Esther
8 That day, everything wey Ha′man wey be the enemy of Jew people get, King A·has·u·e′rus carry them give Queen Esther; then Mor′de·cai come meet the king because Esther don tell the king say Mor′de·cai na im family person. 2 Then, the king comot the special ring wey e be don collect from Ha′man and give-am to Mor′de·cai. Esther choose Mor′de·cai to dey in charge of everything wey Ha′man be get.
3 Apart from that one, Esther follow the king talk again. Esther kneel down for front of im leg de cry and de beg-am say make e comot the problem wey Ha′man wey be A′gag person don cause and im wicked plan against Jew people. 4 The king raise the rod of gold for Esther, Esther come stand up and stand for front of the king. 5 Esther talk say: “If the king like-am and if the king de happy with me, and if e good for the king eyes, and e really like me, make them write one law to cancel the things wey Ha′man write, that bad man wey be the son of Ham·me·da′tha the A′gag person, wey e write say make them destroy Jew people for all the areas wey the king de rule. 6 Because I no go fit stand de look the kind serious problem wey my people go face, and I no go fit bear-am when them de destroy my family people.”
7 So King A·has·u·e′rus tell Queen Esther and Mor′de·cai wey be Jew person say: “See! I don give Esther everything wey Ha′man get, and them don hang Ha′man ontop pole as I talk, because of the wicked plan wey e make to attack* Jew people. 8 Now you fit use the king name write anything wey you want make them do for Jew people and seal-am with the king special ring, because if them use the king name write any law and seal-am with the king special ring, them no fit change-am.”
9 So them gather the king secretaries that time for the third month wey be the month of Si′van, for the 23rd day, and them write everything wey Mor′de·cai command them to write to the Jew people, to the satraps, the governors, and the leaders of the different-different areas from In′di·a go reach E·thi·o′pi·a, na 127 areas. Them write-am to each area according to the way the people de write, and them write-am to each of the people according to their own language, and them write-am to the Jew people according to the way them de write and according to their own language.
10 E use the name of King A·has·u·e′rus write the letter and use the king special ring seal-am, and na messengers wey de ride horse e use send the letters. Them de ride horse them wey de fast well-well, wey them train so that them go use them do the king work. 11 For inside the letters, the king give the Jew people wey dey all the different-different cities permission to gather together and defend theirself* and say make them kill and destroy any group of people for any of the areas wey come attack them, even if na women and children, and make them carry the people things. 12 This one go happen for the same day for all the areas wey King A·has·u·e′rus de rule, for the 13th day of the 12th month, wey be, the month of A′dar. 13 The things wey them write for the letter, them go put them as law for all the areas. Them go announce-am give all the people so that the Jew people go ready for that day to fight their enemies. 14 The messengers wey de ride the horse them wey them de use for the king work comot quick-quick, and them de fast well-well as the king command them. Them go still put the law for Shu′shan* the big strong house.*
15 Then Mor′de·cai comot from the king front and e wear cloth wey king de wear wey get blue and white color, e still wear big crown wey them use gold make, together with long fine cloth wey them make with purple wool, and the people wey dey the city of Shu′shan* de shout and de happy. 16 The Jew people really happy, them get joy and honor because their mind don come down. 17 And for all the areas and all the cities, anywhere wey wetin the king talk and im law reach, the Jew people wey dey there de happy, belle de sweet them, them de do party, and de celebrate. Many of the people of the land come de talk say them be Jew people, as fear don catch them because of Jew people.