September

God don give Jesus power to end all our problem. The miracles wey Jesus do show say e get the power to remove all the problems wey we no fit solve by ourself. For example, e miracles show say e get the power to remove the sin wey dey our body wey de make us sick and die. (Matt. 9:​1-6; Rom. 5:​12, 18, 19) E still show say e get the power to comot “all kind of” sickness and even bring people wey don die back to life. (Matt. 4:23; John 11:​43, 44) Jesus get the power to control breeze wey fit scatter things and win demons. (Mark 4:​37-39; Luke 8:2) E really de make us happy say Jehovah don give Jesus this kind power! We fit dey sure with all our heart say the good things wey Jehovah promise us go happen for E Kingdom. The miracles wey Jesus do when e dey this earth teach us say when e start to rule this earth for God Kingdom, the miracles wey e go do, go really plenty pass the ones wey e don do. w23.04 3 ¶5-7

If you dey big congregation and you feel say this one de make-am hard for them to call you, e fit make you no want raise your hand up to answer again. But no allow this one stop you to raise your hand to answer question. Try to prepare plenty answer for each meeting. So that if them no call you for the beginning, them fit call you before the meeting end. When you de prepare your Watchtower, think about how each paragraph connect to the topic for the article. This one go help you get better answer wey you fit give for different-different paragraph. Another thing be say, you fit prepare to answer question for paragraph wey discuss things for Bible wey no easy to explain. Why? Because plenty people fit no raise their hand when them reach that paragraph. Wetin you fit do if you still see say plenty meeting don pass wey you no still answer any question? Meet the brother wey de conduct before meeting start and tell-am the paragraph wey you go like answer question. w23.04 21-22 ¶9-10

Joseph no de waste time to do wetin Jehovah talk, and this one make-am better husband. At least three times for Bible, Jehovah tell-am something wey e go do for e family. And anytime wey Jehovah tell-am say make e do something, e de do-am quick-quick even though say the thing fit hard for-am to do. (Matt. 1:20; 2:​13-15, 19-21) As Joseph do wetin Jehovah tell-am, e protect, support, and care for Mary. Wetin Joseph do go don make Mary respect-am and love-am more-more! Husband, you go fit copy Joseph example when you de follow advice from Bible as you de care for your family. When you follow this advice even if e go make you change some things for your life, e go show say you love your wife, and e go make una love continue to grow. One sister for Vanuatu, wey e don pass 20 years wey e marry talk say: “I de respect my husband more when e follow Jehovah advice. E de make my mind come down and de help me fit trust e decision.” w23.05 21 ¶5

Israel people wey de go back to their land go become “holy people” to Jehovah. (Deut. 7:6) But this one no mean say them no go need to change some things for their life to make Jehovah happy. Na for Babylon them born plenty Israel people wey dey Babylon. So, na the way Babylon people de think and do things this Israel people sabi. After 69 years wey Israel people comot from Babylon, Governor Nehemiah surprise to see say some children wey them born for Israel, no de understand Hebrew language wey be the language of Israel people. (Deut. 6:6, 7; Neh. 13:​23, 24) So how this children go take learn how to love and worship Jehovah if them no de understand Hebrew language wey be the main language wey them use write God Word? (Ezra 10:3, 44) This Israel people get plenty things wey them go need to change for their life. But e go dey easy for them to change this things for Israel as them start to worship God for the correct way small-small.—Neh. 8:8, 9. w23.05 15 ¶6-7

The truth be say, even though e de really hungry us to do wetin we plan and we get self-control, things fit still happen wey fit make-am hard for us to do wetin we plan. For example, “wetin [we] no expect” fit happen wey go make us no get time to do wetin we plan. (Eccl. 9:11) We fit face problem wey fit make us tire or no get power to do wetin we plan. (Prov. 24:10) Because we no perfect, we fit make mistake wey go make-am hard for us to fit do wetin we plan. (Rom. 7:23) Or we fit just tire. (Matt. 26:43) Wetin go help us fit continue to try to do wetin we plan even if something happen wey make-am hard for us to do wetin we plan? Remember say if something happen wey make-am hard for you to do wetin you plan, this one no mean say you don fail. Bible talk say we fit face problem plenty time. But e still talk say we go fit succeed to do wetin we plan even when we get problem. When you do your best to do wetin you plan even when wetin fit stop you happen, you de show Jehovah say you want make-am happy. E de really make Jehovah happy to see say you de do your best to do wetin you plan. w23.05 30 ¶14-15

To pioneer de help young brothers learn how to work with all kind of people. E still de help them fit manage their money well, and no de spend anyhow. (Phil. 4:​11-13) One better way to join full-time service na to start with auxiliary pioneer, that one fit help you become regular pioneer. And when you pioneer, e fit give you the chance to enjoy other work for full-time service, like to join build for our organization or go work for Bethel. E good make young brothers put-am for mind to get the better character wey go fit make them be elders, so that them go fit help brothers and sisters hold Jehovah tight more-more. And Bible talk say na better work brothers wey de do their best to be elders, want do. (1 Tim. 3:1) But before any brother become elder, e go first be ministerial servant. Ministerial servants get different-different ways wey them take de help elders. Elders and ministerial servants de carry body down as them de do their best to help their brothers and sisters. And them de put all their mind for the preaching work. w23.12 28 ¶14-16

King Josiah dey 16 years when e start to near Jehovah more-more. Na that time e learn more about Jehovah and how e fit do wetin go make Jehovah happy. But things no easy for-am because e still dey young. That time, plenty people de worship other gods, so Josiah need to get strong mind to fit stop them. And Jehovah help-am to fit do-am. And before e reach 20 years, e start to remove the lie-lie gods wey the people de worship. (2 Chron. 34:1, 2) How you fit copy Josiah example if you dey young? Learn more about Jehovah and im better-better character. This one go move you to give your life to Jehovah. And how e go take affect your life? One young brother wey im name na Luke wey baptize when e dey 14 years talk say: “From the day I give my life to Jehovah, I know say to worship Jehovah go be the number one thing for my life, and I go do my best to make-am happy.” (Mark 12:30) Jehovah go bless you well-well if na the same thing dey your mind. w23.09 11 ¶12-13

E never reach one year wey them form the congregation wey dey Thessalonica, when apostle Paul write this letter to them. This one mean say na new elders de care for the congregation and this one fit don make them make plenty mistake. Even with this one, the congregation still need to respect the elders. As great tribulation de near more-more, we go need our congregation elders pass the way we need them now. Because e fit be say e no go dey possible for us to receive direction from brothers for our headquarters and branch office again. So e dey important make we do our best to love and respect elders for our congregation now before that time reach. No matter wetin happen, make we continue to de use our sense well, and make we no de put mind for their mistake. Remember, Jehovah de use Jesus direct elders. Just as helmet de protect soldier head, na so our hope say God go save us when e destroy this wicked world, de protect our mind and help us fit think well. We know say nothing wey this Satan world fit give us, get any value. (Phil. 3:8) Our hope de make our mind come down make us no de worry-worry. w23.06 11-12 ¶11-12

People wey de hear wetin the “woman wey no get sense” de talk need to choose whether them go go e house or them no go go. We get plenty important reason why we need to run from sex wey no clean for God eye. Bible tell us say the “woman wey no get sense” talk say: “Water wey person thief de sweet.” (Prov. 9:17) Wetin “water wey person thief” mean? Bible talk say sex wey husband and wife de enjoy be like water wey de cool person body. (Prov. 5:​15-18) Na only man and woman wey marry each other for the correct way get right to sleep with each other. But this one different from “water wey person thief.” E dey different because “water wey person thief” fit mean sex wey no clean for God eye. People wey de do sex wey no clean de hide do-am like person wey de thief something. This bad thing wey them de do fit de “sweet” them especially if them think say nobody go ever know about-am. Them de really deceive theirself because Jehovah de see everything. Nothing bad reach to lose our friendship with Jehovah. So nothing about sex wey no clean for God eye de “sweet.”—1 Cor. 6:9, 10. w23.06 22 ¶7-9

Wetin you go do if you see say you no de pray from your heart again or say you no de enjoy preaching like before? No think say you no get Jehovah spirit again. Because we no dey perfect, the way we de feel about ourself fit change anytime. If the way you de worship Jehovah no de sweet you like before, make you think about the example of apostle Paul. Even though say e do im best to copy Jesus example, e know say no be everytime e go de sweet-am to do as e dey im mind. Apostle Paul always want give Jehovah im best no matter how im condition be. For the same way, make you no use the way you de feel make decision. Make up your mind say you must do the correct thing no matter how you de feel. And if you continue to do the correct thing, as time de go, the way you de feel fit change.—1 Cor. 9:16. w24.03 11-12 ¶12-13

We fit show say we love our brothers and sisters when we make them be our friend. (2 Cor. 6:​11-13) For plenty of us, brothers and sisters for our congregation come from different-different place and de do things for different-different way. We go fit continue to love them if we de put mind for their better-better character. When we de see other people the way Jehovah de see them, we de show say we love them. Another character wey go help us for great tribulation na love. How Jehovah go protect us when great tribulation start? Make we see wetin Jehovah tell Israel people wey dey Babylon when enemy attack Babylon. E talk say: “My people, make una enter una inner room and close door. Make una hide una self small until God vex finish.” (Isa. 26:20) E fit be say, we too go need to follow wetin this verse talk for great tribulation. w23.07 6-7 ¶14-16

Make people know you as person wey ready to adjust. Ask yourself say: ‘People de see me as person wey ready to adjust, wey de agree with other people, and no de quick vex? Or them de see me as person wey no de gree change e mind, harsh, or wey get strong head? I de do things the way other people want if e no dey against wetin Jehovah want?’ If we always ready to adjust, e de show say we de copy Jehovah and Jesus well-well. To show say we de do things with sense, we go ready to adjust when things change. When things change, e fit make life hard us. For example, we fit get serious sickness when we no even expect. Or problem for government or business, fit turn things up-side-down and make things hard for us well-well. (Eccl. 9:11) Even when Jehovah organization change the way we de do some things, e fit hard us to adjust. We go fit adjust if we do this four things: (1) Agree say things don change, (2) think about how things go be for front, no be how e be before, (3) de see the good things wey de happen for our life now, and (4) de help people. w23.07 21-22 ¶7-8

Prophet Daniel dey young when Babylon soldiers carry-am from Jerusalem go Babylon as slave. But when the people for Babylon government see Daniel, them like-am because na fine boy. The things wey them see about Daniel, na “only wetin eye fit see”—Daniel no get comma for body, e fine well-well and e come from rich family. (1 Sam. 16:7) Because of this one, Babylon people train-am to fit work for their palace. (Dan. 1:3, 4, 6) Jehovah love Daniel because e choose to live im life the way God want. In fact, Daniel dey around 20 years when Jehovah talk say e be like Noah and Job wey don worship-am for many years. (Gen. 5:32; 6:9, 10; Job 42:​16, 17; Ezekiel 14:14) And Jehovah continue to show say e love Daniel till e die.—Dan. 10:​11, 19. w23.08 2 ¶1-2

If you want buy house you go like check everything about the house by yourself. We fit do the same thing when we de read and study Bible. If you rush read Bible, na only simple things you go fit learn and you no go gain plenty. (Heb. 5:12) Just as you go do for the house, take time study Bible well. One way to fit study Bible well na to see how the different-different story for Bible connect to each other. Another thing be say, make you try understand wetin you de learn from Bible and why you believe say na the truth. To fit really understand Bible well, we need to take time study the deep truth wey dey Bible. Apostle Paul encourage Christians for im time say make them take time study God word. This one go make them “fit really understand well, how wide and long and high and deep the truth be.” E go make their faith strong and them go fit stand well. (Eph. 3:​14-19) Na the same thing we need to do. w23.10 18 ¶1-3

Bible get many other example of people wey show say them dey patient. You fit take time study about this examples. For example, even though say na when David dey young Jehovah choose-am say e go be king for Israel, e wait for many years before e become king. Simeon and Anna continue to worship Jehovah well as them de wait for the Messiah wey Jehovah promise. (Luke 2:​25, 36-38) As you de study their story, try answer this questions: Wetin fit don help this person dey patient? Wetin e gain as e dey patient? You fit still learn from the example of people wey no dey patient for Bible. (1 Sam. 13:​8-14) You fit ask yourself say: ‘Wetin fit don make them no dey patient? Wetin happen because them no dey patient?’ w23.08 25 ¶15

Apostle Peter no allow anything stop-am make e no follow Jesus. For example, e get one time wey Jesus talk something wey im disciples no understand. (John 6:68) Instead make them wait make Jesus explain wetin e mean, many people stop to follow-am. But Peter no join them because e know say na only Jesus “de talk things wey go make person get life wey no go end.” Jesus know say im disciples go run leave-am. But Jesus still tell Peter say e go come back and continue to hold Jehovah tight. (Luke 22:​31, 32) Jesus know say “the spirit ready but body weak.” (Mark 14:38) So Jesus no lose hope for Peter even after e deny-am. After Jesus come back to life, e appear to Peter when Peter dey alone. (Mark 16:7; Luke 24:34; 1 Cor. 15:5) This one go don make Peter really happy again. w23.09 22 ¶9-10

God de forgive or cover person sin, if the person put faith for-am. So, when e forgive person for something wey e do, E no go punish the person for that thing again. (Ps. 32:1, 2) E go see the person as righteous person or person wey no get sin, because of the person faith. Even though say Abraham, David, and other people wey worship Jehovah well no dey perfect, Jehovah see them as righteous people. Why? Na because of their faith and especially when e compare them to people wey no de worship-am. (Eph. 2:12) For the letter wey apostle Paul write to the Christians for Rome, e explain say we need faith to fit be God friend. Na so e be for Abraham and David, and na so e still be for us today. w23.12 3 ¶6-7

Today, all servant of Jehovah get the honor to use their time, power and things wey them get worship Jehovah. We go show say we really value the favor wey we get to worship Jehovah when we give Jehovah our best as we de worship-am. Apostle Paul tell us some things wey we no suppose take play as we de worship Jehovah. (Heb. 10:​22-25) Them be, to de pray, to de preach to people, to de go meeting, and to de encourage our brothers and sisters as we de see as the day of Jehovah de near more-more. Near the end of the book of Revelation, Jehovah angel talk say: “Worship God.” Na two times e talk-am to show say e really dey important. (Rev. 19:10; 22:9) Make we no ever forget this deep truth wey we don learn for Bible about Jehovah wonderful temple and make we always value the honor wey we get to worship our great God Jehovah. w23.10 29 ¶17-18

All of us need to “continue to show each other love.” But, remember wetin Jesus talk. E say: “The love wey most of the people get go de go down.” (Matt. 24:12) Jesus no mean say many of im disciple go stop to de show love for each other. But we need to dey careful make the character of people for this world no affect how we de treat each other. So, wetin go help us know if we get strong love for our brothers and sisters? One thing wey fit help us know if we get strong love for our brothers and sisters na to de check how we de behave when some things happen. (2 Cor. 8:8) Make we see one example for wetin apostle Peter talk. E say: “Another thing wey dey important be say, make una get deep love for each other, because love de cover plenty sin.” (1 Pet. 4:8) So, wetin we de do when brother or sister do wetin pain us de show if our love for them strong. w23.11 10-11 ¶12-13

We no go fit talk say we de obey Jesus if we no love everybody for congregation. The truth be say for congregation, we fit dey close to some people pass other people. Na so e still be for Jesus! (John 13:23; 20:2) But Peter advice us say make we do our best to love our brothers and sisters well-well like family. (1 Pet. 2:17) Peter advice us say make we “get strong love wey come from the heart for each other.” (1 Pet. 1:22) This one mean say we go love somebody even if e hard to love the person. For example, imagine say one brother or sister do wetin make you vex. The first thing wey fit come your mind fit be to do-am back instead to show-am love and forgive-am. But Peter learn from Jesus say this kind character no de make God happy. (John 18:​10, 11) Peter write say: “Make una no pay bad with bad or insult person wey insult una. Instead, pay the person back with blessing.” (1 Pet. 3:9) So, make the strong love wey you get for your brothers and sisters move you to de treat them well. w23.09 28-29 ¶9-11

E de surprise us how small pikin de grow. The way them de grow fast-fast just be like say them no need to do anything wey go help them grow. But to become mature Christian no be like that. (1 Cor. 13:11; Heb. 6:1) To be mature Christian, we must get better friendship with Jehovah. We still need holy spirit to help us get better character, learn some things wey fit help us for our life everyday, and prepare to handle more work for future. (Prov. 1:5) Jehovah make us to be man or woman. (Gen. 1:27) E clear say man body different from woman own, and them still different for other ways. For example, the work wey Jehovah give men to do different from the one wey e give women. So, them need better character and need to sabi do things wey go help them fit do the work wey Jehovah give them.—Gen. 2:18. w23.12 18 ¶1-2

Jesus want make people use im Papa real name? Yes! Some people wey de lead for religion that time believe say for person to call God name de show say the person no get respect for God. But Jesus no allow this kind bad teaching stop-am to use im Papa name. Think about wetin happen when e pursue demons comot from one man body for one area wey them de call the Gerasenes. The people start to fear and beg Jesus say make e comot from their area, so e no stay there again. (Mark 5:​16, 17) Even with this one, Jesus want make people for there know Jehovah name. So e tell the man wey e cure say make e tell people for the area wetin Jehovah don do for-am, no be wetin Jesus do for-am. (Mark 5:19) Na the same thing Jesus want make we do today. E want make we help people for the whole world know Jehovah name. (Matt. 24:14; 28:20) When we do our best to help people know Jehovah name, we de make Jesus wey be our King happy. w24.02 10 ¶10

Na big honor e be for us to dey Jehovah organization for this last days wey problem full everywhere. As the condition of this world de bad more-more, Jehovah don give us brothers and sisters to help us fit continue to worship-am well. (Ps. 133:1) Jehovah de teach us to fit enjoy our family life. (Eph. 5:33–6:1) And e don give us the sense wey we need to fit handle all our problems and get peace of mind. We need to do our best to fit continue to worship Jehovah well. Why? Because sometimes, our brothers and sisters fit talk or do wetin go pain us. We fit no happy because of our own mistake, especially if the mistake happen plenty times. So, we need to continue to worship Jehovah even when (1) brother or sister do wetin pain us, (2) our husband or wife do things wey pain us well-well, and (3) when our mistake no make us happy. w24.03 14 ¶1-2

Plenty times, you go hear and read about brothers and sisters wey decide to do more for Jehovah. E fit be say them go School for Kingdom Evangelizers or them go where them need more publishers. If your condition go allow you do like this, make you no allow anything stop you. Jehovah people de always look for chance to do more for-am. (Acts 16:9) What if your condition no allow you to do more for Jehovah now? Abeg, make you no think say other people wey fit do more for Jehovah better pass you. Wetin dey important be say you continue to endure as you de worship Jehovah. (Matt. 10:22) No forget say wetin de make Jehovah happy na when you do your best no matter your condition. This na one of the best way wey you fit continue to follow Jesus after you don baptize.—Ps. 26:1. w24.03 10 ¶11

Our Papa for heaven promise us say e go forgive us if we repent. (Ps. 86:5) So if you don really repent from the sins wey you commit before you baptize, make you get-am for mind say Jehovah don forgive you. Wetin go help us stop to de feel say Jehovah no go ever forgive us? Remember say Jehovah no de expect make we do pass where our power reach, and e no go ever tell us say make we do pass where our power reach. E value anything wey we do for-am as far say na the best wey we fit do. You fit still think deep about some people for Bible wey worship Jehovah with all their heart. Think about apostle Paul. E use all im heart travel go preach for different-different place and form plenty congregation. But when im condition change and e no fit preach like before, e mean say Jehovah no happy with-am again? No. E continue to do im best and Jehovah bless-am. (Acts 28:​30, 31) Na so e still be, our best fit no be the same all the time. Wetin dey important to Jehovah na why we do wetin we de do. w24.03 27 ¶7, 9

Jesus use e own prayer, show e disciples example wey them fit follow about prayer. From the beginning of e preaching work till the end, Jesus pray plenty times. Jesus arrange time to fit pray because e always dey busy and plenty people always dey with-am. (Mark 6:​31, 45, 46) E wake up for early morning so that e go get time to pray when people no dey. E get one time wey Jesus use the whole night pray before e make one important decision. (Luke 6:​12, 13) The night before Jesus die, e pray plenty times because time don reach for-am to do the part of e work wey hard pass. (Matt. 26:​39, 42, 44) Jesus use e example teach us say no matter how we dey busy reach, we need to get time wey we go take de pray. Like Jesus, we fit need to arrange time wey we go de use pray. E fit be say we go need to wake up for early morning to pray or wait to pray for night when everywhere don quiet. If we de do like that, we de show say we really value the chance wey Jehovah give us to fit pray to-am. w23.05 3 ¶4-5

Bible talk about anointed Christians say, “God don pour im love” for their heart. One book compare the love wey Jehovah get for anointed Christians to the water wey dey inside river. E just be like say them pour all the water wey dey inside river for their heart. This example show say Jehovah really love anointed Christians. And them know say Jehovah love them. (Jude 1) Apostle John talk how anointed Christians de feel when e write say: “See the kind big love wey the Papa don show us, as e gree say make them call us children of God!” (1 John 3:1) Na only anointed Christians Jehovah love? No, Jehovah don show say e love all of us. Wetin be the biggest thing wey Jehovah don do wey show say e really love us? Na Jesus sacrifice. No love pass this one!—John 3:16; Rom. 5:8. w24.01 28 ¶9-10

The verse for today text tell us another thing wey help David when e de fear. Even though say im life still dey for danger, e think about wetin Jehovah go do for-am for future. David know say Jehovah go save-am for the correct time. After all, Jehovah don talk say na David go be the next king for Israel. (1 Sam. 16:1, 13) And David dey sure say anything wey Jehovah promise must happen. Wetin Jehovah don promise you? We no de expect say Jehovah go hide us make problem no affect us. But no matter the problem wey we fit face for this Satan world, Jehovah go remove-am when im Kingdom come. (Isa. 25:​7-9) Jehovah get the power to bring people wey don die back to life, remove all our sickness, and remove all the people wey dey against us because we de worship-am.—1 John 4:4. w24.01 6 ¶12-13

Think deep about why you give Jehovah your life and baptize. You give Jehovah your life and baptize because you want support Jehovah and e Kingdom. Remember the things wey make you believe say this na the truth. You learn about Jehovah, and this one make your love and respect for-am grow and you come de see-am as your Papa for heaven. Wetin you learn from Bible make you get strong faith and make you comot hand for bad things and start to do wetin Jehovah want. Your mind really come down when you see say Jehovah don forgive you. (Ps. 32:2) You start to go meeting, and preach to people about the better-better things wey you don learn. Now wey you don give Jehovah your life and baptize, you don de waka for the road wey go make you get life wey no go end. And you don make up your mind say you go continue to waka for this road. (Matt. 7:​13, 14) Make you stand strong, no shake as you de obey Jehovah. w23.07 17 ¶14; 19 ¶19

When you de think about the promise wey you make to Jehovah when you give your life to-am, this one go help you fit face any temptation. For example, you no go de put eye for another person husband or wife because you don already promise Jehovah say you no go ever do that kind thing. If you no allow this kind thing grow for your heart and mind, you no go de struggle later to comot-am after e don enter body. E go make you no follow the bad things wey people de do. (Prov. 4:​14, 15) When you think about how Jesus make up im mind to make im Papa happy, that one go help you reject any work or anything wey you know say e no go make Jehovah happy, as you don give-am your life. (Matt. 4:10; John 8:29) The truth be say, when we de face problem or temptation, we de get better chance to show say we don make up our mind to continue to follow Jesus. If you do like that, Jehovah go really help you to fit hold-am tight. w24.03 9-10 ¶8-10