QUESTIONS WEY YOUNG PEOPLE DE ASK
Wetin I Go Do if My Friend Do Wetin Pain Me?
Wetin you suppose know?
E no get friends wey no de get problem with each other sometimes. Because you no dey perfect, your friend even your best friend fit do or talk something wey pain you. Even you too no dey perfect. So talk true, you never do something wey pain another person before?—James 3:2.
Your friends fit post something for Internet wey fit pain you. For example, one boy wey im name na David wey dey around 15 years talk say: “When you dey for Internet and you come see say your friends post picture when them de enjoy theirself, you fit de ask yourself why them no invite you. This one fit make you vex and make you feel like say your friends no like you again.”
How you fit solve this problem?
Wetin you fit do?
Check yourself. Bible talk say: “Make you no de vex quick, because na person wey no get sense de vex quick.”—Ecclesiastes 7:9.
“Sometimes you fit later see say wetin you de vex for no reach anything.”—Alyssa.
Think about this one: Things de quick de pepper you for body? You fit learn to bear things wey other people do you?—Ecclesiastes 7:21, 22.
Think of wetin you go gain if you forgive people. Bible talk say: ‘Na fine thing if you no look the bad thing wey other people do.’—Proverbs 19:11.
“Even if the person do wetin make you vex, e good make you forgive-am with all your heart. And that one mean say you no go de continue to remind the person of wetin e do you or make-am de beg you all the time. Once you don forgive-am, make you forget-am.”—Mallory.
Think about this one: The things wey happen really serious well-well? You fit forgive make peace dey?—Colossians 3:13.
To de always talk about the problem wey you and your friend get be like when you open door and window for dry season make breeze blow dust full your house
Think of the other person. Bible talk say: “No de look for wetin go benefit only unaself, but wetin go still benefit other people.”—Philippians 2:4.
“When you love and respect your friend, this one go make you solve any problem wey una get quick-quick. Because, you don work hard to make your friendship grow and you no want make e scatter.”—Nicole.
Think about this one: If person talk wetin you no like, you fit see something wey make sense from wetin e talk?—Philippians 2:3.
The truth of the matter be say: If you sabi endure things wey people do you wey pain you well-well, this one go help you when you don grow. E go good make you learn to de endure things now.