Diccanawu “Ne Gediyaassi Ogiyaa Salallissa”

XOOSSAA asay 537 K.K. Baabilooneppe kiyiyo wode, eti Yerusalaame baana ogiyaabay Yihoowa qofissiis. I eta, “Asaayyo ogiyaa kessite! Kessite, wogga ogiyaa kessite! SHuchchatakka diggite” yaagiis. (Isi. 62:10) Issi issi Ayhuda asati hegaa waatidi polidaakko qoppa. Sinttati biida amaridaageeti geella boohuwaa kunttiyoogaaninne geli kessa sohuwaa salallissiyoogan ogiyaa giigissennan waayi aggana. Yaatiyoogee eta geeduwaa kaallidi bantta biitti biya eta ishantta maaddiyaaba.

Ayyaanaaban halchidobaa polanawu biyo ogiyaa hegan leemisana danddayoos. Yihooway ba ashkkarati ubbay bessennaban xubettiyoogaappe attidi he ogiyan hemettanaadan koyees. A Qaalay nuna, “Ne gediyaassi ogiyaa salallissa; suure oge xalaalan hemetta” yaagidi zorees. (Lee. 4:26) Neeni yelaga gidin gidana xayin, Xoossay hegaadan giidoogee eratetta zore gidiyoogaa akeekana danddayaasa.

LOꞌꞌOBAA KUUYIYOOGAN OGIYAA GIIGISSA

Asay issi yelaga uraabaa, ‘A darobaa oottawusu’ woy qassi ‘I darosaa bees’ giishin siyana danddayaasa. Yelagati darotoo payya, issibaa eesuwan akeekoosonanne banttawu injjetanaadan keehi koyoosona. Geeshsha Maxaafay, “Yelagatu bonchchoi eta wolqqaa” yaagees. (Lee. 20:29) Ba eraanne ba wolqqaa Yihoowayyo haggaazanawu goꞌettana koyiya yelagi ayyaanaaban halchidobaa polana danddayiyo gishshawu, tumu ufayssaa demmees.

SHin neeni akeekiyoogaadan, yelagatu wolqqay alamiyan keehi koyettiyaaba. Issi yelaga Yihoowa Markkay timirttiyan gooba gidiyo wode, timirttiyaaban zoriya uri, a tamaarissiya woy aara tamaariya uri i ha alamiyan injjetido ura gidana mala xoqqa timirttiyaa tamaaranaadan minttettana danddayees. Woy qassi ispporttiyan gooba gidida yelaga michiyo woy yelaga ishaa harati ispporttiyan erettidaagaa gidanaadan labana danddayoosona. Nena hegaa malabay gakkidee, woy hegaa malabay gakkiyo ura eray? Issi Kiristtaanee suurebaa kuuyanaadan maaddanabi aybee?

Issi uri ba deꞌuwan keehi loꞌꞌo ogiyan hemettanawu giigettanaadan Geeshsha Maxaafay tamaarissiyoobay maaddana danddayees. Eranchchaa 12:1y, “Ne yelagatettaa laittan nena Medhdhidaagaa qoppa” yaagees. Neeni woy neeni eriyo yelagi waatidi ‘inttena Medhidaagaa qoppana’ danddayeetii?

Arggo Afirkkan deꞌiya Erikaa gakkidabaa ane qoppa. I tohuwaa kuwaasiyaa kaaꞌiyoogaa dosees. Erikawu layttay 15 gidido wode, ba biittawu kaaꞌanaadan doorettiis. Yaagiyoogee i guuttaa takkidi, Awurooppan ispporttiyan loohidi geella he ispporttiyan erettida ura gidana danddayees giyoogaa. SHin “Nena Medhidaagaa qoppa” yaagiya zoriyaa waatidi kaallana danddayii? Qassi a hanotaappe neeni woy amarida yelagati ay tamaarana danddayeetii?

Eriki timirtte keettan deꞌiyo layttatun Yihoowa Markkatuura Geeshsha Maxaafaa xannaꞌiyoogaa doommiis. Yaatiyo gishshawu, bana Medhidaagee asaa naatu metuwaa merinawu qaaranaagaa eriis. Eriki ba eraanne ba wolqqaa Xoossaa sheniyaa polanawu goꞌettiyoogee keehi koshshiyaaba gidiyoogaa akeekiis. He aadhida eraappe denddidaagan Eriki Ispporttiyan erettanawu koyibeenna. I ubba xammaqettidi ayyaanaabaa minnidi oottiis. Guyyeppe, gubaaꞌiyawu oottiyaagaa gidiis; qassi takkidi Machibeenna Ishati Loohiyo Timirtte Keettan tamaaranaadan shoobettiis.

Eriki Ispporttiyan erettanawu baaxetidaba gidiyaakko duretananne hayttatana danddayees. SHin i Geeshsha Maxaafay, “Dure asatussi eta duretettai yuushoi gimbbettido katamaa mala; eta qofan eta duretettai mino dirssaadan eta naagiyaabaa milatees” yaagiyo maaray tuma gidiyoogaa akeekiis. (Lee. 18:11) Ee, duretettay issi ura naagiyaaba milatiyoogee hada. Hegaa bollikka, duretanawu bichaariyaageeti darotoo ‘daro metuwan banttana qohoosona.’—1 Xim. 6:9, 10.

Daro yelagati kumetta wodiyaa haggaazuwaa doorido gishshawu, ufayttoosonanne merinaa naaguwaa demmidosona. Eriki hagaadan giis: “Taani Yihoowayyo kumetta wodiyaa haggaaziya coratu ‘citan’ deꞌays. Hegee taayyo ay citappenne aadhiya cita; qassi tumu ufayssaa demmiyoonne injje deꞌuwaa deꞌiyo ogiyaa tana bessido gishshawu Yihoowa galatays.”

Neeni shin? Alamiyaaban halchidobaa polanawu bichaariyoogaappe aqinye gidada ne ogiyaa Yihoowa sinttan ayssi minttikkii?—“Yuniversttiyan Demmana Danddayenna Goꞌꞌaa Demmiyoogaa” giya saaxiniyaa xeella.

NE OGIYAAPPE XUBBIYAABAA DIGGIYOOGAA

Issi azinaynne machiyaa Amarkkaa biittaa macara biiruwaa beꞌanawu biidi, yan Yihoowawu haggaaziya Beeteele keettaa yarati ufayttiyoogaa akeekidosona. Michiyaa guyyeppe, “Nuuni kase meezetidobaa keehi dosoos” gaada xaafaasu. He azinaynne machiyaa haggaazuwan daro maataa demmanawu wodiyaanne wolqqaa kaseegaappe gujjanawu qofaa qachidosona.

Issi wode, ha aqo laggeti laammanawu koyidobay etawu keehi deexxiyaaba milatiis. SHin issi gallassi he gallassaa xiqisiyaa wotti denttidi qoppidosona. He xiqisee Yesuusi, “Intte taani tamaarissiyoogau azazettikko, tumu tana kaalliyaageeta” yaagido, Yohaannisa 8:31n deꞌiyaagaa. Eti hegaa hassayidi, “Nuuni nu deꞌoy undduwaalettennaadan giidi aybanne aggibayikko hegee bessiyaaba” giidi qoppidosona. Eti bantta gita keettaa bayzzidosona, hara toohuwaa bantta bollappe wottidosona, yaatidi maadoy koshshiyo gubaaꞌiyaa maaddanawu biidosona. Haꞌꞌi eti aqinye gididi haggaaziiddi deꞌoosona; qassi Kawotettaa Addaraashaa keexxiyoogaaninne awuraajjaa shiiquwaa wode bantta dosan oottiyoogan maaddoosona. Haꞌꞌi banttawu siyettiyaabaa hagaadan goosona: “Yihoowa dirijjitee minttettiyoogaadan undduwaalettibeenna deꞌuwaa deꞌiyoogee ay keena ufayssiyaabakko beꞌidi garamettida.”

AYYAANAABAN DICCIYO OGIYAAPPE KIYOPPA

Solomoni, “Sitti gaada sinttau xeella; ne aifee ne sinttan de7iyaabaa tishshi oottidi xeello” yaagiis. (Lee. 4:25) Nuuni ogiyaa sinttawu tishshi oottidi xeelliiddi kaamiyaa laaggiya uradan, ayyaanaaban halchennaadaaninne halchidobaa polennaadan diggiyaabaappe haakkana koshshees.

Neeni ayyaanaaban halchana danddayiyoobaynne hegaa polanawu baaxetana danddayiyoobay aybee? Kumetta wodiyaa haggaaziyoogee hegawu maaddiya loꞌꞌoba. Haray qassi matan deꞌiya gubaaꞌee ba aaho moottaa gattanawu sabbakiyoogaa meezetida uri maaddanaadan koyikko, eta maaddiyoogaa. Woy qassi issi gubaaꞌiyan aassiyoogan qara gidida daroti deꞌikkonne, cimatinne gubaaꞌiyawu oottiyaageeti guutta gidana danddayoosona. Hegeetuppe issuwan maaddana danddayay? Neeni maaddana danddayiyaakkonne eranawu woradaa xomoosiyaagaa ayssi oychikkii? Neeni haahosaa baada maaddanawu koyikko, maadoy koshshiyo, haahuwan deꞌiya gubaaꞌetubaa oychana danddayaasa.b

Isiyaasa 62:10n odettida hanotaa ane zaarettidi qoppoos. Ayhudatuppe amaridaageeti Xoossaa asay ba biyoosaa gakkanaadan bantta biitti simmiyo ogiyaa salallissanawu minnidi oottennan aggokkona. Neeni geeshsha haggaazuwan halchidobaa polanawu minnada baaxetaydda deꞌikko, hidootaa qanxxoppa. Neenikka Xoossay maaddin he halchuwaa polana danddayaasa. Ne sinttappe xubbiyaabaa digganawu maliyo wode, Yihooway aadhida eratettaa immanaadan ubbatoo woossa. “Ne gediyaassi ogiyaa” salallissanaadan i nena waatidi maaddana danddayiyaakko sinttappe akeekana.—Lee. 4:26.