Oyshaa Saaxiniyaa

◼ Kupponiyaanne Interneettiyaa Oyshaa Kunttana Koshshiyay Oonee?

Nu xuufetun darotoo, xuufe oychanau woy Yihoowa Markkati yiidi oychanaadan kunttidi macaraa biiruwau kiittana danddayiyo kuppone deꞌees. Hegaa bollikka, issi uri www.watchtower.org giyo nu Weyb saytiyan Geeshsha Maxaafaa xannaꞌanau oychana danddayees. He giigissoti daroti tumaa eranaadan maaddiiddi deꞌoosona. SHin, aassiyaageeti he ogetun bantta dabboti woykko harati ayyaanaaban maaduwaa demmanaadan oottiyo wode metoy merettiis.

Issoti issoti eti koyennan macaraa biiroy xuufiyaa yeddido gishshau, nu dirijjitee eta yiilloyanau hegaadan oottiyaabadaaninne ubbatoo kiittanau eta sunttaa xaafi oyqqidobadan qoppidi, amassalidosona. Ba huuphe koyibeenna uraa oychanaadan odettido aassiyaageeti, he uri yiillotiyo wode yeellatidosona. Hegaa gishshau, nu Weyb saytiyan woy kupponiyan koshshay deꞌiyo asati bantta huuphe oychana koshsheesippe attin, eta gishshaa aassiyaageeti oychana koshshenna. Hara uraa gishshaa hegaa mala oyshay oyshettidoogaa akeekikko, he oyshaa zaarokko.

Yaatin, nu dabbo woy nuuni eriyo ura ayyaanaaban waatidi maaddana danddayiyoo? Au xuufiyaa immanau koyikko, ayssi he xuufiyaa ayyo imotadan kiittikkii? Ayyo koshshay deꞌiyaabanne Yihoowa Markkati oychanaadan i koyishin, a heeran deꞌiya gubaaꞌiyaa cimatuura waatada gayttanaakko neeni erennaba gidikko, Hayyanintta Kaallidi Maaddite (S-43) giyo qitsiyaa kunttada ne gubaaꞌiyaa xaafiyau immana koshshees; i hegaa zaaretti xeellidi macara biiruwau kiittees. SHin koshshay deꞌiyo uri woyniyan, qasho keettan, amale gidiyaabaa goꞌettiyoogaa aggana mala maaddiya sohuwan woykko kawo hosppitaaliyan deꞌiyaaba gidikko, a gishshaa neeni macara biiruwau xaafana koshshenna. Yaatiyoogaappe, i he sohuwaa biya ishanttuura gayttanaadan woykko macara biiruwau i ba huuphe xaafanaadan minttettana danddayaasa.