Different young people wey their face de show how them de feel as their body de change as them de grow

QUESTIONS WEY YOUNG PEOPLE DE ASK

When My Body Start to Change as I De Grow, Wetin I Fit Do?

“E no de really easy for girls when their body start to change as them de grow. E fit make them confuse, feel dirty, or de feel pain. Everything about-am no just be like say e dey okay!”—Oksana.

“I fit just de happy now-now, but before you know, I no go de happy again. I no know if na like that e de be for boys. But na so e happen to me.”—Brian.

When pikin body start to change to show say e don de mature, e be like when person dey ontop big round machine wey de carry-am go up and down for playground. E fit make-am happy and fear at the same time! Wetin fit help you when your body start to change as you de grow?

Wetin de happen to your body as you de grow?

This na time wey your body de change quick-quick to make you become mature man or woman. Your body go de change for outside and inside, and the way you de feel go still de change. When your body change like this, e go make-am possible for you to fit get pikin for future.

This one no mean say you don ready to be papa or mama. But when your body de change like this, e mean say you don de comot from small pikin and want become mature man or woman. The truth be say, this one go make you happy and at the same time, e fit make you worry or dey sad.

Question: From which age you think say person body fit start to change as e de grow? Choose from the age wey dey down:

Answer: E dey normal for person body to start to change when e reach any of the age wey them write for up.

So you no need to overworry if your body never start to change when you don reach fourteen years, or if your body don start to change when you never reach ten years. Na when your body ready to change, e go change, you no fit do anything about-am or control-am.

Young people dey ontop one machine wey de carry them go up and down; one dey sad, one de fear, and the other one de happy well-well — When your body start to change e be like when person dey ontop big round machine wey de carry-am go up and down for playground. E fit make you happy and fear but things dey wey *fit* help you

Things wey de change for your body

The change wey people fit see quick-quick na say you go start to tall more-more and de get body. But the problem be say no be all part of your body de grow at the same time. So make e no surprise you if the way you de waka and do things begin change. But you fit dey sure say things go dey normal after some time.

Other things wey de change for your body as you de grow.

For boys:

Private part go de big
Hair go de grow for armpit, private part, and face
Voice go change
Private part go de rise on im own and something wey dey white (sperm) go de comot from-am when the person de sleep.

For girls:

Breast go start to grow
Hair go de grow for armpit and private part
And start to see period

Things wey de change for both boys and girls:

Them fit start to get body odor. Na sweat and bacteria de cause-am.

Wetin you fit do? You fit de control the smell wey de comot from your body if you de bath all the time, and you fit still use other things like perfume.
Pimples, wetin de cause-am na when bacteria mix with oil wey de under your skin.

Wetin you fit do? Even though say e no easy to control pimples, when you de wash your face all the time and de use some things wey them de use clean face, this one fit help.

How the way you de feel de change

The things wey de make your body change fit affect how you de feel. The way you de feel fit de change quick-quick. You fit de happy and before you know, you go de vex or de feel sad.

“Today you de cry and the next day you dey okay. You fit de vex now-now and before you know, you go just dey sad and de find place to hide yourself make nobody disturb you.”—Oksana.

When young people body start to change, e de make them feel like say everybody de look them and de judge them. This one de make them to dey extra careful about everything wey them de do. And the way their body and their face just de change quick-quick de make the matter worse!

“When my body start to change as I de grow, I just decide to de bend as I de waka and de wear big-big shirt. Even though say I know why my body de change, I no just like-am and e de make me shame. E just de do me like say no be so e suppose be.”—Janice.

One big change wey fit happen to you be say, if you be girl you fit start to de like boys, and if you be boy you fit start to de like girls.

“I stop to de vex for boys. Na now I see say some of them fine. And I no see-am as bad thing make girls start to get special feeling for boys. And wetin everybody de talk about na ‘who like who.’”—Alexis.

When young people body start to change as them de grow, some boys fit start to like their fellow boys and get special feeling for them, and some girls fit start to like their fellow girls and get special feeling for them. If this kind thing happen to you, no just feel say you go become man wey de sleep with man or woman wey de sleep with woman. Most times, this kind feeling de stop after some time.

“Because I too de compare myself with other boys, this one make me start to get special feeling for them. Na after I don grow, I start to get special feeling for girls. So I no get this kind feeling for boys again.”—Alan.

Wetin you fit do?

Try to see things the way them really be. Na true say your body de change and the way you de feel de still change, but get-am for mind say you really need this change. Wetin David talk for Bible fit make your mind come down, e talk say: “The way you make me dey wonderful.”—Psalm 139:14.
No de compare yourself with other people and no de too worry yourself about how your body be. Bible talk say: “Man de see only wetin im eye fit see, but Jehovah de see wetin dey inside the heart.”—1 Samuel 16:7.
De do exercise and de rest well. If you de sleep well, you no go de too vex, de tire, and de feel sad when you don wake.
No put your mind for all the bad things wey your mind de tell you about yourself. Na really true say everybody de put eye for your body the way you think? Even if people de talk about how your body de change, no too take-am serious. Bible talk say: “No put everything wey people de talk for mind.”—Ecclesiastes 7:21.
Know how to control yourself so that your body no go push you to put hand for sex wey no clean for God eye. Bible talk say: “Run from sex wey no clean! . . . Anybody wey de put hand for sex wey no clean de sin against im own body.”—1 Corinthians 6:18.
Talk to your papa or mama or another mature person wey you really trust. You fit de shame to talk to them about-am, but you go really gain from the help wey them go give you.—Proverbs 17:17.

The main point: E no dey easy when your body start to change as you de grow. But e de give you the opportunity to grow for body, for how you de think, how you de feel, and even for your relationship with God.—1 Samuel 2:26.