QUESTIONS WEY YOUNG PEOPLE DE ASK
Na Bad Thing for Man to Sleep With Man and Woman to Sleep With Woman?
“When I de grow, one of the things wey hard for me pass na say I de like other boys. I be de think say the feeling go stop after some time but e never stop.”—David, 23 years.
David na Christian and e want do wetin God want. You think say David fit do wetin God want even as e de like other boys? How God de really feel when e see man de sleep with man and woman de sleep with woman?
Wetin Bible talk?
People de look this matter for different ways, e fit be because of the place wey them de live or because of how things be for their time. But Christians no be like person wey breeze “de carry . . . up and down,” so no be wetin people de think de guide wetin they believe. (Ephesians 4:14) Instead, na Bible de guide wetin they believe about things like, if man suppose sleep with man or if woman suppose sleep with woman (or any other kind of behavior).
Wetin Bible talk about this matter dey clear. Bible talk say:
“Make you no ever sleep with man for the same way wey you de sleep with woman.”—Leviticus 18:22.
“God see the kind thing wey dey their heart, e . . . allow them to do the kind sex wey they no fit control, for their women change the natural way to use their body to the one wey e dey against how God create them.”—Romans 1:24, 26.
“Make nobody deceive wuna. Person wey de do things about sex wey God hate, person wey de worship idol, person wey de sleep with person wey no be e wife or husband, man wey agree to sleep with another man, man wey de sleep with man, person wey de thief, person wey want get everything for e self, person wey de over-drink, person wey de curse people, and person wey de cheat people no go enter the Kingdom of God.”—1 Corinthians 6:9, 10.
The laws wey God give concern everybody, whether the person de like man or e de like both man and woman. Because we no dey perfect, we fit want do bad things sometimes but we get the power to control ourself because we want make God happy.—Colossians 3:5.
Wetin that one mean . . . ?
Wetin Bible talk mean say make we de hate this kind people?
No. In fact, Bible no support say make we de hate anybody whether the person de sleep with man or e de sleep with both man and woman. Instead, Bible tell us say make we “get peace with everybody,” no matter the kind life wey them de live. (Hebrews 12:14) So e no good to talk bad, fight, or attack people because they be man wey de sleep with man or woman wey de sleep with woman.
E mean say Christian no go respect law wey allow make man marry man or woman marry woman?
Bible show say God want make marriage dey between one man and one woman. (Matthew 19:4-6) No be Bible de guide the laws wey government de give instead, na politics. Bible tell Christians say make they no put hand for politics. (John 18:36) So they no de support or dey against any law wey government give about man wey de marry man or woman wey de marry woman.
But what about . . . ?
But what about man wey don already de sleep with man and woman wey don already de sleep with woman? E fit still change?
Yes. Some Christians for the time of the apostles stop to do this kind things! After Bible talk say people wey de do this kind things no go enter the Kingdom of God, e talk say: “Na so some of wuna be before.”—1 Corinthians 6:11.
E mean say people wey don stop to do this kind thing no de ever feel like to do this kind thing again? No. Bible talk say: “Make wuna wear the new character like cloth, the one wey correct teaching from Bible de make-am new.” (Colossians 3:10) We must continue to change the kind person wey we be.
But what about man or woman wey really want serve God but still feel like to sleep with person like-am?
Na just as e de be when bad thinking enter person mind, person fit decide say e go comot the bad thinking for e mind or e fit decide to do-am. How person fit comot this bad thinking for e mind? Bible talk say: “If wuna continue to do as the spirit de direct, wuna no go ever do the things wey body want.”—Galatians 5:16.
That Bible verse no talk say bad thing no go come the person mind at all. Instead, the person go get the power to fight the bad thinking if e de always study Bible and pray.
David wey we mention for the beginning of this article see say this one na true, especially after e talk to e papa and mama about how e de feel. E talk say, “e just be like say they carry one heavy load from my shoulder and I for enjoy my life when I dey young if to say I quick talk to my papa and mama.”
We go always dey happy if we follow the laws wey Jehovah de give. We dey sure say the laws wey Jehovah de give “dey correct, e de make the heart happy,” and say “plenty blessing dey when we obey.”—Psalm 19:8, 11.