To Make Friends Fit Help You Stop to Feel Say You Dey Alone​—How Bible Fit Help

For 2023, people wey sabi health matter talk say to dey alone na serious health problem wey them need to do something about-am. Any solution really dey to this problem?

• Dr. Vivek Murthy, U.S. surgeon general talk say: “To de feel say we dey alone and to separate ourself from other people na serious problem wey fit affect our health and make us no dey happy.” But e still talk say: “E dey our hand to do something about-am.” Wetin we fit do? E say: “We fit do small-small things everyday to make our friendship with other people to dey strong.”a

No be only when we separate ourself from other people we fit dey feel say we dey alone. Some de feel say them dey alone even when them dey with plenty people. No matter wetin de make us feel say we dey alone, Bible fit help us. Bible get better advice wey fit help us to do something to make our friendship with other people strong more-more, when we de feel say we dey alone.

Bible advice wey fit help

Make you sabi talk well with people. This one mean say you no go only de talk how you de feel every time but you go still listen well to other people when them de talk how them de feel. The more you de show person say you care about-am, e go make una friendship to dey strong more-more.

• Bible advice: “Make una no de look for wetin go benefit only unaself, but wetin go still benefit other people.”​—Philippians 2:⁠4.

Get different-different kind of friends. Dey ready to make friends with people wey old pass you or people wey young pass you or people wey get different culture or wey come from other country.

• Bible advice: “Make una really show love.”​—2 Corinthians 6:⁠13.

If you want learn more about how to make your friendship with other people strong, read the article “Satisfying Our Hunger for Friendship.”