Help for People Wey Family Member De Suffer Them

The World Health Organization talk say, “One big problem for the whole world wey be like sickness wey de spread na how people de suffer women, and we really need to do something about-am quick-quick.” That organization still talk say if you count 10 women, 3 among them don suffer for the hand of their husband or person wey them de live with. And one report from the United Nations talk say, for one year, 137 women for different part of the world de die every day for the hand of their husband or another family member.a

Different-different reports fit show how plenty people de suffer for house like this, but they no go fit tell us anything about the kind pain wey this kind people de feel for their heart and even for their body.

Person for your family de suffer you? Or you know person wey de face this kind problem? If your answer na yes, see this points from Bible wey go fit help you.

No be your fault if your husband de suffer you

Something dey wey fit help you

You no dey alone

That kind suffer go soon end

How you fit help person wey them de suffer-am

No be your fault if your husband de suffer you

See wetin Bible talk: “We go answer to God one by one, for the things wey we don do with our life.”​—Romans 14:12.

Remember this one: The person wey de suffer you go answer for the things wey e don do.

If e de blame you for the things wey e de do to suffer you, e dey wrong. God want make husband de love e wife, no be to de beat-am or suffer-am.​—Colossians 3: 19.

Sometimes, person fit de beat or de suffer e wife because e get mental sickness, or e fit be because of the kind family wey e come from, or e fit be because e de over drink. Even so, e go answer to God for the way e de treat you. And na e hand e dey to change that kind behaviour.

Something dey wey fit help you

See wetin Bible talk: “When plenty people dey wey de give advice, we go succeed.”​—Proverbs 15:22.

Remember this one: If you feel say you no dey safe or you no know wetin you go do, other people fit help you.

Why you fit need other people to help you? Many things fit dey for your mind as you de face this kind suffer. E fit hard for you to know wetin be the best thing to do because you no know which of all this points dey more important:

• You want dey safe

• You want wetin go benefit your children

• You no get money

• You love your husband

• You want save your marriage if your husband change e behaviour

E dey normal if you no know wetin you go do or if you just confuse. Who go fit help you?

Your friend wey you trust or your family member fit help you feel better. Even if na just to de talk to person wey really care about you, e go really go far to help you.

Some organizations get telephone numbers wey people wey their husband de beat or suffer them fit call. You fit get quick help if you call this numbers. People wey de work for this organizations fit help you plan wetin you go do to dey safe. If your husband agree say wetin e de do dey wrong and e really want change, call any of those organizations for phone, they fit help your husband to know the first steps wey e need to take.

Other people wey you fit call for emergency time fit help you if you need help quick-quick. This people fit be doctors, nurses, or other people wey their work na to handle that kind situation.

You no dey alone

See wetin Bible talk: “Jehovahb dey near people wey de feel say their own don finish; E de save people wey life don tire.”​—Psalms 34:18.

Remember this one: God don promise to help you.

Jehovah really get you for e heart. (1 Peter 5:7) E understand all the things wey you de think, deep inside your head and how you really de feel. E fit use e Word, the Bible, help you calm your heart and mind. E want make you de pray. When you pray, you fit ask Jehovah say make e give you good sense and power to manage your problem.​—Isaiah 41:10.

That kind suffer go soon end

See wetin Bible talk: “Each one of them go stay, for e own farm and under e own fig tree, and nobody go make them fear.”​—Micah 4:​4, footnote.

Remember this one: Bible don promise us say time de come for future wey everybody go get peace for e own house.

Na only Jehovah get the complete and permanent solution for all our problems. Bible promise us say: “E go wipe all the tears from their eye, and they no go die again, people no go de cry again, pain no go dey again.” (Revelation 21:4) That time, we no go de remember all the bad things wey we de face now because na good ones go don replace them. (Isaiah 65:17) Na the fine future wey God promise us for Bible be that.