Study Book for Our Life and Preaching Meeting
NOVEMBER 7-13
FINE-FINE LESSON FROM BIBLE | 2 KINGS 5-6
“The Number of People With Us Plenty Pass the Number of People With Them”
it-1 716 ¶4
Elisha
Jehovah save Israel from Syria hand. For the time wey King Jehoram de rule Israel, Syria people plan to attack Israel people by surprise. But Elisha de always spoil their plan, because e de always tell King Jehoram the plan wey Syria people get. Ben-hadad II wey be king of Syria first de think say na e person de tell Israel people their plan. But later, when e find out who de tell King Jehoram their plan, e send e army go Dothan. Them surround the place with their horse and things wey them take de fight war so that them go catch Elisha. (PICTURE, Vol. 1, p. 950) Elisha servant start to fear no be small. But Elisha pray to God to open the servant eye. When the servant eye open, “e see plenty horse and war motor of fire. Them full the area wey mountain dey and them surround Elisha.” So as Syria people de near them, Elisha come pray for another kind of miracle. E say: “Abeg, make this nation blind.” Elisha come tell Syria people say make them follow-am. But e no go need to hold their hand to show them road, meaning say na their mind blind no be their eyes. Them no come know Elisha wey them come catch again, and them no even know where Elisha de carry them go.—2Ki 6:8-19.
w13 8/15 30 ¶2
Elisha See War Motor of Fire—You De See-am?
Even though say enemies surround Elisha for Dothan, Elisha no fear. Why? Because e don make e faith for Jehovah really strong. Today, we still need that kind faith. So e go good make we de pray to God for holy spirit so that we fit show faith and other character wey holy spirit de give.—Luke 11:13; Gal. 5:22, 23.
it-1 343 ¶1
Blindness
The kind blindness wey happen to Syria army na blindness of the mind. If to say na their eye blind, e for mean say them go need who go hold their hand waka. But the Bible portion show say Elisha just tell them say: “No be the road be this, and this one no be the city. Make wuna follow me.” Na this kind thing make William James talk for e book wey be Principles of Psychology (1981, Vol. 1, p. 59) say: ‘One thing about the kind brain problem wey them de call cortical disorder be say e fit make person blind for mind. This one no mean say the eye no de send signal to the brain when e see things, but the thing be say the brain no fit explain-am. Wetin happen be say, the connection wey dey between the signal wey the brain receive and wetin e mean, no clear. And if anything disturb the space wey dey between the part of the brain wey de receive pictures and other part of the brain, e fit make person blind for mind.’ E fit be say na this kind blindness Jehovah remove from Syria army when them reach Samaria. (2Ki 6:18-20) E fit still be say na this kind blindness happen to the men for Sodom. As Bible show, instead of the men to de worry or feel pain say their eyes blind, them continue to de find the door to enter Lot house.—Ge 19:11.
Fine-Fine Things Wey You See for Bible
w05 8/1 9 ¶2
Lessons From the Book of Second Kings
5:15, 16—Why Elisha no accept the gift wey Naaman bring? Elisha no gree collect the gift because e know say the power wey heal Naaman no be e own but e come from Jehovah. For Elisha eye, e no go make sense to use the work wey God give-am take make money or gather property. Today too, people wey de serve God for the correct way no de do more work for Jehovah because of the things wey them go gain. Them de always think of wetin Jesus talk, when e say: “They give wuna for free, make wuna give free.”—Matthew 10:8.
NOVEMBER 14-20
FINE-FINE LESSON FROM BIBLE | 2 KINGS 7-8
“Jehovah Do Wetin Them No Expect”
it-1 716-717
Elisha
So later, king Ben-hadad II attack Samaria people, but e no attack them small-small. E attack them at once with full force and e surround the city. The force serious sotey them report to King Jehoram say one woman don eat e pikin. As e be say King Jehoram na Ahab pikin, and Ahab kill people well-well, to kill person no be new thing to King Jehoram, so e swear say he must kill Elisha. But the swear wey e swear no work. As e reach the prophet house with e army officer, Jehoram talk say e no believe say Jehovah de help again. Elisha come tell the king say food go plenty the next day. But the king army officer start to de laugh because of wetin Elisha talk. This one make Elisha talk say: “You go use your eye see the food, but your mouth no go touch-am.” So Jehovah make the army of Syria people hear sound like say na plenty army from different Nation join together to come attack them, so they run, and leave all their things and even their food wey them carry come. When the King hear say the Syria army don run, e send e army officer make e guard the gate of Samaria. And na there them for use leg match-am to death when the hungry people of Israel de rush to carry the food wey dey the camp where the Syria army stay. E see the food with e eyes but e no even taste-am.—2Ki 6:24–7:20.
Fine-Fine Things Wey You See for Bible
it-2 195 ¶7
Lamp
Kings Wey Come From the Line of David. Jehovah God make David king for the throne of Israel. The things wey David do show say e get sense to lead Israel people, and e de follow wetin God talk. Na e make them call-am the lamp of Israel. (2Sa 21:17) For the covenant wey E make with David, Jehovah promise say: “Nothing go shake your throne forever.” (2Sa 7:11-16) So the kings wey come From David through e pikin Solomon come be lamp for Israel.—1Ki 11:36; 15:4; 2Ki 8:19; 2Ch 21:7.
NOVEMBER 21-27
FINE-FINE LESSON FROM BIBLE | 2 KINGS 9-10
“E Get Strong Heart and E Ready to Do the Work Wey Them Give-am”
w11 11/15 3 ¶2
Jehu Support Pure Worship
Jehu receive one assignment for the time wey things bad for Israel. The thing Wey Ahab wife wey be Jezebel de do don really spoil the country. And na this Jezebel be the mama of Jehoram wey de rule Israel that time. E make people de worship Baal instead of Jehovah, e kill many of God prophet, and e spoil the people with the “bad-bad things” and “juju things” wey e de do. (2 Ki. 9:22; 1 Ki. 18:4, 13) Jehovah come talk say everybody for Ahab house go die, even Jehoram and Jezebel. Na Jehu go do this thing wey Jehovah don talk.
w11 11/15 4 ¶2-3
Jehu Support Pure Worship
Jehu no gree answer the two messengers wey them send to-am. Later e see King Jehoram. And e still see King Ahaziah of Judah wey de support King Jehoram. King Jehoram come ask-am say: “Jehu, peace dey so?” But Jehu answer-am say: “How peace go dey when Jezebel, your mama, don spoil everywhere with all the bad-bad things and juju things wey e de do?” This thing wey Jehu talk really shock Jehoram. Na so e turn and e want run, but before e know, Jehu shoot-am with arrow and the arrow enter e heart. Na there the King die inside e chariot. Even though say Ahaziah manage escape, Jehu still later look for-am and tell e people make them kill-am.—2 Ki. 9:22-24, 27.
The next person wey Jehu go kill for Ahab house na wicked Queen Jezebel. Jehu even call-am person wey them don curse. And na true e talk. As Jehu ride e horse enter Jezreel, e see Jezebel as e de look from one of the window for the palace. Jehu no waste time, e command the court officials make them throw Jezebel down from the window. E come use e horse match-am for ground. After, Jehu still kill other plenty people wey still dey wicked Ahab house.—2 Ki. 9:30-34; 10:1-14.
w11 11/15 5 ¶3-4
Jehu Support Pure Worship
Na true say Jehu kill plenty people. But Bible still talk say Jehu na man wey get strong heart and wey free Israel people from the hand of wicked Jezebel and e family. If any leader for Israel want really succeed to do this kind thing, e must get strong heart and e go really ready to support pure worship. As one Bible dictionary talk, ‘the work na rough work and them really do-am finish.’ ‘If to say na cool mind them use, them for no fit remove Baal worship for Israel.’
As we don see, for Christians to fit face some kind things for this world today, them really need to show the kind character wey Jehu show. For example, wetin we go do if we face temptation to do something wey Jehovah hate? Make we no waste time, make we get strong heart and quick-quick reject anything like that. Make we no use Jehovah worship play at all.
Fine-Fine Things Wey You See for Bible
w11 11/15 5 ¶6-7
Jehu Support Pure Worship
Jehu fit don believe say for the kingdom of Israel to dey separate from Judah, the two kingdoms need to de do their worship for different way. So like the former kings for Israel, e allow the people to de worship calf. But this one go show say e no get faith for Jehovah, the God wey make-am king.
Jehovah praise Jehu because e do well as e do things wey good for E eye. But Jehu no continue to use all e heart follow Jehovah. (2 Ki. 10:30, 31) If we think about the better things wey Jehu first do, e fit surprise us and pain us say e later do this kind thing. But something dey wey we fit learn from-am. Make we no ever take our friendship with Jehovah play at all. Everyday, we need to de do things wey go make us continue to hold Jehovah tight. Some of this things na to de study Bible, de think deep about the things wey we learn, and de always pray to Jehovah. So, make we dey careful so that we go de do our best and continue to de obey Jehovah law with all our heart.—1 Cor. 10:12.
NOVEMBER 28–DECEMBER 4
FINE-FINE LESSON FROM BIBLE | 2 KINGS 11-12
“One Wicked Woman Wey No Escape Punishment”
it-1 209
Athaliah
For the eight years wey Jehoram be king, Athaliah wey be e wife push-am to de do wetin bad for Jehovah eye. This na the same thing wey Athaliah mama wey be Jezebel still do. (1Ki 21:25; 2Ch 21:4-6) Like e mama, e still kill many people. When e wicked son Ahaziah die after one year wey e rule as king, e kill every other person wey dey in line to be king. But e no fit kill one small baby wey be Jehoash because the high priest and e wife wey be Jehoash aunty hide-am. Na so Athaliah come make eself queen for six years, c. 905-899 B.C.E. (2Ch 22:11, 12) Athaliah sons come de thief things wey dey Jehovah temple and de use them as sacrifice to Baal.—2Ch 24:7.
it-1 209
Athaliah
When Jehoash reach seven years, High Priest Jehoiada wey fear Jehovah bring-am out make people see-am, and e make-am king because na e get the right to rule. As Athaliah as people de shout, e run go temple. As e see wetin de happen, e start to shout, “Them don plan me! Them don plan me!” High Priest Jehoiada command say make them carry Athaliah go outside and kill-am for the horse gate of the palace; e fit be say na Athaliah be the last person wey come from Ahab useless family. (2Ki 11:1-20; 2Ch 22:1–23:21) All this things wey happen just show say everything wey Jehovah talk about wetin go happen to Ahab family, happen as Jehovah talk-am.—2Ki 10:10, 11; 1Ki 21:20-24.
Fine-Fine Things Wey You See for Bible
it-1 1265-1266
Jehoash
After, for all the time wey High Priest Jehoiada dey alive, e continue to do like papa to young Jehoash and de advise-am. This one make everything de go well for Jehoash. When e don reach 21 years, e marry two wife. One of them name na Jehoaddan. Na this two women born children for Jehoash. So na like this the family line of David wey lead to the Messiah take continue, because na small remain, e for no continue. But e no happen like that.—2Ki 12:1-3; 2Ch 24:1-3; 25:1.
DECEMBER 5-11
FINE-FINE LESSON FROM BIBLE | 2 KINGS 13-15
“Jehovah Go Bless Us If We Use All Our Heart Do E Work”
w10 4/15 26 ¶11
You de Follow Jesus Christ With All your Heart?
11 To use examples explain why e dey important to use your heart work for Jehovah, see wetin happen when Jehoash de rule as king for Israel. Jehoash cry go meet Elisha because Syria de threaten Israel and e no just know wetin e go do. Prophet Elisha tell-am make e shoot arrow from window to the direction of Syria. This one go show how Jehovah go use Jehoash win Syria. This one for don give the king mind. After, Elisha come tell the king say make e carry e arrows and make e use them chuk ground. Jehoash chuk the ground three times. Elisha come vex for-am because if to say e chuk the ground five or six times, e for show say Jehoash go destroy Syria finish. But now, na only three times Jehoash go win Syria. Because e no use all e heart do wetin Jehovah talk, Jehoash no succeed finish. (2 Kings 13:14-19) Wetin we fit learn from this story? Jehovah go bless us well-well if we do e work with all our heart.
w13 11/1 11 ¶5-6
“E De Bless the People Wey De Use All Their Heart Look For-am”
Who Jehovah de bless? Paul talk say na “people wey de use all their heart look for-am.” One reference work for people wey de translate Bible show say Greek word wey be to “use all our heart look for-am” no mean say we de comot go find-am. Instead, wetin e mean be say we de come know God as we de worship-am. Another reference work explain say, this Greek verb de help us see say we need to put power and do our best as we de worship Jehovah. Yes, Jehovah de bless people wey love-am and wey their faith de move them to worship-am with all their heart.—Matthew 22:37.
How Jehovah take de bless people wey de really worship-am? To show say E love them and E really value their worship, E don promise to give them everlasting life for inside Paradise wey go dey this earth. (Revelation 21:3, 4) But before paradise go reach, people wey de use all their heart worship God today still de get plenty blessing. The help wey them de get from holy spirit and the sense from Bible, de help them enjoy better life now.—Psalm 144:15; Matthew 5:3.
Fine-Fine Things Wey You See for Bible
w05 8/1 11 ¶3
Lessons From the Book of Second Kings
13:20, 21—This miracle de support the worship of any part of person dead body wey some religions see as holy? No, no be so. Bible no show say them ever worship Elisha bone. Na God power make the miracle happen. And na God power still make Elisha fit do all the miracle wey e do the time wey e dey alive.
DECEMBER 12-18
FINE-FINE LESSON FROM BIBLE | 2 KINGS 16-17
“Jehovah No Go Dey Patient Forever”
it-2 908 ¶5
Shalmaneser
Them Take Over Israel. For the time wey King Hoshea de rule Israel (c. 758-740 B.C.E.), Shalmaneser V wey be king for Assyria start to de control-am. E make Hosea de pay-am money or other things wey get value every year. (2Ki 17:1-3) But after some time, Hoshea no gree pay wetin e de pay to Shalmaneser V again. Instead, e go meet King So of Egypt (Check SO.) and them start to plan against Shalmaneser V. When Shalmaneser V find out, e put Hoshea for prison and carry e army go surround Samaria for three years. Later, them destroy the city and carry Israel people comot as slave.—2Ki 17:4-6; 18:9-12; compare Ho 7:11; Eze 23:4-10.
it-1 414-415
Them Carry Them as Slave
Na the same thing make them carry both the ten-tribe kingdom of Israel for north and the two-tribe kingdom of Judah for south as slave. The reason be say, them stop to de worship Jehovah and start to de worship lie-lie gods. (De 28:15, 62-68; 2Ki 17:7-18; 21:10-15) Even though say Jehovah continue to send e prophets to warn them, them no gree listen. (2Ki 17:13) All the king wey rule for the ten-tribe kingdom of Israel no comot all lie-lie worship wey the first king Jeroboam start. And the other two-tribe kingdom of Judah no gree listen as Jehovah de warn them, and them no still gree learn from the way them carry the ten-tribe kingdom of Israel as slave. (Jer 3:6-10) Later, enemy nations come carry the different-different tribe for the two kingdoms and make them slave for different-different place.
Fine-Fine Things Wey You See for Bible
it-2 847
Samaritan
The name “Samaritan” first show for Bible after them don attack the ten-tribe kingdom of Samaria for 740 B.C.E. Them de use this name de call the people wey de stay for the north part of the kingdom before the attack. But this name no concern other people wey come from different part of Assyria wey later enter the land. (2Ki 17:29) E be like say no be all Israel people wey de stay Samaria Assyria carry comot, because 2 Chronicles 34:6-9 (compare 2Ki 23:19, 20) help us see say some Israel people still dey the land for the time wey King Josiah de rule. After some time, them come de use the name “Samaritan” de call both the pikin them of the people wey remain for Samaria and the people wey Assyria bring come. Na e be say some of this “Samaritan” come from Assyria and Israel people wey marry each other. After some time pass again, them come de use this name base on the kind religion wey person de practice, instead of where person come from or the kingdom wey de rule. “Samaritan” come be name wey them de call person wey belong to the religion wey them de practice for Shechem and Samaria of olden days. And wetin them believe dey different from the religion of Jew people.—Joh 4:9.
DECEMBER 19-25
FINE-FINE LESSON FROM BIBLE | 2 KINGS 18-19
“How People Wey Dey Against Us De Try to Make Us Fear”
w05 8/1 11 ¶5
Lessons From the Book of Second Kings
18:19-21, 25—Hezekiah really make agreement with Egypt? No. Na lie Rabshakeh talk. Na so e still lie when e talk say na Jehovah send-am make e come destroy Jerusalem. But King Hezekiah trust Jehovah and e hold-am tight.
w10 7/15 13 ¶3
“No Fear. Na Me Go Help You”
Rabshakeh talk for cunning-cunning way so that people for Judah go de get double mind. E talk say: “No be [Jehovah] high place and altar Hezekiah don remove? . . . Na Jehovah use e mouth tell me say, ‘attack this land and destroy-am.’ ” (2 Ki. 18:22, 25) So wetin Rabshakeh de talk be say Jehovah no go fight for E people because E de vex for them. But that one no be true. Jehovah dey happy with Hezekiah and the people wey don come back to true worship.—2 Ki. 18:3-7.
w13 11/15 19 ¶14
Seven Shepherd, Eight People Wey Go Rule as Prince—Wetin E Mean for Us Today?
14 Assyria king set e camp for Lachish wey dey the southwest side for Jerusalem. Na from there e send three of e men to go tell Jerusalem make them surrender. The person wey de talk for-am wey them de call Rabshakeh, use many different cunning way to try deceive them. E use Hebrew language tell the people to turn against the king and support Assyria. E even promise them say they go carry them go better land wey enjoyment go dey. But this thing wey e talk na lie. (Read 2 Kings 18:31, 32.) Then Rabshakeh talk say just as the gods of other nations no fit save them, na so Jehovah no go fit save Jew people from Assyria hand. But the people use sense, them no answer all the lie-lie wey Rabshakeh don talk. And na wetin Jehovah people still de do today.—Read 2 Kings 18:35, 36.
yb74 177 ¶1
Part 2—Germany
E go surprise you to know say the guards wey them de call SS de turn against person wey be Jehovah witness after them don use cunning-cunning trick decieve-am and make-am sign say e no be Jehovah witness again. The way they go come de treat them go even worse pass the time when them still be Jehovah witness. Karl Kirscht talk this one. E say: ‘For inside the concentration camp, na Jehovah witness people them de always try to decieve pass with many lie lie talk. This one na to make them sign say them no be Jehovah witness again. Them de always tell us make we sign. Some of us agree to sign-am. But many times even after them don sign, them go still need to wait pass one year before them go free them. For this time wey them de wait, the SS guards de see them as hypocrites and people wey no get mind. Them de even force them make them waka round their brothers wey still be witness before them go comot.’
Fine-Fine Things Wey You See for Bible
it-1 155 ¶4
Archaeology
For example, Bible record talk say na the two pikin of King Sennacherib of Assyria wey be Adrammelech and Sharezer, kill-am. After, another of e son wey be Esar-haddon come be king. (2Ki 19:36, 37) But another record for Babylon talk say na one of Sennacherib son kill-am on the 20th of Tebeth. Both Berossus wey be priest of Babylon for the third century B.C.E., and Nabonidus wey be king of Babylon for the sixth century B.C.E., talk the same thing say na only one of Sennacherib pikin kill-am. But later, them see small part of one record wey them de call Prism of Esar-haddon. For this record, Esar-haddon wey be the son wey later become king talk say e brothers (plural) join together kill their papa wey be Sennacherib and them run. For the Universal Jewish History (1948, Vol. I, p. 27), Philip Biberfeld talk say: ‘Mistake dey both the record for Babylon and the thing wey Nabonid and Berossus talk. Na only wetin Bible talk about this matter correct. The thing wey Esarhaddon write really confirm everything wey Bible talk about this matter and na e even correct pass all this record from Babylon. This thing wey happen, na very important thing wey fit help person wey want check other record wey no agree with wetin Bible talk.’
DECEMBER 26–JANUARY 1
FINE-FINE LESSON FROM BIBLE | 2 KINGS 20-21
“Prayer Make Jehovah Help E Servant”
ip-1 394 ¶23
King Wey Get Blessing Because of E Faith
23 Around the time wey Sennacherib first come against Judah, Hezekiah start to de sick. Prophet Isaiah tell-am say e go die. (Isaiah 38:1) When King Hezekiah hear this news, e no happy at all. King Hezekiah na 39-years that time. Wetin really de make-am feel sad, na because e de think about the future of e people, no be only about e sickness. Jerusalem and Judah dey danger because Assyria fit come attack them. If Hezekiah die, who go lead the people go fight? That time, Hezekiah no get any pikin wey go be king after-am. When e de pray, Hezekiah really beg Jehovah to help-am.—Isaiah 38:2, 3.
w17.03 21 ¶16
Serve Jehovah With Your Whole Heart!
16 Later, Hezekiah start to sick and e almost die. E beg Jehovah make E remember how e don serve-am well. (Read 2 Kings 20:1-3.) From wetin Bible talk, we know say we no de live for time wey we fit expect God to do miracle for us when we de sick or to add extra years to our life. But, as Hezekiah do, all of us fit tell Jehovah for prayer say: “I don serve you well and waka straight with all my heart.” You believe say Jehovah go fit, and e get the mind to help you when you de sick?—Ps. 41:3.
g01 7/22 13 ¶4
How Prayer Fit Help Me?
For Bible time, Jehovah give direct answer to the prayer of some men wey really get faith. Sometimes, E even use miracle answer them. For example, when King Hezekiah hear say e go die because of e sickness, e really beg Jehovah make e help-am. Jehovah answer say: “I don hear your prayer. I don see your tears. See, I de heal you.” (2 Kings 20:1-6) Some other men and women wey serve God well, still see how God answer their prayer.—1 Samuel 1:1-20; Daniel 10:2-12; Acts 4:24-31; 10:1-7.
Fine-Fine Things Wey You See for Bible
it-2 240 ¶1
Leveling Instrument
For building work, leveling instrument de help to fit build well or to check if wetin them build go last. Jehovah don talk say because of the bad things wey Jerusalem people de do, E go use ‘the measuring line wey E use for Samaria. . .and E go use the levelling tool wey E use for Ahab house’ for them. God don measure Samaria and the house of King Ahab and E see say them really bad and wicked. Because of this one, E destroy them. Na the same way God go judge Jerusalem and their kings them. E go disgrace them because of their wickedness and E go destroy the city. This things really happen for Jerusalem for 607 B.C.E. (2Ki 21:10-13; 10:11) Jehovah use Isaiah tell the wicked kings for Jerusalem about the destruction wey de wait for them. Isaiah still tell them wetin Jehovah don talk, e say: “And I go use justice as measuring line and righteousness go be leveling tool.” People wey de follow the way of justice and righteousness wey Jehovah don show us, de show say them really be God servants and this one go make them get life. But anybody wey nor follow this way go face destruction.—Isa 28:14-19.