Naati Bantta Huuphiyaa Kawushshanaadan Tamaarissite

METIYAABAA

• Intte naꞌay otorettees; shin awu layttay biron tamma!

• I bana asa ubbay dummayidi xeellanaadan koyees.

Intte hagaadan qoppeeta: ‘I hegaadan haniyoy aybissee? Taani i babaa loꞌꞌobaa qoppanaadan koyays; shin i ubba asaappe aadhiyaabadan qoppanaadan koyikke!’

Naꞌi bana laafa asadan xeellennan ba huuphiyaa kawushshanaadan tamaarissana danddayettii?

INTTE ERANA BESSIYAABAA

Mata wodeppe haa simmin, aawatussinne aayotussi eti bantta naati koyiyoobaa ubbaa oottanaadan, galatana bessiyaabaa eti oottana xayikkonne, coo galatanaadan, qassi naata seerennaadaaninne qaxxayennaadan odettees. Naati banttana dumma asadan qoppanaadan oottikko, eti banttana bessiyaagaadan bonchidi diccoosona giidi qofettees. SHin hanotay ay bessii? Jenereshin Mi giyo maxaafay hagaadan gees: “Bana bonchanaadan denttettiyoogee wozannaamanne ufayttiya naati daranaadan gidennan, banttana sabbiya naati daranaadan oottiis.”

Daro naati coo galatin diccido gishshawu hidootaa qanxxissiyaabay merettiyo wode, eta asi boriyo wodenne issi issitoo qoppidobay polettennan attiyo wode ammanidi ekkokkona. Eti banttabaa xallaa qoppanaadan tamaarido gishshawu gasttiyo wode asaara maayettidi deꞌanawu metootoosona. Hegaappe denddidaagan, etappe daroti hirggoosonanne unꞌꞌettoosona.

Naati banttana tumuppe bonchanaadan oottiyay eti issibaa poliyoogaappe attin, dumma asa gididabadan etawu ubbatoo yootiyoogaa gidenna. Hegawu banttanan ammanettiyoogaappe aadhiyaabay koshshees. Eti issi issi hiillaa tamaarana, meezetananne kaseegaappe loytti erana bessees. (Leemiso 22:29) Qassi eti hara asawu koshshiyaabaa qoppana bessees. (1 Qoronttoosa 10:24) Hegaa ubbaa oottanawu eti bantta huuphiyaa kawushshana koshshees.

INTTE OOTTANA DANDDAYIYOOBAA

Galatana bessiyo wode galatite. Intte naꞌiyaa timirtte keettaa paaciyan loꞌꞌo markkiyaa demmikko, o galatite. A demmido markkee guutta gidikko, coo asttamaariyan gaasoyoppite. Hegee intte naꞌiyaa ba huuphiyaa kawushshanaadan maaddenna. A haroode loꞌꞌo markkiyaa waata demmana danddayiyaakko akeekanaadan maaddite. Loꞌꞌobaa oottiyo wode galatite.

Bessiyo wode seerite. Hegaa giyoogee eti mooro wode ubban borana koshshees giyoogaa gidenna. (Qolasiyaasa 3:21) SHin gita balaa baliyo wode seerana bessees. Iitabaa haniyo wodekka hegaadan oottana danddayettees. Hegee xayikko, hanotay yaa iitana danddayees.

Leemisuwawu, intte naꞌay ayyiyoogaa doommiis giidi qoppite. Seerana xayikko, i otorettananne harati baakko shiiqennaadan oottiyoogaa doommana danddayees. Yaatiyo gishshawu, ayyiyoogee i iita gidanaadan oottiyoogaanne hegee a yeellayana danddayiyoogaa intte naꞌaassi odite. (Leemiso 27:2) Bana bessiyaagaadan xeelliya uri ba eraa haratuyyo awaajjana koshshennaagaakka yootite. Hegaadan naꞌaa siiquwan seeriyoogee i bana laafa asadan xeellennan ba huuphiyaa kawushshiyoogaa tamaaranaadan maaddees.—Geeshsha Maxaafaa maaraa: Maatiyoosa 23:12.

Deꞌuwan gakkiyaabawu intte naꞌay giigettanaadan maaddite. Naꞌi koyiyoobaa ubbaa ayyo immiyoogee i aawatanaadan oottana danddayees. Leemisuwawu, intte wolqqappe darobaa intte naꞌay oychiyaaba gidikko, intte wolqqadan deꞌana koshshiyoy aybissakko qonccissite. Allaxxanawu keeri uttidi, hegaa agganawu koshshikko, qoppidobay polettennan attiyoogee wottin deꞌiyaaba gidiyoogaa yootana danddayeeta; qassi hegaa malabay gakkiyo wode intte waatana danddayiyaakko tobbana danddayeeta. Naata ayba metoynne gakkennaadan teqqiyoogaappe, gasttiyo wode gakkanabawu giigettanaadan eta maaddite.—Geeshsha Maxaafaa maaraa: Leemiso 29:21.

Immanaadan minttettite. ‘Ekkiyoogaappe immiyoogee ufayssiyoogaa’ intte naꞌaassi qonccissite. (Oosuwaa 20:35) Waatidi? Issibaa shammiyooban, issisaappe harasaa biyo wode kaamiyawu koshshiya miishshaa qanxxiyoogan woy moorettidabaa giigissiyoogan maaddana koshshiyo asaa qoppanaadan maaddana danddayeeta. Intte etappe amaridaageeta maaddiyo wode intte naꞌaa inttenaara efiite. Haratuyyo koshshiyaabaa kunttiyo wode intte keehi ufayttiyoogaa intte naꞌay beꞌanaadan oottite. Leemiso gidiyoogan intte naꞌay ba huuphiyaa kawushshanaadan hegaadan loꞌꞌo ogiyan intte tamaarissana.—Geeshsha Maxaafaa maaraa: Luqaasa 6:38.