa’ baggaara koshshiya wodiyan giigida ayyaanaa qumay kumi palahanaadan oottiis. Gubaaˈiyaaninne gita shiiqotun, nuugaa mala ammanoy deˈiyo, maaddiya daro laggetakka immiis. Ha giigissotun loytti goˈetteetii? Hegaadan oottiyaageeti ubbay “wozanan ufaittidi yexxana.” SHin Xoossay yootiyoogaa siyanau koyennaageeti “wozanan azzanidi waassana. Qassi [eta] ayyaanai meqqido gishshau, [eti] zilaalidi yeekkana.”—Isi. 65:13, 14.
LAAPPUNE 10-16
XOOSSAA QAALAN DEˈIYA ALˈˈOBAA LEEMISO 4
“Ne Wozanaa Minttada Naaga”
Ne Wozanaa Waata Mintta Naagana Danddayay?
4 Leemiso 4:23n “wozanaa” geetettida qaalay asi beˈana danddayenna aybanne qonccissiyaaba. (Mazamure 51:6 nabbaba.) Qassi “wozanay” nu qofaa, nuussi siyettiyaabaa, nuna denttettiyaabaanne nu koyiyoobaa qonccissees. Hegee bolla baggaara beettiyaaba gidennan, nu garssa asatettaa bessiyaaba.
Ne Wozanaa Waata Mintta Naagana Danddayay?
10 Nuuni nu wozanaa mintti naaganawu, qohiyaabaa shaakki erananne hegaappe nuna eesuwan naagana koshshees. Leemiso 4:23n “minttada naaga” geetettidi birshshettida qaalay naagiya uri oottiyoobaa nuna hassayissees. Kawuwaa Solomona wode, naagiyaageeti katamaa gimbbiyaa bolli eqqidi naagoosona; qassi eti qohiyaabay yiyoogaa beˈikko alaahoosona. Hegaa qoppiyoogee Seexaanay nu qofaa moorennaadan teqqanawu ay oottana bessiyaakko akeekanaadan maaddees.
11 Beni wode, naagiyaageeti katamaa penggiyaa naagiya asatuura hashetidi oottoosona. (2 Sam. 18:24-26) Eti morkkee matattiyo wode penggeti gorddettanaadan oottiyoogan katamay naagettanaadan issippe maaddoosona. (Nah. 7:1-3) Geeshsha Maxaafan loohida nu kahay naagiya uradan oottananne Seexaanay nu wozanaa, hegeekka nu qofaa, nuussi siyettiyaabaa, nuna denttettiyaabaa woy nu amuwaa mooranawu baaxetiyo wode nuna yeˈˈe gaana danddayees. Qohiyaabay deˈiyoogaa nu kahay nuuyyo yootiyo wode ubban, hegaappe haakkanawu nuussi danddayettida ubbabaa oottana koshshees.
Ne Wozanaa Waata Mintta Naagana Danddayay?
14 Nu wozanaa mintti naaganawu, qohiyaabaa teqqiyoogaa xalla gidennan loˈˈobaakka ekkana bessees. Gimbbiyan direttida katamaa leemisuwaa ane zaarettada qoppa. Penggiyaa naagiyaagee morkkee katamaa gelennaadan teqqanawu katamaa penggeta gorddees; shin hara wode kattaanne harabaa katamaa gelissanawu I penggeta dooyees. Penggeti mule dooyettennaba gidikko, kataman deˈiyaageeti namisettana. Hegaadankka, nuuni Xoossaa qofay nuna ubbatoo maaddanaadan nu wozanaa dooyana koshshees.
“Ne Wozanaa Minttada Naaga!”
2 Nuuni nu leemiso wozanaa naagana koshshiyoy aybissee? Xoossay Kawuwa Solomoni hagaadan giidi xaafanaadan denttettiis, “Ubbabaappekka ne wozanaa minttada naaga; aissi giikko, de7oi appe pulttees.” (Leemiso 4:23) Nuuni haˈˈi loˈˈo deˈuwa deˈanaageenne sinttappe loˈˈo deˈuwa demmanaagee nu leemiso wozanaa hanotaara gayttidaba. Aybissi? Xoossay nu wozanan deˈiyabaa beˈiyo gishshataassa. (1 Sameela 16:7) Xoossay nuna siiqiyoy nu “wozana giddon de7iya” loˈˈotettaappe denddidaagaana.—1 Pheexiroosa 3:4.
Ayyaanaaban Alˈˈobaa
Yihoowa Naagashshanawu Eeno Guutee?
4 Leemiso 4:18y “xillotu ogee gallassai seetana gakkanaashin, gujji gujji poo7iya maallado xalqqiyaa mala” gidiyoogaa yootees. He qofay Yihooway ba halchchuwaa ba asawu loddan loddan qonccissiyo hanotaa bessiyaaba. Issi Kiristtaanee ba deˈuwan laamettiyo ogiyaanne Yihoowakko shiiqiyo ogiyaa nuuni akeekanaadankka ha xiqisee maaddees. Issi uri ayyaanaaban eesuwan diccanaadan oottana danddayokko. Hegee wode ekkiyaaba. Nuuni Xoossaa Qaalaappenne A dirijjitiyaappe demmiyo zoriyaa loyttidi xannaˈiyaabanne oosuwan peeshshiyaaba gidikko, loddan loddan Kiristtoosaagaa mala eeshshay deˈiyoogeeta gidoos. Qassi Xoossaa kaseegaappe loyttidi eroos. Ha qofaa Yesuusi waati qonccissidaakko qoppa.
Ootti-besuwa
Cuccumaa: Yihoowa Markkati Paasikaa Bonchchennay Aybissee?
ijwfq huuphe yohuwa 19
Meeze gidida Bala qofata
● Bala qofaa: Yihoowa Markkati Paasikaa bonchchennay eti Kiristtaane gidenna gishshataassa.
Tumaa: Yesuus Kiristtoosi nuna ashshiyaagaa gidiyoogaa ammanoos, qassi A ‘leemisuwa kaallanawu’ nuussi danddayettida ubbabaa oottoos.—1 PHeexiroosa 2:21; Luqaasa 2:11.
● Bala qofaa: Yesuusi hayquwaappe denddidoogaa intte ammanekketa.
Tumaa: Nuuni Yesuusa dendduwan ammanoos; hegee Kiristtaanetu ammanuwawu waannaba gidiyoogaa akeekoos, qassi hegaabaa sabbakoos.—1 Qoronttoosa 15:3, 4, 12-15.
● Bala qofaa: Paasikaa baalaa bonchchiyoogan ufayttiyoogee intte naatuppe halanaadan ootteeta.
Tumaa: Nuuni nu naata siiqoos, qassi eti ufayttanaadan eta loohissanawunne maaddanawu nuuni danddayiyo ubbabaa oottoos.—Tiitu 2:4, 5.
Yihoowa Markkati Paasikaa bonchchennay aybissee?
● Paasikaa baalaa bonchchiyoogee Geeshsha Maxaafay yootiyoobaa gidenna.
● Yesuusi I denddido gallassaa gidennan, hayqqido gallassaa bonchchanaadan azaziis. Nuuni Geeshsha Maxaafaa gallassaa qoodaadan Yesuusa hayquwaa hassayiyo baalaa layttan layttan bonchchoos.—Luqaasa 22:19, 20.
● Paasikaa baalaara gayttida meezetu doomettay beni wode yelettiyoogaa goynuwaappe yiidaba gidiyo gishshawu, paasikaa baalay Xoossaa ufayssennaagaa ammanoos. Xoossay nuuni A xallawu goynnanaadan koyees, qassi I dosennabaara gayttida goynoy A ufayssenna.—Kessaabaa 20:5; 1 Kawotu Maxaafaa 18:21.
Nuuni Paasikaa baalaa bonchchennay “eratettaanne adussi qoppiyoogaa” goˈettanaadan minttettiya Geeshsha Maxaafaa qofaa kaalliyo gishshataassa; nuuni asa wogaa kaallanawu koyokko. (Leemiso 3:21; Maatiyoosa 15:3) Paasikaa baalaa bonchchiyoogaa xeelliyaagan harati nuna oychchiyo wode nu ammaniyoobaa etawu yootiyaaba gidikkonne, ubba asay ba koyidobaa oottanawu dooriyo maataa bonchchoos.—1 PHeexiroosa 3:15.
LAAPPUNE 17-23
XOOSSAA QAALAN DEˈIYA ALˈˈOBAA LEEMISO 5
Pokkiya Tuna Nagaraappe Haakkite
w00 7/15 29 ¶1
Kandduwan Moorettida Alamiyan Geeshsha Gidada Deˈana Danddayaasa
1 Ha xiqisiyan ‘shaaramuxa maccaasiyo’ giyagee shori baynna ura qonccissiyaba. A asa cimmanawu eessaa ililuwadan laqilaqiyanne zaytiyappe looxigiya haasayaa haasayawusu. Darotoo pokkiya tuna nagarawu kaalettiyay hegaa mala haasayaa gidennee? Leemisuwawu, layttay 27 gidido Eemo giyo puulanchcha xaafee hanotaa beˈa. A hagaadan gaasu: “Tanaara oottiya bitanee taassi qoppeesinne demmido injje ubban tana sabbees. Hegee tana ufayssiis. Shin I tanaara mattumaa gayttanawu koyidi hegaadan oottiyogaa loytta akeekaas. Yaaniyo gishshawu taani I oottiyoban cimettikke.” Nu akeekana xayikko, lambbeechchiya uri haasayiyo looxiga qaalan cimettana danddayoos. Hegaa gishshawu nuuni loytti qoppana koshshees.
9 Bessenna inddaa gaytettaappe nuuni naagettana koshshiyo loˈˈo gaasoy deˈees. Ha ‘eeyya maccaasiyaa’ hagaadan gidoogee odettiis: “Wuuqqidi uyiyo haattai mal77ees.” “Wuuqqidi uyiyo haattai” ay qonccissii? Geeshsha Maxaafay azinaynne machchiyaa inddan gayttiyoogaa gazddissiya haattan leemisees. (Lee. 5:15-18) Higgiyaa maaran aqo oyqqida azinaynne machchiyaa inddan gayttiyoogan ufayttana danddayoosona. SHin hegee ‘wuuqqidi uyiyo haattappe’ keehi dummatees. Wuuqqidi uyiyo haattay bessenna inddaa gaytettaa qonccissana danddayees. Kaysoy qosan wuuqqiyoogaadan, pokkobaa oottiya asati hegaa genttanawu maloosona. Eti oottiyoobaa ooninne erennabadan qoppiyaaba gidikko, “wuuqqidi uyiyo haattai” malˈˈiyaaba milatana danddayees. Yihooway ubbabaa beˈiyo gishshawu, eti banttana cimmoosona. Yihoowan sabettennan aggiyoogaappe aaruwan iitabi baawa; hegaa gishshawu he azzanttiyaabay malˈˈenna. (1 Qor. 6:9, 10) SHin harabaykka deˈees.
10 Bessenna inddaa gaytettay issi uri yeellatanaadan, pattenna asadan bana xeellanaadan, koyennan shaaranaadaaninne so asay laalettanaadan oottana danddayees. Eeyya maccaasee shoobiyaa ekkennan aggiyoogee eratetta gidiyoogee qoncce. Pokkobaa oottiya daroti eti Yihoowaara dabbotido dabbotay moorettiyoogaa xalla gidennan, worana danddayiya harggiyan oyqettoosona. (Lee. 7:23, 26) SHemppo 9 paydo 18y hagaadan giidi kuuyees: ‘I imattati duufo giddon deˈoosona.’ Yaatin, azzanttiyaabaa kaalettiya I shoobiyaa daroti ekkiyoy aybissee?—Lee. 9:13-18.
8 Leemiso 5:8y, “SHaaramuxa maccaasee heeri booppa; i keettaa penggiyaakko shiiqoppa” yaagees. Ha zoriyaa xaasayidi xeelliyoogan gakkiya daafabay issi shaaramuxa maccaasee keettaa mataara kanttanawu biida wodallabaa yootiya Leemiso shemppo 7n odettiis. Saˈay qammiis. Kalluwaa bessiya maayuwaa maayida, ogiyaa doonan eqqida issi maccaaseekko i biis. Maccaasiyaa a oyqqada yeraasu. I sheleeshsho haasayay i eqettana danddayibeenna iitabaa amottanaadan oottiis. Qassi eti shori baynnabaa hanidosona. He wodallay shori baynnabaa hananawu kase waayi qoppana. I akeekay paccido asa. Ubba qassi, i oottidobay a bolli daafabay gakkanaadan oottiis. Hegaa i akeekiyaakko maccaaseeppe baqatana!—Lee. 7:6-27.
9 Nuuni gakkiya daafabaa akeekennaagaappe denddidaagan he wodallaagaa mala akeeki paccidobaa oottana danddayoos. Leemisuwawu, televizhiiniyan hara saatiyan diggiyoobaa qammi qammi diggennan aggana danddayoosona. Issi issitoo nuuni dumma dumma xaabiyaa dooyikko shin? Woy qassi pokkobaa bessiyaabaa Intternneetiyan beˈanaadan shoobbiya sayttiyaa yuushshi qoppennan goˈettana danddayoos. Hegaa mala hanotay nuuni iitabaa amottanaadaaninne geeshsha gididi deˈanawu baaxetiyoogaa xaasayi xeellanaadan oottana danddayennee?
10 Geeshsha Maxaafay nuna maaddiyo hara ogee nuugaappe dummatiya mattumay deˈiyoogeetuura gayttiyo wode oottana koshshiyaabaa zoriyoogaa. (1 Ximootiyoosa 5:2 nabbaba.) He zoree lambbeechenna mala diggiyoogee qoncce. Issoti issoti issi uraa bochana xayikko, qaaqqatidi xeelliyoogee, qimˈˈotiyoogeenne hegaa malabay qohennabadan xeelloosona. SHin lambbeechiyoogee nagaraa oottanaadan denttettiya iita amuwaa amottanaadan oottana danddayees. Hegee kase haniis; zaarettidikka hanana danddayees.
Ayyaanaaban Alˈˈobaa
Geeshsha Maxaafay Inddaa Gaytettaabaa Woygii?
1 Inddaa gaytettay Yihoowa imota. Inddaa gaytettan azinaynne machchiyaa ufayttanaadan I koyees. He imotay azinaynne machchiyaa naata yelanaadan oottees; hegaa xalla gidennan, eti siiqettiyoogaa ufayssiya ogiyan bessanaadankka oottees. Xoossaa Qaalay, “Yelagatettan neeni ekkido ne maccaaseera ufaitta” giyoy hegaassa. (Leemiso 5:18, 19) Yihooway aqo oyqqida Kiristtaaneti bantta aqo laggiyawu ammanettanaadan koyiyo gishshawu, eti mule wodiraa laammokkona.—Ibraawe 13:4 nabbaba.
LAAPPUNE 24-30
XOOSSAA QAALAN DEˈIYA ALˈˈOBAA LEEMISO 6
Qaacuwappe Ay Tamaarana Danddayiyoo?
it-1 115 ¶1-2
Qaacuwa
‘Meretan Demmido Eraa.’ Qaacotussi deˈiya ‘eray’ eti tamaaridi woy yuushshi qoppidi demmidoba gidennan, Medhdhidaagee etawu immidoba. Geeshsha Maxaafay qaacoti ‘banttawu maanabaa bone minjjiyogaanne kattaa cakkiyo wode banttawu koshshiya kattaa shiishshiyogaa’ yootees. (Lee 6:8) Pilisxxeeme biittan deˈiya, qumaa shiishshiyogan keehi erettida qaaco qommotuppe issoy, qumaa demmanawu keehi wayssiya balgguwan maanawu, boniyaninne cahaa wodiyan daro kattaa shiishshidi minjjees. He qaacoy kattaa ayfee kumido, kattaa qoxxiyo awudiya heeran darotoo deˈees. He qaacoy I shiishshido kattaa iray moorikko, he kattay melanaadan awaa kessidi miccees. He qaacoy kattaa minjjiyo wode kattay caarennaadan humˈˈuwa kessirggees. Shiishshiya qaacotu citaa eti hemettido ogiyappenne eta penggen kuurettida kattaa suullaappe shaakki erana danddayoos.
Leemiso Gidiya Eeshshaa. Yaaniyo gishshawu, qaacotubaa qanttan beˈidobay, “inttenoo azallatoo, qaacotukko biite; biidi etappe tamaarite. Yaatidi aadhdhida eranchcha gidite” giya zoree keehi koshshiyaba gidiyogaa akeekissees. (Lee. 6:6) Eti sinttanawu kattaa minjjiyogaa xalla gidennan, eti doommidobaa polanawu keehi minni oottiyogee maalaalees. Eti banttappe naaˈˈu kushe deexxiyabaa tookkoosona woy goochchoosona, qassi harchchikko woy kunddikkokka guyye simmokkona. Eti hashetidi oottoosona, bantta keettaa geeshshatettaa naagoosona, qassi issi issitoo, qohettida woy daafurida qaacota tookkidi soo efiyogan issoy issuwawu qoppiyogaa bessoosona.
w00 9/15 26 ¶3-4
Intte Sunttaa Naagite
Qaacotugaadan nuunikka minnidi oottana bessees. Nuna kaalli xeelliya uri deˈin xayin nuuni minnidi oottiyogeenne nu oosuwan kaseppe gooba gidanawu baaxetiyogee nuuyyo keehi loˈˈo. Tamaare keettan gidin, qaxarettidi oottiyo sohuwan, woy haggaazuwan nuuni danddayido keenan loytti oottana bessees. Qaacoy minnidi oottiyogan goˈettiyogaadan nuunikka minnidi oottiyogan goˈettanaadan Xoossay koyees. (Eranchchaa 3:13, 22; 5:18) Minnidi oottiyogee nuussi geeshsha kahay deˈanaadaaninne nuuni ufayttanaadan maaddees.—Eranchchaa 5:12.
Solomoni azalla uri ba azallatettaappe beegottanaadan oottanawu naaˈˈu oyshata oychchiis: “Nenoo azallau, neeni aude gakkanaashin xiskkuutee? Ne xiskkuwaappekka aude dendduutee?” He azalla ura bochchidi haasayanawu Kawuwa Solomoni hagaadan giis: “Neeni qassikka guuttaa zin77aasa; guuttaa xiskkaasa; kushiyaa shiishsha ekkada, guuttaa shemppaasa. Yaatiyo wode hiyyeesatettai panggaadan, pacai ola miishshaa oiqqida asadan, ne bolli yaana.” (Leemiso 6:9-11) Azalla uri bonggottidi zinˈˈidaashin, hiyyeesatettay panggaadan, pacay ola miishshaa oyqqida asadan A bolli yaana. Azalla asa gaden agunttaynne sharafay eesuwan kumees. (Leemiso 24:30, 31) A zalˈˈee eesuwan gammaa mees. Azalla ura ootissiyagee A gamˈˈetenna. Qassi xannaˈanawu azalliya tamaaree timirttiyan gooba gidana danddayenna.
Ayyaanaaban Alˈˈobaa
ijwbq huuphe yohuwa 114 ¶2
“Woriya Laappun Nagarati” Deˈiyonaa?
‘Yihooway Shenetiyo Laappunbbata’ Geeshsha Maxaafay Yootii?
Ee, yootees. Leemiso 6:16y hagaadan gees: “[Yihooway] ixxiyo usuppun yohoti de7oosona; i shenetiyo yohoti ubba laappuna.” Shin, Leemiso 6:17-19n odettidabati asay qoppiyobaa, haasayiyobaanne oottiyobaa gujjin ubba qommo balabatussi denddo gididabata yootoosonappe attin, Yihooway ixxiyo ubbabata wurssi yootokkona.
LAAPPUNE 31–HOSPPUNE 6
XOOSSAA QAALAN DEˈIYA ALˈˈOBAA LEEMISO 7
Paacciya Hanotatuppe Naagettite
“Ne Akeekan Zemppoppa”
16 Paaciyaa xoonanau woosay keehippe koshshiyaaba gidikkonne, bessiya wodiyan woossana koshshiyoogaa nuuni akeekana bessees. Leemiso 7:6-23n odettida issi yelaga naˈaabaa qoppa. Saˈay qammanau lankkilankkiyo wode, shaaramuxa maccaasiyaa deˈiyoosaa eriiddi yaa biis. Ba liiqo inxxarssan sheleeshshada a cimmin cimettidi, shuhau biya booraadan i geeduwaa kaallidi biis. He yelagay he sohuwaa aybissi biidee? I iita amuwaara baaxetiiddi deˈiya, wozanaa kunttibeenna, “keehi eeyya” gidiyo gishshataassa gidennan aggenna. (Lee. 7:7) Woosay a keehi maaddanay awudeeshin? Paacee gakkiyo wode awudenne hegaa xoonanau woossiyoogee maaddana danddayiyoogee qoncce. SHin, i woossana bessiyo keehi loˈˈo wodee, i heeri baanau koyro qoppiyo wode gidanau koshsheesishin.
Geeshsha Gididi Deˈana Danddayoos
8 Leemiso 5:8y, “SHaaramuxa maccaasee heeri booppa; i keettaa penggiyaakko shiiqoppa” yaagees. Ha zoriyaa xaasayidi xeelliyoogan gakkiya daafabay issi shaaramuxa maccaasee keettaa mataara kanttanawu biida wodallabaa yootiya Leemiso shemppo 7n odettiis. Saˈay qammiis. Kalluwaa bessiya maayuwaa maayida, ogiyaa doonan eqqida issi maccaaseekko i biis. Maccaasiyaa a oyqqada yeraasu. I sheleeshsho haasayay i eqettana danddayibeenna iitabaa amottanaadan oottiis. Qassi eti shori baynnabaa hanidosona. He wodallay shori baynnabaa hananawu kase waayi qoppana. I akeekay paccido asa. Ubba qassi, i oottidobay a bolli daafabay gakkanaadan oottiis. Hegaa i akeekiyaakko maccaaseeppe baqatana!—Lee. 7:6-27.
Xoossawu Yayyiyoogan Ubbatoo Goˈetta
10 Bessenna inddaa gaytettay issi uri yeellatanaadan, pattenna asadan bana xeellanaadan, koyennan shaaranaadaaninne so asay laalettanaadan oottana danddayees. Eeyya maccaasee shoobiyaa ekkennan aggiyoogee eratetta gidiyoogee qoncce. Pokkobaa oottiya daroti eti Yihoowaara dabbotido dabbotay moorettiyoogaa xalla gidennan, worana danddayiya harggiyan oyqettoosona. (Lee. 7:23, 26) SHemppo 9 paydo 18y hagaadan giidi kuuyees: ‘I imattati duufo giddon deˈoosona.’ Yaatin, azzanttiyaabaa kaalettiya I shoobiyaa daroti ekkiyoy aybissee?—Lee. 9:13-18.
Ayyaanaaban Alˈˈobaa
w00 11/15 29 ¶1
“Ta Azazota Naagidi Deˈuwan Deˈite”
Solomoni, “[ta azazota] ne biradhdhetun qachcha; ne wozanankka xaafa” yaagiis. (Leemiso 7:3) Biradhdheti nu sinttaappe geemmennaagaadaaninne nu qoppidobaa oottanawu maaddiyogaadan, Xoossaa qaalaappe demmiyo timirtteenne eray nu oottiyo ubbaban kaaletteesinne nuna hassayissees. Hegeeta nu bollaa kifiletudan meeze oottiyogan ubbatoo nu wozanan xaafana koshshees.
HOSPPUNE 7-13
XOOSSAA QAALAN DEˈIYA ALˈˈOBAA LEEMISO 8
Yesuusa Aadhdhida Eratettaappe Tamaarite
cf 131 ¶7
‘Taani Aawaa Siiqays’
7 Paydo 22n, aadhdhida eratettay hagaadan gees: “[Yihooway] tana ba ooso ubbaappe koiro medhdhiis; benippekka a oosuwau doomettai tana.” Aadhdhida eratettay ‘merettibeenna’ gishshawu, ha xiqisee aadhdhida eratettaappe dariyabaa yootees. Yihooway merinawu deˈiyagaanne ubbatookka aadhdhida eranchcha gidiyo gishshawu, A aadhdhida eratettawu doomettay baawa. (Mazamure 90:2) Shin Xoossaa Naˈay, “merettidabaa ubbaappe aadhdhiya baira.” I Yihooway medhdhido ubbabaappe koyro merettiis. (Qolasiyaasa 1:15) Leemiso maxaafay yootiyogaadan saˈaappenne saluwappe kase Naˈay deˈees. Qaalaa geetettida Yesuusi Xoossaa kalˈˈatiyo gishshawu, Yihoowa aadhdhida eratettaa loytti qonccissees.—Yohaannisa 1:1.
cf 131-132 ¶8-9
‘Taani Aawaa Siiqays’
8 Xoossaa Naˈay saˈaa yaanaappe kase, keehi adussa wodiyawu ay oottiiddi takkidee? Paydo 30y yootiyogaadan, I he wode Xoossaa matan “waanna oosanchcha.” Hegee woygiyogee? Qolasiyaasa 1:16y hagaadan gees: “Ubbabaikka aani merettiis; . . . saluwaaninne sa7an de7iya ubbabaikka aaninne ayyo merettiis.” Yaaniyo gishshawu, mereta ubbaa Medhdhida Yihooway, Waanna Oosanchcha gidida ba Naˈaa baggaara hara meretata ubbaa hegeetikka, saluwan deˈiya ayyaana meretata, keehi gita gidida salo gufanttuwan deˈiya ayfiyan beettiya meretata, saˈan deˈiya malaaliya dumma dumma meedoosatanne dozata, qassi mereta ubbaappe dummatiya asaa medhdhiis. Aawaynne Naˈay hashetidi oottiyo hanotay, manddisee gimbbiya keexxiya uraara issippe oottiyogaara amaridaban issi mala. Manddisee halchchuwa kessin, gimbbiya uray he halchchuwa kaallidi keexxees. Nuuni issi meretaa beˈidi keehi maalaalettiyo wode, hegaa halchchuwa kessida Xoossaa bonchchoos. (Mazamure 19:1) Shin, Medhdhidaageenne ‘waanna oosanchchay’ daro layttawu ufayssan hashetidi oottidoogaa hassayoos.
9 Nagaranchcha gidida naaˈˈu asati issippe oottiyo wode, issi issitoo maayettanawu metootana danddayoosona. Shin, Yihoowaynne A Naˈay hegaa mala gidokkona! Naˈay zawi baynna layttawu ba Aawaara oottiis; qassi ‘ubba gallassi, A sinttan ufayttays’ yaagiis. (Leemiso 8:30) Ee, Naˈay ba Aawaara oottiyogan ufayttiis; Aawaykka keehi ufayttiis. Naˈay Xoossaa eeshshaa tamaariyogan kaseegaappe aaruwan ba Aawaa milatiis. Hegaa gishshawu, Aawaanne Naˈaa siiqoy keehi minnidoogee aynne maalaalissenna! Salo gufanttuwan etaagaa mala adussa wodiyawu deˈida keehi mino siiqoy baawa.
w09 4/15 31 ¶14
Gita Daawitanne Gita Solomona Gidida Yesuusa Loyttidi Akeekiyoogaa
14 Aadhida eratettan Solomonappe aadhiyay issi asa xalla. Hegee bana: “Solomonappekka aadhdhiyaagee hagan de7ees” yaagida Yesuus Kiristtoosa. (Maatiyoosa 12:42) Yesuusi ‘merinaa deˈuwaa qaalaa’ yootiis. (Yohaannisa 6:68) Leemisuwau, Deriyaa bolla Timirttee Solomona leemisotuppe amaridaageetu baaso siraataa aahuwan qonccisseesinne loytti akeekanaadan maaddees. Yihoowayyo goynniya urassi ufayssaa demissiya darobaa Solomoni yootiis. (Leemiso 3:13; 8:32, 33; 14:21; 16:20) Yihoowayyo goynniyoogaaranne Xoossay qaalaa gelidobay polettiyoogaara gayttidaagan tumu ufayssay beettiyoogaa Yesuusi qonccissiis. I: “Bantta ayyaanan hiyyeesa gididoogaa eriyaageeti anjjettidaageeta [“ufayttiyaageeta,” NW]; aissi giikko, saluwaa kawotettai etassa” yaagiis. (Maatiyoosa 5:3) Yesuusa timirttee oyqqido baaso siraatata oosuwan peeshshiyaageeti ‘deˈuwaa pulttoy a achan deˈiyo’ Yihoowakko shiiqoosona. (Mazamure 36:9; Leemiso 22:11; Maatiyoosa 5:8) Kiristtoosi ‘Xoossaa aadhida eratettau’ leemiso gidiis. (1 Qoronttoosa 1:24, 30) Mase Kawo gidiyoogaadan, Yesuus Kiristtoosau ‘aadhida eratettaa ayyaanay’ deˈees.—Isiyaasa 11:2.
Ayyaanaaban Alˈˈobaa
Aadhdhida Eratettiyaa Xeesawusu
1 DARO biittatun asay corattiyoosan ufayttiiddi nu ishanttinne michchontti asawu xuufiyaa immiyoogaa beˈiyoogee meeze gididaba. Neenikka hegaadan oottennan aggakka. Qassi, asay maaddiya zoriya siyana mala dabaaban ba qaalaa xoqqu oottidi xeesiya aadhdhida eratettaabaa yootiya, Leemiso maxaafan deˈiya xiqisiyaabaa neeni qoppanaadan hagee oottennan aggenna. (Leemiso 1:20, 21 nabbaba.) Geeshsha Maxaafaynne nu xuufeti ‘aadhdhida eratettaabaa,’ hegeekka Yihoowa aadhdhida eratettaabaa yootoosona. Asay merinaa deˈuwaa demmana mala ha aadhdhida eratettay keehi koshshiyaaba. Issi uri nu xuufetuppe issuwaa ekkiyo wode keehi ufayttoos. SHin ekkiyay ubba asaa gidenna. Amaridaageeti Geeshsha Maxaafay yootiyoobaa siyanawu koyokkona. Harati qassi nu bolli miiccoosona. Eti Geeshsha Maxaafay ha wodiyawu hanennaba giidi qoppoosona. Geeshsha Maxaafaa zoriyaa kaalliyaageeta meqetti baynnaageeta woy haratu bolli pirddiyaageeta giidi eti qoppoosona. Gidikkonne, Yihooway ba aadhdhida eratettaa asa ubbawu siiquwan yootiyoogaa aggibeenna. I hegaadan waati oottii?
2 Issi ogee, Yihooway ba Qaalaa, Geeshsha Maxaafaa ubba asay demmanaadan oottiyoogaana. Geeshsha Maxaafaa qofay deˈiyo nu xuufetubaa shin? Nu xuufeti 1,000ppe dariya qaalan deˈiyo gishshawu nuuni Yihoowa galatoos. Hegaa siyiyaageeti, nabbabiyaageetinne oosuwan peeshshiyaageeti goˈettana. Gidikkonne, daro asay Yihooway yootiyoobaa siyennan agganawu kuuyiis. Eti issibaa kuuyiyo wode, banttanan ammanettoosona woy bantta mala asay yootiyoobaa siyoosona. Nuuni Geeshsha Maxaafay yootiyoobaa kaalliyo gishshawu eti nuna toochchoosona.
Ne Ammaniyobaa Qonccissiyogaa
Haasayaa. ijwbq huuphe yohuwa 160—Cuccumaa: Yesuusi Xoossaa Naˈaa Geetettiyoy Aybissee?
Geeshsha Maxaafay yootiyoobaa
Geeshsha Maxaafay Yesuusa darotoo “Xoossaa Na7aa” yaagees. (Yohaannisa 1:49) “Xoossaa Na7aa” giya qofay, Xoossay Yesuusa deˈuwaa gujjin, deˈo ubbaa Pultto gidiyoogaa bessiyaaba. (Mazamure 36:9; Ajjuutaa 4:11) Geeshsha Maxaafay Xoossay aawa gididoy issi asi naata yeliyoogaa mala geenna.
Geeshsha Maxaafay kiitanchchatakka “Xoossaa naata” yaagees. (Iyyooba 1:6, NW) Geeshsha Maxaafay koyro bitaniyaa, Addaamakka hegaadan “Xoossaa na7aa” yaagees. (Luqaasa 3:38) SHin Yesuusi Xoossay koyro medhdhidoogaa, qassi Xoossay barkka medhdhidoy A xalaalaa gidiyo gishshawu, Geeshsha Maxaafay Yesuusa Xoossawu bayra Naˈa yaagees.
Yesuusi saˈan yelettanaappe kase saluwan deˈidee?
Yesuusi saˈaa yaanaappe kase ay oottidee?
Yesuusi saˈan yelettanaappe kase saluwan deˈidee?
Ee. Yesuusi asa gididi saˈan yelettanaappe kase saluwan ayyaana mereta gididi deˈiis. Yesuusi, ‘Taani saluwaappe yaas’ yaagiis.—Yohaannisa 6:38; 8:23.
Xoossay hara ubbabaa medhdhanaappe kase Yesuusa medhdhiis. Yesuusa xeelliyaagan Geeshsha Maxaafay hagaadan gees:
● “I merettidabaa ubbaappe . . . baira na7aa.”—Qolasiyaasa 1:15.
● I “Xoossai medhdhidobau [koiro].”—Ajjuutaa 3:14.
“Au denddoi beniisappe doommidi, merinaappe” gidido uraabaa yootiya hiraagay Yesuusan polettiis.—Mikiyaasa 5:2; Maatiyoosa 2:4-6.
Yesuusi saˈaa yaanaappe kase ay oottidee?
Yesuusi saluwan gita bonchchuwan deˈiis. Yesuusi, “Aawau, . . . kase ne matan taayyo de7iya bonchchuwan ne sinttan tana bonchcha” yaagidi woossido wode, kase bawu deˈiya he maataabaa yootiis.—Yohaannisa 17:5.
I ba Aaway ubbabaa medhdhiyo wode maaddiis. Yesuusi “waanna oosanchcha” gididi Xoossaara issippe oottiis. (Leemiso 8:30) Yesuusa xeelliyaagan Geeshsha Maxaafay, “Saluwaaninne sa7an de7iya ubbabaikka aaninne ayyo merettiis” yaagees.—Qolasiyaasa 1:16.
Xoossay hara ubbabaa Yesuusa baggaara medhdhiis. He merettidabati ayyaana meretata ubbaa, qassi saluwaanne saˈaa. (Ajjuutaa 5:11) Xoossaynne Yesuusi issippe oottiyo hanotay, manddisee gimbbiya uraara issippe oottiyoogaara amaridaban issi mala. Manddisee pilaaniyaa kessin, gimbbiya uray he pilaaniyaa kaallidi keexxees.
I Qaalaa gididi oottiis. Geeshsha Maxaafay Yesuusi asa gidanaappe kase deˈido deˈuwaabaa yootiiddi, I ‘Qaalaa’ yaagees. (Yohaannisa 1:1) Hegee Xoossay hara ayyaana meretatussi ba qofaanne kaaletuwaa ba Naˈaa baggaara gattiyoogaa bessiyaaba gidiyoogee qoncce.
Yesuusi saˈan deˈiya asawukka Xoossaa Doona gididi oottennan aggenna. Xoossay Yesuusi ayyo Qaala gidin, Edene gannatiyan Addaamessinne Hewaanissi kaaletuwaa yootennan waayi aggana. (Doomettaabaa 2:16, 17) Beni Israaˈeelati I yootiyoobaa wozanappe azazettanaadan odettida, bazzuwan eta kaalettida kiitanchchay Yesuusa gidennan aggenna.—Kessaabaa 23:20-23.
HOSPPUNE 14-20
XOOSSAA QAALAN DEˈIYA ALˈˈOBAA LEEMISO 9
Eranchcha Asa Gidite, Qilliicciya Asa Gidoppite
“Aadhdhida Eranchchai Odiyoobaa Siya”
4 Nuuyyo issi uraappe sittan imettiya zoriyaa siyiyoogeenne oosuwan peeshshiyoogee metiyaaba gidana danddayees. Ubba qassi nuuni yiillotana danddayoos. Aybissi? Nuuni nagaranchcha gidiyoogaa erikkonne, nuuni oottido moorobaa issi uri sittan nuuyyo yootiyo wode zoriyaa ekkiyoogee metiyaaba gidana danddayees. (Eranchchaa 7:9 nabbaba.) Nuuni gaasoyana danddayoos. Nuuni nuna zorida uraa sirana danddayoos woy I zoriyaa immido ogee nuna yiilloyana danddayees. Nuuni nuna zorida uraa hagaadan giidi borana danddayoos: ‘I tana zorana koshshenna! Ikka moorobaa oottees!’ Qassi nuuni imettida zoriyaa dosana xayikko, nuuni hegaa xaasayana woy nuuni siyanawu koyiyoobaa yootana giidi qoppiyo hara ura zoriyaa oychchana danddayoos.
“Aadhdhida Eranchchai Odiyoobaa Siya”
12 Zoriyaa siyanaadan nuna aybi maaddana danddayii? Nuuni nagaranchcha gidiyoogaanne issi issitoo eeyyabaa oottana danddayiyoogaa hassayiyoogan nuna ziqqi oottana koshshees. Nuuni qommoora beˈidoogaadan, Iyyoobi kase balabaa qoppiis. Guyyeppe I ba qofaa laammido gishshawu Yihooway A anjjiis. Aybissi? Iyyoobi bana ziqqi oottido gishshataassa. Eelihu appe yelaga gidikkonne, Eelihu immido zoriyaa siyiyoogan I bana ziqqi oottiya asa gidiyoogaa bessiis. (Iyy. 32:6, 7) Hegaadankka, nuuni nuussi zoree koshshenna giidi qoppiyo wode woy zoriyaa immiyaagee nuuppe yelagiyo wodekka he zoriyaa oosuwan peeshshanaadan nuna ziqqi oottiyoogee maaddees. Kanaadan deˈiya issi cimay hagaadan giis: “Nuna ooninne zorana xayikko ayyaanaaban diccanawu nuuni keehi metootoos.” Nuuni ubbay ayyaana ayfiyaa kaseppe aaruwan ayfiyaageetanne mishiraachchuwaa sabbakiyoogaaninne tamaarissiyoogan qara gidana koshshees.—Mazamure 141:5 nabbaba.
13 Neessi imettiya zoriyaa Xoossay nena siiqiyoogaa bessiyaabadan xeella. Yihooway nuussi keehi loˈˈobaa qoppees. (Lee. 4:20-22) I ba Qaalaa baggaara, Geeshsha Maxaafaa qofay deˈiyo xuufiyaa baggaara, woy kayma Kiristtaaniyaa baggaara nuna zoriyo wode, nuna siiqiyoogaa bessees. Ibraawe 12:9, 10y yootiyoogaadan, “Xoossai . . . nuna maaddanau qaxxayees.”
14 Zoree imettido ogiyaa gidennan, zoriyaa qoppa. Nuuni issi issitoo zoree nuussi likke ogiyan imettibeenna giidi qoppana danddayoos. Zoriyaageeti siyanawu ufayssiya ogiyan zoranawu baaxetana koshshees. (Gal. 6:1) SHin zoree imettiyoy nuussa gidikko, zorida uri nuna loˈˈo ogiyan zoribeenna giidi nuuni qoppikkokka zoriyan xeelaa wottana koshshees. Nuna hagaadan oychchana danddayoos: ‘Zoree imettido ogiyaa taani dosana xayikkonne, odettidabay tumee? Taani zoriyaa immida ura balaa aggabayada he zoriyan goˈettana danddayiyaanaa?’ Nuuyyo imettiya zoree ayba gidikkonne, zoriyan goˈettiyo ogiyaa koyiyoogee loˈˈoba.—Lee. 15:31.
w01 5/15 30 ¶1-2
‘Aadhdhida Eratettay Nu Bariya Adussana’
Aadhdhida eranchcha uri seeray imettiyo wode zaariyobay qilliicciya uraagaappe keehi dummatees. Solomoni hagaadan giis: “Aadhdhida eranchcha uraa zora; zorikko i nena siiqana. Aadhdhida eranchcha uraa tamaarissa; yaatikko, i kaseegaappekka aadhdhida eranchcha gidana.” (Leemiso 9:8b, 9a) Eranchcha uri, ‘seeray haˈˈissawu yiilloyiyabanne ufayssennaagaa gidikkonne guyyeppe he seeray xillotettaa deˈuwanne sarotettaa woytuwa’ demissanaagaa erees. (Ibraawe 12:11) Zoree ufayssennaba milatikkonne, hegaa ekkiyogee nuna aadhdhdida eranchcha kessiyaba gidikko, zoriya ixxana bessenna.
Solomoni gujjidi hagaadan giis:“Xillo uraakka tamaarissa; yaatikko i eraa gujjana.” (Leemiso 9:9b) Keehi eranchcha woy cima urikka ubbatoo tamaarana koshshees. Keehi cimidaageetikka tumaa tamaaridi banttana Yihoowawu sheedhdhiyogaa beˈiyogee keehi ufayssiyaba! Yaanikko, nuunikka ubbatoo tamaaranawunne aadhdhida eratettaa demmanawu giigetti uttidaageeta gidoos.
w01 5/15 30 ¶5
‘Aadhdhida Eratettay Nu Bariya Adussana’
Aadhdhida eratettaa demmanawu nuuni huuphiyan huuphiyan baaxetana koshshees. Hegaa xeelliyagan Solomoni hagaadan giis: “Neeni aadhdhida eranchcha gidikko, ne huuphiyau go7ettaasa. Neeni qilliicciyaagaa gidikkokka, ne huuphiyau qohettaasa.” (Leemiso 9:12) Aadhdhida eranchcha uri goˈettees; shin qilliicciya uri qohettees. Qassi nuuni nu zeriyobaa cakkoos. Yaakko nuuni, “aadhdhida eratettaa” loyttidi ezggiyageeta gidoos.—Leemiso 2:2.
Ayyaanaaban Alˈˈobaa
Xoossawu Yayyiyoogan Ubbatoo Goˈetta
9 Bessenna inddaa gaytettaappe nuuni naagettana koshshiyo loˈˈo gaasoy deˈees. Ha ‘eeyya maccaasiyaa’ hagaadan gidoogee odettiis: “Wuuqqidi uyiyo haattai mal77ees.” “Wuuqqidi uyiyo haattai” ay qonccissii? Geeshsha Maxaafay azinaynne machchiyaa inddan gayttiyoogaa gazddissiya haattan leemisees. (Lee. 5:15-18) Higgiyaa maaran aqo oyqqida azinaynne machchiyaa inddan gayttiyoogan ufayttana danddayoosona. SHin hegee ‘wuuqqidi uyiyo haattappe’ keehi dummatees. Wuuqqidi uyiyo haattay bessenna inddaa gaytettaa qonccissana danddayees. Kaysoy qosan wuuqqiyoogaadan, pokkobaa oottiya asati hegaa genttanawu maloosona. Eti oottiyoobaa ooninne erennabadan qoppiyaaba gidikko, “wuuqqidi uyiyo haattai” malˈˈiyaaba milatana danddayees. Yihooway ubbabaa beˈiyo gishshawu, eti banttana cimmoosona. Yihoowan sabettennan aggiyoogaappe aaruwan iitabi baawa; hegaa gishshawu he azzanttiyaabay malˈˈenna.—1 Qor. 6:9, 10.
HOSPPUNE 21-27
XOOSSAA QAALAN DEˈIYA ALˈˈOBAA LEEMISO 10
Ufayssiya Deˈuwa Waati Demmana Danddayiyoo?
w01 7/15 25 ¶1-3
‘Xillo Uri Anjjettees’
Xillo uri hara ogiyankka anjjettees. “Azallatettai hiyyeesissees; shin minnidi oottiyoogee dureyees. Aadhdhida eranchcha urai kattaa boniyan shiishshees; shin kattaa cakkiyo wode xiskkiya urai kauyyees.”—Leemiso 10:4, 5.
Solomoni kattaa shiishshiyageetubaa yootidobay keehi maaddees. Kattaa cakkiyo wodee xiskkiyo wode gidenna. Hegee minnidi adussa saatiya oottiyo wode. Hegee tumukka eesoyiya wode.
Yesuusi kattaa gidennan, asaa shiishshiyogaabaa qoppidi bana kaalliyageetussi hagaadan giis: “Cahawu gakkida kattay daro; shin oosanchchati guutta. Hegaa gishshawu, kattaa cakkanawu oosanchchata kiittana mala, cahaa oosuwa Godaa [Yihoowa] woossite.” (Maatiyosa 9:35-38) Godaa Kahuwa bonchchanawu 2000 M.Ln 14 miiloone asay shiiqiis; qassi hegee Yihoowa Markkatuppe naaˈˈu kushe darees. Yaaniyo gishshawu, “kattay bootidi cahawu gakkidoogaa” kashi giya asi baawa. (Yohaannisa 4:35) Tumuppe Yihoowawu goynniyageeti bantta woosaara maayettiya ogiyan erissiyo ashkkara oottiyo oosuwa minni oottiiddi, Goday oosanchchata kiittanaadan woossoosona. (Maatiyosa 28:19, 20) Yihooway eta oosuwa darissidi anjjiis. Haggaazo layttaa 2000n, haattan muukettida oorattati 280,000ppe daroosona. He oorattatikka Xoossaa Qaalaa tamaarissanawu minnidi oottoosona. Simi yaakko erissiyo ashkkara oottiyo oosuwa nuuyyo danddayettida keenan oottiyogan ha cahaa wodiyan ufayttiyageeta gidoos.
w01 9/15 24 ¶3-4
‘Suure Ogiyan’ Hemettite
Xillotettay keehi koshshiyaba gidiyogaa Solomoni hagaadan giidi yootiis: “Duriyaa miishshai direttida katamaadan, ba godaa naagees; shin hiyyeesatettai hiyyeesaa xaissees. Xillo uraa a lo77o oosoi de7uwau kaalettees; shin iita uraa wurssettai qixaate.”—Leemiso 10:15, 16.
Direttida kataman deˈiyageeti amarida ogiyan hirggennaagaadan, duretettaykka deˈuwan gakkiya issi issi metotuppe ashshana danddayees. Qassi hiyyeesa asi ba deˈuwan qoppibeennabay gakkiyo wode metootana danddayees. (Eranchchaa 7:12) Shin, Solomoni duretettaykka hiyyeesatettaykka gattana danddayiyo qohoy deˈiyogaa malaatennan aggenna. Dure asi ba aquwa “mino dirssaadan” qoppidi ba duretettan muleera ammanettana danddayees. (Leemiso 18:11) Qassi hiyyeesa asi ba hiyyeesatettaappe denddidaagan sinttappe bawu hidooti baa giidi balan qoppana danddayees. Hegaa gishshawu, naaˈˈankka Xoossay ufayttenna.
it-1 340
Anjjuwa
Yihooway Asaa Anjjees. “[Yihoowa] anjjoi dure kessees; i he duretettan meto walakkenna.” (Lee. 10:22) Yihooway ba siiqiyogeeta naagiyogan, kaalettiyogan, etawu ushachchanaadaaninne hirattanaadan oottiyogan, qassi etawu koshshiyabaa kunttiyogan eta anjjees.
Ayyaanaaban Alˈˈobaa
Denddoy Xoossaa Siiquwaa, A Aadhdhida Eratettaanne Danddayaa Qonccissees
12 Leemiso 10:22y, “GODAA anjjoi dure kessees; i he duretettan meto walakkenna” giyoogee tuma gidiyoogaa Xoossaa Kawotettaa haaruwan ubba asay akeekana. Yihoowa ayyaanay maaddin, Xoossaa asay yaa gujji gujji Kiristtoosa milatananne wottiyoobi baynna asa gidana. (Yoh. 13:15-17; Efi. 4:23, 24) Qassi galla galla eta bollay yaa gujji gujji minnananne eti loˈˈo asa gidana. He wodee keehi ufayssiya wode gidana!—Iyy. 33:25.
HOSPPUNE 28–UDDUFUNE 4
XOOSSAA QAALAN DEˈIYA ALˈˈOBAA LEEMISO 11
Hagaa Malabaa Haasayoppite!
w02 5/15 26 ¶4
Suuretettay Xillota Kaalettees
Suuretu xillotettay harata maaddees; shin iitatu makkala oosoy harata qohees. Solomoni hagaadan giis: “Xoossaa kaddida asi ba doonan asa xaissees; shin xilloti eran kessi ekkoosona.” (Leemiso 11:9) Sunttaa mooriyogee, zigirssay, iitanne yeda haasayay harata qohiyogee qoncce. Shin xillo ura haasayay, geeshsha, loytti qoppidoogaanne keha. Hegaa mala uri A mootiyageeti worddanchcha gidiyogaa ba suuretettan bessiyo gishshawu, eran I kessi ekkees.
w02 5/15 27 ¶2-3
Suuretettay Xillota Kaalettees
Kataman deˈiya Suuretettaa kaalliya asati hegan deˈiya hara asaa minttettoosona; qassi eti sarotettaanne woppaa demmanaadan oottoosona. Hegaa gishshawu, he katamay dicceesinne duretees. Shin, sunttaa mooriya, qohiyanne worddobaa haasayiyageeti kataman shabbirssay, azzanoy, issippetettaa xayoynne metoy daranaadan oottoosona. Ubbakka hegaa mala asatussi maatay deˈikko hegaa mala metoy merettiyogee attenna. Hegaa mala kataman shoray xayees, mattaayee darees, kanddoy moorettees, qassi geella duussaykka qaxiwatana danddayees.
Leemiso 11:11n odettida maaray kataman leemisettida galchchatun issippetettan deˈiya Yihoowa asawukka hanees. Ayyaanaaban minonne suure asati deˈiyo galchchay ufayssiyagaa, minttettiyagaa, issoy issuwa maaddiyagaanne Xoossaa bonchchissiyagaa gidees. Hegaa mala galchchaa Yihooway anjjees; yaatin ayyaanaaban diccees. Galchchan issibay oosettiyo ogiya xeelliyagan haratussi iitabaa haasayiya, lancciya, zuuzummiyanne boriya amaridaageeti “marzziyan asa waissiya camo mittadan” loddan loddan harata qohana danddayoosona. (Ibraawe 12:15) Hegaa mala asati darotoo xoqqa maataanne bonchchuwa koyoosona. Eti galchchay woy cimati asaa naaqqoosona, zariyan zaggoosona, woy hegaa mala hara metoy deˈees giidi zigiroosona. Eta haasayay galchchaa giddon shaahotaa medhdhana danddayees. Nuuni eta haasayaa siyennan ixxiyogaaninne ayyaanaaban minniyogan galchchaa sarotettawunne issippetettawu baaxetana koshshees.
Haasayanawu Bessiya Wodee Awudee?
12 Issi ishay woy issi michchiyaa eti hara asawu yootana koshshennabaa erikko, neeni waatuutee? Leemisuwawu, nu oosoy muleera teqettido biittan deˈiya issi uraara neeni gayttikko, nu oosoy he biittan waani oosettiyaakko ubbabaa oychchanawu maluutee? Neeni eta qohanawu koyada oychchennaagee qoncce. Nuuni nu ishantta siiqiyo gishshawu, eta gakkiyaabaa eranawu koyoos. Qassi nuuni etawu woossiyo wode, shaakki eridobaa woossanawu koyoos. SHin, hegaa mala wodiyan nuuni haasayiyooban naagettidi coˈˈu gaana koshshees. Nuuni he ishay xuurabaa odanaadan iisettikko, A siiqennaagaa bessoos. Nuuni he biittan deˈiya ishanttanne michchontta siiqennaagaakka bessoos; ayssi giikko, he ishay yootiyoobay eti qohettanaadan oottana danddayees. Nu oosoy muleera teqettido biittan deˈiya ishanttunne michchonttu metoy yaa daranaadan koyiya uri nu giddon baynnaagee qoncce. Qassi, nuuni hegaa mala biittatun haggaazikko, yan deˈiya Yihoowa Markkatu haggaazuwaa woy ayyaanaabaa oosuwaa xeelliyaagan ubbabaa yootanawu koyokko.
13 Cimati Leemiso 11:13n deˈiya maaraa oosuwan peeshshiyoogee keehi koshshiyaaba. (Nabbaba.) Eti xuurabaa erana bessenna urawu yootokkona. Hegee aqo oyqqida cimawu paacciyaaba gidana danddayees. Aqo oyqqidaageeti bantta qofaa, banttawu siyettiyaabaanne banttana unˈˈissiyaabaa darotoo issoy issuwaara haasayiyoogee eta aqo deˈoy minnanaadan oottees. SHin issi cimay gubaaˈiyan deˈiyaageetu “xuuraa” yootana bessennaagaa akeekees. I yootikko, harati an ammanettokkona, qassi A loˈˈo sunttay moorettana. Gubaaˈiyan aawatettay deˈiyoogeeti “naa77a haasayennaageeta” woy cimmennaageeta gidana koshshees. (1 Xim. 3:8) Hegaa giyoogee eti cimmana woy zigirana koshshenna giyoogaa. Issi cimay ba keettayiyo siiqikko, A erana koshshennabaa iyyo yootenna.
Ayyaanaaban Alˈˈobaa
g20.1 11, saaxiniya
KEHIYOOGEE NEENI DARIN UNˈˈETTENNAADAN MAADDANA DANDDAYEES
“Keha asi baassi lo77obaa oottees; shin meqettaa iita asi bana qohees.”—LEEMISO 11:17.
Overkaming Isttires giyo maxaafan, “Kehiyoogan Unˈˈettiyoogaa Xayssa” giya issi shemppoy deˈees. He maxaafaa xaafida, Tim Kantafar giyo dottoree yootidoogaadan, harata kehatettan oyqqiyoogee payya gidanaadaaninne ufayttanaadan oottana danddayees. Hara baggaara qassi, kehenna woy meqettaa iita ura harati dosennanne appe haakkiyo gishshawu, I ufayttenna. Nu huuphessi kehiyoogankka unˈˈettiyoogaappe woppaa demmana danddayoos. Leemisuwawu, keehi deexxiyaabaa woy danddayettennabaa nuuni nuuppe naagana koshshenna. Woy qassi nuuni nuna keehi ziqqi oottana woy karana koshshenna. Yesuusi, “Neeni ne shooruwaa ne huuphedan siiqa” yaagiis.—Marqqoosa 12:31.