Esther

9 For the 13th day of the 12th month, wey be, the month of Aʹdar, when them suppose do wetin the king and im law talk, for the day wey the enemies of Jew people think say them go win them, things change, na the Jew people come win the people wey de hate them. 2 The Jew people gather together for their cities for all the areas wey King A·has·u·eʹrus de rule, so that them go fight against the people wey want attack them, and nobody fit stand against the Jew people because all the people don de fear them. 3 And all the leaders of the different-different areas, the satraps, the governors, and the people wey de do the king work de support Jew people, because them de fear Morʹde·cai. 4 That time, Morʹde·cai don get power for the king house* and im name de spread for all the areas because e de get power more-more.

5 Jew people win all their enemies, them use sword kill them and destroy them. Them do the people wey hate them anything wey them like. 6 For Shuʹshan* the big strong house,* Jew people kill and destroy 500 men. 7 Them still kill Par·shan·daʹtha, Dalʹphon, As·paʹtha, 8 Po·raʹtha, A·daʹli·a, A·ri·daʹtha, 9 Par·mashʹta, Arʹi·sai, Arʹi·dai, and Vai·zaʹtha, 10 wey be the ten sons of Haʹman the son of Ham·me·daʹtha wey be enemy of Jew people. But after them kill them, them no collect any property.

11 That day, them tell the king the number of people wey them kill for Shuʹshan* the big strong house.*

12 The king come tell Queen Esther say: “For Shuʹshan* the big strong house,* Jew people don kill and destroy 500 men and the ten sons of Haʹman. So wetin them don do for the other areas wey the king de rule? Now, wetin you want? I go do-am for you. And which other thing you want ask for? I go do-am.” 13 Esther answer-am say: “If the king like-am, tomorrow, make them allow the Jew people wey dey for Shuʹshan* to still do wetin the law talk as them do today, and make them hang the ten sons of Haʹman ontop pole.” 14 So the king talk say make them do like that. Them come put law for Shuʹshan,* and them hang the ten sons of Haʹman.

15 The Jew people wey dey for Shuʹshan* gather together again for the 14th day of the month of Aʹdar and them kill 300 men for Shuʹshan,* but them no collect any property.

16 The other Jew people for the different-different areas wey the king de rule still gather together and defend theirself.* Them finish their enemies, them kill 75,000 of the people wey hate them, but them no collect any property. 17 This thing happen for the 13th day of the month of Aʹdar, and them rest for the 14th day, and them use that day do party and de happy.

18 The Jew people wey dey for Shuʹshan* gather together for the 13th day and the 14th day and them rest for the 15th day, and them use the day do party and de happy. 19 Na im make the Jew people wey de stay for the small-small cities wey dey outside of the capital city make the 14th day of the month of Aʹdar the day wey them de happy, de do party, de celebrate, and the time wey them de send food go give each other.

20 Morʹde·cai write this things wey happen and e send letters to all the Jew people for all the areas wey King A·has·u·eʹrus de rule, whether the place near or far. 21 E tell them say every year, make them de do celebration for the 14th day and the 15th day of the month of Aʹdar, 22 because for those days, Jew people free from the hand of their enemies, and for that month them start to happy instead of to de cry, and the day wey them de mourn come turn to the day wey them de celebrate. Them go de remember those days as days wey them de do party and de happy, and as time wey them go de send food to each other and give poor people gifts.

23 The Jew people gree say them go continue the celebration wey them don start and say them go do wetin Morʹde·cai write to them. 24 Because Haʹman the son of Ham·me·daʹtha wey be Aʹgag person, and wey be the enemy of all Jew people be don plan against the Jew people to destroy them and e cast Pur, wey be, Lot, so that e go make them fear and destroy them. 25 But when Esther come inside come meet the king, the king give command and them write say: “Make the wicked plan wey e plan against Jew people come ontop im own head”; them come hang-am together with im sons ontop pole. 26 Na im make them call this days Puʹrim, and e come from the name Pur.* So, because of everything wey them write for this letter and wetin them don use their eyes see about the matter, plus wetin don happen to them, 27 the Jew people make up their mind say every year for the time wey them don fix, them and their children-children and all the people wey de join them no go fail to celebrate this two days and to do wetin them write about them. 28 For every generation, them go de remember this days, and do celebration about them for each family, each area and each city; and make Jew people no forget this days of Puʹrim, and make their children-children no fail to remember them.

29 Then Queen Esther wey be the daughter of Abʹi·ha·il, and Morʹde·cai wey be Jew person use full authority write another letter* about Puʹrim. 30 Morʹde·cai send letters to all the Jew people for the 127 areas wey A·has·u·eʹrus de rule, and e use better words wey be true write the letter 31 to confirm say make them de remember the days of Puʹrim for the time wey them fix, just as Morʹde·cai wey be Jew person and Queen Esther be don tell them say make them do, and just as them don make up their mind say them and their children-children go de do, and say them go de do fasting and de really beg God. 32 And the thing wey Esther command them confirm all this matter about Puʹrim, and them write-am for book.