Which Time all This Fight-Fight Go Stop?​—Wetin Bible Talk?

“Now na the time to calm down and no do wetin go make the situation worse. Now na the time for people to control theirself and no make the war worse pass as e dey.” Na wetin United Nations Secretary-General, António Guterres talk for Saturday April 13, 2024 as Iran attack Israel.

This fight wey de happen for Middle East na one example of wetin de happen for the whole world.

United Nations Security Council talk for January 26, 2023 say: “Na this time war don affect people pass for the world since Second World War, and na 2 billion people e don affect​—this one mean say the war don affect one out of every four person.”

Different-different place wey this war and fight-fight de happen na Israel, Gaza, Syria, Azerbaijan, Ukraine, Sudan, Ethiopia, Niger, Myanmar, and Haiti.a

Which time all this fight-fight go stop? Leaders for this world fit make peace dey? Wetin Bible talk?

Everywhere for the world no settle

The fight-fight wey dey different part of the world today, na sign wey show say small time war go end. All this war de show wetin Bible don talk say go happen for this our time. Bible call-am “the last days of this world.”​—Matthew 24:⁠3.

• [You] go hear when them de fight war and news about war. . . . Nation go de fight nation, and kingdom go de fight kingdom.”​—Matthew 24:​6, 7.

Read the article, “Wetin Be the Sign of the ‘Last Days,’ or ‘End Time’?” to see how the wars wey de happen today, na wetin Bible don talk say go happen.

One war wey go end all other wars

Bible don talk say this fight-fight go end. How this one go happen? No be human being go end-am, but na Armageddon, “the war of the great day of God the Almighty.” (Revelation 16:​14, 16) After the war, God go do wetin e don promise say human being go enjoy peace wey no go end.​—Psalm 37:​10, 11, 29.

To learn more about the wey God go use end all wars, read the article, “Wetin Be the War of Armageddon?”