Study Book for Our Life and Preaching Meeting

OCTOBER 1-7

FINE-FINE LESSON FROM BIBLE | JOHN 9-10

“Jesus De Care for E Sheep”

(John 10:1-3) “True-true, I de tell wuna say if person want enter sheepfold, and e no enter from door, but e jump enter, that person na thief and armed-robber. ² But the person wey enter from door na the shepherd of the sheep. ³ The person wey de guard the door go open for the shepherd and the sheep go obey his voice. E go call the name of his sheep, and carry them comot.

(John 10:11) I be the fine shepherd, and the fine shepherd ready to die for his sheep.

(John 10:14) I be the fine shepherd. I know my sheep and my sheep know me,

nwtsty media

Sheepfold

For Jesus time, sheepfold na place wey they build to protect sheep from thief people and wild animals. Na there shepherds de keep their sheep for night. Them de build the place round like fence. E no de get roof and e de get different-different shape and size. The normal way to build-am na with stone and na only one door e de get. (Nu 32:16; 1Sa 24:3; Zep 2:6) John talk say them de enter sheepfold “from door,” and they get “person wey de guard the door.” (Joh 10:1, 3) Some sheepfold na for the whole community, and plenty group of sheep de stay together for night, and one guard go de protect all the sheep. When morning reach, the guard go open the door for the shepherds. All of them go take their group of sheep comot one by one. Each shepherd go call e group of sheep and they go follow him, because they know his voice. (Joh 10:3-5) Jesus use this example show his disciples how e de care for them.​—Joh 10:7-14.

w11 5/15 7-8 ¶5

Family, Make Wuna Stand Well for God Side

⁵ Wetin de make shepherd and sheep dey close na because they know theirself and trust theirself. Shepherd know all his sheep and his sheep know him and trust him, and they know his voice. Jesus talk say: “I know my sheep and my sheep know me.” Jesus know everybody for congregation well. For Greek language, the word “know,” mean to “sabi person well.” True-true, the Fine Shepherd know all the sheep one by one. E know wetin each of them need, where they weak and where they strong. Jesus wey be the Fine Shepherd, know everything about us—his sheep. The sheep really know the shepherd well, and they trust say e go lead them well.

(John 10:4, 5) When e carry all his own come out, e go dey their front, and his sheep go follow him, because they know his voice. ⁵ They no go ever follow stranger, but they go run from him, because they no know the voice of strangers.”

cf 124-125 ¶17

E Must Use Example When E De Teach Them

¹⁷ For the book The Historical Geography of the Holy Land, wey George A. Smith write, e talk say: “Sometimes, we de like to rest for afternoon near one of this well for Judea. About three or four shepherd de carry their sheep come there. For there, their group of sheep go join together, and we go de wonder how they go manage know their sheep again. But after all the sheep don drink water and play finish, all the shepherd go waka go different-different side. Each shepherd go call his sheep, and his sheep go separate from the others. They go waka go meet their shepherd and all of them go go, as they come.” Na the best example Jesus use teach this lesson. E de teach us say if we know wetin e de teach us, we obey him, and we allow make e lead us, e go care for us.

(John 10:16) “I get other sheep wey they no dey part of this group; I must bring them too, and they go listen to my voice. And they go be one group of sheep and one shepherd.

nwtsty study note for Joh 10:16

bring them: Or “direct them.” The Greek word wey they use for here na aʹgo. Depending on how they use-am, e fit mean “to bring something (inside)” or “to direct.” For one Greek document wey they write around 200 C.E., they use another Greek word (sy·naʹgo), and e mean “to gather.” As Jesus be the Fine Shepherd, e de gather, de direct, de protect and de feed the sheep wey be part of this group (Jesus still call this group “little flock” for Lu 12:32). E still get another group of sheep wey be other sheep. So all the sheep go be one group of sheep wey one shepherd de control. This example show say all disciples of Jesus go be one.

Fine-Fine Things Wey You See for Bible

(John 9:38) E talk say: “Lord, I put my faith for you.” And e bow for Jesus.

nwtsty study note for Joh 9:38

bow for Jesus: If they want describe person wey de worship god, or image, they go use the Greek word pro·sky·neʹo wey e mean “to worship.” (Mt 4:10; Lu 4:8) But for this verse, the blind man wey Jesus cure bow for Jesus to show say na God send Jesus. E no take Jesus as God, but as the Messiah wey get power from God. (Joh 9:35) When e bow for Jesus, e fit be say na the same way people for prophet their time de do. For example, them de bow when they meet prophet, king or other people wey de work for God. (1Sa 25:23, 24; 2Sa 14:4-7; 1Ki 1:16; 2Ki 4:36, 37) Plenty times when people bow for Jesus, they do-am to show say they know say na Jehovah send Jesus.​—Check study note for Mt 2:2; 8:2; 14:33; 15:25.

(John 10:22) Na that time the Festival of Dedication happen for Jerusalem and na cold season,

nwtsty study note for Joh 10:22

Festival of Dedication: The name of this festival for Hebrew language na Hanukkah (chanuk·kahʹ), and e mean “Dedication.” Na eight days festival. E de start for 25th of the month wey be Chislev, near cold season (check study note for wintertime for this verse and App. B15.) The people of Israel de do this festival to remember when they dedicate the temple for Jerusalem again for 165 B.C.E. The king of Syria, Antiochus IV Epiphanes, really hate Jehovah. E no treat Jehovah’s temple with respect. For example, e build altar ontop the altar wey people of Israel de use do sacrifice for Jehovah. Antiochus do the worst for Chislev 25, 168 B.C.E. E use the altar sacrifice pig, and splash the pig pepper soup for the whole temple. E burn the gate for the temple and destroy the place wey priests de stay. E carry the altar wey they use gold make, the table wey them de keep showbread, and the lampstand wey they make with gold. Then e dedicate Jehovah temple to one pagan god wey be Zeus of Olympus. After two years, Judas Maccabaeus take Jerusalem and the temple back from Antiochus. Na after they clean the temple, they dedicate-am again to Jehovah for Chislev 25, 165 B.C.E. And na exactly three years after Antiochus use the temple do sacrifice for Zeus. Na that time they start de do sacrifice again for the temple to Jehovah every day. Nothing for Bible show say na Jehovah give Maccabaeus power so that e go take-over the city, and clean the temple. But Jehovah don use king from other nation before like this. For example, Cyrus the king of Persia, do special work for Jehovah. (Isa 45:1) So na correct thing if we talk say Jehovah fit use somebody wey be person do wetin e want. Bible show say the temple must de function well for all the thing wey the prophets talk about the life, preaching, and sacrifice of the Messiah to happen. And the Levites go still de do sacrifice for the temple when the Messiah go use his life do sacrifice. (Da 9:27; Joh 2:17; Heb 9:11-14) Jesus no command his disciples make they do Festival of Dedication. (Col 2:16, 17) But nothing show say Jesus and his disciple condemn this festival.

OCTOBER 8-14

FINE-FINE LESSON FROM BIBLE | JOHN 11-12

“Like Jesus, De Feel for People”

(John 11:23-26) Jesus tell her say: “Your brother go come back to life.” ²⁴ Martha tell Jesus say: “I know say for the resurrection for the last day, e go come back to life.” ²⁵ Jesus tell her say: “Na me be the resurrection and the life. Anybody wey put faith for me go come back to life even if e die. ²⁶ Anybody wey dey alive and wey de put faith for me, no go ever die. You believe-am?”

nwtsty study note for Joh 11:24, 25

I know say e go come back to life: Martha be think say Jesus de talk about the resurrection wey go happen when the Kingdom come. (Check study note for Joh 6:39.) She really believe say resurrection go happen. Bible talk say resurrection go happen. But the Sadducees, wey be part of people wey de teach them that time, no believe-am. (Da 12:13; Mr 12:18) The other group of their teachers, wey be Pharisees believe say, soul no de die. But Martha know say Jesus talk say resurrection dey. And e know say Jesus don resurrect people before. Even though Jesus don resurrect people before, no one don reach four days for grave like Lazarus.

Na me be the resurrection and the life: As Jesus die and resurrect, e open road for people wey don die, to fit come life again. After Jehovah resurrect Jesus, e give Jesus power make e resurrect people wey don die and still give people everlasting life. (Check study note for Joh 5:26.) For Re 1:18, Jesus talk say na him be the ‘person wey dey alive’ and wey hold ‘the key of death and the Grave.’ So, Jesus na the hope of people wey dey alive and people wey don die. Jesus don promise say e go bring people wey don die back to life. Some of them go rule with Jesus for heaven and others go live for the new earth wey the Kingdom of God go bring.​—Joh 5:28, 29; 2Pe 3:13.

(John 11:33-35) As Jesus see say Mary and the Jew people wey follow her come, de cry, the thing really touch Jesus and e worry him ³⁴ So e talk say: “Where wuna bury-am?” They tell Jesus say: “Lord, come see-am.” ³⁵ Then, Jesus shed tears.

nwtsty study note for Joh 11:33-35

de cry: Plenty times, the Greek word for “de cry,” de describe person wey de cry out make people hear. Na the same word they use describe wetin Jesus do when e talk say they go destroy Jerusalem.​—Lu 19:41.

the thing really touch Jesus and e worry him: As they use this two Greek word for this verse, e show the deep feeling wey Jesus be get when this thing happen. Them de normally use the Greek word for “really touch” (em·bri·maʹo·mai), show the strong feeling wey person de get when something wey e no like happen. But the way they use-am for this verse, show say wetin happen really touch Jesus sotey e show-am make people see. For Greek language, “e worry him” (ta·rasʹso), de show the kind confusion wey worry fit cause. One professor talk say for this verse, this word mean say “person go just confuse or say e de feel serious pain.” Na the same word they use for Joh 13:21, describe how Jesus feel when e know say na Judas Iscariot go sell or betray him.​—Check study note for Joh 11:35.

Jesus shed tears: The Greek word wey they use here na da·kryʹo. Na this Greek word they still use talk about “tears” for Lu 7:38; Ac 20:19, 31; Heb 5:7; Re 7:17; 21:4. E be like say na the tears wey comot from Jesus eye be the main thing wey this verse de talk. No be just say Jesus cry make people see. If we check Bible from Matthew to Revelation, na only for here they use this Greek word. And e different from the Greek word wey they use for Joh 11:33 (check study note.) That one de describe the cry wey Mary and the Jew people cry. Jesus know say e go resurrect Lazarus but as e see the people wey e love de cry, the thing really touch him. Na the deep love and feeling wey e get for his friends, make Jesus shed tears. And e no worry say e happen for public. This story teach us say Jesus de really feel for people wey their person don die.

(John 11:43, 44) After e don talk all this things, e shout say: “Lazarus, come out!” ⁴⁴ The man wey be don die come out with the cloth wey they use wrap e leg, hand and face. So Jesus tell them say: “Make wuna remove the cloth, make e go.”

Fine-Fine Things Wey You See for Bible

(John 11:49) But one of them, wey e name na Caiaphas na high priest that year. So e tell them say: “Wuna no know anything at all!

nwtsty study note for Joh 11:49

high priest: The time wey the nation of Israel no dey under any country, person wey be high priest go do this work until e die. (Nu 35:25) But when Rome start de control Israel, na their governor de choose who go be high priest, and e fit still remove the high priest. (Go check Glossary for “High priest.”) Na the government of Rome choose Caiaphas as high priest. The time wey Caiaphas spend as high priest long pass other high priest before e time. This na because e de work well with the Roman government. Na around 18 C.E. they put him for this position and e do this work till around 36 C.E. As John be talk say Caiaphas na high priest that year, for 33 C.E., e mean say na Caiaphas be high priest the year wey they kill Jesus.​—Check App. B12 so that you go see the place wey Caiaphas house be dey.

(John 12:42) Even with this one, plenty of the rulers put their faith for him, but because of Pharisee people, they no fit show their faith, make they no ban them from synagogue.

nwtsty study note for Joh 12:42

plenty of the rulers: The Greek word wey they translate as “rulers” for this verse fit mean person wey be member for Sanhedrin; the high court of Jew people. For Joh 3:1, they still use this word describe Nicodemus wey be member of the high court.​—Check study note for Joh 3:1.

ban them from synagogue: Na only for here and Joh 12:42 and 16:2 they use the Greek word a·po·sy·naʹgo·gos. If they ban person for synagogue, people no go treat the person well. They no go make friend with the person and they no go join the person do things again. This kind ban fit affect the family business, and cause suffer for them. The main thing wey them de use synagogue for, na to teach people. But they fit still use-am as court. And for this court, they get right to beat person and even ban the person from synagogue.​—Check study note for Mt 10:17.

OCTOBER 15-21

FINE-FINE LESSON FROM BIBLE | JOHN 13-14

“I Don Show Wuna Example”

(John 13:5) After that one, e put water for basin and start de wash the feet of the disciples, and de dry them with the towel wey e tie for waist.

nwtsty study note for Joh 13:5

wash the feet of the disciples: That time for Israel, na sandals be the main thing wey people dey wear. Their sandals resemble slippers wey get rope. So, if person wear that kind sandal travel, e feet and leg must surely dirty because of dust and potopoto for road and farm. So before person go enter house, e must remove e sandals. And if the person wey get house sabi welcome visitor well, e go e wash the feet of the visitor. Plenty place dey Bible wey show say them de do this thing that time. (Ge 18:4, 5; 24:32; 1Sa 25:41; Lu 7:37, 38, 44) When Jesus wash the feet of e disciples, e use-am teach them fine lesson say e good to serve other people and dey humble.

(John 13:12-14) Now, after e don wash their feet and wear his outer garment, e sitdown with them again and ask them say: “Wuna understand wetin I just do for wuna? ¹³ Wuna de call me ‘Teacher’ and ‘Lord,’ wuna correct because na wetin I be. ¹⁴ So, if me, wey I be Lord and Teacher wash wuna feet, wuna must wash the feet of one another.

nwtsty study note for Joh 13:12-14

must: The Greek word wey they use for here na word wey them de use for money matter. And e mean “to owe person money or something.” (Mt 18:28, 30, 34; Lu 16:5, 7) For here and other verse, they use-am show wetin person must do.​—1Jo 3:16; 4:11; 3Jo 8.

(John 13:15) I don show wuna example, so that wuna go do just as I do for wuna.

w99 3/1 31 ¶1

Jesus Do Something Wey Show Say E Humble

As Jesus wash the feet of e disciples, e teach us say make we dey humble. As servants of Jehovah, e no good make we de feel say we better pass other people, and de expect them to serve us all the time. And make we no de put eye for big position. But make we de follow the example of Jesus. E “no come make people be e servant, but e come to serve people and to give e life as sacrifice to buy many people back.” (Matthew 20:28) Make we always ready to do any work for other people even though say na something wey servant suppose do.

Fine-Fine Things Wey You See for Bible

(John 14:6) Jesus talk say: “I be the road, the truth, and the life. Nobody fit come meet the Father if e no pass through me.

nwtsty study note for Joh 14:6

I be the road, the truth, and the life: Jesus na the road because na only through him we fit pray to God. E still be “the road” because na only him fit bring us back to God. (Joh 16:23; Ro 5:8) Jesus na the truth because all the things wey e talk and do na about the truth. Plenty things wey the prophets talk about Jesus happen. This one show say Jesus get important work to make things wey Jehovah want happen. (Joh 1:14; Re 19:10) Things wey Bible talk happen through Jesus. (2Co 1:20) Jesus na the life because e die to save us from sin and death. Because of this one, we go fit get the “real life” wey be “everlasting life.” (1Ti 6:12, 19; Eph 1:7; 1Jo 1:7) E go still be life for plenty people wey go come back to life for Paradise.​—Joh 5:28, 29.

(John 14:12) I de tell wuna say, anybody wey put faith for me go do the work wey I do; and e go do work wey pass this one, because I de go meet the Father.

nwtsty study note for Joh 14:12

work wey pass this one: For here, Jesus no de talk say the miracle wey e disciples go do go plenty pass the ones wey e do. But e de talk say, the place wey e disciples go preach reach, the people wey they go preach for, and the time wey they go use preach, go pass e own. This thing wey Jesus talk show say e expect say e disciples go continue de preach and de teach after e die.

OCTOBER 22-28

FINE-FINE LESSON FROM BIBLE | JOHN 15-17

“Wuna No Be Part of the World”

(John 15:19) If wuna be part of the world, the world for love wuna because wuna be e own. But because wuna no be part of the world, and I don choose wuna from this world, the world hate wuna.

nwtsty study note for Joh 15:19

world: For this verse, the Greek word, koʹsmos mean people for this world wey no de worship Jehovah. Na only John write say Jesus talk say e disciples no be part of this world or no de join people for this world. Jesus talk-am two times again for e last prayer.​—Joh 17:14, 16.

(John 15:21) And they go do all this things against wuna because of my name. Because they no know the Person wey send me.

nwtsty study note for Joh 15:21

because of my name: Sometimes for Bible, “name” fit be person name, the kind person wey e be, and everything about the person. (Check study note for Mt 6:9.) But when e concern Jesus, the power and position wey Jehovah give Jesus still be part of his name. (Mt 28:18; Php 2:9, 10; Heb 1:3, 4) For here, Jesus explain why people for this world go de fight against e people. E talk say: “Because they no know the Person wey send me.” Na only when they know God, they go understand and accept wetin Jesus name represent. (Ac 4:12) And if they know God, they go gree say na Jesus be the person wey God don choose as King. And everybody must obey Jesus so that they go get life.​—Joh 17:3; Re 19:11-16; compare Ps 2:7-12.

(John 16:33) I don tell wuna all this things, so that wuna go get peace because of me. For this world, wuna go de get plenty trouble, but no fear! I don win the world.’

it-1 516

No Fear, Get Mind!

Person wey de worship Jehovah no need to fear so that bad people no go spoil e good character. This one go make them continue de worship Jehovah well even though people for this world hate them. Jesus tell e disciples say: “I don tell wuna all this things, so that wuna go get peace because of me. For this world, wuna go de get plenty trouble, but no fear! I don win the world.” (Joh 16:33) Jesus no ever do things wey the world want. E show say e win the world as e no imitate the world for any way. The way Jesus live e life, and win the world fit help us live like Jesus so that this world no go spoil our good character.​—Joh 17:16.

Fine-Fine Things Wey You See for Bible

(John 17:21-23) Father, I de pray make all of them be one, as you be one with me and I be one with you. And make them be one with us. This one go make the world believe say na you send me. ²² I don give them the honor wey you give me, so that they go be one as me and you be one. ²³ I be one with them and you be one with me, so that all of them go really be one. And this world go know say na you send me, and say you love them the way you love me.

nwtsty study note for Joh 17:21-23

one: Or “do things as one.” Jesus pray make e disciples be “one.” This one mean say e want make e disciples de work together for the same reason, just as he and his Father de work together for the same reason. (Joh 17:22) Wetin Paul talk for 1Co 3:6-9 show say all servants of Jehovah de work together as one, and with God.​—Check 1Co 3:8 and study note for Joh 10:30; 17:11.

so that all of them go really be one: Or “really get one mind for everything.” For this verse, Jesus de teach us say when we de do things with one mind, e de show say we de enjoy the love of Jehovah. This thing wey Jesus talk agree with wetin dey Col 3:14, that place talk say: “Love . . . de join people together so that nothing fit separate them.” This one no mean say everything about e disciples go be one, because all the disciples no de behave the same way. But e mean say they go be one for the things wey they believe, wey them de teach and for the way them de worship God.​—Ro 15:5, 6; 1Co 1:10; Eph 4:3; Php 1:27.

(John 17:24) Father, I want make the people wey you don give me dey with me for the place wey I dey, so that they go de see the honor wey you give me, because you love me from the beginning of the world.

nwtsty study note for Joh 17:24

beginning of the world: For Heb 11:11, they use the Greek word for “beginning,” and they translate am as “to born pikin.” E be like say as they use-am for Joh 17:24, e de talk about the time wey Adam and Eve start to born children. When Jesus talk say “from the beginning of the world,” e fit de talk about Abel wey be the first righteous man wey die. And na e be the first person wey them write e name for the book of life. (Lu 11:50, 51; Re 17:8) This thing wey Jesus talk for e prayer show say, before Adam and Eve start de born children, Jehovah love Jesus.

OCTOBER 29–NOVEMBER 4

FINE-FINE LESSON FROM BIBLE | JOHN 18-19

“Jesus Make People Know the Truth”

(John 18:36) Jesus answer say: “My Kingdom no dey part of this world. If my Kingdom na part of this world, my servants for don fight so that they no go carry me give the Jews. But as e be, my Kingdom no come from this place.”

(John 18:37) Then Pilate talk say: “So you be king?” Jesus answer say: “You don talk say I be king. Na because of that one, I come this world, and they born me so that I go make people know the truth. Anybody wey de support the truth de listen to me.”

nwtsty study note for Joh 18:37

make people know: For the part of Bible wey they write after the time of Jesus, the two Greek word wey they translate as “make people know” (mar·ty·reʹo) and “person wey de talk wetin e know” (mar·ty·riʹa; marʹtys) get different-different meaning. If person see something wey happen or e know about-am, they fit use any of this two Greek word describe the person. They fit still use this two word describe person wey “de preach; de talk wetin e de sure of; de talk good about another person.” Jesus dey sure of the truth wey e learn from his Father. And e still tell people about this truth. The way Jesus live e life, show say e make everything wey e Father talk be true. (2Co 1:20) God don talk for Bible how e go bring the Kingdom and say na Jesus e choose as King for this Kingdom. Everything wey Jesus do when e come this earth, even as e die, agree with things wey the prophets and the Law talk about Jesus. (Col 2:16, 17; Heb 10:1) So from things wey Jesus talk and do, e clear say e “make people know the truth.”

the truth: For this verse, Jesus no de talk about the normal truth wey we know, but e de talk about the truth wey concern things wey Jehovah want do. One thing wey Jehovah want, na make Jesus wey Bible call “son of David,” be High Priest and King for God’s Kingdom. (Mt 1:1) Jesus explain say one reason why e come this earth na to teach people the truth about that Kingdom. Before and after they born Jesus, Jehovah use angels tell people say na Jesus go be King for that Kingdom.​—Lu 1:32, 33; 2:10-14.

(John 18:38a) Pilate ask Jesus say: “Wetin be truth?”

nwtsty study note for Joh 18:38a

Wetin be truth?: E be like say na the normal truth wey we know, Pilate de ask Jesus about. This question no concern “the truth” wey Jesus mean for here. (Joh 18:37) Jesus no answer this question because e know say Pilate just de ask, no be say Pilate want know the answer. This question show say Pilate no believe say anything like truth dey. Even self, Pilate no wait make Jesus answer the question, e just comot go outside.

Fine-Fine Things Wey You See for Bible

(John 19:30) When Jesus taste the sour wine, e talk say: ‘I don do everything wey you say make I do!’ Then e bend e head, and e die.

w10 8/15 p. 11 ¶15

Wetin Jesus Death Don Do?

¹⁵ Jesus dey ontop the torture stake, and small time e go die. Just before e die, e talk say: ‘I don do everything wey you say make I do!’ (John 19:30) From the time wey Jesus baptize go reach the time wey e die, na three and half years. Jehovah help Jesus do many good things! When Jesus die, ground shake sotey e open (violent earthquake). This one make the Roman army officer in charge of people wey they kill Jesus talk say: ‘True-true, this one na Son of God.’ (Matt. 27:54) E fit be say the officer see when the people de laugh Jesus because e talk say e be Son of God. Jesus really suffer but e no ever deny Jehovah. This thing wey Jesus do, show say Satan na wicked liar. Satan challenge everybody wey e de worship Jehovah well. E talk say we go give everything wey we get so that we go save our life. (Job 2:4, Complete Jewish Bible) As Jesus no leave Jehovah, e still show say Adam and Eve for still dey faithful for Jehovah, because their own test really easy. The most important one na say, the way Jesus live e life and as e die, show say na Jehovah get the right to rule. And say Jehovah na the best ruler. (Read Proverbs 27:11.) But Jesus death still do other things.

(John 19:31) Since that day na the day of Preparation, the Jews tell Pilate say make e break the leg of the people wey dey the torture stake, and carry them comot so that they no go remain there for Sabbath (because that Sabbath day na special Sabbath).

nwtsty study note for Joh 19:31

that Sabbath day na special Sabbath: Nisan 15 na the day after Passover and e de always be Sabbath day. They go do Sabbath that day, even if no be the normal Sabbath day. (Le 23:5-7) If this Sabbath fall the same day with the normal Sabbath (the seventh day for Jew people their calendar, wey be Friday evening to Saturday evening), them de call-am “special” Sabbath. The day wey Jesus die na Friday, for the year 33 C.E. And the day after Jesus die na this special Sabbath. From 29 go reach 35 C.E., the only year wey Nisan 14 be Friday na for the year 33 C.E. So this one show say true-true na Nisan 14, 33 C.E., Jesus die.