QUESTIONS WEY YOUNG PEOPLE DE ASK
How I Fit Choose Better Example Wey I Go Copy?
“When I get problem for school, wetin de help me na when l think about person wey l like wey don face the kind problem wey resemble the type wey l de face. I go come try to copy the person example. As l get who l de copy im example e de make-am easy for me to face hard time.”—Haley.
When you get person wey you de copy im example, e fit help you avoid problem and help you do the things wey you plan to do. The main thing na to choose better example to copy.
Why e good make you choose well?
The people wey you choose to copy their example go affect the way you de behave.
Bible tell Christians to notice people wey get better character, e say: “As una de take time de look the good result of their character, make una de follow their example of faith.”—Hebrews 13:7.
See wetin you fit do: Since the people wey you choose to follow their example go affect you, either for good or bad way, e go good make you choose people wey get better character, no be just people wey dey popular or wey dey around your age.
“I learn plenty things from one brother wey im name na Adam—both from the way e de behave and from im character. E really dey wonderful say I still remember some particular things wey e talk and do. The brother no know how the way e live im life affect me reach.”—Colin.
The people wey you choose to copy their example go affect the way you de think and feel.
Bible talk say: “No allow anybody deceive una. Bad friends de spoil better character.”—1 Corinthians 15:33.
See wetin you fit do: Choose person wey get better-better character, no be just person wey fine. If not, you fit no like wetin you go see.
“When you de always compare yourself with people wey fine well-well or wey sabi fashion, e go make you feel say you no fine, and say you no dey important. E fit come make you de worry too much about the way you be.”—Tamara.
Think about this question: Wetin be de danger wey dey if we choose people wey dey popular and people wey sabi sports as people wey we want de copy?
The people wey you choose to copy their example go affect the plans wey you get—whether you go succeed or not.
Bible talk say: “When person de follow wise people, e go get sense.”—Proverbs 13:20.
See wetin you fit do: Make the people wey you choose to copy their example be people wey de show the kind character wey you go like to get. As you de watch them, you fit learn particular things wey you fit do to make the plans wey you get work.
“Instead of just to say ‘I want be better person,’ talk the particular thing wey you want be. You fit say, ‘I want de do things like Jane. E de always do things on time and e de take things wey them tell-am to do serious.’”—Miriam.
The main point: When you choose better example to copy, e go help you fit be the kind person wey you want be.
When you get better example wey you de copy, e fit make-am dey easy to do the things wey you plan!
How you fit choose
Na two ways dey to do this one, you fit choose one of them.
You fit choose one fine character wey you go like to get, and look for person wey get that character wey you like.
You fit choose somebody wey you like and then select the character wey the person get wey you want copy.
The worksheet wey follow this article fit help you do-am.
The people wey you choose to copy their example fit be:
Young people. “I want be like my best friend. E no de dey too busy to stop and show concern for another person. Na me senior-am, but e get better-better character wey I no get, and na this one de make me want be like-am.”—Miriam.
Adults. Them fit be your papa and mama or your Christian brothers and sisters. “My papa and mama na better example for me. Them get plenty fine character. Na true say them de make mistake, but I de see say them still dey faithful no matter their mistake. I hope say them fit talk this kind thing about me when I reach their age.”—Annette.
Examples for Bible. “I don pick different people for Bible wey I go like to copy their example—Timothy, Ruth, Job, Peter, the small Israelite girl—and I choose each of them for different reason. The more I learn about people for Bible, them de dey more real to me. I don really enjoy the story of the people wey dey the Imitate Their Faith book, and the ‘Role Model Index’ wey dey for volume 1 and 2 of the book Questions Young People Ask—Answers That Work.”—Melinda.
See wetin you fit do: No just dey okay with one person wey you de copy im example. Paul tell Christians say: “Continue to look the people wey de follow the example wey we don show una.”—Philippians 3:17.
You know? You fit be example to another person! Bible talk say: “Make you be better example for people wey de serve God well for the way you de talk, the way you de behave, the way you de show love, for your faith, and for the way you de live clean life.”—1 Timothy 4:12.
“Even though say you need to improve for some of your character, you fit still help other people to be better people. You no know who de look you, and you fit no know how wetin you de talk go affect another person.”—Kiana.