As People No De Trust Politicians Again​—Wetin Bible Talk?

For year 2024, people around the world go do plenty election pass all the election wey don happen for one year before. But many people no de trust politicians again.

• When them interview people for America, many of them talk say “plenty people for politics only want do things for themself” no be say them want do better things to help the people wey them de rule.a​—Pew Research Center, September 19, 2023.

Plenty young people no de trust people for politics too.

• “Young people want solution to problems wey de worry people, but when them interview them, them talk say people for politics no de solve this problems wey de worry people.”​—The New York Times, January 29, 2024.

• “According to one research, young people trust people wey get plenty followers for social media pass the way them trust politicians.”​—The Korea Times, January 22, 2024.

We fit really trust say people for politics go make our future better? Who we fit really trust?

Dey careful about who you go trust

E good make people dey careful about who them go trust. Bible talk say “when person no get experience, e de believe everything wey people talk.”​—Proverbs 14:15.

• If you want get better advice about how to know information wey correct and the one wey no correct, read the article “Protect Yourself From Lie-lie Information.”

The truth be say, even people for politics wey de talk truth and wey get good things for mind, no get the power to do everything wey them go like do. This na the reason why Bible talk say:

• “No put your trust for human leaders; because no human being fit save you.”​—Psalm 146:3, Good News Translation.

One leader wey you fit trust

Bible talk say God don choose Jesus Christ as leader wey fit rule us well and wey we fit really trust. (Luke 1:32, 33) Jesus na the King of God Kingdom wey be government wey de rule from heaven.​—Matthew 6:10.

• Learn why you fit trust Jesus and the things wey e go do to comot the problems wey we de face. Read the articles “Who Is the King of God’s Kingdom?” and “What Will God’s Kingdom Accomplish?”