LEVITIKO

1 Pea neʼe pauʼi leva e Sehova ia Moisese ʼo palalau kia ia mai te fale la ʼo te fono.+ Neʼe ina ui age: 2 “Palalau ki te kau Iselaele* pea ke ke ui age kia natou: ‘Kapau ʼe fia foaki e he tahi ia koutou he manu neʼe ina toʼo mai tana faga manu ohage ko hana molaga kia Sehova, ʼe tonu anai ke ina foaki he manu mai tana faga pipi, peʼe ko tana faga ovi peʼe ko tana faga tao.+

3 “ ‘Kapau ʼe ina foaki he manu neʼe ina toʼo mai tana faga pipi ohage ko he holokoseta,* ʼe tonu anai ke ina foaki he vitulo ʼe heʼe mele.+ ʼE tonu anai ke ina foaki ʼaki he lotolelei+ ia muʼa ʼo Sehova, ʼi te huʼaga ʼo te fale la ʼo te fono. 4 ʼE ina hili anai tona nima ki te ʼulu ʼo te manu ʼo te holokoseta, pea ʼe tali anai e te ʼAtua tana molaga pea ʼe ina fakamolemole anai ʼana agahala.

5 “ ‘Pea ʼe tonu anai ke matehi te vitulo ʼae kei mui ia muʼa ʼo Sehova. Pea ʼe momoli anai e te ʼu foha ʼo Alone, ʼae ko te kau pelepitelo+ te toto ki te ʼAtua pea ʼe natou afuhi anai ki te ʼu faʼahi fuli ʼo te ʼaletale,+ ʼae ʼe tuʼu ʼi te huʼaga ʼo te fale la ʼo te fono. 6 ʼE fohi anai te kili ʼo te manu ʼae ka molagaʼi, pea ʼe taʼataʼaga anai.+ 7 ʼE tonu anai ki te ʼu foha ʼo Alone, ʼae ko te kau pelepitelo, ke natou ʼai te afi* ki te ʼaletale+ pea mo hili te fafie ki te afi. 8 ʼE hili anai e te ʼu foha ʼo Alone, ʼae ko te kau pelepitelo, te ʼu ʼinasi+ mo te foʼi ʼulu ʼo feia mo te gako ʼo te ʼu ifiifi ki te fafie ʼae ʼe tafu ʼaki te afi ʼi te ʼaletale. 9 ʼE fakamaʼa anai tona gākau pea mo ʼona vaʼe ʼaki te vai, pea ʼe tutu anai e te pelepitelo ke kohu te ʼu meʼa fuli ʼaia ʼi te ʼaletale. ʼE ko he holokoseta ʼaia, ʼei ko he molaga ʼe tutu maʼa Sehova pea ʼe ko he ʼaele lelei kia te ia.+

10 “ ‘Kapau ʼe ina foaki he manu+ neʼe ina toʼo mai te ʼu ovi tagata ʼae kei mui peʼe ko te ʼu tao tagata ohage ko he holokoseta, ʼe tonu anai ke ina foaki he manu ʼe heʼe mele.+ 11 ʼE matehi anai te manu ʼi te faʼahi noleto ʼo te ʼaletale, ia muʼa ʼo Sehova. Pea ʼe afuhi anai e te ʼu foha ʼo Alone, ʼae ko te kau pelepitelo tona toto ki te ʼu faʼahi fuli ʼo te ʼaletale.+ 12 ʼE taʼataʼaga anai, pea ʼe hili anai e te pelepitelo te ʼu ʼinasi, mo te foʼi ʼulu pea mo te gako ʼo te ʼu ifiifi ki te fafie ʼae ʼe tafu ʼaki te afi ʼi te ʼaletale. 13 ʼE fakamaʼa anai tona gākau pea mo ʼona vaʼe ʼaki te vai. Pea ʼe momoli anai e te pelepitelo ia te ʼu meʼa fuli ʼaia ki te ʼAtua pea ʼe ina tutu anai ke kohu ʼi te ʼaletale. ʼE ko he holokoseta ʼaia, ʼei ko he molaga ʼe tutu maʼa Sehova pea ʼe ko he ʼaele lelei kia te ia.

14 “ ‘Kae kapau ʼe ina foaki he manulele kia Sehova ohage ko he holokoseta, ʼe tonu anai ke ina foaki he kulukulu peʼe ko he lupe ʼe kei mui.+ 15 ʼE momoli anai e te pelepitelo te manulele ki te ʼAtua ʼi te ʼaletale pea ʼe ina hifiʼi* anai tona kia pea mo ina tutu ke kohu te manulele ʼi te ʼaletale, kae ʼe tonu anai ke fakahali tona toto ki he faʼahi ʼo te ʼaletale. 16 ʼE tonu anai ke ina fusi te manulele pea mo toʼo tona taga kai. ʼE ina liʼaki anai te ʼu fuluʼi manulele mo tona taga kai ʼo ovi ki te ʼaletale, ʼi te faʼahi esite, ki te faʼahi ʼae ʼe laku ki ai te ʼu lefulefu.*+ 17 ʼE ina fahiʼi nima anai te manulele ʼi te vaha ʼo ʼona pakakau kae ʼe mole motu lua anai. ʼE tutu anai e te pelepitelo te manulele ʼi te ʼaletale pea ʼe ina tuku anai ke kohu. ʼE ko he holokoseta ʼaia, ʼei ko he molaga ʼe tutu maʼa Sehova pea ʼe ko he ʼaele lelei kia te ia.

2 “ ‘Kae kapau leva ʼe momoli e he tahi* he molaga meʼa kai+ kia Sehova, ʼe tonu anai ke ina foaki he falena lelei. Pea ʼe tonu anai ke ina liligi ki ai he lolo pea mo ʼai ki ai he iseso hina.*+ 2 Pea ʼe ina ʼaumai anai ki te ʼu foha ʼo Alone, ʼae ko te kau pelepitelo. Pea ʼe toʼo anai e te pelepitelo he kiʼi moʼi falena lelei pea mo he kiʼi moʼi lolo ʼo feia mo te iseso hina fuli, ʼo tutu ke kohu ʼi te ʼaletale. Ko he fakata ʼaia ʼo* te molaga katoa.+ ʼE ko he molaga ʼe tutu maʼa Sehova pea ʼe ko he ʼaele lelei kia te ia. 3 Ko te meʼa ʼae ka toe anai ʼi te molaga meʼa kai, ʼe maʼu anai e Alone mo ʼona foha.+ Ko he meʼa taputapu ʼaupito+ mai te ʼu molaga ʼae ʼe tutu maʼa Sehova.

4 “ ‘Kapau ʼe ke momoli ki te ʼAtua he molaga meʼa kai neʼe fakamoho ʼi te gutuʼumu, ʼe ke fai anai ʼaki te falena lelei. ʼE ko he ʼu pane takafuafua* hala fakatupu neʼe ʼai ki ai he moʼi lolo, peʼe ko he ʼu foʼi fakapaku hala fakatupu neʼe vali ʼaki te lolo.+

5 “ ‘Kapau ko hau molaga meʼa kai neʼe fakamoho ʼi te fakapaku,+ ʼe ke fai anai ʼaki he falena hala fakatupu neʼe ʼai ki ai he moʼi lolo. 6 ʼE tofitofi anai, pea ʼe ke liligi anai ki ai he moʼi lolo.+ ʼE ko he molaga meʼa kai ʼaia.

7 “ ‘Kapau ko hau molaga meʼa kai neʼe teuteuʼi ʼi he kulo, ʼe ke fai anai ʼaki he falena lelei pea mo he moʼi lolo. 8 ʼE tonu anai ke ke ʼaumai kia Sehova te molaga meʼa kai ʼaia neʼe teuteuʼi ʼaki te ʼu meʼa ʼaia. ʼE foaki anai ki te pelepitelo pea ʼe fakaovi anai mo te molaga meʼa kai ʼaia ki te ʼaletale. 9 ʼE toʼo anai e te pelepitelo he koga ʼo te molaga meʼa kai ʼaia, ʼo tutu ke kohu ʼi te ʼaletale. Ko he fakata ʼaia ʼo* te molaga katoa.+ ʼE ko he molaga ʼe tutu maʼa Sehova pea ʼe ko he ʼaele lelei kia te ia.+ 10 Ko te meʼa ʼae ka toe anai ʼi te molaga meʼa kai, ʼe maʼu anai e Alone mo ʼona foha. Ko he meʼa taputapu ʼaupito mai te ʼu molaga ʼae ʼe tutu maʼa Sehova.+

11 “ ‘ ʼE mole tonu ke kotou momoli kia Sehova he molaga meʼa kai neʼe fai ʼaki he meʼa fakatupu,+ koteʼuhi ʼe mole tonu ke kotou tutu ke kohu he falena neʼe natu ʼaki he meʼa fakatupu peʼe ko he meli, ohage ko he molaga ʼe tutu maʼa Sehova.

12 “ ‘ ʼE feala ke kotou momoli kia Sehova te ʼu meʼa ʼaia ko he molaga ʼo te ʼu ʼuluaki fua.+ Kae ʼe mole tonu ke ʼaumai te ʼu meʼa ʼaia ki te ʼaletale ko he molaga ʼe tutu maʼa te ʼAtua pea ʼe ko he ʼaele lelei kia te ia.

13 “ ‘ ʼE ke konakonaʼi anai te ʼu molaga meʼa kai fuli ʼae ka ke fai. Pea ʼaua naʼa ke galoʼi te ʼai ʼo te masima ʼo te fuakava ʼo tou ʼAtua ki tau molaga meʼa kai. ʼE ke momoli fakatahi anai ʼau molaga fuli mo he masima.+

14 “ ‘Kapau ʼe ke momoli kia Sehova he molaga meʼa kai ʼo te ʼu ʼuluaki fua ʼae kua matutuʼa, ʼe tonu anai ke ke momoli te ʼu tegaʼi fulumeto* foʼou ʼae neʼe taʼo, pea neʼe tuki. Ko te molaga meʼa kai ʼaia ʼo ʼau ʼuluaki fua ʼae kua matutuʼa.+ 15 ʼE ke ʼai anai ki ai he moʼi lolo pea mo he iseso hina. ʼE ko he molaga meʼa kai ʼaia. 16 Pea ʼe tutu anai e te pelepitelo he koga ʼo te ʼu tegaʼi fulumeto ʼae neʼe tuki, mo he lolo ʼo feia mo te iseso hina fuli ke kohu ʼi te ʼaletale. Ko he fakata ʼaia ʼo* te molaga katoa.+ ʼE ko he molaga ʼe tutu maʼa Sehova.

3 “ ‘Kapau ʼe ina momoli he sakilifisio ʼo te tokalelei*+ pea kapau ko he manu tagata peʼe fafine neʼe ina toʼo mai tana faga pipi, ʼe tonu anai ke ina momoli ia muʼa ʼo Sehova he manu ʼe heʼe mele. 2 ʼE ina hili anai tona nima ki te ʼulu ʼo te manu, pea ʼe matehi anai ʼi te huʼaga ʼo te fale la ʼo te fono. Pea ʼe afuhi anai e te ʼu foha ʼo Alone, ʼae ko te kau pelepitelo, te toto ki te ʼu faʼahi fuli ʼo te ʼaletale. 3 Koʼeni te ʼu faʼahi ʼo te sakilifisio ʼo te tokalelei ka momoli anai ko he molaga ʼe tutu maʼa Sehova:+ ko te gako+ ʼae ʼe ina ʼaofi te gākau, mo te gako fuli ʼae ʼe pipiki ki te gākau, 4 mo te ʼu ifiifi ʼe lua mo te gako fuli ʼae ʼe ina ʼaofi te ʼu ifiifi ʼaia. ʼE toe toʼo fakatahi anai te gako ʼo te ʼate mo te ʼu ifiifi.+ 5 ʼE tutu anai e te ʼu foha ʼo Alone te ʼu meʼa fuli ʼaia ke kohu ʼi te ʼaletale, ʼi ʼoluga ʼo te holokoseta ʼae neʼe hili ʼi te fafie ʼae ʼe tafu ʼaki te afi.+ ʼE ko he molaga ʼaia ʼe tutu maʼa Sehova pea ʼe ko he ʼaele lelei kia te ia.+

6 “ ‘Kapau ʼe ina momoli kia Sehova he ovi peʼe ko he tao ko he sakilifisio ʼo te tokalelei, ʼe ina momoli anai he manu tagata peʼe fafine ʼe heʼe mele.+ 7 Kapau ʼe ina momoli he ovi tagata kei mui ko hana molaga, ʼe ina momoli anai ia muʼa ʼo Sehova. 8 ʼE ina hili anai tona nima ki te ʼulu ʼo te manu, pea ʼe matehi anai ʼi te muʼa fale la ʼo te fono. ʼE afuhi anai e te ʼu foha ʼo Alone te toto ki te ʼu faʼahi fuli ʼo te ʼaletale. 9 ʼE momoli anai te gako ʼo te sakilifisio ʼo te tokalelei ko he molaga ʼe tutu maʼa Sehova.+ ʼE toʼo anai ʼi te ovi tagata ʼaia tona hiku ʼae ʼe gako, ʼae ʼe ovi ki tona hui tuʼa tofu, mo te gako ʼae ʼe ina ʼaofi tona gākau, mo te gako fuli ʼae ʼe pipiki ki tona gākau, 10 mo te ʼu ifiifi ʼe lua pea mo te gako fuli ʼae ʼe ina ʼaofi te ʼu ifiifi ʼaia. ʼE toe toʼo fakatahi anai te gako ʼo te ʼate mo te ʼu ifiifi.+ 11 Pea ʼe tutu anai e te pelepitelo te ʼu meʼa fuli ʼaia ke kohu ʼi te ʼaletale. ʼE ko he meʼa kai* ʼaia, ʼei ko he molaga ʼe tutu maʼa Sehova.+

12 “ ‘Kapau ko tana molaga ʼe ko he tao, ʼe ina momoli anai ia muʼa ʼo Sehova. 13 ʼE ina hili anai tona nima ki te ʼulu ʼo te manu, pea ʼe matehi anai ʼi te muʼa fale la ʼo te fono. Pea ʼe tonu anai ke afuhi e te ʼu foha ʼo Alone te toto ki te ʼu faʼahi fuli ʼo te ʼaletale. 14 Koʼeni te vahe ʼae ka momoli anai ko he molaga ʼe tutu maʼa Sehova: ko te gako ʼae ʼe ina ʼaofi te gākau, mo te gako fuli ʼae ʼe pipiki ki te gākau,+ 15 mo te ʼu ifiifi ʼe lua mo te gako fuli ʼae ʼe ina ʼaofi te ʼu ifiifi ʼaia. ʼE toe toʼo fakatahi anai te gako ʼo te ʼate mo te ʼu ifiifi. 16 ʼE tutu anai e te pelepitelo te ʼu faʼahi fuli ʼaia ke kohu ʼi te ʼaletale. ʼE ko he meʼa kai* ʼaia, ʼei, ko he molaga ʼe tutu maʼa te ʼAtua pea ʼe ko he ʼaele lelei kia te ia. ʼE maʼu anai e Sehova te gako fuli.+

17 “ ‘ ʼE mole tonu ke kotou kai ki he gako pea mo he toto.+ ʼE ko he lao ʼaia mai he taʼiake ki he tahi taʼiake, ʼi te ʼu faʼahi fuli ʼae ʼe kotou nonofo ai anai.’ ”

4 Pea neʼe toe ui e Sehova kia Moisese: 2 “Ke ke tala ki te kau Iselaele: ‘Kapau ʼe agahala he tahi* kae neʼe mole loto ki ai,+ ʼo ina fai he meʼa neʼe fakatotonu e Sehova ke mole fai, ʼe tonu anai ke mulimuli ki te ʼu faʼahi ʼaeni:

3 “ ‘Kapau ʼe agahala+ te pelepitelo ʼae neʼe fakanofo,+ ʼo lakahala ai mo te hahaʼi fuli, ʼe tonu anai ke ina momoli kia Sehova he vitulo kei mui pea mo heʼe mele ko he molaga ʼo te agahala, ʼuhi ko te agahala ʼae neʼe ina fai.+ 4 ʼE ina ʼaumai anai te vitulo ki te huʼaga ʼo te fale la ʼo te fono+ ia muʼa ʼo Sehova, pea ʼe ina hili anai tona nima ki te ʼulu ʼo te vitulo, pea ʼe ina matehi anai te vitulo ia muʼa ʼo Sehova.+ 5 ʼE toʼo anai e te pelepitelo ʼae neʼe fakanofo+ he moʼi toto ʼo te vitulo ʼo ʼave ki te fale la ʼo te fono. 6 Pea ʼe fufuʼi anai e te pelepitelo tona kauʼi tuhi ki te toto+ pea ʼe ina afuhi tuʼa fitu+ anai ki lalo ia muʼa ʼo Sehova, ʼi te muʼa lito ʼo te koga meʼa taputapu. 7 ʼE toe vali anai e te pelepitelo he moʼi toto ki te ʼu tala ʼo te ʼaletale ʼo te iseso magoni,+ ʼae ʼe tuʼu ia muʼa ʼo Sehova ʼi te fale la ʼo te fono. Pea ʼe ina liligi anai te toe ʼo te toto ʼo te vitulo ki te vaʼe ʼaletale ʼo te ʼu holokoseta,+ ʼae ʼe tuʼu ʼi te huʼaga ʼo te fale la ʼo te fono.

8 “ ‘Pea ʼe ina toʼo anai te gako fuli ʼo te vitulo ʼo te molaga ʼo te agahala, ʼo feia mo te gako ʼae ʼe ina ʼaofi te gākau pea mo te gako ʼae ʼe pipiki ki te gākau, 9 mo te ʼu ifiifi ʼe lua mo te gako fuli ʼae ʼe ina ʼaofi te ʼu ifiifi ʼaia. ʼE toe toʼo fakatahi anai te gako ʼo te ʼate mo te ʼu ifiifi.+ 10 ʼE toe hage pe anai ko te ʼu meʼa ʼae neʼe toʼo ʼi te vitulo ʼo te sakilifisio ʼo te tokalelei.+ Pea ʼe tutu fakatahi anai e te pelepitelo te ʼu meʼa fuli ʼaia ke kohu ʼi te ʼaletale ʼo te ʼu holokoseta.

11 “ ‘Kae ko te kili ʼo te vitulo, mo tona kakano fuli, ʼo feia mo tona ʼulu, mo ʼona vaʼe, mo tona gākau pea mo ʼona faifekau,+ 12 ia te ʼu meʼa fuli ʼae ʼe toe ʼo te vitulo, ʼe ina ʼave anai ki he koga meʼa ʼe mole heʼe maʼa ʼi tuʼa atu ʼo te nofoʼaga pea ʼe laku ai te lefulefu,* pea ʼe ina tutu anai te ʼu meʼa ʼaia ʼi te fafie.+ ʼE tonu anai ke tutu te ʼu meʼa ʼaia ʼi te faʼahi ʼae ʼe laku ai te lefulefu.

13 “ ‘Pea kapau leva ʼe lakahala te hahaʼi fuli ʼo Iselaele ʼo natou agahala kae neʼe mole natou loto ki ai,+ pea neʼe natou fai he meʼa kae neʼe mole natou* iloʼi neʼe fakatotonu age e Sehova ke mole fai te faʼahi ʼaia,+ 14 pea ka iloʼi leva te agahala ʼaia neʼe fai, ʼe tonu anai ke momoli e te hahaʼi* he vitulo kei mui ko he molaga ʼo te agahala pea ʼe natou ʼaumai anai ki te muʼa fale la ʼo te fono. 15 ʼE hili anai e te kau takitaki ʼo te hahaʼi ʼonatou nima ki te ʼulu ʼo te vitulo ia muʼa ʼo Sehova, pea ʼe matehi anai te vitulo ia muʼa ʼo Sehova.

16 “ ‘ ʼE ʼaumai anai e te pelepitelo ʼae neʼe fakanofo he moʼi toto ʼo te vitulo ki te fale la ʼo te fono. 17 ʼE fufuʼi anai e te pelepitelo tona kauʼi tuhi ki te toto pea ʼe ina afuhi tuʼa fitu anai ki lalo he moʼi toto ia muʼa ʼo Sehova, ʼi te muʼa lito.+ 18 ʼE ina vali anai he moʼi toto ki te ʼu tala ʼo te ʼaletale,+ ʼae ʼe tuʼu ia muʼa ʼo Sehova ʼi te fale la ʼo te fono. Pea ʼe ina liligi anai te toe ʼo te toto ki te vaʼe ʼaletale ʼo te ʼu holokoseta, ʼae ʼe tuʼu ʼi te huʼaga ʼo te fale la ʼo te fono.+ 19 ʼE ina toʼo anai tona gako fuli pea mo ina tutu ke kohu ʼi te ʼaletale.+ 20 ʼE ina fai anai ki te vitulo ʼaia ohage pe ko te meʼa ʼae neʼe ina fai ki te tahi age vitulo ʼae neʼe momoli ko he molaga ʼo te agahala. Ko te meʼa ʼaia ka fai anai e te pelepitelo ke molehi ai tanatou agahala,+ pea ʼe fakamolemole anai tanatou agahala. 21 ʼE ʼave anai te vitulo ki tuʼa atu ʼo te nofoʼaga pea ʼe ina tutu anai, ohage pe ko tana tutu te ʼuluaki vitulo.+ ʼE ko he molaga ʼaia ʼo te agahala maʼa te hahaʼi katoa.+

22 “ ‘Pea ka agahala he pule+ kae neʼe mole loto ki ai, ʼo ina fai he meʼa neʼe fakatotonu e Sehova tona ʼAtua ke mole fai pea ʼe ina iloʼi leva neʼe lakahala ai, 23 peʼe kapau ʼe fakaha age kia ia neʼe agahala he neʼe talagataʼa ki he fakatotonu, ʼe tonu anai ke ina ʼaumai he tao tagata kei mui pea mo heʼe mele ʼo momoli ko hana molaga. 24 ʼE ina hili anai tona nima ki te ʼulu ʼo te tao ʼae kei mui pea ʼe matehi anai ʼi te koga meʼa ʼae ʼe matehi ai te ʼu manu ʼo te holokoseta ia muʼa ʼo Sehova.+ ʼE ko he molaga ʼaia ʼo te agahala. 25 ʼE ʼai anai e te pelepitelo he moʼi toto ʼo te molaga ʼo te agahala ki tona kauʼi tuhi pea ʼe ina vali anai ki te ʼu tala+ ʼo te ʼaletale ʼo te ʼu holokoseta. Pea ʼe ina liligi anai te toe ʼo te toto ki te vaʼe ʼaletale ʼo te ʼu holokoseta.+ 26 ʼE ina tutu anai ke kohu te gako fuli ʼi te ʼaletale ohage pe ko te gako ʼo te sakilifisio ʼo te tokalelei.+ ʼE kole anai e te pelepitelo ke molehi te agahala ʼa te pule, pea ʼe fakamolemole anai tana agahala.

27 “ ‘Kapau ʼe agahala he tahi* ʼi te hahaʼi ʼo te fenua kae neʼe mole loto ki ai, ʼo lakahala ai ʼi tana fai he meʼa neʼe fakatotonu e Sehova ke mole fai,+ 28 peʼe kapau ʼe fakaha age e he tahi tana agahala, ʼe tonu anai ke ina ʼaumai he tao fafine kei mui pea mo heʼe mele ʼo momoli ko hana molaga ʼuhi ko te agahala ʼae neʼe ina fai. 29 ʼE ina hili anai tona nima ki te ʼulu ʼo te manu ʼo te molaga ʼo te agahala, pea ʼe matehi anai te manu ʼaia ʼi te koga meʼa pe ʼae ʼe matehi ai te ʼu manu ʼo te holokoseta.+ 30 ʼE ʼai anai e te pelepitelo he moʼi toto ki tona kauʼi tuhi pea ʼe ina vali anai ki te ʼu tala ʼo te ʼaletale ʼo te ʼu holokoseta. Pea ʼe ina liligi anai te toe ʼo te toto ki te vaʼe ʼaletale.+ 31 ʼE ina toʼo anai te gako fuli,+ ohage pe ko te toʼo ʼo te gako ʼae ʼi te manu ʼo te sakilifisio ʼo te tokalelei,+ pea ʼe ina tutu anai ke kohu ʼi te ʼaletale ko he ʼaele lelei kia Sehova. ʼE kole anai e te pelepitelo ke molehi te agahala ʼo ia ʼae neʼe agahala, pea ʼe fakamolemole anai tana agahala.

32 “ ‘Kae kapau ʼe ina fia momoli he akeno ko he molaga ʼo te agahala, ʼe tonu anai ke ina ʼaumai he akeno fafine ʼe heʼe mele. 33 ʼE ina hili anai tona nima ki te ʼulu ʼo te manu ʼo te molaga ʼo te agahala, pea ʼe matehi anai ʼi te koga meʼa ʼae ʼe matehi ai te ʼu manu ʼo te holokoseta.+ 34 ʼE ʼai anai e te pelepitelo he moʼi toto ʼo te molaga ʼo te agahala ki tona kauʼi tuhi pea ʼe ina vali anai ki te ʼu tala ʼo te ʼaletale ʼo te ʼu holokoseta.+ Pea ʼe ina liligi anai te toe ʼo te toto ki te vaʼe ʼaletale. 35 ʼE ina toʼo anai te gako fuli, ohage pe ko te toʼo ʼo te gako ʼae ʼi te ovi tagata kei mui ʼo te sakilifisio ʼo te tokalelei. Pea ʼe tutu anai e te pelepitelo te gako ʼaia ke kohu ʼi te ʼaletale, ʼi ʼoluga ʼo te ʼu molaga ʼae ʼe tutu maʼa Sehova.+ ʼE kole anai e te pelepitelo ke molehi te agahala ʼa ia ʼae neʼe agahala, pea ʼe fakamolemole anai tana agahala.+

5 “ ‘Kapau neʼe sio he tahi* ki he aga ʼe kovi pe neʼe fakaha age kia ia, pea kapau ʼe logo ki te kumi ʼo he tahi ke fakamoʼoni*+ ki te faʼahi ʼaia kae ʼe mole ina fakaha, ʼe agahala anai ia pea ʼe ina utu pe anai te ʼu fua ʼo tana hala.

2 “ ‘Pea kapau ʼe fāfā he tahi* ki he meʼa ʼe heʼe maʼa kae ʼe mole ina iloʼi, peʼe ko he manu mate ʼo te vao ʼe heʼe maʼa, peʼe ko he manu lalata kua mate ʼe heʼe maʼa, peʼe ko he kiʼi manu* kua mate ʼe heʼe maʼa,+ ʼe heʼe maʼa anai ia pea mo lakahala. 3 Peʼe kapau ʼe fāfā he tahi ki he tagata peʼe ko he fafine ʼe heʼe maʼa+ peʼe ko he meʼa pe ʼe heʼe maʼa, kae ʼe mole ina iloʼi ʼo feala ai ke heʼe maʼa, ʼe lakahala pe anai, tatau aipe pe ʼe hoki ina iloʼi age ki ʼamuli.

4 “ ‘Pea kapau ʼe fakapapau e he tahi* ke ina fai he meʼa, pe ʼe lelei peʼe kovi, kae neʼe mole ina fakakaukauʼi, pea kapau ʼe ina iloʼi leva ki ʼamuli neʼe ina fai he fakapapau kae neʼe mole ina fakakaukauʼi, ʼe lakahala anai ia.*+

5 “ ‘Kapau ʼe liliu ʼo lakahala he neʼe ina fai he meʼa ʼi te ʼu meʼa ʼaia, ʼe tonu anai ke ina vete+ tana agahala. 6 ʼE ina toe ʼaumai anai mo he manu ke momoli kia Sehova ohage ko he sakilifisio fakatokatoka* ʼuhi ko tana agahala:+ ko he akeno fafine peʼe ko he tao fafine kei mui, neʼe ina toʼo ʼi tana faga manu, ke momoli ohage ko he molaga ʼo te agahala. ʼE momoli anai e te pelepitelo te manu ʼaia ke fakamolemole ai te lakahala ʼa ia ʼae neʼe agahala.

7 “ ‘Kae kapau ʼe mole feala ke ina foaki he ovi, ʼe tonu anai ke ina ʼaumai kia Sehova he taluaʼi lupe peʼe ko he taluaʼi kulukulu kei mui,+ ohage ko he sakilifisio fakatokatoka ʼuhi ko tana agahala. Ko te tahi manulele ki te molaga ʼo te agahala pea mo te tahi manulele ki te holokoseta.+ 8 ʼE ina ʼaumai anai ki te pelepitelo ke ina ʼuluaki momoli te manulele ʼo te molaga ʼo te agahala. ʼE ina hifiʼi* anai tona kia, kae ʼe mole motu anai. 9 ʼE ina afuhi anai he moʼi toto ʼo te molaga ʼo te agahala ki he faʼahi ʼo te ʼaletale, kae ʼe ina tuku anai te toto ʼae ʼe kei toe ke hali ʼi te vaʼe ʼaletale.+ ʼE ko he molaga ʼaia ʼo te agahala. 10 ʼE ina toe fai feia pe anai ki te tahi manulele ʼo mulimuli pe ki te ʼu fakatotonu ʼo ʼuhiga mo te ʼu holokoseta.+ ʼE fakahoko anai e te pelepitelo te faʼahi ʼaia ke molehi ai te lakahala ʼa ia ʼae neʼe agahala, pea ʼe fakamolemole age anai tana agahala.+

11 “ ‘Kae kapau leva ʼe mole feala ke ina foaki he taluaʼi lupe peʼe ko he taluaʼi kulukulu kei mui, ʼe tonu anai ke ina ʼaumai he vahe tahi ki te hogofulu ʼo he efa*+ falena lelei ʼe tahi ohage ko he molaga ki tana agahala. ʼE ko te molaga ʼaia ʼo te agahala. ʼE mole tonu anai ke ina ʼai ki ai he moʼi lolo peʼe ko he iseso hina, he ʼe ko te molaga ʼaia ʼo te agahala. 12 ʼE ina ʼaumai anai ki te pelepitelo pea ʼe toʼo anai e te pelepitelo he lukuga moʼi falena lelei ʼo tutu ke kohu ʼi te ʼaletale, ʼi ʼoluga ʼo te ʼu molaga ʼae neʼe tutu maʼa Sehova. Ko he fakata ʼaia ʼo* te molaga katoa. ʼE ko te molaga ʼaia ʼo te agahala. 13 ʼE fakahoko anai e te pelepitelo te faʼahi ʼaia ke molehi ai te agahala ʼa ia ʼae neʼe agahala, ʼei, he agahala pe ʼi te ʼu agahala ʼaia, pea ʼe fakamolemole age anai tana agahala.+ ʼE maʼu anai e te pelepitelo te meʼa ʼae ka toe ʼi te molaga,+ ohage pe ko te meʼa ʼae ʼe toe ʼi te molaga meʼa kai.’ ”+

14 Neʼe hoko atu pe te palalau ʼa Sehova kia Moisese, ʼo ina ui: 15 “Kapau ʼe heʼe agatonu he tahi,* ʼo talagataʼa ki te lao ʼo ʼuhiga mo te ʼu meʼa taputapu ʼa Sehova+ kae neʼe mole loto ki ai, ʼe ina ʼaumai anai kia Sehova he ovi tagata ʼe heʼe mele neʼe ina toʼo ʼi tana faga ovi ohage ko he sakilifisio fakatokatoka.+ ʼE ina ʼaumai anai te ovi tagata ʼaia ʼo mulimuli ki te lahi ʼo te ʼu sikele* siliva ʼae neʼe fakafuafua e te pelepitelo, ʼo mulimuli pe ki te sikele ʼae ʼe fakaʼaogaʼi ʼi te koga meʼa taputapu.*+ 16 ʼE ina foaki anai he totogi ki te agahala ʼae neʼe ina fai ki te koga meʼa taputapu pea ʼe ina toe foaki anai mo te vahe tahi ki te nima+ ʼo te totogi ʼaia. ʼE ina foaki anai te ʼu meʼa ʼaia ki te pelepitelo fakatahi mo te ovi tagata ʼo te sakilifisio fakatokatoka. ʼE momoli anai e te pelepitelo te ovi tagata ʼaia ke molehi ai te lakahala+ ʼa ia ʼae neʼe agahala, pea ʼe fakamolemole age anai tana agahala.+

17 “Kapau ʼe agahala he tahi* he neʼe ina fai he meʼa neʼe fakatotonu e Sehova ke mole fai, kae ʼe mole ina iloʼi, ʼe lakahala anai ia pea ʼe ina utu pe anai te ʼu fua ʼo tana hala.+ 18 ʼE tonu anai ke ina ʼaumai ki te pelepitelo he ovi tagata ʼe heʼe mele neʼe ina toʼo ʼi tana faga ovi, ʼo mulimuli ki te totogi ʼae neʼe fakafuafua e te pelepitelo. ʼE ko he sakilifisio fakatokatoka ʼaia.+ ʼE momoli anai e te pelepitelo te ovi tagata ʼaia ke molehi ai te agahala ʼa ia ʼae neʼe agahala kae neʼe mole ina iloʼi pea neʼe mole loto ki ai. Pea ʼe fakamolemole age anai tana agahala. 19 ʼE ko he sakilifisio fakatokatoka ʼaia. Neʼe lakahala moʼoni, he neʼe agahala kia Sehova.”

6 Pea neʼe toe ui e Sehova kia Moisese: 2 “Kapau ʼe agahala he tahi* pea mo heʼe agatonu kia Sehova+ ʼo ina kakaʼi tona tatau ʼo ʼuhiga mo he meʼa neʼe foaki age ke tokaga ki ai,+ peʼe kapau ʼe ina kaihaʼa peʼe ina toʼo fakamalohi he meʼa ʼo tona tatau, 3 peʼe ina maʼu he meʼa neʼe puli pea loi ʼo ʼuhiga mo te meʼa ʼaia, pea kapau ʼe ina fai he fakapapau loi, ʼo ina ui neʼe mole ina fai he agahala,+ koʼeni te meʼa ʼae ʼe tonu ke ina fai: 4 Kapau neʼe agahala, ʼe tonu anai ke ina liufaki te meʼa ʼae neʼe ina kaihaʼa, peʼe ko te meʼa ʼae neʼe ina toʼo fakamalohi, peʼe ko te meʼa ʼae neʼe foaki age ke tokaga ki ai, peʼe ko te meʼa ʼae neʼe puli pea neʼe ina maʼu, 5 peʼe ko he meʼa pe neʼe ina fai ai he fakapapau loi. ʼE tonu anai ke ina huʼi tona totogi katoa+ pea mo toe foaki te vahe tahi ki te nima ʼo te totogi ʼaia. ʼE ina foaki anai kia ia ʼae ʼaʼana te meʼa ʼaia ʼi te ʼaho ʼae ʼe fakamoʼoni ai neʼe lakahala. 6 Pea ʼe ina ʼaumai anai ki te pelepitelo he ovi tagata ʼe heʼe mele, neʼe ina toʼo ʼi tana faga ovi, ʼo mulimuli ki te totogi ʼae neʼe fakafuafua. ʼE ina momoli anai kia Sehova ohage ko he sakilifisio fakatokatoka.+ 7 ʼE fakahoko anai e te pelepitelo te faʼahi ʼaia ia muʼa ʼo Sehova ke molehi ai te lakahala ʼa ia ʼae neʼe agahala, pea ʼe fakamolemole age anai tana agahala.”+

8 Neʼe hoko atu pe te palalau ʼa Sehova kia Moisese, ʼo ina ui: 9 “Ke ke fakatotonu kia Alone mo ʼona foha: ‘Koʼeni te lao ʼo ʼuhiga mo te ʼu holokoseta:+ ʼE tuku pe anai te ʼu holokoseta ʼi te afi ʼi te ʼaletale ʼi te po katoa ʼo kaku ki te uhu, pea ʼe tonu anai ke hokohoko te afi ʼo te ʼaletale. 10 ʼE tui anai e te pelepitelo tona teu fakapelepitelo ʼae neʼe fai ʼaki te lino,*+ ʼo feia mo te vavaʼe loto ʼae neʼe fai ʼaki te lino+ moʼo ʼuʼufi ʼaki tona telefua. Pea ʼe ina toʼo anai te lefulefu*+ ʼo te ʼu holokoseta ʼae neʼe tutu ʼi te ʼaletale, ʼo tuku ia tafa ʼo te ʼaletale. 11 Pea ʼe ina huʼi anai ʼona mutuʼi meʼa+ kae ʼe ina tui anai he tahi age ʼu mutuʼi meʼa, pea ʼe ina ʼave anai te lefulefu ki he koga meʼa ʼe mole heʼe maʼa, ʼi tuʼa atu ʼo te nofoʼaga.+ 12 ʼE tonu anai ke hokohoko te afi ʼo te ʼaletale. ʼE mole tonu anai ke mate. ʼI te uhu fuli, ʼe tonu anai ke tafu ai e te pelepitelo he afi ʼaki te ʼu fafie+ pea mo hili ki ai te ʼu holokoseta, pea ʼe ina tutu anai ke kohu te gako ʼo te ʼu sakilifisio ʼo te tokalelei.+ 13 ʼE tonu anai ke hokohoko tuʼumaʼu pe te afi ʼo te ʼaletale. ʼE mole tonu anai ke mate.

14 “ ‘Koʼeni leva te lao ʼo ʼuhiga mo te molaga meʼa kai:+ ʼE momoli anai e te ʼu foha ʼo Alone te molaga meʼa kai ia muʼa ʼo Sehova, ʼi te muʼa ʼaletale. 15 ʼE toʼo anai e he tahi ia natou he lukuga moʼi falena lelei ʼo te molaga meʼa kai, mo he moʼi lolo pea mo te iseso hina fuli ʼae neʼe ʼai ki te molaga meʼa kai, pea ʼe ina tutu anai ke kohu ʼi te ʼaletale ohage ko he ʼaele lelei kia Sehova. Ko he fakata ʼaia ʼo* te molaga katoa.+ 16 ʼE maʼu anai e Alone mo ʼona foha te meʼa ʼae ka toe,+ pea ʼe natou fai ʼaki anai ni pane hala fakatupu, pea ʼe natou kai anai ʼi he koga meʼa taputapu. ʼE natou kai anai ʼi te malaʼe ʼo te fale la ʼo te fono.+ 17 ʼE mole tonu anai ke teuteuʼi ʼaki he meʼa fakatupu.+ ʼE au foaki anai kia natou te vahe ʼaia mai ʼaku molaga ʼae ʼe tutu.+ ʼE ko he meʼa taputapu ʼaupito ia,+ ohage pe ko te molaga ʼo te agahala pea mo te sakilifisio fakatokatoka. 18 ʼE kai anai ki ai te ʼu tagata fuli ʼo te hologa ʼo Alone.+ ʼE ko tonatou vahe ʼaia ʼi te ʼu molaga ʼae ʼe tutu maʼa Sehova, mai he tahi taʼiake ki he tahi taʼiake, ʼo talu ai.+ Ko he meʼa pe ʼe lave ki te ʼu molaga ʼaia, ʼe liliu anai ʼo taputapu.’ ”

19 Neʼe toe ui e Sehova kia Moisese: 20 “Koʼeni te molaga ʼae ʼe tonu anai ke momoli tuʼumaʼu e Alone mo ʼona foha kia Sehova, ʼi te ʼaho ʼae ʼe fakanofo ai ia Alone ko he pelepitelo lahi:+ ko he vahe tahi ki te hogofulu ʼo he efa*+ falena lelei ʼe tahi ʼe momoli anai ohage ko he molaga meʼa kai,+ ʼe vaeluaʼi anai ʼo momoli tona tahi koga ʼi te uhu pea ko tona tahi koga ʼi te afiafi. 21 ʼE natu fakatahi anai mo he moʼi lolo pea ʼe fakamoho anai ʼi he fakapaku.+ ʼE ke liligi anai ki ai te lolo pea ʼe ke tofitofi anai pea ke momoli ohage ko he molaga meʼa kai kia Sehova, ʼei ʼe ko he ʼaele lelei kia te ia. 22 Ko te foha ʼo Alone ʼae ka fakanofo anai moʼo fetogi ia ia,+ ʼe ina fai anai te faʼahi ʼaia. ʼE tutu anai ke kohu te molaga katoa ʼaia kia Sehova. Ko he lao ʼaia ʼo talu ai. 23 Ko te ʼu molaga meʼa kai fuli ʼae ʼe fai maʼa te pelepitelo, ʼe tonu anai ke tutu katoa. ʼE mole tonu anai ke kai.”

24 Neʼe hoko atu pe te palalau ʼa Sehova kia Moisese, ʼo ina ui: 25 “Ke ke ui kia Alone mo ʼona foha: ‘Koʼeni te lao ʼo ʼuhiga mo te ʼu molaga ʼo te agahala:+ ʼI te koga meʼa ʼae ʼe matehi ai anai te ʼu manu ʼo te ʼu holokoseta,+ ʼe toe matehi ai anai mo te ʼu manu ʼo te ʼu molaga ʼo te agahala ia muʼa ʼo Sehova. ʼE ko he meʼa taputapu ʼaupito. 26 ʼE kai anai e te pelepitelo, ʼae ka ina momoli te molaga ʼo te agahala ia tona vahe.+ ʼE kai anai ʼi he koga meʼa taputapu, ʼi te malaʼe ʼo te fale la ʼo te fono.+

27 “ ‘Ko he meʼa pe ʼe lave ki te kanoʼi manu ʼo te molaga ʼaia, ʼe liliu anai ʼo taputapu. Pea ka mafisi he moʼi toto ʼo te molaga ʼaia ki he kofu ʼo he tahi, ʼe tonu anai ke fo ʼi he koga meʼa taputapu. 28 Kapau neʼe fakamoho ʼi he kulo neʼe fai ʼaki te kele, ʼe tonu anai ke foaʼi te kulo ʼaia. Pea kapau neʼe fakamoho ʼi he kulo kapa, ʼe tonu anai ke kilisi pea mo fufulu te kulo ʼaia.

29 “ ‘ ʼE tahi kai pe anai tona vahe e te ʼu tagata ʼae ʼe gaue fakapelepitelo.+ ʼE ko he meʼa taputapu ʼaupito.+ 30 Kae ʼe mole tonu anai ke kai te molaga ʼo te agahala mo kapau ʼe ʼave he koga ʼo te toto ʼo te molaga ʼaia ki te fale la ʼo te fono, ke fakamolemole ai te ʼu agahala ʼi te koga meʼa taputapu.+ ʼE tonu anai ia ke tutu.

7 “ ‘Koʼeni te lao ʼo ʼuhiga mo te sakilifisio fakatokatoka:+ ’E ko he meʼa taputapu ʼaupito. 2 ʼE matehi anai te manu ʼo te sakilifisio fakatokatoka ʼi te koga meʼa ʼae ʼe matehi ai te ʼu manu ʼo te ʼu holokoseta, pea ʼe tonu anai ke afuhi tona toto+ ki te ʼu faʼahi fuli ʼo te ʼaletale.+ 3 ʼE momoli anai te gako fuli ʼo te manu,+ ia te hiku ʼae ʼe gako, mo te gako ʼae ʼe ina ʼaofi te gākau, 4 mo te ʼu ifiifi ʼe lua mo te gako fuli ʼae ʼe ina ʼaofi te ʼu ifiifi ʼaia. ʼE toe toʼo fakatahi anai te gako ʼo te ʼate mo te ʼu ifiifi.+ 5 ʼE tutu anai e te pelepitelo te ʼu faʼahi fuli ʼaia ke kohu ʼi te ʼaletale ohage ko he molaga ʼe tutu maʼa Sehova.+ ʼE ko he sakilifisio fakatokatoka ʼaia. 6 ʼE ko te ʼu tagata pe ʼae ʼe gaue fakapelepitelo ka natou kai te molaga ʼaia+ pea ʼe tonu anai ke kai ʼi he koga meʼa taputapu. ʼE ko he meʼa taputapu ʼaupito.+ 7 ʼE ko he lao pe ʼe tahi ʼo ʼuhiga mo te molaga ʼo te agahala pea mo te sakilifisio fakatokatoka. ʼE maʼu anai e te pelepitelo ʼae ka ina momoli te molaga ʼaia ki te fakamolemole ʼo te agahala, ia te kanoʼi manu.+

8 “ ‘Ka momoli e te pelepitelo he holokoseta ʼa he tahi, ʼe maʼu pe anai e te pelepitelo te kili+ ʼo te holokoseta ʼaia.

9 “ ‘Ko he molaga meʼa kai neʼe fakamoho ʼi te gutuʼumu, pe neʼe teuteuʼi ʼi he kulo peʼe ko he fakapaku,+ ʼe maʼu pe anai e te pelepitelo ʼae ʼe ina momoli te molaga ʼaia. ʼE ʼaʼana te faʼahi ʼaia.+ 10 Kae ko te ʼu molaga meʼa kai ʼae ʼe ʼai ki ai he moʼi lolo+ peʼe ko te ʼu molaga meʼa kai ʼae ʼe moamoa,+ ʼe maʼu pe anai e te ʼu foha fuli ʼo Alone. ʼE vaevae fakatatau anai kia natou fuli.

11 “ ‘Koʼeni te lao ʼo ʼuhiga mo te sakilifisio ʼo te tokalelei+ ʼae ʼe feala ke momoli e he tahi kia Sehova: 12 Kapau ʼe ina momoli tana sakilifisio ʼaia moʼo fakaha tana fakafetaʼi,+ ʼe ina momoli fakatahi anai te sakilifisio ʼaia ʼo te fakafetaʼi mo he ʼu pane takafuafua* hala fakatupu neʼe ʼai ki ai he moʼi lolo, mo he ʼu foʼi fakapaku hala fakatupu neʼe vali ʼaki te lolo, pea mo he ʼu pane takafuafua* neʼe fai ʼaki te falena lelei, ʼae neʼe natu lelei ʼaki te lolo. 13 ʼE ina momoli fakatahi anai tana molaga ʼaia mo he ʼu pane takafuafua* neʼe ʼai ki ai he meʼa fakatupu pea mo te ʼu sakilifisio ʼo te tokalelei ʼae ʼe ina momoli moʼo fakaha tana fakafetaʼi. 14 ʼE ina toʼo anai ʼi tana molaga ʼaia he pane ʼe tahi ʼi te ʼu faʼahiga pane kehekehe ʼaia pea ʼe ina momoli anai ohage ko he vahe taputapu kia Sehova. ʼE maʼu pe anai e te pelepitelo ʼae ʼe ina afuhi te toto ʼo te ʼu sakilifisio ʼo te tokalelei, ia te vahe ʼaia.+ 15 Ko te kanoʼi manu ʼo te ʼu sakilifisio ʼo te tokalelei ʼae ʼe ina momoli moʼo fakaha tana fakafetaʼi, ʼe kai anai ʼi te ʼaho pe ʼae ʼe ina momoli ai. ʼE mole tonu anai ke tuku he meʼa ki te uhu ake.+

16 “ ‘Kapau ko te sakilifisio ʼae ʼe ina momoli ʼe ko he fakapapau+ peʼe ko he molaga ʼe ina foaki ʼaki he lotolelei,+ ʼe kai anai ʼi te ʼaho ʼae ʼe ina momoli ai tana sakilifisio. Pea ʼe toe feala anai ke kai te meʼa ʼae ʼe toe ʼi te ʼaho ake. 17 Kae ʼe tonu anai ke tutu te kanoʼi manu ʼo te sakilifisio ʼae ʼe toe ʼi te tolu ʼaho.+ 18 Kae kapau ʼe kai te kanoʼi manu ʼo tana sakilifisio ʼo te tokalelei ʼi te tolu ʼaho, ʼe mole ʼofa anai te ʼAtua kia ia ʼae neʼe ina momoli te sakilifisio. ʼE mole fua lelei anai kia ia. ʼE ko he meʼa fakalialia ia. Pea ko ʼae* ʼe kai anai ki ai ʼe ina utu pe anai te ʼu fua ʼo tana hala.+ 19 ʼE mole tonu anai ke kai te kanoʼi manu ʼae ʼe lave ki he meʼa ʼe heʼe maʼa. ʼE tutu anai te kanoʼi manu ʼaia. Kae ko te kanoʼi manu ʼae ʼe maʼa ʼe feala anai tona kai e he tahi ʼe maʼa.

20 “ ‘ ʼE tonu anai ke matehi ia ia* ʼae ʼe heʼe maʼa kae neʼe ina kai te kanoʼi manu ʼo te sakilifisio ʼo te tokalelei ʼae ʼe momoli kia Sehova.+ 21 Kapau ʼe fāfā he tahi* ki he tahi ʼe heʼe maʼa,+ peʼe ko he manu ʼe heʼe maʼa,+ peʼe ko he meʼa fakalialia pe ʼe heʼe maʼa,+ pea mo kai te kanoʼi manu ʼo te sakilifisio ʼo te tokalelei, ʼae ʼe momoli kia Sehova, ʼe tonu ke matehi.’ ”

22 Neʼe hoko atu pe te palalau ʼa Sehova kia Moisese, ʼo ina ui: 23 “Ke ke ui ki te kau Iselaele: ‘ ʼE mole tonu anai ke kotou kai te gako+ ʼo he vitulo, peʼe ʼo he ovi tagata kei mui, peʼe ʼo he tao. 24 Ko te gako ʼo he manu neʼe maʼu atu kua mate peʼe ko te gako ʼo he manu neʼe matehi e he tahi manu, ʼe feala anai ke kotou fakaʼaogaʼi ki he tahi age meʼa, kae ʼe mole tonu ke kotou kai.+ 25 Koteʼuhi ʼe tonu anai ke matehi ia ia ʼae ʼe ina kai te gako ʼo te manu ʼae ʼe ina momoli ohage ko he molaga ʼe tutu maʼa Sehova.

26 “ ‘ ʼE mole tonu anai ke kotou kai he toto+ ʼi te ʼu koga meʼa ʼae ʼe kotou nonofo ai anai, pe ʼe ko te toto ʼo te ʼu manulele peʼe ko te toto ʼo he tahi age ʼu manu. 27 ʼE tonu anai ke matehi ia ia* ʼae ʼe kai ki he toto.’ ”+

28 Pea neʼe toe ui e Sehova kia Moisese: 29 “Ke ke ui ki te kau Iselaele: ‘Ko ʼae ʼe ina momoli tana sakilifisio ʼo te tokalelei kia Sehova, ʼe ina ʼaumai anai kia Sehova he koga ʼo tana sakilifisio ʼaia ʼo te tokalelei.+ 30 ʼE ina ʼaumai anai te gako+ mo te fatafata ohage ko he molaga ʼe tutu maʼa Sehova, pea ʼe ina lu anai ohage ko he molaga ʼe lu+ ia muʼa ʼo Sehova. 31 ʼE tutu anai e te pelepitelo te gako ke kohu ʼi te ʼaletale,+ kae ʼe maʼu pe anai e Alone mo ʼona foha te fatafata.+

32 “ ‘ ʼE kotou toʼo anai ʼi ʼakotou sakilifisio ʼo te tokalelei te alaga mataʼu pea ʼe kotou foaki anai ki te pelepitelo ohage ko hona vahe taputapu.+ 33 Ko te foha ʼo Alone ʼae ʼe ina momoli te toto ʼo te ʼu sakilifisio ʼo te tokalelei ʼo feia mo te gako, ʼe ina maʼu anai te alaga mataʼu ohage ko hona vahe.+ 34 Koteʼuhi ʼe au toʼo anai ʼi te ʼu sakilifisio ʼo te tokalelei ʼae ʼe fai e te kau Iselaele, te fatafata ʼo te molaga ʼae ʼe lu pea mo te alaga ʼo te vahe taputapu, pea ʼe au foaki anai ki te pelepitelo ko Alone mo ʼona foha. Ko te lao ʼaia maʼa te kau Iselaele ʼo talu ai.+

35 “ ‘Ko te vahe ʼaia neʼe toʼo ʼi te ʼu molaga ʼae ʼe tutu maʼa Sehova pea neʼe tuku keheʼi maʼa te kau pelepitelo, ia Alone mo ʼona foha, talu mai te ʼaho ʼae neʼe fakanofo ai ia natou ke natou tauhi kia Sehova ʼi tonatou ʼuhiga pelepitelo.+ 36 Neʼe fakatotonu e Sehova ʼi te ʼaho ʼae neʼe fakanofo ai ia natou,+ ke foaki age te vahe ʼaia neʼe toʼo ʼi te ʼu sakilifisio ʼae neʼe fai e te kau Iselaele. ʼE ko he lao ʼaia mai he taʼiake ki he tahi taʼiake ʼo talu ai.’ ”

37 Ko te lao ʼaia ʼo ʼuhiga mo te ʼu holokoseta,+ mo te ʼu molaga meʼa kai,+ mo te ʼu molaga ʼo te agahala,+ mo te ʼu sakilifisio fakatokatoka,+ mo te ʼu sakilifisio ʼo te fakanofo,+ pea mo te ʼu sakilifisio ʼo te tokalelei,+ 38 ohage pe ko tona fakatotonu e Sehova kia Moisese ʼi te Moʼuga ʼo Sinai,+ ʼi te ʼaho ʼae neʼe ina fakatotonu ai ki te kau Iselaele ke natou momoli ʼanatou molaga kia Sehova ʼi te toafa ʼo Sinai.+

8 Neʼe hoko atu pe te palalau ʼa Sehova kia Moisese, ʼo ina ui: 2 “ ʼE ke ʼave anai ia Alone mo ʼona foha+ ki te huʼaga ʼo te fale la ʼo te fono, pea ʼe ke toe toʼo anai mo te ʼu teu,+ mo te lolo taputapu,+ mo te vitulo ʼo te molaga ʼo te agahala, mo te ʼu ovi tagata ʼe lua pea mo te kato ʼo te ʼu pane hala fakatupu.+ 3 Pea ʼe tonu anai ke ke fakatahiʼi te hahaʼi fuli ki te huʼaga ʼo te fale la ʼo te fono.”

4 Neʼe fai pe e Moisese te meʼa ʼae neʼe fakatotonu age e Sehova. Neʼe fakatahitahi leva te hahaʼi ki te huʼaga ʼo te fale la ʼo te fono. 5 Pea neʼe ui e Moisese ki te hahaʼi: “Koʼeni te meʼa ʼae neʼe fakatotonu mai e Sehova ke tou fai.” 6 Neʼe ʼaumai ai e Moisese ia Alone mo ʼona foha pea neʼe ina fakamaʼa natou ʼaki te vai.*+ 7 Hili ʼaia, neʼe ina fakatui kia Alone te kofu,+ mo ina haʼi te kie taputapu ki tona koga loto,+ pea mo toe fakatui ki ai te kofu ʼae neʼe mole hona ʼu nimaʼi kofu,+ ʼo feia mo te efote*+ pea neʼe ina haʼi leva te kiliʼi pipi+ ʼo te efote ʼae neʼe lalaga, ke nofo maʼu te efote. 8 Neʼe ina ʼai leva kia ia te peketolale*+ pea neʼe ina tuku te Ulime mo te Tumime+ ki te loto peketolale. 9 Pea neʼe ina takai leva tona ʼulu ʼaki te kie taputapu,+ pea neʼe ina fakamaʼu te lauʼi ukamea aulo gigila, ia te fakailoga taputapu,*+ ki te kie ʼo fakatafa ki muʼa, ohage pe ko tona fakatotonu e Sehova kia Moisese.

10 Neʼe toʼo leva e Moisese te lolo taputapu ʼo vali ki te tapenakulo mo te ʼu meʼa fuli ʼae neʼe tuku ʼi loto,+ ke fakamaʼoniʼoniʼi ai te ʼu meʼa ʼaia. 11 Hili ʼaia, neʼe ina afuhi tuʼa fitu he moʼi lolo ki te ʼaletale pea mo ʼana meʼa gaue fuli, pea mo te topu kapa mo tona tuʼuʼaga ke fakamaʼoniʼoniʼi ai te ʼu meʼa ʼaia. 12 Ki muli age leva, neʼe ina tākai te ʼulu ʼo Alone ʼaki he moʼi lolo taputapu ke fakamaʼoniʼoniʼi ai ia ia.+

13 Neʼe ʼaumai leva e Moisese te ʼu foha ʼo Alone pea neʼe ina fakatui kia natou te ʼu kofu, mo haʼi te ʼu kie taputapu ki ʼonatou koga loto, pea mo takai ʼonatou ʼulu ʼaki te ʼu kie taputapu,+ ohage pe ko tona fakatotonu e Sehova kia Moisese.

14 Neʼe ina ʼaumai leva te vitulo ʼo te molaga ʼo te agahala, pea neʼe hili e Alone mo ʼona foha ʼonatou nima ki te ʼulu ʼo te vitulo ʼaia.+ 15 Neʼe matehi e Moisese te vitulo pea neʼe ina ʼai he moʼi toto+ ki tona kauʼi tuhi pea neʼe ina vali ki te ʼu tala fuli ʼo te ʼaletale. Pea neʼe ina fakamaʼa te ʼaletale ia muʼa ʼo te ʼAtua, kae neʼe ina liligi te toe ʼo te toto ki te vaʼe ʼaletale. Neʼe ina fakamaʼoniʼoniʼi ai te ʼaletale ke feala hanatou momoli ʼi ai te ʼu sakilifisio. 16 Hili ʼaia, neʼe ina toʼo te gako fuli ʼo te gākau, mo te gako ʼo te ʼate, mo te ʼu ifiifi ʼe lua mo ʼonā gako, pea neʼe tutu e Moisese te ʼu meʼa ʼaia ke kohu ʼi te ʼaletale.+ 17 Neʼe tutu leva te toe ʼo te vitulo, ia tona kili, mo tona kakano pea mo ʼona faifekau ʼi tuʼa atu ʼo te nofoʼaga,+ ohage pe ko tona fakatotonu e Sehova kia Moisese.

18 Neʼe ina ʼaumai leva te ovi tagata ʼo te holokoseta, pea neʼe hili e Alone mo ʼona foha ʼonatou nima ki te ʼulu ʼo te ovi tagata ʼaia.+ 19 Neʼe matehi e Moisese te ovi tagata ʼaia, pea neʼe ina afuhi tona toto ki te ʼu faʼahi fuli ʼo te ʼaletale. 20 Neʼe ina taʼataʼaga te ovi tagata, pea neʼe tutu e Moisese te foʼi ʼulu, mo te ʼu ʼinasi, pea mo te gako ʼo te ʼu ifiifi ke kohu ʼi te ʼaletale. 21 Neʼe ina fakamaʼa te gākau mo te ʼu vaʼe, pea neʼe tutu e Moisese te ovi tagata katoa ke kohu ʼi te ʼaletale. Neʼe ko he holokoseta ʼaia, ko he ʼaele lelei ki te ʼAtua. Neʼe ko he molaga neʼe tutu maʼa Sehova, ohage pe ko tona fakatotonu e Sehova kia Moisese.

22 Neʼe ina ʼaumai leva te lua ovi tagata, ʼae ʼe sakilifisioʼi ʼi te fakanofo+ ʼo Alone mo ʼona foha ko he kau pelepitelo, pea neʼe hili e Alone mo ʼona foha ʼonatou nima ki te ʼulu ʼo te ovi tagata ʼaia.+ 23 Neʼe matehi e Moisese te ovi tagata ʼaia, pea neʼe ina toʼo he moʼi toto ʼo ʼai ki te taliga mataʼu ʼo Alone, mo tona kauʼi tuhi matuʼa ʼo tona nima mataʼu ʼo feia mo tona kauʼi vaʼe matuʼa ʼo tona vaʼe mataʼu. 24 Hili ʼaia, neʼe ʼaumai e Moisese te ʼu foha ʼo Alone pea neʼe ina ʼai he moʼi toto ki ʼonatou taliga mataʼu pea mo te kauʼi tuhi matuʼa ʼo ʼonatou nima mataʼu ʼo feia mo te kauʼi vaʼe matuʼa ʼo ʼonatou vaʼe mataʼu. Kae neʼe afuhi e Moisese te toe ʼo te toto ki te ʼu faʼahi fuli ʼo te ʼaletale.+

25 Neʼe ina toʼo leva te gako, mo te hiku ʼae ʼe gako, mo te gako fuli ʼo te gākau, mo te gako ʼo te ʼate, mo te ʼu ifiifi ʼe lua mo ʼonā gako, pea mo te alaga mataʼu.+ 26 Pea neʼe ina toʼo ʼi te kato ʼo te ʼu pane hala fakatupu ʼae neʼe tuku ia muʼa ʼo Sehova, he foʼi pane takafuafua* hala fakatupu,+ mo he foʼi pane takafuafua* neʼe ʼai ki ai he moʼi lolo,+ ʼo feia mo he foʼi fakapaku. Pea neʼe ina hili leva te ʼu meʼa ʼaia ki te gako mo te alaga mataʼu. 27 Hili ʼaia, neʼe ina tuku te ʼu meʼa fuli ʼaia ki te ʼu nima ʼo Alone mo ʼona foha, pea neʼe ina lu ohage ko he molaga ʼe lu ia muʼa ʼo Sehova. 28 Neʼe toe toʼo leva e Moisese te ʼu meʼa ʼaia mai ʼonatou nima ʼo tutu ke kohu ʼi te ʼaletale, ʼi ʼoluga ʼo te holokoseta. Ko te ʼu meʼa ʼaia ʼe momoli ʼi te fakanofo ʼo Alone mo ʼona foha ko he kau pelepitelo, ʼe ko he ʼaele lelei ki te ʼAtua. Ko he molaga neʼe tutu maʼa Sehova.

29 Pea neʼe toʼo e Moisese te fatafata ʼo te ovi tagata, ʼae ʼe sakilifisioʼi ʼi te fakanofo ʼo Alone mo ʼona foha ko he kau pelepitelo, ʼo lu ohage ko he molaga ʼe lu ia muʼa ʼo Sehova.+ Neʼe ko te vahe ʼaia ʼo Moisese, ohage pe ko tona fakatotonu e Sehova kia Moisese.+

30 Pea neʼe toʼo e Moisese he moʼi lolo taputapu+ mo he koga ʼo te toto ʼae neʼe ʼi te ʼaletale, ʼo afuhi kia Alone mo ʼona teu pea mo ʼona foha mo ʼonatou teu. Neʼe ina fakamaʼoniʼoniʼi ai ia Alone mo ʼona teu pea mo ʼona foha+ mo ʼonatou teu.+

31 Neʼe ui leva e Moisese kia Alone mo ʼona foha: “Kotou fakamoho+ te kanoʼi manu ʼi te huʼaga ʼo te fale la ʼo te fono. ʼE kotou kai anai ʼi ai te kanoʼi manu mo te ʼu pane ʼae ʼi te kato, ʼo mulimuli ki te fakatotonu ʼae neʼe fai mai e te ʼAtua, ke hoki au ui atu ke kotou kai ki te ʼu meʼa ʼaia.+ 32 ʼE kotou tutu anai te meʼa ʼae ka toe ʼi te kanoʼi manu pea mo te ʼu pane.+ 33 ʼE mole tonu anai ke kotou fakamamaʼo mai te huʼaga ʼo te fale la ʼo te fono lolotoga ʼaho ʼe fitu, ʼo kaku ki te ʼosi ʼo tokotou fakanofo ko he kau pelepitelo, koteʼuhi ʼe fakanofo anai koutou ko he kau pelepitelo* lolotoga ʼaho ʼe fitu.+ 34 Neʼe fakatotonu mai e Sehova ke tou fai te ʼu meʼa ʼae neʼe tou fai ʼi te ʼaho nei, ke fakamolemole ai ʼakotou agahala.+ 35 ʼE kotou nonofo anai ʼi te huʼaga ʼo te fale la ʼo te fono ʼi te ʼaho mo te poʼuli lolotoga ʼaho ʼe fitu+ pea ʼe kotou fakahoko anai tokotou maʼua kia Sehova,+ ke mole kotou mamate ai. Ko te meʼa ʼaia neʼe fakatotonu mai e te ʼAtua kia au.”

36 Pea neʼe fai e Alone mo ʼona foha te ʼu meʼa fuli ʼae neʼe fakatotonu e Sehova ʼaki ia Moisese.

9 ʼI te valu ʼaho,+ neʼe pauʼi e Moisese ia Alone, mo ʼona foha pea mo te kau tagata takitaki ʼo Iselaele. 2 Neʼe ina ui kia Alone: “Ke ke toʼo he ʼuhiʼi pipi ki te molaga ʼo te agahala+ pea mo he ovi tagata ki te holokoseta, ko he ʼu manu ʼe heʼe mele, pea ke ke momoli ia muʼa ʼo Sehova. 3 Kae ʼe ke ui anai ki te kau Iselaele: ‘Kotou ʼaumai he tao tagata ki te molaga ʼo te agahala pea mo he ʼuhiʼi pipi mo he ovi tagata kei mui ki te holokoseta, ʼe nā taki taʼu tahi pea mo heʼe mele, 4 mo he vitulo pea mo he ovi tagata ki te ʼu sakilifisio ʼo te tokalelei.+ Pea ʼe tonu ke sakilifisioʼi te ʼu manu ʼaia ia muʼa ʼo Sehova. ʼE kotou toe ʼaumai anai mo he molaga meʼa kai+ neʼe ʼai ki ai he lolo. Koteʼuhi ʼe ha anai ia Sehova kia koutou ʼi te ʼaho nei.’ ”+

5 Neʼe natou ʼaumai ai te ʼu meʼa fuli ʼaia ki te muʼa fale la ʼo te fono, ohage pe ko tona fakatotonu e Moisese. Pea neʼe ʼomai leva te hahaʼi katoa ʼo tutuʼu ia muʼa ʼo Sehova. 6 Pea neʼe ui e Moisese: “Koʼena te meʼa ʼae neʼe fakatotonu e Sehova ke kotou fai, ke feala ai ke ha te kololia ʼo Sehova kia koutou.”+ 7 Pea neʼe ui e Moisese kia Alone: “Ke ke fakaovi ki te ʼaletale pea ke ke momoli tau molaga ki te agahala+ pea mo tau holokoseta, ke fakamolemole ai ʼau agahala+ pea mo te ʼu agahala ʼo tou famili.* Pea ke ke momoli te ʼu molaga ʼa te hahaʼi,+ ke fakamolemole ai ʼanatou agahala,+ ohage pe ko tona fakatotonu e Sehova.”

8 Neʼe fakaovi atu aipe ia Alone ki te ʼaletale pea neʼe ina matehi te ʼuhiʼi pipi ʼae neʼe momoli ʼo ʼuhiga mo ʼana agahala.+ 9 Neʼe ʼavage leva e ʼona foha kia ia te toto ʼo te manu ʼaia+ pea neʼe ina fufuʼi tona kauʼi tuhi ki te toto, mo ina vali ki te ʼu tala ʼo te ʼaletale. Neʼe ina liligi leva te toe ʼo te toto ki te vaʼe ʼaletale.+ 10 Neʼe ina tutu ke kohu ʼi te ʼaletale te gako, mo te ʼu ifiifi pea mo te gako ʼo te ʼate ʼo te manu ʼae neʼe momoli ohage ko he molaga ʼo te agahala, ʼo mulimuli pe ki te fakatotonu ʼae neʼe fai e Sehova kia Moisese.+ 11 Pea neʼe ina tutu te kanoʼi manu mo te kili ʼi tuʼa atu ʼo te nofoʼaga.+

12 Neʼe matehi leva e Alone te ovi tagata ʼo te holokoseta. Pea neʼe ʼavage e ʼona foha kia ia te toto ʼo te manu ʼaia pea neʼe ina afuhi ki te ʼu faʼahi fuli ʼo te ʼaletale.+ 13 Neʼe natou ʼavage kia ia te ʼu ʼinasi ʼo te holokoseta, ʼo feia mo te ʼulu pea neʼe ina tutu leva ke kohu ʼi te ʼaletale. 14 Hili ʼaia, neʼe ina fakamaʼa te gākau mo te ʼu vaʼe, pea neʼe ina tutu ke kohu ʼi te ʼaletale, ʼi ʼoluga ʼo te holokoseta.

15 Neʼe ina momoli leva te ʼu molaga ʼae neʼe ʼaumai e te hahaʼi. Neʼe ina toʼo te tao, ʼo ina matehi pea neʼe ina momoli ʼo ʼuhiga mo te agahala ʼa te hahaʼi. Neʼe ina momoli te manu ʼaia ohage pe ko te momoli ʼo te ʼuhiʼi pipi. 16 Pea neʼe ina ʼaumai te ʼu manu ʼo te holokoseta pea neʼe ina momoli ʼo mulimuli pe ki te ʼu fakatotonu ʼo ʼuhiga mo te ʼu holokoseta.+

17 Pea neʼe ina momoli te molaga meʼa kai,+ ʼo ina toʼo he koga ʼo te molaga ʼaia ʼo tutu ke kohu ʼi te ʼaletale, kae kua ʼosi momoli te ʼu manu ʼo te holokoseta ʼo te uhu.+

18 Hili ʼaia, neʼe matehi e Alone te vitulo mo te ovi tagata ʼo te sakilifisio ʼo te tokalelei ke momoli maʼa te hahaʼi. Pea neʼe ʼavage e ʼona foha te toto ʼo te ʼu manu ʼaia, pea neʼe ina afuhi ki te ʼu faʼahi fuli ʼo te ʼaletale.+ 19 Neʼe natou toʼo te gako ʼo te vitulo,+ mo te hiku ʼae ʼe gako ʼo te ovi tagata, mo te gako ʼae ʼe ina ʼaofi te gākau, mo te ʼu ifiifi pea mo te gako ʼo te ʼate,+ 20 pea neʼe natou hili te ʼu meʼa fuli ʼaia ʼi ʼoluga ʼo te ʼu fatafata ʼo te ʼu manu ʼaia. Hili ʼaia, neʼe ina tutu ke kohu te gako ʼi te ʼaletale.+ 21 Kae neʼe lu e Alone te ʼu fatafata mo te ʼu alaga mataʼu ʼo te ʼu manu ʼaia ohage ko he molaga ʼe lu ia muʼa ʼo Sehova, ʼo mulimuli pe ki te fakatotonu ʼa Moisese.+

22 Neʼe haga ia Alone ki te hahaʼi, pea neʼe ina hiki ki ʼoluga ʼona nima ʼo ina tapuakiʼi ia natou.+ Neʼe hifo leva mai te ʼaletale ʼi tana ʼosi momoli te molaga ʼo te agahala, mo te holokoseta pea mo te ʼu sakilifisio ʼo te tokalelei. 23 Pea neʼe hu ia Moisese mo Alone ki te fale la ʼo te fono pea neʼe nā mavae leva mai ai ʼo tapuakiʼi te hahaʼi.+

Neʼe ha leva te kololia ʼo Sehova ki te hahaʼi fuli,+ 24 pea neʼe fakato e Sehova he afi+ ʼo tutu ai te holokoseta pea mo te gako ʼae neʼe ʼi te ʼaletale. ʼI te sisio ʼa te hahaʼi fuli ki te meʼa ʼaia, neʼe natou fakafiafia ai pea mo punou mo tulolo ki te kele.+

10 Ki muli age, neʼe tahi toʼo e te ʼu foha ʼo Alone, ʼae ko Natape mo Apiu,+ tana ʼaiʼaga afi ʼo nā ʼai ki ai he ʼu mamala kakaha pea mo te iseso.+ Pea neʼe nā tutu leva he afi ia muʼa ʼo Sehova kae neʼe mole gafua ke nā tutu,+ he neʼe mole ina fakatotonu age ke nā fai te faʼahi ʼaia. 2 Pea neʼe fakato leva e Sehova he afi ʼo tutu ai ia naua,+ pea neʼe nā mamate ai ia muʼa ʼo Sehova.+ 3 Pea neʼe ui e Moisese kia Alone: “Koʼeni te meʼa ʼae neʼe ui e Sehova: ‘ ʼE fakamaʼoniʼoniʼi anai au e natou ʼae ʼe fakaovi mai kia te au,+ pea ʼe fakakololiaʼi anai au ia muʼa ʼo te hahaʼi fuli.’ ” Neʼe nofo fakalogologo ia Alone.

4 Neʼe pauʼi ai e Moisese ia Misaele mo Elisafani, te ʼu foha ʼo Usiele,+ te tehina ʼo te tamai ʼa Alone, pea neʼe ina ui kia naua: “Kolua ʼomai ʼo fata ʼokolua tehina ʼae ʼe tuku ʼi te muʼa koga meʼa taputapu, ʼo ʼave ki tuʼa atu ʼo te nofoʼaga.” 5 Neʼe nā ʼomai ai ʼo fata te ʼu tagata ʼaia neʼe kei tui ʼonā kofu, pea neʼe nā ʼave ki tuʼa atu ʼo te nofoʼaga, ohage pe ko tona fakatotonu age e Moisese.

6 Neʼe ui leva e Moisese kia Alone pea mo ʼona tahi ʼu foha ko Eleasale mo Itamale: “ ʼAua naʼa kotou tuku ke maveu ʼokotou ʼulu peʼe kotou hae ʼokotou kofu,+ ke mole kotou mamate ai pea ke mole ita ai te ʼAtua ki te hahaʼi katoa. ʼE ko ʼokotou tehina, ia te hahaʼi katoa ʼo Iselaele, ʼae ka fetagihi anai kia naua ʼae neʼe matehi e Sehova ʼaki te afi. 7 ʼE mole tonu ke kotou fakamamaʼo mai te huʼaga ʼo te fale la ʼo te fono naʼa kotou mamate, he neʼe fakanofo* ia koutou e Sehova ʼaki te lolo taputapu.”+ Pea neʼe natou fai ʼo mulimuli pe ki te ʼu palalau ʼa Moisese.

8 Pea neʼe ui e Sehova kia Alone: 9 “ ʼE mole ke inu anai he vino peʼe ko he tahi age kava, ia koe mo ʼou foha moka kotou hu ki te fale la ʼo te fono,+ ke ʼaua naʼa kotou mamate. ʼE ko he lao ʼaia mai he taʼiake ki he tahi taʼiake ʼo talu ai. 10 ʼE kotou fai anai te faʼahi ʼaia ke kotou fakakehekeheʼi ai te meʼa ʼae ʼe maʼoniʼoni mo te meʼa ʼae ʼe mole maʼoniʼoni, pea mo te meʼa ʼae ʼe heʼe maʼa mo te meʼa ʼae ʼe maʼa,+ 11 pea ke feala ai hakotou akoʼi ki te kau Iselaele te ʼu fakatotonu fuli ʼae neʼe fakaha age e Sehova kia natou ʼaki ia Moisese.”+

12 Pea neʼe ui leva e Moisese kia Alone pea mo ʼona foha ko Eleasale mo Itamale, ʼae neʼe kei maʼuʼuli: “Kotou toʼo ʼi te ʼu molaga ʼae ʼe tutu maʼa Sehova te meʼa ʼae ʼe toe mai te molaga meʼa kai, pea ke kotou fai ʼaki he ʼu pane hala fakatupu. ʼE kotou kai anai te ʼu pane ʼaia ʼo ovi ki te ʼaletale,+ he ʼe ko he meʼa taputapu ʼaupito.+ 13 ʼE tonu ke kotou kai ʼi he koga meʼa taputapu,+ he ʼe ko tou vahe ʼaia pea mo ʼou foha neʼe toʼo ʼi te ʼu molaga ʼae ʼe tutu maʼa Sehova. Ko te meʼa ʼaia neʼe fakatotonu mai e te ʼAtua kia au. 14 ʼE ke toe kai anai ʼi he koga meʼa ʼe mole heʼe maʼa, ia te fatafata ʼo te manu ʼo te molaga ʼae ʼe lu ʼo feia mo te alaga ʼo te vahe taputapu,+ ia koe mo ʼou foha pea mo ʼou ʼofafine,+ koteʼuhi ʼe ko tou vahe ʼaia pea mo ʼou foha ʼae neʼe toʼo ʼi te ʼu sakilifisio ʼo te tokalelei ʼae neʼe fai e te kau Iselaele. 15 ʼE natou ʼaumai anai te alaga ʼo te vahe taputapu, mo te fatafata ʼo te manu ʼo te molaga ʼae ʼe lu pea mo te gako ʼo te ʼu molaga ʼae ʼe tutu maʼa te ʼAtua, ke momoli te molaga ʼae ʼe lu ia muʼa ʼo Sehova. ʼE liliu anai ko tou vahe pea mo ʼou foha ʼo talu ai,+ ohage pe ko tona fakatotonu e Sehova.”

16 Pea neʼe kumi fakalelei e Moisese te tao ʼo te molaga ʼo te agahala,+ kae neʼe kua ʼosi tutu. Neʼe kovi ʼosi ai tona ita kia Eleasale mo Itamale, te ʼu foha ʼo Alone ʼae neʼe kei maʼuʼuli, pea neʼe ina ui kia naua: 17 “He koʼe neʼe mole kolua kai te molaga ʼo te agahala ʼi te koga meʼa taputapu?+ ʼE ko he meʼa taputapu ʼaupito pea neʼe foaki atu ke kolua fua te hala ʼa te hahaʼi katoa pea ke fakamolemole ai ʼanatou agahala ia muʼa ʼo Sehova. 18 Neʼe mole ʼave tona toto ki te koga meʼa taputapu.+ Koia neʼe tonu ai ke kolua kai ʼi te koga meʼa taputapu, ohage pe ko te meʼa ʼae neʼe fakatotonu mai e te ʼAtua kia au.” 19 Neʼe tali e Alone kia Moisese: “Sio mai, neʼe nā momoli ʼi te ʼaho nei te molaga ʼo te agahala pea mo te holokoseta ia muʼa ʼo Sehova,+ kae neʼe hoko kia au te malaʼia ʼaia. Kae kapau neʼe au kai te molaga ʼo te agahala ʼi te ʼaho nei, neʼe feala koa ke fiafia ai ia Sehova?” 20 ʼI te logo ʼa Moisese ki ai, neʼe ina leleiʼia tana tali.

11 Neʼe ui leva e Sehova kia Moisese pea mo Alone: 2 “Kolua ui ki te kau Iselaele: ‘Koʼeni te ʼu manu ʼo te kele ʼae ʼe feala ke kotou kai ki ai:+ 3 ko te ʼu manu fuli ʼae ʼe mafahi katoa ʼonatou paninia pea mo natou hakeʼi tanatou meʼa kai ʼo toe kai.

4 “ ‘Kae ʼi te ʼu manu ʼaia ʼae ʼe natou hakeʼi tanatou meʼa kai ʼo toe kai peʼe mafahi lua ʼonatou paninia, ʼe mole tonu ke kotou kai te kamelo, he ʼe ina hakeʼi tana meʼa kai ʼo toe kai kae ʼe mole mafahi lua ʼona paninia. ʼE heʼe maʼa anai kia koutou.+ 5 ʼO toe feia mo te tamani,*+ he ʼe ina hakeʼi tana meʼa kai ʼo toe kai kae ʼe mole mafahi lua ʼona paninia. ʼE heʼe maʼa anai kia koutou. 6 ʼO toe feia mo te lapino vao, he ʼe ina hakeʼi tana meʼa kai ʼo toe kai kae ʼe mole mafahi lua ʼona paninia. ʼE heʼe maʼa anai kia koutou. 7 ʼO toe feia mo te puaka,+ he ʼe mafahi katoa ʼona kenukenu kae ʼe mole ina hakeʼi tana meʼa kai ʼo toe kai. ʼE heʼe maʼa anai kia koutou. 8 ʼE mole tonu ke kotou kai tonatou kanoʼi manu peʼe fāfā ki te ʼu manu ʼaia moka mamate. ʼE natou heʼe maʼa anai kia koutou.+

9 “ ‘Koʼeni te ʼu manu ʼo te ʼu vai ʼae ʼe feala ke kotou kai ki ai: ko te ʼu manu ʼae ʼe ʼi ai ʼonatou kapoga mo ʼonatou ʼuno, pea ʼe maʼuʼuli ʼi te tai peʼe ʼi te ʼu vai tafe.+ 10 Kae ko te ʼu manu fuli ʼo te tai mo te ʼu vai tafe, ʼo kau ai te ʼu kiʼi manu ʼae ʼe maʼuʼuli fakapupuga, ʼae ʼe mole honatou ʼu kapoga mo honatou ʼu ʼuno, ʼe ko he meʼa fakalialia anai kia koutou. 11 ʼEi, ʼe kotou fakalialia anai ki te ʼu manu ʼaia, pea ʼe mole tonu ke kotou kai ki ʼonatou kakano+ pea ʼe tonu ke kotou fakalialia ki te ʼu manu ʼaia moka mamate. 12 Ko te ʼu manu fuli ʼo te ʼu vai ʼae ʼe mole ʼi ai honatou ʼu kapoga mo honatou ʼu ʼuno, ʼe kotou fakalialia anai ki ai.

13 “ ‘Koʼeni te ʼu manulele ʼae ʼe kotou fakalialia anai ki ai, pea ʼe mole tonu ke kotou kai ki ai he ʼe fakalialia: ko te akuila,+ mo te fokone* ʼo te tai, mo te fokone* lahi ʼae ʼe mole fulufulu tona ʼulu,+ 14 mo te milani* kula pea mo te milani* ʼuli, 15 mo te ʼu faʼahiga kolopo* kehekehe fuli, 16 mo te otulusi, mo te lulu, mo te akapeau, mo te ʼu faʼahiga fokone* kehekehe fuli, 17 mo te lulu veliveli, mo te kolomolani,* mo te lulu taliga loloa, 18 mo te sine,* mo te pelikano,* mo te fokone* ʼae ʼe mole fulufulu tona ʼulu, 19 mo te motuku, mo te ʼu faʼahiga elone* kehekehe fuli, mo te upe* pea mo te peka. 20 Pea ʼe kotou fakalialia anai ki te ʼu kiʼi manu* fuli ʼae ʼe ʼi ai ʼonatou pakakau pea ʼe feala hanatou haʼele vaʼe fa.

21 “ ‘ ʼI te ʼu kiʼi manu* ʼae ʼe ʼi ai ʼonatou pakakau pea ʼe feala hanatou haʼele vaʼe fa, ʼe feala pe anai hakotou kai ki te ʼu kiʼi manu ʼae ʼe ʼi ai ʼonatou vaʼe ʼe lua ʼe loloa age ʼi te tahi ʼu vaʼe, ke feala hanatou hopohopo. 22 Koʼeni te ʼu kiʼi manu ʼae ʼe feala hakotou kai ki ai: ko te ʼu faʼahiga heʼe ʼae ʼe lalahi, mo te ʼu heʼe mahani,+ pea mo te tahi age ʼu faʼahiga heʼe. 23 Kae ʼe kotou fakalialia anai ki te tahi age ʼu kiʼi manu ʼae ʼe ʼi ai ʼonatou pakakau pea mo vaʼe fa. 24 ʼE feala anai hakotou liliu ʼo heʼe maʼa ʼuhi ko te ʼu kiʼi manu ʼaia. Ko ʼae ʼe fāfā ki te ʼu kiʼi manu ʼaia kua mamate, ʼe heʼe maʼa anai ʼo kaku ki te afiafi.+ 25 Ko ʼae ʼe ina tae te ʼu kiʼi manu ʼaia kua mamate, ʼe tonu anai ke ina fo ʼona mutuʼi meʼa.+ ʼE heʼe maʼa anai ʼo kaku ki te afiafi.

26 “ ‘Ko te ʼu manu ʼae ʼe mole mafahi katoa ʼonatou paninia pea ʼe mole natou hakeʼi tanatou meʼa kai ʼo toe kai, ʼe heʼe maʼa anai kia koutou. Pea ko ʼae ʼe fāfā ki te ʼu manu ʼaia, ʼe heʼe maʼa anai.+ 27 ʼI te ʼu manu fuli ʼae ʼe vaʼe fa, ʼe heʼe maʼa anai kia koutou te ʼu manu fuli ʼae ʼe haʼele ki te ʼalofi vaʼe.* Pea ko ʼae ʼe fāfā ki te ʼu manu ʼaia kua mamate, ʼe heʼe maʼa anai ʼo kaku ki te afiafi. 28 Ko ʼae ʼe ina ʼave te ʼu manu ʼaia kua mamate, ʼe tonu anai ke ina fo ʼona mutuʼi meʼa,+ pea ʼe heʼe maʼa anai ʼo kaku ki te afiafi.+ ʼE heʼe maʼa anai kia koutou te ʼu manu ʼaia.

29 “ ‘Koʼeni te ʼu kiʼi manu* ʼo te kele ʼae ʼe heʼe maʼa anai kia koutou: ko te ʼu faʼahiga kuma kehekehe,*+ mo te ʼu faʼahiga pili kehekehe fuli, 30 mo te moko, mo te pili lahi, mo te pili ʼo te ʼu vai, mo te pili ʼo te ʼone pea mo te kameleo. 31 ʼE heʼe maʼa anai kia koutou te ʼu kiʼi manu ʼaia ʼe maʼuʼuli fakapupuga.+ Ko ʼae ʼe fāfā ki te ʼu kiʼi manu ʼaia kua mamate, ʼe heʼe maʼa anai ʼo kaku ki te afiafi.+

32 “ ‘Pea ko he meʼa pe ʼe to ki ai te ʼu kiʼi manu ʼaia moka mamate, ʼe liliu anai ʼo heʼe maʼa, pe ʼe ko he meʼa neʼe fai ʼaki te ʼakau, peʼe ko he mutuʼi meʼa, peʼe ko he kiliʼi manu peʼe ko he taga.* Ko he meʼa pe ʼe kotou fakaʼaogaʼi, ʼe tonu anai ke fakavai, pea ʼe heʼe maʼa anai ʼo kaku ki te afiafi. Pea ʼe toe maʼa anai. 33 Kapau ʼe to te ʼu kiʼi manu ʼaia ki he ipu kele, ʼe kotou foaʼi anai pea ʼe heʼe maʼa anai te ʼu meʼa ʼae neʼe ʼi loto.+ 34 Ko he meʼa kai pe ʼe lave ki te vai ʼae neʼe ʼi te ipu kele ʼaia, ʼe heʼe maʼa anai, pea ko he meʼa inu pe neʼe ʼi te ipu kele ʼaia, ʼe heʼe maʼa anai. 35 Ko he meʼa pe ʼe to ki ai te ʼu kiʼi manu ʼaia kua mamate, ʼe heʼe maʼa anai. Kapau ko he gutuʼumu peʼe ko he hiliʼaga kulo,* ʼe tonu anai ke maumauʼi. ʼE heʼe maʼa ia, pea ʼe heʼe maʼa tuʼumaʼu anai kia koutou. 36 Kae kapau ʼe to te ʼu kiʼi manu ʼaia kua mamate ki he matapuna vai peʼe ko he tane vai, ʼe maʼa pe anai, kae ko ʼae ka ina toʼo te ʼu kiʼi manu ʼaia kua mamate, ʼe heʼe maʼa anai. 37 Kapau ʼe natou fetoki ki he pulapula ʼe tonu ke nunusi, ʼe maʼa pe anai te pulapula ʼaia. 38 Kae kapau ʼe huaʼi he moʼi vai ki he pulapula pea lave he koga ʼo te ʼu kiʼi manu ʼaia kua mamate ki te pulapula, ʼe heʼe maʼa anai te pulapula kia koutou.

39 “ ‘Pea kapau ʼe mate he manu ʼe feala ke kai, ʼe heʼe maʼa anai ia ia ʼae ʼe fāfā ki te manu ʼaia kua mate, ʼo kaku ki te afiafi.+ 40 Ko ʼae ʼe kai anai ki he koga ʼo te manu ʼaia kua mate, ʼe tonu anai ke ina fo ʼona mutuʼi meʼa pea ʼe heʼe maʼa anai ʼo kaku ki te afiafi.+ Ko ʼae ʼe ina ʼave te manu ʼaia kua mate, ʼe tonu anai ke ina fo ʼona mutuʼi meʼa pea ʼe heʼe maʼa anai ʼo kaku ki te afiafi. 41 Ko te ʼu kiʼi manu fuli ʼo te kele ʼae ʼe maʼuʼuli fakapupuga, ʼe ko he meʼa fakalialia.+ ʼE mole tonu ke kai ki ai. 42 ʼE mole tonu ke kotou kai te ʼu manu ʼae ʼe totolo, peʼe ko te ʼu manu ʼae ʼe vaʼe fa, peʼe ko te ʼu kiʼi manu* ʼae ʼe lahi ʼonatou vaʼe, he ʼe ko he ʼu meʼa fakalialia.+ 43 ʼAua naʼa kotou* liliu ko he hahaʼi fakalialia ʼuhi ko te ʼu kiʼi manu ʼaia ʼe maʼuʼuli fakapupuga, pea ʼaua naʼa kotou ʼulihi ia koutou pea mo liliu ʼo heʼe maʼa ʼuhi ko te ʼu kiʼi manu ʼaia.+ 44 Koteʼuhi ko au ia Sehova tokotou ʼAtua,+ pea ʼe tonu ke kotou maʼa pea mo maʼoniʼoni,+ he ʼe au maʼoniʼoni.+ Koia ʼe mole tonu ai ke kotou* liliu ʼo heʼe maʼa ʼuhi ko te ʼu kiʼi manu ʼae ʼe maʼuʼuli fakapupuga ʼi te kele. 45 Koteʼuhi ko au ia Sehova, ʼae neʼe ina fakamavae koutou mai te fenua ʼo Esipito ke au liliu ai ko tokotou ʼAtua,+ pea ʼe tonu ke kotou maʼoniʼoni,+ he ʼe au maʼoniʼoni.+

46 “ ‘Ko te lao ʼaia ʼo ʼuhiga mo te ʼu manu vaʼe fa, mo te ʼu manulele, mo te ʼu manu* fuli ʼae ʼe maʼuʼuli ʼi te ʼu vai, pea mo te ʼu kiʼi manu* fuli ʼae ʼe maʼuʼuli fakapupuga ʼi te kele, 47 ke fakakehekeheʼi ai te meʼa ʼae ʼe heʼe maʼa mo te meʼa ʼae ʼe maʼa, pea mo te ʼu manu ʼae ʼe feala ke kai mo te ʼu manu ʼae ʼe mole feala ke kai.’ ”+

12 Neʼe toe ui e Sehova kia Moisese: 2 “Ke ke ui ki te kau Iselaele: ‘Kapau ʼe faitama he fafine pea ʼe ina fanauʼi he tamasiʼi tagata, ʼe heʼe maʼa anai lolotoga ʼaho ʼe fitu, ohage pe ko tana heʼe maʼa ʼi te ʼu ʼaho ʼae ʼe mahaki fakafafine ai.+ 3 ʼI te valu ʼaho, ʼe tonu anai ke silikosisioʼi* te tamasiʼi.+ 4 ʼI te ʼu ʼaho ʼe 33 ʼae ʼe hoa mai ki ai, ʼe haga fakamaʼa pe anai e te fafine ia ia ʼuhi ko te toto ʼae neʼe alu ia ia. ʼE mole tonu anai ke fāfā ki he meʼa taputapu, pea ʼe mole tonu anai ke hu ki te koga meʼa taputapu ʼo kaku ki te ʼosi katoa ʼo te ʼu ʼaho ʼo tona fakamaʼa.

5 “ ‘Kapau ʼe ina fanauʼi he tamasiʼi fafine, ʼe heʼe maʼa anai lolotoga ʼaho ʼe 14, ohage pe ko tana heʼe maʼa ʼi te ʼu ʼaho ʼae ʼe mahaki fakafafine ai. ʼI te ʼu ʼaho ʼe 66 ʼae ʼe hoa mai ki ai, ʼe ina haga fakamaʼa pe anai ia ia ʼuhi ko te toto ʼae neʼe alu ia ia. 6 Ka ʼosi katoa te ʼu ʼaho ʼo tona fakamaʼa, tatau aipe pe ʼe ko he tamasiʼi tagata peʼe ko he tamasiʼi fafine, ʼe ina ʼaumai anai ki te pelepitelo ʼi te huʼaga ʼo te fale la ʼo te fono, he ovi tagata ʼe taʼu tahi ki te holokoseta+ pea mo he lupe ʼe kei mui peʼe ko he kulukulu ki te molaga ʼo te agahala. 7 ʼE momoli anai e te pelepitelo te ʼu manu ʼaia ia muʼa ʼo Sehova ke fakamolemole ai te ʼu agahala ʼa te fafine, pea ʼe maʼa anai ʼi te toto ʼae neʼe alu ia ia. ʼE ko te lao ʼaia ʼo ʼuhiga mo te fafine ʼae ʼe ina fanauʼi he tamasiʼi tagata peʼe ko he tamasiʼi fafine. 8 Kae kapau ʼe mole feala ke ina foaki he ovi, ʼe tonu anai ke ina toʼo he taluaʼi lupe peʼe ko he taluaʼi kulukulu kei mui,+ ko te tahi ki te holokoseta pea mo te tahi ki te molaga ʼo te agahala. ʼE momoli anai e te pelepitelo te ʼu manulele ʼaia, ke molehi te ʼu agahala ʼa te fafine, pea ʼe maʼa ai anai.’ ”

13 Neʼe hoko atu pe te palalau ʼa Sehova kia Moisese mo Alone, ʼo ina ui: 2 “Kapau ʼe ha he foʼi fufula, peʼe ko he foʼi fele, peʼe ko he pulepule ʼi te kili ʼo he tagata, pea ʼe feala ke liliu ko te mahaki ʼae ko te kilia,*+ ʼe tonu anai ke ʼave ia ia kia Alone te pelepitelo peʼe ko he tahi ʼo ʼona foha. Ko natou ʼaia ʼe ko te kau pelepitelo.+ 3 ʼE vakaʼi anai e te pelepitelo te meʼa ʼaia ʼe ha ʼi tona kili. Kapau kua liliu ʼo hina te ʼu fulu ʼo te meʼa ʼaia ʼe ha ʼi tona kili pea ʼe hage kua ulu loloto age te meʼa ʼaia ʼi te kili, ʼe ko te mahaki ʼae ko te kilia. ʼE vakaʼi anai e te pelepitelo te meʼa ʼaia ʼe ha ʼi tona kili pea ʼe ina tala anai ʼe heʼe maʼa te tagata ʼaia. 4 Kae kapau ʼe ha ʼi tona kili he pulepule hina, ʼe mole hage kua ulu loloto age ʼi tona kili, pea ʼe mole hina te ʼu fulu, ʼe ʼave anai e te pelepitelo te tagata ʼaia ʼe mahaki ke nofo tokotahi lolotoga ʼaho ʼe fitu.+ 5 ʼI te fitu ʼaho, ʼe toe vakaʼi anai e te pelepitelo te meʼa ʼae neʼe ha ʼi te kili ʼo te tagata ʼaia. Pea kapau neʼe heʼeki ʼi ai he fetogi pea neʼe mole mafola, ʼe toe ʼave anai e te pelepitelo ia te tagata ʼaia ke nofo tokotahi lolotoga ʼaho ʼe fitu.

6 “ ʼI te fitu ʼaho, ʼe tonu anai ke toe vakaʼi e te pelepitelo ia te tagata ʼaia. Pea kapau kua kamata lelei te meʼa ʼaia neʼe ha ʼi tona kili pea neʼe mole mafola, ʼe tala anai e te pelepitelo ʼe maʼa te tagata ʼaia.+ Neʼe ko he foʼi fele pe ia. ʼE fo anai e te tagata ʼaia ʼona mutuʼi meʼa, pea ʼe maʼa anai. 7 Kae kapau ʼe kua mafola te meʼa ʼaia ʼi te kili ʼo te tagata ʼi tona ʼosi vakaʼi e te pelepitelo ke feala hana tala kua maʼa, ʼe tonu anai ke toe alu ki te pelepitelo.* 8 ʼE toe vakaʼi anai e te pelepitelo te meʼa ʼaia neʼe ha ʼi tona kili, pea kapau kua mafola, ʼe tala anai e te pelepitelo ʼe heʼe maʼa te tagata ʼaia. ʼE ko te kilia ʼaia.+

9 “Kapau kua kilia he tagata, ʼe tonu anai ke ʼave ki te pelepitelo, 10 pea ʼe ina vakaʼi anai ia ia.+ Kapau ʼe ʼi ai he foʼi fufula hina ʼi tona kili, pea kua liliu te ʼu fulu ʼo hina mo ha te kakano+ ʼi te foʼi fufula ʼaia, 11 ʼe ko he kilia ʼe fualoa anai, pea ʼe tala anai e te pelepitelo ʼe heʼe maʼa te tagata ʼaia. ʼE mole ʼaoga anai ia ke ʼave te tagata ʼaia ʼo tuku ke nofo tokotahi,+ koteʼuhi ʼe heʼe maʼa ia. 12 Kae kapau ʼi te sio ʼa te pelepitelo kua ha te kilia ʼi te sino katoa ʼo he tagata pea kua mafola mai tona ʼulu ki ʼona vaʼe, 13 pea kapau ʼi tona vakaʼi e te pelepitelo, ʼe sio kua mafola te kilia ʼi tona sino katoa, ʼe tala anai e te pelepitelo kua maʼa te tagata ʼaia ʼe kilia.* ʼE kua hina fuli tona kili, pea kua maʼa ia te tagata ʼaia. 14 Kae kapau ʼe ʼi ai he mataʼi papala pea ʼe ha te kakano, ʼe heʼe maʼa anai te tagata ʼaia. 15 Ka sio anai te pelepitelo ki te kakano ʼo te mataʼi papala ʼaia, ʼe ina tala anai ʼe heʼe maʼa te tagata ʼaia.+ ʼE heʼe maʼa te kakano ʼo te mataʼi papala. ʼE ko te kilia ʼaia.+ 16 Kae kapau ʼe toe hina te kakano ʼo te mataʼi papala, ʼe toe liliu anai te tagata ʼaia ki te pelepitelo. 17 ʼE vakaʼi anai ia ia e te pelepitelo,+ pea kapau kua hina te mataʼi papala ʼaia, ʼe tala anai e te pelepitelo kua maʼa te tagata ʼaia. ʼEi, ʼe kua maʼa ia.

18 “Kapau neʼe ha he foʼi polo ʼi te kili ʼo he tagata pea kua mole, 19 kae kapau ʼi te faʼahi ʼae neʼe tuʼu ai te foʼi polo, ʼe ha he foʼi fufula hina peʼe ko he pulepule hina mo kula, ʼe tonu anai ke alu ki te pelepitelo. 20 ʼE vakaʼi anai e te pelepitelo te meʼa ʼae neʼe ha+ ʼi te kili ʼo te tagata ʼaia, pea kapau kua ulu loloto age ʼi tona kili pea kua liliu te ʼu fulu ʼo hina, ʼe tala anai e te pelepitelo ʼe heʼe maʼa te tagata ʼaia. ʼE kua ha te mahaki ʼae ko te kilia ʼi te faʼahi ʼae neʼe tuʼu ai te foʼi polo. 21 Kae kapau ʼe vakaʼi e te pelepitelo te meʼa ʼae neʼe ha ʼi tona kili pea sio ʼe mole ʼi ai he ʼu fulu hina, pea ʼe mole ulu loloto age te meʼa ʼaia ʼi te kili kae ʼe hage kua kamata mole, ʼe ʼave anai e te pelepitelo ia te tagata ʼaia ke nofo tokotahi lolotoga ʼaho ʼe fitu.+ 22 Pea kapau kua mafola te meʼa ʼaia neʼe ha ʼi tona kili katoa, ʼe tala anai e te pelepitelo ʼe heʼe maʼa ia te tagata ʼaia. ʼE kua kilia ia. 23 Kae kapau neʼe mole mafola te pulepule ʼi tona kili, ʼe ko he fufula pe ia ʼo te foʼi polo, pea ʼe tala anai e te pelepitelo ʼe maʼa te tagata ʼaia.+

24 “Peʼe kapau neʼe vela he tahi, pea ha te kakano ʼo te mataʼi lavea, pea neʼe liliu ʼo pulepule hina peʼe pulepule hina mo kula, 25 ʼe vakaʼi anai e te pelepitelo. Kapau kua liliu te ʼu fulu ʼo te pulepule ʼaia ʼo hina, pea ʼe ulu loloto age te pulepule ʼaia ʼi te kili, ʼe kua ha te kilia ʼi te mataʼi lavea ʼaia, pea ʼe tala anai e te pelepitelo ʼe heʼe maʼa te tagata ʼaia. ʼE ko te mahaki ʼae ko te kilia. 26 Kae kapau ʼe vakaʼi e te pelepitelo pea ʼe sio ʼe mole ʼi ai he ʼu fulu hina ʼi te pulepule, pea ʼe mole ulu loloto age te pulepule ʼaia ʼi te kili, pea kua kamata puli, ʼe ʼave anai e te pelepitelo ia te tagata ʼaia ke nofo tokotahi lolotoga ʼaho ʼe fitu.+ 27 ʼI te fitu ʼaho, ʼe vakaʼi anai e te pelepitelo ia te tagata ʼaia, pea kapau kua mafola ʼi tona kili te pulepule, ʼe tala anai e te pelepitelo ʼe heʼe maʼa ia te tagata ʼaia. ʼE ko te mahaki ʼae ko te kilia. 28 Kae kapau neʼe mole mafola ʼi tona kili te pulepule pea ʼe kua kamata puli, ʼe ko he fufula pe ia ʼo te faʼahi ʼae neʼe vela ai. ʼE tala anai e te pelepitelo ʼe maʼa ia te tagata ʼaia, he ʼe ko he fufula pe ia ʼo te faʼahi ʼae neʼe vela ai.

29 “Kapau ʼe mafuta he kili ʼi te ʼulu peʼe ko te kumukumu ʼo he tagata peʼe ko he fafine, 30 ʼe vakaʼi anai e te pelepitelo te kili ʼaia.+ Kapau ʼe hage ʼe ulu loloto age te meʼa ʼaia ʼi te kili pea kapau kua legalega pea ʼe mole lahi te ʼu fuluʼi ʼulu peʼe ko te ʼu fulu ʼo te kava, ʼe tala anai e te pelepitelo ʼe heʼe maʼa te fafine peʼe ko te tagata ʼaia. ʼE ko te mahaki ʼaia ʼi te foʼi ʼulu peʼe ʼi te fofoga. ʼE ko te kilia ʼaia ʼo te ʼulu peʼe ʼo te kumukumu. 31 Kae kapau ʼe sio te pelepitelo ʼe hage ʼe mole ulu loloto age ʼi te kili pea ʼe mole ʼi ai he ʼu fuluʼi ʼulu peʼe ko he ʼu fulu ʼo te kava ʼe ʼuli, ʼe tonu anai ke ina ʼave ia te tagata peʼe ko te fafine ʼaia ʼe mahaki ke nofo tokotahi lolotoga ʼaho ʼe fitu.+ 32 ʼI te fitu ʼaho, ʼe vakaʼi anai e te pelepitelo te kili ʼaia. Pea kapau neʼe mole mafola pea ʼe mole ʼi ai he ʼu fuluʼi ʼulu peʼe ko he ʼu fulu ʼo te kava kua legalega pea ʼe mole hage kua ulu loloto age ʼi te kili, 33 ʼe tonu anai ke tele te ʼulu peʼe ko te kava ʼo ia ʼae ʼe mahaki, kae ʼe mole tele anai te faʼahi ʼae neʼe mafuta ai te kili. Pea ʼe toe ʼave anai e te pelepitelo te tagata peʼe ko te fafine ʼaia ʼe mahaki ke nofo tokotahi lolotoga ʼaho ʼe fitu.

34 “ ʼI te fitu ʼaho, ʼe toe vakaʼi anai e te pelepitelo te faʼahi ʼae neʼe mafuta ai te kili. Pea kapau ko te kili ʼaia ʼo te foʼi ʼulu peʼe ʼi te fofoga neʼe mole mafola pea ʼe hage ʼe mole ulu loloto age ʼi te kili, ʼe tonu anai ke tala e te pelepitelo ʼe maʼa te tagata ʼaia. Pea ʼe tonu anai ke fo e te tagata ʼaia ʼona mutuʼi meʼa pea ʼe maʼa anai. 35 Kae kapau kua mafola te kili ʼi te ʼosi tala e te pelepitelo kua maʼa te tagata ʼaia, 36 ʼe toe vakaʼi anai e te pelepitelo te tagata ʼaia. Pea kapau kua mafola te kili, ʼe mole ʼaoga anai ke vakaʼi e te pelepitelo pe ʼe ʼi ai he ʼu fuluʼi ʼulu peʼe ko he ʼu fulu ʼo te kava kua legalega. ʼE heʼe maʼa ia te tagata ʼaia. 37 Kae kapau ʼi tona vakaʼi ʼaia, neʼe mole mafola te kili pea kua tupu he ʼu fuluʼi ʼulu ʼe ʼuli peʼe ko he ʼu fulu ʼo te kava ʼe ʼuli, ʼi te faʼahi ʼae neʼe mafuta ai te kili, ʼe kua lelei te mahaki. ʼE kua maʼa te tagata ʼaia, pea ʼe tala anai e te pelepitelo ʼe kua maʼa.+

38 “Kapau ʼe ha he ʼu pulepule hina ʼi te kili ʼo he tagata peʼe ko he fafine, 39 ʼe vakaʼi anai e te pelepitelo te ʼu pulepule ʼaia.+ Kapau ʼe mole faʼa hina lelei te ʼu pulepule ʼaia ʼi tona kili, ʼe mole kovi te mahaki ʼaia kua ha. ʼE maʼa te tagata peʼe ko te fafine ʼaia.

40 “Kapau ʼe maʼofa te ʼu fuluʼi ʼulu ʼo he tagata pea ʼe liliu ʼo ʼulu tula, ʼe mole heʼe maʼa. 41 Kapau ʼe maʼofa te ʼu fuluʼi ʼulu ʼo tona tumuʼaki pea ʼe liliu ʼo laʼe tula, ʼe mole heʼe maʼa te tagata ʼaia. 42 Kae kapau ʼe ha he foʼi fele ʼe hina mo kula ʼi tona ʼulu tula peʼe ʼi tona laʼe, ʼe kua ha te kilia ʼi tona foʼi ʼulu peʼe ʼi tona laʼe. 43 ʼE vakaʼi anai e te pelepitelo ia te tagata ʼaia, pea kapau ko te foʼi fufula ʼo te faʼahi ʼaia kua mahaki ʼe hina mo kula, pea ʼe tuʼu ʼi te faʼahi ʼae ʼe tula ʼi te tumutumu ʼo tona foʼi ʼulu peʼe ʼi tona laʼe, pea kapau ʼe hage ko te kilia ʼae ʼi tona kili, 44 ʼe kilia te tagata ʼaia. ʼE heʼe maʼa, pea ʼe tonu anai ke tala e te pelepitelo ʼe heʼe maʼa te tagata ʼaia ʼuhi ko te mahaki ʼae ʼe ha ʼi tona foʼi ʼulu. 45 ʼE tonu anai ke tui e ia ʼae ʼe kilia he ʼu mutuʼi meʼa kua makahaehae, mo ina tuku ke maveu tona ʼulu. ʼE tonu anai ke ina ʼuʼufi tona kaukava ʼaki he koga kie pea mo kalaga: ‘ ʼE au heʼe maʼa! ʼE au heʼe maʼa!’ 46 ʼE heʼe maʼa anai ʼi te temi katoa ʼae ʼe mahaki ai. ʼE tonu anai ke nofo tokotahi koteʼuhi ʼe heʼe maʼa. ʼE nofo anai ʼi tuʼa atu ʼo te nofoʼaga.+

47 “Kapau ʼe ha te kilia ʼi he mutuʼi meʼa neʼe fai ʼaki te fuluʼi ovi peʼe ko te lino,* 48 pea ʼe ha ʼi te ʼu filo ʼae neʼe lalaga ʼaki te mutuʼi meʼa ʼaia, peʼe ko he kiliʼi manu peʼe ko he meʼa pe neʼe fai ʼaki te kiliʼi manu, 49 pea kapau ʼe ha te pulepule legalega mo fuluʼi hega peʼe kula ʼo te kilia ʼi he mutuʼi meʼa, peʼe ko te ʼu filo ʼae neʼe lalaga ʼaki te mutuʼi meʼa ʼaia, peʼe ko he kiliʼi manu, peʼe ko he meʼa pe neʼe fai ʼaki te kiliʼi manu, ʼe ko te kilia ʼaia. Pea ʼe tonu anai ke fakaha ki te pelepitelo. 50 ʼE vakaʼi anai e te pelepitelo te pulepule ʼaia, pea ʼe tonu anai ke ina tuku keheʼi te meʼa ʼaia ʼe ha ai te kilia lolotoga ʼaho ʼe fitu.+ 51 ʼI te fitu ʼaho, ʼe ina vakaʼi anai te pulepule ʼaia. Pea kapau kua mafola ʼi te mutuʼi meʼa, peʼe ʼi te ʼu filo ʼae neʼe lalaga ʼaki, peʼe ʼi te kiliʼi manu (tatau aipe pe kotea te meʼa ʼae ʼe fakaʼaogaʼi ki ai te kiliʼi manu ʼaia), ʼe ko he kilia ʼe kovi, pea ʼe heʼe maʼa te meʼa ʼaia ʼe ha ai te kilia.+ 52 ʼE tonu anai ke ina tutu te mutuʼi meʼa ʼae neʼe fai ʼaki te fuluʼi ovi peʼe ko te lino, peʼe ko te ʼu meʼa fuli pe ʼae neʼe fai ʼaki te kiliʼi manu pea ʼe ha ai te kilia, he ʼe ko he kilia ʼe pikisia gafua. ʼE tonu anai ke tutu te ʼu meʼa ʼaia.

53 “Kae kapau ʼe vakaʼi e te pelepitelo te pulepule ʼaia neʼe mole mafola ʼi te mutuʼi meʼa, peʼe ʼi te ʼu filo ʼae neʼe lalaga ʼaki, peʼe ʼi he meʼa pe neʼe fai ʼaki te kiliʼi manu, 54 ʼe fakatotonu anai e te pelepitelo ke fo te mutuʼi meʼa ʼaia peʼe ke fufulu te ʼu meʼa ʼaia ʼe ha ai te pulepule, pea ʼe ina toe tuku keheʼi anai lolotoga ʼaho ʼe fitu. 55 ʼE vakaʼi anai e te pelepitelo te ʼu meʼa ʼaia ʼe ha ai te pulepule ʼi tonatou ʼosi fo peʼe fufulu. Kapau neʼe mole fetogi te pulepule, ʼe heʼe maʼa anai te ʼu meʼa ʼaia, logo la neʼe mole mafola te pulepule. ʼE ke tutu anai te ʼu meʼa ʼaia he ʼe kua kaina ia loto peʼe ko tuʼa.

56 “Kae kapau ʼe vakaʼi e te pelepitelo te pulepule pea kua kamata puli tona lanu ʼi te ʼosi fo peʼe fufulu ʼo te ʼu meʼa ʼaia, ʼe ina toʼo kehe anai te pulepule ʼi te mutuʼi meʼa, peʼe ko te ʼu filo ʼae neʼe lalaga ʼaki, peʼe ko te kiliʼi manu. 57 Kae kapau ʼe toe ha te pulepule ʼi he tahi faʼahi ʼo te mutuʼi meʼa, peʼe ko te ʼu filo ʼae neʼe lalaga ʼaki, peʼe ko he meʼa pe ʼe fai ʼaki te kiliʼi manu, ʼe kua mafola te pulepule ʼi te ʼu meʼa ʼaia. ʼE tonu anai ke ke tutu te ʼu meʼa ʼaia.+ 58 Kae kapau ʼe puli te pulepule ʼi tau ʼosi fo te mutuʼi meʼa, peʼe ko te ʼu filo ʼae neʼe lalaga ʼaki peʼe ʼi tau ʼosi fufulu he meʼa pe neʼe fai ʼaki te kiliʼi manu, ʼe tonu anai ke ke toe fo peʼe ke ke toe fufulu, pea ʼe maʼa anai te ʼu meʼa ʼaia.

59 “ ʼE ko te lao ʼaia ʼo ʼuhiga mo te kilia ʼae ʼe ha ʼi he mutuʼi meʼa neʼe fai ʼaki te fuluʼi ovi peʼe ko te lino, peʼe ʼi te ʼu filo ʼae neʼe lalaga ʼaki, peʼe ʼi he meʼa pe neʼe fai ʼaki te kiliʼi manu, ke tala pe ʼe natou maʼa peʼe natou heʼe maʼa.”

14 Pea neʼe hoko atu pe te palalau ʼa Sehova kia Moisese, ʼo ina ui age: 2 “Koʼeni te lao ʼo ʼuhiga mo te tagata kilia ʼi te ʼaho ʼae ʼe tala ai kua maʼa, moka ʼe tonu ke ʼave ki te pelepitelo:+ 3 ʼE mavae anai te pelepitelo ʼi te nofoʼaga ʼo alu ʼo vakaʼi ia ia. Pea kapau kua lelei te tagata kilia, 4 ʼe fakatotonu age anai e te pelepitelo ke ina ʼaumai ki tona fakamaʼa he ʼu manulele maʼuli mo maʼa ʼe lua, mo he ʼakau ko te sete, mo he kie kula, pea mo he isope.+ 5 ʼE fakatotonu anai e te pelepitelo ke matehi te tahi manulele ʼi te pesini ʼae neʼe fai ʼaki te kele pea neʼe ʼi ai he vai mai he matapuna vai. 6 Kae ʼe ina toʼo anai te manulele ʼae ʼe kei maʼuli, mo te ʼakau ʼae ko te sete, mo te kie kula pea mo te isope. Pea ʼe ina fufuʼi fakatahi anai te ʼu meʼa ʼaia ki te toto ʼo te manulele ʼae neʼe matehi. 7 Pea ʼe ina afuhi tuʼa fitu anai kia ia ʼae ʼe tonu ke fakamaʼa mai te kilia pea ʼe ina tala anai kua maʼa te tagata ʼaia. Pea ʼi tuʼa atu ʼo te kolo ʼe ina tuku age anai te manulele ʼae ʼe kei maʼuli ke alu.+

8 “ ʼE fo anai e ia ʼae ʼe tonu ke fakamaʼa ʼona mutuʼi meʼa, mo tele tona sino katoa, mo maʼanu, pea ʼe maʼa anai. Pea ʼe feala anai ke toe liliu ki te nofoʼaga, kae ʼe mole tonu anai ke ulu ki tona fale la lolotoga ʼaho ʼe fitu. 9 ʼI te fitu ʼaho, ʼe ina tele anai tona ʼulu, mo tona kumukumu pea mo ʼona tuʼa mata. ʼI tana ʼosi tele tona sino katoa, ʼe ina fo anai ʼona mutuʼi meʼa, mo maʼanu, pea ʼe maʼa anai.

10 “ ʼI te valu ʼaho, ʼe ina toʼo anai he ʼu ovi tagata ʼe lua kei mui mo heʼe mele, mo he akeno fafine ʼe taʼu tahi mo heʼe mele,+ mo he vahe tolu ki te hogofulu ʼo he efa* falena lelei ʼe tahi ʼe natu ʼaki te lolo ke momoli ohage ko he molaga meʼa kai,+ pea mo he fua loke* lolo ʼe tahi.+ 11 Pea ko te pelepitelo ʼae ʼe ina tala kua maʼa te tagata ʼae neʼe fakamaʼa, ʼe ina ʼaumai anai te tagata ʼaia mo ʼana molaga kia muʼa ʼo Sehova, ʼi te huʼaga ʼo te fale la ʼo te fono. 12 Pea ʼe toʼo anai e te pelepitelo he ovi tagata kei mui mo heʼe mele pea ʼe ina momoli fakatahi anai mo te fua loke lolo ʼe tahi ohage ko he sakilifisio fakatokatoka.*+ Pea ʼe ina lu anai te ʼu meʼa ʼaia ohage ko he molaga ʼe lu ia muʼa ʼo Sehova.+ 13 Pea ʼe ina matehi anai te ovi tagata ʼae kei mui ʼi te koga meʼa ʼae ʼe matehi tuʼumaʼu ai te ʼu manu ki te molaga ʼo te agahala pea mo te holokoseta,+ ʼi he koga meʼa taputapu, koteʼuhi ʼe maʼu anai e te pelepitelo te kanoʼi manu ʼo te sakilifisio fakatokatoka, ohage pe ko te molaga ʼo te agahala.+ ʼE ko he meʼa taputapu ʼaupito.+

14 “Pea ʼe toʼo anai e te pelepitelo he moʼi toto mai te sakilifisio fakatokatoka. ʼE ina ʼai anai ki te taliga mataʼu ʼo ia ʼae ʼe fakamaʼa, mo te kauʼi tuhi matuʼa ʼo tona nima mataʼu pea mo te kauʼi vaʼe matuʼa ʼo tona vaʼe mataʼu. 15 Pea ʼe toʼo anai e te pelepitelo he koga ʼo te fua loke lolo+ ʼo liligi ki tona ʼalofi nima hema. 16 ʼE ina fufuʼi anai te kauʼi tuhi ʼo tona nima mataʼu ki te lolo ʼae ʼe ʼi tona ʼalofi nima hema pea ʼe ina afuhi tuʼa fitu anai ki lalo ia muʼa ʼo Sehova. 17 Pea ʼe ʼai anai e te pelepitelo he koga ʼo te lolo ʼae ʼe toe ʼi tona ʼalofi nima ki te taliga mataʼu ʼo ia ʼae ʼe fakamaʼa, mo te kauʼi tuhi matuʼa ʼo tona nima mataʼu pea mo te kauʼi vaʼe matuʼa ʼo tona vaʼe mataʼu. ʼE ina ʼai anai ki te ʼu faʼahi ʼae neʼe kua ʼosi ʼai ki ai te toto ʼo te sakilifisio fakatokatoka. 18 Pea ʼe ina vali anai te toe ʼo te lolo ʼae ʼi tona ʼalofi nima ki te ʼulu ʼo ia ʼae ʼe fakamaʼa. Ko te meʼa ʼaia ka fai anai e te pelepitelo ke fakamolemole te ʼu agahala ʼa te tagata ʼaia ia muʼa ʼo Sehova.+

19 “ ʼE momoli anai e te pelepitelo te molaga ʼo te agahala+ ke fakamolemole ai te ʼu agahala ʼa ia ʼae ʼe fakamaʼa. Hili ʼaia, ʼe ina matehi anai te manu ʼo te holokoseta. 20 Pea ʼe momoli anai e te pelepitelo te holokoseta pea mo te molaga meʼa kai+ ʼi te ʼaletale ke fakamolemole te ʼu agahala ʼa te tagata ʼaia.+ Pea ʼe maʼa ai anai.+

21 “Kae kapau ʼe masiva pea ʼe mole ina fealagia te faʼahi ʼaia, ʼe ina toʼo anai he ovi tagata ʼe tahi kei mui ohage ko he sakilifisio fakatokatoka ʼe lu ia muʼa ʼo te ʼAtua ke fakamolemole ai ʼana agahala. ʼE ina toe toʼo anai mo he vahe tahi ki te hogofulu ʼo he efa* falena lelei ʼe tahi ʼe natu ʼaki te lolo ke momoli ohage ko he molaga meʼa kai, pea mo he fua loke lolo ʼe tahi, 22 pea mo he taluaʼi lupe peʼe ko he taluaʼi kulukulu kei mui, ʼo mulimuli pe ki ʼona fealagia. ʼE momoli anai te tahi ohage ko he molaga ʼo te agahala pea ko te tahi ʼe momoli anai ohage ko he holokoseta.+ 23 ʼI te valu ʼaho,+ ʼe ina ʼaumai anai te ʼu meʼa fuli ʼaia ki te pelepitelo, ʼi te huʼaga ʼo te fale la ʼo te fono ia muʼa ʼo Sehova, ke tala ai kua maʼa.+

24 “Pea ʼe toʼo anai e te pelepitelo te ovi tagata kei mui ki te sakilifisio fakatokatoka+ pea mo te fua loke lolo. Pea ʼe ina lu anai te ʼu meʼa ʼaia ohage ko he molaga ʼe lu ia muʼa ʼo Sehova.+ 25 ʼE ina matehi anai te ovi tagata kei mui ʼo te sakilifisio fakatokatoka. Pea ʼe ina toʼo anai he koga ʼo te toto ʼo te sakilifisio fakatokatoka ʼo ʼai ki te taliga mataʼu ʼo ia ʼae ʼe fakamaʼa, mo te kauʼi tuhi matuʼa ʼo tona nima mataʼu pea mo te kauʼi vaʼe matuʼa ʼo tona vaʼe mataʼu.+ 26 Pea ʼe liligi anai e te pelepitelo he moʼi lolo ki tona ʼalofi nima hema,+ 27 pea ʼe ina afuhi tuʼa fitu anai ki lalo he koga ʼo te lolo ʼae ʼe ʼi tona ʼalofi nima hema ia muʼa ʼo Sehova. ʼE ina fakaʼaogaʼi anai te kauʼi tuhi ʼo tona nima mataʼu moʼo fai te faʼahi ʼaia. 28 Pea ʼe ʼai anai e te pelepitelo he koga ʼo te lolo ʼae ʼi tona ʼalofi nima ki te taliga mataʼu ʼo ia ʼae ʼe fakamaʼa, mo te kauʼi tuhi matuʼa ʼo tona nima mataʼu pea mo te kauʼi vaʼe matuʼa ʼo tona vaʼe mataʼu. ʼE ina ʼai anai ki te ʼu faʼahi ʼae neʼe kua ʼosi ʼai ki ai te toto ʼo te sakilifisio fakatokatoka. 29 Pea ʼe ina vali anai te toe ʼo te lolo ʼae ʼi tona ʼalofi nima ki te ʼulu ʼo ia ʼae ʼe fakamaʼa, ke fakamolemole ai te ʼu agahala ʼa te tagata ʼaia ia muʼa ʼo Sehova.

30 “Pea ʼe ina momoli anai he taluaʼi kulukulu peʼe ko he taluaʼi lupe ʼe kei mui, ʼo mulimuli pe ki te ʼu fealagia ʼo te tagata,+ 31 ko te tahi ki te molaga ʼo te agahala, pea ko te tahi ki te holokoseta.+ ʼE ina momoli fakatahi anai te ʼu molaga ʼaia mo te molaga meʼa kai. Ko te meʼa ʼaia ka fai anai e te pelepitelo ke fakamolemole te ʼu agahala ʼa te tagata ʼaia ia muʼa ʼo Sehova.+

32 “Ko te lao ʼaia ʼo ʼuhiga mo ia ʼae neʼe kilia kae ʼe mole ina maʼu te ʼu meʼa ʼae ʼe ʼaoga ke tala ai kua maʼa.”

33 Pea neʼe ui e Sehova kia Moisese pea mo Alone: 34 “Ka kotou hu ki te fenua ʼo Kanaane,+ ʼae ka au foaki atu anai ke kotou maʼu,+ pea ka au tuku anai ke heʼe maʼa he ʼapi ʼo tokotou fenua ʼuhi ko te kilia,+ 35 ʼe tonu anai ke alu ia ia ʼae ʼoʼona te ʼapi ki te pelepitelo, ʼo ui age: ‘ ʼE pulepule te kaupa ʼo toku ʼapi ohage ko te kilia.’ 36 ʼE fakatotonu anai e te pelepitelo ke ʼave ki tuʼa te ʼu meʼa fuli ʼae ʼi te ʼapi ia muʼa ʼo tana alu ʼo vakaʼi te pulepule ʼae neʼe ha ai, ke mole ina tala ʼe heʼe maʼa te ʼu meʼa fuli ʼaia. Pea ka ʼosi fai te faʼahi ʼaia, ʼe feala anai ke alu te pelepitelo ʼo vakaʼi te ʼapi. 37 Pea ʼe ina vakaʼi anai te faʼahi ʼae neʼe ha ai te pulepule, pea kapau ʼe sio ki he faʼahi ʼo te kaupa ʼo te ʼapi neʼe ha ʼe fuluʼi hega mo legalega peʼe kula ʼi te kaupa ʼo te ʼapi, pea kapau ʼe hage mai kua ulu loloto age ʼi te kaupa, 38 ʼe mavae anai te pelepitelo mai te ʼapi pea ʼe ina fakatotonu anai ke mole hu he tahi ki te ʼapi lolotoga ʼaho ʼe fitu.+

39 “Pea ʼe toe liliu mai anai te pelepitelo ʼi te fitu ʼaho ʼo vakaʼi te ʼapi. Pea kapau kua mafola te pulepule ʼi te ʼu kaupa, 40 ʼe fakatotonu anai e te pelepitelo ke toʼo te ʼu maka ʼae neʼe ha ai te pulepule pea ke laku ki he koga meʼa ʼe heʼe maʼa, ʼi tuʼa atu ʼo te kolo. 41 ʼE tonu anai ke ina toli te kaupa ʼo te ʼapi, pea mo laku te ʼu meʼa fuli ʼae neʼe ina toli, ki he koga meʼa ʼe heʼe maʼa, ʼi tuʼa atu ʼo te kolo. 42 ʼE toe ʼai anai he tahi age ʼu maka moʼo fetogi ʼaki te ʼu maka ʼae neʼe toʼo, pea ʼe toe fakamomole anai te ʼu kaupa ʼo te ʼapi ʼaki he tahi age sima.

43 “Kae kapau ʼe toe ha te pulepule ʼi te ʼapi ʼi te ʼosi toʼo ʼo te ʼu maka mo te toli ʼo te ʼu kaupa ʼo te ʼapi pea mo tona toe fakamomole, 44 ʼe alu anai te pelepitelo ʼo toe vakaʼi. Pea kapau kua mafola te pulepule ʼi te ʼapi, ʼe ko he kilia ia ʼe kovi.+ ʼE heʼe maʼa te ʼapi ʼaia. 45 ʼE tonu anai ke maumauʼi te ʼapi: ʼona maka, mo ʼona papa, pea mo te ʼu sima fuli ʼae neʼe fakamomole ʼaki te ʼu kaupa. Pea ʼe ʼave anai ki he koga meʼa ʼe heʼe maʼa, ʼi tuʼa atu ʼo te kolo.+ 46 Pea ko ia ʼae ʼe ulu anai ki te ʼapi ʼi te ʼu ʼaho ʼae ʼe mole tonu ai ke hu he tahi ki ai,+ ʼe heʼe maʼa anai ʼo kaku ki te afiafi.+ 47 Pea ko ia ʼae ʼe moe peʼe kai ʼi te ʼapi, ʼe tonu anai ke ina fo ʼona mutuʼi meʼa.

48 “Kae kapau ʼe haʼu te pelepitelo ʼo sio neʼe mole mafola te pulepule ʼi te ʼapi ʼi tona toe ʼosi fakamomole, ʼe ina tala anai ʼe maʼa te ʼapi, koteʼuhi kua puli te pulepule ʼaia neʼe ha. 49 ʼE ina toʼo anai he ʼu manulele ʼe lua, mo he ʼakau ko te sete, mo he kie kula, pea mo he isope pea ʼe ina fakaʼaogaʼi anai te ʼu meʼa ʼaia ke feala ai ke tala kua maʼa te ʼapi.+ 50 ʼE tonu anai ke ina matehi he manulele ʼe tahi ʼi te pesini ʼae neʼe fai ʼaki te kele pea neʼe ʼi ai he vai mai he matapuna vai. 51 Pea ʼe ina toʼo anai te ʼakau ʼae ko te sete, mo te isope, mo te kie kula, pea mo te manulele ʼae ʼe kei maʼuli. ʼE ina fufuʼi fakatahi anai te ʼu meʼa ʼaia ki te toto ʼo te manulele ʼae neʼe matehi ʼi te pesini vai. Pea ʼe ina afuhi tuʼa fitu anai ki te ʼapi.+ 52 Pea ʼe ina tala anai kua maʼa te ʼapi ʼi tana fakaʼaogaʼi te toto ʼo te manulele, mo te vai ʼae mai te matapuna vai, mo te manulele ʼae ʼe kei maʼuli, mo te ʼakau ʼae ko te sete, mo te isope, pea mo te kie kula. 53 Pea ʼi tuʼa atu ʼo te kolo ʼe ina tuku age anai te manulele ʼae ʼe kei maʼuli ke alu. Ko te meʼa ʼaia ka fai e te pelepitelo ke fakamaʼa ai te ʼapi, pea ʼe maʼa anai ia.

54 “Ko te lao ʼaia ʼo ʼuhiga mo te ʼu faʼahiga kilia kehekehe, mo te mahaki ʼae ʼi te foʼi ʼulu peʼe ʼi te fofoga,+ 55 mo te kilia ʼae ʼe ha ʼi te ʼu mutuʼi meʼa+ peʼe ʼi te ʼu ʼapi,+ 56 mo te ʼu foʼi fufula, mo te ʼu foʼi fele, mo te ʼu pulepule ʼae ʼi te kili,+ 57 ke iloʼi ai pe ʼe heʼe maʼa mo maʼa he tahi peʼe ko he meʼa.+ ʼE ko te lao ʼaia ʼo ʼuhiga mo te kilia.”+

15 Neʼe hoko atu pe te palalau ʼa Sehova kia Moisese pea mo Alone, ʼo ina ui: 2 “Kolua palalau ki te kau Iselaele pea kolua ui kia natou: ‘Kapau ʼe maligi he meʼa mai te koga tapu ʼo he tagata, ʼe heʼe maʼa anai ʼuhi ko te mahaki ʼaia.+ 3 ʼE heʼe maʼa anai tatau aipe pe ʼe maligi he meʼa mai tona koga tapu peʼe mole kei haʼu he meʼa ki tuʼa ʼuhi ko te mahaki ʼaia.

4 “ ‘Ko he moeʼaga pe ʼe takoto ki ai te tagata mahaki,* ʼe heʼe maʼa anai. Pea ʼe toe heʼe maʼa anai mo te ʼu meʼa fuli ʼae ʼe heka anai ki ai. 5 Ko ʼae ʼe fāfā ki te moeʼaga ʼo te tagata ʼaia, ʼe tonu anai ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi.+ 6 Ko ʼae ʼe heka ki he meʼa neʼe heka ki ai te tagata mahaki, ʼe tonu anai ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 7 Ko ʼae ʼe fāfā ki te sino ʼo te tagata mahaki, ʼe tonu anai ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 8 Kapau ʼe ʼanuhi e te tagata mahaki he tahi ʼe mole heʼe maʼa, ʼe tonu anai ke fo e ia ʼae ʼe mole heʼe maʼa ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 9 Pea ko he hekaʼaga pe ʼi te tuʼa ʼo he manu ʼe heka ki ai te tagata mahaki, ʼe heʼe maʼa anai. 10 Ko ʼae ʼe fāfā ki he meʼa pe neʼe heka ki ai te tagata mahaki, ʼe heʼe maʼa anai ʼo kaku ki te afiafi. Pea ko ʼae ʼe ina ʼave te meʼa ʼaia neʼe heka ki ai te tagata mahaki, ʼe ina fo anai ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 11 Kapau ʼe fāfā te tagata mahaki+ ki he tahi, kae neʼe mole fanofano, ʼe tonu anai ki ʼae neʼe fāfā ki ai te tagata mahaki ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 12 Ko te ipu kele ʼae ʼe fāfā ki ai te tagata mahaki, ʼe tonu anai ke foaʼi, pea ko he faʼahiga ipu ʼakau pe, ʼe tonu anai ke fufulu.+

13 “ ‘Ka gata anai te meʼa ʼae ʼe maligi mai tona koga tapu, ʼe talitali anai ʼi ni ʼaho ʼe fitu. Pea ʼe tonu anai ke ina fo ʼona mutuʼi meʼa, mo maʼanu ʼaki he vai mai he matapuna vai, pea ʼe maʼa anai.+ 14 ʼI te valu ʼaho, ʼe ina toʼo anai he taluaʼi lupe peʼe ko he taluaʼi kulukulu kei mui.+ Pea ʼe alu anai ʼo tuʼu ia muʼa ʼo Sehova, ʼi te huʼaga ʼo te fale la ʼo te fono ʼo foaki te ʼu meʼa fuli ʼaia ki te pelepitelo. 15 Pea ʼe momoli anai e te pelepitelo te ʼu meʼa ʼaia ki te ʼAtua, ko te tahi ohage ko he molaga ʼo te agahala pea ko te tahi ohage ko he holokoseta. Ko te meʼa ʼaia ka fai anai e te pelepitelo moʼo fakamaʼa te tagata mai tona heʼe maʼa* ia muʼa ʼo Sehova.

16 “ ‘Kapau ʼe ʼi ai he tagata ʼe alu tona huʼa vai, ʼe tonu anai ke maʼanu katoa. ʼE heʼe maʼa anai ʼo kaku ki te afiafi.+ 17 Pea ʼe tonu anai ke ina fo ʼona mutuʼi meʼa fuli, mo fakamaʼa te ʼu kiliʼi manu fuli ʼae neʼe to ki ai te huʼa vai. ʼE heʼe maʼa anai te ʼu meʼa ʼaia ʼo kaku ki te afiafi.

18 “ ‘Kapau ʼe momoe he tagata mo he fafine pea ʼe alu ʼi te tagata tona huʼa vai, ʼe tonu anai ke nā maʼanu. ʼE nā heʼe maʼa anai ʼo kaku ki te afiafi.+

19 “ ‘Kapau ʼe alu te fatu ʼo he fafine, ʼe heʼe maʼa anai lolotoga ʼaho ʼe fitu.+ Pea ko he tahi pe ʼe fāfā ki ai, ʼe heʼe maʼa anai ʼo kaku ki te afiafi.+ 20 Ko te ʼu meʼa fuli ʼae ʼe takoto mo heka ki ai te fafine, ʼe heʼe maʼa anai ʼuhi ko tona mahaki fakafafine.+ 21 Ko he tahi pe ʼe fāfā ki tona moeʼaga, ʼe tonu anai ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 22 Ko he tahi pe ʼe fāfā ki he meʼa neʼe heka ki ai te fafine, ʼe tonu anai ke ina fo ʼona mutuʼi meʼa pea mo maʼanu. ʼE heʼe maʼa anai ʼo kaku ki te afiafi. 23 Ko he tahi pe ʼe fāfā ki te moeʼaga peʼe ko he tahi age meʼa neʼe heka ki ai te fafine, ʼe heʼe maʼa anai ʼo kaku ki te afiafi.+ 24 Pea kapau ʼe momoe he tagata mo te fafine ʼaia pea ʼe heʼe maʼa te tagata ʼaia ʼuhi ko te alu ʼo te toto ʼi te fafine,+ ʼe heʼe maʼa anai te tagata ʼaia lolotoga ʼaho ʼe fitu. Pea ko he moeʼaga pe ʼe takoto ki ai te tagata ʼe heʼe maʼa anai.

25 “ ‘Kapau ʼe alu te toto ʼi he fafine lolotoga ni ʼaho+ kae ʼe mole ko te temi ʼaia ʼe alu ai tona fatu,+ peʼe kapau ʼe fualoa age tana maligi ʼi te agamahani, ʼe heʼe maʼa anai lolotoga te ʼu ʼaho fuli ʼaia ohage pe ko tana heʼe maʼa ʼi te ʼu ʼaho ʼae ʼe mahaki fakafafine ai. 26 Pea ko he moeʼaga pe ʼe takoto ki ai te fafine, ʼe heʼe maʼa anai ohage pe ko te moeʼaga ʼae ʼe takoto ai moka mahaki fakafafine.+ Pea ko te ʼu meʼa fuli ʼae ʼe heka ki ai te fafine, ʼe heʼe maʼa anai ohage pe ko te heʼe maʼa ʼo te ʼu meʼa fuli ʼaia moka mahaki fakafafine. 27 Ko he tahi pe ʼe fāfā ki te ʼu meʼa ʼaia ʼe heʼe maʼa anai, pea ʼe tonu anai ke ina fo ʼona mutuʼi meʼa mo maʼanu. ʼE heʼe maʼa anai ʼo kaku ki te afiafi.+

28 “ ‘Kae kapau kua gata te alu ʼo te toto ʼi te fafine, ʼe talitali anai ʼi ni ʼaho ʼe fitu, pea ʼe maʼa anai.+ 29 ʼI te valu ʼaho, ʼe ina toʼo anai he taluaʼi lupe peʼe ko he taluaʼi kulukulu kei mui,+ ʼo ʼave ki te pelepitelo ʼi te huʼaga ʼo te fale la ʼo te fono.+ 30 ʼE momoli anai e te pelepitelo he manulele ʼe tahi ohage ko he molaga ʼo te agahala pea ko te tahi manulele ohage ko he holokoseta. Ko te meʼa ʼaia ka fai anai e te pelepitelo moʼo fakamaʼa te fafine mai tona heʼe maʼa* ia muʼa ʼo Sehova.+

31 “ ‘Koia ke kolua puipui te kau Iselaele mai tonatou heʼe maʼa, ke mole natou mamate ai ʼuhi ko tonatou heʼe maʼa ʼi tanatou moamoagaʼi toku tapenakulo, ʼae ʼe tuʼu ʼi te lotolotoiga ʼo natou.+

32 “ ‘Ko te lao ʼaia ʼo ʼuhiga mo te tagata ʼae ʼe maligi he meʼa mai tona koga tapu, pea mo te tagata ʼae ʼe heʼe maʼa ʼuhi ko te alu ia ia tona huʼa vai,+ 33 mo te fafine ʼae ʼe heʼe maʼa ʼuhi ko te alu ʼo tona fatu,+ mo he tahi pe ʼe maligi he meʼa mai tona koga tapu, tatau aipe pe ko he tagata pe ko he fafine,+ pea mo he tagata ʼe momoe mo he fafine ʼe heʼe maʼa.’ ”

16 Pea neʼe palalau ia Sehova kia Moisese ʼi te ʼosi mamate ʼo te ʼu foha ʼe lua ʼo Alone koteʼuhi neʼe nā tutuʼu ia muʼa ʼo Sehova.+ 2 Neʼe ui e Sehova kia Moisese: “Pea ke ke ui age ki tou tehina ko Alone ke ʼaua tana hoko hu ki te koga meʼa taputapu+ ʼae ʼi te tuʼa lito,+ pea mo tuʼu ʼi te muʼa tapunu ʼo te Aleka, naʼa mate anai,+ koteʼuhi ʼe au ha anai ʼi he ʼao+ ʼi te fuga tapunu.+

3 “Koʼeni te meʼa ʼae ʼe tonu ke ʼaumai e Alone moka hu ki te koga meʼa taputapu: ko he vitulo kei mui ki te molaga ʼo te agahala+ pea mo he ovi tagata ki te holokoseta.+ 4 ʼE tonu anai ke ina tui te kofu taputapu ʼae neʼe fai ʼaki te lino,+ pea mo te ʼu vavaʼe loto ʼae neʼe fai ʼaki te lino+ moʼo ʼuʼufi ʼaki tona telefua. Pea ʼe tonu anai ke ina haʼi he kie neʼe fai ʼaki te lino ki tona koga loto+ pea mo takai tona ʼulu ʼaki he kie neʼe fai ʼaki te lino.+ ʼE ko he ʼu mutuʼi meʼa taputapu ʼaia.+ ʼE maʼanu anai+ ʼi muʼa ʼo tana tui te ʼu teu ʼaia.

5 “ ʼE foaki age anai e te hahaʼi ʼo Iselaele+ he ʼu tao tagata kei mui ʼe lua ki te molaga ʼo te agahala pea mo he ovi tagata ʼe tahi ki te holokoseta.

6 “ ʼE tonu anai ke ʼaumai e Alone te vitulo ki te molaga ʼo te agahala ʼae ʼe momoli ʼo ʼuhiga mo ʼana agahala, pea ʼe ina momoli anai te molaga ʼaia ke fakamolemole ai ʼana agahala+ pea mo te ʼu agahala ʼo tona famili.*

7 “Pea ʼe ina toʼo anai te ʼu tao ʼe lua ʼo ʼave kia muʼa ʼo Sehova, ʼi te huʼaga ʼo te fale la ʼo te fono. 8 ʼE fai anai e Alone he toho ke iloʼi ai te tao ʼae ʼe tonu ke momoli kia Sehova pea mo te tao ʼo Asasele.* 9 Pea ʼe momoli anai e Alone te tao ʼae neʼe filifili+ maʼa Sehova ohage ko he molaga ʼo te agahala. 10 Kae ko te tao ʼo Asasele, ʼe tonu anai ke ʼave maʼuli kia muʼa ʼo Sehova moʼo fakamolemole te ʼu agahala, pea ke tuku age ai ke alu te tao ʼo Asasele ki te toafa.+

11 “ ʼE ʼaumai anai e Alone te vitulo ki te molaga ʼo te agahala ʼae ʼe momoli ʼo ʼuhiga mo ʼana agahala, ke fakamolemole ai ʼana agahala pea mo ʼae ʼo tona famili.* Pea ʼe ina matehi anai te vitulo ʼaia ʼe momoli ʼo ʼuhiga mo ʼana agahala.+

12 “ ʼE ina toʼo anai te ʼaiʼaga afi+ ʼae kua fonu ai ko te mamala kakaha ʼi te ʼaletale,+ ʼae ʼe tuʼu ia muʼa ʼo Sehova. Pea ʼe ina toe toʼo anai mo he ʼu lukuga iseso magoni+ ʼe lua neʼe keli ʼaki tona nima. Pea ʼe ina ʼave anai te ʼu meʼa ʼaia ki te tuʼa lito.+ 13 ʼE ina toe ʼai anai mo te iseso ki te afi ia muʼa ʼo Sehova,+ pea ʼe ʼaofi anai e te kohu ʼo te iseso te tapunu ʼae ʼe hili ʼi te Aleka ʼo te Fakamoʼoni,+ ke mole mate ai ia Alone.

14 “ ʼE ina toʼo anai he koga ʼo te toto ʼo te vitulo+ pea ʼaki tona kauʼi tuhi ʼe ina afuhi tuʼa fitu anai ki lalo te faʼahi ʼo te muʼa Aleka, ʼae ʼe haga ki te potu esite.+

15 “ ʼE ina matehi anai te tao ʼo te molaga ʼo te agahala, ʼae ʼe momoli ʼo ʼuhiga mo te ʼu agahala ʼa te hahaʼi,+ pea ʼe ina ʼave anai te toto ki te tuʼa lito+ pea ʼe ina toe fai anai ʼaki te toto ʼaia+ te meʼa pe ʼae neʼe ina fai ʼaki te toto ʼo te vitulo. Pea ʼe ina afuhi anai te toto ki lalo ʼi te muʼa Aleka.

16 “Ko te meʼa ʼaia ka ina fai anai ke tala ai kua maʼa te koga meʼa taputapu ʼo ʼuhiga mo te ʼu aga heʼe maʼa ʼa te kau Iselaele pea mo ʼanatou talagataʼa pea mo ʼanatou agahala.+ Pea ʼe ina toe fai feia anai ki te fale la ʼo te fono, ʼae ʼe tuʼu ʼi te lotolotoiga ʼo te kau Iselaele ʼae ʼe heʼe maʼa.

17 “ ʼE mole tonu anai ke nofo he tahi age tagata ʼi te fale la ʼo te fono kae nofo ia Alone ʼi te koga meʼa taputapu ke fakamolemole ai te ʼu agahala. ʼE hu anai ki ai ke fakamolemole ʼana agahala, mo te ʼu agahala ʼo tona famili,*+ pea mo te ʼu agahala ʼo te kau Iselaele katoa.+

18 “Pea ʼe mavae anai mai ai ʼo alu ki te ʼaletale+ ʼae ʼe tuʼu ia muʼa ʼo Sehova. ʼE ina toʼo anai he koga ʼo te toto ʼo te vitulo pea mo he koga ʼo te toto ʼo te tao pea ʼe ina vali anai ki te ʼu tala fuli ʼo te ʼaletale, ke fakamaʼa ai te ʼaletale. 19 ʼE ina toe afuhi tuʼa fitu anai he koga ʼo te toto ʼaia ʼaki tona kauʼi tuhi, pea ʼe ina fakamaʼa anai te ʼaletale mai te ʼu aga heʼe maʼa ʼa te kau Iselaele pea ʼe ina fakamaʼoniʼoniʼi anai.

20 “ ʼI tana ʼosi fai te faʼahi ʼaia ki te koga meʼa taputapu, mo te fale la ʼo te fono pea mo te ʼaletale ke tala ai kua maʼa,+ ʼe ina ʼaumai anai te tao ʼae kei maʼuli.+ 21 ʼE hili anai e Alone ʼona nima ki te ʼulu ʼo te tao maʼuli pea ʼe ina vete anai ki te ʼAtua te ʼu hala mo te ʼu agahala fuli ʼa te kau Iselaele. ʼE hage pe anai ʼe ina tuku te ʼu hala pea mo te ʼu agahala fuli ʼaia ki te ʼulu ʼo te tao.+ Pea ʼe ina tuku anai te tao ki te tagata ʼae neʼe hinoʼi* ke ina taki ki te toafa. 22 Pea ʼe tuku anai te tao ke alu ki te toafa,+ pea ʼe ʼave anai e te tao ʼanatou hala fuli.+

23 “Pea ʼe hu anai ia Alone ki te fale la ʼo te fono. ʼE ina huʼi anai te ʼu teu ʼae neʼe fai ʼaki te lino ʼae neʼe ina tui ʼi tana alu ki te koga meʼa taputapu, pea ʼe ina tuku anai ʼona teu ʼi ai. 24 ʼE tonu anai ke maʼanu+ ʼi he koga meʼa taputapu pea mo tui he tahi age ʼu teu.+ Pea ʼe mavae anai mai ai ʼo alu ʼo momoli tana holokoseta+ pea mo te holokoseta ʼa te hahaʼi,+ ke fakamolemole ai ʼana agahala pea mo te ʼu agahala ʼa te hahaʼi.+ 25 ʼE ina tutu anai ke kohu te gako ʼo te molaga ʼo te agahala ʼi te ʼaletale.

26 “Ko te tagata ʼae neʼe ina tuku ke alu te tao ʼo Asasele+ ki te toafa, ʼe tonu anai ke ina fo ʼona teu mo maʼanu, pea hoki feala anai ke hu ki te nofoʼaga.

27 “ ʼE ʼave anai ki tuʼa atu ʼo te nofoʼaga te vitulo ʼo te molaga ʼo te agahala pea mo te tao ʼo te molaga ʼo te agahala. Neʼe ko te toto ʼo te ʼu manu ʼaia neʼe ʼave ki te koga meʼa taputapu moʼo fakamolemole te ʼu agahala. Pea ʼe tutu anai te kili, mo te ʼu kanoʼi manu pea mo te ʼu faifekau ʼo te vitulo mo te tao.+ 28 Ko ia ʼae ʼe ina tutu te ʼu meʼa ʼaia ʼe tonu anai ke ina fo ʼona teu mo maʼanu, pea hoki feala anai ke hu ki te nofoʼaga.

29 “Ko te lao ʼaeni maʼa koutou ʼo talu ai: ʼI te hogofulu ʼaho ʼo te fitu mahina, ʼe tonu anai ke kotou fakamamahiʼi ia koutou,* pea ʼe mole tonu anai ke fai e he tagata Iselaele peʼe ko te matapule ʼae ʼe nofo ʼi te lotolotoiga ʼo koutou ia he faʼahiga gaue.+ 30 ʼI te ʼaho ʼaia, ʼe momoli anai e te pelepitelo he ʼu sakilifisio ke molehi ai ʼakotou agahala,+ pea ke tala ai kua kotou maʼa. ʼE fakamolemole anai ʼakotou agahala pea ʼe kotou maʼa anai ia mata ʼo Sehova.+ 31 ʼE ko he sapato ʼaia maʼa koutou ke kotou malolo ai, pea ʼe tonu anai ke kotou fakamamahiʼi ia koutou.*+ ʼE ko he lao ʼaia ʼo talu ai.

32 “ ʼE fai anai e te pelepitelo he ʼu sakilifisio ke fakamolemole ai te ʼu agahala. Ko te pelepitelo ʼaia kua tākai lolo tona ʼulu+ pea fakanofo* ke gaue ʼi tona ʼuhiga pelepitelo+ moʼo fetogi tana tamai.+ ʼE ina tui anai te ʼu teu taputapu+ ʼae neʼe fai ʼaki te lino.+ 33 ʼE tonu anai ke ina momoli te ʼu sakilifisio ʼaia ʼo ʼuhiga mo te sagatualio taputapu,+ mo te fale la ʼo te fono,+ mo te ʼaletale,+ ʼo feia mo te fakamolemole ʼo te ʼu agahala ʼa te kau pelepitelo pea mo te hahaʼi fuli ʼo Iselaele.+ 34 Ko te lao ʼaia maʼa koutou ʼo talu ai.+ ʼE kotou fai anai te ʼu meʼa ʼaia ʼo tuʼa tahi ʼi te taʼu ke fakamolemole ai te ʼu agahala fuli ʼa te kau Iselaele.”+

Neʼe fai ai e Alone te ʼu meʼa ʼae neʼe fakatotonu age e Sehova kia Moisese.

17 Neʼe toe ui e Sehova kia Moisese: 2 “Palalau kia Alone, mo ʼona foha pea mo te kau Iselaele fuli, pea ke ke ui age kia natou: ‘Koʼeni te meʼa ʼae ʼe fakatotonu atu e Sehova:

3 “ ‘ “Kapau ʼe matehi e he tagata ʼo Iselaele ia he vitulo, peʼe ko he ovi tagata kei mui, peʼe ko he tao ʼi te nofoʼaga peʼe ʼi tuʼa atu ʼo te nofoʼaga, 4 kae ʼe mole ina ʼaumai te manu ʼaia ki te huʼaga ʼo te fale la ʼo te fono ʼo momoli kia Sehova ohage ko he molaga, ia muʼa ʼo te tapenakulo ʼo Sehova, ʼe lakahala anai te tagata ʼaia. Neʼe ina liligi te toto, koia ʼe tonu ai ke matehi. 5 ʼE fai anai te meʼa ʼaia he ʼe mole tonu ke toe matehi e te kau Iselaele ʼanatou manu ʼi te vao, kae ʼe tonu ke natou ʼaumai kia Sehova, ʼi te huʼaga ʼo te fale la ʼo te fono pea mo foaki ki te pelepitelo. ʼE tonu ke natou momoli te ʼu sakilifisio ʼaia kia Sehova ohage ko he ʼu sakilifisio ʼo te tokalelei.+ 6 Pea ʼe afuhi anai e te pelepitelo te toto ki te ʼaletale ʼo Sehova, ʼi te huʼaga ʼo te fale la ʼo te fono, pea ʼe ina tutu anai ke kohu te gako. ʼE ko he ʼaele lelei kia Sehova.+ 7 Koia ʼe mole tonu ke natou toe fai ʼanatou sakilifisio ki te ʼu temonio ʼae ʼe hage ko he ’u tao,*+ pea mo tauhi kia* natou.+ Ko te lao ʼaia maʼa koutou mai he taʼiake ki he tahi taʼiake, ʼo talu ai.” ’

8 “Pea ʼe ke ui anai kia natou: ‘Ko he tagata pe ʼo Iselaele peʼe ko he matapule ʼe nofo ʼi te lotolotoiga ʼo koutou, pea ʼe ina momoli he holokoseta peʼe ko he sakilifisio 9 kae ʼe mole ina ʼaumai ki te huʼaga ʼo te fale la ʼo te fono ʼo momoli kia Sehova, ʼe tonu anai ke matehi.+

10 “ ‘Kapau ʼe kai e he tagata ʼo Iselaele peʼe ko he matapule ʼe nofo ʼi te lotolotoiga ʼo koutou ia he faʼahiga toto pe,+ ʼe au liʼaki moʼoni anai ia ia* ʼae ʼe ina kai te toto, pea ʼe au matehi anai. 11 Koteʼuhi ko te maʼuli* ʼo te ʼu meʼa maʼuli fuli ʼe ʼi te toto.+ Pea neʼe au foaki atu maʼa koutou te toto ʼi te ʼaletale+ moʼo fakamolemole ʼakotou agahala, he ʼe feala ke fakamolemole ai ʼakotou agahala ʼaki te toto+ koteʼuhi ko te maʼuli* ʼe ʼi te toto. 12 Koia neʼe au ui ai ki te kau Iselaele: “Ke ʼaua naʼa kai te toto+ e he tahi* pe ia koutou peʼe ko he matapule ʼe nofo ʼi te lotolotoiga ʼo koutou.”+

13 “ ‘Kapau ʼe maʼu e he tahi ʼo Iselaele peʼe ko he matapule ʼe nofo ʼi te lotolotoiga ʼo koutou ia he manu ʼo te vao peʼe ko he manulele ʼe feala ke kai ʼi tana kapu manu, ʼe ina liligi anai tona toto ki te kele+ pea ʼe ina tanu anai. 14 Koteʼuhi ko te maʼuli* ʼo te ʼu faʼahiga meʼa maʼuli fuli ʼe ko te toto, he ʼe ko te maʼuli* ʼe ʼi te toto. Koia ʼae neʼe au ui ai ki te kau Iselaele: “ ʼE mole tonu anai ke kotou kai te toto ʼo te ʼu faʼahiga meʼa maʼuli fuli, he ʼe ko te maʼuli* ʼo te ʼu faʼahiga meʼa maʼuli fuli ʼaia ʼe ko te toto. Ko ʼae ʼe ina kai anai te toto ʼe matehi anai.”+ 15 Kapau ʼe kai e he tagata Iselaele peʼe ko he matapule he manu neʼe maʼu atu kua mate pe neʼe hae e he manu fekai,+ ʼe tonu anai ke ina fo ʼona mutuʼi meʼa, mo maʼanu pea ʼe heʼe maʼa anai ʼo kaku ki te afiafi.+ Pea ʼe hoki maʼa ai anai. 16 Kae kapau ʼe mole ina fo ʼona mutuʼi meʼa pea mo maʼanu, ʼe ina utu pe anai te ʼu fua ʼo tana hala.’ ”+

18 Neʼe hoko atu pe te palalau ʼa Sehova kia Moisese, ʼo ina ui: 2 “Palalau ki te kau Iselaele pea ke ui kia natou: ‘Ko au ia Sehova tokotou ʼAtua.+ 3 ʼE mole tonu ke kotou fai te meʼa ʼae ʼe fai ʼi te fenua ʼo Esipito, ʼae neʼe kotou maʼuʼuli ai. Pea ʼe mole tonu ke kotou fai te meʼa ʼae ʼe fai ʼi te fenua ʼo Kanaane, ʼae ʼe au taki koutou ki ai.+ Pea ʼe mole tonu ke kotou mulimuli ki ʼanatou aga. 4 ʼE kotou fakalogo anai ki ʼaku lekula, mo taupau ʼaku lao pea mo mulimuli ki ai.+ Ko au ia Sehova tokotou ʼAtua. 5 ʼE kotou taupau anai ʼaku lao pea mo ʼaku lekula. Ko ʼae ʼe ina fai te ʼu meʼa ʼaia ʼe maʼuli anai.+ Ko au ia Sehova.

6 “ ‘ ʼE mole tonu anai ke momoe he tagata ia koutou mo* hona kaiga totonu.+ Ko au ia Sehova. 7 ʼE mole tonu anai ke ke momoe mo tau tamai, pea ʼe mole tonu anai ke ke momoe mo tau faʼe. ʼEi, ʼe ko tau faʼe, pea ʼe mole tonu ke ke momoe mo ia.

8 “ ‘ ʼE mole tonu anai ke ke momoe mo te ʼohoana ʼo tau tamai.+ ʼE ko he meʼa fakaufiufi anai ki tau tamai.

9 “ ‘ ʼE mole tonu anai ke ke momoe mo tou tokolua, pe ʼe ko he ʼofafine ʼo tau tamai peʼe ko he taʼahine ʼo tau faʼe, tatau aipe pe neʼe kolua tutupu ʼi he loto fale pe ʼe tahi peʼe kailoa.+

10 “ ‘ ʼE mole tonu anai ke ke momoe mo te ʼofafine ʼo tou foha, peʼe ko te taʼahine ʼo tou ʼofafine, he ʼe ko he meʼa fakaufiufi anai kia koe.

11 “ ‘ ʼE mole tonu anai ke ke momoe mo te taʼahine ʼo te ʼohoana ʼo tau tamai, he ʼe ko te ʼofafine ʼo tau tamai, pea ʼe ko tou tokolua.

12 “ ‘ ʼE mole tonu anai ke ke momoe mo te tokolua ʼo tau tamai, he ʼe kaiga totonu mo tau tamai.+

13 “ ‘ ʼE mole tonu anai ke ke momoe mo te tehina ʼo tau faʼe, he ʼe kaiga totonu mo tau faʼe.

14 “ ‘ ʼE mole tonu anai ke ke momoe mo te ʼohoana ʼo te tehina ʼo tau tamai, he ʼe ko he meʼa fakaufiufi ki te tehina ʼo tau tamai. He ʼe ko tau kiʼi faʼe.+

15 “ ‘ ʼE mole tonu anai ke ke momoe mo te ʼohoana ʼo tou foha.+ ʼEi, ʼe ko te ʼohoana ʼo tou foha, pea ʼe mole tonu ke ke momoe mo ia.

16 “ ‘ ʼE mole tonu anai ke ke momoe mo te ʼohoana ʼo tou tehina,+ he ʼe ko he meʼa fakaufiufi anai ki tou tehina.

17 “ ‘ ʼE mole tonu anai ke ke momoe mo he fafine pea mo tana taʼahine.+ Pea ʼe mole tonu anai ke ke momoe mo te ʼofafine ʼo tana tama, pea mo te taʼahine ʼo tana taʼahine. ʼE nā kaiga totonu mo te fafine, pea ʼe ko he aga fakalialia.*

18 “ ‘ ʼE mole tonu anai ke ke ʼohoana mo te tehina ʼo tou ʼohoana+ pea mo momoe mo ia kae kei maʼuli tou ʼohoana.

19 “ ‘ ʼE mole tonu anai ke ke momoe mo he fafine ʼe heʼe maʼa koteʼuhi ʼe mahaki fakafafine.+

20 “ ‘ ʼE mole tonu anai ke ke momoe mo te fafine ʼohoana ʼo tou tatau,* koteʼuhi ʼe ke heʼe maʼa anai.+

21 “ ‘ ʼE mole tonu anai ke ke tali ke momoli he tahi ʼo tou hakoga kia Moleke.+ ʼE mole tonu anai ke ke tali te faʼahi ʼaia he ʼe ke ʼulihi anai te huafa ʼo tou ʼAtua.+ Ko au ia Sehova.

22 “ ‘ ʼE mole tonu anai ke ke momoe mo he tagata ohage ko tau momoe mo he fafine.+ ʼE ko he aga fakalialia ia.

23 “ ‘ ʼE mole tonu anai ke momoe he tagata mo he manu koteʼuhi ʼe heʼe maʼa anai. Pea ʼe mole tonu anai ke faiga he fafine ke momoe mo he manu.+ ʼE ko he aga fakalialia ia.

24 “ ‘ ʼE mole tonu anai ke kotou heʼe maʼa ʼuhi ko te ʼu meʼa fuli ʼaia, koteʼuhi ʼe heʼe maʼa te ʼu puleʼaga ʼae ʼe au kapu ʼi ʼokotou muʼa ʼuhi ko te ʼu taʼi aga ʼaia.+ 25 Koia, ʼe heʼe maʼa tonatou fenua, pea ʼe au tauteaʼi anai te hahaʼi ʼuhi ko tanatou hala, pea ʼe kapu anai natou mai tonatou fenua.+ 26 Kae ʼe tonu ke kotou taupau ʼaku lao, mo ʼaku lekula.+ Pea ʼe mole tonu ke kotou fai he meʼa pe ʼi te ʼu meʼa fakalialia ʼaia, tatau aipe pe ko he tagata Iselaele peʼe ko he matapule ʼe nofo ʼi te lotolotoiga ʼo koutou.+ 27 Neʼe fai te ʼu meʼa fakalialia fuli ʼaia e te hahaʼi ʼae neʼe maʼuʼuli ʼi muʼa atu ia koutou ʼi te fenua,+ pea ʼi te temi nei kua heʼe maʼa te fenua. 28 Pea ʼe mole kapu anai koutou ʼi te fenua ohage ko te kapu ʼo te ʼu puleʼaga ʼae neʼe maʼuʼuli ai ʼi muʼa atu ia koutou he neʼe mole kotou ʼulihi te fenua. 29 ʼE matehi anai ia natou* fuli ʼae ʼe natou fai he meʼa ʼi te ʼu meʼa fakalialia ʼaia. 30 ʼE tonu ke kotou fakahoko ʼokotou maʼua kia te au ke mole kotou fai ai he ʼu aga fakalialia ohage ko tona fai ʼi muʼa atu.+ Kapau ʼe kotou fai te faʼahi ʼaia, ʼe mole kotou heʼe maʼa ai anai ʼuhi ko te ʼu aga ʼaia. Ko au ia Sehova tokotou ʼAtua.’ ”

19 Pea neʼe toe palalau ia Sehova kia Moisese, ʼo ina ui age: 2 “Palalau ki te kau Iselaele katoa pea ke ui kia natou: ‘ ʼE tonu ke kotou maʼoniʼoni, koteʼuhi ko au ia Sehova tokotou ʼAtua, ʼe au maʼoniʼoni.+

3 “ ‘Ke kotou tahi fakaʼapaʼapa* ki tana faʼe pea mo tana tamai,+ pea mo kotou taupau ʼaku sapato.+ Ko au ia Sehova tokotou ʼAtua. 4 ʼAua naʼa kotou tauhi ki he ʼu ʼatua ʼe mole honatou ʼuhiga+ peʼe kotou fai he ʼu fakatata ukamea.+ Ko au ia Sehova tokotou ʼAtua.

5 “ ‘Kapau ʼe kotou momoli he sakilifisio ʼo te tokalelei kia Sehova,+ ʼe tonu ke kotou fai fakalelei te sakilifisio ʼaia ke feala hana tali.+ 6 ʼE tonu anai ke kai te manu ʼo te sakilifisio ʼaia ʼi te ʼaho ʼae ʼe momoli ai pea mo te ʼaho ake, kae ko te meʼa ʼae ʼe toe ʼo aʼu ki te tolu ʼaho, ʼe tonu anai ke tutu.+ 7 Kae kapau ʼe kai e he tahi te meʼa ʼaia ʼe toe ʼi te tolu ʼaho, ʼe mole tali anai ia he ʼe ko he meʼa fakalialia. 8 Ko he tahi pe ʼe ina kai te meʼa ʼaia, ʼe ina utu pe anai te ʼu fua ʼo tana hala koteʼuhi neʼe ina meʼa noaʼi he meʼa taputapu ʼa Sehova, pea ʼe tonu anai ke matehi.

9 “ ‘Moka kotou tanaki te taʼukai ʼo tokotou fenua, ʼe mole tonu anai ke ke tanaki fuli te ʼu fua ʼae ʼi te ʼu tuʼakoi ʼo tau gaueʼaga pea mo tae te meʼa ʼae neʼe toe ʼo tau taʼukai.+ 10 Koia, ʼe mole tonu anai ke ke toli te meʼa ʼae ʼe toe ʼi tau gaueʼaga vite pea mo tae te ʼu vite ʼae neʼe fetoki ki lalo. ʼE ke tuku anai maʼa te tagata masiva*+ pea mo te matapule. Ko au ia Sehova tokotou ʼAtua.

11 “ ‘ ʼE mole tonu anai ke kotou kaihaʼa,+ ʼe mole tonu anai ke kotou kaka,+ pea mo aga fakakaka ia koutou. 12 ʼE mole tonu anai ke kotou fai he fakapapau loi ʼi toku huafa+ he ʼe kotou moamoagaʼi anai te huafa ʼo tokotou ʼAtua. Ko au ia Sehova. 13 ʼE mole tonu anai ke ke kakaʼi tou tatau+ pea ʼe mole tonu anai ke ke kaihaʼa.+ ʼE mole tonu anai ke ke nofo mo te totogi ʼo te tagata gaue ʼo kaku ki te ʼala uhu ake.+

14 “ ‘ ʼE mole tonu anai ke ke laukoviʼi he tuli peʼe ke tuku he meʼa ʼe feala ke tukia ai he kivi,+ kae ʼe tonu anai ke ke manavasiʼi ki tou ʼAtua.+ Ko au ia Sehova.

15 “ ‘ ʼE mole tonu anai ke kotou heʼe faitotonu ʼi takotou faifakamau. ʼE mole tonu anai ke ke fakapalatahi ki te tagata masiva peʼe ke leleiʼia age te tagata maʼu koloa.+ ʼE ke faitotonu anai moka ke fakamauʼi tou tatau.

16 “ ‘ ʼE mole tonu anai ke ke fealuʼaki ʼi te lotolotoiga ʼo tau hahaʼi ʼo faifasituʼu.+ ʼE mole tonu anai ke ke faiga ke ke matehi tou tatau.*+ Ko au ia Sehova.

17 “ ‘ ʼE mole tonu anai ke ke fehiʼa ki tou tehina ʼi tou loto.+ ʼE tonu anai ke ke fakatonutonuʼi tou tatau,+ ke mole ke toe lakahala ai.

18 “ ‘ ʼE mole tonu anai ke ke lagavaka+ peʼe ke lotokovi ki tau hahaʼi. ʼE tonu anai ke ke ʼofa ki tou tatau ohage pe ko koe totonu.+ Ko au ia Sehova.

19 “ ‘Koʼeni ʼaku lao ʼae ʼe tonu anai ke kotou taupau: ʼE mole tonu anai ke ke ʼaumai he manu lalata ke ina tauʼi he tahi age faʼahiga manu lalata ke maʼu ai ni ʼuhi. ʼE mole tonu anai ke ke nunusi ni faʼahiga pulapula kehekehe ʼe lua ʼi tau gaueʼaga,+ pea ʼe mole tonu anai ke ke tui he teu neʼe fai ʼaki ni faʼahiga filo kehekehe ʼe lua.+

20 “ ‘Kapau ʼe momoe he tagata mo he fafine faifekau, kae neʼe kua fakatuʼutuʼu ke foaki ki he tahi tagata, pea neʼe heʼeki totogi peʼe ʼateaina, ʼe tonu anai ke fakatuʼā ia naua. Kae ʼe mole tonu anai ke matehi ia naua, he neʼe heʼeki fakaʼateainaʼi te fafine faifekau. 21 ʼE ʼaumai anai e te tagata he ovi tagata ke momoli kia Sehova ʼe ko te sakilifisio fakatokatoka,+ ʼi te huʼaga ʼo te fale la ʼo te fono. 22 ʼE momoli anai e te pelepitelo te ovi tagata ʼo te sakilifisio fakatokatoka ia muʼa ʼo Sehova ke molehi ai te agahala ʼa te tagata, pea ʼe fakamolemole anai tana agahala.

23 “ ‘Ka kotou hu ki te fenua pea mo to he fuʼu ʼakau pe ke kotou kai, ʼe tonu anai ke hage kia koutou ʼe heʼe maʼa ʼona fua pea mo tapu. ʼE mole kotou fakaovi anai ki te fuʼu ʼakau ʼaia lolotoga taʼu ʼe tolu. ʼE mole tonu anai ke kotou kai ki ai. 24 Kae ʼi te fa taʼu, ʼe taputapu leva ʼona fua fuli pea ʼe kotou momoli anai kia Sehova ʼaki he fiafia.+ 25 ʼI te nima taʼu, ʼe feala anai ke kotou tanaki fakatahi ʼona fua mo te tahi ʼu fua pea mo kotou kai. Ko au ia Sehova tokotou ʼAtua.

26 “ ‘ ʼE mole tonu anai ke kotou kai he meʼa ʼe maʼu ai he toto.+

“ ‘ ʼE mole tonu anai ke kotou kumi he ’u fakailoga pea mo gaohi meʼa fakamanamana.+

27 “ ‘ ʼE mole tonu anai ke kotou tele* te ʼu faʼahi ʼo ʼokotou foʼi ʼulu. Pea ʼe mole tonu anai ke ke hoko kosi tou kava.*+

28 “ ‘ ʼE mole tonu anai ke kotou hifi ʼokotou sino ʼuhi ko he tahi kua mate,*+ pea ʼe mole tonu anai ke kotou ta ʼokotou sino. Ko au ia Sehova.

29 “ ‘ ʼE mole tonu anai ke ke fakalainoaʼi tou ʼofafine ʼo ke fakaliliu ia ia ko he fafine paomutu,+ ke mole heʼe maʼa ai te fenua ʼuhi ko te faiaga, pea mo fonu ai ko te ʼu aga fakalialia.+

30 “ ‘ ʼE tonu anai ke kotou taupau ʼaku sapato,+ pea ʼe tonu anai ke kotou fakaʼapaʼapa* ki toku sagatualio. Ko au ia Sehova.

31 “ ‘ ʼAua naʼa kotou olo ʼo kumi tokoni ki te hahaʼi ʼae ʼe felogoi mo te kau mate+ pea mo te hahaʼi faifakakikite,+ he ʼe kotou heʼe maʼa anai ʼuhi ko natou. Ko au ia Sehova tokotou ʼAtua.

32 “ ‘ ʼE tonu anai ke ke fakaʼapaʼapa kia ia ʼae ʼe ʼulu hina+ pea mo fakamaʼuhigaʼi ia ia ʼae kua matuʼa,+ pea ʼe tonu anai ke ke manavasiʼi ki tou ʼAtua.+ Ko au ia Sehova.

33 “ ‘Kapau ʼe nofo he matapule ʼi tokotou fenua, ʼe mole tonu ke kotou gaohi koviʼi ia ia.+ 34 Ko te matapule ʼae ʼe nofo mo koutou ʼe hage pe anai ko he tahi ʼo tokotou hahaʼi,+ pea ʼe tonu anai ke ke ʼofa kia ia ohage pe ko tau ʼofa kia koe totonu, koteʼuhi neʼe kotou nonofo ohage ko ni matapule ʼi te fenua ʼo Esipito.+ Ko au ia Sehova tokotou ʼAtua.

35 “ ‘ ʼE mole tonu anai ke kotou agakaka ʼi te fakafuafua ’o te loa peʼe ko te mamafa ʼo he meʼa, peʼe ko te fakafuafua ʼo te ʼu meʼa ʼae ʼe huhuʼa.+ 36 ʼE tonu anai ke kotou fakaʼaogaʼi he ʼu meʼa fua ʼe totonu, mo he ʼu maka ʼe iloʼi totonu ai te mamafa ʼo he meʼa, mo he efa* ʼe totonu pea mo he hine* ʼe totonu.+ Ko au ia Sehova tokotou ʼAtua, ʼae neʼe ina fakamavae koutou mai te fenua ʼo Esipito. 37 Koia ʼe tonu anai ke kotou taupau ʼaku lao pea mo ʼaku lekula fuli, pea ʼe tonu anai ke kotou mulimuli ki ai.+ Ko au ia Sehova.’ ”

20 Neʼe hoko atu pe te palalau ʼa Sehova kia Moisese, ʼo ina ui: 2 “ ʼE tonu anai ke ke ui ki te kau Iselaele: ‘Ko he tagata pe ʼo Iselaele peʼe ko he matapule pe ʼe nofo ʼi Iselaele ʼe ina momoli he tahi ʼo tona hakoga kia Moleke, ʼe tonu anai ke matehi.+ ʼE tonu anai ke tuki makaʼi e te hahaʼi ʼo te fenua ʼo kaku ki tona mate. 3 ʼE au liʼaki anai te tagata ʼaia, pea ʼe au matehi anai, koteʼuhi neʼe ina momoli he tahi ʼo tona hakoga kia Moleke, ʼo heʼe maʼa ai toku koga meʼa taputapu,+ pea neʼe ina moamoagaʼi toku huafa maʼoniʼoni. 4 Kapau ʼe sisio te hahaʼi ʼo te fenua ki te tagata ʼaia ʼe ina momoli he tahi ʼo tona hakoga kia Moleke kae ʼe mole natou fai he meʼa ʼo mole natou matehi,+ 5 ʼe au liʼaki moʼoni anai te tagata ʼaia mo tona famili.+ ʼE au matehi anai te tagata ʼaia pea mo natou fuli ʼae ʼe fakatahi mo ia ki te tauhi kia* Moleke.

6 “ ‘Ko he tahi* ʼe kumi tokoni ki te hahaʼi ʼae ʼe felogoi mo te kau mate+ pea mo te hahaʼi faifakakikite+ ʼo tupu ai tana heʼe agatonu ki te ʼAtua,* ʼe au liʼaki moʼoni anai ia ia* pea ʼe au matehi anai.+

7 “ ‘ ʼE tonu ke kotou maʼa pea mo maʼoniʼoni,+ koteʼuhi ko au ia Sehova tokotou ʼAtua. 8 Pea ʼe tonu anai ke kotou taupau ʼaku lao pea mo mulimuli ki ai.+ Ko au ia Sehova, ʼae ʼe ina fakamaʼoniʼoniʼi koutou.+

9 “ ‘Kapau ʼe lotokoviʼi e he tagata tana tamai peʼe ko tana faʼe, ʼe tonu anai ke matehi.+ ʼE ko tana pe ia hala moka matehi, koteʼuhi neʼe ina lotokoviʼi tana tamai peʼe ko tana faʼe.

10 “ ‘Koʼeni te fakatuʼā ʼo ʼuhiga mo te tagata ʼae ʼe tono mo te ʼohoana ʼo he tahi age tagata: Ko ʼae ʼe tono mo te ʼohoana ʼo tona tatau ʼe tonu anai ke matehi, ʼo feia mo te fafine ʼae neʼe tono.+ 11 Kapau ʼe momoe he tagata mo te ʼohoana ʼo tana tamai, ʼe ko he meʼa fakaufiufi ki tana tamai.+ ʼE tonu anai ke matehi ia naua toko lua. ʼE ko te hala pe ia ʼa naua moka matehi ia naua. 12 Kapau ʼe momoe he tagata mo te ʼohoana ʼo tona foha, ʼe tonu anai ke matehi ia naua toko lua. ʼE ko he meʼa fakalialia ia. ʼE ko te hala pe ia ʼa naua moka matehi ia naua.+

13 “ ‘Kapau ʼe momoe he tagata mo he tahi tagata ohage ko hana momoe mo he fafine, ʼe kua nā fai he meʼa fakalialia.+ ʼE tonu anai ke matehi ia naua toko lua. ʼE ko te hala pe ia ʼa naua moka matehi ia naua.

14 “ ‘Kapau ʼe ʼohoana he tagata mo he fafine pea ʼe toe momoe mo te faʼe ʼo tona ʼohoana, ʼe ko he aga fakalialia* ia.+ ʼE tonu anai ke matehi pea mo tutu ia natou,+ ke mole toe fai te aga fakalialia ʼaia ʼi te lotolotoiga ʼo koutou.

15 “ ‘Kapau ʼe momoe he tagata mo he manu, ʼe tonu anai ke matehi te tagata, pea ʼe kotou matehi anai te manu.+ 16 Kapau ʼe faiga he fafine ke momoe mo he manu,+ ʼe kotou matehi anai te fafine pea mo te manu. ʼEi, ʼe tonu ke matehi moʼoni ia te fafine ʼaia pea mo te manu. Pea ʼe ko te hala pe ia ʼa naua* moka matehi ia naua.

17 “ ‘Kapau ʼe momoe he tagata mo tona tokolua, ia te ʼofafine ʼo tana tamai peʼe ko te taʼahine ʼo tana faʼe, ʼe ko he meʼa fakaufiufi ia.+ ʼE tonu anai ke matehi ia naua ia muʼa ʼo te hahaʼi. Neʼe ina fakalainoaʼi tona tokolua. ʼE ina utu pe anai te ʼu fua ʼo tana hala.

18 “ ‘Kapau ʼe momoe he tagata mo he fafine kae alu tona fatu, neʼe mole nā fakaʼapaʼapa ki tona toto.+ ʼE tonu anai ke matehi ia naua.

19 “ ‘ ʼE mole tonu anai ke ke momoe mo te tehina ʼo tau faʼe peʼe ko te tokolua ʼo tau tamai, he ʼe ke fakalainoaʼi anai tou kaiga totonu.+ ʼE nā utu pe anai te ʼu fua ʼo tanā hala. 20 Ko he tagata ʼe momoe mo te ʼohoana ʼo te tehina ʼo tana tamai, ʼe ina fakalainoaʼi anai te tehina ʼo tana tamai.+ ʼE nā utu pe anai te ʼu fua ʼo tanā agahala. Pea ʼe nā mamate anai kae mole maʼu hanā fanau. 21 Kapau ʼe momoe he tagata mo te ʼohoana ʼo tona tehina, ʼe ko he meʼa fakalialia ia.+ Neʼe ina fakalainoaʼi tona tehina. Pea ʼe mole nā maʼu fanau anai.

22 “ ‘ ʼE tonu anai ke kotou taupau ʼaku lao fuli, mo ʼaku lekula fuli+ pea mo mulimuli ki ai,+ ke mole kapu koutou ʼi te fenua ʼae ʼe au taki anai koutou ki ai ke kotou nonofo ai.+ 23 ʼE mole tonu anai ke kotou mulimuli ki te ʼu aga ʼa te ʼu puleʼaga ʼae ʼe au kapu ʼi ʼokotou muʼa,+ he neʼe natou fai te ʼu meʼa fuli ʼaia, pea ʼe au fakalialia kia natou.+ 24 Ko te tupuʼaga la ʼaia ʼo taku ui atu: “ ʼE kotou maʼu anai tonatou fenua ʼae ʼe tafe ai te huʼa pipi mo te meli, ʼei ʼe au foaki moʼoni atu anai.+ Ko au ia Sehova tokotou ʼAtua, ʼae neʼe au tuku keheʼi koutou mai te hahaʼi fuli.”+ 25 ʼE tonu anai ke kotou fakakehekeheʼi te manu maʼa mo te manu heʼe maʼa pea mo te manulele heʼe maʼa mo te manulele maʼa.+ Pea ʼe mole tonu anai ke kotou* liliu ko he hahaʼi fakalialia ʼuhi ko he manu peʼe ko he manulele peʼe ko he faʼahiga manu pe ʼe totolo ʼi te kele. Neʼe au tuku keheʼi te ʼu manu ʼaia ke heʼe maʼa kia koutou.+ 26 ʼE tonu ke kotou maʼoniʼoni, koteʼuhi ko au ia Sehova tokotou ʼAtua, ʼe au maʼoniʼoni,+ pea ʼe au tuku keheʼi ia koutou mai te hahaʼi fuli ke kotou liliu ko taku hahaʼi.+

27 “ ‘Ko he tagata peʼe ko he fafine pe ʼe felogoi mo te kau mate peʼe faifakakikite fakatemonio, ʼe tonu anai ke matehi.+ ʼE tuki makaʼi anai e te hahaʼi ʼo kaku ki tona mate. ʼE ko tana pe ia hala moka matehi.’ ”

21 Neʼe toe ui e Sehova kia Moisese: “Palalau ki te ʼu foha ʼo Alone, ʼae ko te kau pelepitelo, pea ke ui kia natou: ‘ ʼE mole tonu ke heʼe maʼa he tahi ia koutou ʼuhi ko tana fāfā ki he tahi ʼo tana hahaʼi kua mate.+ 2 Kae ʼe feala ke heʼe maʼa mo kapau ko hona kaiga totonu, ohage ko tana faʼe, peʼe ko tana tamai, peʼe ko tona foha, peʼe ko tona ʼofafine, peʼe ko tona tehina, 3 peʼe ko tona tokolua, mo kapau neʼe kei nofo taupoʼou mo nofo io ia, pea neʼe heʼeki ʼohoana. 4 Kae ʼe mole gafua leva ke heʼe maʼa mo kapau ko he fafine neʼe ʼohoana mo he tagata ʼo tana hahaʼi. 5 ʼE mole tonu anai ke tele e te kau pelepitelo ʼonatou ʼulu,+ peʼe kosi ʼonatou kava ʼae ʼi te ʼu faʼahi, peʼe hifi ʼonatou sino.+ 6 ʼE tonu anai ke natou maʼoniʼoni ia muʼa ʼo tonatou ʼAtua,+ pea ʼe mole tonu anai ke natou moamoagaʼi te huafa ʼo tonatou ʼAtua,+ koteʼuhi ʼe natou momoli te ʼu molaga ʼae ʼe tutu maʼa Sehova, te pane* ʼo tonatou ʼAtua. Pea ʼe tonu anai ke natou maʼoniʼoni.+ 7 Pea ʼe mole tonu anai ke natou ʼohoana mo he fafine paomutu,+ peʼe ko he fafine ʼe mole kei nofo taupoʼou, peʼe ko he fafine kua mavete mo tona ʼohoana,+ koteʼuhi ʼe maʼoniʼoni te pelepitelo ia muʼa ʼo tona ʼAtua. 8 ʼE tonu anai ke maʼoniʼoni kia koutou te pelepitelo,+ hahaʼi ʼo Iselaele, koteʼuhi ʼe ina momoli te pane ʼo tokotou ʼAtua. ʼEi, ʼe tonu anai ke maʼoniʼoni kia koutou, koteʼuhi ko au ia Sehova, ʼae ʼe ina fakamaʼoniʼoniʼi koutou, ʼe au maʼoniʼoni.+

9 “ ‘Kapau ʼe heʼe maʼa he ʼofafine ʼo he pelepitelo ʼuhi ko tana faiaga, ʼe ko he meʼa fakaufiufi ia ki tana tamai. ʼE tonu anai ke matehi pea mo tutu.+

10 “ ‘Ko he tahi ʼi ʼona tehina, ʼae neʼe tākai tona ʼulu ʼaki te lolo taputapu+ pea neʼe fakanofo ko he pelepitelo* ke feala hana tui te ʼu teu fakapelepitelo,+ ʼe mole tonu anai ke ina tuku ke maveu tona ʼulu peʼe ke ina hae ʼona teu.+ 11 ʼE mole tonu anai ke fakaovi ki he tahi kua mate.+ ʼE mole gafua anai ke heʼe maʼa tatau aipe pe ʼe ko tana tamai peʼe ko tana faʼe. 12 ʼE mole tonu anai ke mavae ʼi te sagatualio, pea ʼe mole tonu anai ke ina moamoagaʼi te sagatualio ʼo tona ʼAtua,+ koteʼuhi neʼe tākai tona ʼulu ʼaki te lolo taputapu ʼo tona ʼAtua, ʼae ko te fakailoga ʼo te foaki ʼo ia ki te ʼAtua.+ Ko au ia Sehova.

13 “ ‘ ʼE tonu anai ke ʼohoana mo he fafine ʼe kei nofo taupoʼou.+ 14 ʼE mole ʼohoana anai mo he fafine vitua, peʼe ko he fafine neʼe mavete mo tona ʼohoana, peʼe ko he fafine ʼe mole kei nofo taupoʼou, peʼe ko he fafine paomutu, kae ʼe tonu anai ke ʼohoana mo he fafine ʼo tana hahaʼi ʼe kei nofo taupoʼou. 15 ʼE mole ina fakalainoaʼi anai tona hakoga ʼi te lotolotoiga ʼo tana hahaʼi,+ koteʼuhi ko au ia Sehova, ʼae ʼe ina fakamaʼoniʼoniʼi ia ia.’ ”

16 Neʼe hoko atu pe te palalau ʼa Sehova kia Moisese, ʼo ina ui: 17 “Ke ke ui kia Alone: ‘ ʼE mole feala anai ʼi he temi ke fakaovi he tagata ʼo tou hakoga ʼe ʼi ai hona mele ki te ʼaletale, ʼo momoli ai te pane ʼo tona ʼAtua. 18 ʼE mole feala anai ke fakaovi ki te ʼaletale he tagata pe ʼe ʼi ai hona mele: ko he tagata kivi, peʼe ketu, peʼe maʼimoa tona ihu, peʼe loa age hona vaʼe ʼi tona tahi vaʼe, peʼe loa age hona nima ʼi tona tahi nima, 19 peʼe fasi tona vaʼe peʼe ko tona nima, 20 peʼe tuʼa piko, peʼe leka,* peʼe mahaki ʼona mata, peʼe kama, peʼe ina maʼu he faʼahiga mahaki kili, peʼe kua maumauʼi tona koga tapu.+ 21 ʼE mole feala anai ke fakaovi he tagata ʼo te hakoga ʼo te pelepitelo ko Alone ʼae ʼe ʼi ai hona mele ki te ʼaletale, ʼo momoli ai te ʼu molaga ʼae ʼe tutu maʼa Sehova. ʼEi, ʼe mole feala anai ke fakaovi ki te ʼaletale ʼo momoli ai te pane ʼo tona ʼAtua, koteʼuhi ʼe ʼi ai tona mele. 22 ʼE feala anai ke ina kai te pane ʼo tona ʼAtua, ia te ʼu meʼa taputapu ʼaupito+ pea mo te ʼu meʼa taputapu.+ 23 Kae ʼe mole feala anai ke fakaovi ki te lito+ pea mo te ʼaletale,+ koteʼuhi ʼe ʼi ai tona mele. ʼE mole tonu anai ke ina moamoagaʼi toku sagatualio,+ koteʼuhi ko au ia Sehova, ʼae ʼe ina fakamaʼoniʼoniʼi ia natou.’ ”*+

24 Koia neʼe palalau ai ia Moisese kia Alone, mo ʼona foha pea mo te kau Iselaele fuli.

22 Neʼe toe palalau ia Sehova kia Moisese, ʼo ina ui: 2 “Ke ke ui kia Alone pea mo ʼona foha ke natou tokakaga ʼo fakaʼaogaʼi lelei* te ʼu meʼa taputapu ʼa te kau Iselaele, ʼae ʼe natou fakamaʼoniʼoniʼi maʼaku+ pea ke ʼaua naʼa natou moamoagaʼi ai toku huafa maʼoniʼoni.+ Ko au ia Sehova. 3 Pea ke ui kia natou: ‘Ko he tagata pe ʼo tou hakoga ʼe fakaovi kae ʼe heʼe maʼa, ki te ʼu meʼa taputapu ʼae neʼe fakamaʼoniʼoniʼi e te kau Iselaele maʼa Sehova, ʼe tonu anai ke matehi ʼi ʼoku muʼa.+ ʼE ko he lao ʼaia ʼo talu ai. Ko au ia Sehova. 4 ʼE mole feala anai ki he tagata ʼo te hakoga ʼo Alone ʼe kilia,+ peʼe mahaki he ʼe maligi he meʼa mai tona koga tapu,+ ke ina kai te ʼu meʼa taputapu ʼo aʼu ki tana liliu ʼo maʼa.+ ʼE toe tatau pe ki ʼae ʼe fāfā ki he tahi ʼe heʼe maʼa ʼuhi ko tana fāfā ki he tahi kua mate,+ peʼe ko he tagata ʼe alu ia ia tona huʼa vai,+ 5 peʼe ko he tagata ʼe fāfā ki te ʼu kiʼi manu heʼe maʼa ʼae ʼe maʼuʼuli fakapupuga,+ peʼe fāfā ki he tagata ʼe heʼe maʼa pea ʼe feala ke heʼe maʼa ai.+ 6 Ko ia* ʼae ʼe fāfā ki te ʼu meʼa ʼaia ʼe heʼe maʼa anai ʼo kaku ki te afiafi, pea ʼe mole feala anai ke ina kai he ʼu meʼa taputapu, kae ʼe tonu ia ke maʼanu.+ 7 Ka ʼosi to te laʼa ʼe maʼa anai, pea ʼe feala leva hana kai he ʼu meʼa taputapu koteʼuhi ʼe ko tana meʼa kai ʼaia.+ 8 ʼE mole feala anai ke ina kai he manu neʼe maʼu atu kua mate pe neʼe hae e he manu fekai koteʼuhi ʼe heʼe maʼa anai.+ Ko au ia Sehova.

9 “ ‘ ʼE tonu anai ke natou fakalogo ki ʼaku fakatotonu, ke mole natou agahala ai pea mo mamate, koteʼuhi neʼe natou moamoagaʼi te ʼu meʼa taputapu. Ko au ia Sehova, ʼae ʼe ina fakamaʼoniʼoniʼi ia natou.

10 “ ‘ ʼE mole feala anai ke kai e he tahi kehe* he ʼu meʼa taputapu.+ ʼE mole feala anai ke kai he ʼu meʼa taputapu e he matapule ʼe nofo ʼi te ʼapi ʼo he pelepitelo, peʼe ko he tagata gaue ʼe totogi. 11 Kae kapau ʼe totogi e he pelepitelo he tahi* ʼaki tana falā, ʼe feala anai ke kai ki ai. Pea ʼe toe feala pe anai ki te ʼu tagata kaugana ʼae neʼe tutupu ʼi tona loto fale ke natou kai tana meʼa kai.+ 12 Kapau ʼe ʼohoana he ʼofafine ʼo he pelepitelo mo he tagata ʼe mole ko he pelepitelo,* ʼe mole feala anai ke ina kai te ʼu meʼa ʼofa ʼae ko te ʼu meʼa taputapu. 13 Kae kapau kua mate te ʼohoana ʼo he ʼofafine ʼo he pelepitelo, peʼe kua mavete mo tona ʼohoana, kae mole maʼu hana fanau, pea ʼe toe liliu ki te ʼapi ʼo tana tamai ʼae neʼe maʼuli ai ʼi tana kei veliveli, ʼe feala anai ke ina kai te meʼa kai ʼa tana tamai.+ Kae ʼe mole feala anai ke kai ki ai he tahi kehe.*

14 “ ‘Kapau neʼe faihala he tagata ʼo ina kai he meʼa taputapu, ʼe tonu anai ke ina ʼaumai he tahi molaga ki te pelepitelo pea mo toe hilifaki ki ai te vahe tahi ki te nima.+ 15 Koia ʼe mole tonu anai ke moamoagaʼi e te kau pelepitelo te ʼu meʼa taputapu ʼae neʼe momoli e te kau Iselaele maʼa Sehova,+ 16 ke mole tauteaʼi ai te hahaʼi ʼuhi ko tanatou agahala ʼi tanatou kai ʼanatou meʼa taputapu. Ko au ia Sehova, ʼae ʼe ina fakamaʼoniʼoniʼi ia natou.’ ”

17 Pea neʼe toe ui e Sehova kia Moisese: 18 “Palalau kia Alone mo ʼona foha, pea mo te kau Iselaele fuli, pea ke ui kia natou: ‘Kapau ʼe momoli e he tagata Iselaele peʼe ko he tagata matapule ʼe nofo ʼi Iselaele he holokoseta+ kia Sehova moʼo fakahoko ʼana fakapapau peʼe ko he molaga ʼe ina fai ʼaki he lotolelei,+ 19 ʼe tonu anai ke ina foaki he vitulo ʼe heʼe mele+ neʼe ina toʼo mai tana faga manu, peʼe ko he ovi tagata kei mui ʼe heʼe mele, peʼe ko he tao tagata ʼe heʼe mele, ke ina maʼu ai te ʼofa ʼo te ʼAtua. 20 ʼE mole tonu anai ke kotou foaki he manu ʼe ʼi ai hona mele,+ he ʼe mole kotou maʼu ai anai te ʼofa ʼo te ʼAtua.

21 “ ‘Kapau ʼe momoli e he tagata he sakilifisio ʼo te tokalelei+ kia Sehova moʼo fakahoko ʼo he fakapapau, peʼe ko he molaga ʼe ina fai ʼaki he lotolelei, ʼe tonu anai ke ina foaki he manu tagata mai tana faga pipi, peʼe ko tana faga tao, peʼe ko tana faga ovi, ke ina maʼu ai te ʼofa ʼo te ʼAtua. ʼE mole tonu anai ke ʼi ai hona mele. 22 ʼE mole tonu anai ke kotou momoli he manu ʼe kivi, peʼe fasi hona vaʼe, peʼe lavea, peʼe ʼi ai hona foʼi tona, peʼe felea, peʼe ina maʼu he faʼahiga mahaki kili pe. ʼE mole tonu anai ke kotou momoli kia Sehova he manu feia ʼi te ʼaletale ʼo Sehova. 23 ʼE feala ke kotou momoli he vitulo, peʼe ko he ovi, ʼe loa age peʼe nounou age hona vaʼe ʼi tona tahi vaʼe, ohage ko he molaga ʼe fai ʼaki he lotolelei, kae ʼe mole tali anai mo kapau ko he fakapapau. 24 ʼE mole tonu anai ke kotou momoli kia Sehova he manu kua maumauʼi tona koga tapu peʼe kua lailai, peʼe ko he manu kua sele, pea ʼe mole tonu anai ke kotou momoli he ʼu manu feia ʼi tokotou fenua. 25 Pea ʼe mole tonu anai ke kotou tali he manu ʼi te ʼu manu ʼaia mai he matapule ke momoli ohage ko he molaga maʼa tokotou ʼAtua, koteʼuhi ʼe ʼi ai tonatou mele. ʼE mole tali anai te ʼu manu ʼaia pea ʼe mole kotou maʼu ai anai te ʼofa ʼo te ʼAtua.’ ”

26 Pea neʼe toe ui e Sehova kia Moisese: 27 “Ka tupu he vitulo, peʼe ko he ovi tagata, peʼe ko he tao, ʼe nofo anai mo tana faʼe lolotoga ʼaho ʼe fitu,+ kae ʼi te valu ʼaho ʼe feala leva ke momoli ohage ko he molaga, ʼei ko he molaga ʼe tutu maʼa Sehova. 28 Kapau ko he vitulo, peʼe ko he ovi, ʼe mole tonu anai ke matehi mo tona ʼuhi ʼi he ʼaho pe ʼe tahi.+

29 “Kapau ʼe kotou momoli kia Sehova he sakilifisio ʼo te fakafetaʼi,+ ʼe tonu anai ke kotou fai te sakilifisio ʼaia ke kotou maʼu ai tona ʼofa. 30 ʼE tonu anai ke kai ʼi te ʼaho pe ʼaia. ʼE mole tonu anai ke kotou tuku he meʼa ki apogipogi uhu.+ Ko au ia Sehova.

31 “ ʼE tonu anai ke kotou taupau ʼaku fakatotonu pea mo mulimuli ki ai.+ Ko au ia Sehova. 32 ʼE mole tonu anai ke kotou moamoagaʼi toku huafa maʼoniʼoni,+ kae ʼe tonu anai ke fakamaʼoniʼoniʼi au ʼi te lotolotoiga ʼo te kau Iselaele.+ Ko au ia Sehova, ʼae ʼe ina fakamaʼoniʼoniʼi ia koutou,+ 33 pea neʼe ina fakamavae koutou mai te fenua ʼo Esipito, ke au liliu ai ko tokotou ʼAtua.+ Ko au ia Sehova.”

23 Neʼe toe ui e Sehova kia Moisese: 2 “Palalau ki te kau Iselaele pea ke ui kia natou: ‘Ko te ʼu ʼaho lalahi+ ʼo Sehova ʼae ʼe tonu anai ke kotou tala+ ʼe ko he ʼu fakatahi taputapu. Koʼeni ʼoku ʼaho lalahi:

3 “ ‘ ʼE feala anai ke fai he ʼu gaue lolotoga ʼaho ʼe ono, kae ko te fitu ʼaho, ʼe ko he sapato, ko he ʼaho makehe ke malolo ai,+ pea ʼe fai ai anai he fakatahi taputapu. ʼE mole tonu anai ke kotou fai he faʼahiga gaue pe. ʼE ko he sapato kia Sehova ʼi te ʼu faʼahi fuli ʼae ka kotou nonofo ai.+

4 “ ‘Koʼeni te ʼu ʼaho lalahi ʼo Sehova, ko he ʼu fakatahi taputapu ʼe tonu anai ke kotou tala ʼi te temi ʼae kua fakatuʼutuʼu ki ai: 5 ʼI te ʼaho 14 ʼo te ʼuluaki mahina,+ ʼi te ʼosi to ʼo te laʼa,* ʼe fai ai te Pasikate+ maʼa Sehova.

6 “ ‘ ʼI te ʼaho 15 ʼo te mahina ʼaia, ʼe fai ai te ʼAho Lahi ʼo Te ʼu Pane Hala Fakatupu maʼa Sehova.+ ʼE tonu anai ke kotou kai he ʼu pane hala fakatupu lolotoga ʼaho ʼe fitu.+ 7 ʼI te ʼuluaki ʼaho, ʼe kotou fai anai he fakatahi taputapu.+ ʼE mole tonu anai ke kotou fai he faʼahiga gaue kinakina pe. 8 Kae ʼe kotou momoli anai he ʼu molaga ʼe tutu maʼa Sehova lolotoga ʼaho ʼe fitu. ʼE kotou fai anai he fakatahi taputapu ʼi te fitu ʼaho. ʼE mole tonu anai ke kotou fai he faʼahiga gaue kinakina pe.’ ”

9 Neʼe hoko atu pe te palalau ʼa Sehova kia Moisese, ʼo ina ui: 10 “Palalau ki te kau Iselaele pea ke ui kia natou: ‘Ka kotou hu ki te fenua ʼae ʼe au foaki atu kia koutou pea ka kotou tanaki te taʼukai, ʼe tonu anai ke kotou ʼave he fuhiga olose ʼo te ʼu ʼuluaki fua+ ʼo te taʼukai ki te pelepitelo.+ 11 Pea ʼe ina lu anai te fuhiga olose ia muʼa ʼo Sehova ke kotou maʼu ai tona ʼofa. ʼE tonu anai ke ina lu ʼi te ʼaho ʼae ʼe hoa mai ki te Sapato. 12 Ko te ʼaho ʼae ʼe ina lu ai te fuhiga olose maʼa koutou, ʼe tonu anai ke kotou momoli he ovi tagata kei mui ʼe taʼu tahi mo heʼe mele, ohage ko he holokoseta maʼa Sehova. 13 Pea ʼe kotou toe ʼave anai mo he molaga meʼa kai, ko te vahe lua ki te hogofulu ʼo he efa* falena lelei ʼe tahi neʼe natu ʼaki te lolo, ke momoli ohage ko he molaga ʼe tutu maʼa Sehova, pea ʼe ko he ʼaele lelei kia te ia. Pea ʼe kotou toe ʼave anai mo he molaga vino ʼe ko te vahe tahi ki te fa ʼo he hine* vino ʼe tahi. 14 ʼE mole tonu anai ke kotou kai ki he faʼahiga pane pe, peʼe ko he olose neʼe tunu, peʼe ko he olose foʼou ʼo aʼu ki te ʼaho ʼae ʼe kotou momoli ai te molaga ki tokotou ʼAtua. ʼE ko he lao ʼaia mai he taʼiake ki he tahi taʼiake, ʼi te ʼu faʼahi fuli ʼae ka kotou nonofo ai.

15 “ ‘ ʼE tonu anai ke kotou kamata lau te ʼu vahaʼa ʼe fitu ʼi te ʼaho ʼae ʼe hoa mai ki te Sapato, ia te ʼaho ʼae ʼe kotou ʼaumai ai te fuhiga olose ʼo te molaga ʼae ʼe lu.+ ʼE ko vahaʼa katoa anai ʼe fitu. 16 ʼE tonu anai ke kotou lau ʼaho ʼe 50+ ʼo aʼu ki te ʼaho ʼae ʼe hoa mai ki te fitu Sapato, pea ʼe tonu anai ke kotou momoli he molaga meʼa kai foʼou maʼa Sehova.+ 17 ʼE kotou ʼaumai anai he ʼu foʼi pane ʼe lua mai ʼokotou nofoʼaga ke momoli ohage ko he molaga ʼe lu. ʼE ko te vahe lua ki te hogofulu ʼo he efa* falena lelei ʼe tahi ʼae ka fai ʼaki te ʼu foʼi pane, pea ʼe tonu anai ke natu ʼaki he meʼa fakatupu.+ ʼE momoli anai kia Sehova te ʼu ʼuluaki fua ʼaia ʼae kua matutuʼa.+ 18 ʼE kotou momoli fakatahi anai te ʼu pane mo he ʼu akeno ʼe fitu ʼe heʼe mele mo taki taʼu tahi, mo he vitulo kei mui ʼe tahi pea mo he ʼu ovi tagata ʼe lua.+ ʼE kotou momoli anai te ʼu manu ʼaia ohage ko he holokoseta kia Sehova, pea ʼe kotou momoli fakatahi anai mo te molaga meʼa kai pea mo te ʼu molaga vino. ʼE ko he molaga ʼe tutu maʼa Sehova, pea ʼe ko he ʼaele lelei kia te ia. 19 Pea ʼe tonu anai ke kotou momoli he tao kei mui ʼe tahi ohage ko he molaga ʼo te agahala,+ pea mo he ʼu akeno tagata ʼe lua, ʼe taki taʼu tahi, ohage ko he sakilifisio ʼo te tokalelei.+ 20 ʼE lu anai e te pelepitelo te ʼu akeno ʼaia ʼe lua pea mo te ʼu foʼi pane ʼae neʼe fai ʼaki te ʼu ʼuluaki fua ʼae kua matutuʼa, ohage ko he molaga ʼe lu ia muʼa ʼo Sehova. ʼE ko he ʼu meʼa taputapu anai kia Sehova pea ʼe maʼu anai e te pelepitelo te ʼu meʼa ʼaia.+ 21 ʼI te ʼaho ʼaia, ʼe kotou tala anai+ he fakatahi taputapu maʼa koutou. ʼE mole feala anai ke kotou fai he faʼahiga gaue kinakina pe. ʼE ko he lao ʼaia mai he taʼiake ki he tahi taʼiake, ʼi te ʼu faʼahi fuli ʼae ka kotou nonofo ai.

22 “ ‘Pea ka kotou tanaki te taʼukai ʼo tokotou fenua, ʼe mole tonu anai ke ke tanaki fuli te ʼu fua ʼae ʼi te ʼu tuʼakoi ʼo tau gaueʼaga pea mo tae te meʼa ʼae ʼe toe ʼi tau taʼukai.+ ʼE ke tuku anai te faʼahi ʼaia maʼa te tagata masiva*+ pea mo te matapule.+ Ko au ia Sehova tokotou ʼAtua.’ ”

23 Neʼe hoko atu pe te palalau ʼa Sehova kia Moisese, ʼo ina ui: 24 “Ke ke ui ki te kau Iselaele: ‘ ʼI te ʼuluaki ʼaho ʼo te fitu mahina, ʼe ko he ʼaho ke kotou malolo ai. ʼE ko he ʼaho fakamanatu ʼe pupuhi ai te fakatagi pupuhi,+ pea ʼe ko he fakatahi taputapu anai. 25 ʼE mole feala anai ke kotou fai he faʼahiga gaue kinakina pe, kae ʼe kotou momoli anai he molaga ʼe tutu maʼa Sehova.’ ”

26 Neʼe toe ui e Sehova kia Moisese: 27 “Ko te ʼaho hogofulu ʼo te fitu mahina ʼaia, ʼe ko te ʼAho ʼo Te ʼu Faifakalelei.+ ʼE kotou fai anai he fakatahi taputapu, pea ʼe tonu anai ke kotou fakamamahiʼi ia koutou*+ pea mo momoli he molaga ʼe tutu maʼa Sehova. 28 ʼE mole tonu anai ke kotou fai he faʼahiga gaue pe ʼi te ʼaho makehe ʼaia, koteʼuhi ʼe ko he ʼaho ʼo te ʼu faifakalelei ke kotou maʼu ai te fakamolemole ki ʼakotou agahala+ ia muʼa ʼo Sehova tokotou ʼAtua. 29 Ko ʼae ʼe mole ina fakamamahiʼi ia ia totonu* ʼi te ʼaho ʼaia, ʼe tonu anai ke matehi.+ 30 Pea ʼe au matehi anai he tahi* pe ʼe ina fai he faʼahiga gaue ʼi te ʼaho ʼaia. 31 ʼE mole tonu anai ke kotou fai he faʼahiga gaue pe. ʼE ko he lao ʼaia mai he taʼiake ki he tahi taʼiake, ʼi te ʼu faʼahi fuli ʼae ka kotou nonofo ai. 32 ʼE ko he sapato ʼaia maʼa koutou ke kotou malolo ai, pea ʼe kotou fakamamahiʼi anai ia koutou*+ ʼi te ʼaho hiva ʼo te mahina, ʼi te afiafi. ʼE tonu anai ke kotou fai takotou sapato mai te afiafi ʼaia ʼo kaku ki te afiafi ʼo te ʼaho ʼae ka hoa mai.”

33 Neʼe toe ui e Sehova kia Moisese: 34 “Ke ke ui ki te kau Iselaele: ‘Ko te ʼaho 15 ʼo te fitu mahina ʼaia ʼe ko te ʼAho Lahi ʼo Te ʼu Pola,* ʼe fai anai lolotoga ʼaho ʼe fitu maʼa Sehova.+ 35 ʼE kotou fai anai he fakatahi taputapu ʼi te ʼuluaki ʼaho, pea ʼe mole tonu ke kotou fai ai he faʼahiga gaue kinakina pe. 36 ʼE kotou momoli anai he ʼu molaga ʼe tutu maʼa Sehova lolotoga ʼaho ʼe fitu. Pea ʼi te valu ʼaho, ʼe kotou fai anai he fakatahi taputapu,+ pea ʼe kotou momoli anai he molaga ʼe tutu maʼa Sehova. ʼEi, ʼe ko he fakatahi taputapu anai. ʼE mole feala ke kotou fai ai he faʼahiga gaue kinakina pe.

37 “ ‘ ʼE ko te ʼu ʼaho lalahi ʼaia+ ʼo Sehova ʼae ʼe tonu anai ke kotou tala ohage ko he ʼu fakatahi taputapu,+ ke momoli ai te ʼu molaga ʼaeni ʼe tutu maʼa Sehova: ko te holokoseta,+ mo te molaga meʼa kai,+ pea mo te ʼu molaga vino,+ ʼo mulimuli pe ki te meʼa ʼae ʼe tonu ke momoli ʼi te ʼaho takitahi. 38 Pea ʼe hilifaki anai te ʼu molaga ʼaia ki te ʼu molaga ʼae ʼe momoli ʼi te ʼu sapato ʼo Sehova,+ mo ʼakotou meʼa ʼofa,+ mo ʼakotou molaga ʼae neʼe kotou fai ʼo ʼuhiga mo ni fakapapau,+ pea mo te ʼu molaga ʼae neʼe kotou fai ʼaki he lotolelei.+ ʼE tonu anai ke kotou foaki kia Sehova. 39 Kae ʼi te ʼaho 15 ʼo te fitu mahina, ʼe kotou fai anai te ʼaho lahi ʼo Sehova lolotoga ʼaho ʼe fitu, kae kua ʼosi tanaki te taʼukai ʼo te fenua.+ Ko te ʼuluaki ʼaho ʼe ko he ʼaho malolo anai, pea ko te valu ʼaho ʼe ko he tahi ʼaho malolo ʼaia.+ 40 ʼI te ʼuluaki ʼaho, ʼe kotou toʼo anai he ʼu fua ʼo te ʼu fuʼu ʼakau matalelei, mo he ʼu lau ʼo te ʼu fuʼu palema,+ mo he ʼu vaʼa ʼakau ʼe failau, mo he ʼu fuʼu ʼakau ʼo te vai tafe.* Pea ʼe kotou fakafiafia anai+ ia muʼa ʼo Sehova, tokotou ʼAtua lolotoga ʼaho ʼe fitu.+ 41 ʼE kotou fai anai te ʼaho lahi ʼaia maʼa Sehova lolotoga ʼaho ʼe fitu ʼi te taʼu fuli,+ pea ʼe tonu anai ke kotou fai ʼi te fitu mahina. ʼE ko he lao ʼaia mai he taʼiake ki he tahi taʼiake. 42 ʼE kotou nonofo anai ʼi te ʼu pola lolotoga ʼaho ʼe fitu.+ Pea ko natou fuli ʼae neʼe tutupu ʼi Iselaele, ʼe tonu anai ke natou nonofo ʼi te ʼu pola, 43 ke iloʼi ai e te ʼu taʼiake ki ʼamuli+ neʼe au fakanofo te kau Iselaele ʼi he ʼu pola, ʼi taku fakamavae natou mai Esipito.+ Ko au ia Sehova tokotou ʼAtua.’ ”

44 Koia neʼe palalau ai ia Moisese ki te kau Iselaele ʼo ʼuhiga mo te ʼu ʼaho lalahi ʼo Sehova.

24 Neʼe hoko atu pe te palalau ʼa Sehova kia Moisese, ʼo ina ui: 2 “Fakatotonu ki te kau Iselaele ke natou ʼaumai kia koe he lolo oliveto maʼa, ke feala ke ulo tuʼumaʼu pe te ʼu malama.+ 3 ʼI te fale la ʼo te fono, ʼi te faʼahi ʼae ʼi te muʼa lito ʼo te Fakamoʼoni,* ʼe tonu anai ke tokaga ia Alone ke ulo tuʼumaʼu pe te ʼu malama mai te afiafi ʼo kaku ki te uhu ia muʼa ʼo Sehova. ʼE ko he lao ʼaia mai he taʼiake ki he tahi taʼiake, ʼo talu ai. 4 ʼE tonu anai ke ina tuku tuʼumaʼu te ʼu malama ki te tuʼulaga malama+ ʼae neʼe fai ʼaki te aulo maʼa, ia muʼa ʼo Sehova.

5 “ ʼE ke toʼo anai he falena lelei ʼo fai ʼaki he ʼu pane takafuafua* ʼe 12. ʼE ke fai anai te ʼu pane takitahi ʼaia ʼaki he vahe lua ki te hogofulu ʼo he efa* falena lelei ʼe tahi. 6 ʼE ke hili fakatuʼuga anai te ʼu pane ʼi te laupapa ʼae neʼe fai ʼaki te aulo maʼa, ia muʼa ʼo Sehova,+ pea ʼe ke fai anai he ʼu tuʼuga ʼe lua, ʼo taki ono te foʼi pane.+ 7 ʼE ke ʼai anai te iseso hina maʼa ki te tuʼuga pane takitahi, pea ʼe momoli anai te iseso ʼaia moʼo fetogi ʼaki* te ʼu pane,+ pea ʼe ko he molaga ʼe tutu maʼa Sehova. 8 ʼI te Sapato fuli, ʼe tuku tuʼumaʼu anai te ʼu pane ia muʼa ʼo Sehova.+ ʼE ko he fuakava mo te kau Iselaele ʼo talu ai. 9 ʼE maʼu anai e Alone mo ʼona foha te ʼu pane,+ pea ʼe natou kai anai ʼi he koga meʼa taputapu,+ koteʼuhi ʼe ko he meʼa taputapu ʼaupito maʼa te pelepitelo pea ʼe toʼo mai ʼi te ʼu molaga ʼae ʼe tutu maʼa Sehova. ʼE ko he lao ʼaia ʼo talu ai.”

10 Neʼe ʼi ai he tama ʼa he fafine Iselaele mo he tagata Esipito ʼi te lotolotoiga ʼo te kau Iselaele.+ Pea neʼe kē te tama mo he tagata Iselaele ʼi te nofoʼaga. 11 Neʼe patapata te tama ʼa te fafine Iselaele ki te Huafa* pea mo laukovi ki ai.+ Koia neʼe ʼave ai te tama kia Moisese.+ Neʼe higoa tana faʼe ko Selomita, te ʼofafine ʼo Tipeli mai te telepi ʼo Tane. 12 Neʼe puke leva ia ia mo leʼoleʼo ʼo kaku ki te fakaha e Sehova tana tonu.+

13 Pea neʼe ui e Sehova kia Moisese: 14 “ ʼAve ia ia ʼae neʼe laukovi ki toku huafa ki tuʼa atu ʼo te nofoʼaga. Pea ko natou fuli ʼae neʼe logo ki tana laukoviʼi toku huafa ʼe tonu anai ke natou hili ʼonatou nima ki tona ʼulu, pea ʼe tonu leva ke tuki makaʼi ia ia e te hahaʼi fuli.+ 15 Pea ke ui ki te kau Iselaele: ‘Kapau ʼe laukovi he tagata ki te ʼAtua, ʼe ina utu pe anai te ʼu fua ʼo tana agahala. 16 Koia ko ʼae ʼe patapata ki te huafa ʼo Sehova ʼe tonu anai ke matehi.+ ʼE tonu anai ke tuki makaʼi e te hahaʼi fuli. Ko he matapule pe ʼe nofo ʼi te lotolotoiga ʼo koutou ʼe patapata ki te Huafa, ʼe tonu anai ke matehi ohage pe ko he tagata Iselaele.

17 “ ‘Kapau ʼe matehi e he tagata he tahi,* ʼe tonu anai ke matehi.+ 18 Ko ʼae ʼe ina ta pea mo matehi he manu* lalata, ʼe tonu anai ke ina fetogi he maʼuli ʼaki he maʼuli.* 19 Kapau ʼe fakalavea e he tagata ia he tahi tagata, pea ʼe toe fai anai ki ai te meʼa ʼae neʼe ina fai.+ 20 ʼE fetogi anai he hui ʼaki he hui, he mata ʼaki he mata, he nifo ʼaki he nifo, pea ʼe toe fai anai ki ai te meʼa ʼae neʼe ina fai.+ 21 Ko te tagata ʼae ʼe ina ta pea mo matehi he manu ʼe ina totogi anai,+ kae ko ʼae ʼe ina ta pea mo matehi he tagata ʼe tonu anai ia ke matehi.+

22 “ ‘ ʼE ko he lao pe anai ʼe tahi ʼe fai tatau ki te matapule ʼae ʼe nofo ʼi te lotolotoiga ʼo koutou pea mo te tagata Iselaele,+ koteʼuhi ko au ia Sehova tokotou ʼAtua.’ ”

23 Neʼe palalau leva ia Moisese ki te kau Iselaele, pea neʼe natou ʼave ia ia ʼae neʼe patapata ki te huafa ʼo te ʼAtua ki tuʼa atu ʼo te nofoʼaga, pea neʼe natou tuki makaʼi ia ia.+ Koia neʼe fai ai e te kau Iselaele te ʼu meʼa fuli ʼae neʼe fakatotonu e Sehova kia Moisese.

25 Neʼe toe palalau ia Sehova kia Moisese ʼi te Moʼuga ʼo Sinai, ʼo ina ui: 2 “Palalau ki te kau Iselaele pea ke ui kia natou: ‘Ka kotou hu anai ki te fenua ʼae ʼe au foaki atu kia koutou,+ ʼe mole kotou gaueʼi anai te kele koteʼuhi ʼe ko he sapato anai kia Sehova.+ 3 ʼE ke nunusi anai tau pulapula ʼi tau gaueʼaga ia taʼu ʼe ono, pea ʼe ke tuʼusi anai te ʼu vaʼa ʼo tau gaueʼaga vite ia taʼu ʼe ono, pea ʼe ke tanaki anai te ʼu fua ʼo tau gaueʼaga.+ 4 Kae ko te fitu taʼu, ʼe ko he sapato ʼaia maʼa Sehova, pea ʼe tuku anai ke malolo te kele. ʼE mole tonu anai ke ke nunusi tau pulapula ʼi tau gaueʼaga peʼe ke tuʼusi te ʼu vaʼa ʼo tau gaueʼaga vite. 5 ʼE mole tonu anai ke ke tuʼusi te meʼa ʼae neʼe homo ake ’i te ʼu pulapula ʼae neʼe maʼofa ʼi te temi ʼo te taʼukai, pea ʼe mole tonu anai ke ke toli te ʼu fuaʼi vite ʼo tau gaueʼaga vite ʼae neʼe mole tuʼusi ʼona vaʼa. ʼE tonu anai ke malolo te kele ʼi he taʼu katoa. 6 ʼE feala anai ke kotou kai te ʼu fua ʼo te ʼu fuʼu ʼakau ʼae neʼe homo ake ʼi te fenua lolotoga tona sapato, ia koe, mo ʼau tagata mo fafine kaugana, mo tau tagata gaue ʼae ʼe totogi, pea mo te ʼu matapule ʼae ʼe nonofo io koe, 7 ʼo toe feia pe mo te manu lalata pea mo te manu ʼo te vao ʼo tou fenua. ʼE feala anai ke kai te ʼu fua fuli ʼo te ʼu fuʼu ʼakau ʼae ʼe homo ake ʼi te fenua.

8 “ ‘ ʼE ke lau anai te ʼu taʼu sapato ʼe fitu, ʼe liuga fitu te ʼu taʼu ʼe fitu, pea ʼe fakatahiʼi age ko taʼu ʼe 49. 9 ʼE ke pupuhi anai te fakatagi pupuhi ʼi te ʼaho hogofulu ʼo te fitu mahina. Pea ʼi te ʼAho ʼo Te ʼu Faifakalelei,+ ʼe tonu anai ke pupuhi te fakatagi pupuhi ʼi te fenua katoa. 10 ʼE tonu anai ke kotou fakamaʼoniʼoniʼi te 50 taʼu pea mo tala te ʼateaina ki te hahaʼi fuli ʼo te fenua.+ Pea ʼe liliu anai ko he Supileo* maʼa koutou. ʼE kotou toe maʼu anai tokotou kele ʼae neʼe kotou fakatau pea ko ʼae neʼe fakatau ohage ko he kaugana ʼe toe liliu anai ki tona famili.+ 11 Ko te 50 taʼu ʼaia ʼe liliu anai ko he Supileo maʼa koutou. ʼE mole tonu anai ke kotou nunusi takotou pulapula ʼi takotou gaueʼaga peʼe tuʼusi te meʼa ʼae neʼe homo ake ʼi te ʼu pulapula ʼae neʼe maʼofa. Pea ʼe mole tonu anai ke kotou toli te ʼu fuaʼi vite ʼo takotou gaueʼaga vite ʼae neʼe mole tuʼusi ʼona vaʼa.+ 12 Koteʼuhi ʼe ko he Supileo. Pea ʼe tonu anai ke maʼoniʼoni kia koutou. Kae ʼe feala pe anai hakotou kai ki te ʼu fua fuli ʼo te ʼu fuʼu ʼakau ʼae ʼe homo feia pe ʼi te fenua.+

13 “ ‘ ʼI te taʼu ʼaia ʼo te Supileo, ʼe kotou toe maʼu anai tokotou kele.+ 14 Kapau ʼe kotou totogi peʼe fakatau he meʼa ki tokotou tatau, ʼaua naʼa kotou fekakaʼaki ia koutou.+ 15 ʼE ke totogi anai ki tou tatau, ʼo ke lau te ʼu taʼu ʼae kua fakalaka mai te Supileo fakaʼosi, pea ʼe ina fakatau atu anai ʼo mulimuli ki te ʼu taʼu ʼae kei toe ke tanaki ai te taʼukai.+ 16 Kapau ʼe lahi te ʼu taʼu ʼae kei toe, ʼe feala anai ke ina hiki te totogi, pea kapau ʼe veliveli te ʼu taʼu ʼae kei toe, ʼe tonu anai ke ina fakahifo te totogi, koteʼuhi ʼe ina fakatau atu anai te lahi ʼo te ʼu taʼukai ʼae ka maʼu. 17 ʼE mole tonu anai ke kakaʼi e he tahi ia koutou tona tatau,+ kae ʼe tonu ke kotou manavasiʼi ki tokotou ʼAtua,+ koteʼuhi ko au ia Sehova tokotou ʼAtua.+ 18 Kapau ʼe kotou mulimuli ki ʼaku lao pea mo taupau ʼaku lekula, ʼe kotou maʼuli fimalie anai ʼi te fenua.+ 19 ʼE toe maʼuli lelei anai te kele,+ pea ʼe kotou kai anai ʼona fua ʼo kaku ki takotou makokona, pea ʼe kotou maʼuli fimalie anai.+

20 “ ‘Kae kapau ʼe kotou feuiʼaki: “Kotea anai ka tou kai ʼi te fitu taʼu koteʼuhi neʼe mole tou nunusi te pulapula peʼe tanaki te taʼukai?”+ 21 ʼe tonu ke kotou iloʼi ʼe au tuku atu anai taku tapuakina ʼi te ono taʼu, pea ʼe maʼuli lelei anai te kele ʼo maʼu ai he taʼukai feʼauga kia taʼu ʼe tolu.+ 22 Pea ʼi te valu taʼu, ʼe kotou nunusi anai te pulapula ʼi ʼakotou gaueʼaga pea ʼe kotou kai anai te taʼukai ʼafea ʼo aʼu ki te hiva taʼu. ʼE kotou kai anai te taʼukai ʼafeā ʼo aʼu ki te hoko mai ʼo te taʼukai foʼou.

23 “ ‘ ʼE mole fakatau anai te kele ʼo talu ai,+ koteʼuhi ʼe ʼaʼaku te kele.+ Kia au ko koutou ko ni matapule pea mo ni hahaʼi mai he tahi age fenua.+ 24 Kapau ʼe fakatau e he tahi tona kele, ʼi te fenua katoa ʼae ka kotou maʼu, ʼe feala anai ke ina toe totogi.

25 “ ‘Kapau ʼe liliu tou tehina ʼo masiva pea ʼe tonu ke ina fakatau he koga ʼo tona kele, ʼe tonu anai ke haʼu hona kaiga totonu ʼo toe totogi te kele ʼae neʼe fakatau e tona tehina.+ 26 Kapau ʼe mole maʼu e he tahi hona kaiga ke ina toe totogi tona kele, kae kua liliu ʼo koloaʼia pea ʼe ina lava totogi, 27 ʼe ina fakafuafua anai te lahi ʼo te totogi ʼo mulimuli ki te ʼu taʼu ʼae kua fakalaka mai te taʼu ʼae neʼe ina fakatau ai, pea ʼe ina liufaki anai te totogi ʼo te ʼu taʼu ʼae kei toe. Pea ʼe ina toe maʼu anai tona kele.+

28 “ ‘Kae kapau ʼe mole ina lava totogi, ʼe maʼu anai te kele e te tagata ʼae neʼe ina totogi ʼo aʼu ki te taʼu ʼo te Supileo.+ Pea ʼe toe liufaki age anai ʼi te Supileo, ʼei ʼe ina toe maʼu anai tona kele.+

29 “ ‘Kapau ʼe fakatau e he tagata he ʼapi ʼi he kolo ʼe ʼa kaupa, ʼe tuku age anai he taʼu katoa ki ai ke feala hana toe totogi tona ʼapi ʼo kamata mai te ʼaho ʼae neʼe ina fakatau ai. ʼE ko he taʼu katoa pe anai ʼe feala ke ina fai ai te faʼahi ʼaia.+ 30 Kae kapau ʼe mole feala ke ina totogi ʼi te taʼu ʼaia, ʼe maʼu ʼosi anai te ʼapi ʼae ʼe tuʼu ʼi he kolo ʼe ʼa kaupa e ia ʼae neʼe ina totogi, mai he taʼiake ki he tahi taʼiake. ʼE mole tonu anai ke toe liufaki age ʼi te Supileo. 31 Kae ko te ʼu ʼapi ʼo te ʼu kolo liliki ʼae ʼe mole ʼa kaupa ʼe feala ia ke ui ʼe tuʼu ʼi te ʼu kele ʼo te fenua. ʼE feala anai ke toe totogi, pea ʼe toe liufaki anai ʼi te Supileo.

32 “ ‘Kae ʼe feala anai ke toe totogi e te kau Levite ʼonatou ʼapi, ʼae ʼe tuʼu ʼi ʼonatou kolo,+ ʼo talu ai. 33 Kapau ʼe mole toe totogi he meʼa ʼa te kau Levite, ʼe toe liufaki age anai ʼi te Supileo te ʼapi ʼae neʼe fakatau ʼi ʼonatou kolo,+ koteʼuhi ʼe maʼu e te kau Levite te ʼu ʼapi ʼae ʼi ʼonatou kolo, ʼi te fenua ʼo Iselaele.+ 34 Kae ʼe mole feala anai ke fakatau te ʼu koga meʼa lunaʼia+ ʼae ʼi te ʼu tafaʼaki ʼo ʼonatou kolo, koteʼuhi ʼe natou maʼu anai ʼo talu ai.

35 “ ‘Kapau ʼe liliu tou tehina ʼae ʼe nofo ovi kio koe ʼo masiva pea ʼe mole feala ke tokaga ki te ʼu meʼa ʼae ʼe ʼaoga ki ai, ʼe tonu anai ke ke tokoni ki ai+ ohage pe ko hau tokoni ki he matapule peʼe ko he tahi mai he tahi age fenua,+ ke maʼuli ai. 36 ʼAua naʼa ke kakaʼi ia ia ke ke maʼu ai hau falā.+ ʼE tonu anai ke ke manavasiʼi ki tou ʼAtua,+ pea ʼe maʼuli ai anai tou tehina fakatahi mo koutou. 37 ʼE mole tonu anai ke ke foaki age he falā pea mo fakamaʼua age ke ina liufaki atu mo hona tupu,+ peʼe ke foaki age hana meʼa kai ke ke maʼu ai hau falā. 38 Ko au ia Sehova tokotou ʼAtua, ʼae neʼe ina fakamavae koutou mai te fenua ʼo Esipito+ ke au foaki atu te fenua ʼo Kanaane, ke au liliu ai ko tokotou ʼAtua.+

39 “ ‘Kapau ʼe liliu tou tehina ʼae ʼe nofo ovi kio koe ʼo masiva pea ʼe tonu anai ke ina fakatau ia ia kia koe,+ ʼaua naʼa ke fakagaueʼi ohage ko he sinifu.+ 40 ʼE tonu anai ke ke tokaga ki ai ohage ko he tagata gaue ʼe totogi,+ peʼe ko he tahi mai he tahi age fenua. ʼE tonu anai ke gaue kia koe ʼo aʼu ki te taʼu ʼo te Supileo. 41 Pea ʼe mavae anai ia ia mai io koe mo ʼana fanau,* pea ʼe toe liliu anai ki tona famili. Pea ʼe ina toe maʼu anai te kele ʼo ʼana kui.+ 42 Koteʼuhi ko te kau Iselaele ko ʼaku kaugana ʼae neʼe au fakamavae mai te fenua ʼo Esipito.+ ʼE mole natou fakatau anai ia natou ohage ko he fakatau ʼo he sinifu. 43 ʼE mole tonu anai ke ke gaohi koviʼi ia ia,+ kae ʼe tonu anai ke ke manavasiʼi ki tou ʼAtua.+ 44 ʼE ke filifili anai ʼau tagata mo fafine kaugana ʼi te ʼu puleʼaga ʼae ʼi ʼokotou tafaʼaki, ʼei ʼe feala anai ke kotou totogi he tagata kaugana peʼe ko he fafine kaugana ʼi te ʼu puleʼaga ʼaia. 45 ʼE feala ke kotou toe totogi ʼakotou kaugana mai te ʼu foha ʼo te ʼu matapule ʼae ʼe nonofo io koutou,+ pea mo ʼonatou famili ʼae neʼe tutupu ʼi tokotou fenua. Pea ʼe liliu anai ko hakotou hahaʼi. 46 ʼE feala anai ke kotou tuku ki ʼokotou foha ohage ko he tofiʼa ke natou maʼu ʼo talu ai. ʼE feala anai ke kotou fakagaueʼi, kae ʼe mole tonu anai ke kotou gaohi koviʼi ʼokotou tehina Iselaele.+

47 “ ‘Kapau ʼe liliu he matapule peʼe ko he tahi mai he tahi age fenua ʼo koloaʼia ʼi te lotolotoiga ʼo koutou, kae masiva tou tehina ʼo fakatau leva ia ia ki he matapule peʼe ko he tahi mai he tahi age fenua ʼi te lotolotoiga ʼo koutou, peʼe ko he tahi ʼo te famili ʼo te matapule, 48 ʼe toe feala pe anai ke toe totogi ia ia. ʼE feala anai ki he tahi ʼo ʼona tehina ke ina toe totogi ia ia,+ 49 peʼe ko he tehina ʼo tana tamai, peʼe ko hona tehina mataʼi tama totonu, ʼei ʼe toe feala anai ke toe totogi ia ia e hona kaiga totonu, peʼe ko he tahi ʼo tona famili.

“ ‘Peʼe kapau kua liliu leva ʼo koloaʼia, ʼe feala anai ke ina toe totogi ia ia totonu.+ 50 ʼE tonu anai ke ina lau te temi mo ia ʼae neʼe ina totogi ia ia, mai te taʼu ʼae neʼe ina fakatau ai ia ia ʼo aʼu ki te taʼu ʼo te Supileo,+ pea ko te tau ’o te paʼaga ʼo tona fakatau ʼe mulimuli pe anai ki te ʼu taʼu ʼae kei toe.+ Lolotoga te temi ʼaia, ʼe fakafuafua anai te totogi ʼo ʼona ʼaho gaue ki te totogi ʼo he tagata gaue.+ 51 Kapau ʼe lahi te ʼu taʼu ʼae kei toe, ʼe ina huʼi anai tona totogi, ʼo mulimuli pe ki te ʼu taʼu ʼaia. 52 Kae kapau ʼe mole kei toe lahi te ʼu taʼu ʼo aʼu ki te taʼu ʼo te Supileo, ʼe ina fakafuafua pea mo foaki age anai te totogi, ʼo mulimuli pe ki te ʼu taʼu ʼaia. 53 ʼE tonu anai ke hoko atu pe tana gaue kia ia ʼi te taʼu fuli ohage ko he tagata gaue ʼe totogi, pea ʼe tonu anai ke ke tokaga naʼa gaohi koviʼi.+ 54 Kae kapau ʼe mole feala ke ina toe totogi ia ia ʼo mulimuli ki te ʼu faʼahi ʼaia, ʼe ʼateaina pe anai mo ʼana fanau* ʼi te taʼu ʼo te Supileo.+

55 “ ‘Koteʼuhi ʼe ko te kau Iselaele ʼe ko ʼaku kaugana. Ko ʼaku kaugana ʼae neʼe au fakamavae mai te fenua ʼo Esipito.+ Ko au ia Sehova tokotou ʼAtua.

26 “ ‘ ʼE mole tonu ke kotou fai he ʼu ʼatua ʼe mole honatou ʼuhiga,+ pea ʼe mole tonu anai ke kotou fai he fakatata,+ peʼe ko he pou maka taputapu. Pea ʼe mole tonu anai ke kotou fakatuʼu he maka neʼe togi+ ʼi tokotou fenua ke kotou tulolo ki ai,+ koteʼuhi ko au ia Sehova tokotou ʼAtua. 2 ʼE tonu anai ke kotou taupau ʼaku sapato, pea ʼe tonu anai ke kotou fakaʼapaʼapa* ki toku sagatualio. Ko au ia Sehova.

3 “ ‘Kapau ʼe kotou haʼele tuʼumaʼu ʼi ʼaku lao, mo taupau ʼaku fakatotonu pea mo mulimuli ki ai,+ 4 ʼe au fakato anai he ʼu ʼua lalahi ʼi tona temi totonu,+ pea ʼe maʼuli lelei anai te kele,+ pea ʼe fua anai te ʼu fuʼu ʼakau ʼo te fenua. 5 ʼE kotou haha anai te fulumeto ʼo kaku ki te temi ʼae ʼe toli ai te vite, pea ʼe kaku anai te temi ʼae ʼe toli ai te vite ki te temi ʼae ʼe nunusi ai te pulapula. ʼE kotou kai anai takotou pane ʼo kaku ki takotou makokona, pea ʼe kotou maʼuli fimalie anai ʼi te fenua.+ 6 ʼE au foaki anai te tokalelei ki te fenua,+ pea ʼe kotou momoe anai ʼo mole kotou toe matataku ki he tahi,+ pea ʼe au kapu anai ʼi te fenua te ʼu manu fekai, pea ʼe mole haʼu anai he tahi ʼo tauʼi koutou ʼaki te heleta. 7 ʼE kotou tuli anai ʼokotou fili pea ʼe kotou matehi anai ʼaki te heleta. 8 ʼE tuli anai e he toko nima ʼo koutou he toko 100, pea ʼe tuli anai e he toko 100 ʼo koutou he toko 10 000, pea ʼe kotou matehi anai ʼokotou fili ʼaki te heleta.+

9 “ ‘ ʼE au tapuakiʼi anai* koutou pea mo fakaliliu anai koutou ʼo kaugamalie,+ pea ʼe au taupau anai taku fuakava mo koutou.+ 10 Logope la kei kotou kai te taʼukai ʼo te taʼu kua hili, ʼe tonu anai ke kotou liʼaki te taʼukai ʼaia kae tanaki te taʼukai foʼou. 11 Pea ʼe au fakatuʼu anai toku tapenakulo ʼi te lotolotoiga ʼo koutou,+ pea ʼe mole au* liʼaki anai ia koutou. 12 ʼE au haʼele anai ʼi te lotolotoiga ʼo koutou, pea ʼe au liliu anai ko tokotou ʼAtua,+ pea ʼe kotou liliu anai ko taku hahaʼi.+ 13 Ko au ia Sehova tokotou ʼAtua, ʼae neʼe ina fakamavae ia koutou mai te fenua ʼo Esipito ke mole kotou toe maʼuli popula ai. Pea neʼe au fasiʼi ʼakotou ʼakau ʼamo, pea neʼe au tuku koutou ke kotou haʼele tuʼu tonu.

14 “ ‘Kae kapau ʼe mole kotou fakalogo kia te au peʼe mole kotou taupau te ʼu fakatotonu fuli ʼaia,+ 15 pea kapau ʼe kotou liʼaki ʼaku lao,+ pea kapau ʼe kotou* fehihiʼa ki ʼaku lekula ʼo mole kotou taupau ʼaku fakatotonu fuli, pea mo maumauʼi taku fuakava,+ 16 koʼeni te meʼa ʼae ka au fai anai kia koutou: ʼE kotou mamahi anai ʼuhi ko taku tautea, pea ʼe au tauteaʼi anai ia koutou ʼaki te mahaki ʼae ko te fatafata vaivai, pea mo te fiva, ke tupu ai hakotou kivi mo puli ai tokotou malohi.* ʼE kotou nunusi anai te pulapula kae ʼe mole kotou kai anai ʼona fua, koteʼuhi ʼe kai anai e ʼokotou fili.+ 17 ʼE au liʼaki anai koutou, pea ʼe malo anai ʼokotou fili ia koutou.+ Pea ko natou ʼae ʼe fehihiʼa kia koutou ʼe natou malamalaki anai ia koutou,+ pea ʼe kotou feholaki anai kae ʼe mole tuli koutou e he tahi.+

18 “ ‘Kae logope la te ʼu faʼahi ʼaia, kapau ʼe mole kotou fakalogo mai kia te au, ʼe tonu anai ke au tauteaʼi ia koutou ʼuhi ko ʼakotou agahala ʼo tuʼa fitu. 19 ʼE au fakagata anai takotou fiameʼalahi, pea ʼe au fakaliliu anai tokotou lagi ke hage ko he ukamea*+ pea mo tokotou kele ke hage ko he kapa.* 20 ʼE mole he ʼuhiga anai ʼo takotou gaue kinakina he ʼe mole kotou maʼu anai te ʼu fua ʼo ʼakotou gaueʼaga,+ pea ʼe mole fua anai te ʼu fuʼu ʼakau ʼo te fenua.

21 “ ‘Kae kapau ʼe hoko atu pe takotou fakafeagai mai kia te au pea mo takotou mole fia fakalogo, ʼe tonu anai ke au tauteaʼi ia koutou ʼo tuʼa fitu, ʼo mulimuli pe ki ʼakotou agahala. 22 ʼE olo atu anai te ʼu manu ʼo te vao kia koutou ʼuhi ko au,+ pea ʼe natou matematehi anai ʼakotou fanau,+ mo ʼakotou manu lalata, ʼe hifo anai tokotou kaugamalie, pea ʼe lavaki anai ʼokotou ala.+

23 “ ‘Kae logope la te ʼu faʼahi ʼaia, kapau ʼe mole kotou tali tokotou fakatonutonuʼi,+ pea mo hoko atu pe takotou fakafeagai mai kia te au, 24 ʼe au toe fakafeagai anai kia koutou, pea ʼe au tauteaʼi anai ia koutou ʼuhi ko ʼakotou agahala ʼo tuʼa fitu. 25 ʼE au tauteaʼi anai ia koutou ʼaki taku uga ʼokotou fili ke natou tauʼi ia koutou ʼaki te heleta koteʼuhi neʼe kotou maumauʼi te fuakava.+ Kapau ʼe kotou feholaki ki ʼokotou kolo, ʼe au fakato anai he mahaki ʼi te lotolotoiga ʼo koutou,+ pea ʼe au tuku anai ia koutou ki te ʼu nima ʼo ʼokotou fili.+ 26 Pea ka au pulihi ʼakotou pane* ʼae neʼe tanaki,*+ ʼe feala anai ki he ʼu fafine ʼe toko hogofulu ke natou taʼo takotou pane ʼi he gutuʼumu pe ʼe tahi, pea ʼe natou tufa atu anai moka natou ʼosi fua.+ Pea ʼe kotou kai anai kae ʼe mole kotou makokona ai.+

27 “ ‘Kae logope la te ʼu faʼahi ʼaia, kapau ʼe mole kotou fia fakalogo mai, pea kapau ʼe hoko atu pe takotou fakafeagai mai kia te au, 28 ʼe au toe fakafeagai malohi anai kia koutou,+ pea ko au totonu ʼae ka au tauteaʼi ia koutou ʼuhi ko ʼakotou agahala ʼo tuʼa fitu. 29 Koia ʼe tonu anai ke kotou kai te sino ʼo ʼokotou foha, ʼo feia pe mo te sino ʼo ʼokotou ʼofafine.+ 30 ʼE au pulihi anai te ʼu faʼahi maʼoluga mo taputapu,+ pea ʼe au maumauʼi anai ʼokotou tuʼulaga iseso pea ʼe au fakatuʼuga anai ʼokotou sino ʼi te ʼu fuga fakatata mate mo fakalialia,*+ pea ʼe au* lituʼa anai kia koutou he ʼe au fakalialia kia koutou.+ 31 ʼE au maumauʼi anai ʼokotou kolo pea mo ʼokotou sagatualio ʼaki te heleta,+ pea ʼe mole au manava anai ki te ʼaele lelei ʼo ʼakotou sakilifisio. 32 ʼE au maumauʼi anai te fenua,+ pea ʼe punamaʼuli anai ʼokotou fili ʼae ʼe nonofo ʼi te fenua ʼi tanatou sisio ki te faʼahi ʼaia.+ 33 Pea ʼe au fakamavetevete anai koutou ʼi te lotolotoiga ʼo te ʼu puleʼaga.+ ʼE au uga anai ʼokotou fili ke natou tauʼi koutou ʼaki te heleta.+ Pea ʼe maumauʼi anai tokotou fenua+ ʼo feia mo ʼokotou kolo.

34 “ ‘ ʼI te temi ʼaia, ʼe fai anai e te fenua te ʼu sapato ʼae neʼe tonu ke fai, ʼi te temi katoa ʼae ʼe tuʼu lavaki ai te fenua kae ʼe nonofo koutou ʼi te fenua ʼo ʼokotou fili. ʼI te temi ʼaia ko te kele ʼe malolo anai,* he ʼe tonu ke fai e te fenua te ʼu sapato ʼae neʼe mole fai.+ 35 ʼI te temi katoa ʼae ʼe tuʼu lavaki ai te fenua, ʼe malolo anai te kele, koteʼuhi neʼe mole malolo te kele ʼi te temi ʼae neʼe tonu ke kotou fai ai ʼakotou sapato ʼi takotou nonofo ʼi te fenua.

36 “ ‘Ko natou ʼae ka hao anai,+ ʼe au fakalotovaivaiʼi anai ia natou ʼi te ʼu fenua ʼo ʼonatou fili. ʼE natou feholaki anai ʼi tanatou logo ki te viligia ʼo he lau neʼe ʼave e te matagi. ʼE natou feholaki anai ohage neʼe tuli natou e he tahi ʼaki te heleta pea ʼe natou fetokaʼi anai kae ʼe mole tuli natou e he tahi.+ 37 ʼE natou fetokaʼi anai ʼo fetaʼotaʼoʼaki ohage ko natou ʼae ʼe feholaki he ʼe tuli natou e he tahi ʼaki te heleta, kae ʼe mole tuli natou e he tahi. ʼE mole feala anai ke kotou tauʼi ʼokotou fili.+ 38 Tokolahi ia koutou ʼe mamate anai ʼi te lotolotoiga ʼo te ʼu puleʼaga,+ pea ʼe kotou mamate anai ʼi te fenua ʼo ʼokotou fili. 39 Ko natou ʼae ka hao ʼe natou maʼuli mamahi anai ʼi te ʼu fenua ʼo ʼokotou fili+ ʼuhi ko ʼakotou hala. ʼEi, ʼe natou maʼuli mamahi anai ʼuhi ko te ʼu hala ʼo ʼanatou tamai.+ 40 ʼE natou vetevete ai anai ʼanatou hala,+ ʼo feia mo te hala ʼo ʼanatou tamai pea mo tanatou heʼe agatonu, pea ʼe natou fakamoʼoni anai neʼe natou heʼe agatonu ʼi tanatou fakafeagai mai kia te au.+ 41 Koia neʼe au toe fakafeagai mo au kia natou,+ ʼi taku ʼave ia natou ki te fenua ʼo ʼonatou fili.+

“ ‘Pea ʼe lagi feala anai ke natou fakamalaloʼi ia natou totonu ʼo mole natou toe uigataʼa,+ pea ʼe natou utu pe anai te ʼu fua ʼo tanatou hala. 42 Pea ʼe au manatuʼi anai taku fuakava mo Sakopo,+ pea mo taku fuakava mo Isaake,+ pea ʼe au manatuʼi anai taku fuakava mo Apalahamo,+ pea ʼe au toe manatuʼi anai te fenua. 43 ʼI tanatou* liʼaki te fenua, ʼe fai anai e te fenua te ʼu sapato ʼae neʼe tonu ke fai,+ pea ʼe tuʼu lavaki anai. ʼE natou utu pe anai te ʼu fua ʼo tanatou hala, koteʼuhi neʼe natou liʼaki ʼaku lekula pea neʼe natou* fehihiʼa ki ʼaku lao.+ 44 Kae logope la te ʼu faʼahi ʼaia, ka natou nonofo ʼi te fenua ʼo ʼonatou fili, ʼe mole au liʼaki ʼosi anai ia natou,+ pea ʼe mole au fehiʼa anai kia natou ʼo kaku ki tonatou fakaʼauha. Koteʼuhi ʼe maumauʼi ai anai taku fuakava+ mo natou, he ʼe ko au ia Sehova tonatou ʼAtua. 45 ʼE au manatuʼi anai te fuakava ʼae neʼe au fai mo ʼanatou kui,+ ʼae neʼe au fakamavae mai te fenua ʼo Esipito kae sisio ki ai te ʼu puleʼaga+ ʼuhi ko natou, ke au liliu ai ko tonatou ʼAtua. Ko au ia Sehova.’ ”

46 ʼE ko te ʼu fakatotonu ʼaia, mo te ʼu lekula, pea mo te ʼu lao ʼae neʼe foaki e Sehova ki te kau Iselaele ʼi te Moʼuga ʼo Sinai ʼaki ia Moisese.+

27 Neʼe hoko atu pe te palalau ʼa Sehova kia Moisese, ʼo ina ui: 2 “Palalau ki te kau Iselaele pea ke ui kia natou: ‘Kapau ʼe fai e he tagata he fakapapau makehe+ ʼo ina foaki kia Sehova he falā ʼo fakafuafua pe ki te totogi ʼo he tahi,* koʼeni tona totogi: 3 kapau ko he tagata ʼe taʼu 20 ʼo kaku ki te taʼu 60 ʼe ko sikele* siliva anai ʼe 50, ʼo mulimuli ki te sikele ʼo te koga meʼa taputapu.* 4 Kae kapau ko he fafine ʼe ko sikele anai ʼe 30. 5 Kae kapau ko he tahi ʼe taʼu 5 ʼo kaku ki te taʼu 20 ʼe ko sikele anai ʼe 20 ki he tamasiʼi tagata pea ko sikele anai ʼe 10 ki he tamasiʼi fafine. 6 Kae kapau ko he fanau ʼe mahina tahi ʼo kaku ki te taʼu nima, ʼe ko sikele siliva anai ʼe nima ki he tamasiʼi tagata, pea ko sikele siliva anai ʼe tolu ki he tamasiʼi fafine.

7 “ ‘Kae kapau ko he tahi ʼe taʼu 60 ʼo fai ki ʼoluga, ʼe ko sikele anai ʼe 15 ki he tagata pea ko sikele anai ʼe 10 ki he fafine. 8 Kae kapau ʼe masiva ia ia ʼae ʼe ina fai te fakapapau ʼo mole ina lava totogi te falā ʼae neʼe kua fakatuʼutuʼu ki ai,+ ʼe tonu anai ke alu ki te pelepitelo, pea ʼe fakaha age anai e te pelepitelo te falā ʼae ʼe tonu ke ina li. ʼE fakafuafua anai e te pelepitelo te lahi ʼo te totogi ʼo mulimuli ki te ʼu fealagia ʼo ia ʼae ʼe ina fai te fakapapau.+

9 “ ‘Pea kapau neʼe fai he fakapapau ʼo ʼuhiga mo he manu ʼe feala ke momoli ohage ko he molaga kia Sehova, pea ko meʼa fuli ʼae ʼe foaki anai maʼa Sehova ʼe liliu anai ʼo taputapu. 10 ʼE mole feala anai ke ina fetogi te manu ʼaki he tahi age manu, pe ʼe sino lelei peʼe sino kovi. Kae kapau ʼe ina fetogi ʼaki he tahi age manu, ʼe taputapu anai te manu ʼaia pea mo te ʼuluaki manu. 11 Kapau ko he manu heʼe maʼa+ ʼe mole feala ke momoli ohage ko he molaga kia Sehova, ʼe ina ʼave anai te manu ki te pelepitelo. 12 ʼE fakaha anai e te pelepitelo tona totogi, ʼo mulimuli pe ki tana vakaʼi te manu, pe ʼe sino lelei peʼe sino kovi. Pea ʼe tonu anai ke mulimuli ki te totogi ʼae neʼe fakafuafua e te pelepitelo. 13 Kae kapau leva ʼe ina toe fia totogi te manu, ʼe tonu anai ke ina foaki he tupu, ia he vahe tahi ki te nima ʼo te totogi ʼaia neʼe fakafuafua.+

14 “ ‘Pea kapau ʼe foaki e he tagata tona ʼapi kia Sehova ohage ko he meʼa taputapu, ʼe fakaha anai e te pelepitelo tona totogi ʼo mulimuli pe ki te lelei peʼe ko te kovi ʼo te ʼapi. Pea ʼe tonu anai ke mulimuli ki te totogi ʼae neʼe fakafuafua e te pelepitelo.+ 15 Kae kapau leva ʼe ina toe fia totogi tona ʼapi ʼae neʼe ina foaki ohage ko he meʼa taputapu, ʼe tonu anai ke ina foaki he tupu, ia he vahe tahi ki te nima ʼo te totogi ʼae neʼe fakafuafua, pea ʼe ina toe maʼu anai.

16 “ ‘Pea kapau ʼe foaki e he tagata he koga ʼo tana gaueʼaga kia Sehova ohage ko he meʼa taputapu, ʼe fakafuafua anai tona totogi ʼo mulimuli pe ki te lahi ʼo te pulapula ʼae ʼe nunusi ʼi ai: ko sikele siliva anai ʼe 50 ki he homele ʼe tahi* ʼo he pulapula olose. 17 Kae kapau ʼe ina foaki tana gaueʼaga ohage ko he meʼa taputapu ʼi te taʼu ʼo te Supileo,+ pea ʼe tonu anai ke mulimuli ki te totogi ʼae neʼe kua fakafuafua. 18 Kae kapau ʼe ina foaki tana gaueʼaga ohage ko he meʼa taputapu ʼi te ʼosi ʼo te taʼu ʼo te Supileo, ʼe fakahifo anai e te pelepitelo tona totogi ʼo mulimuli ki te ʼu taʼu ʼae kei toe ʼo aʼu ki te taʼu ʼo te Supileo ʼae ka hoa mai.+ 19 Kae kapau leva ʼe ina toe fia totogi tana gaueʼaga ʼae neʼe ina foaki ohage ko he meʼa taputapu, ʼe tonu anai ke ina foaki he tupu, ia he vahe tahi ki te nima ʼo te totogi ʼae neʼe kua fakafuafua, pea ʼe ina toe maʼu anai. 20 Kae kapau leva ʼe mole ina fia totogi tana gaueʼaga kae ʼe fakatau ki he tahi age tagata, ʼe mole feala anai ke ina toe totogi. 21 ʼI te Supileo, ka liufaki te gaueʼaga e ia ʼae neʼe ina totogi, ʼe liliu anai te gaueʼaga ʼaia ko he meʼa taputapu kia Sehova, ohage ko he gaueʼaga kua foaki kia te ia. Pea ʼe maʼu anai e te kau pelepitelo.+

22 “ ‘Kae kapau neʼe kua totogi e he tagata he gaueʼaga pea ʼe ina foaki kia Sehova ohage ko he meʼa taputapu, kae ʼe mole kau ki tona tofiʼa,+ 23 ʼe fakafuafua anai e te pelepitelo tona totogi ʼo mulimuli ki te ʼu taʼu ʼae kei toe ʼo aʼu ki te taʼu ʼo te Supileo, pea ʼe foaki anai e te tagata ʼaia te totogi ʼi te ʼaho pe ʼaia.+ ʼE ko he meʼa taputapu ia kia Sehova. 24 ʼI te taʼu ʼo te Supileo, ʼe liufaki anai te kele kia ia ʼae neʼe ina totogi mai ai te kele, ʼei, ki ʼae ʼaʼana te kele ʼaia.+

25 “ ‘Ko te ʼu totogi fuli ʼe fakafuafua anai ʼo mulimuli ki te sikele ʼo te koga meʼa taputapu. Ko he foʼi sikele ʼe tahi ʼe ko kela* ʼe 20.

26 “ ‘Kae ʼe mole foaki anai he ʼuluaki ʼuhi ʼo he manu ohage ko he meʼa taputapu, koteʼuhi ʼe ʼa Sehova te ʼu ʼuluaki ʼuhi.+ Tatau aipe pe ʼe ko he vitulo peʼe ko he ovi, kua ʼosi maʼu ia e Sehova.+ 27 Kapau ʼe ko he manu ʼi te ʼu manu heʼe maʼa pea ʼe ina toe totogi ʼo mulimuli ki te totogi ʼae neʼe fakafuafua, ʼe tonu anai ke ina foaki he tupu, ia he vahe tahi ki te nima ʼo te totogi ʼae neʼe kua fakafuafua.+ Kae kapau ʼe mole toe totogi te manu ʼaia, ʼe fakatau anai ʼo mulimuli ki te totogi ʼae neʼe kua fakafuafua.

28 “ ‘Kae ko te ʼu meʼa fuli ʼae ʼe tuku keheʼi ke fakaʼaogaʼi ki he gaue taputapu, pea neʼe toʼo e he tagata mai ʼona koloa ʼo foaki katoa* kia Sehova, ʼe mole feala anai ke fakatau peʼe toe totogi, tatau aipe pe ko he tagata peʼe ko he manu peʼe ko hana gaueʼaga. Ko te ʼu meʼa fuli ʼaia ʼe ko he ʼu meʼa taputapu ʼaupito kia Sehova.+ 29 Pea tahi ʼae, ʼe mole feala anai ke toe totogi he tahi kua fakatuʼā pea kua tuku keheʼi ke matehi.+ Koia ʼe tonu anai ke matehi.+

30 “ ‘ ʼE maʼu e Sehova te vahe tahi fuli ki te hogofulu+ ʼo te fenua, ʼae ʼe toʼo mai te ʼu fua ʼo te ʼu gaueʼaga peʼe ko te ʼu fua ʼo te ʼu fuʼu ʼakau. ʼE ko he meʼa taputapu kia Sehova. 31 Kapau ʼe toe fia totogi e he tagata he koga ʼo tona vahe tahi ki te hogofulu, ʼe tonu anai ke ina foaki he tupu, he vahe tahi ki te nima. 32 Ko he manu ʼe tahi ia manu ʼe hogofulu ʼo te faga pipi, mo te faga tao, pea mo te faga ovi, ʼei, ko he manu ʼe tahi ia manu ʼe hogofulu ʼae ʼe fakalaka ʼi te lalo toko ʼo te tagata tauhi manu, ʼe ko he meʼa taputapu ia kia Sehova. 33 ʼE mole tonu anai ke ina vakaʼi pe ʼe sino lelei peʼe sino kovi, pea ʼe mole tonu anai ke ina fetogi. Kae kapau ʼe faiga ke ina fetogi ʼaki he tahi age manu, ʼe taputapu anai te manu ʼaia pea mo te ʼuluaki manu.+ ʼE mole feala anai ke toe totogi te ʼu manu ʼaia.’ ”

34 Ko te ʼu fakatotonu ʼaia neʼe foaki e Sehova kia Moisese ʼi te Moʼuga ʼo Sinai+ ke fakaha ki te kau Iselaele.