Yesuusi Ubbaa Danddayiya Xoossay?
Asay darotoo zaariyo zaaruwaa:
▪ “Ee, Yesuusi Ubbaa Danddayiya Xoossaa.”
▪ “Yesuusi asa gididi qonccida Xoossaa.”
Yesuusi woygidee?
▪ “Intte tana siiqidobaa gidiyaakko, taappe Aawai dariyo gishshau, taani Aawaakko biyoogan intte ufaittana shin.” (Yohaannisa 14:28) Yesuusi inne ba Aaway issi lagge gidennaagaa yootiis.
▪ “Taani ta Aawaakkonne intte Aawaakko, ta Xoossaakkonne intte Xoossaakko, pude bais.” (Yohaannisa 20:17) Yesuusi i ba huuphe Xoossa gidiyoogaa yootibeenna; shin Xoossay appe dumma gidiyoogaa yootiis.
▪ “Taani hagaa taappe haasayabeikke; shin tana kiittida ta Aawai taani gaanaagaanne haasayanaagaa tana azaziis.” (Yohaannisa 12:49) Yesuusi baappe gidennan ba Aawaappe yiidabaa tamaarissiis.
YESUUSI bana Xoossaa Naꞌaa giisippe attin, Ubbaa Danddayiya Xoossaa gibeenna. Yesuusi Xoossaa gidikko, saꞌan deꞌiyo wode ookko woossidee? (Maatiyoosa 14:23; 26:26-29) Yesuusi issi urau haasayiyooba malatissidi yootibeennaagee tuma!
I erissiyo ashkkaratuppe naaꞌꞌati a Kawotettan dumma sohuwaa oychido wode: “Taappe ushachcha baggaaranne haddirssa baggaara uttanaageeta dooranau taayyo maati baawa; shin he sohoi ta Aawai immanau giigissi wottidoogeetussa” yaagidi zaariis. (Maatiyoosa 20:23) Yesuusi eti koyidobaa immanau bau maatay baynnaagaa yootido wode, wordduwaa yootidee? CHii, i worddotibeenna! Hegaappe, hegaa mala kuushshaa kuuyanau maatay deꞌiyoy Xoossaa xalla gidiyoogaa i ashkketettan ammaniis. Aawaa xallay eriyo, inne kiitanchati erenna issi issibay deꞌiyoogaa Yesuusi yootiis.—Marqqoosa 13:32.
Yesuusi Aawaappe guuxxiyoy saꞌan asa gididi deꞌido wode xallaanee? Gidenna. Geeshsha Maxaafay Yesuusi hayquwaappe denddi simminkka, Xoossaappe guuxxiyoogaa yootees. Kiitettida PHauloosi: “Xoossai Kiristtoosassi huuphe” gidiyoogaa hassayissiis. (1 Qoronttoosa 11:3) Geeshsha Maxaafay wodenau “ubbabai Kiristtoosassi haarettidoogaappe guyyiyan, Kiristtoosi qassi ba huuphen ubbabaa bana haarissida Xoossaassi haarettana. Xoossai qassi ubbabaa wurssidi haarana” yaagees.—1 Qoronttoosa 15:28.
Yesuusi Ubbaa Danddayiya Xoossa gidennaagee qoncce. I ba Aawaa “ta Xoossaa” giidoy hegaassa.—Ajjuutaa 3:2, 12; 2 Qoronttoosa 1:3, 4.a
[Tohossa qofata]
a Hagaa xeelliyaagan hara gujo qofaa demmanau, Yihoowa Markkatun attamettida Tumuppe Geeshsha Maxaafay Tamaarissiyoy Aybee? giya maxaafaa sinttaa 201-204 xeella.
[Sinttaa 7n deꞌiya misiliyaa qonccissuwaa]
Aawaa xallay eriyo, inne kiitanchati erenna issi issibay deꞌiyoogaa Yesuusi yootiis