Why People Character De Bad More-More?​—Wetin Bible Talk?

Plenty people character don de bad more-more. For example, people wey go hospital make them get treatment de shout for doctors; people wey de chop food for where them de sell food de insult people wey de serve them food; passengers dey stubborn, and them de even fight with driver or conductor; children wey get bad character de laugh, de threaten, and de even attack their teachers; and some people for politics de do bad things wey de shock people, but other people for politics de try to make people think say them be better people.

Na only Bible we fit trust to fit help us understand which kind character really good. And e explain why plenty people de behave for bad way for this our time.

Why people no get better character again?

Everywhere for this world, people character de bad more-more. This one mean say people no de behave for good way, them de do things wey other people no like, and wey de shock other people.

• One research wey them newly do, show say people for America believe say for the past 22 years, the character of people wey de live for inside United States don worse pass as e be before.

• For another research, them interview 32,000 people wey come from 28 country, 65 percent (wey be 20,800) of them talk say, the behavior of people don worse sotey mouth no fit even talk-am.

Bible don talk before about the way people go de behave for this our time.

• “For last days, serious hard time wey no go dey easy to handle, go dey. People go de love theirself, go like money too much, go de make mouth, go de think say them better pass other people, go de talk bad about God, no go de obey papa and mama, no go de talk thank you, . . . them go really wicked, them go hate good thing.”​—2 Timothy 3:​1-3.

If you want learn more about how wetin Bible talk don de happen, read the article, “Did the Bible Predict the Way People Think and Act Today?” (For English.)

Wetin fit help us to get better character?

For world wey people character de worse more-more, plenty people don see say Bible de help them get better character. The advice wey Bible de give na something wey “we fit trust . . . all the time, now and forever.” (Psalm 111:8) Make we see some examples:

• Wetin Bible talk? “Everything wey una want make people do to una, una must do-am to them too.”​—Matthew 7:12.

  Wetin e mean? Make we de treat people for kind way and show them respect, just as we go like make them de treat us.

• Wetin Bible talk? “Now wey una don comot hand from lie-lie things, make each of una de talk truth with im neighbor.”​—Ephesians 4:25.

  Wetin e mean? Make we de talk truth for everything wey we de do.

If you want learn more, abeg read this article for English:

• The Watchtower wey de title na, “Right and Wrong​—A Guide You Can Trust.”

• The article “To De Overlook Things​—How Bible Fit Help.”