October

E de hard you sometimes to obey? If your answer na yes, make you know say you no dey alone. Sometimes, King David feel like that and e pray to Jehovah say: “Make you make my heart dey ready to obey you.” (Ps. 51:12) Even though David love Jehovah, sometimes e no easy for-am to obey Jehovah just as e no de easy for us sometimes. Why e be like that? Number one, we no dey perfect. Number two, Satan de try everything to make us no obey Jehovah. (2 Cor. 11:3) And number three, we dey around “people wey no de obey.” (Eph. 2:2) So we no only need to fight against the sin wey dey our body, we still need to fight against Satan and this wicked world. w23.10 6 ¶1

Wetin we fit learn from this miracle wey Jesus turn water to wine? We learn to de carry body down. Jesus no boast when e do this miracle. In fact, e no ever boast about anything wey e do. Instead, e de carry body down and e de always give e Papa the praise. (John 5:​19, 30; 8:28) If we de carry body down like Jesus, we no go boast about anything wey we do. Make we no boast about ourself, but make we always give the praise to God wey give us power to fit work. (Jer. 9:​23, 24) Make we give-am the honor wey we suppose give-am. After all, wetin we go fit do if Jehovah no give us the power to do-am? (1 Cor. 1:​26-31) When we carry body down, we no go boast or take the praise when we help person. E de make us happy to know say Jehovah de see wetin we do and e value-am. (Compare Matthew 6:​2-4; Heb. 13:16) True-true, e de make Jehovah happy when we copy the way Jesus carry body down.—1 Pet. 5:6. w23.04 4 ¶9; 5 ¶11-12

Jehovah use holy spirit move apostle Paul encourage Christians say make they no only de think about theirself, but make them de think about other people. How we fit follow this advice for meeting? Na to remember say no be only we like to answer question. Think about-am like this. When you de talk with your friends, na only you go de talk sotey they no go get chance to talk? You no go do like that! You go give them chance to talk. Na so e still be for our meeting, we want give our brothers and sisters chance to answer question. In fact, one of the best way we fit encourage our brothers and sisters na to give them chance to answer question for meeting. (1 Cor. 10:24) One thing wey we fit do to give our brothers and sisters chance to answer question na to make our answer short. Even when you give short answer, no talk all the points for the paragraph. If you talk everything for the paragraph, other people no go get wetin they go answer. w23.04 22-23 ¶11-13

We must remember say e dey important to continue to help people, especially to help people learn about Jehovah. To fit do our preaching work well, we need to de adjust. People wey we de meet for preaching don learn different-different things about God and them come from different-different place and their culture different. We fit learn from apostle Paul because e adjust the way e de preach to the people wey e meet. Jesus make Paul “apostle to the nations.” (Rom. 11:13) So Paul preach to Jew people, Greek people, people wey go school well-well, village people, people for government, and kings. To fit preach to all this kind people make e touch their heart, e become “everything to all kind of people.” (1 Cor. 9:​19-22) E put mind for their culture, where them come from, and wetin them believe to fit preach to them well. We too fit make the way we de preach better if we de adjust the way we de preach when we meet different-different people. w23.07 23 ¶11-12

To dey gentle no mean say person dey weak. Because weak person no fit dey calm when e de face problem. Gentle heart na one of the better character wey holy spirit de produce. (Gal. 5:​22, 23) Sometimes, them de use the Greek word wey them translate as gentle heart to describe the way horse wey no get control de be after them don train-am to dey calm. The horse harsh well-well before, but now e dey calm. Even though say the horse dey calm now, e still get power. How we too fit dey gentle and still dey strong? The truth be say, we no go fit do-am by ourself. One thing wey go help us na to pray say make God give us holy spirit so that we go fit get this better character. And plenty people don succeed to dey gentle. For example, plenty of our brothers and sisters don show this character when people try to argue with them or make them vex. This one don help some people change the way them be de see Jehovah Witness people.—2 Tim. 2:​24, 25. w23.09 15 ¶3

For one vision, apostle John see 24 elders for heaven as them de worship Jehovah. As them de praise God, them talk say na Jehovah “deserve the honor, the praise, and the power.” (Rev. 4:​10, 11) All the angels for heaven get plenty reason to praise Jehovah. Them de stay with-am for heaven and them don know-am well. They don know the kind God wey Jehovah be from the things wey e de do. When them see the way Jehovah de do things, e de make them want praise-am. (Job 38:​4-7) Just like the angels, we too need to de praise Jehovah for our prayer. When we de pray, make we de tell-am wetin we love about-am and why. As you de read and study Bible, try see how the place wey you study or read show Jehovah character wey you like well-well. (Job 37:23; Rom. 11:33) Then when you de pray, tell Jehovah how you feel about that character. We fit still praise Jehovah because e de help us and e de help our brothers and sisters for the whole world.—1 Sam. 2:1, 2. w23.05 3-4 ¶6-7

For 1919, God people free from the hand of Babylon the Great. Na that year Jesus choose “faithful and discreet slave” and them start to work at once so that people wey want worship Jehovah for the correct way, go start to waka for “the Holy Road.” (Matt. 24:​45-47; Isa. 35:8) Wetin other people don do to prepare “the Holy Road,” help people wey de travel for that road to learn more about Jehovah and wetin e get for mind to do. (Prov. 4:18) E still help them fit live their life the way Jehovah want. Jehovah no expect say make e people change everything for their life one time. Instead, na small-small e de correct e people. We go really happy to see the time wey we go fit make Jehovah happy for everything wey we de do! For road to continue to dey good, them need to de maintain-am. Since 1919, God don make sure say faithful and discreet slave continue to maintain “the Holy Road” so that e go help more people comot from lie-lie religion. w23.05 17 ¶15; 19 ¶16

Governing Body de train brothers wey de help them for the different-different committee of the Governing Body. This brothers de handle important work for Jehovah organization. Them don train them well to fit continue to care for Jehovah people. After Jehovah bring the last anointed Christian back to life and take-am go heaven near the end of great tribulation, the other sheep go continue to worship Jehovah for the correct way. We really happy say na Jesus Christ be our leader, so Jehovah worship no go ever stop. We know say that time, some nations go join together attack God people. Bible call this group of nation, Gog of Magog. (Ezek. 38:​18-20) The attack go short and e go fail, because them no go fit stop God people to worship Jehovah. Jehovah go save im people! For one vision, apostle John see “plenty-plenty people” wey be part of the other sheep. The angel tell John say this “plenty-plenty people” survive “the serious trouble,” wey be the great tribulation. (Rev. 7:9, 14) So we dey sure with all our heart say Jehovah go save them! w24.02 5-6 ¶13-14

Wetin we fit do to get holy spirit? To get-am, we go pray make God give us the spirit, study Bible, and join e servants worship-am for e organization. When we do this one, we go fit get the better-better character wey holy spirit de help person get. (Gal. 5:​22, 23) Na only people wey de think and do wetin clean for Jehovah eye e de give e holy spirit. E no go continue to give us holy spirit if we de think and do wetin bad. (1 Thess. 4:7, 8) Another thing be say, to continue to get holy spirit, make we “no treat message from God anyhow.” (1 Thess. 5:20) “Message from God” wey this verse talk about na things wey God use e spirit move e servants write for Bible. Some of them na things about the day of Jehovah and things wey de show say Satan world go soon end. We no go de think for our mind say Armageddon no go come for our time. Instead, we go show say we de wait for-am as we continue to dey busy for Jehovah worship and continue to do wetin good for Jehovah eye.—2 Pet. 3:​11, 12. w23.06 12 ¶13-14

As servants of Jehovah, wetin we go do if picture of naked people just show for our phone or computer when we no expect? Make we comot our eye from-am quick-quick. E go easy for us to fit do this one if we remember say our friendship with Jehovah dey important pass any other thing. The truth be say, even picture or film wey no de show people wey really dey naked, fit still make person start to think about sex wey no clean for God eye. Why we suppose run from them? Because we no want anything wey fit make us even start to think about sex wey no clean for God eye. (Matt. 5:​28, 29) One elder for Thailand wey e name na David talk say: “I de ask myself say, ‘Jehovah go happy if I continue to look this picture or film even if the people for inside no really naked?’ When I ask myself this kind question, e go help me do the correct thing.” If we de fear God and no want do wetin go pain-am, this one go help us do wetin correct for God eye. Bible talk say to fear God na “the start” or beginning “of deep sense.” w23.06 23 ¶12-13

The “inner room” for this Bible verse fit mean our different-different congregation. Jehovah don promise us say e go protect us for great tribulation if we continue to serve-am together with our brothers and sisters. So we need to do our best now to get strong love for them. This na one of the things wey go help us to fit survive the great tribulation. Things go really hard for everybody for great tribulation. (Zeph. 1:​14, 15) Things no go easy even for people wey de serve Jehovah. But if we prepare now, we go fit dey calm that time and even fit help other people. We go fit endure any problem wey we go face. When our brothers and sisters de suffer, we go do our best to help them or give them wetin them need because we de feel for them and we ready to help them. And if we love our brothers and sisters now, we go fit show them love for great tribulation. Then Jehovah go bless us and put us for Paradise wey we no go get any problem again.—Isa. 65:17. w23.07 7 ¶16-17

Many times, Bible describe people wey hold Jehovah tight as strong people. But no be everytime them feel like that. For example, sometimes, King David feel say e “strong like mountain,” but for some other time, e “start to fear.” (Ps. 30:7) Jehovah give Samson holy spirit wey make-am get power to fit do wonderful things. But e know say if Jehovah no give-am the power, e go just be like any other person. (Judg. 14:5, 6; 16:17) All this servants of Jehovah get power to do the work wey Jehovah give them because Jehovah help them. Apostle Paul na another person wey know say e need help from Jehovah. (2 Cor. 12:9, 10) E suffer because of sickness. (Gal. 4:​13, 14) Sometimes, e no easy for-am to do the correct thing. (Rom. 7:​18, 19) And some other time, e de worry about wetin fit happen to-am. (2 Cor. 1:8, 9) But when apostle Paul dey weak, na that time e de get power. How? Because Jehovah de give-am the power wey e need to fit endure im problem. w23.10 12 ¶1-2

When we de feel sometimes say we no get value, make we remember say Jehovah see something wey good about us wey make-am draw us near body. (John 6:44) E de see the better-better character wey we get wey we fit no see, and e know wetin dey our heart. (2 Chron. 6:30) So we go fit trust-am when e talk say we dey special. (1 John 3:​19, 20) Before we learn the truth, many of us do some things wey still de worry us for mind. (1 Pet. 4:3) Even people wey de worship Jehovah well still de fight the bad things wey de come their mind. What about you? Sometimes, you de feel say Jehovah no go ever forgive you? If na so you de feel, you no dey alone. Many servants of Jehovah feel like that. For example, when apostle Paul remember the mistakes wey e make before, e really make-am feel bad. (Rom. 7:24) Even after Paul repent and baptize, e still talk about imself say na im “small pass among the apostles,” and say na im be “number one” person among people wey de sin.—1 Cor. 15:9; 1 Tim. 1:15. w24.03 27 ¶5-6

One lesson wey we learn from the bad decision wey King Jehoash make be say we need to choose friends wey go help us love Jehovah. To fit get this kind friend, no be only people wey be our age we go make friends with. Remember say Jehoiada wey help Jehoash worship Jehovah well when e dey young senior Jehoash well-well. To know if na better friends you get, ask yourself this questions: ‘Them de help me make my faith strong more-more? Them de help me to fit follow wetin Bible talk? Them de talk about Jehovah and the things wey we de learn from Bible? Them de follow wetin Bible talk? Them go fit correct me when I make mistake or na wetin I like to hear them de tell me?’ (Prov. 27:5, 6, 17) The truth be say, if your friends no de worship Jehovah, you no need them. But if your friends de worship Jehovah and love-am well-well, make you hold them tight, because them go always help you.—Prov. 13:20. w23.09 9-10 ¶6-7

Alpha na the first letter for Greek alphabet, just as letter A be for us. And omega na the last letter for Greek alphabet, just as Z be for us. So, when Jehovah say na im be “the Alpha and the Omega,” e mean say when e start something, e must do-am reach the end and succeed. After Jehovah make Adam and Eve, e talk wetin e get for mind for them and their children, and for this earth. Bible talk say: “God bless them and e tell them say: ‘Make una born pikin them and make una plenty; make una full this earth and de control everything for this earth.’” (Gen. 1:28) When Jehovah talk this one, e just be like say e talk “Alpha.” Time de come when all Adam and Eve children wey obey Jehovah go full this earth and make-am Paradise. When this one go happen for future, e go just be like say Jehovah talk “Omega.” After Jehovah don make everything for heaven and earth, e talk something wey show say wetin e get for mind must happen. E just be like say e de talk say wetin e get for mind for this earth and for us must happen for the end of the seventh day.—Gen. 2:​1-3. w23.11 5 ¶13-14

To travel from Babylon go reach Israel fit take about four months and no be easy journey. But Jehovah promise say e go remove anything wey fit disturb their journey. For Israel people wey love Jehovah, the thing wey them go gain if them return to Israel big pass anything wey them go leave for Babylon. The blessing wey big pass for them na their worship to Jehovah. Israel people no get any temple wey them de use worship Jehovah for Babylon. Them no still get altar wey them fit use do sacrifice as the law wey Jehovah give Moses talk. And priests no dey to help them do sacrifice. Another thing be say, the people wey de worship lie-lie gods plenty well-well pass the people wey love Jehovah and want follow E law. So Israel people wey love Jehovah de wait for the time wey them go go back to Israel to start to worship Jehovah well again. w23.05 14-15 ¶3-4

We need Jehovah holy spirit to “continue to live as children of light.” Why? Because e no dey easy at all to live clean life for this Satan world wey people de live dirty life. (1 Thess. 4:​3-5, 7, 8) Holy spirit fit help us make we no de think like people for this world, wey no de think the wey Jehovah de think. Holy spirit go still help us do “every kind of thing wey dey good and wey correct for God eye.” (Eph. 5:9) One way wey we fit get Jehovah holy spirit na to pray to Jehovah make e give us holy spirit. Jesus talk say Jehovah “go give holy spirit to people wey de ask-am.” (Luke 11:13) And when we de worship Jehovah together for meeting, we de get holy spirit. (Eph. 5:​19, 20) Holy spirit go help us live our life the way wey go make Jehovah happy. w24.03 23-24 ¶13-15

You go like to dey more patient? If your answer na yes, then pray make Jehovah help you. To dey patient na one of the character wey holy spirit de help person get. (Gal. 5:​22, 23) So we fit pray make Jehovah give us holy spirit so that we go fit get this better character. If something happen wey fit make-am hard for us to dey patient, make we “continue to ask” for holy spirit to help us dey patient. (Luke 11:13) We fit still beg Jehovah make e help us de see things the way e de see-am. Then when we don pray, we need to continue to do our best to dey patient everyday. If we continue to pray make Jehovah help us dey patient and continue to do our best to dey patient, Jehovah go help us dey patient more-more even if e de hard us to dey patient before. Another thing wey fit help na to think deep about some examples for Bible. Bible get plenty example of people wey dey patient. When we think about them, we fit learn how to dey patient. w23.08 22 ¶10-11

Jesus help Peter know say Jehovah go care for-am. After Jesus come back to life, e use another miracle catch some fish for im disciples. (John 21:​4-6) This one make Peter faith strong say Jehovah go care for-am. E fit be say this one make Peter remember wetin Jesus talk before say Jehovah go care for people wey “put the Kingdom. . . as the number one thing for [their] life.” (Matt. 6:33) This one make Peter fit put the preaching work as the number one thing for im life, instead of im fisherman work. E use strong mind preach for the day of Pentecost for 33 C.E., and this one help many people become Christians. (Acts 2:​14, 37-41) Later, e help people from Samaria and people wey no be Jew to become Christians. (Acts 8:​14-17; 10:​44-48) Jehovah use Peter help people from different-different place to become Christian. w23.09 20 ¶1; 23 ¶11

Two years after Babylon people destroy Jerusalem, Nebuchadnezzar wey be king of Babylon dream about one big image wey really make-am fear. E talk say e go kill all im wise men if them no fit tell-am wetin e dream and wetin the dream mean. (Dan. 2:​3-5) Daniel need to do something quick-quick, if not people go die. So e “meet the king and beg-am make e give-am time to fit tell the king wetin im dream mean.” (Dan. 2:16) This one show say Daniel get faith and strong mind. Why we talk like that? No place for Bible talk say Daniel don talk wetin dream mean before. E tell im friends “say make them pray make the God wey dey heaven show them pity about the secret.” (Dan. 2:18) Jehovah answer their prayer and help Daniel fit tell King Nebuchadnezzar im dream and wetin e mean. This one save Daniel and im friends. w23.08 3 ¶4

Think about wetin we go gain when we dey patient. The more we dey patient, the more we go de happy and get peace of mind. When we dey patient, e go help us get better health. If we dey patient with people, our friendship with them go better. We go de do things together more-more for congregation. If we no quick vex when person do wetin pain us, the problem no go bad pass as e be. (Ps. 37:8, ftn.; Prov. 14:29) But the one wey dey important pass be say, we de copy the example of our Papa for heaven and this one go de make us near-am more-more. True-true, to dey patient na really better character wey all of us need to get! Even though say sometimes e no dey easy to dey patient, Jehovah fit help us get this better character. As we dey patient de wait for the new world, we dey sure say “Jehovah de put eye for people wey de fear-am, people wey de expect make e show them love wey no de fail.” (Ps. 33:18) Make all of us make up our mind to continue to do our best to get this better character and de show-am. w23.08 22 ¶7; 25 ¶16-17

James help us see say person fit talk say e get faith, but wetin e do show say e de deceive imself. (Jas. 2:​1-5, 9) James talk about servant of Jehovah wey see brother or sister wey need cloth or food, but e no gree help-am. Even if the person talk say e get faith, im faith dey useless because e no gree help im brother. (Jas. 2:​14-16) James use Rahab as better example of person wey use wetin e do show say e get faith. (Jas. 2:​25, 26) The things wey e hear about Jehovah help-am see say Jehovah de support Israel people. (Josh. 2:​9-11) Then, e do wetin show say e put faith for Jehovah; e protect two Israel people wey Jericho people be want kill when them come check how the land of Canaan be. Jehovah see Rahab as righteous person just the way e see Abraham as righteous person, even though say e no be Israel person wey de follow the Law of Moses. We learn from Rahab say e dey important to use wetin we de do show say we get faith. w23.12 5-6 ¶12-13

As servant of Jehovah, no be only simple things we de like to learn from Bible. With the help of God spirit, e de sweet us to learn “even the deep things of God.” (1 Cor. 2:9, 10) For your personal study, do research for some topic and e go make your friendship with Jehovah strong more-more. For example, you fit take time study how Jehovah show say e love im servant for Bible time and how this one show say e love you too. You fit study about how Jehovah arrange make Israel people worship-am and compare-am to how we de worship-am today. Or you go fit study about how wetin Bible talk say go happen for Jesus life happen when e dey this earth. You go really enjoy to use Watch Tower Publications Index or Research Guide for Jehovah’s Witnesses to study this topic them. When you do deep Bible study, e go make your faith strong and help you know God well.—Prov. 2:4, 5. w23.10 18-19 ¶3-5

For this verse, apostle Peter talk about two important thing. (1) E talk say make we get “deep love” for each other. The word wey them translate as “deep” mean “to stretch something.” (2) E tell us wetin we go do when we get deep love for our brothers and sisters. Deep love go move us to forgive them when them do wetin pain us. Think about one table wey don get plenty mark ontop. To make people no see the mark, we fit spread cloth ontop to cover all the mark. No be only one, or two mark the cloth go cover, but na all of them. For the same way, if we get deep love for our brothers and sisters, e go help us fit cover or forgive them when them make mistake or do wetin pain us. We need to get strong love for our brothers and sisters. This one go help us forgive them even when e no easy for us. (Col. 3:13) When we forgive them, e go show say we get strong love for them and say we want make Jehovah happy. w23.11 11-12 ¶13-15

When King Josiah dey 26 years, e start to repair the temple. When them de repair the temple, them see “the book of the Law wey Jehovah use Moses give Israel people.” When them read-am to Josiah, e really touch-am, and e make up im mind to do wetin the law talk. (2 Chron. 34:​14, 19-21) You go like to de read Bible everyday? If you de try to read-am everyday, how e de go? You de mark the verse them wey really touch you? When Josiah dey around 39 years, e make one serious mistake wey kill-am. Instead to ask Jehovah, e use over sabi do wetin e no suppose do. (2 Chron. 35:​20-25) This one teach us serious lesson. No matter how many years we don de study Bible or how many years we dey, we need to continue to follow wetin Jehovah talk. To fit do this one, we need to de always pray make Jehovah direct us, study Bible, and de follow the advice of people wey de worship Jehovah well. This one fit help us no make serious mistake, and we go de happy more-more.—Jas. 1:25. w23.09 12 ¶15-16

Bible talk about plenty women wey love Jehovah and worship-am well. This women for Bible time ‘control how them de behave,’ and “them get faith for everything wey them de do.” (1 Tim. 3:11) Another thing be say, better example of mature Christian sisters wey una fit copy dey una congregation. Young sisters, the truth be say una fit know some mature Christian sisters for una congregation. Make una try see their better-better character wey una fit copy. Then think about how una fit de show those better-better character. One important character wey go help you be mature Christian na to de carry body down. Woman wey de carry body down go get better friendship with Jehovah and other people. For example, woman wey love Jehovah go support the arrangement wey Jehovah make for 1 Corinthians 11:3. Wetin dey this Bible verse help us know who be head for family and for congregation. w23.12 18-19 ¶3-5

Jehovah want make husband love im wife and give-am the things wey e need. E still want make e be good friend to im wife and help-am continue to hold Jehovah tight. To learn how to use your mind well, be person wey de respect women, person wey them fit trust and wey no de play with im work, go help you if you choose to marry. After you don marry, you fit get your own pikin. Wetin you fit learn from Jehovah example wey fit help you be good papa? (Eph. 6:4) Jehovah tell Jesus say e love-am and say e happy with-am. (Matt. 3:17) If you get children, make sure say you de always tell them say you love them. Praise them when them do good things. Papa wey de copy Jehovah example de help im children become mature Christians. To fit prepare now to be good papa for future, de care for your family members, brothers and sisters for congregation and de show say you love them. And learn to tell them say you love them and value them.—John 15:9. w23.12 28-29 ¶17-18

Even though say we de serve Jehovah, we de face problem wey other people de face like sickness or other serious problems. And because we de serve Jehovah, people fit still suffer us or dey against us. Even though say Jehovah no de stop-am make bad things no happen to us, e promise say e go help us. (Isa. 41:10) So, Jehovah fit help us continue to happy, make better decision, and continue to hold-am tight even when we de face serious problems. Jehovah promise us say e go give us wetin Bible call “the peace wey God de give.” (Phil. 4:6, 7) This na the peace of mind wey person de get because e be Jehovah friend. This peace “pass anything wey person fit understand.” E dey wonderful pass anything wey we fit ever think about. For example, you don ever pray to Jehovah well-well when you de face problem and you come see say your mind calm down after you pray finish? That na “the peace wey God de give.” w24.01 20 ¶2; 21 ¶4

People wey love Jehovah de use all their heart praise im name. David know say when we praise Jehovah name, e mean say we de praise Jehovah. When we hear Jehovah name, e de make us think about the kind God wey e be. E de help us think about the better-better character wey e get and the wonderful things wey e de do. Na im make David love to treat Jehovah name as something wey dey holy and praise-am. And na everything about-am e take praise Jehovah name. This one mean say e praise-am with all im heart. For the same way, na the Levites be the number one people for Israel wey de praise Jehovah. Them know say no word wey them fit use, go fit praise Jehovah name finish. (Neh. 9:5) We dey sure say the way them de bring body down and use all their heart praise Jehovah, go don make-am happy. w24.02 9 ¶6

Jehovah no go see you as person wey don fail just because you no fit do wetin you plan wey pass your power. (2 Cor. 8:12) Learn something from the problems wey de make-am hard for you to do wetin you don plan. No forget the ones wey you don do. Bible talk say: ‘God no be bad person so e no go forget the things wey you don do.’ (Heb. 6:10) Since God no go forget wetin you don do, make you no forget them too. Make you think about the things wey you don do. E fit be to become Jehovah friend, to de preach to people, or to baptize. Just as you succeed to do the things wey you plan to do before, you go fit succeed to do the one wey you plan now. Jehovah go help you fit do wetin you plan as you de worship-am. Make you try to see how Jehovah de bless you. This one go help you de happy as you de do your best to do wetin you plan. (2 Cor. 4:7) If you no tire and stop to de do your best, Jehovah go bless you well-well.—Gal. 6:9. w23.05 31 ¶16-18

Jehovah like to let im servants know say e love them and say e de happy with them. Two times for Bible, Jehovah tell Jesus say, Jesus na im pikin wey e love and wey de make-am happy. (Matt. 3:17; 17:5) You go like make Jehovah tell you say e de happy with you? Jehovah no de talk to us direct from heaven for this our time, but na Bible e de use talk to us. When we read the things wey Jesus tell im disciples, e go just be like say Jehovah de tell us the same thing. Jesus copy the way im Papa de do things and e copy-am finish! So when you read about how Jesus use better words make im disciples mind come down, you go fit use your mind think about how Jehovah de use those words make your mind come down. (John 15:9, 15) When we de face problems, e no mean say Jehovah no de happy with us. Instead, them de give us chance to show how our love for Jehovah strong reach and say we trust-am.—Jas. 1:12. w24.03 28 ¶10-11