Bala Timirttiyaa 4: Xoossay Sillaase
Ha bala timirttiyau denddoy aybee? “Sillaasiyaa ammanoy 4tta xeetu laytta wurssettan merettida waannatiya timirtte giidi issi uri qoppana danddayees. Amarida ogiyan hegee tuma. . . . ‘Issi Xoossan deꞌiya heezzu Bollata’ giya qofau mino naqaashi deꞌenna; he qofay 4tta xeetu laytta wurssettaappe kase, Kiristtaanetu deꞌuwaaranne ammanuwaara muleera walahettibeenna.”—Niwu Kaatolik Inssaykilopidiya (1967), Vooliyum 14, sinttaa 299.
“Uddufune 20, 325 [M.Ln] Niiqiyaa yaaꞌaa asay shiiqiis. Qosxxenxxinoosi yaaꞌaa kaalettiis; qassi i ba huuphe . . . Kiristtoosanne Xoossaa giddon deꞌiya gaytotettaa qonccissiya, ‘Aawaara issi bolla’ yaagiya, he yaaꞌan giigida waanna wogaa kessanaadan qofaa immiis. . . . PHaaphaasetuppe daroti maayibeennaba gidikkonne, naaꞌꞌatu xallay attin ubbay kawuwau yayyidi, he wogaa paramidi ekkidosona.”—Inssaykilopidiya Biritanika (1970), Vooliyum 6, sinttaa 386.
Geeshsha Maxaafay woygii? “Isxxifaanoosi banan Geeshsha Ayyaanai kumin, saluwaa pude tishshi ootti xeellidi, Xoossaa bonchchuwaanne Yesuusi Xoossaappe ushachcha baggan eqqidaagaa be7iis. Be7idi, ‘Xeellite, taani saloi dooyettin, Asa Na7ai Xoossaappe ushachcha baggan eqqidaagaa be7ais’ yaagiis.”—Oosuwaa 7:55, 56.
He ajjuutay ay qonccissidee? Isxxifaanoosi Xoossaa wolqqan kumidi, Yesuusi “Xoossaappe ushachcha baggan eqqidaagaa” beꞌiis. Hegaa gishshau, Yesuusi hayquwaappe denddidi saluwaa biido wode, Xoossaa gidibeenna; shin i bana danddayida ayyaana mereta. Ha taarikiyan hara heezzantto uri Xoossaa matan deꞌiyoogee odettibeenna. Doominika qeesee Maare Amel Buwamari, Sillaasiyaa ammanuwaa kaafiya xiqisiyaa demmanau baaxetiis; gidikkokka, À lꞌaube du christianisme—La naissance des dogmes (Kiristtaane Ammanuwaa Doomettan—Bala Ammanoy Doommiis) giya ba maxaafan: “Issi Xoossan heezzu bollay deꞌees giyaabi . . . Ooratta Maachan awaaninne deꞌenna” yaagidi xaafiis.
Qosxxenxxinoosi 4tta xeetu layttan Woosa Keettan merettida shaahotettaa giigissanau he ammanuwaa minttettiis. SHin hegee: Mayraama, Yesuusa yelidaara, “Xoossaa Aayiyyee”? giya, hara oyshaa denttiis.
Kaallidi deꞌiya Geeshsha Maxaafaa xiqiseta beꞌa: Maatiyoosa 26:39; Yohaannisa 14:28; 1 Qoronttoosa 15:27, 28; Qolasiyaasa 1:15, 16
TUMAA:
Sillaasiyaa ammanoy oyddantta xeetu laytta wurssettaa heeran doommettidaba
[Sinttaa 7n deꞌiya Misilee Ekettidosaa]
Museo Bardini, Florence