QUESTIONS WEY YOUNG PEOPLE DE ASK
E Bad to Show Say You Like Person When You No Mean-Am?
E really bad to show say you get feeling for person?
Some people de show say them like person, when them talk or do something to show say them get feeling for that person. E really bad to show say you get feeling for person? No be say e bad. Even one woman wey im name na Ann talk say: “If you like person and you dey free to date, na only when you give-am sign say you get feeling for-am, you go know if the other person get feeling for you too.”
For this article, we go talk about when person de talk or do something to show say e get feeling for another person, but e no get serious thing for mind.
“E no bad to show say you like person when you want enter relationship with-am. But e really bad to make person start to like you when you no get serious thing for mind. This one go just be like say you de comot chair for person wey don ready to sitdown.”—Deanna.
Why some people de show say them like person when them no get serious thing for mind?
Some people de do like this just to make theirself feel say them dey important. One young woman wey im name na Hailey talk say: “When you see say wetin you de talk or do de make people like you for special way, e fit make you want de do-am more-more.”
But if you de talk or do something to show say you get feeling for another person when you no mean-am, this one show say you no care about how the other person de feel at all. This one go make people see you as person wey no de reason well. Bible talk say: “Foolish things de make person wey no get sense de happy.”—Proverbs 15:21.
Na im make Hailey talk say: “When you start to talk or do something to show say you get feeling for person when you no mean-am, this one fit de sweet you for body, but for the end e fit cause serious problem.”
Which kind problem e fit cause?
This kind thing de spoil your name.
“When person de talk or do something to show say e get feeling for person when e no mean-am, people de see-am as person wey no de behave well. E fit make you feel say the person just de pretend and say e just want get something from you.”—Jeremy.
Bible talk say: “Love . . . no de look for wetin go benefit only imself.”—1 Corinthians 13:4, 5.
Think about this question: Wetin you fit de talk or do wey go make people see you like who sabi make person feel say you like-am when you no really mean-am?
E de pain the person wey you do-am to.
“I no de like to dey around boy wey de make girls feel say e like them when e no really mean-am. E go come be like say the only reason why e de talk to me na because I be girl. I de feel say this kind person no really care about me. The truth be say, e de only care about imself and wetin e want.”—Jaqueline.
Bible talk say: “Make each person no de look for wetin go benefit only imself, but make e be wetin go benefit another person too.”—1 Corinthians 10:24.
Think about this question: Person don talk or do something to show say e get feeling for you, and you come later find out say e no really mean-am? If na so, how that one make you feel? Wetin you fit do make you no get this bad character?
E fit make people feel say you no really serious when you don ready to enter serious relationship.
“Nobody go like to date or marry person wey de show say e get feeling for person when e no really mean-am. How I fit really know wetin this kind person get for mind or trust-am?”—Olivia.
For Bible, King David talk say: “I no de near people wey de hide who them be.”—Psalm 26:4.
Think about this question: Who go like person wey de show say e get feeling for person when e no really mean-am? Na that kind person you go like to date?