Bantta Dosan Eeno Giidosona Mekisiikon

YELAGA gidida daro Yihoowa markkati kaseegaappe aaruwan haggaazanau giidi bantta deꞌuwaa sima oottiyoogaa beꞌiyoogee keehippe ufayssiyaaba. (Maa. 6:22) Eti bantta deꞌuwan ay ay laammiyoonaa? Eta ayba metoy gakkii? Hegaa eranau, ha wodiyan Mekisiikon haggaaziiddi deꞌiya issotu issotu hanotaa ane beꞌoos.

“NU DEꞌUWAA LAAMMANA KOSHSHIIS”

Amarkkaa biittan deꞌiya Dasttini Ichashe 2007n Jaaso ekkiis. Hegaappe simmin takkennan, eti wolwoluwaa shammidi a giddon deꞌanau daro layttau amottido amuwaa polidosona. Eti Amarkkan, Origenen, woray dariyo zumbbullatinne shachay kammido dereti yuushuwan deꞌiyo, Pasifikke Ano Abbaa matan deꞌiya daro loꞌꞌiya, Asttoriyaa giyo katamaa matan bantta wolwoluwaa essoosona. Dasttini, “Beꞌiyoobay ubbay keehippe loꞌꞌees!” yaagiis. Eti Yihoowan ammanettidi, sima deꞌo deꞌiyaabadan qoppidosona. Eti, ‘Nuuni deꞌiyoy 8 meetire gidiya wolwoluwaana, oottiyoy amarida saatiyaassa, shiiqiyoy hara qaalaa haasayiya gubaaꞌiyaana, qassi issi issitoo kaafiya aqinye gididikka haggaazoos gidennee?’ giidi qoppidosona. SHin guuttaa takkidi, banttana banttarkka cimmidoogaa eridosona. Dasttini, “Nuuni gubaaꞌiyaa maaddiyoogaappe, wolwoluwaa giigissiiddi daro wodiyaa wurssoos. Tumuppe Yihoowa sheniyaa kaseyanau koyikko, nu deꞌuwaa laammana koshshiyoogaa akeekida” yaagiis.

Jaasa qassi, “Taani gelanaappe kase Mekisiikon deꞌaas; yan Inggilizetto qaalaa goꞌettiya gubaaꞌiyan shiiqays. He biittan haggaazoy keehi ufayssiyo gishshau, simmada yaa baanau keehippe koyaas” yaagaasu. Dasttininne Jaasa hara biitti biidi haggaazanau koyiyoogaa yaa gujjanau, cahaa bessida kattaa mala asay deꞌiyo biitti biidi haggaazida ishatubaanne michotubaa so asaa goynuwaa wode nabbabiyoogaa doommidosona. (Yoh. 4:35) Dasttini, “Nuunikka hegaadan ufayttanau koyida” yaagiis. Mekisiikon deꞌiya eta laggeti yan eqqida ooratta citaa maaddiya asi koshshiyoogaa etau yootido wode, Dasttininne Jasa yaa baanau qofaa qachidosona. Bantta oosuwaa yeddidinne bantta wolwoluwaa bayzzidi Mekisiikko biidosona.

“NU DEꞌUWAN HANIDA AYBIPPENNE AADHIYAABAA”

Dasttininne Jaasa Takoman giyo kataman deꞌiyoogaa doommidosona; he katamay Pasifikke Ano Abbaa mataana gidikkokka, Asttoriyaa katamaappe tohossa baggan 4,345 kilo meetiriyaa haakkees. Dasttini haꞌꞌi deꞌiyo sohoy kaseegaadan “irxxa carkkoy carkkiyoonne deriyaa beꞌiyo soho gidennan, keehi hombbiyaanne” loomiyaa mitta xallay kumido soho gidiyoogaa yootiis. Koyro heeran eti yan ooso demmibookkona. Eta miishshay metiyo gishshau, ubba wode gallassan naaꞌꞌutoo uruuziyaanne lokkomaa moosona. Jaasa, “SHin nuuni miyoobay nuna salettiyo wode, nuuni xannaꞌissiyoogeeti nuuyyo mangguwaa, muuziyaa, paappaayiyaanne qarccita kumetta loomiyaa immiyoogaa doommidosona!” yaagaasu. Guyyeppe eti, Taywaane biittan deꞌiya, intternneetiyan dumma dumma qaalaa timirttiyaa tamaarissiya dirijjitiyan oosuwaa demmidosona. Eti he oosuwan demmiyo miishshay galla galla eta koshshiyaabau gidees.

Dasttininne Jaasa haꞌꞌi eti deꞌiyo deꞌuwaabaa woygiyoonaa? Hagaadan giidosona: “Nuuni ha sohuwaa yiidoogee nu deꞌuwan hanida aybippenne aadhiyaabaa. Nuuyyo Yihoowaara deꞌiya dabbotaynne nu giddon deꞌiya dabbotay nuuni qoppiyoogaappe aaruwan minniis. Ubba gallassi darobaa issippe oottoos; giishin issippe haggaazoos, Geeshsha Maxaafaa xannaꞌissiyoogeeta waatidi maaddanaakko tobboosinne shiiquwau giigettoos. Qassi kase unꞌꞌettiyooban haꞌꞌi unꞌꞌettokko.” Eti gujjidikka, “Nuuni kase loyttidi akeekibeennabaa, giishin Mazamure 34:8y, Yihooway ‘keha gidiyoogaa xeelli be7ite’ yaagiyoogee tuma gidiyoogaa haꞌꞌi akeekida” yaagidosona.

EENO GIIDI OOTTIYA SHAꞌAN QOODETTIYAAGEETA DENTTETTIYAABAY AYBEE?

Darotuyyo layttay 20ppenne 39ppe gidduwaana gidido, aqo oyqqidanne oyqqibeenna, 2,900ppe dariya ishatinne michoti Mekisiiko biittan Kawotettaabaa aassiyaageeti keehippe koshshiyo heera biidi haggaaziiddi deꞌoosona. Ha ubba Yihoowa Markkati ha metiya oosuwaa oottanau dooridoy aybissee? Etappe amaridaageeta ha oyshaa oychin, hegau heezzu waanna gaasota yootidosona. Hegeeti aybee?

Yihoowanne asaa siiqiyoogaa bessanaassa. Letisiyaa xammaqettiyo wode iyyo layttay 18. A hagaadan gaasu: “Ta huuphiyaa Yihoowayyo geppiyo wode, hegee ta kumetta wozanaappenne shemppuwaappe ayyo haggaazanaassa gidiyoogaa akeekaas. Yaatiyo gishshau, Yihoowa ta kumetta wozanaappe siiqiyoogaa bessanau, kaseegaappe aaro wodiyaanne wolqqaa goꞌettada ayyo oottanau koyaas.” (Mar. 12:30) Haꞌꞌi Letisiyo ekkida Ermeelloy Kawotettaabaa aassiyaageeti keehippe koshshiyo sohuwan haggaazanau biyo wode, ayyo layttay 21 heera. I, “Asay ayyaanaaban koshshiyaabaa demmanaadan maaddiyoogee taani shooruwaa siiqiyoogaa bessiyo aybippenne loꞌꞌo oge gidiyoogaa akeekaas” yaagiis. (Mar. 12:31) Yaatiyo gishshau, i bankkiyan oottiiddi ishalo deꞌuwaa deꞌiyo, Monterey giyo dure katamaappe guutta katamaa biis.

Ubbatoo tumu ufayssaa demmanaassa. Letisiyaa xammaqetta simmada takkennan, issi gooba aqinyeera haahosan deꞌiya katamaa baasu; yan eti issi aginau sabbakidosona. Letisiyaa hagaadan gaasu: “Taani keehippe maalaalettaas. Nuuni Kawotettaabaa sabbakiyo wode asay ay keena ufayttidi siyiyaakko beꞌiyoogee tana keehippe ufayssiis. He aginaa wurssettan ta wozanan, ‘Taani ta deꞌuwan oottanau koyiyoy hagaa!’ yaagaas.” Hegaadankka, haꞌꞌi iyyo layttay 21 heera gidido, Esliyo giyo aqo oyqqabeenna michiyaa harati ufayttiyoogaa beꞌidoogee akka ha oosuwaa oottanaadan denttettiis. A naaꞌꞌantto xekka timirttiyaa tamaariyo wode, aassiyaageeti keehippe koshshiyo sohuwaa biidi haggaazida amarida Yihoowa Markkatuura gayttaasu. A, “He ishanttunne michonttu ufayssaa beꞌiyoogee, taani etaagaa mala deꞌuwaa deꞌanau koyanaadan oottiis” yaagaasu. Daro michontti Esliyiigaadan giidosona. Aqo oyqqibeenna, 680ppe dariya michontti Mekisiikon, aassiyaageeti keehippe koshshiyoosan haggaazoosona. Eti yelagatussikka gasttatussikka keehippe loꞌꞌo leemiso!

Ufayssiyaanne injje deꞌuwaa deꞌanaassa. Esiliya naaꞌꞌantto xekka timirttiyaa wurssiyo wode, miishsha qanxxennan yuniversttiyan tamaaranaadan shoobettaasu. I laggeti a he shoobiyaa ekkada, yuniversttiyaappe anjjettada, loꞌꞌo ooso oyqqada, kaamiyaa shammada ba koyidosaa ba beꞌada, loꞌꞌo deꞌuwaa deꞌanaadan zoridosona. SHin a eta zoriyaa siyabeykku. Esiliya hagaadan gaasu: “Kiristtaane gidida ta laggetuppe daroti hegaadan oottidosona; qassi eti ayyaanaabaa hoolliyaa kaseyennaagaa akeekaas. Eti ashuwaabau keehippe bichaariyo wode banttana gakkiya metuwan hidootaa qanxxidoogaakka akeekaas. Taani ta yelagatetta wodiyan Yihoowayyo wozanappe haggaazanau koyaas.”

Esiliya aqinye gidiyo wode miishshan metootennaadan ooso oyqqanau maaddiya timirttiyaa tamaarada, Kawotettaabaa aassiyaageeti keehippe koshshiyo sohuwaa baasu. A Otominne Tlaapaneko asay haasayiyo qaalaa tamaaranaukka baaxetaasu. Haahosan deꞌiya heeran heezzu layttau haggaazido wodiyaa qoppada, haꞌꞌi hagaadan gaasu: “Kawotettaabaa aassiyaageeti keehippe koshshiyo sohuwan haggaaziyoogee ta deꞌuwan ufayttanaadan oottiis. Ubbaappe aaruwan, hegee taani Yihoowaara ta dabbotaa keehi minttanaadan maaddiis.” Layttay 31 heera gidido, Amarkkan deꞌiya, Filipanne Rakeelo giyo azinaynne machiyaa hegaa maayoosona. “Alamiyaa hanotay eesuwaara laamettiiddi deꞌiyo gishshau, daroti deꞌuwaabau hirggoosona. SHin Geeshsha Maxaafaa tumaa siyiya keehi daro asay deꞌiyoosan sabbakiyoogee nu deꞌoy injjetanaadan oottiis. Hegee keehippe ufayssiyaaba!”

METUWAN GENCCIYO OGIYAA

Kawotettaabaa aassiyaageeti keehippe koshshiyo heera biidi haggaaziyo wode metiyaabaykka deꞌees. Metiyaabaappe issoy koshshiyaabau miishshaa demmiyoogaa. Hegau, heeraa hanotaadan ne hanotaa giigissana koshshees. Daro wodiyau aqinye gidada oottida Veroonika hagaadan gaasu: “Taani haggaazido issi heeran hirayso qumaa kattada bayzzaas. Hara sohuwan qassi maayuwaa bayzzaasinne huuphiyaa qanxxaas. Haꞌꞌi keettaa geeshshays, qassi mata wode yelidaageeti bantta naatuura haasayanaadan tamaarissays.”

Haahosan deꞌiya heeran he biittaa asaara deꞌiyo wode, biittaa wogaa meezetiyoogeekka keehippe metana danddayees. Filipinne Rakeela asay Naawatile qaalaa haasayiyo heeran haggaaziyo wode hegaadan metootidosona. Filipi, “He biittaa wogay nuugaappe keehi dummatees” yaagiis. Eti bantta hanotaa giigissanaadan aybi maaddidee? I, “Nuuni Nawatile asaa giddon beꞌido loꞌꞌobaa, giishin so asay siiqettiyoogaa, asay issoy issuwau ammanettiyoogaanne asau kehiyoogaa ubbatoo qoppoos” yaagiis. Rakeela qassi, “Nuuni yan deꞌiyoogaaninne he biittaa ishanttuuranne michonttuura haggaaziyoogan darobaa tamaarida” yaagaasu.

NEENI GIIGETTIYO OGIYAA

Neeni maadoy keehi koshshiyo haahosan deꞌiya heeran haggaazanau koyikko, giigettanau ay oottana danddayay? Hegaa mala sohuwaa biidi haggaaziya ishanttinne michontti hagaadan goosona: Baanaappe kase ne deꞌuwaa sima ootta; qassi tau deꞌiyaabay gidana ga. (Pili. 4:11, 12) Harabaa shin ay oottana danddayay? Letisiyaa hagaadan gaasu: “Taani issi sohuwan keehi takkanaadan oottiya oosuwaa oyqqanau koyabeykke. Awanne gidin, koshshiyo wode awudenne baanau koyaas.” Ermeelloy, “Taani qumaa kattiyoogaa, maayuwaa meecciyoogaanne tokkosiyoogaa tamaaraas” yaagiis. Veroonika, “Taani nu soo asaara deꞌiyo wode, keettaa geeshshiyoogan maaddays; qassi bollau maaddiya, hirayso qumaa kattiyoogaa tamaaraas. Miishshaa qoraphiyoogaakka tamaaraas” yaagaasu.

Amarkkan deꞌiya, aqo deꞌuwan hosppun layttaa issippe deꞌida, Leevinne Ameliyaa koshshiyaabaa qonccissidi woossiyoogee, Mekisiikon haggaazanau eti giigettanaadan waatidi maaddidaakko yootidosona. Leevi, “Nuuni hara biittan issi layttau haggaazanau ay keena miishshay koshshiyaakko eridi, hegaa keena miishshaa demmanaadan Yihooway maaddana mala woossida” yaagiis. Eti bantta woosan oychidoogaa keena miishshaa issi aginaa giddon demmidi, sohuwaara haggaazana biitta bi aggidosona. Leevi, “Nuuni qonccissidi woossido woosaa Yihooway zaarido gishshau, nuuppe koyettiyaabaa oottana bessees” yaagiis. Ameliyaa gujjada hagaadan gaasu: “Nuuni issi laytta xallau takkana danddayiyaabadan qoppida, shin haꞌꞌi nuuni hagaa yoosappe laappun laytta; qassi hagaappe aggidi baanau qoppokko! Hagan deꞌiyoogee nuuni Yihoowa maaduwaa beꞌanaadan oottees. A loꞌꞌotettaa qonccissiyaabaa ubbatoo beꞌoos.”

Mekisiikon Inggilizetto qaalaa haasayiyaageetussi sabbakanau Amarkkaa biittaappe biida azinaanne machiyo, Addaamanne Jeenifero woosay keehippe maaddiis. Eti hagaadan giidosona: “Intteyyo ubbabay hirattanaashin naagoppite. Intte hara biitta biidi haggaazanau koyiyo koshshaa xeelliyaagan woossite; qassi intte woosaara giigiyaabaa oottite. Intte deꞌuwaa sima oottite, intte haggaazanau koyiyo biittan deꞌiya macara biiruwau xaafite, qassi koshshiya ubbabaa yuushshi qoppidi, he sohuwaa biite!”a Intte hegaadan oottikko, ufayssiyaanne ayyaanaaban daro anjjuwaa demmiyo deꞌoy inttena naagees.