ESEKIELE

1 ʼI te nima ʼaho ʼo te fa mahina ʼo te 30 taʼu, neʼe au nofo mo te kau popula+ ʼo ovi ki te vai tafe ko Kepile.+ ʼI te temi ʼaia, neʼe ava ai te lagi pea neʼe au sio leva ki ni meʼa neʼe fakaha mai e te ʼAtua. 2 ʼI te nima ʼaho ʼo te mahina (neʼe ko te nima taʼu ʼaia ʼo te nofo popula ʼa te Hau ko Seoakini),+ 3 neʼe palalau mai leva ia Sehova kia au Esekiele* foha ʼo te pelepitelo ko Pusi, ʼi taku nofo ovi ki te Kepile, ʼi te fenua ʼo te kau Kaletea.+ Neʼe gaue te malohi ʼo Sehova ia au.+

4 Neʼe au sio leva, pea koʼeni he tuʼani matagi lalahi+ mai te potu noleto. Neʼe ʼi ai he ʼao matolu mo he afi neʼe tapa ohage ko te hila.+ Pea neʼe takatakai e he malama. ʼI te lotomalie ʼo te afi, neʼe ʼi ai he meʼa neʼe hage ko te aulo neʼe fio ʼaki te siliva.+ 5 ʼI te afi, neʼe ʼi ai he meʼa neʼe hage ko ni ʼaselo ʼe fa.+ Neʼe hage tonatou agaaga ko he tagata. 6 Neʼe natou tahi maʼu fofoga ʼe fa mo pakakau ʼe fa.+ 7 Neʼe totonu ʼonatou vaʼe pea neʼe hage ko ʼae ʼo he ʼuhiʼi pipi, pea neʼe gigila ohage ko te kapa momole.+ 8 Neʼe ʼi ai ʼonatou nima ʼi ʼonatou lalo pakakau ʼi te ʼu faʼahi ʼe fa pea neʼe maʼu e te ʼu ʼaselo ʼe fa ʼonatou fofoga mo ʼonatou pakakau. 9 Neʼe felaveʼaki ʼonatou pakakau. Neʼe mole femafuliʼaki te ʼu ʼaselo moka natou feoloʼaki. Neʼe natou tahi alu fakahagatonu ki muʼa.+

10 Koʼeni te agaaga ʼo ʼonatou fofoga: Neʼe fofoga tagata te toko fa ʼaia, mo fofoga laione+ ʼi te faʼahi mataʼu, mo fofoga vitulo+ ʼi te faʼahi hema, pea neʼe toe fofoga akuila+ te toko fa ʼaia.+ 11 Neʼe feia ʼonatou fofoga. Neʼe folahi ʼonatou pakakau ki ʼoluga. Neʼe natou tahi maʼu pakakau ʼe lua neʼe felaveʼaki pea mo pakakau ʼe lua neʼe ʼaofi ʼaki ʼonatou sino.+

12 Neʼe natou tahi alu fakahagatonu ki muʼa. Neʼe natou olo ki te potu fuli ʼae neʼe uga e te laumalie ke natou olo ki ai.+ Pea neʼe mole natou femafuliʼaki moka natou feoloʼaki. 13 Pea neʼe hage te ʼu ʼaselo ko ni mamala kakaha. Neʼe ʼi ai te meʼa neʼe hage ko ni taume ʼe ulo neʼe fealuʼaki ʼi te vaha ʼo te ʼu ʼaselo pea neʼe tapa te hila mai te afi.+ 14 Pea neʼe hage te ʼu ʼaselo ko te hila ʼi tanatou feoloʼaki.

15 ʼI taku sioʼi te ʼu ʼaselo, neʼe ʼi ai he foʼi teka ʼi te kele ia tafa ʼo te ʼu ʼaselo takitahi ʼaia neʼe ʼi ai ʼonatou fofoga ʼe fa.+ 16 Neʼe gigila te ʼu foʼi teka ohage ko te kisolite. Neʼe tatau fuli. Neʼe hage tonatou agaaga mo tonatou faʼahiga faʼu ko he foʼi teka ʼi he loto foʼi teka.* 17 Ka natou feoloʼaki ʼi te ʼu faʼahi ʼe fa, ʼe feala ke natou olo ki he faʼahi pe kae ʼe mole natou femafuliʼaki. 18 Neʼe maʼoluga ʼaupito te ʼu foʼi teka. Pea neʼe ʼaofi e ni mata+ te takatakai katoa ʼo te ʼu foʼi teka ʼe fa. 19 Ka feoloʼaki te ʼu ʼaselo, neʼe toe feoloʼaki te ʼu foʼi teka mo natou. Pea ka malaga te ʼu ʼaselo ʼi te kele, ʼe toe malaga ai mo te ʼu foʼi teka.+ 20 Neʼe natou olo ki te faʼahi ʼae neʼe uga e te laumalie ke natou olo ki ai, ʼei, ki te potu fuli ʼae neʼe alu ki ai te laumalie. Neʼe malaga te ʼu foʼi teka mo natou he ʼe ko te laumalie ʼae neʼe gaue ʼi te ʼu ʼaselo neʼe toe nofo foki ʼi te ʼu foʼi teka. 21 Ka feoloʼaki te ʼu ʼaselo, ʼe toe feoloʼaki mo te ʼu foʼi teka. Pea ka natou tutuʼu, ʼe toe tutuʼu ai mo te ʼu foʼi teka. Pea ka natou malaga ʼi te kele, ʼe toe malaga ai te ʼu foʼi teka mo natou, he ʼe ko te laumalie ʼae neʼe gaue ʼi te ʼu ʼaselo neʼe toe nofo foki ʼi te ʼu foʼi teka.

22 ʼI ʼoluga ʼo te ʼu foʼi ʼulu ʼo te ʼu ʼaselo, neʼe ʼi ai he meʼa neʼe hage he lauʼi sioʼata ʼe gigila pea neʼe fakaofoofo.+ 23 ʼI te lalo lauʼi sioʼata, neʼe totonu* ʼonatou pakakau mo felaveʼaki. Neʼe natou tahi maʼu pakakau ʼe lua moʼo ʼuʼufi he faʼahi ʼo tonatou sino pea mo pakakau ʼe lua moʼo ʼuʼufi ʼo te tahi faʼahi. 24 Pea neʼe au logo ki te logoaʼa ʼo ʼonatou pakakau: neʼe hage ia ko te gugulu ʼo te ʼu vai ʼae ʼe hou, ohage ko te logoaʼa ʼae mai te Mafimafi.+ Ka feoloʼaki te ʼu ʼaselo, neʼe natou logoaʼa ohage ko he foʼi tau. Ka natou tutuʼu, neʼe natou tuku ifo ki lalo ʼonatou pakakau.

25 Neʼe logo he leʼo ʼi ʼoluga ʼo te lauʼi sioʼata ʼae neʼe ʼi ʼoluga ʼi ʼonatou ʼulu. (Ka natou tutuʼu, neʼe natou tuku ifo ki lalo ʼonatou pakakau.) 26 ʼI ʼoluga ʼo te meʼa ʼae neʼe hage ko he lauʼi sioʼata ʼae neʼe ʼi ʼoluga ʼi ʼonatou ʼulu, neʼe ʼi ai te meʼa neʼe hage ko te maka ʼae ko te safile,+ pea neʼe hage ko he hekaʼaga fakahau.+ Pea ʼi ʼoluga atu, ko ia ʼae neʼe heka ʼi te hekaʼaga fakahau neʼe hage ko he tagata.+ 27 Neʼe lagi ko tona koga loto ʼae neʼe au sio ki ai ʼo kaku ki ʼoluga. Pea neʼe ʼi ai he meʼa neʼe gigila ohage ko te aulo ʼe fio ʼaki te siliva+ pea neʼe hage ko he afi kakaha. Pea mai tona koga loto ki lalo ifo, neʼe ʼi ai he meʼa neʼe hage ko he afi.+ Pea neʼe takatakai ia ia e he malama 28 neʼe hage ko he nuanua+ ʼi he ʼao ʼi he ʼaho ʼua. Neʼe feia te malama ʼae neʼe ina takatakai ia ia. Neʼe hage ia ko te kololia ʼo Sehova.+ ʼI taku sio ki ai, neʼe au punou mo tulolo ki te kele. Pea neʼe au logo leva ki te leʼo ʼo he tahi neʼe palalau.

2 Neʼe ina ui mai: “Foha ʼo te tagata,* tuʼu ki ʼoluga ke au palalau mo koe.”+ 2 ʼI te palalau mai ʼa te ʼAtua, neʼe ulu tona laumalie ia au ʼo au tuʼu ake ai ki ʼoluga+ ke feala haku logo ki tana palalau mai.

3 Pea neʼe ina ui mai leva: “Foha ʼo te tagata, ʼe au fekauʼi koe ki te hahaʼi ʼo Iselaele,+ ki ni puleʼaga agatuʼu neʼe natou agatuʼu mai kia te au.+ Ko natou mo ʼanatou kui neʼe natou talagataʼa kia te au ʼo kaku mai ki te ʼaho nei.+ 4 ʼE au fekauʼi koe ki ni foha agatuʼu mo uigataʼa+ pea ʼe tonu anai ke ke ui age kia natou: ‘Koʼeni te folafola ʼa te Tuʼi ʼAliki ko Sehova.’ 5 Tatau aipe pe ʼe natou fakalogo peʼe mole natou fia fakalogo, koteʼuhi ko natou ko he hahaʼi agatuʼu,+ kae ʼe natou iloʼi anai neʼe nofo he polofeta ia natou.+

6 “Kae ko koe foha ʼo te tagata, ʼaua naʼa ke mataku ia natou+ mo ʼanatou palalau, logo la tau nofo ʼi te lotolotoiga ʼo te vao mo te ʼakau talatala*+ pea mo tau nofo mo te ʼu sekolopio. Ko he hahaʼi agatuʼu, kae ʼaua naʼa ke mataku ʼi ʼanatou palalau+ pea ʼaua naʼa ke tekelili ʼuhi ko ʼonatou fofoga.+ 7 ʼE tonu anai ke ke fakaha age ʼaku folafola pe ʼe natou fakalogo ki ai peʼe kailoa. ʼEi, ko he hahaʼi agatuʼu.+

8 “Kae ko koe foha ʼo te tagata, fakalogo mai ki ʼaku palalau. ʼAua naʼa ke agatuʼu ohage ko te hahaʼi ʼaia. Avahi tou gutu mo kai te meʼa ʼae ʼe au foaki atu.”+

9 Neʼe au sio leva pea koʼeni neʼe faoʼi mai he nima kia au+ pea neʼe ina toʼo he takaiga tohi kua tohi.+ 10 Neʼe ina folahi leva ʼi ʼoku muʼa pea neʼe tohi ʼi loto mo tuʼa.+ Neʼe tohi ai ni hiva mate mo ni lauga pea mo ni tagilaulau.+

3 Pea neʼe ina ui mai: “Foha ʼo te tagata, kai te meʼa ʼae ʼi ʼou muʼa. Kai te takaiga tohi ʼaeni pea ke alu ʼo palalau ki te hahaʼi ʼo Iselaele.”+

2 Neʼe au avahi ai toku gutu pea neʼe ina fakatoʼo mai te takaiga tohi ke au kai. 3 Neʼe ina toe ui: “Foha ʼo te tagata, kai te takaiga tohi ʼae ʼe au foaki atu ke fonu ai tou fatu.” Neʼe au kai leva pea neʼe malie ohage ko te meli ʼi toku gutu.+

4 Pea neʼe ina ui mai: “Foha ʼo te tagata, alu ki te hahaʼi ʼo Iselaele pea ke fakaha kia natou ʼaku folafola. 5 ʼE mole fekauʼi koe ki he hahaʼi ʼe palalau ʼi he lea ʼe mole mahino peʼe ko he lea ʼe mole ke iloʼi, kae ʼe fekauʼi koe ki te hahaʼi ʼo Iselaele. 6 ʼE mole fekauʼi koe ki ni puleʼaga kaugamalie ʼe palalau ʼi he lea ʼe mole mahino peʼe faigataʼa ʼe mole ke iloʼi ʼona kupu. Ka na neʼe au fekauʼi la koe kia natou ʼaia, ʼe natou fakalogo atu anai.+ 7 Kae ʼe mole fia fakalogo atu anai te hahaʼi ʼo Iselaele koteʼuhi ʼe mole natou fia fakalogo mai kia te au.+ ʼE ʼulu fefeka mo uigataʼa te hahaʼi fuli ʼo Iselaele.+ 8 Koʼeni, neʼe au fakafefeka tou fofoga ohage ko ʼonatou fofoga pea neʼe au fakafefeka tou laʼe ohage ko ʼonatou laʼe.+ 9 Neʼe au fakaliliu tou laʼe ohage ko he taimani, ʼo fefeka age ia ʼi te maka fefeka.+ Ko he hahaʼi agatuʼu kae ʼaua naʼa ke mataku ia natou pea ʼaua naʼa ke tekelili ʼuhi ko ʼonatou fofoga.”+

10 Pea neʼe ina ui mai: “Foha ʼo te tagata, fagono mai ki te ʼu palalau fuli ʼae ka au ui atu mo ke fakakaukauʼi lelei. 11 Alu ʼo palalau ki te kau popula ʼo tau hahaʼi.+ Pe ʼe natou fakalogo peʼe mole natou fia fakalogo, kae ʼe ke ui anai kia natou: ‘Koʼeni te folafola ʼa te Tuʼi ʼAliki ko Sehova.’ ”+

12 Neʼe ʼave leva au e he laumalie+ pea neʼe au logo ʼi ʼoku tuʼa ki he leʼo ʼe gugulu neʼe ina ui: “Ke vikiʼi te kololia ʼo Sehova ʼi tona nofoʼaga!” 13 Neʼe au logo ki te felaveʼaki ʼo te ʼu pakakau ʼo te ʼu ʼaselo,+ mo te logoaʼa ʼo te ʼu foʼi teka ʼi ʼonatou tafa+ pea mo he toe gugulu. 14 Neʼe hiki leva au e te laumalie ʼo ʼave, ʼo au alu mamahi ai mo ita. Neʼe gaue lahi leva te malohi ʼo Sehova ia au. 15 Koia neʼe au alu ai ki te kau popula ʼo Tele-apipi ʼae neʼe nonofo ovi ki te Kepile.+ Neʼe au nofo ʼi te koga meʼa ʼae neʼe natou maʼuʼuli ai. Neʼe au nofo punamaʼuli+ mo natou ia ʼaho ʼe fitu.

16 ʼI te ʼosi ʼo te ʼu ʼaho ʼaia ʼe fitu, neʼe palalau mai ia Sehova ʼo ina ui:

17 “Foha ʼo te tagata, neʼe au fakanofo koe ko he tagata leʼo ki te hahaʼi ʼo Iselaele:+ ka ke logo ki he logo mai ia te au, ʼe tonu anai ke ke fakaha taku fakatokaga kia natou.+ 18 Kapau ʼe au ui ki he tahi ʼe agakovi: ‘ ʼE ke mate anai,’ kae ʼe mole ke fakatokaga ia ia pea ʼe mole ke uga te tagata agakovi ke liʼaki tana aga ʼae ʼe kovi ke maʼuli ai,+ ʼe mate anai ia ʼuhi ko tana hala he ʼe agakovi+ kae ʼe au toe tuku anai te hala kia koe.+ 19 Pea kapau ʼe ke fakatokaga te tagata agakovi kae ʼe mole ina tuku tana aga ʼae ʼe kovi mo ʼana gaue ʼae ʼe kovi, ʼe mate anai ia ʼuhi ko tana hala kae ʼe ke haofaki anai tou maʼuli.+ 20 Kae kapau ʼe liʼaki e he tahi ʼe faitotonu tana aga ʼae ʼe lelei ʼo fai te aga ʼae ʼe kovi, ʼe au tuku anai ʼi ʼona muʼa he meʼa fakatupu tukia pea ʼe mate anai.+ Kapau neʼe mole ke fakatokaga ia ia ʼe mate anai ia ʼuhi ko tana agahala pea ʼe mole toe manatuʼi anai ʼana gaue ʼae ʼe lelei. Kae ʼe au toe tuku anai te hala kia koe.+ 21 Kapau leva neʼe ke fakatokaga te tagata faitotonu ke ʼaua naʼa agahala pea ʼe mole agahala ia, ʼe maʼuli anai he neʼe ke fakatokaga ia ia+ pea ʼe ke haofaki anai tou maʼuli.”

22 ʼI te potu ʼaia, neʼe gaue te malohi ʼo Sehova ia au pea neʼe ina ui mai: “Tuʼu ki ʼoluga pea ke alu ki te potu fenua laulelei pea ʼe au palalau anai mo koe ʼi ai.” 23 Neʼe au tuʼu ake ai ʼo alu ki te potu fenua laulelei. Pea koʼeni neʼe ha ʼi ai te kololia ʼo Sehova+ ohage ko te kololia ʼae neʼe au sio ki ai ovi ki te Kepile.+ Neʼe au punou leva ʼo tulolo ki te kele. 24 Pea neʼe ulu te laumalie ʼo te ʼAtua ia au ʼo au tuʼu ake ai ki ʼoluga.+ Neʼe palalau mai leva te ʼAtua ʼo ina ui:

“Alu ʼo nofo punupunu io koe. 25 Foha ʼo te tagata, ʼe natou haʼihaʼi anai koe ʼaki ni maea ke mole feala hau alu kia natou. 26 ʼE au fakamate anai tou ʼalelo pea ʼe mole feala ke ke palalau mo valokiʼi natou. Ko he hahaʼi agatuʼu. 27 Kae ka au palalau mo koe, ʼe au avahi anai tou gutu pea ʼe tonu ke ke ui kia natou:+ ‘Koʼeni te folafola ʼa te Tuʼi ʼAliki ko Sehova.’ Ko ia ʼae ʼe fakalogo ke fakalogo,+ pea ko ia ʼae ʼe mole fia fakalogo ke mole fakalogo. ʼEi, ko he hahaʼi agatuʼu.+

4 “Foha ʼo te tagata, toʼo he foʼi piliki ʼo tuku ki ʼou muʼa, pea ke togi ki ai te pāki ʼo he kolo, ia Selusalemi. 2 ʼA takai ia ia,+ laga he kaupa moʼona ʼa takai+ mo he kaupa moʼona tauʼi,+ pea ke fakatuʼu ʼi ʼona tafaʼaki he ʼu nofoʼaga solia ʼo ke ʼa takai ʼaki ni masini tau.+ 3 Toʼo he lauʼi ukamea pea ke fakatuʼu ohage ko he kaupa ukamea ʼi tou vaha mo te kolo. Pea ke sio fakamamaʼu ki ai. ʼE ʼa takai anai pea ko koe ʼae ka ke ʼa takai. Ko he fakailoga ʼaia ki te hahaʼi ʼo Iselaele.+

4 “ ʼE ke takoto anai ki tou faʼahi hema pea ʼe tuku kia koe* te hala ʼa te hahaʼi ʼo Iselaele.+ ʼE ke ʼamo anai tanatou hala ʼi te ʼu ʼaho ʼae ka ke takoto fakatafa ai. 5 ʼE au fakamaʼua atu anai te faʼahi ʼaia ia ʼaho ʼe 390 ʼae ko te ʼu taʼu ʼo tanatou hala,+ pea ʼe ke ʼamo anai te hala ʼa te hahaʼi ʼo Iselaele. 6 ʼE ke fai feia anai ʼo kaku ki te ʼosi ʼo te ʼu ʼaho ʼaia.

“Pea ʼe ke toe takoto anai kae ki tou faʼahi mataʼu. ʼE ke ʼamo anai te hala ʼa te hahaʼi ʼo Suta+ ia ʼaho ʼe 40. Ko te ʼaho ʼe tahi ki te taʼu ʼe tahi, ʼei, ko te ʼaho ʼe tahi ki te taʼu ʼe tahi, koʼena te meʼa ʼae neʼe au fakamaʼua atu. 7 ʼE ke sioʼi fakamamaʼu anai te ʼa takai ʼo Selusalemi+ ʼo ke pelu ake tou nimaʼi kofu pea ʼe tonu anai ke ke fakakikite te ʼu malaʼia ʼae ka hoko ki ai.

8 “Koʼeni ʼe au haʼihaʼi anai koe ʼaki ni maea ke mole feala hau femafuliʼaki ʼo kaku ki te katoa ʼo te ʼu ʼaho ʼae ʼe ke ʼa takai ai te kolo.

9 “ ʼE ke toʼo anai he fulumeto, mo he olose, mo ni aliko, mo ni lenitili, mo he mile pea mo te tahi faʼahiga fulumeto* ʼo ke ʼai ki he pa moʼo fai ʼaki tau pane. ʼE ke kai anai ki ai ia ʼaho ʼe 390, te ʼu ʼaho ʼae ka ke takoto fakatafa ai.+ 10 ʼE ke fua anai te mamafa ʼo tau meʼa kai ʼi te ʼaho fuli ʼe ko foʼi sikele ʼe 20.* ʼE ke kai pe anai ʼi te temi ʼae kua fakatuʼutuʼu ki ai.

11 “Ko te lahi ʼo te vai ʼae ka ke inu ko te vahe tahi ki te ono ʼo he hine.* ʼE ke inu pe anai ʼi te temi ʼae kua fakatuʼutuʼu ki ai.

12 “ ʼE ke kai anai te pane ʼaia ohage ko he foʼi pane olose takafuafua. ʼE ke fakamoho anai ʼi ʼonatou muʼa ʼaki ni faifekau ʼa he tagata kua magemage kae mole ʼaki ni fafie.” 13 Pea neʼe ui mai e Sehova: “ ʼE kai feiaʼi anai e te kau Iselaele tanatou pane heʼe maʼa ʼi te ʼu puleʼaga ʼae ka au fakamavetevete ai natou.”+

14 Pea neʼe au ui: “Kailoa ia, Tuʼi ʼAliki ko Sehova! Talu mai taku kei veliveli ʼo kaku mai ki te ʼaho nei, neʼe mole au kai ki he meʼa kai heʼe maʼa. Neʼe mole au kai he kanoʼi manu ʼo he manu neʼe maʼu atu kua mate pe neʼe hae liki e he manu fekai.+ Neʼe mole he temi neʼe au ʼai ai he kanoʼi manu heʼe maʼa ki toku gutu.”+

15 Pea neʼe ina ui mai: “ ʼIo, ʼe au fakagafua atu ke ke fakaʼaogaʼi he faiʼi pipi kae mole ko ni faifekau ʼa he tagata. Pea ʼe ke fakamoho ʼaki anai tau pane.” 16 Neʼe ina ui mai leva: “Foha ʼo te tagata, ʼe au fakasiʼisiʼi anai te meʼa kai* ʼi Selusalemi.+ ʼE natou kai anai mo he toe lototuʼania tanatou vaega pane ʼae kua fua.+ Pea ʼe natou inu anai mo he fakalialia tanatou vaega vai ʼae kua fua.+ 17 ʼE natou punamaʼuli anai ʼi te hoko ʼo te aluʼaga ʼaia, ʼo natou fesioʼaki mo vaivavai ʼuhi ko tanatou hala, he ʼe kua natou masisiva ʼi te pane mo te vai.

5 “Kae kia koe, foha ʼo te tagata, ke ke toʼo he heleta masila ʼo ke fakaʼaogaʼi ohage ko he meʼa telekava. Tele tou ʼulu mo tou kava, pea ke toʼo he meʼa fua moʼo fua ʼou fuluʼi ʼulu mo te ʼu fulu ʼo tou kava pea ke vaheʼi tolu. 2 ʼE ke tutu anai he vahe tahi ki te tolu ʼi te loto kolo moka ʼosi te ʼu ʼaho ʼae ʼe ʼa takai ai.+ ʼE ke toʼo anai te tahi vahe tahi ki te tolu ʼo ta ʼaki te heleta ʼi te takafoli ʼo te kolo.+ Pea ko te vahe tahi ki te tolu ʼae ʼe toe, ʼe ke laku anai ke viligia ʼi te matagi pea ʼe au tohoʼi anai he heleta ʼo tuli ʼaki.+

3 “ ʼE ke toʼo anai he lukuga fuluʼi ʼulu ʼo ʼai ki tou tapaʼi kofu. 4 Toʼo he tahi ʼu fuluʼi ʼulu ʼo li ki te afi ke tutu ai. ʼE mafola anai te afi ʼaia ʼi Iselaele katoa.+

5 “Koʼeni te folafola ʼa te Tuʼi ʼAliki ko Sehova: ‘Ko Selusalemi ʼaia. Neʼe au tuku ia ia ʼi te lotolotoiga ʼo te ʼu puleʼaga mo ni fenua ʼi ʼona tafaʼaki. 6 Kae neʼe talagataʼa ki ʼaku lao mo ʼaku fakatotonu. Neʼe lahi age tana agakovi ʼi te ʼu puleʼaga pea mo te ʼu fenua ʼae ʼi ʼona tafaʼaki.+ ʼE moʼoni, neʼe ina liʼaki ʼaku lao pea neʼe mole fakaʼapaʼapa ki ʼaku fakatotonu.’

7 “Koʼeni te folafola ʼa te Tuʼi ʼAliki ko Sehova: ‘Neʼe kovi age takotou aga ʼi te ʼu puleʼaga ʼae ʼi ʼokotou tafaʼaki. Neʼe mole kotou fakaʼapaʼapa ki ʼaku fakatotonu mo maʼuliʼi ʼaku lao. Kailoa, neʼe kotou mulimuli ki te ʼu lao ʼa te ʼu puleʼaga ʼae ʼi ʼokotou tafaʼaki.+ 8 Koia, koʼeni te folafola ʼa te Tuʼi ʼAliki ko Sehova: “Selusalemi, ʼe au fakafeagai anai+ mo fakahoko tonu te tautea kia koe ia muʼa ʼo te ʼu puleʼaga.+ 9 ʼE au fakahoko anai kia koe he meʼa neʼe heʼeki au fakahoko ki muʼa atu, he faʼahiga meʼa ʼe mole au toe fakahoko anai ʼuhi ko ʼau aga fakalialia fuli.+

10 “ ‘ “ ʼE kai anai e te ʼu tamai ʼae ʼe nonofo io koe ʼonatou foha+ pea ʼe kai anai e te ʼu foha ʼanatou tamai. ʼE au fakahoko anai tou tautea mo fakamavetevete te ʼu meʼa fuli ʼae ʼe toe ia koe ʼi te potu fuli.” ’+

11 “ ʼE ui e te Tuʼi ʼAliki ko Sehova: ‘ ʼE au tala moʼoni atu, neʼe ke ʼulihi toku sagatualio ʼaki ʼau fakatata fakalialia fuli pea mo ʼau aga fakalialia fuli,+ koia mo au la ʼe au liʼaki anai koe. ʼE mole au ʼofa tuʼa tahi anai kia koe mo manavaʼofa.+ 12 ʼE mamate anai he vahe tahi ki te tolu ʼo tau hahaʼi ʼi te ʼu taʼi mahaki* peʼe pupuli anai ʼi te hoge. Pea ko te tahi vahe tahi ki te tolu ʼe to ʼi ʼou tafaʼaki he ʼe matehi anai ʼaki te heleta.+ Pea ko te vahe tahi ki te tolu fakaʼosi, ʼe au fakamavetevete anai ʼi te potu fuli mo tohoʼi he heleta ʼo tuli ʼaki.+ 13 ʼE ʼosi ai leva toku ita, ʼei, ʼe malū ifo toku hauhau ʼae kia natou, pea ʼe au fimalie anai.+ Ka ʼosi taku fakato kia natou toku ita, ʼe natou iloʼi moʼoni anai ko au ia Sehova neʼe au palalau he ʼe au fakamaʼua ke pipiki ʼateaina pe kia te au.+

14 “ ‘ ʼE au fakaliliu anai koe ko he koga meʼa maumau. ʼE fehiʼaʼinaʼi anai koe e te ʼu puleʼaga ʼae ʼi ʼou tafaʼaki ʼo feia kia natou ʼae ka fakalaka ai.+ 15 ʼE fehiʼaʼinaʼi anai koe mo meʼa noaʼi+ pea ʼe ke liliu anai ko he meʼa fakalialia mo he fakatokaga ki te ʼu puleʼaga ʼae ʼi ʼou tafaʼaki, moka au fakahoko kia koe te tautea mo ni tuʼā mamafa ʼi toku hauhau. Ko au ia Sehova ʼae neʼe palalau.

16 “ ‘ ʼE au fakato anai he hoge ʼe kotou mamate ai ohage ʼe tauʼi koutou e ni kauʼi nahau. ʼE kotou mamate anai ʼi te ʼu kauʼi nahau ʼae ʼe au fana ʼaki koutou.+ ʼE kovi anai te hoge he ʼe au fakasiʼisiʼi takotou meʼa kai.*+ 17 ʼEi, ʼe au fakato anai ki tau hahaʼi he hoge pea mo ʼaumai ni manu fekai+ ʼe mamate ai ʼakotou fanau. ʼE pulihi anai koutou ʼi te ʼu taʼi mahaki mo te ʼu ligi toto. Pea ʼe au fakaʼaogaʼi anai he heleta moʼo matehi ʼo koutou.+ Ko au ia Sehova ʼae neʼe palalau.’ ”

6 Neʼe toe palalau mai ia Sehova, ʼo ina ui: 2 “Foha ʼo te tagata, haga ki te ʼu moʼuga ʼo Iselaele pea ke fakakikite te ʼu malaʼia ʼae ka hoko ki ai. 3 ʼE tonu anai ke ke ui: ‘ ʼU moʼuga ʼo Iselaele, kotou fagono ki te Tuʼi ʼAliki ko Sehova: Koʼeni te meʼa ʼae ʼe ui e te Tuʼi ʼAliki ko Sehova ki te ʼu moʼuga, mo te ʼu kiʼi moʼuga, mo te ʼu liuʼa pea mo te ʼu potu fenua laulelei: “Koʼeni ʼe au tauʼi anai koutou ʼaki te heleta pea ʼe au maumauʼi anai ʼokotou faʼahi maʼoluga. 4 ʼE maumauʼi anai ʼokotou ʼaletale, ʼe holoʼi anai ʼokotou tuʼulaga iseso+ pea ʼe au laku anai ʼakotou mate ki te kele ia muʼa ʼo ʼakotou fakatata fakalialia.*+ 5 ʼE au li anai te ʼu sino mate ʼo te hahaʼi ʼo Iselaele ia muʼa ʼo ʼanatou fakatata fakalialia pea ʼe au fakamavetevete anai ʼokotou hui ʼi te takafoli ʼo ʼokotou ʼaletale.+ 6 ʼI te ʼu potu fuli ʼae ʼe kotou nonofo ai, ʼe holoʼi anai te ʼu kolo,+ ʼe maumauʼi anai te ʼu faʼahi maʼoluga mo tuʼu noa.+ ʼE laliki anai ʼokotou ʼaletale, ʼei, ʼe laliki anai. ʼE maumauʼi anai ʼakotou fakatata fakalialia, ʼe taʼataʼaga anai ʼokotou tuʼulaga iseso pea ʼe pulihi anai te ʼu meʼa fuli ʼae neʼe kotou faʼu. 7 Tokolahi ia koutou ʼe mamate anai+ pea ʼe kotou iloʼi moʼoni anai ko au ia Sehova.+

8 “ ‘ “Kae ʼe au tuku anai ʼihi ke maʼuʼuli. ʼEi, ʼe hao anai ʼihi ia koutou mai te heleta moka kotou nonofo ʼi te ʼu puleʼaga mo mavetevete ʼi te ʼu fenua.+ 9 Pea ʼe manatuʼi anai au e natou ʼae neʼe hao ʼi tanatou maʼuli popula ʼi te ʼu puleʼaga.+ ʼE natou mahino anai neʼe au lotomamahi ʼi tanatou mole agatonu kia te au+ mo tanatou holi ʼae ki ʼanatou fakatata fakalialia.+ ʼE natou ufiufi anai mo fakalialia ʼuhi ko te ʼu agakovi fuli mo te ʼu aga fakalialia ʼae neʼe natou fai.+ 10 ʼE natou iloʼi moʼoni anai ko au ia Sehova pea ʼe mole to noa anai te ʼu malaʼia ʼae ʼe au fakaha kia natou.” ’+

11 “Koʼeni te folafola ʼa te Tuʼi ʼAliki ko Sehova: ‘Pasipasi, mo tuki ʼou vaʼe mo tagilaulau ʼuhi ko te ʼu agakovi fuli mo te ʼu aga fakalialia fuli ʼae ʼe fai e te hahaʼi ʼo Iselaele he ʼe natou mamate anai ʼi te heleta, mo te hoge pea mo te ʼu taʼi mahaki.+ 12 ʼE mate anai ia ia ʼae ʼe nofo mamaʼo ʼi he taʼi mahaki. Pea ko ia ʼae ʼe nofo ovi ʼe mate anai ʼi te heleta. Ko natou ʼae neʼe hao ʼi te ʼu aluʼaga ʼaia, ʼe mamate anai ʼi te hoge. ʼEi, ʼe au fakato katoa anai toku hauhau kia natou.+ 13 Pea ʼe kotou iloʼi moʼoni anai ko au ia Sehova+ moka leta ʼanatou mate ʼi te lotolotoiga ʼo ʼanatou fakatata fakalialia, ʼi te takafoli ʼo ʼonatou ʼaletale,+ ʼi te ʼu kiʼi moʼuga fuli, ʼi te ʼu tumutumu ʼo te ʼu moʼuga fuli, ʼi te ʼu lalo fuʼu ʼakau fuli ʼae ʼe maʼuli lelei pea mo te ʼu lalo fuʼu ʼakau lalahi. Ko te ʼu potu fuli ʼaia neʼe natou momoli ai ni molaga ʼe ʼaele magoni ki ʼanatou fakatata fakalialia moʼonatou fakafiafiaʼi.+ 14 ʼE au faoʼi anai toku nima moʼonatou fakatuʼā pea ʼe au fakaliliu anai te fenua ko he koga meʼa lavaki. Pea ʼe liliu anai te ʼu koga meʼa fuli ʼae ʼe natou nonofo ai ʼo kovi age ʼi te ʼu potu toafa ʼae ʼe ovi ki Tipela. Pea ʼe natou iloʼi moʼoni anai ko au ia Sehova.’ ”

7 Neʼe toe palalau mai ia Sehova, ʼo ina ui: 2 “Foha ʼo te tagata, koʼeni te folafola ʼa te Tuʼi ʼAliki ko Sehova ki te fenua ʼo Iselaele: ‘Ko te fakaʼosi! Kua hoko te fakaʼosi ki te ʼu potu taupotu ʼe fa ʼo te fenua. 3 Kua hoko te fakaʼosi kia koe pea ʼe au fakato anai toku hauhau kia koe. ʼEi, ʼe au fakamauʼi anai koe ʼo mulimuli ki tau aga pea mo ʼau gaue fakalialia fuli ʼae neʼe ke fai. 4 ʼE mole au ʼofa tuʼa tahi anai kia koe mo manavaʼofa.+ ʼE au fakahoko anai kia koe te ʼu fua ʼo tau aga. ʼEi, ʼe ke tau anai mo te ʼu nunuʼa ʼo ʼau aga fakalialia ʼae neʼe ke fai.+ Pea ʼe ke iloʼi moʼoni anai ko au ia Sehova.’+

5 “Koʼeni te folafola ʼa te Tuʼi ʼAliki ko Sehova: ‘Koʼeni ʼe hoko mai he malaʼia, he malaʼia ʼe mole hona fakatatau.+ 6 ʼE haʼu te fakaʼosi, ʼei, ʼe haʼu anai ia. ʼE tuʼu ake anai ʼo to kia koe. ʼEi, ʼe haʼu ia! 7 Ko tokotou temi* ʼaeni, hahaʼi ʼo te fenua. ʼE haʼu te temi, kua ovi mai te ʼaho.+ ʼE ʼi ai te maveuveu ʼi te ʼu moʼuga kae mole ko he ʼu kalaga fakafiafia.

8 “ ‘ ʼE kei toe pe he kiʼi temi siʼi pea ʼe au fakato anai toku hauhau kia koe+ pea ʼe au huaʼi katoa anai toku ita kia koe.+ ʼEi, ʼe au fakamauʼi anai koe ʼo mulimuli ki tau aga pea mo ʼau gaue fakalialia fuli ʼae neʼe ke fai. 9 ʼE mole au ʼofa tuʼa tahi anai mo manavaʼofa.+ ʼE au fakahoko anai kia koe te ʼu fua ʼo tau aga. ʼEi, ʼe ke tau anai mo te ʼu nunuʼa ʼo ʼau aga fakalialia ʼae neʼe ke fai. Pea ʼe ke iloʼi moʼoni anai ko au ia Sehova ʼae ʼe ina tauteaʼi koe.+

10 “ ‘Koʼeni te ʼaho! ʼEi, ʼe haʼu!+ Ko tou temi* ʼaeni. Kua fisi te toko pea kua moto te fiameʼalahi. 11 Kua liliu te agamalohi ko te toko ʼo te agakovi.+ ʼE pulihi anai ia natou, mo ʼonatou koloa, mo ʼanatou hahaʼi pea mo ʼonatou tuʼulaga maʼuhiga. 12 ʼE hoko mai anai te temi, ʼei, ʼe hoko mai anai te ʼaho. Ke mole fiafia ia natou ʼae ʼe totogi koloa pea ke mole lotomamahi ia natou ʼae ʼe fakatau koloa he ʼe ita ia te ʼAtua ki te hahaʼi katoa ʼaia.*+ 13 ʼE mole toe liliu anai te tagata fakatau koloa ki te kele ʼae neʼe ina fakatau, tatau aipe pe ʼe kei maʼuli he ʼe ko te ʼu meʼa ʼae neʼe ha ʼe hoko anai ki te hahaʼi katoa ʼaia. ʼE mole toe liliu mai anai he tahi ia natou pea ʼe mole hao he tahi ia natou ʼuhi ko tana hala.*

14 “ ‘Kua pupuhi te fakatagi pupuhi+ pea kua tokalelei te hahaʼi fuli, kae ʼe mole alu he tahi ki te tau he ʼe au ita ki te hahaʼi katoa ʼaia.+ 15 ʼE hoko te tau ʼi tuʼa+ pea ʼe to te ʼu taʼi mahaki mo te hoge ʼi loto. ʼE mamate anai ia natou ʼae ʼe nonofo ʼi te tuʼa kolo ʼuhi ko te tau. Pea ʼe mamate anai ia natou ʼae ʼe nonofo ʼi te kolo ʼi te hoge mo te ʼu taʼi mahaki.+ 16 ʼE feholaki anai ki te ʼu moʼuga ia natou ʼae neʼe hao pea ʼe natou lauga fuli anai ʼi tanatou manatuʼi tanatou hala ohage ko te ʼu lupe ʼo te potu fenua laulelei.+ 17 ʼE vaivai anai ʼonatou nima mo palapala ʼonatou tuli.*+ 18 Kua natou tui ni taga*+ pea kua natou tekelili. ʼE natou ufiufi fuli anai mo ʼulu tula fuli.*+

19 “ ‘ ʼE natou laku anai ʼanatou siliva ʼi te ʼu ala mo fakalialia ki ʼanatou aulo. ʼE mole feala anai ke haofaki natou e ʼanatou siliva peʼe ko ʼanatou aulo ʼi te ʼaho ʼo te hauhau ʼo Sehova.+ ʼE mole feala anai ke natou makokona peʼe ke fonu ʼonatou fatu he ʼe ko te ʼu meʼa ʼaia* ʼae neʼe natou tukia ai mo higa ki te agahala. 20 Neʼe natou fiameʼameʼa ʼi te matalelei ʼo ʼanatou meʼa fakateuteu pea neʼe natou fakaʼaogaʼi* moʼo faʼu ʼaki ʼanatou fakatata fakalialia mo ʼanatou taula ʼatua fakalialia.+ Koia ʼe au fakaliliu anai te ʼu meʼa ʼaia* ko he ʼu meʼa ʼe natou fehihiʼa anai ki ai. 21 ʼE au tuku anai ke kaihaʼa te ʼu meʼa ʼaia e te kau matapule pea ke liliu ko he koloa maʼa te kau agakovi ʼo te kele pea ʼe natou moamoagaʼi anai.

22 “ ‘ ʼE au haga kehe anai mai ia natou+ pea ʼe moamoagaʼi anai toku nonoʼaga.* Pea ʼe ulufi anai e he kau kaihaʼa ʼo moamoagaʼi.+

23 “ ‘Faʼu he seini*+ he ʼe kua fonu te fenua ko ni faifakamau kaka ʼe tupu ai te faifakapo+ pea kua fonu te kolo ko te agamalohi.+ 24 ʼE au ʼaumai anai te hahaʼi agakovi ʼaupito ʼo te ʼu puleʼaga+ pea ʼe natou nofoʼi anai ʼonatou ʼapi.+ ʼE au fakagata anai te fiameʼalahi ʼa te kau malohi pea ʼe moamoagaʼi anai ʼonatou sagatualio.+ 25 ʼI te temi ʼae ka natou hoha ai ʼe natou kumi anai te tokalelei kae ʼe mole natou maʼu.+ 26 ʼE lahi anai te ʼu malaʼia ʼae ka hoko mo te ʼu logo ʼae ka tala. ʼE kumi anai e te hahaʼi ki te polofeta he meʼa neʼe ha kae ʼe mole hona fua.+ ʼE mole toe maʼu anai e te pelepitelo ia te lao* pea ʼe mole toe faitokoni te kau takitaki.+ 27 ʼE putu anai te hau,+ ʼe kofuʼi anai e te pule te lotomamahi pea ʼe tete anai te ʼu nima ʼo te hahaʼi ʼo te fenua ʼi tanatou matataku. ʼE au liufaki anai kia natou ʼo mulimuli pe ki tanatou aga pea ʼe au fakamauʼi anai natou ohage pe ko tanatou fakamauʼi ʼihi. Pea ʼe natou iloʼi moʼoni anai ko au ia Sehova.’ ”+

8 ʼI te nima ʼaho ʼi te ono mahina ʼo te ono taʼu, neʼe au nofo ʼi toku ʼapi pea neʼe heheka te kau takitaki ʼo Suta ʼi ʼoku muʼa. Neʼe puke au ʼi ai e te nima ʼo te Tuʼi ʼAliki ko Sehova. 2 Neʼe au sio leva pea koʼeni te meʼa neʼe hage ko he tagata pea neʼe toe hage ko he afi. Mai tona koga loto ki lalo ifo,+ neʼe hage tona sino ko he afi. Pea mai tona koga loto ki ʼoluga neʼe gigila ohage ko te aulo ʼae neʼe fio ʼaki te siliva.+ 3 Neʼe hage ko he nima ʼae neʼe ina faoʼi ʼo puke toku lauʼulu. Neʼe hiki leva au e he laumalie ki te ʼaele pea neʼe ʼi ai te meʼa neʼe ha mai mai te ʼAtua. Neʼe ina ʼave au ki Selusalemi ʼo kaku ki te huʼaga ʼo te matapa ʼo te malaʼe ʼae ʼi loto+ ʼe haga ki te potu noleto. Neʼe tuʼu ai te fakatata ʼae ʼe ina fakatupu te maheka ʼo te ʼAtua.+ 4 Pea koʼeni, neʼe ha ʼi ai te kololia ʼo te ʼAtua ʼo Iselaele+ ohage ko te meʼa ʼae neʼe ha mai kia au ʼi taku nofo ʼi te potu fenua laulelei.+

5 Neʼe ina ui mai leva: “Foha ʼo te tagata, fakalelei siʼou loto, hiki ake ʼou mata ʼo sio ki te potu noleto.” Neʼe au hiki ake ai ʼoku mata ʼo sio ki te potu noleto. Pea koʼeni ʼi te potu noleto ʼo te matapa ʼo te ʼaletale, ʼi te huʼaga, neʼe tuʼu ai te fakatata ʼo te maheka. 6 Pea neʼe ina ui mai: “Foha ʼo te tagata, ʼe ke sio la ki te ʼu meʼa kovi mo fakalialia ʼae ʼe fai ʼi heni e te hahaʼi ʼo Iselaele,+ te ʼu meʼa ʼae ʼe tupu ai taku fakamamaʼo mai toku sagatualio?+ Kae ʼe kovi age te ʼu meʼa fakalialia ʼae ka ke sio ki ai.”

7 Neʼe ina ʼave leva au ki te huʼaga ʼo te malaʼe pea neʼe au sio ki he pu ʼi te kaupa. 8 Neʼe ina ui mai: “Foha ʼo te tagata, fakalelei siʼou loto, pūhi te kaupa.” Neʼe au pūhi ai pea neʼe au sio leva ki he huʼaga. 9 Neʼe ina ui mai leva: “Ulu ki loto ʼo sio ki te ʼu meʼa kovi mo fakalialia ʼae ʼe natou fai ʼi heni.” 10 Neʼe au ulu ai ki loto pea neʼe au sio ki ni pāki ʼo ni manu totolo kehekehe, mo ni manu fakalialia+ pea mo te ʼu fakatata fakalialia* fuli ʼa te hahaʼi ʼo Iselaele+ kua togi ʼi te takafoli ʼo te kaupa. 11 Pea neʼe tutuʼu ʼi ʼonatou muʼa he kau takitaki ʼe toko 70 ʼo te hahaʼi ʼo Iselaele. Pea neʼe kau ai ia Saasania foha ʼo Safani.+ Neʼe natou tahi puke tana tutuʼaga iseso pea neʼe alu ake tona ʼaele magoni.+ 12 Neʼe ina ui mai: “Foha ʼo te tagata, ʼe ke sio la ki te meʼa ʼae ʼe fai e te kau takitaki ʼo te hahaʼi ʼo Iselaele ʼi te fakapoʼuli? ʼE natou tahi nofo ʼi te ʼu koga fale taupotu ʼae ʼe tutuʼu ai ʼanatou fakatata pea ʼe natou ui: ‘ ʼE mole sio mai ia Sehova. Kua mavae ia Sehova ʼi te fenua.’ ”+

13 Pea neʼe ina ui mai: “ ʼE ke sio anai ki ʼihi meʼa fakalialia ʼe natou fai pea ʼe toe kovi age la ia.” 14 Neʼe ina ʼave au ki te huʼaga ʼo te matapa ʼo te potu noleto ʼo te fale ʼo Sehova pea koʼeni neʼe au sio ai ki ni fafine neʼe felalāʼi ʼo tagiʼi te ʼatua ko Tamusi.

15 Neʼe ina toe ui mai: “Foha ʼo te tagata, ʼe ke sio la ki te ʼu meʼa ʼaia? ʼE ke sio anai ki te ʼu meʼa fakalialia ʼe toe kovi age ia ʼi te ʼu meʼa ʼaeni.”+ 16 Neʼe ina ʼave leva au ki te malaʼe ʼae ʼi loto ʼo te fale ʼo Sehova.+ ʼI te huʼaga ʼo te fale lotu ʼo Sehova, ʼi te vaha ʼo te fakamalumaluʼaga mo te ʼaletale, neʼe nonofo ai ni tagata ʼe teitei toko 25. Neʼe natou situʼa ki te fale lotu ʼo Sehova ʼo haga ki te potu esite pea neʼe natou tulolo ki te potu esite, ia muʼa ʼo te laʼa.+

17 Pea neʼe ina ui mai: “Foha ʼo te tagata, ʼe ke sio la ki te ʼu meʼa ʼaia? ʼE ko he meʼa noa koa maʼa te hahaʼi ʼo Suta tanatou fai te ʼu meʼa fakalialia ʼaia, tanatou fakamafola ʼi te fenua te agamalohi+ mo tanatou haga ʼo fakamamahiʼi au? Koʼeni, kua natou fakaovi mai leva ia he kiʼi vaʼa ʼakau* ki toku ihu! 18 ʼE au fakato anai toku hauhau kia natou. ʼE mole au ʼofa tuʼa tahi anai mo manavaʼofa.+ ʼE natou fiu anai ʼi te kalaga leʼo lahi mai ki ʼoku taliga, kae ʼe mole au logo anai kia natou.”+

9 Pea neʼe kalaga leʼo lahi ki ʼoku taliga ʼo ina ui: “Kotou pauʼi ia natou ʼae ka natou tauteaʼi te kolo, ʼo takitahi mo ia tana mahafu fakatupu maumau!”

2 Neʼe au sio neʼe ʼomai ni tagata ʼe toko ono mai te ala ʼo te matapa maʼoluga+ ʼae ʼe haga ki te potu noleto. Pea neʼe natou tahi puke tana mahafu moʼo matehi. Neʼe fakatahi mo natou te tagata neʼe ina tui tona kofu lino* pea neʼe haʼi ʼi tona koga loto he ʼaiʼaga vaitohi ʼa he sikalaipe. Neʼe natou ʼomai leva ʼo tutuʼu ovi ki te ʼaletale kapa.+

3 Pea neʼe malaga ake te kololia ʼo te ʼAtua ʼo Iselaele+ mai te ʼu fuga kelupimi ʼo alu ki te muʼa matapa ʼo te fale.+ Pea neʼe kalaga te ʼAtua ki te tagata ʼae neʼe ina tui tona kofu lino mo haʼi ʼi tona koga loto te ʼaiʼaga vaitohi ʼa he sikalaipe. 4 Neʼe ui e Sehova kia ia: “Foliʼi te kolo ʼo Selusalemi ʼo fakailoga te laʼe ʼo te hahaʼi ʼae ʼe mamahi pea mo fetagihi+ ʼuhi ko te ʼu meʼa fakalialia fuli ʼae ʼe fai ʼi te kolo.”+

5 Pea neʼe au logo ki tana ui ki te ʼu tagata ʼae: “Kotou muliʼi ia ia ʼo kotou foliʼi te kolo pea kotou tamateʼi te hahaʼi. ʼAua naʼa kotou ʼoʼofa mo manavaʼofa.+ 6 ʼE kotou matematehi fuli anai te kau matuʼa, te kau tupulaga, te ʼu taʼahine taupoʼou, te ʼu toe liliki mo te ʼu fafine.+ Kae ʼaua pe naʼa kotou fakaovi ki he tahi kua fakailoga.+ ʼE tonu anai ke kotou kamata ʼi toku sagatualio.”+ Neʼe natou kamata ai ʼi te kau takitaki ʼae neʼe nonofo ʼi te muʼa fale.+ 7 Pea neʼe ina ui kia natou: “Kotou moamoagaʼi te fale pea kotou fakafonu te ʼu malaʼe ʼaki te ʼu mate.+ Kotou olo la ʼo fakahoko!” Neʼe natou olo ai ʼo tamateʼi te hahaʼi ʼo te kolo.

8 Neʼe natou tamateʼi ia natou pea ko au pe neʼe kei maʼuli. Neʼe au punou leva mo tulolo ki te kele ʼo kalaga: “Oiaue, Tuʼi ʼAliki ko Sehova! ʼE ke matehi anai koa ia natou fuli ʼae ʼe kei toe ʼi Iselaele ʼo fakato tou hauhau ki Selusalemi?”+

9 Neʼe ina tali mai: “ ʼE mamafa ʼaupito te hala ʼa te hahaʼi ʼo Iselaele pea mo Suta.+ Kua mafola ʼi te fenua te faifakapo+ pea ʼi te kolo te agakaka.+ ʼE natou ui: ‘Kua mavae ia Sehova ʼi te fenua. ʼE mole sio ia Sehova.’+ 10 Pea ko au ʼe mole au ʼofa tuʼa tahi anai mo manavaʼofa.+ ʼE au liufaki anai kia natou te ʼu fua ʼo tanatou aga.”

11 Pea neʼe au sio ki te tagata ʼae neʼe ina tui tona kofu lino mo haʼi ʼi tona koga loto te ʼaiʼaga vaitohi ʼe ina fakamatala te ʼu meʼa ʼae neʼe hoko. Neʼe ina ui: “Neʼe au fai pe te meʼa ʼae neʼe ke fakatotonu mai.”

10 Neʼe au sio leva pea koʼeni ʼi ʼoluga ʼo te meʼa ʼae neʼe hage ko he lauʼi sioʼata ʼae neʼe ʼi ʼoluga ʼo te ʼu ʼulu ʼo te ʼu kelupimi, neʼe ʼi ai te meʼa neʼe hage ko te maka ʼae ko te safile pea neʼe hage ko he hekaʼaga fakahau.+ 2 Neʼe ui leva e te ʼAtua ki te tagata ʼae neʼe ina tui tona kofu lino:+ “Fakalaka ʼi te vaha ʼo te ʼu foʼi teka,+ ʼi lalo ʼo te ʼu kelupimi. Fakafonu ʼou nima ʼaki ni mamala kakaha+ ʼe ke toʼo anai mai te vaha ʼo te ʼu kelupimi pea ke laku ki te kolo.”+ Neʼe alu ai kae au lolotoga sioʼi.

3 ʼI te hoho atu ʼa te tagata, neʼe tutuʼu te ʼu kelupimi ʼi te faʼahi mataʼu ʼo te fale pea neʼe ʼaofi e te ʼao te malaʼe ʼae ʼi loto. 4 Pea neʼe malaga ake te kololia ʼo Sehova+ mai te ʼu fuga kelupimi ʼo alu ki te muʼa matapa ʼo te fale. Neʼe ʼaofi mamalie te fale e te ʼao+ pea neʼe malamagia te malaʼe ʼi te kololia ʼo Sehova. 5 Pea neʼe logo te logoaʼa ʼo te ʼu pakakau ʼo te ʼu kelupimi ʼi te malaʼe ʼae ʼi tuʼa. Neʼe hage ko te logoaʼa ʼae moka palalau te ʼAtua Mafimafi.+

6 Pea neʼe ina fakatotonu ki te tagata ʼae neʼe ina tui tona kofu lino: “Toʼo he afi ʼi te vaha ʼo te ʼu foʼi teka, ʼi te vaha ʼo te ʼu kelupimi.” Neʼe hoho atu leva te tagata ʼo tuʼu ia tafa ʼo he foʼi teka. 7 Neʼe faoʼi leva e he kelupimi tona nima ki te afi ʼi te vaha ʼo te ʼu kelupimi.+ Neʼe ina toʼo ni mamala kakaha ʼo ʼai ki te ʼu nima ʼo te tagata ʼae neʼe ina tui tona kofu lino,+ ʼo ina puke ai mo hu ki tuʼa. 8 ʼI te ʼu lalo pakakau ʼo te ʼu kelupimi, neʼe hage neʼe ʼi ai honatou ʼu nima.+

9 Neʼe au sio leva pea koʼeni neʼe ʼi ai ni foʼi teka ʼe fa ia tafa ʼo te ʼu kelupimi, ko he foʼi teka ʼe tahi ia tafa ʼo te kelupimi takitahi. Pea neʼe gigila te ʼu foʼi teka ohage ko te maka ʼae ko te kisolite.+ 10 Neʼe tatau te agaaga ʼo te ʼu foʼi teka ʼe fa. Neʼe hage ia ko he foʼi teka ʼi he loto foʼi teka. 11 Ka natou feoloʼaki ʼi te ʼu faʼahi ʼe fa, ʼe feala ke natou olo ki he faʼahi pe kae ʼe mole natou femafuliʼaki. Neʼe natou olo ki te faʼahi ʼae neʼe haga ki ai te ʼulu ʼo mole natou femafuliʼaki. 12 Neʼe fonu te ʼu sino katoa ʼo te ʼu kelupimi ko ni mata, ʼo kau ai mo ʼonatou tuʼa, mo ʼonatou nima pea mo ʼonatou pakakau. Neʼe toe feia pe mo te ʼu foʼi teka, te ʼu foʼi teka ʼo te ʼu kelupimi ʼe fa.+ 13 Pea neʼe au logo leva ki he leʼo neʼe kalaga ki te ʼu foʼi teka: “ ʼU foʼi teka!”

14 Neʼe natou tahi maʼu fofoga ʼe fa. Ko te ʼuluaki neʼe fofoga kelupimi, ko te lua neʼe fofoga tagata, ko te tolu neʼe fofoga laione pea ko te fa neʼe fofoga akuila.+

15 Neʼe malaga leva te ʼu kelupimi (neʼe ko te ʼu ʼaselo ʼae neʼe au sio ki ai ʼi te vaʼe vai tafe ʼo Kepile+), 16 pea ka feoloʼaki te ʼu kelupimi ʼe feoloʼaki mo te ʼu foʼi teka ʼi ʼonatou tafa. Pea ka folahi e te ʼu kelupimi ʼonatou pakakau ki ʼoluga ke natou malaga ʼo maʼoluga ʼaupito ʼi te kele, neʼe mole femafuliʼaki te ʼu foʼi teka pea neʼe mole natou mamaʼo mai ia natou.+ 17 Ka natou tutuʼu ʼe toe tutuʼu ai mo te ʼu foʼi teka pea ka natou malaga ʼe toe malaga ai mo te ʼu foʼi teka he ʼe ko te laumalie ʼae neʼe gaue ʼi te ʼu ʼaselo neʼe toe nofo foki ʼi te ʼu foʼi teka.

18 Neʼe mavae leva te kololia ʼo Sehova+ mai ʼoluga ʼo te muʼa matapa ʼo te fale ʼo alu ʼo tuʼu ʼi te ʼu fuga kelupimi.+ 19 Neʼe au sio leva pea koʼeni neʼe folahi e te ʼu kelupimi ʼonatou pakakau ki ʼoluga mo natou malaga ʼi te kele. ʼI tanatou olo neʼe toe olo fakatahi mo natou te ʼu foʼi teka. Neʼe natou tutuʼu ʼi te huʼaga ʼo te matapa ʼo te potu esite ʼo te fale ʼo Sehova. Neʼe ha ai te kololia ʼo te ʼAtua ʼo Iselaele ʼi ʼoluga ʼo natou.+

20 Neʼe ko te ʼu ʼaselo ʼaia neʼe au sio ki ai ʼi lalo ʼo te hekaʼaga fakahau ʼo te ʼAtua ʼo Iselaele ʼi te vaʼe vai tafe ʼo Kepile.+ Neʼe au mahino ai leva neʼe ko te ʼu kelupimi. 21 Neʼe natou tahi maʼu fofoga ʼe fa mo pakakau ʼe fa pea neʼe hage neʼe ʼi ai honatou ʼu nima ʼi ʼonatou lalo pakakau.+ 22 Pea neʼe tatau te agaaga ʼo ʼonatou fofoga mo te ʼu fofoga ʼae neʼe au sio ki ai ovi ki te Kepile.+ Neʼe natou tahi alu fakahagatonu ki muʼa.+

11 Neʼe hiki leva au e he laumalie ʼo ʼave ki te matapa ʼo te potu esite ʼo te fale ʼo Sehova, te matapa ʼae ʼe haga ki te potu esite.+ ʼI te huʼaga ʼaia neʼe au sio ki ni tagata ʼe toko 25. Neʼe kau ai ia Saasania foha ʼo Asuli pea mo Pelatia foha ʼo Penaia, ko ni tama ʼaliki ʼo te hahaʼi.+ 2 Pea neʼe ui mai e te ʼAtua: “Foha ʼo te tagata, ko te ʼu tagata ʼaia ʼae ʼe natou fai ni fakatuʼutuʼu kaka pea mo foaki ni tokoni ʼe kovi ʼi te kolo ʼaia. 3 ʼE natou ui: ‘Ko te temi ʼaeni ke laga ai ni fale.+ ʼE hage te kolo* ko te kulo+ pea ʼe tou hage ko te kanoʼi manu.’

4 “Koia fakakikite te meʼa ʼae ka hoko kia natou. Fakakikite, foha ʼo te tagata!”+

5 Neʼe gaue leva te laumalie ʼo Sehova ia au+ pea neʼe ui mai e te ʼAtua: “ ʼE ke ui anai kia natou: ‘Koʼeni te folafola ʼa Sehova: “Hahaʼi ʼo Iselaele, ʼe tonu te meʼa ʼae neʼe kotou ui, pea ʼe au iloʼi ʼakotou manatu. 6 Ko te tokolahi neʼe mamate ʼi te kolo ʼaia ʼuhi ko koutou, ʼo fonu mate ai te ʼu ala.” ’ ”+ 7 “Koia koʼeni te folafola ʼa te Tuʼi ʼAliki ko Sehova: ‘Ko te ʼu sino mate ʼae neʼe kotou fakaleta haʼele ʼi te kolo ko te kanoʼi manu pea ko te kolo ko te kulo.+ Kae ʼe fakamavae anai koutou mai ai.’ ”

8 “ ‘Neʼe kotou matataku ʼi te heleta+ pea ko te heleta ʼae ka au fakaʼaogaʼi moʼo matehi ʼo koutou,’ ko te ui ʼaia ʼa te Tuʼi ʼAliki ko Sehova. 9 ‘ ʼE au fakamavae anai koutou ʼi te kolo, ʼe au tuku anai koutou ki ni kau matapule pea ʼe au tauteaʼi anai koutou.+ 10 ʼE kotou mamate anai ʼi te heleta.+ ʼE au fakamauʼi anai koutou ʼi te tuʼakoi ʼo Iselaele+ pea ʼe kotou iloʼi moʼoni anai ko au ia Sehova.+ 11 ʼE mole hage anai te kolo ko he kulo kia koutou pea ʼe mole kotou hage anai ko te kanoʼi manu ʼae ʼi loto. ʼE au fakamauʼi anai koutou ʼi te tuʼakoi ʼo Iselaele, 12 pea ʼe kotou iloʼi moʼoni anai ko au ia Sehova. Neʼe mole kotou fakaʼapaʼapa ki ʼaku lao pea neʼe mole kotou mulimuli ki ʼaku lekula+ kae neʼe kotou mulimuli ki te ʼu lekula ʼo te ʼu puleʼaga ʼae ʼi ʼokotou tafaʼaki.’ ”+

13 ʼI taku fakaha te lea fakapolofeta ʼaia, neʼe mate atu aipe ia Pelatia foha ʼo Penaia. Neʼe au punou ai ʼo tulolo ki te kele mo kalaga: “Oiaue, Tuʼi ʼAliki ko Sehova! ʼE ke pulihi anai koa ia natou ʼae ʼe kei toe ʼi Iselaele?”+

14 Neʼe toe palalau mai ia Sehova, ʼo ina ui: 15 “Foha ʼo te tagata, neʼe ui e te hahaʼi ʼo Selusalemi ki ʼou tehina, ʼou tehina ʼae ʼe natou maʼu te fealagia ke natou totogi te ʼu kele, ʼo feia ki te hahaʼi katoa ʼo Iselaele: ‘Kotou nonofo mamaʼo ia Sehova. ʼE ʼa matou te fenua pea neʼe foaki mai ko homatou kele.’ 16 Koia ʼe ke ui anai kia natou: ‘Koʼeni te folafola ʼa te Tuʼi ʼAliki ko Sehova: “Neʼe au fakamamaʼo natou ke olo ʼo maʼuli ʼi te u puleʼaga pea ke mavetevete ʼi te ʼu fenua,+ kae ʼe au liliu anai ʼi he kiʼi temi ko he sagatualio maʼa natou ʼi te ʼu fenua ʼae neʼe natou olo ki ai.” ’+

17 “Koia ʼe ke ui anai kia natou: ‘Koʼeni te folafola ʼa te Tuʼi ʼAliki ko Sehova: “ ʼE au fakatahiʼi anai koutou mai te ʼu puleʼaga, ʼe au tanaki anai koutou mai te ʼu fenua ʼae neʼe kotou mavetevete ai pea ʼe au foaki atu anai te fenua ʼo Iselaele.+ 18 ʼE natou toe liliu mai anai ʼo pulihi ʼi ai te ʼu meʼa fakalialia fuli pea mo te ʼu agakovi fuli.+ 19 ʼE au foaki anai kia natou he loto ʼe tahi+ pea ʼe au ʼai anai kia natou he ʼatamai ʼe foʼou.+ ʼE au toʼo anai mai ʼonatou sino ʼonatou mafu maka+ kae ʼe au foaki anai kia natou he mafu kakano,*+ 20 ke natou fakaʼapaʼapa ki ʼaku fakatotonu, ke natou fakalogo ki ʼaku lekula pea mo maʼuliʼi. ʼE natou liliu ai leva ko taku hahaʼi pea ʼe au liliu anai ko tonatou ʼAtua.” ’

21 “ ‘ “Kae ko natou ʼae ʼe mole natou fia liʼaki ʼanatou meʼa fakalialia mo ʼanatou agakovi, ʼe au liufaki anai kia natou te ʼu fua ʼo tanatou aga,” ko te ui ʼaia ʼa te Tuʼi ʼAliki ko Sehova.’ ”

22 Neʼe folahi leva e te ʼu kelupimi ʼonatou pakakau ki ʼoluga. Neʼe tutuʼu ovi kia natou te ʼu foʼi teka+ pea neʼe ha te kololia ʼo te ʼAtua ʼo Iselaele ʼi ʼoluga ʼo natou.+ 23 Pea neʼe malaga ake te kololia ʼo Sehova+ mai ʼoluga ʼo te kolo ʼo alu ʼo tuʼu ʼi ʼoluga ʼo te moʼuga ʼae ʼi te potu esite ʼo te kolo.+ 24 Neʼe ha mai leva he meʼa mai te laumalie ʼo te ʼAtua, neʼe hiki ai au e he laumalie ʼo ʼave ki te kau popula ʼi Kaletea. Pea neʼe puli ai te meʼa ʼae neʼe ha mai kia au. 25 Neʼe au fakamatala ai ki te kau popula ia te ʼu meʼa fuli ʼae neʼe fakaha mai e Sehova.

12 Neʼe toe palalau mai ia Sehova, ʼo ina ui: 2 “Foha ʼo te tagata, ʼe ke maʼuli ʼi he hahaʼi agatuʼu. ʼE ʼi ai ʼonatou mata kae ʼe mole natou sisio, ʼe ʼi ai ʼonatou taliga kae ʼe mole natou logo,+ he ʼe ko he hahaʼi agatuʼu.+ 3 Kae ko koe foha ʼo te tagata, teuteuʼi tau kato ke ke alu ʼo maʼuli popula. Pea ʼi te ʼaho, ʼe ke alu anai ohage ko he tahi ʼe ʼave popula kae natou sisio atu. ʼI ʼonatou muʼa ʼe ke mavae anai mai tou ʼapi ʼo alu ki he tahi koga meʼa ohage ko he tahi ʼe ʼave popula. ʼE lagi malave anai kia natou te aluʼaga ʼaia logo la ko he hahaʼi agatuʼu. 4 ʼI te ʼaho, ʼe ke toʼo anai tau kato mai io koe ʼi ʼonatou muʼa ke ke alu ʼo maʼuli popula. Pea ʼi te afiafi ʼe natou sisio atu anai ki tau alu ohage ko he tahi ʼe ʼave popula.+

5 “ ʼI ʼonatou muʼa, ʼe ke pūhi anai te kaupa ke ke tuku ai ki tuʼa tau kato.+ 6 ʼI ʼonatou muʼa, ʼe ke hili anai tau kato ki tou fuga ʼuma pea ke hu ki tuʼa ʼi te fakapoʼuli. ʼUʼufi tou fofoga ke mole ke sio ki te kele he ʼe au fakaliliu koe ko he fakailoga maʼa te hahaʼi ʼo Iselaele.”+

7 Neʼe au fai leva te meʼa ʼae neʼe ina fakatotonu mai. ʼI te ʼaho, neʼe au toʼo mai io ʼoku taku kato ohage ko he kato neʼe au teuteuʼi ke au alu ʼo maʼuli popula. ʼI te afiafi neʼe au pūhi nima te kaupa. Pea ʼi te kua fakapoʼuli leva neʼe au ʼamo taku kato ʼo hu ki tuʼa kae natou sisio mai.

8 ʼI te ʼaho ake, neʼe toe palalau mai ia Sehova, ʼo ina ui: 9 “Foha ʼo te tagata, neʼe mole fehuʼi atu pe la e te hahaʼi ʼo Iselaele, te hahaʼi agatuʼu ʼaia pe kotea ʼae ʼe ke fai? 10 Ui age kia natou: ‘Koʼeni te folafola ʼa te Tuʼi ʼAliki ko Sehova: “ ʼE fakahagahaga te folafola ʼaia ki te pule+ ʼae ʼi Selusalemi mo te hahaʼi katoa ʼo Iselaele ʼae ʼi te kolo.” ’

11 “Ui age kia natou ko koe ko he fakailoga+ pea ko te aluʼaga ʼae neʼe ke faʼifaʼitakiʼi ko te meʼa ʼaia ka hoko kia natou. ʼE ʼave popula anai natou.+ 12 Ko ʼae ʼe pule ia natou ʼe ina ʼamo anai tana kato ʼo alu ʼi te fakapoʼuli. ʼE ina pūhi anai te kaupa ʼo tuku ai ki tuʼa tana kato.+ Pea ʼe ina ʼuʼufi anai tona fofoga ke mole sio ki te kele. 13 ʼE au li anai ki ai taku kupega pea ʼe maʼua ai.+ ʼE au ʼave anai ia ia ki Papiloni ki te fenua ʼo te kau Kaletea kae ʼe mole sio anai ki ai. Pea ʼe mate ai anai.+ 14 ʼE au fakamavetevete anai ʼi te ʼu faʼahi fuli ia natou fuli ʼae ʼi ʼona tafa, ʼana tagata tokoni gaue mo ʼana kau solia.+ Pea ʼe au tohoʼi anai he heleta ʼo tuli ʼaki natou.+ 15 Pea ʼe natou iloʼi moʼoni anai ko au ia Sehova moka au fakamavetevete natou ʼi te ʼu puleʼaga, ʼei, moka au fakamavetevete natou ʼi te ʼu fenua. 16 Kae ʼe au haofaki anai ʼihi ia natou ʼi te tau, mo te hoge pea mo te ʼu taʼi mahaki. Pea ʼe natou fakamatala anai ʼi te ʼu puleʼaga ʼae ka natou olo ki ai te ʼu aga fakalialia fuli neʼe natou fai. Pea ʼe natou iloʼi moʼoni anai ko au ia Sehova.”

17 Neʼe toe palalau mai ia Sehova, ʼo ina ui: 18 “Foha ʼo te tagata, ʼe ke kai anai tau pane ʼi te mataku pea ʼe ke inu anai tau vai ʼi te lotohoha mo te lototuʼania.+ 19 Ui age ki te hahaʼi ʼo te fenua: ‘Koʼeni te folafola ʼa te Tuʼi ʼAliki ko Sehova ʼo ʼuhiga mo te hahaʼi ʼo Selusalemi ʼae ʼe nonofo ʼi te fenua ʼo Iselaele: “ ʼE natou kai anai tanatou pane ʼi te lototuʼania pea ʼe natou fakalialia anai ʼi te inu ʼo tanatou vai he ʼe liliu anai tonatou fenua ko he koga meʼa ʼe tuʼu lavaki+ ʼuhi ko te agamalohi ʼa natou fuli ʼae ʼe nonofo ai.+ 20 ʼE maumauʼi anai te ʼu kolo ʼae ʼe nofoʼi mo liliu te fenua ko he toafa.+ Pea ʼe kotou iloʼi moʼoni anai ko au ia Sehova.” ’ ”+

21 Neʼe toe palalau mai ia Sehova, ʼo ina ui: 22 “Foha ʼo te tagata, ʼe mole ʼi ai koa la he taʼaga lea fenei ʼi Iselaele: ‘ ʼE fakalaka te ʼu ʼaho kae ʼe mole hoko te ʼu meʼa ʼae neʼe ha’?+ 23 Koia ui age kia natou: ‘Koʼeni te folafola ʼa te Tuʼi ʼAliki ko Sehova: “ ʼE au fakagata anai te takuga ʼaia pea ʼe mole toe fakaʼaogaʼi ai e he tahi ohage ko he taʼaga lea ʼi Iselaele.” ’ Kae ui age kia natou: ‘Kua ovi mai te ʼu ʼaho+ pea ʼe hoko anai te ʼu meʼa fuli ʼae neʼe ha.’ 24 ʼE mole toe ha anai ni meʼa kaka pea ʼe mole toe ʼi ai he fakakikite fakalai* ʼi te hahaʼi ʼo Iselaele.+ 25 ‘ “Ko au ia Sehova ʼe au palalau anai. ʼE hoko fakavilivili anai te ʼu folafola fuli ʼae ka au tala.+ Hahaʼi agatuʼu, ʼe au tala anai te folafola mo fakahoko ʼi takotou kei maʼuʼuli,”+ ko te ui ʼaia ʼa te Tuʼi ʼAliki ko Sehova.’ ”

26 Neʼe toe palalau mai ia Sehova, ʼo ina ui: 27 “Foha ʼo te tagata, koʼeni te meʼa ʼae ʼe ui e te hahaʼi ʼo Iselaele: ‘Ko te meʼa ʼae neʼe ha kia ia heʼeki vave hoko ia pea ʼe kei mamaʼo te fakahoko ʼo te ʼu lea fakapolofeta ʼae neʼe ina tala.’+ 28 Koia ui age kia natou: ‘Koʼeni te folafola ʼa te Tuʼi ʼAliki ko Sehova: “ ‘ ʼE mole tuai anai te fakahoko ʼo ʼaku folafola fuli, ʼei, ʼe hoko moʼoni anai,’ ko te ui ʼaia ʼa te Tuʼi ʼAliki ko Sehova.” ’ ”

13 Neʼe toe palalau mai ia Sehova, ʼo ina ui: 2 “Foha ʼo te tagata, fakakikite te malaʼia ʼae ka hoko ki te kau polofeta ʼo Iselaele,+ pea ʼe ke ui anai kia natou ʼae ʼe natou faʼufaʼu ʼanatou fakakikite:+ ‘Kotou fakalogo ki te folafola ʼa Sehova. 3 Koʼeni te folafola ʼa te Tuʼi ʼAliki ko Sehova: “Malaʼia ki te kau polofeta vavale ʼae ʼe mulimuli ki ʼanatou manatu kae neʼe mole ha he meʼa kia natou.+ 4 Siʼi Iselaele, kua hage ʼau polofeta ko he ʼu lenato ʼi ni koga meʼa maumau. 5 Kua pūpū te ʼu kaupa maka kae ʼe mole kotou olo anai ʼo toe gaohi moʼo tokoni ki te hahaʼi ʼo Iselaele,+ ke katakiʼi ai e Iselaele te tau ʼi te ʼaho ʼo Sehova.”+ 6 “Ko natou ʼae ʼe natou ui: ‘Koʼeni te folafola ʼa Sehova,’ neʼe ha kia natou ni meʼa kaka mo natou fakakikite he loi kae neʼe mole fekauʼi natou e Sehova pea neʼe natou talitali foki ke hoko tanatou fakakikite.+ 7 ʼE mole koa la ko ni meʼa kaka ʼae neʼe ha kia koutou peʼe mole koa la ko he loi ʼae neʼe kotou fakakikite ʼi takotou ui: ‘Koʼeni te folafola ʼa Sehova,’ kae neʼe mole au fakaha atu pe la he meʼa?” ’

8 “ ‘Koia koʼeni te folafola ʼa te Tuʼi ʼAliki ko Sehova: “ ‘ ʼE au fakafeagai anai kia koutou he neʼe kotou fai ni palalau kaka pea ko te ʼu meʼa ʼae neʼe ha kia koutou ko te loi,’ ko te ui ʼaia ʼa te Tuʼi ʼAliki ko Sehova.”+ 9 Kua au faoʼi toku nima moʼo tauteaʼi te kau polofeta ʼae neʼe ha kia natou ni meʼa kaka pea mo natou fakakikite he loi.+ ʼE mole natou kau anai ki ʼoku kaumeʼa lelei, ʼe mole tuʼu ʼonatou higoa ʼi te tohi ʼa te hahaʼi ʼo Iselaele pea ʼe mole natou toe liliu anai ki te fenua ʼo Iselaele. Pea ʼe kotou iloʼi moʼoni anai ko au ia te Tuʼi ʼAliki ko Sehova.+ 10 Kotea te tupuʼaga ʼo te ʼu meʼa fuli ʼaia? Koteʼuhi neʼe natou fakahehe taku hahaʼi ʼo ui: “ ʼE ʼi ai te tokalelei!” kae ʼe mole he tokalelei.+ ʼE laga e he tahi ia he kaupa ʼe mole tuʼu malohi kae haga natou ʼo fakamomole ʼaki te lahe.’*+

11 “Ui age kia natou ʼae ʼe natou fakamomole ʼaki te lahe ʼe holo anai ia. ʼE to anai he ʼua lalahi mo he ʼuamaka pea ʼe agi mai ni tuʼani matagi ʼo maumau ai.+ 12 Pea ka holo te kaupa ʼe fehuʼi atu anai: ‘Kofea te lahe ʼae neʼe kotou fakamomole ʼaki?’+

13 “Koʼeni leva te folafola ʼa te Tuʼi ʼAliki ko Sehova: ‘ ʼI toku hauhau ʼe au fakaagi anai ni tuʼani matagi, ʼei, ʼi toku hauhau ʼe au fakato anai he ʼua lalahi pea ʼi te lahi ʼo toku ita ʼe au fakato anai he ʼuamaka. 14 ʼE au maumauʼi anai te kaupa ʼae neʼe kotou fakamomole ʼaki te lahe pea mo au holoʼi ʼo ha ai ʼona fakatafito. ʼE kotou mamate anai ʼi te loto kolo moka maʼu. Pea ʼe kotou iloʼi moʼoni anai ko au ia Sehova.’

15 “ ‘Ka au fakato katoa toku hauhau ki te kaupa pea mo natou ʼae neʼe natou fakamomole ʼaki te lahe, ʼe au ui atu anai: “Kua puli te kaupa pea mo natou ʼae neʼe natou fakamomole.+ 16 Kua pupuli te kau polofeta ʼo Iselaele, ia natou ʼae neʼe faifakakikite ʼo ʼuhiga mo Selusalemi pea mo ha kia natou te tokalelei ʼo te kolo kae neʼe mole ʼi ai he tokalelei,” ’+ ko te ui ʼaia ʼa te Tuʼi ʼAliki ko Sehova.

17 “Kae ko koe foha ʼo te tagata, tokagaʼi te ʼu taʼahine ʼo tau hahaʼi, ʼae ʼe natou faʼufaʼu ʼanatou fakakikite, pea ke fakakikite te malaʼia ʼae ka hoko kia natou. 18 Ui age kia natou: ‘Koʼeni te folafola ʼa te Tuʼi ʼAliki ko Sehova: “Malaʼia ki te ʼu fafine ʼae ʼe natou tui ni lipine ke haʼi ki te ʼu nima fuli* mo fai ni pulou maʼa natou ʼae ʼe lalahi pea mo liliki. Pea ʼe kotou faigaʼi ke fai e taku hahaʼi te meʼa ʼae ʼe kotou loto ki ai. Koia ʼe kotou fakatupu tuʼutamaki ki te maʼuli ʼo taku hahaʼi. Kae ʼi takotou manatu, ʼe feala koa ke kotou puipui ʼokotou maʼuli? 19 ʼE kotou moamoagaʼi anai koa au ia muʼa ʼo taku hahaʼi ke kotou maʼu ni lukuga olose mo ni toega pane?+ ʼE kotou fakamatala ni loi ki taku hahaʼi ʼo natou fagono ki ai. Pea ʼe kotou matehi ai ia natou ʼae ʼe mole tonu ke mamate kae ʼe kotou tuku ke maʼuli ia natou ʼae ʼe mole tonu ke maʼuʼuli!” ’+

20 “Koia koʼeni te folafola ʼa te Tuʼi ʼAliki ko Sehova: ‘ ʼU fafine, ʼe mole au tukunoaʼi anai ʼakotou lipine ʼae ʼe kotou fakaʼaogaʼi ke fai e te hahaʼi te meʼa ʼae ʼe kotou loto ki ai ohage ko ni manulele. ʼEi, ʼe au taʼaki anai ʼakotou lipine ʼae ʼi ʼokotou nima pea ʼe au fakaʼateainaʼi anai te hahaʼi ʼae ʼe kotou puleʼi ohage ko ni manulele. 21 ʼE au taʼaki anai ʼokotou pulou mo fakaʼateainaʼi taku hahaʼi mai ia koutou. ʼE mole natou toe hage anai kia koutou ko he meʼa ʼe kapu pea mo puke. Pea ʼe kotou iloʼi moʼoni anai ko au ia Sehova.+ 22 Neʼe kotou fakalotovaivaiʼi te tagata faitotonu ʼaki ʼakotou loi+ kae neʼe mole au fakamamahiʼi ia ia. Pea neʼe kotou fakalotomalohiʼi te tagata agakovi+ ke mole ina tuku tana aga ʼae ʼe kovi ʼo mate ai.+ 23 Koia ʼu fafine, ʼe mole kotou toe sisio anai ki ni meʼa kaka ʼe ha kia koutou pea ʼe mole kotou toe fai anai he fakakikite fakatemonio.+ ʼE au fakaʼateainaʼi anai taku hahaʼi mai ia koutou pea ʼe kotou iloʼi moʼoni anai ko au ia Sehova.’ ”

14 Neʼe ʼomai leva ʼihi takitaki ʼo Iselaele ʼo nonofo ʼi ʼoku muʼa.+ 2 Pea neʼe palalau mai ia Sehova, ʼo ina ui: 3 “Foha ʼo te tagata, neʼe fakatotonu e te ʼu tagata ʼaia ke natou atolasio ki ʼanatou fakatata fakalialia.* Pea neʼe natou tuku kia muʼa ʼo te hahaʼi he meʼa fakatupu tukia ke natou agahala ai. ʼE au tuku anai koa ke natou fakafehuʼi au?+ 4 Koia ʼe ke palalau anai kia natou mo ui: ‘Koʼeni te folafola ʼa te Tuʼi ʼAliki ko Sehova: “Kapau ʼe fakatotonu e he Iselaele ke atolasio ki ʼana fakatata fakalialia ʼo tuku kia muʼa ʼo te hahaʼi he meʼa fakatupu tukia ke natou agahala ai, pea kapau leva ʼe haʼu ʼo fakafehuʼi he polofeta, pea ko au Sehova ʼe au fai age anai te tali ʼae ʼe tuha mo te lahi ʼo ʼana fakatata fakalialia. 5 Koia ʼe au fakamatakuʼi anai te hahaʼi ʼo Iselaele, koteʼuhi neʼe natou fakamamaʼo fuli ia te au. Pea ʼe natou atolasio ki ʼanatou fakatata fakalialia.” ’+

6 “Koia ui age ki te hahaʼi ʼo Iselaele: ‘Koʼeni te folafola ʼa te Tuʼi ʼAliki ko Sehova: “Kotou toe liliu mai, kotou lituʼa ki ʼakotou fakatata fakalialia pea mo fakafisi ki ʼakotou aga fakalialia fuli.+ 7 Kapau ʼe fakamamaʼo ia te au he tagata Iselaele peʼe ko he matapule ʼe nofo ʼi Iselaele, pea kapau ʼe ina fakatotonu ke atolasio ki ʼana fakatata fakalialia ʼo tuku kia muʼa ʼo te hahaʼi he meʼa fakatupu tukia ke natou agahala ai, pea kapau leva ʼe haʼu ʼo fakafehuʼi taku polofeta,+ pea ko au Sehova ʼe au tali tonu anai ki ai. 8 ʼE au tauteaʼi anai te tagata ʼaia mo fakaliliu ko he fakatokaga, ko he tahi ʼe palalauʼi e te hahaʼi ʼi ʼanatou taʼaga lea, pea ʼe au toʼo kehe anai ia ia mai taku hahaʼi.+ Pea ʼe kotou iloʼi moʼoni anai ko au ia Sehova.” ’

9 “ ‘Kae kapau neʼe kakaʼi te polofeta ʼaia pea ʼe ina fai hana tali, ko au ia Sehova ʼae neʼe au kakaʼi te polofeta ʼaia.+ ʼE au faoʼi anai toku nima moʼona tauteaʼi mo pulihi ia ia ʼi taku hahaʼi ko Iselaele. 10 ʼE hoko anai kia natou te ʼu fua ʼo tanatou hala. ʼE lakahala anai ia ia ʼae ʼe faifehuʼi ohage pe ko te polofeta, 11 ke mole toe fakamamaʼo ia te au te hahaʼi ʼo Iselaele pea ke natou fakagata tanatou heʼe maʼa ʼi ʼanatou talagataʼa fuli. ʼE natou liliu anai ko taku hahaʼi pea ʼe au liliu anai ko tonatou ʼAtua,’+ ko te ui ʼaia ʼa te Tuʼi ʼAliki ko Sehova.”

12 Neʼe toe palalau mai ia Sehova, ʼo ina ui: 13 “Foha ʼo te tagata, kapau ʼe agahala he fenua kia te au ʼo heʼe agatonu, ʼe au faoʼi anai toku nima moʼona tauteaʼi. ʼE au maumauʼi anai ʼana meʼa kai,*+ ʼe au fakato anai ki ai te hoge+ mo pulihi te ʼu tagata mo te ʼu manu ʼae ʼe maʼuʼuli ai.”+ 14 “ ‘Tatau aipe pe ʼe nonofo ʼi te fenua ia Noe,+ mo Taniela+ pea mo Sopo,+ ʼe feala pe anai ki te toko tolu ʼaia ke natou haofaki pe ʼonatou maʼuli ʼuhi ko tanatou faitotonu,’+ ko te ui ʼaia ʼa te Tuʼi ʼAliki ko Sehova.”

15 “ ‘Fakakaukauʼi age muʼa moka ʼe au fakaulu ki te fenua ni manu fekai ʼo tuʼu lavaki ai mo liliu ko he toafa, pea ʼe mole kei fakalaka ai he tahi ʼuhi ko te ʼu manu fekai.+ 16 ʼE au tala moʼoni atu,’ ko te ui ʼaia ʼa te Tuʼi ʼAliki ko Sehova, ‘tatau aipe pe ʼe nonofo ʼi te fenua te ʼu tagata ʼaia ʼe toko tolu, ʼe mole natou haofaki anai ʼonatou foha peʼe ko ʼonatou ʼofafine. ʼE natou haofaki pe anai ʼonatou maʼuli mo tuʼu lavaki ai te fenua.’ ”

17 “ ‘Peʼe fakakaukauʼi age muʼa moka ʼe au fakaʼaogaʼi he heleta ʼi te fenua ʼaia,+ mo ui ke fakalaka te heleta ʼi te fenua, pea ke au pulihi te ʼu tagata mo te ʼu manu ʼae ʼe maʼuʼuli ai.+ 18 ʼE au tala moʼoni atu,’ ko te ui ʼaia ʼa te Tuʼi ʼAliki ko Sehova, ‘tatau aipe pe ʼe nonofo ʼi te fenua te ʼu tagata ʼaia ʼe toko tolu, ʼe mole natou haofaki anai ʼonatou foha peʼe ko ʼonatou ʼofafine. ʼE natou haofaki pe anai ʼonatou maʼuli.’ ”

19 “ ‘Peʼe fakakaukauʼi age muʼa moka ʼe au fakato he taʼi mahaki pea mo toku hauhau ki te fenua ʼaia,+ ʼo matehi he tokolahi ke pulihi te ʼu tagata mo te ʼu manu ʼae ʼe maʼuʼuli ai. 20 ʼE au tala moʼoni atu,’ ko te ui ʼaia ʼa te Tuʼi ʼAliki ko Sehova, ‘tatau aipe pe ʼe nonofo ʼi te fenua ia Noe,+ mo Taniela+ pea mo Sopo,+ ʼe mole natou haofaki anai ʼonatou foha peʼe ko ʼonatou ʼofafine. ʼE natou haofaki pe anai ʼonatou maʼuli ʼuhi ko tanatou faitotonu.’ ”+

21 “Koʼeni te folafola ʼa te Tuʼi ʼAliki ko Sehova: ‘Koʼeni te meʼa ʼae ka hoko moka au fakato ki Selusalemi ʼaku tautea ʼe fa,+ te heleta, te hoge, te ʼu manu fekai mo te taʼi mahaki,+ ke pulihi ai te ʼu tagata mo te ʼu manu ʼae ʼe maʼuʼuli ai.+ 22 Kae ʼe hao anai ʼihi ia natou, ko ni foha mo ni ʼofafine, pea ʼe fakamavae anai natou.+ ʼE natou ʼomai kia koutou, pea ka kotou sisio ki tanatou aga mo ʼanatou gaue, ʼe kotou fimalie anai ʼi te malaʼia ʼae neʼe au fakato ki Selusalemi, ʼei, ʼi te ʼu meʼa fuli ʼae neʼe au fakahoko ki ai.’ ”

23 “ ‘Ka kotou sisio ki tanatou aga mo ʼanatou gaue, ʼe kotou fimalie anai mo mahino neʼe ʼi ai te tupuʼaga ʼo taku fakahoko te faʼahi ʼaia,’+ ko te ui ʼaia ʼa te Tuʼi ʼAliki ko Sehova.”

15 Neʼe toe palalau mai ia Sehova, ʼo ina ui: 2 “Foha ʼo te tagata, ʼe lelei age koa te ʼakau ʼo te fuʼu vite ʼi ʼihi age fuʼu ʼakau, peʼe ko te ʼu vaʼa ʼo te ʼu fuʼu ʼakau ʼo te vao matuʼa? 3 ʼE feala koa ke fai he lou ʼaki te ʼakau ʼo te fuʼu vite mo gaue ʼaki? Peʼe feala koa ke fakaʼaogaʼi moʼo tautau ki ai ni meʼa gaue? 4 Koʼeni ʼe li ki te afi moʼona hokohoko, ʼo gosigosi ai ʼona potupotu pea vela ai mo lotomalie. Pea ʼe feala koa ke toe fakaʼaogaʼi mo gaue ʼaki? 5 Neʼe mole pe feala ke fai ʼaki he meʼa ʼi tana kei katoa. Kae ʼe feafeaʼi age la moka vela mo gosigosi?”

6 “Koia koʼeni te folafola ʼa te Tuʼi ʼAliki ko Sehova: ‘Ohage pe ko taku li ki te afi ia te ʼakau ʼo te fuʼu vite ʼae ʼe tuʼu ʼi te vao matuʼa, ʼe au fai feia anai ki te hahaʼi ʼo Selusalemi.+ 7 ʼE au fakafeagai anai kia natou. Neʼe natou hao ʼi te afi, kae ʼe natou vela anai ʼi he tahi afi. Pea ʼe kotou iloʼi moʼoni anai ko au ia Sehova moka au fakafeagai kia natou.’ ”+

8 “ ‘ ʼEi, ʼe au fakaliliu anai te fenua ko he koga meʼa ʼe tuʼu lavaki+ he neʼe mole natou nofo agatonu,’+ ko te ui ʼaia ʼa te Tuʼi ʼAliki ko Sehova.”

16 Neʼe toe palalau mai ia Sehova, ʼo ina ui: 2 “Foha ʼo te tagata, fakaha ki Selusalemi ʼana aga fakalialia.+ 3 ʼE ke ui anai: ‘Koʼeni te folafola ʼa te Tuʼi ʼAliki ko Sehova ki Selusalemi: “Ko te fenua ʼo ʼau kui ʼae neʼe ke tupu ai, ko te fenua ʼo te kau Kanaane. Ko tau tamai neʼe ko te tagata Amole+ pea ko tau faʼe neʼe ko te fafine Heti.+ 4 ʼI te ʼaho ʼae neʼe ke tupu ai, neʼe mole tuʼusi tou ʼuho, neʼe mole fufulu koe ke ke maʼa, neʼe mole milihi koe ʼaki te masima pea neʼe mole kofukofu koe ʼaki ni kie. 5 Neʼe mole ʼofa he tahi ia koe ʼo fai atu pe la he meʼa ʼe tahi ʼi te ʼu meʼa ʼaia. Neʼe mole manavaʼofa he tahi kia koe. Kae neʼe li koe ki te vao, koteʼuhi neʼe fehiʼaʼinaʼi koe ʼi te ʼaho ʼae neʼe ke tupu ai.

6 “ ‘ “ ʼI taku fakalaka ʼi ʼou tafa, neʼe au sio ʼe ke tapalutu ʼi tou toto. Pea neʼe au ui atu ʼi tau takoto ʼi tou toto: ‘Ke ke maʼuli!’ ʼEi, neʼe au ui atu ʼi tau takoto ʼi tou toto: ‘Ke ke maʼuli!’ 7 Neʼe au fakaliliu koe ko he toe hahaʼi kaugamalie, ohage ko te ʼulu ʼakau ʼae ʼe fisi ʼi te vao. Neʼe ke lahilahi ake pea neʼe ke tui ni meʼa faiteuteu matalelei. Neʼe tuputupu ʼou fatafata mo tou lauʼulu. Kae neʼe kei ke telefua, ʼei, neʼe ke telefua.” ’

8 “ ‘ ʼI taku toe fakalaka ʼi ʼou tafa mo sio atu, neʼe au tokagaʼi kua feala ke ke laukau. Koia neʼe au folahi kia koe toku kofu+ moʼo ʼuʼufi tou telefua. Neʼe au fai he fakapapau mo he fuakava mo koe pea neʼe au maʼu leva ia koe maʼaku,’ ko te ui ʼaia ʼa te Tuʼi ʼAliki ko Sehova. 9 ‘Tahi ʼae, neʼe au fufulu koe, neʼe au fakamaʼa koe ʼi tou toto pea neʼe au vali loloʼi koe.+ 10 Neʼe au teuteuʼi leva ia koe ʼaki he kofu fakailoga mo foaki atu ni sulie kiliʼi manu lelei* pea neʼe au kofukofuʼi koe ʼaki te lino lelei. Neʼe au teuteuʼi koe ʼaki ni teu totogi kovi. 11 Neʼe au fakamataleleiʼi koe ʼaki ni meʼa faiteuteu. Neʼe au tau ki ʼou nima ni vesa mo he kahoa ki tou kia. 12 Neʼe au toe ʼai foki mo he mama ki tou ihu, mo ni foʼi hau ki ʼou taliga pea mo he pale taulekaleka ki tou ʼulu. 13 Neʼe ke matalelei ʼi te aulo mo te siliva. Neʼe fai ʼou teu ʼaki te lino lelei, mo te ʼu kie maʼuhiga pea neʼe tui fakailoga. Ko tau meʼa kai ko te falena lelei, mo te meli pea mo te lolo. Neʼe ke liliu ai ʼo finelelei ʼaupito+ pea neʼe feala ai ke ke fineʼaliki.’ ”

14 “ ‘Kua mafola tou logologona ʼi te ʼu puleʼaga+ ʼuhi ko tou finelelei, ʼae ʼe haohaoa koteʼuhi ko toku kololia ʼae neʼe au tuku kia koe,’+ ko te ui ʼaia ʼa te Tuʼi ʼAliki ko Sehova.”

15 “ ‘Kae neʼe ke falala leva koe ki tou finelelei,+ neʼe ke fakaʼaogaʼi tou logologona ʼo ke liliu ai ko he paomutu.+ Neʼe ke faiaga faʼifaʼitaliha mo natou fuli ʼae neʼe fakalaka ai,+ pea neʼe ke foaki ia koe maʼa natou. 16 Neʼe ke toʼo ʼihi ʼi ʼou teu lanu kehekehe pea neʼe ke fakaʼaogaʼi moʼo teuteuʼi te ʼu faʼahi maʼoluga ʼae neʼe ke faiaga ai.+ Neʼe mole tonu ke hoko te ʼu meʼa ʼaia, kailoa ia, neʼe mole tonu ia ke hoko ʼi he temi. 17 Neʼe ke toe toʼo ʼau meʼa gigila ʼae ʼe fai ʼaki te aulo mo te siliva ʼae neʼe au foaki atu, pea neʼe ke fai ni fakatata ʼo ni tagata ʼo ke faiaga ai mo natou.+ 18 Neʼe ke toe toʼo ʼou teu fakailoga moʼo ʼuʼufi ʼaki natou,* pea neʼe ke foaki age toku lolo mo taku iseso.+ 19 Pea neʼe ke toe foaki age mo te ʼaele lelei+ ʼo te pane ʼae neʼe au foaki atu, ʼae neʼe teuteuʼi ʼaki te falena lelei, mo te lolo mo te meli ʼae neʼe au foaki atu ke ke kai. Koʼena la te meʼa ʼae neʼe hoko,’ ko te ui ʼaia ʼa te Tuʼi ʼAliki ko Sehova.”

20 “ ‘Neʼe ke toe toʼo ʼau tama mo ʼau taʼahine ʼae neʼe ke foaki mai+ pea neʼe ke momoli natou ko he sakilifisio ki te ʼu taula ʼatua ke natou kai.+ Koia, ʼe mole ke feʼaugaʼia koa la koe ʼau faiaga? 21 Neʼe ke matehi ʼoku foha pea neʼe ke momoli natou ko he sakilifisio ke tutu ia natou.+ 22 ʼI tau fai te ʼu aga fakalialia fuli ʼaia mo ʼau faiaga fuli, neʼe mole ke manatuʼi tau kei veliveli, te temi ʼae neʼe ke telefua ai, ʼei, neʼe ke telefua pea neʼe ke tapalutu ʼi tou toto. 23 Malaʼia, ʼei, malaʼia kia koe+ ʼuhi ko te ʼu agakovi fuli ʼae neʼe ke fai,’ ko te ui ʼaia ʼa te Tuʼi ʼAliki ko Sehova. 24 ‘ ʼI te ʼu malaʼe fuli, neʼe ke laga he koga meʼa ke ke atolasio ai ki te ʼu ʼatua hala. 25 Neʼe ke laga ni faʼahi maʼoluga ʼi te koga meʼa ʼae ʼe ha lelei ʼi te ʼu ala fuli. Neʼe ke fetogi tou matalelei ko he meʼa fakalialia ʼi tau foaki ia koe kia natou fuli ʼae ʼe fakalaka ai,+ pea neʼe tuʼa lahi ʼau faiaga.+ 26 Neʼe ke faiaga mo te ʼu foha ʼo Esipito,+ ia natou ʼae ʼe holi kovi ʼi ʼou tafaʼaki, pea neʼe ke fakamamahiʼi au ʼi te lahi ʼo ʼau faiaga. 27 Koia ʼe au faoʼi anai toku nima moʼou tauteaʼi. ʼE au fakaveliveli anai tau meʼa kai+ mo tuku ke faʼifaʼitaliha kia koe te hahaʼi fafine ʼae ʼe fehihiʼa ia koe,+ te ʼu taʼahine ʼa te kau Filisitini ʼae neʼe ufiufi ʼi tau aga fakalialia.+

28 “ ‘Neʼe ke faiaga leva mo te kau Asilia,+ koteʼuhi neʼe mole ke fimalie. Kae ʼi tau ʼosi faiaga mo natou, neʼe mole pe la ke fimalie. 29 Koia neʼe ke fakalahi ʼau faiaga ʼi te fenua ʼo te hahaʼi fakatau koloa* pea mo te kau Kaletea.+ Kae tatau aipe, neʼe mole pe la ke fimalie. 30 Neʼe mahaki ʼosi tou loto* ʼi tau fai te ʼu aga fuli ʼaia pea neʼe hage tau aga ko he fafine paomutu agapauʼu,’+ ko te ui ʼaia ʼa te Tuʼi ʼAliki ko Sehova. 31 ‘Kae ʼi tau laga he koga meʼa ke ke atolasio ai ki te ʼu ʼatua hala ʼae ʼe ha lelei ʼi te ʼu ala fuli, pea ʼi tau fai he faʼahi maʼoluga ʼi te ʼu malaʼe fuli, neʼe mole ke hage koe ko he fafine paomutu he neʼe mole ke loto ke totogi koe. 32 Ko koe ko te fafine tono, he ʼe ke leleiʼia age te kau matapule ʼi tou ʼohoana totonu.+ 33 ʼE maʼu meʼa ʼofa te ʼu fafine paomutu fuli,+ kae ʼe ke foaki meʼa ʼofa koe kia natou fuli ʼae ʼe holi fakavale kia koe.+ ʼE ke totogi natou ke ʼomai mai te ʼu potu fuli ke kotou faiaga.+ 34 ʼE kehe tau aga ʼi te ʼu fafine ʼae ʼe faiaga. ʼE mole faiaga he tahi ohage ko koe. Ko koe ʼae ʼe ke totogi kae ʼe mole totogi koe ia. ʼE ke kehe ʼosi pe koe.’

35 “Koia, fafine paomutu,+ fagono ki te logo ʼa Sehova. 36 Koʼeni te folafola ʼa te Tuʼi ʼAliki ko Sehova: ‘Neʼe ke faʼifaʼitaliha ʼi ʼau holi fakavale, pea neʼe ke fakaha tou telefua ʼi tau faiaga mo ʼau tagata laukau mo ʼau fakatata fakalialia* fuli.+ Neʼe ke toe momoli te toto ʼo ʼau tama ko he sakilifisio ki te ʼu taula ʼatua ʼaia.+ 37 Koia ʼe au tanaki anai te ʼu tagata laukau fuli ʼae neʼe ke fakafiafiaʼi, ia natou fuli ʼae neʼe ke ʼofa ai mo natou fuli ʼae neʼe ke fehiʼa ai. ʼE au ʼaumai anai natou mai te ʼu potu fuli ke natou tauʼi koe. ʼE au fakaha anai tou telefua kia natou ʼo natou sisio ai ki tou telefua.+

38 “ ‘Pea ʼe au fakahoko anai kia koe te tautea ʼae ʼe tuha mo te ʼu fafine tono+ pea mo te hahaʼi fafine ʼae ʼe natou liligi te toto.+ ʼEi, ʼe au liligi anai tou toto ʼi toku hauhau mo toku maheka.+ 39 ʼE au tuku anai koe ki ʼonatou nima. ʼE natou maumauʼi anai ʼou koga meʼa ʼae ʼe ke atolasio ai ki te ʼu ʼatua hala pea mo ʼou faʼahi maʼoluga.+ ʼE natou toʼo anai ʼou teu+ mo ʼau meʼa gigila+ pea ʼe natou liʼaki telefua ai ia koe. 40 ʼE natou fekauʼi mai anai he toe hahaʼi ke natou tauʼi koe,+ ʼo tuki makaʼi+ pea mo matehi koe ʼaki ʼanatou heleta.+ 41 ʼE natou tutu anai ʼou ʼapi+ mo fakahoko kia koe te fakatuʼā ia muʼa ʼo he hahaʼi fafine kaugamalie. ʼE au fakagata anai tau faiaga+ pea ʼe ke tuku anai tau totogi ia natou. 42 ʼE au fakafimalieʼi anai toku hauhau ʼo ʼuhiga mo koe+ ʼo puli ai toku ita.+ ʼE au fimalie ai leva ʼo mole au toe mamahi.’

43 “ ‘Neʼe mole ke manatuʼi tau kei veliveli+ pea neʼe ke fakatupu toku ita ʼi te ʼu meʼa fuli ʼae neʼe ke fai. Koia ʼi te temi nei, ʼe au fakahoko anai kia koe te ʼu fua kovi ʼo tau aga pea ʼe ke liʼaki ai leva tau aga fakalialia mo ʼau agakovi fuli,’ ko te ui ʼaia ʼa te Tuʼi ʼAliki ko Sehova.

44 “ ‘Fagono, ʼe fakaʼuhiga anai kia koe te taʼaga lea ʼaeni: “ ʼE hoko pe te taʼahine ki tana faʼe!”+ 45 ʼE ke hoko ʼosi pe ki tau faʼe, ʼae neʼe fehiʼa ki tona ʼohoana mo ʼana fanau. Pea ʼe ke hoko pe ki ʼou tehina, ʼae neʼe natou fehihiʼa ki ʼonatou ʼohoana mo ʼanatou fanau. Ko tau faʼe neʼe ko te fafine Heti pea ko tau tamai neʼe ko te tagata Amole.’ ”+

46 “ ‘Ko tou taʼokete, ʼae ʼe nofo ʼi te potu noleto, ko Samalia+ mo ʼana taʼahine.*+ Pea ko tou kiʼi tehina, ʼae ʼe nofo ʼi te potu saute, ko Sotoma+ mo ʼana taʼahine.+ 47 Neʼe mole gata pe ʼi tau faʼifaʼitakiʼi natou pea mo tau fai tanatou aga fakalialia, kae neʼe liliu tau aga ʼi he kiʼi temi pe ʼo kovi age ia ʼi tanatou aga.+ 48 ʼE au tala moʼoni atu,’ ko te ui ʼaia ʼa te Tuʼi ʼAliki ko Sehova, ‘neʼe mole fai e tou tehina ko Sotoma mo ʼana taʼahine te meʼa ʼae neʼe ke fai mo ʼau taʼahine. 49 Fagono! Koʼeni te hala ʼo tou tehina ko Sotoma: Neʼe fiameʼalahi mo ʼana taʼahine,+ neʼe lahi tanatou meʼa kai+ pea neʼe natou maʼuʼuli fimalie.+ Kae neʼe mole natou tokoni ki te hahaʼi fakaʼofaʼofa mo masisiva.+ 50 Neʼe natou fiameʼameʼa+ ʼo hoko atu pe tanatou aga fakalialia ʼi ʼoku muʼa.+ Koia neʼe au fakatotonu ai ke au pulihi natou.+

51 “ ‘Neʼe mole fai pe la e Samalia+ te vaelua ʼo te ʼu agahala ʼae neʼe ke fai. Neʼe lahi age ʼau aga fakalialia ʼi te ʼu aga ʼae neʼe natou fai, ʼo hage mai ai, ʼe faitotonu age ʼou tehina ʼuhi ko ʼau aga fakalialia fuli.+ 52 ʼI te temi nei, ke ke lainoa koteʼuhi neʼe ke lagolago ki te aga ʼo ʼou tehina. ʼE natou faitotonu age ia koe, koteʼuhi neʼe ke agahala age ʼi te fakalialia ʼo tau aga. Koia ʼi te temi nei ke ke ufiufi mo lainoa, he ʼe matatonu age ʼou tehina ia koe ʼuhi ko tau aga.’

53 “ ‘ ʼE au toe fakatahiʼi anai ʼanatou kau pilisoni, te kau pilisoni ʼo Sotoma mo ʼana taʼahine, pea mo te kau pilisoni ʼo Samalia mo ʼana taʼahine. Pea ʼe au toe fakatahiʼi anai ʼau kau pilisoni mo natou ʼaia,+ 54 ke ke lainoa ai. Pea ʼe ke ufiufi anai ʼi te meʼa ʼae neʼe ke fai, he neʼe ke fakapelepeleʼi natou. 55 ʼE liliu anai tou tehina ko Sotoma mo ʼana taʼahine ki tonatou aluʼaga ʼafeā. Pea ʼe liliu anai tou tehina ko Samalia mo ʼana taʼahine ki tonatou aluʼaga ʼafeā. Pea ko koe mo ʼau taʼahine, ʼe kotou toe liliu anai ki tokotou aluʼaga ʼafeā.+ 56 ʼI te temi ʼae neʼe ke fiameʼameʼa ai, neʼe mole tuha ke ke palalau ʼo ʼuhiga mo tou tehina ko Sotoma, 57 ʼi muʼa ʼo te iloʼi ʼo tau agakovi.+ ʼI te temi nei, ʼe laukoviʼi koe e te ʼu taʼahine ʼo Silia pea mo natou ʼae ʼi ʼona tafaʼaki. Pea ʼe fehiʼaʼinaʼi koe e te ʼu taʼahine ʼo te kau Filisitini+ ʼae ʼi ʼou tafaʼaki. 58 ʼE hoko anai kia koe te ʼu fua ʼo tau aga fakalialia pea mo ʼau agakovi,’ ko te ui ʼaia ʼa Sehova.”

59 “Koʼeni te folafola ʼa te Tuʼi ʼAliki ko Sehova: ‘ ʼI te temi nei, ʼe hage pe anai taku aga kia koe ko tau aga,+ koteʼuhi neʼe ke meʼa noaʼi tau fakapapau ʼi tau maumauʼi taku fuakava.+ 60 Kae ʼe au manatuʼi anai te fuakava ʼae neʼe au fai mo koe ʼi tau kei veliveli, pea ʼe au fai anai mo koe he fuakava ʼo talu ai.+ 61 ʼE ke manatuʼi anai tau aga mo ufiufi+ moka ʼe ke fakatalitali ʼou tehina, ʼou taʼokete pea mo ʼou tehina liliki. ʼE au foaki atu anai natou ko ʼau taʼahine, kae ʼe mole ʼuhi ko tau fuakava.’

62 “ ‘ ʼEi, ʼe au fai anai taku fuakava mo koe pea ʼe ke iloʼi moʼoni anai ko au ia Sehova. 63 Koia moka au fakamolemole* anai kia koe, logo la te ʼu meʼa fuli ʼae neʼe ke fai,+ ʼe ke manatuʼi anai pea ʼe mole ke avahi anai tou gutu ʼi te lahi fau ʼo tou ufiufi+ ʼuhi ko tou lainoa,’ ko te ui ʼaia ʼa te Tuʼi ʼAliki ko Sehova.”

17 Neʼe toe palalau mai ia Sehova, ʼo ina ui: 2 “Foha ʼo te tagata, fai he matetea mo fakamatala he hisitolia* ʼo ʼuhiga mo te hahaʼi ʼo Iselaele.+ 3 ʼE tonu anai ke ke ui: ‘Koʼeni te folafola ʼa te Tuʼi ʼAliki ko Sehova: “Neʼe haʼu he akuila lahi+ ki Lipane,+ mo ʼona pakakau lalahi, mo ʼona fulu loloa, mo matolu pea mo lanu kehekehe. Neʼe ina fasiʼi te tumutumu ʼo te fuʼu sete.+ 4 Neʼe ina pakiʼi tona kiʼi vaʼa ʼae ʼe maʼoluga, ʼo ʼave ki te fenua ʼo te hahaʼi fakatau koloa* pea neʼe ina tuku ki he kolo ʼo te hahaʼi fakatau koloa.+ 5 Neʼe ina toʼo leva he kiʼi koga ʼo te pulapula ʼo te fenua+ pea neʼe ina nunusi ki he kele lelei. Neʼe ina to ʼo ovi ki ni vai lalahi ohage ko he fuʼu sole. 6 Neʼe homo ai ʼo liliu ko he fuʼu vite malalo ʼe mafola.+ Neʼe homo ʼona lau ki loto pea neʼe tupu ʼona aka ʼo mole mafola. Koia neʼe liliu ko he fuʼu vite ʼe huli mo homo ʼona vaʼa.+

7 “ ‘ “Pea neʼe haʼu leva te tahi akuila lahi.+ Neʼe lalahi ʼona pakakau mo loloa ʼona fulu.+ Neʼe fakamafola fiameʼameʼa leva e te fuʼu vite ʼaia ʼona aka ki ai, ʼo mamaʼo ia mai te koga meʼa ʼae neʼe to ai. Neʼe ina toe fakaovi ʼona lau ki ai ke ina fakapala.+ 8 Kae neʼe to pe la ʼo ovi ki ni vai lalahi, ʼi he kele lelei ke homo ʼona vaʼa mo fua pea ke liliu ko he fuʼu vite matalelei.” ’+

9 “ ʼE ke ui anai: ‘Koʼeni te folafola ʼa te Tuʼi ʼAliki ko Sehova: “ ʼE feala anai koa ke tuputupu? ʼE mole taʼaki anai koa e he tahi ʼona aka?+ ʼE mole pala anai koa ʼona fua mo fefe ʼona huli?+ ʼE mole ʼaoga anai he nima malohi peʼe ko he tokolahi moʼona taʼaki ʼi te kovi ʼo tona moamoa. 10 Logope la tona hiki, ʼe feala anai koa ke tuputupu? ʼE mole moamoa ʼosi anai koa moka agi mai te matagi mai te potu esite ki ai? ʼEi, ʼe moamoa anai ʼi te koga meʼa ʼae neʼe homo ai.” ’ ”

11 Pea neʼe toe palalau mai ia Sehova, ʼo ina ui: 12 “Fakalelei siʼou loto, ui age ki te hahaʼi agatuʼu: ‘ ʼE mole kotou mahino koa la ki te fakaʼuhiga ʼo te meʼa ʼaeni?’ Tala age ki ai: ‘Koʼeni, neʼe haʼu te hau ʼo Papiloni ki Selusalemi. Neʼe ina toʼo te hau mo te ʼu tama ʼaliki ʼo ʼave natou mo ia ki Papiloni.+ 13 Neʼe ina toe toʼo he tahi ʼo te hologa fakahau.+ Neʼe ina fai mo ia he fuakava pea neʼe ina fakamaʼua age he fakapapau.+ Neʼe ina ʼave mo ia te ʼu tagata maʼuhiga ʼo te fenua+ 14 ke fakamalaloʼi ai te puleʼaga ke mole toe malohi, pea ke hoko atu te maʼuli ʼo te hahaʼi mo kapau foki ʼe natou fakaʼapaʼapa ki te fuakava.+ 15 Kae neʼe agatuʼu leva te hau kia ia.+ Neʼe ina fekauʼi ni kau ʼave logo ki Esipito ke ina maʼu ai ni hosi+ mo he kautau lahi.+ ʼE ʼi ai anai koa hona fua? ʼE hao anai koa mai te fakatuʼā ia ia ʼae ʼe ina fai te ʼu meʼa ʼaia? ʼE feala koa ke ina maumauʼi te fuakava pea hao aipe?’+

16 “ ‘ ʼE ui e te Tuʼi ʼAliki ko Sehova: “ ʼE au tala moʼoni atu, ʼe mate anai ʼi Papiloni, ʼi te koga meʼa ʼae ʼe nofo ai te hau* ʼae neʼe ina fakanofo ke hau,* he neʼe ina meʼa noaʼi tana fakapapau pea mo maumauʼi tana fuakava.+ 17 Tatau aipe pe ʼe kaugamalie mo malolohi te foʼi tau ʼa Falaone, kae ʼe mole ʼaoga anai ʼi te tau+ moka laga ni kaupa moʼo ʼa takai te kolo, mo ni kaupa moʼona tauʼi ke mamate ai te tokolahi. 18 Neʼe ina meʼa noaʼi te fakapapau pea neʼe ina maumauʼi te fuakava. Neʼe ina fai te ʼu meʼa fuli ʼaia kae neʼe kua ina fai tana fakapapau. ʼE mole hao anai ia.” ’

19 “ ‘Koia, koʼeni te folafola ʼa te Tuʼi ʼAliki ko Sehova: “Neʼe ina meʼa noaʼi taku fakapapau+ pea neʼe ina maumauʼi taku fuakava. Koia ʼe au tala moʼoni atu, ʼe au fakahoko anai kia ia ʼona fua kovi. 20 ʼE au li anai ki ai taku kupega pea ʼe maʼua ai.+ ʼE au ʼave anai ki Papiloni pea ʼi te potu ʼaia ʼe au fakatuʼā anai ia ia ʼuhi ko tana heʼe agatonu kia te au.+ 21 ʼE matematehi anai ʼaki te heleta te kau solia fuli ʼae neʼe feholaki. Ko natou ʼae ka hao, ʼe mavetevete ʼi te ʼu potu fuli.+ Pea ʼe kotou iloʼi moʼoni anai, ko au ia Sehova ʼae neʼe palalau.” ’+

22 “ ‘Koʼeni te folafola ʼa te Tuʼi ʼAliki ko Sehova: “ ʼE au pakiʼi anai he kiʼi vaʼa ʼi te tumutumu ʼo te fuʼu sete lahi+ pea ʼe au to anai. ʼE au pakiʼi anai he kiʼi vaʼa+ ʼi te tumutumu ʼo ʼona kiʼi vaʼa ʼo to ai ʼi he moʼuga maʼoluga.+ 23 ʼE au to anai ʼi he moʼuga maʼoluga ʼo Iselaele. ʼE tuputupu anai ʼona vaʼa mo fua ʼo liliu ai ko he fuʼu sete matalelei. ʼE ʼomai anai ni manulele kehekehe ʼo maʼuʼuli ai mo nonofo ʼi te malu ʼo ʼona lau. 24 Pea ʼe iloʼi moʼoni anai e te ʼu fuʼu ʼakau fuli ʼo te vao matuʼa, ko au ia Sehova neʼe au fakamalaloʼi te fuʼu ʼakau ʼae neʼe maʼoluga mo fakamaʼolugaʼi te fuʼu ʼakau ʼae neʼe malalo.+ Pea neʼe au fakamoamoa te fuʼu ʼakau ʼae ʼe maʼuli lelei mo fakafisi te fuʼu ʼakau ʼae neʼe moamoa.+ Ko au ia Sehova ʼae neʼe palalau mo fakahoko te faʼahi ʼaia.” ’ ”

18 Pea neʼe toe palalau mai ia Sehova, ʼo ina ui: 2 “Kotea te fakaʼuhiga ʼo te taʼaga lea ʼaeni ʼe fai ʼi Iselaele: ‘Neʼe kai e te ʼu tamai ni vite neʼe kei mumui,* kae ko te ʼu foha ia ʼae neʼe maninia ʼonatou nifo’?+

3 “ ʼE ui e te Tuʼi ʼAliki ko Sehova: ‘ ʼE au tala moʼoni atu, ʼe mole kotou toe fai anai te taʼaga lea ʼaia ʼi Iselaele. 4 Koʼeni, ʼaʼaku te ʼu maʼuli* fuli. ʼAʼaku te maʼuli ʼo te tamai mo te maʼuli ʼo te foha. ʼE mate anai ia ia* ʼae ʼe agahala.

5 “ ‘Fakakaukauʼi age muʼa he tagata ʼe ina fai te meʼa ʼae ʼe lelei pea mo totonu. 6 ʼE mole ina kai ia te ʼu sakilifisio ʼae neʼe momoli ki te ʼu taula ʼatua ʼi te ʼu moʼuga.+ ʼE mole tauhi ia ki te ʼu fakatata fakalialia* ʼo te hahaʼi ʼo Iselaele. ʼE mole tono ia mo te ʼohoana ʼo tona tatau,+ pea ʼe mole momoe ia mo he fafine ʼe maligi tona fatu.+ 7 ʼE mole ina gaohi koviʼi he tahi+ pea ʼe ina toe liufaki age pe ki te tagata toʼo maʼua te meʼa ʼae neʼe ina foaki age kia ia.+ ʼE mole ina kaihaʼa he tahi,+ ʼe ina toe vaevae pe tana meʼa kai mo ia ʼae ʼe fia kai,+ pea ʼe ina foaki he mutuʼi meʼa kia ia ʼae ʼe telefua.+ 8 ʼE mole ina foaki he maʼua ke maʼu ai hona tupu peʼe ke maʼu koloa ai,+ kae ʼe fakafisi ia ki te aga heʼe faitotonu.+ ʼE ina fakamauʼi ʼi te faitotonu ni tagata ʼe lua,+ 9 pea ʼe hoko atu pe tana mulimuli ki ʼaku fakatotonu mo ʼaku lao ke agatonu ai. Ko te tagata ʼaia ʼe faitotonu pea ʼe maʼuli moʼoni anai ia,’+ ko te ui ʼaia ʼa te Tuʼi ʼAliki ko Sehova.

10 “ ‘Peʼe fakakaukauʼi age muʼa ʼe liliu tona foha ʼo kaihaʼa+ peʼe faifakapo+ peʼe ina fai he meʼa ʼe tahi ʼi te ʼu meʼa ʼaia 11 (kae neʼe mole fai ia e te tamai he meʼa ʼe tahi ʼi te ʼu meʼa ʼaia): ʼe ina kai ia te ʼu sakilifisio ʼae neʼe momoli ki te ʼu taula ʼatua ʼi te ʼu moʼuga, ʼe tono ia mo te ʼohoana ʼo tona tatau, 12 ʼe ina gaohi koviʼi ia ia ʼae ʼe fakaʼofaʼofa mo masiva,+ ʼe kaihaʼa, ʼe mole ina liufaki ia te meʼa ʼae neʼe foaki age e te tagata toʼo maʼua, ʼe tauhi ia ki te ʼu fakatata fakalialia,+ ʼe ina fai ni aga fakalialia.+ 13 ʼE ina foaki he maʼua ke ina maʼu ai hona tupu pea ke maʼu koloa ai.+ ʼE mate anai te foha ʼaia, ʼe mate moʼoni ia ʼuhi ko te ʼu aga fakalialia fuli ʼae neʼe ina fai. ʼE mate pe anai ʼuhi ko tana hala.

14 “ ‘Kae fakakaukauʼi age muʼa ʼe sio he foha ki te ʼu agahala fuli ʼae ʼe fai e tana tamai. Tatau aipe pe ʼe sio ki ai, ʼe mole ina fai te ʼu aga ʼaia. 15 ʼE mole ina kai ia te ʼu sakilifisio ʼae neʼe momoli ki te ʼu taula ʼatua ʼi te ʼu moʼuga. ʼE mole tauhi ki te ʼu fakatata fakalialia ʼo te hahaʼi ʼo Iselaele. ʼE mole tono ia mo te ʼohoana ʼo tona tatau. 16 ʼE mole ina gaohi koviʼi he tahi, ʼe mole ina taupau te meʼa ʼae neʼe foaki age e te tagata toʼo maʼua, ʼe mole kaihaʼa, ʼe ina toe vaevae pe tana meʼa kai mo ia ʼae ʼe fia kai pea ʼe ina foaki he mutuʼi meʼa kia ia ʼae ʼe telefua. 17 ʼE fakafisi ia ki te gaohi koviʼi ʼo te masiva. ʼE mole ina foaki he maʼua ke maʼu ai hona tupu peʼe ke maʼu koloa ai. ʼE mulimuli ia ki ʼaku lao mo ʼaku fakatotonu. ʼE mole mate anai te tagata ʼaia ʼuhi ko te hala ʼo tana tamai. ʼE maʼuli moʼoni anai ia. 18 Kae ko tana tamai ʼae neʼe aga fakakaka, mo ina kaihaʼa tona tehina, mo fai te meʼa ʼae ʼe kovi ʼi te lotolotoiga ʼo tana hahaʼi, ʼe mate anai ʼuhi ko tana hala.

19 “ ‘Kae ʼe kotou feʼekeʼaki anai: “He koʼe koa ʼe mole tukugakoviʼi te foha ʼuhi ko te hala ʼa tana tamai?” Neʼe fai e te foha te meʼa ʼae ʼe lelei mo totonu, neʼe fakaʼapaʼapa ia mo fakalogo ki ʼaku fakatotonu, koia ʼe maʼuli anai.+ 20 ʼE mate anai ia ia* ʼae ʼe agahala.+ ʼE mole tukugakoviʼi anai he foha ʼuhi ko te hala ʼa tana tamai, pea ʼe mole tukugakoviʼi anai he tamai ʼuhi ko te hala ʼo tona foha. ʼE fakamauʼi pe te tagata faitotonu ʼo mulimuli ki tana faitotonu, pea ʼe fakamauʼi pe te tagata agakovi ʼo mulimuli ki tana agakovi.+

21 “ ‘Pea kapau leva ʼe lituʼa he tahi ʼe agakovi ki te ʼu agahala fuli ʼae neʼe ina fai, kapau ʼe fakaʼapaʼapa ki ʼaku fakatotonu fuli pea mo fai te meʼa ʼae ʼe lelei mo totonu, ʼe maʼuli moʼoni anai ia. ʼE mole mate anai.+ 22 ʼE mole manatuʼi anai he hala ʼe tahi ʼi te ʼu hala ʼae neʼe ina fai.+ ʼE maʼuli anai he neʼe ina fai te meʼa ʼae ʼe totonu.’+

23 “ ʼE ui e te Tuʼi ʼAliki ko Sehova: ‘ ʼE au fiafia koa moka mate he tahi ʼe agakovi?+ ʼE mole au leleiʼia age koa moka fetogi tana aga pea ke maʼuli?’+

24 “ ‘Kae kapau ʼe liʼaki e he tahi ʼe faitotonu tana aga ʼae ʼe lelei ʼo fai te meʼa ʼae ʼe kovi, kapau ʼe ina fai ia meʼa fakalialia fuli ʼae ʼe fai e te kau agakovi, ʼe maʼuli anai koa? ʼE mole manatuʼi anai he gaue ʼe tahi ʼi te ʼu gaue faitotonu ʼae neʼe ina fai.+ ʼE mate anai ʼuhi ko tana heʼe agatonu pea mo te agahala ʼae neʼe ina fai.+

25 “ ‘ ʼE kotou ui anai: “ ʼE mole totonu te aga ʼa Sehova.”+ Hahaʼi ʼo Iselaele, fakalelei siʼokotou ʼu loto, kotou fakalogo mai! ʼE ko taku aga koa ʼae ʼe mole totonu?+ ʼE mole koa la ko ʼakotou aga ʼae ʼe mole totonu?+

26 “ ‘Kapau ʼe liʼaki e he tahi ʼe faitotonu tana aga ʼae ʼe lelei ʼo fai te meʼa ʼae ʼe kovi pea mate ai, ʼe mate anai ʼuhi ko te kovi ʼae neʼe ina fai.

27 “ ‘Pea kapau ʼe lituʼa he tahi ʼe agakovi ki tana agakovi, kae ʼe ina fai leva te meʼa ʼae ʼe lelei mo totonu, ʼe ina haofaki anai tona maʼuli.+ 28 Kapau ʼe mahino pea mo lituʼa ki te ʼu talagataʼa fuli ʼae neʼe ina fai, ʼe maʼuli moʼoni anai. ʼE mole mate anai.

29 “ ‘ ʼE ui anai e te hahaʼi ʼo Iselaele: “ ʼE mole totonu te aga ʼa Sehova.” Hahaʼi ʼo Iselaele, ʼe ko ʼaku aga koa ʼae ʼe mole totonu?+ ʼE mole koa la ko ʼakotou aga ʼae ʼe mole totonu?’

30 “Koia ʼe ui e te Tuʼi ʼAliki ko Sehova: ‘Hahaʼi ʼo Iselaele, ʼe au fakamauʼi anai ia koutou takitokotahi ʼo mulimuli pe ki tana aga.+ Kotou lituʼa, ʼei, kotou lituʼa ʼosi mai ʼakotou talagataʼa fuli naʼa kotou tukia mo agahala ai. 31 Kotou siʼaki ʼakotou talagataʼa fuli ʼae ʼe kotou fai,+ pea kotou maʼu he loto foʼou mo he ʼatamai foʼou.+ ʼEi, hahaʼi ʼo Iselaele, he koʼe ʼe tonu ke kotou mamate?’+

32 “ ʼE ui e te Tuʼi ʼAliki ko Sehova: ‘ ʼE mole au fiafia au ʼi he temi ʼi te mate ʼo he tahi.+ Koia kotou fetogi takotou aga pea ʼe kotou maʼuʼuli anai.’ ”+

Neʼe takoto ʼi te lotolotoiga ʼo te ʼu laione tagata kei mui mo malolohi, pea neʼe ina taupau ʼona ʼuhi.

 3 Neʼe ina taupau he tahi ʼi ʼona ʼuhi pea neʼe liliu ko he laione mui mo malohi.+

 5 Neʼe talitali tana faʼe, pea neʼe mahino leva neʼe mole he ʼuhiga ʼo tana fakaʼamu ʼae ke toe liliu mai.

Neʼe ina toʼo ai he tahi ʼi ʼona ʼuhi, pea neʼe ina fakaliliu ko he laione mui mo malohi.

 6 Neʼe toe fealuʼaki mo ia ʼi te ʼu laione, pea neʼe liliu ko he laione mui mo malohi.

Neʼe poto leva ʼi te kumi ʼo tana meʼa kai pea neʼe ina toe kai foki mo ni hahaʼi.+

 9 Neʼe natou ʼave ia ia ʼi te kesi ʼaki ni mātaʼu ki te hau ʼo Papiloni.

Neʼe fakamaʼu ai ia ia ke ʼaua naʼa toe logoʼi tana gugulu ʼi te ʼu moʼuga ʼo Iselaele.

10 Neʼe hage tau faʼe ko he fuʼu vite+ ʼi tou toto,* neʼe to ʼi he vaʼe vai.

Neʼe lahi ʼona fua mo ʼona vaʼa ʼuhi ko te lahi ʼo te vai.

11 Neʼe malolohi ʼona vaʼa pea neʼe feala ke toe fai ʼaki ni tokotoko ʼo ni pule.

Neʼe fasifasi mo moamoa ʼona vaʼa malohi+ pea neʼe vela ai.+

“ ‘Ko te hiva mate ʼaia, pea ʼe fakaʼaogaʼi anai.’ ”

20 ʼI te fitu taʼu, ʼi te ʼaho hogofulu ʼo te nima mahina, neʼe ʼomai te ʼu takitaki ʼo Iselaele ʼo nonofo ʼi ʼoku muʼa, ʼo fakafehuʼi ia Sehova. 2 Neʼe palalau mai leva ia Sehova, ʼo ina ui: 3 “Foha ʼo te tagata, palalau ki te ʼu takitaki ʼo Iselaele, ʼo ke ui: ‘Koʼeni te folafola ʼa te Tuʼi ʼAliki ko Sehova: “Neʼe kotou ʼomai koa ʼo fakafehuʼi au? ‘ ʼE au tala moʼoni atu, ʼe mole au tali atu anai,’+ ko te ui ʼaia ʼa te Tuʼi ʼAliki ko Sehova.” ’

4 “Kua ke tokalelei koa ke ke fakamauʼi ia natou? Foha ʼo te tagata, kua ke tokalelei koa ke ke fakamauʼi ia natou? Fakaha kia natou te ʼu meʼa fakalialia ʼae neʼe fai e ʼanatou kui.+ 5 Ui age kia natou: ‘Koʼeni te folafola ʼa te Tuʼi ʼAliki ko Sehova: “ ʼI te ʼaho ʼae neʼe au filifili ai ia Iselaele,+ neʼe au fai he fakapapau ki te ʼu hakoga ʼo Sakopo, pea neʼe natou iloʼi ai au ʼi Esipito.+ ʼEi, neʼe au fai he fakapapau mo ui age kia natou: ‘Ko au ia Sehova tokotou ʼAtua.’ 6 ʼI te ʼaho ʼaia, neʼe au fakapapau ʼe au fakamavae anai natou mai Esipito ʼo ʼave ki he fenua neʼe au kumi maʼa natou, he fenua ʼe tafe ai te huʼa pipi mo te meli.+ Neʼe matalelei age ʼi te ʼu fenua fuli. 7 Pea neʼe au ui age kia natou: ‘Kotou tahi liʼaki te ʼu meʼa fakalialia ʼae ʼe kotou sisio ki ai. ʼAua naʼa kotou heʼe maʼa ʼaki te ʼu fakatata fakalialia* ʼo Esipito.+ Ko au ia Sehova tokotou ʼAtua.’+

8 “ ‘ “Kae neʼe natou agatuʼu kia te au, neʼe mole natou fia fakalogo mai. Neʼe mole natou liʼaki te ʼu meʼa fakalialia ʼae neʼe natou sisio ki ai, pea neʼe mole natou fia lituʼa ki te ʼu fakatata fakalialia ʼo Esipito.+ Koia neʼe au fakapapau ke au fakato toku hauhau katoa kia natou ʼi Esipito. 9 Kae neʼe au manatuʼi toku huafa ke mole ʼulihi ia muʼa ʼo te ʼu puleʼaga ʼae neʼe natou maʼuʼuli ai.+ Neʼe natou iloʼi ai au ʼi te temi ʼae neʼe au fakamavae ai natou mai Esipito, kae sioʼi e te ʼu puleʼaga ʼaia.+ 10 Koia neʼe au fakamavae ai natou ʼi Esipito ʼo taki ki te toafa.+

11 “ ‘ “Pea neʼe au foaki kia natou ʼaku fakatotonu mo fakaha ʼaku lao+ ke fakalogo ki ai te tagata pea ke maʼuli.+ 12 Neʼe au toe foaki ʼaku sapato,+ ko he fakailoga ia au pea mo natou,+ ke natou iloʼi ai ko au ia Sehova ʼae ʼe au fakamaʼoniʼoniʼi ia natou.

13 “ ‘ “Kae neʼe agatuʼu kia te au te hahaʼi ʼo Iselaele ʼi te toafa.+ Neʼe mole natou fakaʼapaʼapa ki ʼaku fakatotonu, neʼe natou liʼaki ʼaku lao, kae kapau ʼe fakalogo ki ai te tagata, ʼe maʼuli anai ia. Neʼe natou maumauʼi ʼaku sapato. Koia neʼe au fakapapau ai, ʼe au fakato anai toku hauhau ʼi te toafa ke natou mamate ai.+ 14 Neʼe au manatuʼi toku huafa ke mole ʼulihi ia muʼa ʼo te ʼu puleʼaga, ʼae neʼe sisio ki taku fakamavae natou mai Esipito.+ 15 Neʼe au toe fakapapau ʼi te toafa, ʼe mole natou hu anai ki te fenua ʼae neʼe au foaki age,+ te fenua ʼae ʼe tafe ai te huʼa pipi mo te meli,+ ʼae ʼe matalelei age ʼi te ʼu fenua fuli. 16 ʼEi, neʼe natou liʼaki ʼaku lao, neʼe mole natou fakaʼapaʼapa ki ʼaku fakatotonu pea neʼe natou maumauʼi ʼaku sapato, koteʼuhi neʼe pipiki ʼonatou loto ki ʼanatou fakatata fakalialia.+

17 “ ‘ “Kae neʼe au ʼofa ia natou, ʼo mole au pulihi, kailoa, neʼe mole au pulihi natou ʼi te toafa. 18 Neʼe au ui age ki ʼonatou foha ʼi te toafa:+ ‘ ʼAua naʼa kotou fakalogo ki te ʼu lao ʼo ʼakotou kui,+ ʼaua naʼa kotou mulimuli ki ʼanatou lao pea ʼaua naʼa kotou heʼe maʼa ʼi ʼanatou fakatata fakalialia. 19 Ko au ia Sehova tokotou ʼAtua. Kotou fakalogo ki ʼaku fakatotonu, kotou mulimuli ki ʼaku lao mo maʼuliʼi.+ 20 Ke taputapu ʼaku sapato kia koutou,+ ko he fakailoga anai ia au pea mo koutou ke kotou iloʼi ai ko au ia Sehova tokotou ʼAtua.’+

21 “ ‘ “Kae neʼe agatuʼu kia te au ʼonatou foha.+ Neʼe mole natou fakaʼapaʼapa ki ʼaku fakatotonu, neʼe mole natou mulimuli mo maʼuliʼi ʼaku lao, kae kapau ʼe fakalogo ki ai te tagata, ʼe maʼuli anai ia. Neʼe natou maumauʼi ʼaku sapato, koia neʼe au fakapapau ai ke au fakato toku hauhau katoa kia natou ʼi te toafa.+ 22 Kae neʼe mole au fakahoko,+ he neʼe au manatuʼi toku huafa+ ke mole ʼulihi ia muʼa ʼo te ʼu puleʼaga ʼae neʼe sisio ki taku fakamavae natou mai Esipito. 23 Kae neʼe au fakapapau ʼi te toafa, ʼe au fakamavetevete anai natou ʼi te ʼu puleʼaga mo te ʼu fenua.+ 24 ʼEi, neʼe mole natou maʼuliʼi ʼaku lao, neʼe natou liʼaki ʼaku fakatotonu,+ neʼe natou maumauʼi ʼaku sapato pea neʼe natou pipiki ki te ʼu fakatata fakalialia ʼo ʼanatou kui.+ 25 Neʼe au tuku ke natou fakalogo ki ni lao neʼe mole lelei, pea neʼe mole feala ai ke natou maʼuʼuli.+ 26 Pea neʼe au toe tuku ke natou heʼe maʼa ʼi ʼanatou sakilifisio ʼi tanatou tutu ʼonatou ʼuluaki tupu fuli,+ ke natou lotovaivai, ke natou iloʼi ai ko au ia Sehova.” ’

27 “Koia foha ʼo te tagata, palalau ki te hahaʼi ʼo Iselaele ʼo ui: ‘Koʼeni te folafola ʼa te Tuʼi ʼAliki ko Sehova: “Neʼe toe laukoviʼi au e ʼakotou kui ʼi tanatou heʼe agatonu kia te au. 28 Neʼe au fakahu natou ki te fenua ʼae neʼe au fakapapau ke au foaki age.+ ʼI tanatou sisio ki te ʼu kiʼi moʼuga pea mo te ʼu fuʼu ʼakau failau fuli,+ neʼe natou momoli ai ʼanatou sakilifisio mo ʼanatou molaga fakalialia. ʼEi, neʼe natou momoli ʼanatou sakilifisio ko he ʼaele lelei ʼi te potu ʼaia, pea neʼe natou liligi ʼanatou molaga meʼa inu. 29 Koia neʼe au fehuʼi ai kia natou: ‘Kotea koa ʼae ʼe kotou olo ʼo fai ʼi te faʼahi maʼoluga ʼaia? (ʼE toe fakahigoaʼi pe ʼi te temi nei ko te Faʼahi Maʼoluga.)’ ” ’+

30 “Koia, tala ki te hahaʼi ʼo Iselaele: ‘Koʼeni te folafola ʼa te Tuʼi ʼAliki ko Sehova: “ ʼE kotou heʼe maʼa pe ohage ko ʼakotou kui, he ʼe kotou atolasio ki ʼanatou fakatata fakalialia, ʼo kotou heʼe agatonu ai kia te au.*+ 31 Pea ʼe kotou toe heʼe maʼa ʼi te ʼaho nei, ʼi takotou tutu ʼokotou foha ko he ʼu sakilifisio ki ʼakotou fakatata fakalialia fuli.+ Hahaʼi ʼo Iselaele, ʼe kotou toe loto koa ke au tali atu ki ʼakotou kole?” ’+

“ ʼE ui e te Tuʼi ʼAliki ko Sehova: ‘ ʼE au tala moʼoni atu, ʼe mole au tali atu anai.+ 32 ʼE mole hoko anai ʼi he temi takotou manatu ʼae: “Tou liliu ohage ko te ʼu puleʼaga, ohage ko te ʼu famili ʼo te ʼu fenua ʼae ʼe atolasio ki te ʼakau mo te maka.” ’ ”+

33 “ ʼE ui e te Tuʼi ʼAliki ko Sehova: ‘ ʼE au tala moʼoni atu, ʼe au pule anai kia koutou ʼaki toku nima malohi mo toku mafimafi, pea ʼe au fakato anai kia koutou toku hauhau.+ 34 ʼEi, ʼe au fakato anai toku hauhau mo fakamavae koutou mai te ʼu puleʼaga ʼaki toku nima malohi mo toku mafimafi. Pea ʼe au tanaki anai koutou mai te ʼu fenua ʼae neʼe kotou mavetevete ai.+ 35 ʼE au ʼaumai anai koutou ki te toafa ʼa te hahaʼi, pea ʼe au fakamauʼi ai koutou ʼi ʼoku muʼa.+

36 “ ʼE ui e te Tuʼi ʼAliki ko Sehova: ‘ ʼE au fakamauʼi anai koutou ohage pe ko taku fakamauʼi ʼakotou kui ʼi te toafa ʼo Esipito. 37 ʼE au taki anai koutou ke kotou fakalaka ʼi te lalo toko ʼo te tagata tauhi ovi,+ pea ʼe au fakamaʼua anai ke kotou fakaʼapaʼapa ki taku fuakava. 38 Kae ʼe au toʼo anai mai io koutou te kau agatuʼu pea mo natou ʼae ʼe talagataʼa kia te au.+ ʼE au fakamavae anai mai te fenua ʼae ʼe natou nonofo matapule ai, kae ʼe mole natou hu anai ki Iselaele,+ pea ʼe kotou iloʼi moʼoni anai ko au ia Sehova.’

39 “Koʼeni te folafola ʼa te Tuʼi ʼAliki ko Sehova kia koutou hahaʼi ʼo Iselaele: ‘Ke kotou tahi olo ʼo tauhi ki ʼana fakatata fakalialia.+ Kae kapau leva ʼe mole kotou fakalogo mai, ʼe mole toe feala anai ke kotou ʼulihi toku huafa taputapu ʼaki ʼakotou sakilifisio mo ʼakotou fakatata fakalialia.’+

40 “ ʼE ui e te Tuʼi ʼAliki ko Sehova: ‘ ʼE tauhi mai anai kia te au te hahaʼi katoa ʼo Iselaele ʼi te fenua, ʼei, ia natou fuli ʼi toku moʼuga taputapu, ʼi he moʼuga maʼoluga ʼo Iselaele.+ ʼE natou fakafiafiaʼi anai toku loto ʼi ai, pea ʼe au kole anai ke kotou ʼaumai ʼakotou meʼa taputapu fuli, ʼakotou meʼa ʼofa pea mo ʼakotou molaga lelei tukupau.+ 41 ʼE kotou fakafiafiaʼi anai toku loto ʼaki te ʼaele lelei ʼo ʼakotou sakilifisio moka au fakamavae anai koutou mai te ʼu puleʼaga pea mo tanaki koutou mai te ʼu fenua ʼae neʼe kotou mavetevete ai.+ ʼEi, ʼe au fakaha atu anai toku maʼoniʼoni pea ʼe sisio anai ki ai te ʼu puleʼaga.’+

42 “ ‘Pea ʼe kotou iloʼi moʼoni anai ko au ia Sehova,+ moka au toe ʼave koutou ki Iselaele,+ te fenua ʼae neʼe au fakapapau ke au foaki ki ʼakotou kui. 43 ʼE kotou manatuʼi anai takotou aga ʼi te potu ʼaia, pea mo te ʼu gaue fuli ʼae neʼe kotou heʼe maʼa ai.+ Pea ʼe kotou fakalialia pe anai kia koutou ʼuhi ko te ʼu meʼa kovi fuli ʼae neʼe kotou fai.’+ 44 ʼE ui e te Tuʼi ʼAliki ko Sehova: ‘Hahaʼi ʼo Iselaele, ʼe kotou iloʼi moʼoni anai ko au ia Sehova, moka au fai te ʼu faʼahi ʼaia ʼuhi ko toku huafa.+ Pea ʼe mole au tauteaʼi anai koutou ʼo mulimuli ki takotou agakovi mo ʼakotou aga heʼe ʼaoga.’ ”

45 Pea neʼe toe palalau mai ia Sehova, ʼo ina ui: 46 “Foha ʼo te tagata, haga ki te potu saute, fakaha te logo ʼaeni ki te potu saute pea mo faifakakikite ʼo ʼuhiga mo te vao matuʼa ʼo te potu saute. 47 Ui ki te vao matuʼa ʼo te potu saute: ‘Fagono ki te logo ʼa Sehova. Koʼeni te folafola ʼa te Tuʼi ʼAliki ko Sehova: “ ʼE au tafu anai he afi io koe,+ ʼo vela ai ʼau fuʼu ʼakau maʼuli fuli pea mo ʼau fuʼu ʼakau moamoa fuli. ʼE mole mate anai te afi kakaha,+ ʼo tutu ai te ʼu fofoga fuli mai te potu saute ki te potu noleto. 48 Pea ʼe iloʼi anai e te hahaʼi fuli ko au ia Sehova, ʼae neʼe au tafu te afi ʼaia pea ʼe mole mate anai ia.” ’ ”+

49 Koia, neʼe au kalaga ai leva: “Oie, Tuʼi ʼAliki ko Sehova, koʼeni tanatou manatu ʼo ʼuhiga mo au: ‘ ʼE palalau pe ia ʼaki ni matetea!’ ”*

21 Neʼe toe palalau mai ia Sehova, ʼo ina ui: 2 “Foha ʼo te tagata, haga ki Selusalemi. Fakaha te logo ʼaeni ʼo ʼuhiga mo te ʼu koga meʼa taputapu, pea mo faifakakikite ʼo ʼuhiga mo Iselaele. 3 Ui age ki Iselaele: ‘Koʼeni te folafola ʼa Sehova: “ ʼE au tauʼi anai koe, ʼei, ʼe au tohoʼi ake anai taku heleta mai tona ʼaiʼaga,+ pea ʼe au pulihi anai io koe te kau faitotonu mo te kau agakovi. 4 ʼE au toʼo ake anai taku heleta mai tona ʼaiʼaga moʼo taʼi te hahaʼi fuli, koteʼuhi ʼe au pulihi anai io koe te kau faitotonu mo te kau agakovi, mai te potu saute ki te potu noleto. 5 ʼE iloʼi moʼoni anai e te hahaʼi fuli ko au ia Sehova, neʼe au toʼo taku heleta mai tona ʼaiʼaga, pea ʼe mole toe liliu anai ki ai.” ’+

6 “Pea ko koe, foha ʼo te tagata, lauga mo tekelili, ʼei, lauga mamahi ʼi ʼonatou muʼa.+ 7 Kapau ʼe natou fehuʼi atu: ‘He koʼe ʼe ke lauga?’ ʼe ke tali age anai: ‘ ʼE tupu ko he logo.’ ʼE hoko moʼoni anai ia, pea ʼe matataku ai te hahaʼi fuli mo vaivai ʼonatou nima, ʼe natou lotovaivai ʼaupito ai mo palapala ai ʼonatou tuli.*+ ‘Koʼeni, ʼe hoko moʼoni anai ia, ʼei, ʼe hoko ia,’ ko te ui ʼaia ʼa te Tuʼi ʼAliki ko Sehova.”

8 Neʼe toe palalau mai ia Sehova, ʼo ina ui: 9 “Foha ʼo te tagata, faifakakikite mo ui: ‘Koʼeni te folafola ʼa Sehova: “ ʼE ke ui anai: ‘Ko he heleta!+ ʼE fakamasila he heleta mo kilisi. 10 ʼE fakamasila moʼo fakahoko he toe mātea, ʼe kilisi ke tapa ohage ko te hila.’ ” ’ ”

“ ʼE mole tonu koa la ke tou fakafiafia?”

“ ‘ ʼE ina* siʼaki anai koa te tokotoko ʼo toku foha totonu,+ ohage pe ko tana siʼaki he fuʼu ʼakau?

11 “ ‘ ʼE foaki ke fakamasila ke fakaʼaogaʼi e he tahi. ʼE fakamasila te heleta ʼaia, pea ʼe kilisi ke fakaʼaogaʼi e he tagata faifakapo.+

12 “ ‘Kalaga mo lauga,+ foha ʼo te tagata, koteʼuhi ʼe haʼu ia ʼo taʼi taku hahaʼi, ʼe fakahagahaga ki te ʼu pule fuli ʼo Iselaele.+ ʼE natou mamate anai ʼi te heleta ʼo feia mo taku hahaʼi. Koia taʼi tou kauaga ʼi tou lotomamahi. 13 Neʼe sivisivi taku hahaʼi,+ pea kotea anai ka hoko mo kapau ʼe liʼaki e te heleta te tokotoko? ʼE puli anai ia,’*+ ko te ui ʼaia ʼa te Tuʼi ʼAliki ko Sehova.

14 “Foha ʼo te tagata, faifakakikite, pasipasi pea mo ui tuʼa tolu: ‘Ko he heleta!’ Ko te heleta ʼo te kau mate, ko te heleta ʼo he toe mātea, ʼe ʼa takai natou e te heleta.+ 15 ʼE natou matataku anai,+ pea ʼe fetoki ai te tokolahi ʼi te ʼu matapa ʼo tonatou kolo. ʼE au fakahoko anai he mātea ʼaki te heleta. ʼEi, ʼe tapa ohage ko te hila pea ʼe kilisi ki he mātea. 16 Tuʼusi te faʼahi mataʼu, taʼi te faʼahi hema. Alu ki te potu fuli ʼae ʼe haga ki ai tau heleta. 17 ʼE au toe pasipasi anai moʼo fakafimalieʼi toku hauhau.+ Ko au ia Sehova ʼae neʼe palalau.”

18 Neʼe toe palalau mai ia Sehova, ʼo ina ui: 19 “Kae kia koe, foha ʼo te tagata, tofa ni ala ʼe lua ke haʼu ai te heleta ʼo te hau ʼo Papiloni. ʼE tofa lua anai mai he fenua pe ʼe tahi. ʼE fakatuʼu anai he pou fakailoga ʼi te potu ʼae ʼe maga lua ai te ala ʼo alu ki ni kolo ʼe lua. 20 ʼE tonu ke ke tofa he ala ke haʼu ai te heleta ʼo taʼi ia Lapa,+ te kolo ʼo te kau Amone, pea mo he tahi ala ke haʼu ai ʼo taʼi ia Selusalemi,+ te kolo tau ʼo Suta. 21 ʼE tuʼu te hau ʼo Papiloni ʼi te maga lua, ʼi te faʼahi ʼae ʼe vahe lua ai te ala, ke gaohi meʼa fakatemonio. ʼE ina lulu te ʼu kauʼi nahau, ʼe faifehuʼi ki ʼana taula ʼatua* pea ʼe ina sivi te ʼate ʼo he manu. 22 Ko te meʼa ʼae ʼi tona nima mataʼu, ʼe ina hinoʼi ia Selusalemi, ke ina fakatuʼu ai ni masini tau, mo fakatotonu ke matehi te hahaʼi, mo fai he kalaga tau, mo fakatuʼu ni masini tau ki te ʼu matapa, mo laga he kaupa moʼona tauʼi pea mo he kaupa moʼona ʼa takai.+ 23 Kae ko he fakailoga kaka anai kia natou* ʼae neʼe natou fai age ni fakapapau.+ ʼE ina manatuʼi tanatou hala pea ʼe ina puke anai natou.+

24 “Koia koʼeni te folafola ʼa te Tuʼi ʼAliki ko Sehova: ‘ ʼE manatuʼi takotou hala, koteʼuhi neʼe kotou fakaha ʼakotou talagataʼa, mo ʼakotou agahala ʼi ʼakotou gaue fuli. ʼE manatuʼi koutou, koia ʼae ʼe ʼave fakamalohi anai koutou.’

25 “Kae kua hoko mai tou ʼaho, tagata ʼae kua lavea kovi, pule agakovi ʼo Iselaele.+ Kua hoko mai te temi ʼae ʼe fakatuʼā ai koe. 26 Koʼeni te folafola ʼa te Tuʼi ʼAliki ko Sehova: ‘Toʼo te kie* ʼi tou ʼulu mo te kolona.+ ʼE hoko anai ni fetogi.+ Fakamaʼuhigaʼi ia ia ʼae ʼe malalo,+ pea fakamalaloʼi ia ia ʼae ʼe maʼuhiga.+ 27 Ko he maumau, ko he maumau, ko he maumau, ʼe au fakaliliu anai ke feia. Pea ʼe mole maʼu anai* e he tahi ʼo kaku ki te haʼu ʼo ia ʼae ʼe tonu ke ina maʼu,+ pea ʼe au foaki age anai ki ai.’+

28 “Pea ko koe, foha ʼo te tagata, faifakakikite mo ui: ‘Koʼeni te folafola ʼa te Tuʼi ʼAliki ko Sehova ʼo ʼuhiga mo te kau Amone pea mo ʼanatou laukovi.’ ʼE ke ui anai: ‘Ko he heleta! Kua toʼo te heleta ki he mātea, kua kilisi ke ina matehi pea ke tapa ohage ko te hila. 29 Logope la te ʼu meʼa kaka ʼae neʼe ha pea mo te ʼu faifakakikite loi ʼo ʼuhiga mo koe, kae ʼe fakatuʼuga anai ʼau sino mate ki ʼihi kau mate, ia te hahaʼi agakovi. Kua hoko mai tonatou ʼaho, ʼei, kua hoko mai te temi ʼae ka fakatuʼā ai natou. 30 Toe ʼai te heleta ki tona ʼaiʼaga. ʼE au fakamauʼi anai koe ʼi te potu ʼae neʼe fakatupu ai koe, ʼi tou fenua totonu. 31 ʼE au fakato anai kia koe toku hauhau. ʼE au pupuhi anai kia koe te afi ʼo toku hauhau, pea ʼe au tuku anai koe kia nima ʼo te hahaʼi agamalohi, te kau tufuga ʼo te maumau.+ 32 ʼE ke liliu anai ko he fafie ki te afi,+ ʼe liligi ai tou toto ʼi te fenua, ʼe mole toe manatuʼi ai koe, koteʼuhi ko au ia Sehova ʼae neʼe palalau.’ ”

22 Neʼe toe palalau mai ia Sehova, ʼo ina ui: 2 “Pea ko koe, foha ʼo te tagata, kua ke tokalelei koa ke ke tala he fakamau ki te kolo faifakapo,+ pea mo fakaha ki ai te ʼu meʼa fakalialia fuli ʼae ʼe ina fai?+ 3 ʼE ke ui anai: ‘Koʼeni te folafola ʼa te Tuʼi ʼAliki ko Sehova: “Kolo ʼae ʼe ke liligi te toto io koe,+ kua hoko mai tou temi,+ ia koe ʼae ʼe ke fai ni fakatata fakalialia* ke ke heʼe maʼa ai.+ 4 ʼE ke lakahala ʼuhi ko te toto ʼae neʼe ke liligi,+ pea kua ke heʼe maʼa ʼuhi ko ʼau fakatata fakalialia.+ Kua ke fakanounou ʼou ʼaho pea kua hoko mai ʼou taʼu fakaʼosi. Koia ʼe au fakaliliu anai koe ko he meʼa ʼe fehiʼaʼinaʼi e te ʼu puleʼaga, ʼae ʼe vaʼi ʼi te ʼu fenua fuli.+ 5 ʼEi, ʼe vaʼi anai koe e te ʼu fenua ʼae ʼi ʼou tafaʼaki mo te ʼu fenua ʼae ʼe mamaʼo,+ ia koe ʼae ʼe ʼuli tou higoa mo lotomaveuveu. 6 Koʼeni ʼe fakaʼaogaʼi e te ʼu pule fuli ʼo Iselaele ʼae io koe ʼonatou tuʼulaga moʼo liligi te toto.+ 7 ʼE meʼa noaʼi io koe te tamai mo te faʼe.+ ʼE kakaʼi te matapule, ʼe gaohi koviʼi te fanau hala mo tamai pea mo te fafine vitua.” ’ ”+

8 “ ‘ ʼE ke meʼa noaʼi ʼoku koga meʼa taputapu pea ʼe mole ke taupau ʼaku sapato.+ 9 ʼE maʼu io koe ni hahaʼi faifasituʼu kua natou fakatotonu ke natou liligi te toto.+ ʼE kai io koe ni sakilifisio neʼe momoli ki te ʼu fakatata ʼi te ʼu moʼuga, pea ʼe fai io koe te aga fakalialia.+ 10 ʼE ʼulihi io koe te moeʼaga ʼo te tamai,+ pea ʼe fakaʼalikiʼi te fafine ʼae ʼe heʼe maʼa ʼuhi ko te maligi ʼo tona fatu.+ 11 ʼE fai he aga fakalialia io koe e he tagata mo te ʼohoana ʼo tona tatau,+ ʼe fakalainoaʼi e te tahi te ʼohoana ʼo tona foha ʼaki tana aga fakalialia,+ pea ʼe toe fakaʼalikiʼi e te tahi tona tokolua, ʼae ʼe nā matuʼa tahi.+ 12 ʼE tali io koe te falā moʼo fai he fakapo.+ ʼE ke foaki he falā ke maʼu ai hona tupu+ pea ke ke maʼu koloa ai, pea ʼe ke kaihaʼa te falā ʼo tou tatau.+ ʼE moʼoni, neʼe ke galoʼi ʼosi ia au,’ ko te ui ʼaia ʼa te Tuʼi ʼAliki ko Sehova.

13 “ ‘Koʼeni, ʼe au fakalialia ʼi taku sio ki tau maʼu fakakaka ʼou koloa, pea mo te ʼu fakapo ʼae ʼe hoko io koe. 14 ʼE ke lototoʼa anai koa, pea ʼe malohi anai koa ʼou nima ʼi te temi ʼae ka au fakatuʼā ai koe?+ Ko au ia Sehova ʼae neʼe palalau, pea ʼe au fakahoko moʼoni anai. 15 ʼE au fakamavetevete anai koe ʼi te ʼu puleʼaga mo te ʼu fenua.+ ʼE au fakagata anai tou heʼe maʼa.+ 16 ʼE fakalainoaʼi anai koe ia mata ʼo te ʼu puleʼaga, pea ʼe ke iloʼi moʼoni anai ko au ia Sehova.’ ”+

17 Pea neʼe toe palalau mai ia Sehova, ʼo ina ui: 18 “Foha ʼo te tagata, ʼe mole kei maʼuhiga kia au te hahaʼi ʼo Iselaele, ʼe natou hage ko te ʼu sikoli.* ʼE natou hage fuli ko te kapa, mo te etani,* mo te ukamea, mo te pulu ʼi he gutuʼumu. ʼE natou hage pe ko te ʼu sikoli ʼo te siliva.+

19 “Koia, koʼeni te folafola ʼa te Tuʼi ʼAliki ko Sehova: ‘ ʼE au tanaki ia koutou fuli ʼi te loto kolo ʼo Selusalemi, koteʼuhi ʼe mole kei kotou maʼuhiga kia te au ohage ko te ʼu sikoli.+ 20 ʼE hage anai ko te tanaki ʼo te siliva, mo te kapa, mo te ukamea, mo te pulu pea mo te etani ʼi he loto gutuʼumu, pea mo te hokohoko ʼo te afi moʼonatou haka. Pea ʼe toe feia pe anai taku fakatahiʼi koutou ʼi toku hauhau, pea ʼe au pupuhi anai te afi moʼo haka ʼo koutou.+ 21 ʼE au fakatahiʼi anai koutou pea mo pupuhi kia koutou te afi ʼo toku hauhau,+ pea ʼe haka ai anai koutou ʼi te loto kolo.+ 22 ʼE hage pe anai te haka ʼo koutou ʼi te loto kolo ko te haka ʼo te siliva ʼi te gutuʼumu. Pea ʼe kotou iloʼi moʼoni anai ko au ia Sehova ʼae neʼe au fakato toku hauhau kia koutou.’ ”

23 Pea neʼe toe palalau mai ia Sehova, ʼo ina ui: 24 “Foha ʼo te tagata, tala age ki ai: ‘ ʼE ke hage ko he kele ʼe mole fakamaʼa anai pea ʼe mole to ki ai te ʼua ʼi te ʼaho ʼo te hauhau. 25 Neʼe fonofono io koe ʼau polofeta+ ohage ko he laione gugulu ʼe ina hae tana meʼa kai.+ ʼE natou kai te hahaʼi. ʼE natou kaihaʼa ni koloa mo ni meʼa maʼuhiga. Neʼe tupu ai te kaugamalie ʼo te ʼu fafine vitua io koe. 26 Neʼe talagataʼa ʼau pelepitelo ki taku lao+ pea ʼe hoko atu pe tanatou ʼulihi ʼoku koga meʼa taputapu.+ ʼE mole natou fakakehekeheʼi te meʼa ʼae ʼe taputapu pea mo te meʼa ʼae ʼe mole taputapu.+ ʼE mole natou fakaha te kehekehe ʼo te meʼa ʼae ʼe heʼe maʼa pea mo te meʼa ʼae ʼe maʼa.+ ʼE mole natou fia taupau ʼaku sapato pea ʼe natou fakalainoaʼi ia au. 27 ʼE hage ʼau tama ʼaliki ʼae io koe ko te ʼu lupo ʼae ʼe natou hae tanatou meʼa kai. ʼE natou liligi te toto pea ʼe natou matehi ni hahaʼi ke natou maʼu fakakaka ni koloa.+ 28 Pea neʼe fufu e ʼau polofeta ʼanatou aga ohage ko te fakamomole ʼo he kaupa ʼaki te lahe. ʼE ha kia natou ni meʼa kaka pea ʼe natou fai ni fakakikite loi.+ ʼE natou ui: “Koʼeni te folafola ʼa te Tuʼi ʼAliki ko Sehova,” kae neʼe mole palalau ia Sehova. 29 Neʼe kaka mo kaihaʼa te hahaʼi ʼo te fenua.+ Neʼe natou gaohi koviʼi te tagata fakaʼofaʼofa mo te masiva. Neʼe natou kakaʼi te matapule pea neʼe mole natou fakamauʼi ia ia ʼi te faitotonu.’

30 “ ‘Neʼe au kumi he tagata ia natou ke ina toe laga te kaupa maka, peʼe ke tuʼu ʼi te ava ʼo te kaupa ʼi ʼoku muʼa moʼo puipui te fenua, ke ʼaua naʼa maumauʼi.+ Kae neʼe mole au maʼu he tahi. 31 Koia ʼe au huaʼi anai toku hauhau kia natou mo fakaʼauha ia natou ʼaki te afi ʼo toku hauhau. ʼE au fakato anai kia natou te ʼu fua ʼo tanatou aga,’ ko te ui ʼaia ʼa te Tuʼi ʼAliki ko Sehova.”

23 Neʼe toe palalau mai ia Sehova, ʼo ina ui: 2 “Foha ʼo te tagata, neʼe ʼi ai ni fafine ʼe lua neʼe nā faʼe tahi.+ 3 Neʼe nā liliu ko te ʼu fafine paomutu ʼi Esipito.+ Neʼe nā faiaga talu mai tonā temi tupulaga. Neʼe alaala ʼonā fatafata kae kei nā taupoʼou ʼi te fenua ʼaia. 4 Neʼe higoa te muʼa ko Ohola,* pea ko te muli ko Oholipa.* Neʼe au maʼu leva naua maʼaku pea neʼe nā fanauʼi ni tama mo ni taʼahine. Ko Ohola ko Samalia,+ pea ko Oholipa ko Selusalemi.

5 “Neʼe faiaga ia Ohola, kae neʼe ʼaʼaku.+ Neʼe holi ki ʼana tagata laukau,+ ia te kau Asilia+ ʼae ʼi ʼona tafaʼaki. 6 Neʼe ko ni kovana neʼe teu ʼuʼui pea mo ni pule. Neʼe ko te kau tama tupulaga mo talavou fuli pea neʼe natou heka hosi. 7 Neʼe hoko atu pe tana faiaga mo te hahaʼi maʼuhiga fuli ʼa te kau Asilia, pea neʼe liliu ai ʼo heʼe maʼa+ ʼaki te ʼu fakatata fakalialia* ʼo natou ʼae neʼe holi fakavale ki ai. 8 Neʼe mole ina siʼaki ia tana faiaga mo natou ʼae ʼi Esipito, koteʼuhi neʼe natou momoe mo ia ʼi tona temi tupulaga. Neʼe natou alaala tona fatafata kae kei taupoʼou, pea neʼe natou fakahoko mo ia ʼonatou holi fakavale.+ 9 Koia neʼe au tuku leva ia ia ki ʼana tagata laukau, te kau Asilia+ ʼae neʼe holi ki ai. 10 Neʼe natou fakahaha tona telefua,+ neʼe natou puke ʼana tama mo ʼana taʼahine+ pea neʼe natou matehi ia ia ʼaki te heleta. Neʼe liliu leva ʼo logona ʼi te hahaʼi fafine, pea neʼe natou fakatuʼā ia ia.

11 “ ʼI te sio ʼa Oholipa ki te meʼa ʼaia, neʼe kovi age ʼona holi mo tana faiaga ʼi tona taʼokete.+ 12 Neʼe holi fakavale ia ki te kau Asilia+ ʼae ʼi ʼona tafaʼaki, te kau kovana mo te kau pule, ʼae neʼe teu matalelei pea neʼe natou heka hosi. Neʼe ko te kau tama tupulaga mo talavou fuli. 13 Neʼe heʼe maʼa ai, pea neʼe au tokagaʼi neʼe tatau pe tanā aga.+ 14 Kae neʼe ʼasili kovi age tana faiaga. Neʼe sio ki te ʼu pāki ʼo ni tagata Kaletea neʼe togi ʼi te kaupa pea neʼe pena kula. 15 Neʼe haʼi ʼi ʼonatou koga loto he kiliʼi pipi, pea neʼe takai ʼonatou ʼulu ʼaki he kie ʼe viligia. Neʼe natou hage ko ni tagata tau. Ko te ʼu pāki fuli, neʼe ko ni tagata Papiloni neʼe tutupu ʼi te fenua ʼo te kau Kaletea. 16 Neʼe kamata holi fakavale kia natou ʼi te temi pe ʼae neʼe sio ai kia natou, pea neʼe ina fekauʼi he kau ʼave logo ki Kaletea.+ 17 Neʼe ʼomai ai te ʼu foha ʼo Papiloni ki te moeʼaga ʼae neʼe ina teuteuʼi ki te ʼu felaveʼi fakasino. Pea neʼe natou ʼulihi ia ia ʼaki ʼonatou holi fakavale. Neʼe heʼe maʼa ai, ʼo lituʼa mo he fakalialia kia natou.

18 “Neʼe hoko atu pe tana agapauʼu ʼi tana faiaga ʼo fakahaha tona telefua.+ Koia neʼe au lituʼa mo he fakalialia kia ia ohage pe ko taku lituʼa mo he fakalialia ki tona taʼokete.+ 19 Neʼe ina fakalahi ʼana faiaga+ ʼo ina manatuʼi ai tona temi tupulaga, ʼi te temi ʼae neʼe faiaga ai ʼi Esipito.+ 20 Neʼe holi fakavale ki ʼana tagata laukau. ʼE hage pe ko he fafine ʼa he tagata ʼe hage tona koga tapu ko ʼae ʼo he asino, peʼe ko he hosi. 21 Neʼe ke manatuʼi tuʼumaʼu tau aga fakalialia ʼi tou temi tupulaga ʼi Esipito,+ ʼi te temi ʼae neʼe alaala ai ʼou fatafata.+

22 “Koia Oholipa, koʼeni te folafola ʼa te Tuʼi ʼAliki ko Sehova: ‘ ʼE au fakaneke anai ʼau tagata laukau ke natou tauʼi koe,+ ia natou ʼae neʼe ke lituʼa mo he fakalialia ki ai. Pea ʼe au fekauʼi anai natou mai te ʼu potu fuli,+ 23 te ʼu foha ʼo Papiloni+ pea mo te kau Kaletea fuli,+ mo te ʼu tagata mai Pikoti,+ mo Soa, mo Koa, ʼo feia pe mo te kau Asilia fuli. Neʼe ko te kau tama tupulaga mo talavou fuli ʼaia, ko ni kovana mo ni pule, ko ni tagata tau pea mo ni tagata neʼe filifili lelei, neʼe natou heka hosi fuli. 24 ʼE natou tauʼi anai koe ʼi te logoaʼa ʼo te ʼu saliote tau mo te ʼu foʼi teka, mo ni kau solia kaugamalie, mo ni meʼa tali tau lalahi mo liliki,* ʼo toe feia pe mo ni puloga tau. ʼE natou ʼa takai anai koe. ʼE au fakagafua anai ke natou fakamauʼi mo fakatuʼā koe ʼo mulimuli pe ki te meʼa ʼae ʼe natou loto ki ai.+ 25 ʼE au fakato anai toku hauhau kia koe, pea ʼe natou gaohi fakaitaita anai koe. ʼE natou tuʼusi anai tou ihu mo ʼou taliga, pea ʼe matehi anai ʼaki te heleta ia natou ʼae ka hao. ʼE natou ʼave anai ʼau tama mo ʼau taʼahine, pea ʼe tutu anai ia natou ʼae ka hao.+ 26 ʼE natou toʼo anai ʼou teu+ mo ʼau meʼa gigila taulekaleka.+ 27 ʼE au fakagata anai tau aga fakalialia mo tau faiaga,+ ʼae neʼe kamata ʼi Esipito.+ ʼE mole ke toe sio anai kia natou pea ʼe mole ke toe manatuʼi anai ia Esipito.’

28 “Koʼeni te folafola ʼa te Tuʼi ʼAliki ko Sehova: ‘Kua vave pe taku tuku koe kia natou ʼae ʼe ke fehiʼa ki ai, ia natou ʼae neʼe ke lituʼa mo he fakalialia ki ai.+ 29 ʼE natou fehihiʼa anai ia koe, ʼe natou ʼave anai ia te ʼu fua fuli ʼo tau gaue kinakina,+ pea ʼe natou liʼaki telefua anai koe, ʼei, ʼe ke telefua ʼosi. ʼE ha anai tau aga fakaufiufi mo ʼau aga heʼe ʼaoga, tau aga fakalialia pea mo tau faiaga.+ 30 ʼE fai anai kia koe te ʼu meʼa ʼaia, koteʼuhi neʼe ke tuli te ʼu puleʼaga ohage ko he fafine paomutu,+ pea neʼe ke heʼe maʼa ʼuhi ko ʼanatou fakatata fakalialia.+ 31 Neʼe tatau pe tau aga mo tou taʼokete.+ Koia ʼe au ʼai anai tona ipu ki tou nima.’+

32 “Koʼeni te folafola ʼa te Tuʼi ʼAliki ko Sehova:

“Ko au ʼae neʼe palalau,” ko te ui ʼaia ʼa te Tuʼi ʼAliki ko Sehova.’

35 “Koia koʼeni te folafola ʼa te Tuʼi ʼAliki ko Sehova: ‘ ʼE hoko anai kia koe te ʼu fua ʼo tau aga fakalialia pea mo ʼau faiaga, koteʼuhi neʼe ke galoʼi au pea mo lituʼa ʼosi mai.’ ”+

36 Pea neʼe ui mai e Sehova: “Foha ʼo te tagata, ʼe ke tala anai koa he fakamau ʼo ʼuhiga mo Ohola pea mo Oholipa?+ ʼE ke tukugakoviʼi anai koa naua ʼuhi ko ʼanā aga fakalialia? 37 Neʼe nā faiaga*+ pea neʼe totoʼia ʼonā nima. Neʼe mole gata pe ki tanā faiaga mo ʼanā fakatata fakalialia, kae neʼe nā tutu te ʼu tama ʼae neʼe nā foaki mai, ʼo momoli ko he meʼa kai ki ʼanā fakatata.+ 38 Pea tahi ʼae, koʼeni te meʼa ʼae neʼe nā fai mai: Neʼe nā ʼulihi toku sagatualio ʼi te ʼaho ʼaia, pea neʼe nā maumauʼi ʼaku sapato. 39 ʼI tanā ʼosi matehi ʼanā tama ʼo momoli ko he sakilifisio ki ʼanā fakatata fakalialia,+ ʼi te ʼaho pe ʼaia neʼe nā feulufi ki toku sagatualio moʼona ʼulihi.+ Koʼena te meʼa ʼae neʼe nā fai ʼi toku loto fale totonu. 40 Neʼe nā toe fekauʼi he tagata ʼave logo ke ʼomai ni tagata mai mamaʼo.+ Ko koe Oholipa, neʼe ke maʼanu ʼi tanatou ʼomai, neʼe ke pena ʼou mata mo fakamatalelei ʼaki ni meʼa fakateuteu.+ 41 Neʼe ke heka ʼi he moeʼaga matalelei+ neʼe tuʼu ʼi ʼona muʼa he laupapa neʼe teuteuʼi.+ Neʼe ke tuku ki ai taku iseso+ mo taku lolo.+ 42 Neʼe haʼu mai ai he logoaʼa ʼo ni tagata kaugamalie ʼe lotonoa, pea neʼe ʼi ai ni kau konahia neʼe ʼaumai mai te toafa. Neʼe natou ʼai ki te ʼu nima ʼo te hahaʼi fafine ni vesa, pea mo ni pale taulekaleka ki ʼonatou ʼulu.

43 “Neʼe au ui leva ʼo ʼuhiga mo te fafine ʼae kua gaʼegaʼe ʼi tana tono: ‘Kae ʼe ina hoko atu pe anai tana faiaga.’ 44 Neʼe hoko atu pe tanatou olo kio ia ohage ko te olo ki he fafine paomutu. Koia neʼe natou olo ai kio Ohola pea mo Oholipa, te ʼu fafine aga fakalialia ʼaia. 45 Kae ʼe fakamauʼi anai ia ia* e ni tagata faitotonu, ʼo mulimuli pe ki ʼana faiaga+ mo ʼana faifakapo.+ ʼE moʼoni, ko ni fafine tono, ko tonā ʼuhiga ʼaia pea ʼe totoʼia ʼonā nima.+

46 “Koʼeni te folafola ʼa te Tuʼi ʼAliki ko Sehova: ‘ ʼE fekauʼi anai he kautau moʼo tauʼi ʼo naua. Pea ʼe natou fakaliliu anai naua ko he meʼa fakalialia mo he meʼa ʼe kaihaʼa.+ 47 ʼE tuki makaʼi anai naua e te kautau ʼaia+ mo matehi naua ʼaki te heleta, mo matehi ʼanā tama mo ʼanā taʼahine+ pea ʼe natou tutu anai ʼonā ʼapi.+ 48 ʼE au fakagata anai te aga fakalialia ʼi te fenua. ʼE taʼofi anai e te ʼu fafine fuli he ako mai ai, pea ʼe mole natou faʼifaʼitakiʼi anai takolua aga fakalialia.+ 49 ʼE natou fakahoko atu anai te ʼu fua ʼo takolua aga fakalialia, pea mo te ʼu agahala ʼae neʼe kolua fai mo te ʼu fakatata fakalialia. Pea ʼe kolua iloʼi moʼoni anai ko au ia te Tuʼi ʼAliki ko Sehova.’ ”+

24 Neʼe toe palalau mai ia Sehova ʼi te hiva taʼu, ʼi te ʼaho hogofulu ʼo te mahina hogofulu, ʼo ina ui: 2 “Foha ʼo te tagata, tohi te ʼaho ʼaeni. Neʼe kamata tauʼi e te hau ʼo Papiloni ʼi te ʼaho ʼaeni ia Selusalemi.+ 3 Pea fakamatala he hisitolia* ʼo ʼuhiga mo te hahaʼi agatuʼu, ʼo ke ui:

“ ‘Koʼeni te folafola ʼa te Tuʼi ʼAliki ko Sehova:

“Fakatuʼu te kulo, fakatuʼu ki te afi pea mo huaʼi ki ai te vai.+

 5 Toʼo te ʼu ovi ʼae ʼe lelei ʼi tau faga manu.+ Tanaki te ʼu fafie ʼi te lalo kulo pea mo ʼona tafaʼaki.

Fakapula te ʼu kanoʼi manu pea mo te ʼu hui ʼae ʼi te kulo.” ’

6 “Koia koʼeni te folafola ʼa te Tuʼi ʼAliki ko Sehova:

‘Malaʼia ki te kolo faifakapo,+ te kulo ukaukamea ʼae neʼe mole toʼo tona ukaukamea!

Ke toʼo takitahi mai ai te ʼu kanoʼi manu,+ ke mole fai he toho moʼonatou filifili.

 7 ʼE maʼu ia ia te toto ʼae neʼe ina liligi,+ neʼe ina liligi leva ki te fuga maka.

Neʼe mole ina liligi ki te kele naʼa ʼuʼufi ʼaki te efu.+

9 “Koia koʼeni te folafola ʼa te Tuʼi ʼAliki ko Sehova:

‘Malaʼia ki te kolo faifakapo!+

ʼE au fakatuʼuga anai he toe fafie.

ʼE puli ai anai tona ʼuli+ pea mo tona ukaukamea.

Li te kulo ukaukamea ki te afi!’

13 “ ‘Neʼe ke heʼe maʼa ʼuhi ko tau aga fakalialia.+ Neʼe au faigaʼi ke au fakamaʼa koe, kae neʼe mole feala ke fakamaʼa koe mai tou heʼe maʼa. ʼE mole ke maʼa anai ʼi muʼa ʼo taku fakafimalieʼi toku hauhau kia koe.+ 14 Ko au ia Sehova ʼae neʼe palalau. ʼE hoko anai. ʼEi, ʼe au fakahoko fakamalotoloto anai, ʼe mole au fakahemala anai.+ ʼE fakamauʼi anai koe ʼo mulimuli pe ki tau aga mo ʼau gaue,’ ko te ui ʼaia ʼa te Tuʼi ʼAliki ko Sehova.”

15 Neʼe toe palalau mai ia Sehova, ʼo ina ui: 16 “Foha ʼo te tagata, ʼe au toʼo fakapunamaʼuli anai ia ia ʼae ʼe ke ʼofa ai.+ ʼE mole tonu anai ke ke putu mo tagi loʼimata. 17 Lauga fakalogologo pea ʼaua naʼa ke fakahoko te ʼu agaʼi fenua ki te putu.+ Takai tou ʼulu ʼaki te kie,+ pea tui ʼou sulie.+ ʼAua naʼa ke ʼuʼufi tou kava+ pea ʼaua naʼa ke kai te pane ʼae ka foaki atu.”+

18 Neʼe au palalau ki te hahaʼi ʼi te uhu, pea neʼe mate toku ʼohoana ʼi te afiafi. Koia ʼi te ʼala uhu ake, neʼe au fai te meʼa ʼae neʼe fakatotonu mai. 19 Neʼe fehuʼi mai e te hahaʼi: “Fakamahino mai te meʼa ʼae ʼe ke fai. Kotea koa tomatou pikipikiga mo te ʼu meʼa ʼaia?” 20 Neʼe au tali age kia natou: “Neʼe palalau mai ia Sehova, ʼo ina ui: 21 ‘Tala age ki te hahaʼi ʼo Iselaele: “Koʼeni te folafola ʼa te Tuʼi ʼAliki ko Sehova: ‘ ʼE au ʼulihi anai toku sagatualio,+ ʼae ʼe kotou fiameʼameʼa ai, ʼae ʼe maʼuhiga kia koutou pea ʼe fakaʼamuʼamu ki ai tokotou loto. ʼE matehi anai ʼaki te heleta ʼokotou foha mo ʼokotou ʼofafine ʼae neʼe mole ʼomai mo koutou.+ 22 Pea ʼe tonu anai ke kotou fai ohage ko au. ʼE mole tonu anai ke kotou ʼuʼufi ʼokotou kava mo kotou kai te pane ʼae ka foaki atu.+ 23 ʼE takai anai ʼokotou ʼulu ʼaki te kie mo kotou tui ʼokotou sulie. ʼE mole kotou putu anai pea mo fetagihi. Kae ʼe kotou pala anai ʼuhi ko ʼakotou hala,+ pea ʼe kotou felaugaʼaki anai. 24 Kua liliu ia Esekiele ko he fakailoga maʼa koutou.+ ʼE kotou fai pe anai ohage ko ia. Ka hoko mai, ʼe kotou iloʼi moʼoni anai ko au ia te Tuʼi ʼAliki ko Sehova.’ ” ’ ”

25 “Pea ko koe foha ʼo te tagata, ʼi te ʼaho ʼae ʼe au toʼo ai anai tonatou kolo tau, tonatou fiafiaʼaga ʼae ʼe maʼuhiga kia natou, ʼae ʼe fakaʼamuʼamu ki ai tonatou loto, ʼi te temi pe ʼaia, ʼe au toe toʼo anai ʼonatou foha mo ʼonatou ʼofafine.+ 26 ʼE fakaha atu anai e he tahi neʼe hao.+ 27 ʼI te ʼaho ʼaia, ʼe mole ke toe nofo fakalogologo anai, ʼe ke avahi anai tou gutu+ mo palalau kia ia ʼae neʼe hao. ʼE ke liliu anai ko he fakailoga maʼa natou, pea ʼe natou iloʼi moʼoni anai ko au ia Sehova.”

25 Neʼe toe palalau mai ia Sehova, ʼo ina ui: 2 “Foha ʼo te tagata, haga ki te kau Amone+ ʼo fakakikite te malaʼia ʼae ka hoko kia natou.+ 3 ʼE ke ui anai ki te kau Amone: ‘Kotou fakalogo ki te folafola ʼa te Tuʼi ʼAliki ko Sehova. Koʼeni te folafola ʼa te Tuʼi ʼAliki ko Sehova: “Neʼe kotou kalaga fakalialia ‘Moitoʼa!’ ʼo ʼuhiga mo toku sagatualio ʼae neʼe ʼulihi, ʼo ʼuhiga mo te fenua ʼo Iselaele ʼae neʼe maumauʼi, pea ʼo ʼuhiga mo te ʼu hologa ʼo Suta ʼae neʼe ʼave popula. 4 Koia ʼe au foaki anai koutou maʼa te hahaʼi ʼo te potu Esite. ʼE natou fakatuʼu anai ʼonatou nofoʼaga* io koutou, ʼei, ʼe natou fakatuʼu anai ʼonatou fale la io koutou. ʼE natou kai anai ʼakotou fuaʼi ʼakau mo inu takotou huʼa pipi. 5 ʼE au fakaliliu anai ia Lapa+ ko he koga meʼa lunaʼia maʼa te ʼu kamelo, pea ko te fenua ʼo te kau Amone ko he maloloʼaga maʼa te ʼu ovi. Pea ʼe kotou iloʼi moʼoni anai ko au ia Sehova.” ’ ”

6 “Koʼeni te folafola ʼa te Tuʼi ʼAliki ko Sehova: ‘Neʼe kotou pasipasi+ pea neʼe kotou hopohopo fakafiafia, ʼei, neʼe kotou fakafiafia ʼi te nekenekea, ʼi te meʼa ʼae neʼe hoko ki te fenua ʼo Iselaele.+ 7 Koia ʼe au faoʼi anai toku nima moʼo tauteaʼi ʼo koutou, pea ʼe au tuku anai koutou ki te ʼu puleʼaga ohage ko he meʼa ke kaihaʼa. ʼE au pulihi anai koutou mai te hahaʼi pea mai te ʼu fenua.+ ʼE au molehi anai koutou pea ʼe kotou iloʼi moʼoni anai ko au ia Sehova.’

8 “Koʼeni te folafola ʼa te Tuʼi ʼAliki ko Sehova: ‘Neʼe ui e Moape+ mo Seili:+ “Fagono! ʼE tatau pe te puleʼaga ʼo Suta mo te ʼu puleʼaga fuli ʼae.” 9 Koia ʼe mole au puipui anai te ʼu kolo ʼae ʼi te tuʼakoi ʼo Moape, te taulekaleka ʼo tona fenua, ia Pete-sesimoti, mo Paale-meoni ʼo kaku ki Kiliataimi.+ 10 ʼE au foaki anai te kau Moape mo te kau Amone maʼa te hahaʼi ʼo te potu Esite.+ Pea ʼe mole toe manatuʼi anai e he tahi ʼi te ʼu puleʼaga te kau Amone.+ 11 ʼE au fakahoko anai taku fakamau ki te kau Moape,+ pea ʼe natou iloʼi moʼoni anai ko au ia Sehova.’

12 “Koʼeni te folafola ʼa te Tuʼi ʼAliki ko Sehova: ‘Neʼe lagavaka ia Etome ki te ʼu hologa ʼo Suta, pea neʼe lakahala mamafa ʼi tana lagavaka kia natou.+ 13 Koia koʼeni te folafola ʼa te Tuʼi ʼAliki ko Sehova: “ ʼE au toe faoʼi anai toku nima moʼo tauteaʼi ʼo Etome. ʼE au pulihi anai mai te fenua te tagata mo te manu pea ʼe au fakaliliu anai ko he koga meʼa ʼe tuʼu lavaki.+ ʼE matehi anai natou ʼaki te heleta mai Temane ʼo kaku ki Tetane.+ 14 ‘ ʼE au lagavaka anai ki Etome ʼo fakaʼaogaʼi taku hahaʼi ko Iselaele.+ ʼE natou fakato anai toku hauhau ki Etome, ke au lagavaka ai ki te kau Etome,’+ ko te ui ʼaia ʼa te Tuʼi ʼAliki ko Sehova.” ’

15 “Koʼeni te folafola ʼa te Tuʼi ʼAliki ko Sehova: ‘Neʼe kumi e te kau Filisitini ke natou lagavaka mo fakatupu maumau, ʼuhi ko tanatou fehihiʼa tuʼumaʼu ki te kau Iselaele.+ 16 Koia koʼeni te folafola ʼa te Tuʼi ʼAliki ko Sehova: “ ʼE au faoʼi anai toku nima moʼo tauteaʼi te kau Filisitini,+ mo matehi te kau Keleti+ pea mo pulihi te toe ʼo te hahaʼi ʼae ʼe nonofo ʼi te matatai.+ 17 ʼE kovi anai taku lagavaka kia natou ʼaki ni fakatuʼā mamafa. Pea ʼe natou iloʼi moʼoni anai ko au ia Sehova moka au fakahoko kia natou taku lagavaka.” ’ ”

26 Neʼe toe palalau mai ia Sehova ʼi te 11 taʼu, ʼi te ʼuluaki ʼaho ʼo te mahina, ʼo ina ui: 2 “Foha ʼo te tagata, neʼe ui e Tile ʼo ʼuhiga mo Selusalemi:+ ‘Moitoʼa! Kua maumau te matapa ʼae ʼe feulufi mai ai te hahaʼi.+ ʼI te temi nei ʼae kua maumauʼi ai, ʼe tau mai anai ia meʼa fuli kia au pea ʼe au maʼu koloa anai!’ 3 Koia koʼeni te folafola ʼa te Tuʼi ʼAliki ko Sehova: ‘Tile, ʼe au tauʼi anai koe mo uga ni puleʼaga kaugamalie ke hake kia koe ohage ko te hake ʼo te ʼu peau ʼo te tai. 4 ʼE natou maumauʼi anai te ʼu kaupa mo te ʼu tule ʼo Tile.+ ʼE au tele anai te kele mo fakaliliu ko he ʼutu. 5 ʼE liliu anai ko he koga meʼa ʼe fakamoamoa ai te ʼu kupega ʼi te loto tai.’+

“ ‘Pea ʼe liliu anai ko he koloa maʼa te ʼu puleʼaga koteʼuhi neʼe au palalau,’ ko te ui ʼaia ʼa te Tuʼi ʼAliki ko Sehova. 6 ‘ ʼE matehi anai ʼaki te heleta te hahaʼi ʼo ʼona kolo liliki ʼo te vao pea ʼe iloʼi moʼoni anai ko au ia Sehova.’

7 “Koʼeni te folafola ʼa te Tuʼi ʼAliki ko Sehova: ‘ ʼE au fekauʼi mai anai mai te potu noleto te Hau ʼo Papiloni ia Nepukanesa* ke ina tauʼi ia Tile.+ Ko he hau ʼe pule ki te tahi ʼu hau,+ ʼe maʼu hosi,+ mo ni saliote tau,+ mo ni tagata heka hosi pea mo he kautau ʼe kaugamalie tana kau solia. 8 ʼE ina matehi anai ʼaki te heleta te hahaʼi ʼo ʼou kolo liliki ʼo te vao. ʼE ina laga anai he kaupa moʼou ʼa takai pea mo he kaupa moʼou tauʼi. Pea ʼe ina hiki anai kia koe he meʼa tali tau lahi. 9 ʼE ina maumauʼi anai ʼou kaupa ʼaki tana masini tau pea ʼe ina holoʼi anai ʼou tule ʼaki ʼana toki. 10 ʼE ʼuʼufi anai koe ʼaki te efu ʼi te kaugamalie ʼo ʼana hosi. Pea ka ulu anai ʼi ʼou matapa ohage ko he kau solia ʼe natou ʼohofi he kolo kua maumauʼi te kaupa, ʼe galulu anai ʼou kaupa ʼi te logoaʼa ʼo te ʼu tagata heka hosi, mo te ʼu foʼi teka pea mo te ʼu saliote tau. 11 ʼE malamalaki anai ʼou ala fuli e te ʼu vaʼe ʼo ʼana hosi.+ ʼE ina matehi anai tau hahaʼi ʼaki te heleta pea ʼe holo anai ʼou pou matolu. 12 ʼE toʼo anai ʼau meʼa lelei, ʼe kaihaʼa anai ʼou koloa,+ ʼe maumauʼi anai ʼou kaupa mo ʼou ʼapi matalelei. Pea ʼe laku leva ki te tai ʼau maka, mo ʼau papa pea mo tau kele.’

13 “ ‘ ʼE au fakagata anai te logoaʼa ʼo ʼau hiva, pea ʼe mole toe ta anai ʼau alepa.+ 14 ʼE au fakaliliu anai koe ko he ʼutu, pea ʼe ke liliu anai ko he koga meʼa ʼe fakamoamoa ai te ʼu kupega.+ ʼE mole toe laga anai koe ʼi he temi, koteʼuhi ko au ia Sehova ʼae neʼe palalau,’ ko te ui ʼaia ʼa te Tuʼi ʼAliki ko Sehova.

15 “Koʼeni te folafola ʼa te Tuʼi ʼAliki ko Sehova ki Tile: ‘ ʼE mole galulu anai koa te ʼu motu ʼi te logoaʼa ʼo tau to, moka lauga anai ia natou ʼae ka vave mamate, moka hoko he toe mātea io koe?+ 16 ʼE hihifo anai te ʼu tama ʼaliki fuli ʼo te tai mai ʼonatou hekaʼaga fakahau pea mo natou huʼi ʼonatou kofu. ʼE natou toʼo anai ʼonatou teu fakailoga mo matataku. ʼE natou nonofo matataku anai ki lalo mo sioʼi fakapunamaʼuli ia koe.+ 17 ʼE natou hiva anai he hiva mate+ ʼo ʼuhiga mo koe, ʼo natou ui atu:

19 “Koʼeni te folafola ʼa te Tuʼi ʼAliki ko Sehova: ‘Moka au fakaliliu anai koe ko he kolo kua maumau ʼe hage ko ni kolo ʼe tuʼu lavaki, moka au fakamou anai koe ʼaki ni vai ʼe hou, mo ʼaofi koe e ni vai malolohi,+ 20 ia koe mo natou ʼae ʼe hihifo ki te luo.* ʼE au ʼave anai koutou ki te hahaʼi ʼo te temi muʼa, ʼei, ʼe au fakanofo anai koe ʼi te koga meʼa ʼae ʼe malalo ohage pe ko te ʼu koga meʼa ʼo te temi muʼa ʼae neʼe maumauʼi, mo natou ʼae ʼe hihifo ki te luo+ ke mole nofoʼi ai koe. Pea ʼe au fakakololiaʼi anai te fenua ʼo te kau maʼuli.

21 “ ‘ ʼE au fakahoko fakapunamaʼuli anai kia koe he toe mataku, pea ʼe ke puli ai.+ ʼE kumi anai koe, kae ʼe mole toe maʼu koe ʼi he temi,’ ko te ui ʼaia ʼa te Tuʼi ʼAliki ko Sehova.”

 8 Ko te hahaʼi ʼo Sitoni mo Alevate+ neʼe ko ʼau kau tauʼaʼalo.

Tile, ko ʼau tagata faiva neʼe ko ʼau kauvaka.+

 9 Neʼe mono ʼou vaka e te ʼu tagata popoto mo faiva ʼo Kepale.+

Neʼe ʼomai te ʼu vaka fuli ʼo te tai mo ʼanatou kauvaka kio koe ʼo faifakatau.

10 Neʼe kau te ʼu tagata ʼo Pelesia, mo Lutime, mo Puti+ ʼi tau kautau, neʼe ko ʼau tagata tau.

Neʼe natou tau io koe ʼanatou meʼa tali tau mo ʼonatou puloga tau, pea neʼe natou fakamataleleiʼi ai koe.

12 “ ‘ “Neʼe faikoloa ia Talesisi+ mo koe koteʼuhi neʼe ke koloaʼia.+ Neʼe natou totogi ʼou koloa ʼaki te siliva, mo te ukamea, mo te etani, mo te pulu.+ 13 Neʼe faifakatau mo koe ia Savani, mo Tupale,+ mo Meseke.+ Neʼe natou totogi ʼou koloa ʼaki ni kaugana+ mo ni meʼa kapa. 14 Neʼe foaki e te ʼu hologa ʼo Tokalama+ ni hosi gaue kele, ni hosi tau mo ni asino moʼo fetogi ʼaki ʼou koloa. 15 Neʼe faifakatau mo koe te hahaʼi ʼo Tetane.+ Neʼe ke fakaʼaogaʼi ni hahaʼi faifakatau ʼi ni tuʼuga motu. Neʼe natou foaki atu te ivuale+ mo te ʼakau maʼuhiga ko he tukuhau. 16 Neʼe faifakatau mo koe ia Etome koteʼuhi neʼe mahu ʼou koloa. Moʼo fetogi ʼaki ʼou koloa neʼe natou foaki ni maka ʼae ko te tulekoase, mo te fuluʼi ovi huʼa lotuma fakapoʼuli, mo ni tui fakailoga ʼe lanu mamaʼa, mo ni kie maʼuhiga, mo ni feo pea mo ni maka ʼae ko te lupi.

17 “ ‘ “Neʼe faifakatau mo koe ia Suta mo Iselaele. Neʼe natou foaki te fulumeto ʼo Miniti,+ ni meʼa kai lelei, ni meli,+ ni lolo mo ni lolo magoni+ moʼo fetogi ʼaki ʼou koloa.+

18 “ ‘ “Neʼe faifakatau mo koe ia Tamaso+ koteʼuhi neʼe mahu ʼou koloa pea neʼe ke koloaʼia ʼaupito. Neʼe ina foaki atu te vino ʼo Heleponi pea mo te fuluʼi ovi ʼo Saale. 19 Neʼe foaki e Vetani mo Savani ʼae mai Usale, te ukamea ʼae neʼe gaueʼi, mo te kasia* pea mo te kaho fakamagoni moʼo fetogi ʼaki ʼou koloa. 20 Neʼe ke maʼu mai Tetane+ ni tupenu ke heheka ai te ʼu tagata heka hosi. 21 Neʼe ke fakagaueʼi te kau Alape pea mo te ʼu pule fuli ʼo Keta,+ ʼae neʼe natou fakatau ni akeno, ni ovi tagata mo ni tao tagata.+ 22 Neʼe faifakatau mo koe te ʼu tagata faifakatau ʼo Sepa mo Laema.+ Neʼe natou foaki ni kaloni kehekehe maʼuhiga pea mo ni faʼahiga maka maʼuhiga, ʼo toe feia pe mo te aulo moʼo fetogi ʼaki ʼou koloa.+ 23 Neʼe faifakatau mo koe ia Halani,+ mo Kane, mo Eteni,+ mo te ʼu tagata faikoloa ʼo Sepa+ mo Asule+ pea mo Kilimati. 24 ʼI te fakatauʼaga koloa, neʼe natou fakatau ni teu matalelei, ni tapi lanu kehekehe, mo ni pulupulu ʼe lanu ʼuʼui neʼe tui fakailoga ʼe lanu mamaʼa, neʼe haʼihaʼi fuli ʼaki ni maea.

28 ʼE galulu anai te ʼu matafenua moka kalaga ʼau kauvaka.

32 ʼE natou lotomamahi anai mo hiva he hiva mate ʼo ʼuhiga mo koe:

‘Ko ai koa ʼae ʼe hage ko Tile, pea kua nofo fakalogologo ʼi te ʼaho nei ʼi te loto tai?+

33 Neʼe ke fafaga he hahaʼi kaugamalie ʼi te tau mai ʼo ʼau meʼa lelei mai te moana.+

Neʼe ke fakakoloa te ʼu hau ʼo te kele ʼi te lahi ʼo tau maʼu koloa pea mo ʼau fakatau.+

36 ʼE veka anai te kau faifakatau ʼo te ʼu puleʼaga ʼuhi ko te meʼa ʼae neʼe hoko kia koe.

28 Neʼe toe palalau mai ia Sehova, ʼo ina ui: 2 “Foha ʼo te tagata, fakaha ki te pule ʼo Tile: ‘Koʼeni te folafola ʼa te Tuʼi ʼAliki ko Sehova:

“ ʼE ke ui tuʼumaʼu ʼi tou fialahi:+ ‘Ko au ko te ʼatua.

ʼE au heka ʼi te hekaʼaga ʼo he ʼatua ʼi te loto tai.’+

 3 ʼE ke poto age koa la koe ia Taniela?+

ʼE ke mahino koa la koe ki te ʼu meʼa fakalilo fuli?

6 “ ‘Koia koʼeni te folafola ʼa te Tuʼi ʼAliki ko Sehova:

 9 ʼE ke toe ui anai koa kia ia ʼae ka ina matehi koe: ‘Ko au ko te ʼatua’?

ʼE mole ke ʼatua, ʼe ke tagata pe ʼi te ʼu nima ʼo natou ʼae ka natou fakalainoaʼi koe.” ’

11 Pea neʼe toe palalau mai ia Sehova, ʼo ina ui: 12 “Foha ʼo te tagata, hiva he hiva mate ʼo ʼuhiga mo te hau ʼo Tile mo ui age: ‘Koʼeni te folafola ʼa te Tuʼi ʼAliki ko Sehova:

13 Neʼe ke nofo ʼi Eteni, te ʼoloto ʼo te ʼAtua.

Neʼe teuteuʼi ʼi te ʼaho ʼae neʼe fakatupu ai koe.

14 Neʼe au fakanofo koe ko te kelupimi leʼoleʼo.

Neʼe ke ʼi te moʼuga taputapu ʼo te ʼAtua,+ pea neʼe ke fealuʼaki ʼi te ʼu maka kakaha.

17 Neʼe fialahi tou loto ʼuhi ko tou taulekaleka.+

Neʼe puli tou poto ʼuhi ko tou kololia.+

ʼE au li anai koe ki te kele.+

ʼE sioʼi anai koe e te ʼu hau, ʼo punamaʼuli.

18 Neʼe ke ʼulihi ʼau sagatualio ʼuhi ko tau lakahala mamafa pea mo tau faifakatau kaka.

ʼE au tafu anai he afi ia koe, pea ʼe ke vela anai.+

ʼE au fakaliliu anai koe ko he lefulefu ʼi te kele, ia muʼa ʼo natou fuli ʼae ʼe natou sioʼi koe.

19 ʼE punamaʼuli anai ia natou fuli ʼae neʼe natou iloʼi koe ʼi te ʼu puleʼaga, pea mo sioʼi fakamamaʼu koe.+

20 Neʼe toe palalau mai ia Sehova, ʼo ina ui: 21 “Foha ʼo te tagata, haga ki Sitoni+ mo fakakikite te malaʼia ʼae ka to ki ai. 22 ʼE tonu anai ke ke ui: ‘Koʼeni te folafola ʼa te Tuʼi ʼAliki ko Sehova:

23 ʼE au fakahoko anai ʼi ai ni taʼi mahaki pea ʼe hahali anai te toto ʼi ʼona ala.

24 “ ‘ “ ʼOsi ʼaia, ʼe mole toe ʼa takai anai te hahaʼi ʼo Iselaele e ni ʼakau talatala, mo fakatupu lavea, mo fakatupu mamahi,+ e te ʼu puleʼaga ʼae ʼe natou meʼa noaʼi. Pea ʼe iloʼi moʼoni anai ko au te Tuʼi ʼAliki ko Sehova.” ’

25 “ ‘Koʼeni te folafola ʼa te Tuʼi ʼAliki ko Sehova: “ ʼE fakamaʼoniʼoniʼi anai au ia muʼa ʼo te ʼu puleʼaga+ ʼaki taku hahaʼi ko Iselaele moka au toe fakaliliu mai natou mai te ʼu puleʼaga ʼae neʼe mavetevete ai.+ Pea ʼe natou nonofo anai ʼi tonatou fenua,+ ʼae neʼe au foaki ki taku kaugana ko Sakopo.+ 26 ʼE natou maʼuli fimalie ai anai,+ mo laga ni ʼapi mo to ni gaueʼaga vite.+ ʼEi, ʼe natou maʼuli fimalie anai moka au fakahoko taku fakamau kia natou fuli ʼae ʼi ʼonatou tafaʼaki pea mo natou meʼa noaʼi.+ Pea ʼe natou iloʼi moʼoni anai ko au ia Sehova tonatou ʼAtua.” ’ ”

29 Neʼe palalau mai ia Sehova ʼi te hogofulu taʼu, ʼi te ʼaho 12 ʼo te mahina hogofulu, ʼo ina ui: 2 “Foha ʼo te tagata, haga kia Falaone te hau ʼo Esipito, mo fakakikite te malaʼia ʼae ka to kia ia, ʼei, ki Esipito katoa pea mo ia.+ 3 ʼE ke fakaha age anai ki ai: ‘Koʼeni te folafola ʼa te Tuʼi ʼAliki ko Sehova:

Neʼe au fai maʼaku!’+

 4 ʼEi, ʼe au ʼai anai ni mātaʼu ki tou gutu mo fakapipiki ki ʼou ʼuno te ʼu ika ʼo te Nile.

ʼE au fakamavae anai koe ʼi te Nile mo te ʼu ika fuli ʼo te Nile ʼae ʼe pipiki ki ʼou ʼuno.

 5 ʼE au liʼaki anai koe ʼi te toafa, ia koe pea mo te ʼu ika fuli ʼo te Nile.

ʼE ke to anai ki he koga meʼa lauʼatea, ʼe mole tae anai peʼe tanaki koe.+

ʼE au foaki anai koe ko he meʼa kai ki te ʼu manu fekai mo te ʼu manulele.+

8 “ ‘Koia koʼeni te folafola ʼa te Tuʼi ʼAliki ko Sehova: “ ʼE au uga anai ni tagata ke natou tauʼi koe ʼaki te heleta,+ pea ʼe au toʼo anai mai io koe te tagata mo te manu. 9 ʼE tuʼu lavaki anai mo maumau ia Esipito.+ Pea ʼe natou iloʼi moʼoni anai ko au ia Sehova koteʼuhi neʼe ke* ui: ‘ ʼAʼaku te Nile! Ko au ʼae neʼe au fai!’+ 10 Koia ʼe au tauʼi anai ia koe pea mo te Nile. ʼE maumau anai mo moamoa ia Esipito, ko he toafa+ mai Miketoli+ ki Siene,+ ʼi te tuʼakoi ʼo Etiopea. 11 ʼE mole fakalaka ai anai he tagata peʼe ko he manu+ pea ʼe mole nofoʼi anai ia taʼu ʼe 40. 12 ʼE au fakaliliu anai te fenua ʼo Esipito ke tuʼu lavaki ʼo kovi age ʼi te ʼu fenua fuli ʼae, pea ʼe toe feia pe anai mo ʼona kolo ia taʼu ʼe 40.+ ʼEi, ʼe au fakamavetevete anai te kau Esipito ʼi te ʼu puleʼaga pea mo te ʼu fenua.”+

13 “ ‘Pea koʼeni te folafola ʼa te Tuʼi ʼAliki ko Sehova: “ ʼE au fakatahiʼi anai te kau Esipito ʼi taku toe fakaliliu mai natou mai te hahaʼi ʼae neʼe au fakamavetevete ai natou, moka ʼosi taʼu ʼe 40.+ 14 ʼE au ʼaumai anai te kau pilisoni ʼo Esipito ki tonatou fenua, ia Patolosi.+ Pea ʼe natou liliu ai anai ko he puleʼaga ʼe mole faʼa maʼuhiga. 15 ʼE mole malohi anai ia Esipito ohage ko te ʼu puleʼaga ʼae, pea ʼe mole toe pule anai ki he tahi age ʼu puleʼaga.+ ʼEi, ʼe au fakavaivaiʼi anai ia ia ʼo mole kei feala ai ke ina puleʼi he tahi ʼu puleʼaga.+ 16 ʼE mole toe falala anai te hahaʼi ʼo Iselaele ki ai ʼi he temi.+ Kae ʼe natou manatuʼi anai te hala ʼae neʼe natou fai ʼi tanatou kole tokoni ki ai. Pea ʼe iloʼi moʼoni anai e te kau Iselaele ko au ia te Tuʼi ʼAliki ko Sehova.” ’ ”

17 Neʼe palalau mai leva ia Sehova ʼi te 27 taʼu, ʼi te ʼuluaki ʼaho ʼo te ʼuluaki mahina, ʼo ina ui: 18 “Foha ʼo te tagata, neʼe fakamaʼua e te Hau ʼo Papiloni ia Nepukanesa+ he gaue kinakina ki tana kautau ʼi tanatou tauʼi ia Tile.+ Neʼe ʼulu tula fuli ʼana kau solia pea neʼe lavelavea ʼonatou fuga ʼuma. Kae neʼe mole totogi ia ia peʼe ko tana kautau ʼi tanatou kinakina ʼae ʼi te tauʼi ʼo Tile.

19 “Koia koʼeni te folafola ʼa te Tuʼi ʼAliki ko Sehova: ‘ ʼE au foaki anai ia Esipito ki te Hau ʼo Papiloni ia Nepukanesa.+ ʼE ina ʼave anai te koloa, ʼei, ʼe ina kaihaʼa anai he toe koloa lahi. Ko te totogi ʼaia ʼo tana kautau.’

20 “ ‘ ʼE au foaki age anai maʼa ia ia Esipito moʼo totogi tanatou kinakina ʼae ʼi te tauʼi ʼo te kolo* koteʼuhi neʼe natou tau maʼaku,’+ ko te ui ʼaia ʼa te Tuʼi ʼAliki ko Sehova.

21 “ ʼI te ʼaho ʼaia, ʼe au fakahomo anai he tala maʼa* te hahaʼi ʼo Iselaele+ pea ko he faigamalie ʼaia ke ke palalau kia natou. Pea ʼe natou iloʼi moʼoni anai ko au ia Sehova.”

30 Neʼe toe palalau mai ia Sehova, ʼo ina ui: 2 “Foha ʼo te tagata, fakakikite mo ui: ‘Koʼeni te folafola ʼa te Tuʼi ʼAliki ko Sehova:

“Kotou kalaga: ‘Oie, ʼe haʼu te ʼaho!’

 3 Kua ovi mai te ʼaho, ʼei, kua ovi mai te ʼaho ʼo Sehova.+

Ko he ʼaho kauʼaoa anai,+ he temi kua fakatuʼutuʼu ke fakamauʼi ai ni puleʼaga.+

 6 Koʼeni te folafola ʼa Sehova:

“ ‘ ʼE matematehi anai natou ʼaki te heleta ʼi te fenua, mai Miketoli+ ki Siene,’+ ko te ui ʼaia ʼa te Tuʼi ʼAliki ko Sehova. 7 ‘ ʼE tuʼu lavaki anai tonatou fenua ʼo kovi age ʼi te ʼu fenua fuli ʼae, pea ʼe toe feia pe anai mo ʼonatou kolo fuli.+ 8 Pea ʼe natou iloʼi moʼoni anai ko au ia Sehova moka au tafu anai he afi ʼi Esipito pea moka malamalaki ia natou fuli ʼae ʼe tokoni ki ai. 9 ʼI te ʼaho ʼaia, ʼe au fekauʼi anai he kau ʼave logo ʼi ni vaka ke tekelili ai ia Etiopea ʼae ʼe falala kia ia totonu. ʼE mataku anai lolotoga te malaʼia ʼae ka hoko ki Esipito he ʼe hoko moʼoni anai te ʼaho ʼaia.’

10 “Koʼeni te folafola ʼa te Tuʼi ʼAliki ko Sehova: ‘ ʼE au fakaʼaogaʼi anai te Hau ʼo Papiloni ko Nepukanesa moʼo pulihi te hahaʼi kaugamalie ʼo Esipito.+ 11 ʼE ʼaumai anai ia ia mo ʼana kau solia, te puleʼaga ʼae ʼe agamalohi+ moʼo maumauʼi te fenua. ʼE natou tohoʼi ake anai ʼanatou heleta moʼo maumauʼi ia Esipito pea mo fakafonu te fenua ʼaki te kau mate.+ 12 ʼE au fakaliliu anai te ʼu tafega vai ʼo te Nile+ ko he kele moamoa pea ʼe au fakatau anai te fenua ki ni tagata agakovi. ʼE au fekauʼi anai ni matapule ke olo ʼo maumauʼi te fenua mo meʼa fuli ʼae ʼe maʼu ai.+ Ko au ia Sehova ʼae neʼe palalau.’

13 “Koʼeni te folafola ʼa te Tuʼi ʼAliki ko Sehova: ‘ ʼE au maumauʼi anai mo te ʼu fakatata fakalialia* pea ʼe au pulihi anai te ʼu ʼatua vaʼiganoa ʼo Nofi.*+ ʼE mole toe maʼu anai he tama ʼaliki ʼi Esipito pea ʼe au fakamatakuʼi ai te fenua.+ 14 ʼE au maumauʼi anai ia Patolosi,+ mo tafu he afi ʼi Tesoane* pea mo fakahoko taku fakamau ki No.*+ 15 ʼE au fakato anai toku hauhau ki Sini te kolo tau ʼo Esipito pea mo pulihi te hahaʼi ʼo No. 16 ʼE au tafu anai he afi ʼi Esipito. ʼE mataku anai ia Sini, ʼe ulufi anai ia No pea ʼe tauʼi anai ia Nofi kae ʼe kei ʼaho. 17 ʼE matematehi anai te ʼu tama tupulaga ʼo Oni* mo Pipeseti ʼaki te heleta pea ʼe ʼave popula anai te hahaʼi ʼo te ʼu kolo. 18 ʼI Tekapanese, ʼe fakapoʼuli anai te ʼaho ʼae ka au fasiʼi ai te ʼu ʼakau ʼamo ʼo Esipito.+ ʼE puli anai tona malohi mo tona fiameʼalahi,+ ʼe ʼaofi ai ia ia e ni ʼao pea ʼe ʼave popula anai te hahaʼi ʼo ʼona kolo.+ 19 ʼE au fakahoko anai taku fakamau ki Esipito, pea ʼe natou iloʼi moʼoni anai ko au ia Sehova.’ ”

20 Neʼe palalau mai ia Sehova ʼi te 11 taʼu, ʼi te fitu ʼaho ʼo te ʼuluaki mahina, ʼo ina ui: 21 “Foha ʼo te tagata, neʼe au fasiʼi te nima ʼo Falaone te hau ʼo Esipito. ʼE mole faitoʼo anai tona nima pea ʼe mole haʼi naʼa ina toe lava toʼo te heleta.”

22 “Koʼeni te folafola ʼa te Tuʼi ʼAliki ko Sehova: ‘ ʼE au tauʼi anai ia Falaone te hau ʼo Esipito.+ ʼEi, ʼe au fasiʼi anai ʼona nima, te nima ʼae ʼe malohi mo ʼae kua fasi,+ ʼo to ai te heleta ʼi tona nima.+ 23 ʼE au fakamavetevete anai te kau Esipito ʼi te ʼu puleʼaga mo te ʼu fenua.+ 24 ʼE au fakamalohiʼi anai te ʼu nima ʼo* te hau ʼo Papiloni+ mo fakatoʼo ki tona nima ia taku heleta.+ ʼE au fasiʼi anai te ʼu nima ʼo Falaone ʼo lauga mamahi ai ʼi ʼona muʼa* ohage ko he tahi ka vave mate. 25 ʼE au fakamalohiʼi anai te ʼu nima ʼo te hau ʼo Papiloni kae ʼe vaivai anai te ʼu nima ʼo Falaone. Pea ʼe iloʼi moʼoni anai ko au ia Sehova moka au fakatoʼo ki te nima ʼo te hau ʼo Papiloni ia taku heleta moʼo tauʼi ia Esipito.+ 26 ʼEi, ʼe au fakamavetevete anai ia te kau Esipito ʼi te ʼu puleʼaga mo te ʼu fenua.+ Pea ʼe iloʼi moʼoni anai ko au ia Sehova.’ ”

 4 Neʼe maʼuli ʼi te lahi ʼo te ʼu vai, pea neʼe fakavai e te ʼu matapuna vai loloto ʼo tupu ai ʼo maʼoluga.

 5 Koia ʼae neʼe maʼoluga age ai ʼi te ʼu fuʼu ʼakau fuli ʼo te vao.

 8 Neʼe mole he fuʼu sete ʼi te ʼoloto ʼo te ʼAtua+ neʼe tatau mo ia.

Pea neʼe mole he fuʼu ʼakau ʼi te ʼoloto ʼo te ʼAtua neʼe matalelei ohage ko ia.

10 “Koia koʼeni te folafola ʼa te Tuʼi ʼAliki ko Sehova: ‘Neʼe liliu ia* ʼo lahi ʼaupito, neʼe kaku tona tumutumu ki te ʼu ʼao pea neʼe liliu ʼo fiameʼalahi ʼuhi ko tona maʼoluga. 11 Koia ʼe au tuku anai ia ia ki te nima ʼo te pule malohi ʼo te ʼu puleʼaga.+ ʼE ina tauʼi anai ia ia pea ʼe au liʼaki anai ʼuhi ko tana agakovi. 12 ʼE tuʼusi anai ia ia mo liʼakina ʼi te u moʼuga e ni matapule ʼe kau ki te ’u puleʼaga ʼae ʼe agamalohi. ʼE maluku anai ʼona lau ʼi te ʼu potu fenua laulelei fuli, mo fetoki ʼona vaʼa ki te ʼu liuʼa fuli ʼo te fenua.+ Pea ʼe mavae anai te ʼu puleʼaga fuli ʼo te kele ʼi tona malumalu mo natou liʼaki ia ia. 13 ʼE nonofo anai te ʼu manulele fuli ʼo te lagi ʼi tona tafito ʼae neʼe tuʼusi, mo te ʼu manu fuli ʼo te vao ʼi ʼona vaʼa.+ 14 ʼE mole toe lahi feia anai he fuʼu ʼakau neʼe to ovi ki te ʼu vai mo kaku tona tumutumu ki te ʼu ʼao, pea ʼe mole toe kaku anai ki te ʼu ʼao he fuʼu ʼakau neʼe fakavai lelei ʼuhi ko tona maʼoluga. ʼE tuku anai ia natou fuli ki te mate ʼi te fenua ʼae ʼi te lalo kele, mo te ʼu foha ʼo te tagata ʼae kua hihifo ki te luo.’*

15 “Koʼeni te folafola ʼa te Tuʼi ʼAliki ko Sehova: ‘ ʼI te ʼaho ʼae ka hifo ai ki te Faitoka,* ʼe putu anai te hahaʼi. ʼEi, ʼe au ʼaofi anai te ʼu vai loloto mo ʼona liuʼa ke mole toe tafe ai te ʼu vai lahi. ʼE au fakapoʼuliʼi anai ia Lipane ʼuhi ko ia, pea ʼe moamoa ai te ʼu fuʼu ʼakau fuli ʼo te vao. 16 ʼE au fakagalulu anai te ʼu puleʼaga ʼi te logoaʼa ʼo tana to, moka au fakahifo ia ia ki te Faitoka* mo natou fuli ʼae kua hihifo ki te luo. Pea ʼe fimalie anai ʼi te fenua ʼae ʼi te lalo kele, te ʼu fuʼu ʼakau fuli ʼo Eteni,+ te ʼu fuʼu ʼakau matalelei mo lelei tukupau ʼo Lipane, ia natou fuli ʼae ʼe fakavai leleiʼi. 17 Neʼe natou hihifo ki te Faitoka* ohage pe ko ia, ki te hahaʼi ʼae neʼe matehi ʼaki te heleta.+ ʼE fakatahi mo ia, ia natou ʼae neʼe lagolago ki ai mo ina fakamalumaluʼi ʼi te ʼu puleʼaga.’+

18 “ ‘ ʼE mole he fuʼu ʼakau ʼi Eteni neʼe tatau tona kololia mo tona lahi mo koe.+ Kae ʼe fakahifo fakatahi anai ia koe mo te ʼu fuʼu ʼakau ʼo Eteni ki te fenua ʼae ʼi te lalo kele. ʼE ke takoto anai mo te hahaʼi neʼe mole silikosisioʼi, mo te hahaʼi ʼae neʼe matehi ʼaki te heleta. Ko te meʼa ʼaia ʼae ka hoko kia Falaone pea mo ʼana kautau fuli,’ ko te ui ʼaia ʼa te Tuʼi ʼAliki ko Sehova.”

 3 Koʼeni te folafola ʼa te Tuʼi ʼAliki ko Sehova:

 7 ‘ ʼE au ʼaofi anai te lagi moka ke mate, ʼe au fakapoʼuliʼi anai te ʼu fetuʼu.

11 Koʼeni te folafola ʼa te Tuʼi ʼAliki ko Sehova:

‘ ʼE taʼi anai koe e te heleta ʼo te hau ʼo Papiloni.+

ʼE natou fakalainoaʼi anai te fiameʼalahi ʼo Esipito, pea ʼe tamateʼi anai ʼana kau solia fuli.+

ʼE natou hivaʼi anai ʼo manatuʼi ia Esipito pea mo ʼana kau solia fuli,’ ko te ui ʼaia ʼa te Tuʼi ʼAliki ko Sehova.”

17 Neʼe toe palalau mai ia Sehova ʼi te 12 taʼu, ʼi te ʼaho 15 ʼo te mahina,* ʼo ina ui: 18 “Foha ʼo te tagata, lauga ʼo ʼuhiga mo te kau solia ʼo Esipito mo fakahifo ia natou ki te fenua ʼae ʼi te lalo kele, ia ia pea mo te ʼu taʼahine ʼo te ʼu puleʼaga malolohi mo natou ʼae kua hihifo ki te luo.*

19 “ ‘ ʼE ke ui koa koe ʼe ke matalelei age ia natou ʼae? Hifo pea ke takoto mo natou ʼae neʼe mole silikosisioʼi!’

20 “ ‘ ʼE matehi anai natou ʼi te hahaʼi ʼae kua matehi ʼaki te heleta.+ Neʼe mate ia ʼi te heleta. ʼAve mamaʼo ia ia, mo ʼana kau solia fuli.

21 “ ‘Mai te Faitoka,* ʼe palalau anai te kau tau malolohi kia Falaone pea mo natou ʼae neʼe lagolago ki ai. ʼE natou hihifo moʼoni anai mo takokoto ohage pe ko natou ʼae neʼe mole silikosisioʼi, ʼae neʼe matehi ʼaki te heleta. 22 ʼE toe takokoto ai mo te kau Asilia pea mo ʼana kau solia fuli. ʼE ʼa takai ia ia* e ʼonatou fale maka, neʼe matehi ia natou fuli ʼaki te heleta.+ 23 ʼE maʼu ʼona fale maka ʼi te luo,* pea ʼe ʼa takai tona fale maka e ʼana kau solia. Neʼe matehi ia natou fuli ʼaki te heleta koteʼuhi neʼe natou fakamatakuʼi te fenua ʼo te kau maʼuli.

24 “ ‘ ʼE takoto ai mo Elame+ pea ʼe ʼa takai tona fale maka e ʼana kau tau fuli, neʼe matehi ia natou fuli ʼaki te heleta. Kua hihifo ia natou ʼae neʼe mole silikosisioʼi ki te fenua ʼae ʼi te lalo kele, ia natou ʼae neʼe natou fakamatakuʼi te fenua ʼo te kau maʼuli. Koia ʼe fakalainoaʼi anai natou mo natou ʼae kua hihifo ki te luo.* 25 Neʼe fai hona moeʼaga ia natou ʼae neʼe matehi pea neʼe ʼa takai ʼona fale maka e ʼana kau solia fuli. Ko te kau heʼe silikosisio fuli neʼe matehi ʼaki te heleta koteʼuhi neʼe natou fakamatakuʼi te fenua ʼo te kau maʼuli. Pea ʼe fakalainoaʼi anai ia natou mo natou ʼae kua hihifo ki te luo.* Neʼe tuku ia ia mo te kau mate.

26 “ ‘ ʼE toe takokoto ai mo Meseke mo Tupale,+ ʼo toe feia pe mo ʼanā kau solia fuli. ʼE ʼa takai ia ia* e ʼonatou fale maka. Ko te kau heʼe silikosisio fuli neʼe matehi ʼaki te heleta koteʼuhi neʼe natou fakamatakuʼi te fenua ʼo te kau maʼuli. 27 ʼE mole takokoto anai koa te kau tau malolohi ʼaia neʼe mole silikosisioʼi pea neʼe mamate, ʼae kua hihifo ki te Faitoka* mo ʼanatou mahafu tau? ʼE tuku anai ʼanatou heleta ki ʼonatou lalo ʼulu* pea ʼe hili anai ʼanatou agahala ki ʼonatou hui, koteʼuhi neʼe fakamatakuʼi e te kau tau malolohi ʼaia te fenua ʼo te kau maʼuli. 28 Kae ʼe tataʼo anai koe mo natou ʼae neʼe mole silikosisio pea ʼe ke takoto anai mo natou ʼae neʼe matehi ʼaki te heleta.

29 “ ‘Neʼe toe takokoto ai mo Etome+ mo ʼana hau pea mo ʼana kau pule fuli. Neʼe natou takokoto ʼi te hahaʼi ʼae neʼe matehi ʼaki te heleta logope la tonatou malolohi. ʼE natou toe takokoto anai mo natou ʼae neʼe mole silikosisioʼi+ pea mo natou ʼae kua hihifo ki te luo.*

30 “ ‘ ʼE toe takokoto ai mo te ʼu tama ʼaliki* fuli ʼo te potu noleto, ʼo toe feia pe mo te kau Sitoni fuli.+ Neʼe natou hihifo lainoa kia natou ʼae neʼe matehi logope la tonatou malohi fakamataku. ʼE takokoto anai te kau heʼe silikosisio ʼaia, mo natou ʼae neʼe matehi ʼaki te heleta, pea ʼe fakalainoaʼi anai natou mo natou ʼae kua hihifo ki te luo.*

31 “ ‘ ʼE sio anai ia Falaone kia natou fuli, pea ʼe fimalie anai ia ia ʼo ʼuhiga mo meʼa fuli ʼae neʼe hoko ki ʼana kau solia.+ ʼE matehi anai ia Falaone mo tana kautau fuli ʼaki te heleta,’ ko te ui ʼaia ʼa te Tuʼi ʼAliki ko Sehova.

32 “ ‘ ʼE tanu anai ia Falaone mo ʼana kau solia fuli, mo te hahaʼi ʼae neʼe mole silikosisioʼi, ia natou ʼae neʼe matehi ʼaki te heleta koteʼuhi neʼe ina fakamatakuʼi te fenua ʼo te kau maʼuli,’ ko te ui ʼaia ʼa te Tuʼi ʼAliki ko Sehova.”

6 “ ‘Kae kapau ʼe sio te tagata leʼo ki te ʼomai ʼa te ʼu fili kae ʼe mole ina pupuhi te fakatagi pupuhi+ ʼo mole ina fakatokaga te hahaʼi, pea kapau ʼe mate he tahi ia natou ʼaia ʼi te heleta ʼo te fili, ʼe mate anai ia ia ʼaia ʼuhi pe ko tana hala. Kae kia au, ko te mate ʼo te tagata ʼaia, ʼe ko te hala ia ʼa te tagata leʼo.’+

7 “Foha ʼo te tagata, neʼe au fakanofo koe ko he tagata leʼo ki te hahaʼi ʼo Iselaele: ka ke logo ki he logo mai ia te au, ʼe tonu anai ke ke fakaha taku fakatokaga kia natou.+ 8 Kapau ʼe au ui ki he tahi ʼe agakovi: ‘Tagata agakovi, ʼe ke mate anai!’+ kae ʼe mole ke palalau koe moʼo fakatokaga ke fetogi tana aga, ʼe mate anai ia ʼuhi ko tana hala ohage ko he tahi ʼe agakovi.+ Kae ʼe au toe tuku anai te hala kia koe. 9 Kae kapau ʼe ke fakatokaga te tagata agakovi ke lituʼa ki tana aga ʼae ʼe kovi, ʼo fakafisi ia ʼo mole fetogi, ʼe mate anai ia ʼuhi ko tana hala,+ kae ʼe ke haofaki anai tou maʼuli.+

10 “Foha ʼo te tagata, ui age ki te hahaʼi ʼo Iselaele: ‘Neʼe kotou ui: “ ʼE matou taʼomia ʼi ʼamatou agatuʼu mo ʼamatou agahala, ʼo matou lotovaivai ai.+ Koia ʼe feafeaʼi anai hamatou maʼuʼuli?” ’+ 11 Tali age kia natou: ‘ ʼE ui e te Tuʼi ʼAliki ko Sehova: “ ʼE au tala moʼoni atu, ʼe mole au fiafia ʼi he temi ʼi te mate ʼo he tahi ʼe agakovi.+ ʼE au leleiʼia age ke fetogi e te tagata agakovi tana aga+ pea ke maʼuli.+ Kotou liliu mai mo lituʼa ki takotou aga ʼae ʼe kovi.+ ʼE moʼoni, hahaʼi ʼo Iselaele, he koʼe ʼe kotou fia mamate?” ’+

12 “Foha ʼo te tagata, ui age ki te ʼu foha ʼo tau hahaʼi: ‘Kapau ʼe agatuʼu he tagata faitotonu ʼi he ʼaho, ʼe mole haofaki anai ʼuhi ko tana faitotonu.+ ʼE toe feia pe, kapau ʼe lituʼa te tagata agakovi ki tana agakovi ʼi he ʼaho, ʼe mole tukia anai ʼuhi ko tana agakovi.+ Pea ʼe toe feia pe, kapau ʼe agahala he tahi ʼe faitotonu ʼi he ʼaho, ʼe mole hoko atu anai tona maʼuli ʼuhi pe ko tana faitotonu.+ 13 Kapau ʼe au ui age ki te tagata faitotonu: “ ʼE ke maʼuli moʼoni anai,” kae ʼe ina fai te meʼa ʼae ʼe kovi+ ʼi tana ui ʼae ʼe haofaki anai ia ia ʼi tana faitotonu, ʼe mole manatuʼi anai he gaue ʼe tahi ʼi ʼana gaue faitotonu. ʼE mate anai ʼuhi pe ko te kovi ʼae neʼe ina fai.+

14 “ ‘Pea kapau ʼe au ui age ki te tagata agakovi: “ ʼE ke mate anai,” kae ʼe lituʼa ki tana agahala mo fai te meʼa ʼae ʼe lelei mo totonu,+ 15 kapau ʼe ina liufaki te meʼa ʼae neʼe foaki age e te tagata toʼo maʼua+ pea mo te meʼa ʼae neʼe ina kaihaʼa,+ mo mulimuli ki te ʼu fakatotonu ʼae ʼe taki ki te maʼuli ʼo mole ina fai te meʼa ʼae ʼe kovi, ʼe maʼuli anai ia.+ ʼE mole mate anai. 16 ʼE mole manatuʼi anai te ʼu agahala ʼae neʼe ina fai.+ ʼE maʼuli moʼoni anai ia, koteʼuhi neʼe ina fai te meʼa ʼae ʼe lelei mo totonu.’+

17 “Kae neʼe ui e tau hahaʼi: ‘ ʼE mole totonu te aga ʼa Sehova,’ kae ʼi tona fakahagatonu, ko ’anatou aga ʼae ʼe mole totonu.

18 “Kapau ʼe liʼaki e he tahi ʼe faitotonu tana aga ʼae ʼe lelei ʼo fai te meʼa ʼae ʼe kovi, ʼe mate anai ʼuhi ko te faʼahi ʼaia.+ 19 Kae kapau ʼe lituʼa he tahi ʼe agakovi ki tana agakovi ʼo fai te meʼa ʼae ʼe lelei mo totonu, ʼe maʼuli anai koteʼuhi neʼe ina fai te meʼa ʼaia.+

20 “Kae neʼe kotou ui: ‘ ʼE mole totonu te aga ʼa Sehova.’+ Hahaʼi ʼo Iselaele, ʼe au fakamauʼi anai ia koutou takitokotahi ʼo mulimuli pe ki tana aga.”

21 ʼI te 12 taʼu leva ʼo tamatou nonofo popula, ʼi te ʼaho nima ʼo te mahina hogofulu, neʼe haʼu he tagata neʼe hao ʼi te ʼohofi ʼo Selusalemi+ ʼo ina ui mai: “Kua to te kolo!”+

22 ʼI te po ʼae ʼi muʼa ʼo te tau mai ʼa te tagata ʼaia, neʼe gaue te malohi ʼo Sehova ia au, pea neʼe ina fakafealagia ke au palalau. ʼI te ʼala uhu ake, ʼi te tau mai ʼa te tagata, neʼe feala ai ke au palalau.+

23 Neʼe palalau mai ia Sehova, ʼo ina ui: 24 “Foha ʼo te tagata, ʼe ui e te hahaʼi ʼo te ʼu kolo maumau ʼaia+ ʼo ʼuhiga mo te fenua ʼo Iselaele: ‘Neʼe tokotahi ia Apalahamo pea neʼe ina maʼu te fenua.+ Kae ko tatou ʼe tou kaugamalie, ʼe mahino ia, neʼe foaki mai te fenua ko hotatou tofiʼa.’

25 “Koia ui age kia natou: ‘Koʼeni te folafola ʼa te Tuʼi ʼAliki ko Sehova: “ ʼE kotou kai te kanoʼi manu mo tona toto,+ ʼe kotou tauhi ki ʼakotou fakatata fakalialia,* ʼe hoko atu pe takotou liligi te toto.+ Pea ʼe kotou fia maʼu leva te fenua? 26 ʼE kotou falala ki ʼakotou heleta,+ ʼe kotou fai ni aga fakalialia, ʼe kotou tahi tono mo te ʼohoana ʼo tona tatau.+ Pea ʼe kotou fia maʼu leva te fenua?” ’+

27 “Koʼeni te meʼa ʼae ka ke ui age kia natou: ‘Koʼeni te folafola ʼa te Tuʼi ʼAliki ko Sehova: “ ʼE au tala moʼoni atu, ʼe matehi anai ʼaki te heleta ia natou ʼae ʼe nonofo ʼi te ʼu kolo maumau. ʼE au foaki anai ia natou ʼae ʼe nonofo ʼi te vao ko he meʼa kai ki te ʼu manu fekai. Pea ʼe mamate mahahaki anai ia natou ʼae ʼe nonofo ʼi te ʼu kolo tau mo te ʼu ʼana.+ 28 ʼE au fakaliliu anai te fenua ko he toafa,+ ʼe au fakagata anai tana fiameʼalahi pea ʼe tuʼu lavaki anai te ʼu moʼuga ʼo Iselaele,+ ʼe mole toe fakalaka ai he tahi. 29 Pea ʼe natou iloʼi moʼoni anai ko au ia Sehova, moka au fakaliliu te fenua ko he toafa+ ʼuhi ko te ʼu meʼa fakalialia fuli ʼae neʼe natou fai.” ’+

30 “Foha ʼo te tagata, ʼe fepalalauʼaki tau hahaʼi ʼo ʼuhiga mo koe ʼo ovi ki te ʼu kaupa pea mo te ʼu matapa ʼo te ʼu ʼapi.+ ʼE natou tahi ui ki tona tehina: ‘Haʼu, ta olo ʼo fakalogo ki te folafola ʼa Sehova.’ 31 ʼE natou ʼomai kaugamalie anai ʼo nonofo ʼi ʼou muʼa ohage ko tona fai e taku hahaʼi. Pea ʼe natou fakalogo anai ki ʼau folafola, kae ʼe mole natou maʼuliʼi anai.+ ʼE natou fakalai kia koe,* koteʼuhi ʼe manumanū tonatou loto ki te ʼu koloa. 32 ʼE ke hage koe maʼa natou ko he hiva laukau ʼe hiva e he leʼo lelei, pea ʼe mālie tona ta ʼi he meʼa faimaholo kauʼi uka. ʼE natou fakalogo anai ki ʼau palalau kae ʼe mole tokagaʼi ia e he tahi. 33 Pea ka hoko te ʼu palalau ʼaia, ʼei, ʼe hoko moʼoni ia, ʼe natou iloʼi moʼoni anai neʼe nofo he polofeta ia natou.”+

34 Neʼe toe palalau mai ia Sehova, ʼo ina ui: 2 “Foha ʼo te tagata, fakakikite te malaʼia ʼae ka hoko ki te kau tauhi ovi ʼo Iselaele. Fakakikite pea mo ui age ki te kau tauhi ovi: ‘Koʼeni te folafola ʼa te Tuʼi ʼAliki ko Sehova: “Malaʼia ki te kau tauhi ovi ʼo Iselaele+ he ʼe natou fafaga pe ia natou totonu! ʼE mole tonu koa la ke natou fafaga te faga ovi?+ 3 ʼE kotou kai te gako, ʼe kotou teu ki te fuluʼi ovi pea ʼe kotou matehi te manu ʼae ʼe sino.+ Kae ʼe mole kotou fafaga te faga manu!+ 4 Neʼe mole kotou fakamalohiʼi te ovi ʼae neʼe vaivai, peʼe faitoʼo ia ia ʼae neʼe mahaki, peʼe haʼi ia ia ʼae neʼe lavea, peʼe ʼaumai ia ia ʼae neʼe hehe, peʼe kumi ia ia ʼae neʼe puli.+ Kailoa ia, neʼe kotou puleʼi fakamalohi.+ 5 Koia neʼe natou mavetevete ai he neʼe mole he tauhi ovi.+ ʼEi, neʼe natou mavetevete ai ʼo liliu ko he meʼa kai maʼa te ʼu manu fuli ʼo te vao. 6 Neʼe hehe ʼaku ovi ʼi te ʼu moʼuga fuli mo te ʼu kiʼi moʼuga fuli. Neʼe mavetevete ʼaku ovi ʼi te kele katoa, ʼo mole alu pe la he tahi ʼo kumi peʼe tuʼania ʼo ʼuhiga mo natou.

7 “ ‘ “Koia ʼae kau tauhi ovi, kotou fagono ki te folafola ʼa Sehova: 8 ‘ ʼE ui e te Tuʼi ʼAliki ko Sehova: “ ʼE au tala moʼoni atu, kua liliu ʼaku ovi ko he meʼa kai maʼa te ʼu manu fekai fuli, he neʼe mole ʼi ai he tauhi ovi pea neʼe mole kumi ʼaku ovi e taku kau tauhi ovi. Kailoa ia, neʼe natou fafaga pe ia natou totonu, kae neʼe mole natou fafaga ʼaku ovi.” ’ 9 Koia kau tauhi ovi, kotou fagono ki te logo ʼa Sehova. 10 Koʼeni te folafola ʼa te Tuʼi ʼAliki ko Sehova: ‘ ʼE au fakafeagai anai ki te ʼu tauhi ovi, mo fakamauʼi natou ʼuhi ko tanatou aga ʼae ki ʼaku ovi. ʼE mole au toe kole age anai ke natou fafaga* ʼaku ovi,+ pea ʼe mole toe feala anai ke natou fafaga ia natou totonu. ʼE au haofaki anai ʼaku ovi pea ʼe mole toe liliu anai ko hanatou meʼa kai.’ ”

11 “ ‘Koʼeni te folafola ʼa te Tuʼi ʼAliki ko Sehova: “Koʼeni, ʼe au alu tonu anai ʼo kumi ʼaku ovi, pea ʼe au tokaga anai kia natou.+ 12 ʼEi, ʼe au tokaga anai ki ʼaku ovi ohage ko he tauhi ovi kua ina toe maʼu ʼana ovi ʼae neʼe mavetevete mo ina fafaga.+ ʼE au haofaki anai natou mai te ʼu koga meʼa fuli ʼae neʼe natou mavetevete ai ʼi he ʼaho ʼe fakapoʼuli gaogao mo kauʼaoa.+ 13 ʼEi, ʼe au fakamavae anai natou mai te ʼu puleʼaga pea ʼe au fakatahiʼi anai natou mai te ʼu fenua. ʼE au taki anai natou ki tonatou fenua mo fafaga ʼi te ʼu moʼuga ʼo Iselaele,+ ʼo ovi ki te ʼu vai tafe mo te ʼu nofoʼaga fuli ʼo te fenua. 14 ʼE au fafaga anai natou ʼi he koga meʼa lunaʼia, pea ʼe tuʼu te ʼu koga meʼa ʼae ka natou kakai ai ʼi te ʼu moʼuga maʼoluga ʼo Iselaele.+ ʼE natou takokoto anai ʼi ni koga meʼa ʼe maʼuli lelei ai te luna,+ mo kakai ʼi te ʼu koga meʼa lunaʼia ʼae ʼe lelei tukupau ʼi te ʼu moʼuga ʼo Iselaele.”

15 “ ‘ “ ʼE au fafaga tonu anai ʼaku ovi,+ mo foaki tonu age honatou maloloʼaga,”+ ko te ui ʼaia ʼa te Tuʼi ʼAliki ko Sehova. 16 “ ʼE au kumi anai te ovi ʼae ʼe puli,+ ʼe au toe ʼaumai anai ia ia ʼae ʼe hehe, ʼe au haʼi anai ia ia ʼae ʼe lavea pea ʼe au fakamalohiʼi anai ia ia ʼae ʼe vaivai. Kae ʼe au pulihi anai ia ia ʼae ʼe sino peʼe ko ia ʼae ʼe malohi. ʼE au fakahoko anai kia ia te tautea ʼae ʼe tuha mo ia.”

17 “ ‘Kae siʼaku ʼu ovi, kotou fakalogo ki te folafola ʼaeni ʼa te Tuʼi ʼAliki ko Sehova: “ ʼE au ʼamanaki fakahoko he fakamau ʼi te ʼu ovi, mo he fakamau ʼi te ʼu ovi tagata mo te ʼu tao tagata.+ 18 ʼE mole feʼauga koa la takotou kakai ʼi te ʼu koga meʼa lunaʼia ʼae ʼe lelei tukupau? He koʼe ʼe kotou malamalaki ia te luna ʼae ʼe toe ʼi ʼokotou koga meʼa lunaʼia? Pea ʼi takotou ʼosi inu ia he vai tasilo, he koʼe leva ʼe kotou fakaʼepu ʼaki ʼokotou vaʼe? 19 ʼE tonu anai koa ke kai ʼaku ovi ʼi te koga meʼa lunaʼia ʼae neʼe kotou malamalaki pea ke natou inu ia te vai ʼae neʼe kotou fakaʼepu ʼaki ʼokotou vaʼe?”

20 “ ‘Koia koʼeni te folafola ʼa te Tuʼi ʼAliki ko Sehova kia natou: “Koʼeni, ʼe au fakamauʼi anai te ovi ʼae ʼe sino pea mo te ovi ʼae ʼe sino kovi, 21 koteʼuhi neʼe kotou humuhumuki ʼaki ʼokotou vakavaka mo ʼokotou alaga muʼa ia natou fuli ʼae neʼe mahahaki, pea neʼe kotou toe humuhumuki ʼaki ʼokotou tala ʼo mavetevete ai ia natou ki ni potu mamaʼo. 22 ʼEi, ʼe au haofaki anai ʼaku ovi, ʼo mole toe feala ke kai natou.+ Pea ʼe au fakamauʼi anai te ʼu ovi. 23 ʼE au foaki anai kia natou he tauhi ovi ʼe tahi,+ taku tagata faifekau ko Tavite+ pea ʼe ina fafaga anai natou. ʼEi, ko ia ʼae ka ina fafaga natou pea ʼe liliu anai ko tonatou tauhi ovi.+ 24 Ko au ia Sehova, ʼe au liliu anai ko tonatou ʼAtua,+ pea ʼe liliu anai ia taku tagata faifekau ko Tavite ko tonatou pule.+ Ko au ia Sehova ʼae neʼe palalau.

25 “ ‘ “Pea ʼe au fai anai he fuakava ʼo te tokalelei mo natou.+ ʼE au pulihi anai ʼi te fenua ia te ʼu manu fekai+ ke natou maʼuli fimalie ʼi te ʼu potu toafa mo momoe ʼi te ʼu vao matuʼa.+ 26 ʼE au fakaliliu anai ʼaku ovi mo te ʼu tafaʼaki ʼo toku kiʼi moʼuga ko he tapuakina,+ pea ʼe au fakato anai te ʼua ʼi tona temi totonu. ʼE au huaʼi anai ia te ʼu tapuakina ohage ko te to ʼo ni ʼua lalahi.+ 27 ʼE fua anai te ʼu fuʼu ʼakau ʼo te vao, ʼe maʼuli lelei anai te kele+ pea ʼe maʼuli fimalie anai taku hahaʼi ʼi te fenua. ʼE natou iloʼi moʼoni anai ko au ia Sehova moka au fasiʼi ʼanatou ʼakau ʼamo+ pea mo au haofaki natou mai te hahaʼi ʼae neʼe natou fakakauganaʼi natou. 28 ʼE mole natou toe liliu anai ko he meʼa kai ki te ʼu puleʼaga, ʼe mole kai anai natou e te ʼu manu ʼo te vao pea ʼe natou maʼuli fimalie anai ʼo mole natou tuʼania he tahi.+

29 “ ‘ “ ʼE au to anai maʼa natou he gaueʼaga ʼe logologona. ʼE mole natou toe mamate pakupaku anai ʼi te fenua+ pea ʼe mole toe fakalainoaʼi ai e te ʼu puleʼaga.+ 30 ‘Pea ʼe natou iloʼi moʼoni anai, ko au ia Sehova tonatou ʼAtua, ʼe au nofo mo natou, pea ko natou ko taku hahaʼi, te hahaʼi ʼo Iselaele,’+ ko te ui ʼaia ʼa te Tuʼi ʼAliki ko Sehova.” ’

31 “ ‘Pea ko koutou ʼaku ovi,+ te ʼu ovi ʼae ʼe au tokaga ki ai, ko koutou ko ni tagata pe, pea ko au, ko tokotou ʼAtua,’ ko te ui ʼaia ʼa te Tuʼi ʼAliki ko Sehova.”

35 Neʼe toe palalau mai ia Sehova, ʼo ina ui: 2 “Foha ʼo te tagata, haga ki te potu moʼugaʼia ʼo Seili+ ʼo fakakikite te malaʼia ʼae ka hoko ki ai.+ 3 Ui age ki ai: ‘Koʼeni te folafola ʼa te Tuʼi ʼAliki ko Sehova: “ ʼE au fakafeagai anai kia koe, potu moʼugaʼia ʼo Seili! ʼE au faoʼi anai toku nima moʼou tauteaʼi pea mo fakaliliu koe ko he koga meʼa ʼe tuʼu lavaki.+ 4 ʼE au maumauʼi anai ʼou kolo pea ʼe ke liliu anai ko he koga meʼa ʼe tuʼu lavaki.+ Pea ʼe ke iloʼi moʼoni anai ko au ia Sehova. 5 Neʼe ke fehiʼa tuʼumaʼu ki te kau Iselaele+ pea neʼe ke tuku ke matehi natou ʼi te temi ʼo tonatou malaʼia, ʼi te temi ʼo tonatou fakatuʼā fakaʼosi.” ’+

6 “ ʼE ui e te Tuʼi ʼAliki ko Sehova: ‘Koia ʼe au tala moʼoni atu, ʼe au teuteuʼi anai koe ki he toe mātea ʼo mole ke hao mai ai.+ ʼEi, ʼe mole ke hao anai mai ai koteʼuhi neʼe ke fehiʼa ki te toto.+ 7 ʼE au fakaliliu anai te potu moʼugaʼia ʼo Seili ko he koga meʼa ʼe tuʼu lavaki+ mo matehi ia natou fuli ʼae ʼe fakalaka ai pea mo natou fuli ʼae ʼe toe liliu mai ki ai. 8 ʼE au fakafonu anai ʼou moʼuga ʼaki he kau mātea. Pea ʼe matehi anai te hahaʼi ʼaki te heleta ʼi ʼou kiʼi moʼuga, mo ʼou potu fenua laulelei pea mo ʼou vai tafe fuli. 9 ʼE au fakaliliu anai ia koe ko he koga meʼa ʼe tuʼu lavaki ʼo talu ai pea ʼe mole toe nofoʼi ʼou kolo.+ Pea ʼe kotou iloʼi moʼoni anai ko au ia Sehova.’

10 “Neʼe ke ui: ‘Ko te ʼu puleʼaga ʼaia ʼe lua mo te ʼu fenua ʼaia ʼe lua ʼe ʼaʼaku anai pea ʼe tou maʼu anai,’+ kae neʼe nofo tonu aipe ia Sehova. 11 ʼE ui e te Tuʼi ʼAliki ko Sehova: ‘Koia ʼe au tala moʼoni atu, ʼe au ita anai mo maheka kia koe ohage pe ko tau ita mo tau maheka ʼae ki taku hahaʼi ʼi tou fehiʼa.+ ʼEi, ʼe au fakaha anai kia natou pe ko ai ia au moka au fakamauʼi anai koe. 12 Pea ʼe ke iloʼi moʼoni anai ko au ia Sehova neʼe au logo ki ʼau laukovi fuli ʼo ʼuhiga mo te ʼu moʼuga ʼo Iselaele ʼi tau ui: “Kua maumauʼi pea kua tuku mai ia natou ko hamatou meʼa kai!” 13 Pea neʼe kotou fiatuʼu ʼo kotou palalau kovi mai kia au pea neʼe liuliuga takotou leakoviʼi au.+ Neʼe au logoʼi fuli.’

14 “Koʼeni te folafola ʼa te Tuʼi ʼAliki ko Sehova: ‘ ʼE fiafia anai te kele katoa moka au fakaliliu anai koe ko he koga meʼa ʼe tuʼu lavaki. 15 Neʼe ke fakafiafia ʼi te maumauʼi ʼo te tofiʼa ʼo te hahaʼi ʼo Iselaele. ʼE au toe fai feia pe anai kia koe.+ ʼE ke tu’u maumau anai mo lavaki, potu moʼugaʼia ʼo Seili, ʼei, ia Etome katoa!+ Pea ʼe iloʼi moʼoni anai ko au ia Sehova.’ ”

36 “Kae ko koe foha ʼo te tagata, fakakikite ʼo ʼuhiga mo te ʼu moʼuga ʼo Iselaele mo ke ui: ‘ ʼU moʼuga ʼo Iselaele, kotou fakalogo ki te folafola ʼa Sehova. 2 Koʼeni te folafola ʼa te Tuʼi ʼAliki ko Sehova: “Neʼe ui e te ʼu fili ʼo ʼuhiga mo koutou: ‘Moitoʼa! Maʼia mo te ʼu potu maʼoluga ʼo te temi muʼa kua matou maʼu!’ ” ’+

3 “Koia fakakikite mo ke ui: ‘Koʼeni te folafola ʼa te Tuʼi ʼAliki ko Sehova: “Neʼe maumauʼi koutou e ʼokotou fili pea neʼe natou ʼomai mai te ʼu potu fuli ʼo tauʼi koutou, ʼo maʼu ai koutou e natou ʼae neʼe hao ʼi te ʼu puleʼaga. Pea ʼe fasituʼu tuʼumaʼu pe te hahaʼi ʼo ʼuhiga mo koutou.+ 4 Koia, ʼu moʼuga ʼo Iselaele, kotou fakalogo ki te folafola ʼa te Tuʼi ʼAliki ko Sehova. Koʼeni te folafola ʼa te Tuʼi ʼAliki ko Sehova ki te ʼu moʼuga, mo te ʼu kiʼi moʼuga, mo te ʼu vai tafe, mo te ʼu potu fenua laulelei, mo te ʼu kolo ʼae neʼe maumau+ pea mo te ʼu kolo ʼae ʼe tuʼu lavaki, ʼae neʼe kaihaʼa mo vaʼi e natou ʼae neʼe hao mai te ʼu puleʼaga ʼi ʼonatou tafaʼaki.+ 5 ʼEi, ʼe ui e te Tuʼi ʼAliki ko Sehova kia natou fuli: ‘ ʼE hage toku hauhau ko he afi+ pea ʼe au tala anai he tautea kia natou ʼae neʼe hao mai te ʼu puleʼaga, mo he tautea ki Etome katoa. Neʼe natou fehihiʼa ki toku fenua mo fiafia+ ʼi tanatou maʼu mo kaihaʼa pea mo toʼo ʼona koga meʼa lunaʼia.’ ” ’+

6 “Koia fakakikite ʼo ʼuhiga mo te ʼu moʼuga ʼo Iselaele mo ke ui ki te ʼu moʼuga, mo te ʼu kiʼi moʼuga, mo te ʼu vai tafe pea mo te ʼu potu fenua laulelei: ‘Koʼeni te folafola ʼa te Tuʼi ʼAliki ko Sehova: “Koʼeni, neʼe fakalainoaʼi koutou e te ʼu puleʼaga. Koia ʼe au palalau anai ʼi te kovi ʼo toku hauhau.” ’+

7 “Koia koʼeni te folafola ʼa te Tuʼi ʼAliki ko Sehova: ‘ ʼE au hiki toku nima ʼo au fakapapau ʼe toe fakalainoaʼi anai mo te ʼu puleʼaga ʼae ʼi te ʼu tafaʼaki.+ 8 Kae ko koutou ʼu moʼuga ʼo Iselaele, ʼe maʼu anai io koutou ni fuʼu ʼakau ʼe lahi ʼona vaʼa mo ʼona fua maʼa taku hahaʼi ko Iselaele,+ he ʼe kua vave liliu mai pe taku hahaʼi. 9 ʼEi, ʼe au nofo mo koutou, ʼe au tokaga anai kia koutou, pea ʼe ʼi ai anai ʼakotou gaueʼaga ʼe nunusi ai te pulapula. 10 ʼE au fakahahaʼi anai koutou, ʼei, ʼo kaugamalie ai te puleʼaga ʼo Iselaele. ʼE toe nofoʼi anai+ mo toe laga te ʼu kolo maumau.+ 11 ʼEi, ʼe au fakahahaʼi anai koutou mo fakalahi ʼakotou manu.+ ʼE kaugamalie anai te hahaʼi mo fanaunau te ʼu manu. Pea ʼe nofoʼi anai koutou ohage ko te temi muʼa+ mo maʼuli lelei ʼo laka age ʼi te temi muʼa.+ Pea ʼe kotou iloʼi moʼoni anai ko au ia Sehova.+ 12 ʼE haʼele anai ni hahaʼi io koutou, ʼei, ko taku hahaʼi ko Iselaele. ʼE natou maʼu anai koutou+ pea ʼe kotou liliu anai ko tonatou tofiʼa. Pea ʼe mole toe mamate anai ʼanatou fanau ʼuhi ko koutou.’ ”+

13 “Koʼeni te folafola ʼa te Tuʼi ʼAliki ko Sehova: ‘ ʼE ui atu e ʼihi: “Ko koe ko he fenua ʼe ina kai ni tagata mo matehi te ʼu fanau ʼo ʼona puleʼaga.” ’ 14 ‘Kae ʼe mole ke toe kai anai ni tagata pea ʼe mole ke toe matehi anai te ʼu fanau ʼo ʼou puleʼaga,’ ko te ui ʼaia ʼa te Tuʼi ʼAliki ko Sehova. 15 ‘ ʼE mole au tuku anai ke ke toe logo ki te ʼu leakovi ʼa te ʼu puleʼaga mo te ʼu manukinuki ʼa te hahaʼi,+ pea ʼe mole ke toe fakatupu tukia anai ki ʼou puleʼaga,’ ko te ui ʼaia ʼa te Tuʼi ʼAliki ko Sehova.”

16 Neʼe toe palalau mai ia Sehova, ʼo ina ui: 17 “Foha ʼo te tagata, ʼi te temi ʼae neʼe maʼuʼuli ai te hahaʼi ʼo Iselaele ʼi tonatou fenua, neʼe natou ʼulihi ʼaki ʼanatou aga mo ʼanatou gaue.+ Neʼe hage tanatou aga kia au ko te heʼe maʼa ʼa he fafine ʼi tana mahaki fakafafine.+ 18 Koia ʼae neʼe au fakato ai toku hauhau kia natou ʼuhi ko te toto ʼae neʼe natou liligi ki te fenua+ pea ʼuhi ko tanatou fakaliliu ʼo heʼe maʼa ia te fenua ʼaki ʼanatou fakatata fakalialia.*+ 19 Koia neʼe au fakamavetevete ai natou ʼi te ʼu puleʼaga mo te ʼu fenua.+ Neʼe au fakamauʼi natou ʼo mulimuli ki ʼanatou aga mo ʼanatou gaue. 20 Kae ʼi tanatou kaku ki te ʼu puleʼaga ʼaia, neʼe ʼulihi e te hahaʼi ia toku huafa taputapu+ ʼo natou ui: ‘Ko natou ʼaia ko te hahaʼi ʼa Sehova kae neʼe tonu ke natou mavae mai tona fenua!’ 21 Koia ʼe au manatuʼi anai toku huafa taputapu ʼae neʼe ʼulihi e te hahaʼi ʼo Iselaele ʼi te ʼu puleʼaga ʼae neʼe natou olo ki ai.”+

22 “Koia ui age ki te hahaʼi ʼo Iselaele: ‘Koʼeni te folafola ʼa te Tuʼi ʼAliki ko Sehova: “Hahaʼi ʼo Iselaele, ʼe mole au toe ʼaumai anai koutou ʼuhi pe ko koutou kae ʼuhi ko toku huafa taputapu ʼae neʼe kotou ʼulihi ʼi te ʼu puleʼaga ʼae neʼe kotou olo ki ai.” ’+ 23 ‘ ʼE au fakamaʼoniʼoniʼi anai toku huafa lahi+ ʼae neʼe ʼulihi e te ʼu puleʼaga pea neʼe kotou toe ʼulihi mo koutou ʼi te ʼu puleʼaga. Pea ʼe iloʼi moʼoni anai e te ʼu puleʼaga ko au ia Sehova+ moka au fakamaʼoniʼoniʼi au ʼaki ia koutou ʼi ʼonatou muʼa,’ ko te ui ʼaia ʼa te Tuʼi ʼAliki ko Sehova. 24 ‘ ʼE au toʼo anai koutou mai te ʼu puleʼaga, ʼe au toe fakaliliu mai anai koutou mai te ʼu fenua fuli ʼo fakatahiʼi mo ʼave koutou ki tokotou fenua.+ 25 ʼE au afuhi anai kia koutou ia he vai ʼe maʼa pea ʼe kotou maʼa ai anai.+ ʼE au toʼo anai mai ia koutou te ʼu meʼa heʼe maʼa fuli+ pea mo te ʼu fakatata fakalialia fuli.+ 26 ʼE au foaki atu anai he loto ʼe foʼou+ pea ʼe au ʼai anai kia koutou he ʼatamai ʼe foʼou.+ ʼE au toʼo anai mai ʼokotou sino te mafu maka+ pea ʼe au foaki atu anai he mafu kakano.* 27 ʼE au ʼai anai kia koutou toku laumalie pea ʼe au uga anai koutou ke kotou fakaʼapaʼapa ki ʼaku lao.+ Pea ʼe kotou mulimuli anai mo maʼuliʼi ʼaku fakatotonu. 28 Pea ʼe kotou nonofo anai ʼi te fenua ʼae neʼe au foaki ki ʼakotou kui. ʼE kotou liliu anai ko taku hahaʼi pea ʼe au liliu anai ko tokotou ʼAtua.’+

29 “ ‘ ʼE au fakaʼateainaʼi anai koutou mai tokotou heʼe maʼa. ʼE au fakatotonu anai ke fua ke lahi te fulumeto pea ʼe mole au fakato anai he hoge kia koutou.+ 30 ʼE au tuku anai ke fua ʼo lahi te ʼu fuʼu ʼakau pea mo te ʼu gaueʼaga, ke mole kotou toe ufiufi ia muʼa ʼo te ʼu puleʼaga ʼuhi ko te hoge.+ 31 Pea ʼe kotou manatuʼi anai ʼakotou aga ʼae neʼe kovi mo ʼakotou gaue ʼae neʼe mole lelei. Pea ʼe kotou fakalialia anai kia koutou totonu ʼuhi ko ʼakotou agahala mo te ʼu meʼa kovi ʼae neʼe kotou fai.+ 32 Kae ke kotou iloʼi te faʼahi ʼaeni: ʼE mole au fai te meʼa ʼaia ʼuhi ko koutou,’+ ko te ui ʼaia ʼa te Tuʼi ʼAliki ko Sehova. ‘ ʼE tonu ke kotou ufiufi ʼuhi ko ʼakotou aga, hahaʼi ʼo Iselaele!’

33 “Koʼeni te folafola ʼa te Tuʼi ʼAliki ko Sehova: ‘ ʼI te ʼaho ʼae ʼe au fakamaʼa ai anai koutou mai ʼakotou agahala, ʼe au fakahahaʼi anai te ʼu kolo+ pea mo toe laga te ʼu kolo ʼae neʼe maumau.+ 34 ʼE toe gaueʼi anai te fenua ʼae neʼe tuʼu lavaki mo liʼakina pea neʼe sisio fuli ki ai ia natou ʼae neʼe fakalaka ai. 35 Pea ʼe ui anai e te hahaʼi: “Kua hage te fenua ʼae neʼe liʼakina ko te ʼoloto ʼo Eteni,+ pea kua toe fakamalohiʼi mo toe nofoʼi te ʼu kolo ʼae neʼe maumauʼi, mo tuʼu lavaki pea mo holoʼi.”+ 36 Pea ʼe iloʼi moʼoni anai e te ʼu puleʼaga ʼae ʼe kei nonofo ʼi ʼokotou tafaʼaki, ko au ia Sehova neʼe au toe laga te ʼu kolo ʼae neʼe maumauʼi pea neʼe au toe gaueʼi te ʼu kele ʼae neʼe liʼakina. Ko au ia Sehova ʼae neʼe palalau mo fakahoko.’+

37 “Koʼeni te folafola ʼa te Tuʼi ʼAliki ko Sehova: ‘ ʼE au tuku anai ke kole mai e te hahaʼi ʼo Iselaele ke au fai te faʼahi ʼaeni maʼa natou: ʼe au fakahahaʼi anai ia natou ke natou kaugamalie ohage ko he faga ovi, 38 pea ohage ko te kau maʼoniʼoni ʼae ʼe fakatahi ʼi Selusalemi* lolotoga te ʼu ʼaho lalahi.+ ʼEi, ʼe hahaʼi anai te ʼu kolo ʼae neʼe maumauʼi.+ Pea ʼe iloʼi moʼoni anai ko au ia Sehova.’ ”

37 Neʼe gaue ia au te malohi ʼo Sehova, pea neʼe ʼave leva au e Sehova ʼaki tona laumalie ki te lotomalie ʼo te potu fenua laulelei+ neʼe fonu ko te hui. 2 Neʼe ina fekau ke au fealuʼaki ʼi ai, pea koʼeni neʼe fonu te potu fenua laulelei ko ni hui kua moamoa.+ 3 Neʼe ina fehuʼi mai: “Foha ʼo te tagata, ʼe feala koa ke toe maʼuli te ʼu hui ʼaena?” Neʼe au tali leva: “Tuʼi ʼAliki ko Sehova, ko koe pe ʼae ʼe ke iloʼi.”+ 4 Neʼe ina ui mai: “Fakakikite ʼo ʼuhiga mo te ʼu hui ʼaena, mo ke ui kia natou: ‘ ʼU hui moamoa, kotou fakalogo ki te folafola ʼa Sehova:

5 “ ‘Koʼeni te meʼa ʼae ʼe ui e te Tuʼi ʼAliki ko Sehova ki te ʼu hui ʼaena: “ ʼE au tuku anai kia koutou he manava pea ʼe kotou toe maʼuʼuli anai.+ 6 ʼE au ʼai anai kia koutou ni ivi mo he kakano, ʼe au kofu anai koutou ʼaki he kili, ʼe au tuku anai kia koutou he manava pea ʼe kotou toe maʼuʼuli anai. Pea ʼe kotou iloʼi moʼoni anai ko au ia Sehova.” ’ ”

7 Neʼe au fakakikite ai leva ohage pe ko tona fakatotonu mai. ʼI te temi pe ʼae neʼe au fakakikite ai, neʼe au logo ki he toe logoaʼa ʼo te gaugaue ʼo te ʼu hui. Pea neʼe kamata fehokohokoʼaki leva te ʼu hui. 8 Pea koʼeni neʼe toe hilifaki ki ai ni ivi mo he kakano pea neʼe ʼuʼufi e he kili. Kae neʼe heʼeki ʼi ai he manava ia natou.

9 Pea neʼe ina ui mai: “Fakakikite ki te matagi. Foha ʼo te tagata, fakakikite mo ke ui ki te matagi: ‘Koʼeni te folafola ʼa te Tuʼi ʼAliki ko Sehova: “Matagi, agi mai mai te ʼu potu taupotu ʼe fa ʼo te kele ki te hahaʼi ʼaia neʼe matehi, ke natou toe maʼuʼuli.” ’ ”

10 Koia neʼe au fakakikite ai ohage pe ko tona fakatotonu mai, neʼe ulu leva he manava* kia natou, ʼo natou toe maʼuʼuli mo tutuʼu ake ai.+ Neʼe ko he kautau kaugamalie.

11 Pea neʼe ina ui mai: “Foha ʼo te tagata, ko te ʼu hui ʼaena ʼe ko te hahaʼi katoa ʼo Iselaele.+ Koʼeni ʼe natou ui: ‘Kua moamoa ʼomatou hui pea ʼe mole kei ʼi ai hamatou ʼamanaki.+ Kua matou pulinoa.’ 12 Koia fakakikite mo ke ui kia natou: ‘Koʼeni te folafola ʼa te Tuʼi ʼAliki ko Sehova: “Siʼaku hahaʼi, ʼe au avahi anai ʼokotou fale maka,+ ʼo fakahu mai koutou ki tuʼa pea ʼe au toe ʼaumai anai koutou ki Iselaele.+ 13 Siʼaku hahaʼi, ʼe kotou iloʼi moʼoni anai ko au ia Sehova moka au avahi ʼokotou fale maka, moka au fakahu mai koutou ki tuʼa.” ’+ 14 ‘ ʼE au tuku anai toku laumalie kia koutou pea ʼe kotou toe maʼuʼuli anai.+ Pea ʼe au toe fakanofo anai koutou ki tokotou fenua. ʼE kotou iloʼi moʼoni anai ko au ia Sehova ʼae neʼe palalau mo fakahoko,’ ko te ui ʼaia ʼa Sehova.”

15 Neʼe toe palalau mai ia Sehova, ʼo ina ui: 16 “Pea ko koe, foha ʼo te tagata, toʼo he koga ʼakau ʼo ke tohi ai: ‘Kia Suta pea mo natou ʼo Iselaele ʼae ʼe kau mo ia.’+ Pea ke toʼo he tahi koga ʼakau ʼo ke tohi ai: ‘Kia Sosefo, te koga ʼakau ʼo Efalaimi pea mo natou fuli ʼo Iselaele ʼae ʼe kau mo ia.’+ 17 Pea ke fakapipiki ia naua ke nā liliu ko he koga ʼakau ʼe tahi ʼi tou nima.+ 18 Ka ui atu anai e te ʼu foha ʼo tau hahaʼi: ‘Fakamahino mai te ʼu meʼa fuli ʼaia.’ 19 ʼE ke tali anai kia natou: ‘Koʼeni te folafola ʼa te Tuʼi ʼAliki ko Sehova: “ ʼE au toʼo anai te koga ʼakau ʼa Sosefo mo te ʼu telepi ʼo Iselaele ʼae ʼe kau mo ia. Ko te koga ʼakau ʼaia ʼe tuku ʼi te nima ʼo Efalaimi pea ʼe au fakapipiki anai ki te koga ʼakau ʼa Suta, ʼo nā liliu ai ko he koga ʼakau ʼe tahi,+ ʼei, ko he koga ʼakau ʼe tahi ʼi toku nima.” ’ 20 ʼE tonu anai ke ke puke te ʼu koga ʼakau ʼae ka ke tohi ke feala hanatou sisio ki ai.

21 “Pea ʼe ke ui anai kia natou: ‘Koʼeni te folafola ʼa te Tuʼi ʼAliki ko Sehova: “ ʼE au toʼo anai te kau Iselaele mai te ʼu puleʼaga ʼae neʼe natou olo ki ai, ʼe au fakatahiʼi anai natou mai te ʼu potu fuli ʼo toe ʼaumai ki tonatou fenua.+ 22 ʼE au fakaliliu anai natou ko he puleʼaga pe ʼe tahi ʼi te fenua,+ ʼi te ʼu moʼuga ʼo Iselaele pea ʼe pule anai kia natou fuli he hau pe ʼe tahi.+ ʼE mole toe ʼi ai anai ni puleʼaga ʼe lua pea ʼe mole toe vaelua anai natou ʼi ni puleʼaga hau ʼe lua.+ 23 ʼE mole natou toe heʼe maʼa anai ʼuhi ko ʼanatou fakatata fakalialia* mo ʼanatou aga ʼae ʼe kovi pea mo ʼanatou talagataʼa fuli.+ ʼE au haofaki anai natou mai tanatou heʼe agatonu ʼae neʼe agahala ai pea mo fakamaʼa natou. ʼE natou liliu anai ko taku hahaʼi, pea ʼe au liliu anai ko tonatou ʼAtua.+

24 “ ‘ “ ʼE liliu anai taku tagata faifekau ko Tavite ko tonatou hau+ pea mo tonatou tauhi ovi pe ʼe tahi.+ ʼE natou mulimuli anai ki ʼaku fakatotonu mo fakalogo lelei ki ʼaku lekula.+ 25 ʼE natou nonofo anai ʼi te fenua ʼae neʼe au foaki ki taku tagata faifekau ko Sakopo, te fenua ʼae neʼe maʼuʼuli ai ʼakotou kui,+ ʼo maʼuʼuli ai ʼo talu ai+ mo ʼanatou fanau pea mo ʼonatou mokopuna.+ Pea ʼe liliu anai taku tagata faifekau ko Tavite, ko tonatou pule* ʼo talu ai.+

26 “ ‘ “ ʼE au fai anai he fuakava ʼo te tokalelei mo natou+ ʼo heʼe gata ai te fuakava ʼaia. ʼE au fakanofo anai natou ki tonatou fenua, pea ʼe au fakahahaʼi+ mo fakatuʼu ai toku sagatualio ia natou ʼo talu ai. 27 ʼE tuʼu anai toku fale la* ia natou, ʼe au liliu anai ko tonatou ʼAtua, pea ʼe natou liliu anai ko taku hahaʼi.+ 28 Ka tuʼu toku sagatualio ia natou ʼo talu ai, ʼe iloʼi moʼoni anai e te ʼu puleʼaga ko au ia Sehova ʼe au fakamaʼoniʼoniʼi ia Iselaele.” ’ ”+

38 Neʼe toe palalau mai ia Sehova, ʼo ina ui: 2 “Foha ʼo te tagata, haga kia Koke mai te fenua ʼo Makoke,+ te pule maʼoluga ʼo Meseke mo Tupale.+ Pea ke fakakikite te malaʼia ʼae ka hoko ki ai.+ 3 ʼE ke ui anai: ‘Koʼeni te folafola ʼa te Tuʼi ʼAliki ko Sehova: “ ʼE au tauʼi anai ia koe, Koke, te pule maʼoluga ʼo Meseke mo Tupale. 4 ʼE au toe fakaliliu anai ia koe, mo ʼai ni mātaʼu ki tou gutu+ pea ʼe au fakamavae anai koe mo tau kautau katoa,+ mo ʼau hosi pea mo ʼau tagata heka hosi ʼae neʼe teu matalelei fuli, ko he kautau kaugamalie neʼe natou toʼo ni meʼa tali tau lalahi mo liliki,* mo natou toʼo heleta fuli. 5 ʼE kau mo natou ia Pelesia, mo Etiopea, mo Puti,+ pea ʼe natou toʼo fuli ni meʼa tali tau liliki mo ʼai ni puloga tau. 6 ʼE toe kau ai ia Komele pea mo ʼana kau solia fuli, ʼo feia mo te hologa ʼo Tokalama+ mo ʼana kau solia fuli ʼae ʼe ʼomai mai te ʼu potu taupotu ʼo te potu noleto. ʼE kau mo koe ni hahaʼi kaugamalie.+

7 “ ‘ “Ke ke tokalelei mo ke teuteu ia koe mo te kautau katoa ʼae ʼe fakatahi mo koe. Pea ko koe anai tonatou kamutoa.

8 “ ‘ “Hili ni ʼaho, ʼe au tokaga anai kia* koe. ʼI te ʼu taʼu fakaʼosi, ʼe ke ʼohofi anai te fenua ʼae neʼe toe ʼaumai ki ai te hahaʼi ʼae neʼe tauʼi ʼaki te heleta. Neʼe fakatahiʼi natou mai ni hahaʼi kaugamalie ʼi te ʼu moʼuga ʼo Iselaele, ʼae neʼe kua fualoa tanatou tuʼu maumau. Neʼe ʼaumai natou mai ni puleʼaga pea ʼe natou maʼuli fimalie fuli.+ 9 ʼE ke to anai kia natou ohage ko he afā pea mo ʼuʼufi te fenua ohage ko ni ʼao, ia koe mo ʼau kau solia fuli pea mo te hahaʼi kaugamalie ʼae ʼe kau mo koe.” ’

10 “Koʼeni te folafola ʼa te Tuʼi ʼAliki ko Sehova: ‘ ʼI te ʼaho ʼaia, ʼe hake anai ʼi tou ʼatamai ni manatu ʼo ke fai ai he fakatuʼutuʼu kovi. 11 ʼE ke ui anai: “ ʼE au ʼohofi anai te fenua ʼaia ʼae ʼe mole puipui te ʼu nofoʼaga.+ ʼE au tauʼi anai ia natou ʼae ʼe maʼuli fimalie mo tokalelei, ʼae ʼe natou nonofo fuli ʼi ni koga meʼa ʼe hala mo kaupa, mo ʼakau fakamaʼu, mo matapa.” 12 ʼE ke toʼo anai he koloa lahi mo ke kaihaʼa. ʼE ke tauʼi anai te ʼu koga meʼa ʼae neʼe maumauʼi ʼi te temi muʼa pea kua toe nofoʼi.+ Pea ʼe ke tauʼi anai he hahaʼi neʼe fakatahiʼi mai te ʼu puleʼaga+ ʼae ʼe natou tanaki ni koloa,+ ia natou ʼae ʼe nonofo ʼi te lotomalie ʼo te kele.

13 “ ‘ ʼE fehuʼi atu anai e Sepa,+ mo Tetane,+ ʼo feia mo te kau faifakatau ʼo Talesisi+ pea mo ʼana kau tagata tau fuli: “ ʼE ke toe ʼohofi koa la te fenua ʼaia ke ke toʼo ai ni koloa lahi pea mo ke kaihaʼa? Neʼe ke fakatahiʼi koa ʼau kautau ke ke ʼave te siliva mo te aulo, mo toʼo ni meʼa lelei, pea mo kaihaʼa he toe koloa?” ’

14 “Koia foha ʼo te tagata, fakakikite mo ke fakaha kia Koke: ‘Koʼeni te folafola ʼa te Tuʼi ʼAliki ko Sehova: “ ʼE mole ke tokagaʼi anai koa la te ʼaho ʼae ka maʼuli fimalie ai taku hahaʼi ko Iselaele?+ 15 ʼE ke haʼu anai mai tou fenua, mai te ʼu potu taupotu ʼo te potu noleto+ mo he hahaʼi kaugamalie ʼe natou heka hosi fuli, ko he kautau lahi, ko ni kau solia kaugamalie.+ 16 ʼE ke ʼohofi anai taku hahaʼi ko Iselaele ohage ko te ʼuʼufi ʼo te fenua e te ʼu ʼao. ʼI te ʼu ʼaho fakamuli, ʼe au uga anai koe ke ke ʼohofi toku fenua,+ ke iloʼi au e te ʼu puleʼaga moka au fakaʼaogaʼi ia koe, Koke, ke au fakamaʼoniʼoniʼi au ʼi ʼonatou muʼa!” ’+

17 “Koʼeni te folafola ʼa te Tuʼi ʼAliki ko Sehova: ‘ ʼE mole ko koe koa la ʼae neʼe au palalau ki ai ʼi te temi muʼa ʼaki ʼaku tagata faifekau, te kau polofeta ʼo Iselaele? Neʼe natou fakakikite lolotoga ni taʼu, ʼe uga anai koe ke ke ʼohofi ia taku hahaʼi.’

18 “ ‘ ʼI te ʼaho ʼaia, te ʼaho ʼae ka ʼohofi ai e Koke ia te fenua ʼo Iselaele, ʼe hage anai toku hauhau ko he afi,’+ ko te ui ʼaia ʼa te Tuʼi ʼAliki ko Sehova. 19 ‘ ʼE au palalau anai ʼi te kovi ʼo toku hauhau, pea ʼi te ʼaho ʼaia ʼe hoko anai he toe mafuike ʼi Iselaele. 20 ʼE matataku anai ʼuhi ko au te ʼu ika ʼo te tai, te ʼu manulele ʼo te lagi, te ʼu manu ʼo te vao, te ʼu manu totolo fuli pea mo te hahaʼi fuli ʼo te kele. Pea ʼe holo anai te ʼu moʼuga,+ mo te ʼu mata mato pea mo te ʼu kaupa fuli.’

21 “ ʼE ui e te Tuʼi ʼAliki ko Sehova: ‘ ʼE au fakaʼaogaʼi anai he heleta moʼona tauʼi ʼi ʼoku moʼuga fuli. ʼE tahi tauʼi pe anai e te tagata ia tona tehina ʼaki tana heleta.+ 22 ʼE au fakahoko anai ki ai ia te fakatuʼā ʼaki he taʼi mahaki+ pea mo liligi te toto. ʼE au fakato anai he ʼua lahi, mo he ʼuamaka,+ mo he afi,+ mo te sulifa+ kia ia mo ʼana kau solia pea mo te hahaʼi kaugamalie ʼae ʼe kau mo ia.+ 23 ʼE au fakaha anai toku mafimafi, mo fakamaʼoniʼoniʼi ia au pea mo fakaha ki ni puleʼaga kaugamalie pe ko ai ia au. Pea ʼe natou iloʼi moʼoni anai ko au ia Sehova.’

39 “Pea kia koe foha ʼo te tagata, fakakikite te malaʼia ʼae ka hoko kia Koke+ mo ui age: ‘Koʼeni te folafola ʼa te Tuʼi ʼAliki ko Sehova: “ ʼE au tauʼi anai ia koe, Koke, te pule maʼoluga ʼo Meseke mo Tupale.+ 2 ʼE au toe fakaliliu anai mo taki koe, mo ʼaumai mai te ʼu potu taupotu ʼo te potu noleto+ pea mo fakahake koe ki te ʼu moʼuga ʼo Iselaele. 3 ʼE au taʼi anai tau nahau ke to mai tou nima hema pea mo ʼau kauʼi nahau ke fetoki mai tou nima mataʼu. 4 ʼE ke mate anai mo ʼau kau solia fuli pea mo te hahaʼi fuli ʼae ʼe kau mo koe ʼi te ʼu moʼuga ʼo Iselaele.+ ʼE au foaki anai koe ko he meʼa kai ki te ʼu faʼahiga manulele kehekehe pea mo te ʼu manu ʼo te vao.” ’+

5 “ ‘ ʼE ke mate anai ʼi te vao+ koteʼuhi neʼe au palalau,’ ko te ui ʼaia ʼa te Tuʼi ʼAliki ko Sehova.

6 “ ‘ ʼE au fakato anai he afi kia Makoke pea mo natou ʼae ʼe maʼuli fimalie ʼi te ʼu motu.+ Pea ʼe iloʼi moʼoni anai ko au ia Sehova. 7 ʼE au fakaha anai toku huafa taputapu ki taku hahaʼi ko Iselaele pea ʼe mole au toe fakagafua anai ke ʼulihi toku huafa taputapu. ʼE iloʼi moʼoni anai e te ʼu puleʼaga ko au ia Sehova,+ te Maʼoniʼoni ʼi Iselaele.’+

8 “ ʼE ui e te Tuʼi ʼAliki ko Sehova: ‘ ʼE hoko anai, ʼei, ʼe hoko moʼoni anai ia. Ko te ʼaho ʼaia ʼae neʼe au palalau ki ai. 9 ʼE ʼomai anai te hahaʼi ʼo te ʼu kolo ʼo Iselaele ʼo tafu he afi ʼaki te ʼu mahafu: te ʼu meʼa tali tau lalahi mo liliki,* te ʼu nahau mo te ʼu kauʼi nahau, te ʼu koga ʼakau* mo te ʼu tao. ʼE natou fakaʼaogaʼi anai moʼo tafu te afi+ lolotoga taʼu ʼe fitu. 10 ʼE mole ʼaoga anai ke natou olo ʼo kumi fafie ʼi te vao peʼe tae fafie ʼi te ʼu vao matuʼa moʼo fakamafana koteʼuhi ʼe natou tafu anai te afi ʼaki te ʼu mahafu.’

“ ‘ ʼE natou toʼo anai te ʼu koloa ʼo natou ʼae neʼe natou toʼo ʼonatou koloa pea ʼe natou kaihaʼa anai ia natou ʼae neʼe natou kaihaʼa ia natou,’ ko te ui ʼaia ʼa te Tuʼi ʼAliki ko Sehova.

11 “ ‘ ʼI te ʼaho ʼaia, ʼe au foaki anai kia Koke+ he fale maka ʼi Iselaele, ʼi te potu fenua laulelei ʼo natou ʼae ʼe faifolau ʼi te potu esite ʼo te tai. Pea ʼe pupunu anai te ala e te potu fenua laulelei ʼaia kia natou ʼae ʼe fakalaka ai. ʼE tanu ai anai ia Koke mo ʼana kau solia fuli, ʼo fakahigoaʼi ko te Potu Fenua Laulelei ʼo Hamone-Koke.+ 12 ʼE tanu anai natou e te hahaʼi ʼo Iselaele moʼo fakamaʼa te fenua lolotoga mahina ʼe fitu.+ 13 ʼE gaue anai te hahaʼi fuli ʼo te fenua ʼo tanu natou pea mo logologona ʼuhi ko te faʼahi ʼaia ʼi te ʼaho ʼae ʼe au fakakololiaʼi ai anai ia au,’+ ko te ui ʼaia ʼa te Tuʼi ʼAliki ko Sehova.

14 “ ‘ ʼE hinoʼi anai ni tagata ke natou vakavakaʼi tuʼumaʼu te fenua pea mo tanu te ʼu sino ʼae ʼe kei leta ʼi te kele koteʼuhi ke fakamaʼa te fenua. ʼE hoko atu anai ʼanatou fekumi lolotoga mahina ʼe fitu. 15 Ka sisio ia natou ʼae ʼe natou vakavakaʼi te fenua ki te ʼu hui ʼo te hahaʼi, ʼe natou fakailoga ai te potu ʼaia. Pea ʼe ʼomai leva ia natou ʼae neʼe hinoʼi ʼo tanu natou ʼi te Potu Fenua Laulelei ʼo Hamone-Koke.+ 16 ʼE toe ʼi ai anai ʼi te potu ʼaia he kolo ʼe higoa ko Hamona.* Pea ʼe natou fakamaʼa anai te fenua.’+

17 “Kae kia koe foha ʼo te tagata, koʼeni te folafola ʼa te Tuʼi ʼAliki ko Sehova: ‘Ui age ki te ʼu faʼahiga manulele fuli pea mo te ʼu manu fuli ʼo te vao: “Kotou fakatahitahi mai! Kotou fakatahitahi mai ki te sakilifisio ʼae ʼe au teuteuʼi maʼa koutou, ko he toe sakilifisio ʼi te ʼu moʼuga ʼo Iselaele.+ ʼE kotou kai anai te kakano mo inu te toto.+ 18 ʼE kotou kai anai te kakano ʼo ni tagata malolohi pea mo inu te toto ʼo te ʼu pule ʼo te kele: te ʼu ovi tagata, te ʼu akeno, te ʼu tao tagata pea mo te ʼu vitulo, ko te ʼu manu sisino fuli ʼaia ʼo Pasani. 19 ʼE lahi anai takotou kai te gako pea mo inu te toto, ʼo kaku ki takotou konahia ʼuhi ko te sakilifisio ʼae ka au teuteuʼi maʼa koutou.” ’

20 “ ‘ ʼE kotou makokona anai ʼi toku laupapa ʼi te kakano ʼo ni hosi, mo ni tagata taki saliote tau, mo ni tagata malolohi pea mo ni faʼahiga tagata tau kehekehe,’+ ko te ui ʼaia ʼa te Tuʼi ʼAliki ko Sehova.

21 “ ‘ ʼE au fakaha anai toku kololia ʼi te ʼu puleʼaga, pea ʼe sisio ai te ʼu puleʼaga fuli neʼe au fakahoko te fakatuʼā pea neʼe au fakaha toku mafimafi ia natou.+ 22 Pea ʼe iloʼi moʼoni anai e te hahaʼi ʼo Iselaele ko au ia Sehova tonatou ʼAtua, talu mai te ʼaho ʼaia. 23 Pea ʼe iloʼi moʼoni anai e te ʼu puleʼaga, kapau neʼe ʼave popula te hahaʼi ʼo Iselaele ko tanatou pe ia hala koteʼuhi neʼe heʼe agatonu kia te au.+ Koia neʼe au lituʼa ai kia natou+ mo tuku natou ki ʼonatou fili+ ʼo natou mamate fuli ʼi te heleta. 24 Neʼe mulimuli pe taku aga ki tanatou heʼe maʼa mo ʼanatou talagataʼa, koia ʼae neʼe au lituʼa ai kia natou.’

25 “Koʼeni te folafola ʼa te Tuʼi ʼAliki ko Sehova: ‘ ʼE au ʼaumai anai te hologa ʼo Sakopo ʼae neʼe pilisoni+ pea mo ʼofa ki te hahaʼi fuli ʼo Iselaele.+ ʼE au fakakololiaʼi anai toku huafa taputapu.+ 26 ʼE natou maʼuli fimalie anai ʼi tonatou fenua ʼo mole natou tuʼania ki he tahi,+ ʼi te ʼosi fakalainoaʼi ʼo natou ʼuhi ko tanatou heʼe agatonu kia te au.+ 27 ʼI te temi ʼae ka au ʼaumai ai natou mai te hahaʼi pea mo fakatahiʼi natou mai te ʼu fenua ʼo ʼonatou fili,+ ʼe au fakamaʼoniʼoniʼi anai au ʼi ʼonatou muʼa pea ia muʼa ʼo ni puleʼaga kaugamalie.’+

28 “ ‘ ʼE natou iloʼi moʼoni anai ko au ia Sehova tonatou ʼAtua, ʼi te temi ʼae ʼe au ʼave popula ai natou ki te ʼu puleʼaga pea moka au toe fakatahiʼi natou ke natou toe liliu mai ki tonatou fenua, ʼo mole galoʼi he tahi.+ 29 ʼE mole au toe lituʼa anai kia natou+ koteʼuhi ʼe au foaki anai toku laumalie ki te hahaʼi ʼo Iselaele,’+ ko te ui ʼaia ʼa te Tuʼi ʼAliki ko Sehova.”

40 ʼI te 25 taʼu ʼo tamatou nofo popula,+ ʼi te kamata ʼo te taʼu, ʼi te ʼaho hogofulu ʼo te mahina, ko tona fakaʼuhiga ʼi te 14 taʼu ʼo te ʼosi maʼu ʼo te kolo,+ ʼi te ʼaho tonu ʼaia, neʼe gaue te malohi ʼo Sehova ia au pea neʼe ina ʼave au ki te kolo.+ 2 Neʼe fakaha mai e te ʼAtua he meʼa, neʼe hage neʼe au ʼi te fenua ʼo Iselaele pea neʼe ina tuku au ki he moʼuga ʼe maʼoluga ʼaupito.+ ʼI te moʼuga ʼaia ʼi te potu saute, neʼe tuʼu ai he meʼa neʼe hage ko he kolo.

3 ʼI tana ʼave au ki ai, neʼe au sio ki he tagata neʼe hage tona agaaga ko te kapa.+ Neʼe ina toʼo ʼi tona nima he maea lino pea mo he kaho moʼo fakafuafua*+ pea neʼe tuʼu ʼi te huʼaga. 4 Neʼe ui mai e te tagata: “Foha ʼo te tagata, sio fakalelei, fagono lelei mo tokaga kia meʼa fuli ʼae ʼe au fakaha atu, he ʼe ko te tupuʼaga la ʼaia ʼo tou ʼaumai ki heni. Fakamatala ki te hahaʼi ʼo Iselaele ia meʼa fuli ʼae ka ke sio ki ai.”+

5 Neʼe au sio ki he kaupa ʼe ina ʼa takai te fale lotu.* Neʼe toʼo e te tagata ʼi tona nima he kaho moʼo fakafuafua neʼe fasiga nima ono (ʼi te ʼu fasiga nima takitahi ʼe hilifaki ki ai he ʼalofi nima ʼe tahi).* Neʼe ina fakafuafua leva te kaupa: neʼe ko he kaho ʼe tahi tona matolu pea ko he kaho ʼe tahi tona maʼoluga.

6 Neʼe alu leva ki te matapa ʼae ʼe haga ki te potu esite+ pea neʼe hake ʼi te ʼu mata tuʼuga. Neʼe ina fakafuafua te huʼaga, neʼe ko he kaho ʼe tahi tona laulahi pea neʼe toe feia pe mo te huʼaga ʼo te tahi matapa. 7 Ko he kaho ʼe tahi te loa ʼo te koga fale leʼo takitahi pea ko he kaho ʼe tahi tona laulahi. ʼE vaha te ʼu koga fale leʼo+ ia fasiga nima ʼe nima. Ko te huʼaga ʼae ʼe ovi ki te fakamalumaluʼaga ʼo te matapa ʼae ʼe haga ki loto, ko te kaho ʼe tahi.

8 Neʼe ina fakafuafua te fakamalumaluʼaga ʼo te matapa ʼae ʼe haga ki loto, neʼe ko te kaho ʼe tahi. 9 Neʼe ina fakafuafua leva te fakamalumaluʼaga ʼo te matapa, neʼe fasiga nima valu. Neʼe fakafuafua ʼona pou ʼae ʼi ʼona tafaʼaki, neʼe fasiga nima lua. ʼE tuʼu te fakamalumaluʼaga ʼo te matapa ʼi te faʼahi ʼae ʼe haga ki loto.

10 ʼI te ʼu faʼahi takitahi ʼo te matapa ʼo te potu esite, neʼe ʼi ai koga fale leʼo ʼe tolu pea neʼe tatau tonatou fakafuafua. Pea neʼe toe tatau pe mo te fakafuafua ʼo te ʼu pou ʼi te ʼu tafaʼaki ʼi ʼona faʼahi takitahi.

11 Neʼe ina fakafuafua leva te huʼaga ʼo te matapa, neʼe fasiga nima 10 tona laulahi, pea ko te matapa neʼe fasiga nima 13 tona loa.

12 ʼI ʼona tafaʼaki, ʼi muʼa ʼo te ʼu koga fale leʼo, neʼe ʼi ai he ki’i kaupa, neʼe vaha ʼi te fasiga nima ʼe tahi. Neʼe taki fasiga nima ono te ʼu koga fale leʼo ʼi ʼona tafaʼaki.

13 Neʼe ina fakafuafua leva te matapa mai te ʼato ʼo he koga fale leʼo* ʼo kaku ki te ʼato ʼo te tahi koga fale, neʼe fasiga nima 25 tona laulahi. Pea neʼe fehagaʼaki te ʼu huʼaga ʼo te ʼu koga fale.+ 14 Pea neʼe ina fakafuafua leva te ʼu pou ʼi te ʼu tafaʼaki, neʼe fasiga nima 60 tona maʼoluga, ʼo toe feia pe mo te ʼu pou ʼi te ʼu tafaʼaki ʼo te ʼu matapa ʼae ʼe natou takafoli te malaʼe. 15 Mai te huʼaga ki te fakamalumaluʼaga ʼae ʼe haga ki loto, neʼe fasiga nima 50.

16 Pea ʼi loto leva ’o te matapa ʼi ʼona faʼahi takitahi, neʼe ʼi ai ni matapa fakamalama neʼe fakaalu ia ʼo faveliveli+ ʼi te ʼu koga fale leʼo pea mo te ʼu pou ʼi ʼonatou tafaʼaki. Neʼe toe ʼi ai ni matapa fakamalama ʼi te ʼu faʼahi takitahi ʼo te ʼu fakamalumaluʼaga. Pea neʼe ʼi ai ni pāki ʼo ni fuʼu palema+ ʼi te ʼu pou ʼi te ʼu tafaʼaki.

17 Neʼe ina fakaulu leva au ki te malaʼe ʼae ʼi tuʼa, pea neʼe au sio ai ki he ʼu fale kai*+ pea mo he tale ʼe ina takafoli te malaʼe. Neʼe ko fale kai ʼe 30 ʼi te tale. 18 Neʼe tatau te loa ʼo te ʼu matapa mo te loa ʼo te tale ʼi te ʼu faʼahi takitahi ʼo te ʼu matapa, neʼe ko te tale malalo ʼaia.

19 Neʼe ina fakafuafua leva te vaha ʼae mai te matapa ʼae ʼe tuʼu ʼi lalo ki te malaʼe ʼae ʼi loto. ʼI te potu esite pea mo te potu noleto, neʼe fasiga nima 100.

20 Neʼe ʼi ai te matapa ʼo te malaʼe ʼae ʼi tuʼa, neʼe haga ki te potu noleto. Neʼe ina fakafuafua te loa pea mo te laulahi ʼo te matapa. 21 ʼI ʼona tafaʼaki, neʼe ʼi ai koga fale leʼo ʼe tolu. Neʼe tatau te loa ʼo te ʼu pou ʼi ʼona tafaʼaki pea mo tona fakamalumaluʼaga mo ʼae ʼo te ʼuluaki matapa. Neʼe fasiga nima 50 tona loa pea mo fasiga nima 25 tona laulahi. 22 Neʼe tatau te fakafuafua ʼo ʼona matapa fakamalama, mo tona fakamalumaluʼaga pea mo te ʼu pāki ʼo te ʼu fuʼu palema+ mo ʼae ʼo te matapa ʼo te potu esite. Neʼe mata tuʼuga fitu te hake ki ai pea neʼe haga ki te fakamalumaluʼaga.

23 Neʼe ʼi ai te matapa ʼi te malaʼe ʼae ʼi loto neʼe haga ki te matapa ʼo te potu noleto, pea ko te tahi matapa neʼe haga ki te matapa ʼo te potu esite. Neʼe ina fakafuafua te vaha ʼo te matapa ki te tahi matapa, neʼe fasiga nima 100.

24 Neʼe ina taki leva au ki te potu saute, pea ʼi te potu ʼaia neʼe au sio ai ki he matapa.+ Neʼe ina fakafuafua te ʼu pou ʼi te ʼu tafaʼaki pea mo te fakamalumaluʼaga. Neʼe tatau tonatou fakafuafua mo te ʼu matapa ʼae. 25 ʼI te ʼu tafaʼaki ʼo te matapa pea mo tona fakamalumaluʼaga, neʼe ʼi ai ni matapa fakamalama neʼe hage pe ko te ʼu matapa fakamalama ʼae. Neʼe fasiga nima 50 tona loa pea mo fasiga nima 25 tona laulahi. 26 Neʼe mata tuʼuga fitu te hake ki ai+ pea neʼe haga ki tona fakamalumaluʼaga. Pea neʼe ʼi ai ni pāki ʼo ni fuʼu palema ʼi te pou takitahi ʼo te ʼu pou ʼi te ʼu tafaʼaki.

27 Neʼe ʼi ai te matapa ʼo te malaʼe ʼae ʼi loto neʼe haga ki te potu saute. Neʼe ina fakafuafua ʼi te potu saute te vaha ʼo te matapa ki te tahi matapa, neʼe fasiga nima 100. 28 Pea neʼe ina fakahu au ki te malaʼe ʼae ʼi loto ʼi te matapa ʼo te potu saute. Neʼe ina fakafuafua te matapa ʼo te potu saute, neʼe tatau pe tona fakafuafua pea mo te ʼu matapa ʼae. 29 Neʼe toe tatau pe te fakafuafua ʼo ʼona koga fale leʼo, mo te ʼu pou ʼi ʼona tafaʼaki, mo tona fakamalumaluʼaga mo te ʼu matapa ʼae. Ko te matapa mo tona fakamalumaluʼaga neʼe ʼi ai ʼonā matapa fakamalama ʼi ʼonā faʼahi takitahi. Neʼe fasiga nima 50 tona loa mo fasiga nima 25 tona laulahi.+ 30 Neʼe ʼi ai te ʼu fakamalumaluʼaga ʼi te takafoli, pea neʼe fasiga nima 25 tonatou loloa mo fasiga nima 5 tonatou laulahi. 31 Neʼe haga tona fakamalumaluʼaga ki te malaʼe ʼae ʼi tuʼa. Neʼe ʼi ai ni pāki ʼo ni fuʼu palema ʼi te ʼu pou ʼi ʼona tafaʼaki,+ pea neʼe mata tuʼuga valu te hake ki ai.+

32 ʼI te temi ʼae neʼe ina fakahu ai au ki te malaʼe ʼae ʼi loto ʼi te potu esite, neʼe ina fakafuafua te matapa. Neʼe tatau pe tona fakafuafua mo te ʼu matapa ʼae. 33 Neʼe toe tatau pe te fakafuafua ʼo ʼona koga fale leʼo, mo te ʼu pou ʼi ʼona tafaʼaki, mo tona fakamalumaluʼaga mo te ʼu matapa ʼae. Ko te matapa mo tona fakamalumaluʼaga neʼe ʼi ai ʼonā matapa fakamalama ʼi ʼonā faʼahi takitahi. Neʼe fasiga nima 50 tona loa mo fasiga nima 25 tona laulahi. 34 Neʼe haga tona fakamalumaluʼaga ki te malaʼe ʼae ʼi tuʼa. Neʼe ʼi ai ni pāki ʼo ni fuʼu palema ʼi te ʼu pou ʼe lua ʼi ʼona tafaʼaki pea neʼe mata tuʼuga valu te hake ki ai.

35 Neʼe ina fakahu au ʼi te matapa ʼo te potu noleto+ pea neʼe ina fakafuafua. Neʼe tatau pe tona fakafuafua mo te ʼu matapa ʼae. 36 Neʼe toe tatau pe mo te ʼu matapa ʼae, ʼona koga fale leʼo, te ʼu pou ʼi ʼona tafaʼaki pea mo tona fakamalumaluʼaga. Neʼe ʼi ai ʼona matapa fakamalama ʼi ʼona faʼahi takitahi. Neʼe fasiga nima 50 tona loa pea mo fasiga nima 25 tona laulahi. 37 Neʼe haga te ʼu pou ʼi ʼona tafaʼaki ki te malaʼe ʼae ʼi tuʼa. Neʼe ʼi ai ni pāki ʼo ni fuʼu palema ʼi te ʼu pou ʼe lua ʼae ʼi ʼona tafaʼaki pea neʼe mata tuʼuga valu te hake ki ai.

38 Neʼe ʼi ai he fale kai mo tona huʼaga ʼe ovi ki te ʼu pou ʼi te ʼu tafaʼaki ʼo te ʼu matapa, pea neʼe fakamaʼa ai te ʼu holokoseta.*+

39 ʼI te ʼu tafaʼaki ʼo te fakamalumaluʼaga ʼo te matapa, neʼe ʼi ai ni laupapa ʼe lua neʼe matehi ai te ʼu holokoseta,+ te ʼu molaga ʼo te agahala*+ pea mo te ʼu sakilifisio fakatokatoka.*+ 40 ʼI te faʼahi ʼae neʼe hu ai ʼi te matapa ʼo te potu noleto, neʼe ʼi ai ni laupapa ʼe lua ʼi tuʼa. Neʼe toe ʼi ai mo ni laupapa ʼe lua ʼi te tahi faʼahi ʼo te fakamalumaluʼaga ʼo te matapa. 41 Neʼe ʼi ai laupapa ʼe fa ʼi te ʼu tafaʼaki ʼo te matapa, neʼe fakatahiʼi ko laupapa ʼe valu, ʼae neʼe matehi ai te ʼu sakilifisio. 42 Neʼe faʼu ʼaki ni maka neʼe taʼataʼaga te ʼu laupapa ʼaia ʼe fa maʼa te ʼu holokoseta. Neʼe fasiga nima tahi vaelua tona loa mo fasiga nima tahi vaelua tona laulahi pea mo fasiga nima tahi tona maʼoluga. Neʼe hihili ai te ʼu meʼa gaue ʼae neʼe fakaʼaogaʼi moʼo matehi te ʼu holokoseta pea mo te ʼu sakilifisio. 43 Neʼe fakapikipiki ʼi te takafoli ʼo te ʼu kaupa ʼae ʼi loto ni hiliʼaga meʼa, ko he ʼalofi nima ʼe tahi tona laulahi. Pea neʼe hili ʼi te ʼu laupapa te ʼu kanoʼi manu ʼo te ʼu molaga.

44 Neʼe ʼi ai ni fale kai maʼa te kau hiva+ ʼe ovi ki te matapa ʼae ʼi loto. Neʼe tuʼu ia ʼi te malaʼe ʼae ʼi loto ʼo ovi ki te matapa ʼo te potu noleto pea neʼe ava ia ki te potu saute. Neʼe ʼi ai te tahi fale kai neʼe ovi ki te matapa ʼo te potu esite, neʼe ava ia ki te potu noleto.

45 Neʼe ina ui mai: “Ko te fale kai ʼae ʼe ava ki te potu saute, ʼe ʼa te kau pelepitelo ʼae neʼe hinoʼi ki te ʼu gaue ʼo te fale lotu.+ 46 Ko te fale kai ʼae ʼe ava ki te potu noleto, ʼe ʼa te kau pelepitelo ʼae neʼe hinoʼi ki te gaue ʼo te ʼaletale.+ Ko te hologa ʼo Satoke,+ te kau Levite ʼae ko tonatou maʼua ko te fakaovi kia Sehova moʼona tauhi.”+

47 Neʼe ina fakafuafua leva te malaʼe ʼae ʼi loto. Neʼe fasiga nima 100 tona loa mo fasiga nima 100 tona laulahi, neʼe tapa fa. Neʼe tuʼu te ʼaletale ʼi muʼa ʼo te fale lotu.

48 Neʼe ina fakahu leva ia au ki te fakamalumaluʼaga ʼo te fale lotu,+ pea neʼe ina fakafuafua te ʼu pou ʼi te ʼu tafaʼaki ʼo te fakamalumaluʼaga, neʼe fasiga nima nima ʼi te tahi faʼahi mo fasiga nima nima ʼi te tahi faʼahi. Neʼe laulahi te matapa ia fasiga nima ʼe tolu ʼi te tahi faʼahi mo fasiga nima ʼe tolu ʼi te tahi faʼahi.

49 Neʼe fasiga nima 20 te loa ʼo te fakamalumaluʼaga mo fasiga nima 11* tona laulahi. Neʼe hake ki ai ʼi ni mata tuʼuga. Neʼe ovi te ʼu pou ʼi ʼona tafaʼaki ki ni pou, te tahi ʼi te tahi faʼahi pea ko te tahi ʼi te tahi faʼahi.+

41 Neʼe ina fakahu leva au ki te Potu Taputapu* pea neʼe ina fakafuafua te ʼu pou ʼi te ʼu tafaʼaki. Neʼe fasiga nima* ono te laulahi ʼi te tahi faʼahi mo fasiga nima ono te laulahi ʼi te tahi faʼahi. 2 Neʼe fasiga nima hogofulu te laulahi ʼo te huʼaga, pea neʼe fasiga nima nima te ʼu kaupa takitahi ʼo te huʼaga. Neʼe ina fakafuafua te koga fale, neʼe fasiga nima 40 tona loa mo fasiga nima 20 tona laulahi.

3 Neʼe hu leva ki loto* pea neʼe ina fakafuafua te pou ʼi te tafaʼaki ʼo te huʼaga, neʼe fasiga nima lua tona matolu. Neʼe fasiga nima ono te laulahi ʼo te huʼaga. Neʼe fasiga nima fitu te ʼu kaupa takitahi ʼo te huʼaga. 4 Neʼe ina fakafuafua leva te koga fale ʼae ʼe tuʼu ʼi muli ʼo te Potu Taputapu, neʼe fasiga nima 20 tona loa mo fasiga nima 20 tona laulahi.+ Pea neʼe ina ui mai: “Ko te Potu Taputapu ʼAupito ʼaeni.”+

5 Neʼe ina fakafuafua leva te kaupa ʼo te fale lotu, neʼe fasiga nima ono tona matolu. Neʼe fasiga nima fa te laulahi ʼo te ʼu koga fale ʼi te tafaʼaki ʼae ʼe natou ʼa takai te fale lotu.+ 6 Neʼe laufata tolu te ʼu koga fale ʼi te ʼu tafaʼaki, neʼe koga fale 30 te laufata. ʼI te takafoli ʼo te kaupa ʼo te fale lotu, neʼe ʼi ai ni tapatapa neʼe hili ai te ʼu koga fale, ke mole fakaulu ai he lalago ki te kaupa ʼo te fale lotu.+ 7 Neʼe ʼi ai he mata tuʼuga ʼi te ʼu faʼahi takitahi ʼo te fale lotu, neʼe fakaalu ʼo laulahi ʼi te hake ki te ʼu koga fale ʼi te ʼu laufata.+ Neʼe fakaalu ʼo falahi te mata tuʼuga mai lalo ki te ʼuluaki laufata pea mo hoko atu ki te laufata fakaʼosi.

8 Neʼe au sio neʼe ʼi ai te tale maʼoluga ʼi te takafoli ʼo te fale lotu. Neʼe fakafuafua te ʼu fakatafito ʼo te ʼu koga fale ʼi te ʼu tafaʼaki, neʼe ko he kaho katoa ʼe fasiga nima ono tona maʼoluga. 9 Neʼe fasiga nima nima te matolu ʼo te kaupa ʼae ʼi tuʼa ʼo te ʼu koga fale ʼi te ʼu tafaʼaki. Neʼe ʼi ai te faʼahi lauʼatea* mai te tapatapa ʼo te tale ki te kaupa ʼo te ʼu koga fale ʼi te ʼu tafaʼaki ʼae ʼe pipiki ki te fale lotu.

10 ʼI te ʼu faʼahi takitahi, neʼe ʼi ai he potu lauʼatea ʼe fasiga nima 20 tona laulahi ʼi te vaha ʼo te fale lotu mo te ʼu fale kai.*+ 11 ʼI te potu noleto, neʼe ʼi ai he huʼaga ʼi te vaha ʼo te ʼu koga fale ʼi te ʼu tafaʼaki pea mo te faʼahi lauʼatea, pea mo te tahi huʼaga ʼi te potu saute. Neʼe fasiga nima nima te laulahi ʼo te faʼahi lauʼatea ʼi te takafoli.

12 Neʼe fasiga nima 70 te laulahi ʼo te fale ʼo te potu uesite mo fasiga nima 90 tona loa, pea neʼe haga ia ki te potu lauʼatea. Neʼe fasiga nima nima te matolu ʼo te kaupa ʼo te fale ʼi tona takafoli.

13 Neʼe ina fakafuafua te fale lotu, neʼe fasiga nima 100 tona loa. Neʼe toe fasiga nima 100 te loa ʼo te potu lauʼatea, mo te fale* pea mo ʼona kaupa. 14 Neʼe fasiga nima 100 te laulahi ʼo te faʼahi esite ʼo te fale lotu pea mo te potu lauʼatea.

15 Neʼe ina fakafuafua te fale ʼae ʼe haga ki te potu lauʼatea ʼae ʼe tuʼu ʼi muli ʼo te fale lotu, ʼo toe feia pe mo ʼona haʼeleʼaga ʼi ʼona faʼahi ʼe lua. Neʼe fasiga nima 100 tona loa.

Neʼe ina toe fakafuafua mo te Potu Taputapu, mo te Potu Taputapu ʼAupito+ pea mo te ʼu fakamalumaluʼaga ʼo te malaʼe, 16 ʼo toe feia pe mo te ʼu huʼaga, mo te ʼu matapa fakamalama ʼae ʼe fakaalu ʼo faveliveli+ pea mo te ʼu haʼeleʼaga ʼi te ʼu koga meʼa ʼaia ʼe tolu. Neʼe ʼi ai ni pano papa+ ʼe ovi ki te huʼaga, mai lalo ʼo kaku ki te ʼu matapa fakamalama. Pea neʼe ʼaofi te ʼu matapa fakamalama. 17 Neʼe ina toe fakafuafua te fuga huʼaga, ʼi te loto fale lotu mo tuʼa, pea mo te takafoli ʼo te kaupa. 18 Neʼe togi ai ni kelupimi+ mo ni pāki ʼo ni fuʼu palema.+ Neʼe tuʼu te ʼu fuʼu palema takitahi ʼi te vaha ʼo ni kelupimi ʼe lua, pea neʼe taki fofoga lua te kelupimi. 19 Neʼe haga te fofoga tagata ki he fuʼu palema ʼi te tahi faʼahi, pea haga te fofoga laione ki he fuʼu palema ʼi te tahi faʼahi.+ Neʼe feia te togi ʼo te ʼu pāki ʼaia ʼi te fale lotu katoa. 20 ʼI te kaupa ʼo te sagatualio, mai lalo ʼo kaku ki te fuga huʼaga, neʼe togi ai ni kelupimi mo ni pāki ʼo ni fuʼu palema.

21 Neʼe tapa fa tatau te ʼu kaumatapa* ʼo te sagatualio.+ ʼI muʼa ʼo te koga meʼa taputapu,* neʼe ʼi ai he meʼa ʼe hage 22 ko he ʼaletale papa+ neʼe fasiga nima tolu tona maʼoluga mo fasiga nima lua tona loa. Neʼe ʼi ai ʼona pou tuliki, pea neʼe fai tona tafito mo ʼona tafaʼaki ʼaki te ʼakau. Neʼe ui mai e te tagata: “Ko te laupapa ʼae ʼe tuʼu ia muʼa ʼo Sehova.”+

23 Neʼe matapa lua te Potu Taputapu pea mo te koga meʼa taputapu.+ 24 Neʼe kaumatapa lua te ʼu matapa, ʼei, neʼe kaumatapa lua te matapa takitahi. 25 Neʼe togi ʼi te ʼu matapa ʼo te sagatualio ni kelupimi mo ni pāki ʼo ni fuʼu palema ohage pe ko te ʼu pāki ʼae ʼi te ʼu kaupa.+ ʼI tuʼa, neʼe ʼi ai he tapatapa papa neʼe fakapipiki ki te fakamalumaluʼaga ʼi muʼa. 26 Neʼe toe ʼi ai ni matapa fakamalama neʼe fakaalu ʼo faveliveli+ pea mo ni pāki ʼo ni fuʼu palema ʼi te ʼu faʼahi lualua ʼo te fakamalumaluʼaga, ʼo toe feia pe mo te ʼu kaupa ʼo te ʼu koga fale ʼi te ʼu tafaʼaki ʼo te fale lotu pea mo te ’u tapatapa.

42 Pea neʼe ina taki au+ ki te potu noleto ʼi te malaʼe ʼae ʼi tuʼa. Neʼe ina ʼave au ki te ʼu fale kai ʼae ʼe tuʼu ia tafa ʼo te potu lauʼatea+ pea ʼi te potu noleto ʼo te fale ʼae ʼe pipiki ki ai.+ 2 Ko te faʼahi ʼo te ʼu fale kai ʼae neʼe tuʼu ai te huʼaga noleto, neʼe fasiga nima* 100 tona loa mo fasiga nima 50 tona laulahi. 3 Neʼe tuʼu te ’u fale kai ʼi te vaha ʼo te malaʼe ʼae ʼi loto, neʼe fasiga nima 20 tona laulahi,+ pea mo te tale ʼo te malaʼe ʼae ʼi tuʼa. Neʼe ʼi ai te haʼeleʼaga ʼi te ʼu laufata ʼe tolu pea ʼe fehagaʼaki. 4 ʼI muʼa ʼo te ʼu fale kai,* neʼe ʼi ai te ala+ neʼe fasiga nima 10 tona laulahi mo fasiga nima 100 tona loa.* Neʼe haga ʼonatou huʼaga ki te potu noleto. 5 Neʼe faveliveli age te ʼu fale kai ʼae ʼi ʼoluga ʼi te ʼu fale kai ʼae ʼi lalo pea mo te laufata ʼae ʼi loto, ʼuhi ko te laulahi ʼo te ʼu haʼeleʼaga. 6 Neʼe laufata tolu te ʼu fale ʼaia, pea neʼe mole laulahi ia ohage ko te ʼu fale ʼo te ʼu laufata ʼae ʼi lalo, he neʼe mole ʼi ai honatou ʼu pou ohage ko te ʼu pou ʼae ʼo te ʼu malaʼe.

7 ʼI te faʼahi ʼo te malaʼe ʼae ʼi tuʼa, neʼe ʼi ai he kaupa maka neʼe ovi ki te ʼu fale kai. Neʼe fasiga nima 50 tona loa pea neʼe haga ia ki te ʼu fale kai ʼae. 8 Neʼe fasiga nima 50 te loa ʼo te ʼu fale kai ʼae ʼi te faʼahi ʼo te malaʼe ʼae ʼi tuʼa. Kae neʼe fasiga nima 100 te ʼu fale kai ʼae neʼe haga ki te sagatualio. 9 ʼI te potu esite, neʼe ʼi ai te huʼaga neʼe alu ai ki te ʼu fale kai mai te malaʼe ʼae ʼi tuʼa.

10 Neʼe toe ʼi ai ni fale kai ʼi te tuʼa kaupa maka ʼi te faʼahi esite ʼae ʼe haga ki te malaʼe ʼe ovi ki te potu lauʼatea pea mo te ʼu fale kai ʼae.*+ 11 ʼI te muʼa fale kai, neʼe ʼi ai te ala neʼe hage pe ko te ala ʼae neʼe fakalaka ia muʼa ʼo te ʼu fale kai ʼo te potu noleto.+ Neʼe tatau pe te loa mo te laulahi ʼo te ʼu fale ʼaia, ʼo toe feia pe mo tonatou faʼahiga fakaalualu pea mo ʼonatou huʼaga ki tuʼa. Neʼe tatau ʼonatou huʼaga ki loto 12 mo te ʼu huʼaga ʼo te ʼu fale kai ʼo te potu saute. ʼI te kamata ʼo te ala, ʼi muʼa ʼo te kaupa maka ʼo te potu esite, neʼe ʼi ai te huʼaga ʼe feala ke hu mai ai.+

13 Neʼe ina ui mai leva: “Ko te ʼu fale kai ʼo te potu noleto mo te potu saute ʼae ʼe ovi ki te potu lauʼatea,+ ko te ʼu fale kai taputapu ʼae ʼe kai ai e te ʼu pelepitelo ʼae ʼe fakaovi kia Sehova te ʼu molaga taputapu ʼaupito.+ ʼE natou tuku ai te ʼu molaga taputapu ʼaupito: te molaga meʼa kai, te molaga ʼo te agahala* pea mo te sakilifisio fakatokatoka, he ʼe taputapu te koga meʼa ʼaia.+ 14 ʼI tanatou fehufi ki loto, ʼe mole tonu ke mavae te kau pelepitelo mai te koga meʼa taputapu ʼo olo ki te malaʼe ʼae ʼi tuʼa kae heʼeki huʼi te ʼu teu ʼae neʼe natou fakaʼaogaʼi ki tanatou gaue,+ he ʼe taputapu te ʼu teu ʼaia. ʼE natou fetogi anai ʼi muʼa ʼo tanatou fakaovi ki te ʼu koga meʼa ʼae ʼe gafua ki ai te hahaʼi.”

15 ʼI tana ʼosi fakafuafua te ʼu faʼahi ʼae ʼi loto ʼo te fale lotu, neʼe ina taki au ki tuʼa ’i te matapa esite,+ pea neʼe ina fakafuafua te koga meʼa katoa.

16 Neʼe ina fakafuafua te faʼahi esite ʼaki te kaho moʼo fakafuafua.* Neʼe kaho 500 tona loa mai te tahi potu ki te tahi potu.

17 Neʼe ina fakafuafua te faʼahi noleto, ʼae neʼe kaho 500 tona loa ʼo mulimuli pe ki te kaho moʼo fakafuafua.

18 Neʼe ina fakafuafua te faʼahi saute, ʼae neʼe kaho 500 tona loa ʼo mulimuli pe ki te kaho moʼo fakafuafua.

19 Neʼe alu leva ki te faʼahi uesite. Neʼe ina fakafuafua ko kaho ʼe 500 tona loa ʼaki te kaho moʼo fakafuafua.

20 Neʼe ina fakafuafua te ʼu faʼahi ʼe fa. Neʼe ʼi ai te kaupa ʼi tona takafoli+ moʼo vaheʼi te koga meʼa ʼae ʼe taputapu mo te koga meʼa ʼae ʼe mole taputapu.+ Neʼe kaho 500 tona loa mo kaho 500 tona laulahi.+

43 Neʼe taki leva au e te tagata ki te matapa ʼae ʼe haga ki te esite.+ 2 Neʼe au sio ai ki te kololia ʼo te ʼAtua ʼo Iselaele ʼe haʼu mai te esite.+ Neʼe gugulu tona leʼo ohage ko te ʼu vai ʼae ʼe tafe malohi+ pea neʼe malamagia te kele ʼi tona kololia.+ 3 Neʼe hage pe te meʼa ʼae neʼe au sio ki ai ko te meʼa ʼae neʼe ha mai ʼi taku* haʼu ʼo molehi te kolo, ʼo toe feia pe mo te meʼa ʼae neʼe au sio ki ai ʼo ovi ki Kepile.+ Neʼe au punou leva mo tulolo.

4 Neʼe hu te kololia ʼo Sehova ki te fale lotu mai te matapa ʼae ʼe haga ki te esite.+ 5 Neʼe hiki leva au e he laumalie mo fakahu ki te malaʼe ʼae ʼi loto. Pea neʼe au sio ai ki te fale lotu kua fonu ia ʼi te kololia ʼo Sehova.+ 6 Pea neʼe au logo leva ki he tahi ʼe palalau mai mai te fale lotu, pea neʼe haʼu te tagata ʼo tuʼu ʼi ʼoku tafa.+ 7 Neʼe ina* ui mai:

“Foha ʼo te tagata, ʼe tuʼu toku hekaʼaga fakahau+ ʼi te koga meʼa ʼaeni mo hilihili ai ʼoku vaʼe.+ ʼE au nofo ai anai mo te hahaʼi ʼo Iselaele ʼo talu ai.+ ʼE mole toe ʼulihi anai toku huafa taputapu e te hahaʼi ʼo Iselaele,+ pe ʼe ko natou peʼe ko ʼonatou hau, ʼaki tanatou heʼe agatonu* pea ʼaki te ʼu sino mate ʼo ʼonatou hau. 8 Neʼe natou ʼulihi toku huafa taputapu ʼaki te ʼu meʼa fakalialia ʼae neʼe natou fai, ʼi tanatou fakaovi tonatou huʼaga ki toku huʼaga, mo tonatou kaumatapa ki toku kaumatapa, ʼo matou vaha pe ʼi he kaupa.+ Koia neʼe au pulihi ai natou ʼi toku hauhau.+ 9 ʼI te temi nei, ke natou fakamamaʼo ia te au tanatou heʼe agatonu* pea mo te ʼu sino mate ʼo ʼonatou hau, pea ʼe au nofo anai mo natou ʼo talu ai.+

10 “Kae kia koe foha ʼo te tagata, fakamahino te agaaga ʼo te fale lotu ki te hahaʼi ʼo Iselaele,+ ke natou ufiufi ai ʼi ʼanatou hala+ mo natou vakavakaʼi tona pāki. 11 Kapau ʼe natou ufiufi ʼi te ʼu meʼa fuli ʼae neʼe natou fai, fakaha age te pāki ʼo te fale lotu, tona faʼahiga fakaalualu, mo ʼona huʼaga ki tuʼa mo loto.+ Fakaha age kia natou ʼona pāki mo ʼana fakatotonu fuli, ʼona pāki mo ʼona lao fuli, pea ke tohi ʼi ʼonatou muʼa ke vakavakaʼi tona pāki pea mo mulimuli ki ʼana fakatotonu.+ 12 Koʼeni te lao ʼo te fale lotu. ʼE taputapu ʼaupito ia te fenua katoa ʼae ʼe ina takafoli te tumutumu ʼo te moʼuga.+ ʼEi, ko te lao ʼaia ʼo te fale lotu.

13 “Koʼeni te ʼu fakafuafua ʼo te ʼaletale ʼaki te ʼu fasiga nima+ (ʼi te ʼu fasiga nima takitahi ʼe hilifaki ki ai he ʼalofi nima ʼe tahi).* ʼE fasiga nima tahi te maʼoluga ʼo tona tafito pea ʼe fakalaka ʼi he fasiga nima ʼe tahi. ʼI te takafoli ʼo tona tapatapa, ʼe ʼi ai he tahi tapatapa ʼe apane tahi* tona laulahi. Ko te tafito ʼaia ʼo te ʼaletale. 14 ʼI te fuga tafito, ʼe ʼi ai te lua koga ʼe fasiga nima lua pea ʼe fakalaka ʼi he fasiga nima ʼe tahi. ʼI te fuga lua koga, ʼe ʼi ai te tolu koga ʼe fasiga nima fa pea ʼe fakalaka ʼi he fasiga nima ʼe tahi. 15 ʼE fasiga nima fa te maʼoluga ʼo te tafuga afi ʼo te ʼaletale, pea ʼe tuʼu ai te ʼu tala ʼe fa.+ 16 ʼE tapa fa tatau te tafuga afi ʼo te ʼaletale, ʼe fasiga nima 12 tona loa mo fasiga nima 12 tona laulahi.+ 17 ʼE fasiga nima 14 te loa ʼo te ʼu faʼahi ʼe fa ʼo te tolu koga, pea ʼe vaeluaʼi fasiga nima te tapatapa ʼi tona takafoli. ʼE fakalaka te tafito ʼi he fasiga nima ʼe tahi ʼi ʼona faʼahi ʼae ʼe fa.

“Pea ʼe haga ʼona tuʼuga ki te esite.”

18 Pea neʼe ina ui mai: “Foha ʼo te tagata, koʼeni te folafola ʼa te Tuʼi ʼAliki ko Sehova: ‘Koʼeni te ʼu fakatotonu ke mulimuli ki ai moka laga te ʼaletale, ke momoli ai te ʼu holokoseta pea ke afuhi ki ai te toto.’+

19 “ ʼE ui e te Tuʼi ʼAliki ko Sehova: ‘ ʼE ke momoli anai he vitulo kei mui mai te faga manu ko he molaga ʼo te agahala+ ki te kau pelepitelo Levite ʼo te hologa ʼo Satoke,+ ʼae ʼe fakaovi mai moʼoku tauhi. 20 ʼE ke toʼo anai he koga ʼo tona toto ʼo vali ki te ʼu tala ʼe fa ʼo te ʼaletale, mo te ʼu tuliki ʼe fa ʼo te tolu koga pea mo te tapatapa ʼo tona takafoli, moʼo fakamaʼa te ʼaletale ʼo te agahala ʼo ʼuʼufi te ʼu agahala.+ 21 Pea ke toʼo leva te vitulo ʼae kei mui, ia te molaga ʼo te agahala, ke tutu ʼi te koga meʼa ʼo te fale lotu ʼae neʼe fakatuʼutuʼu ki ai ʼi tuʼa ʼo te sagatualio.+ 22 ʼI te ʼaho lua, ʼe ke momoli anai he tao tagata heʼe mele ko he molaga ki te agahala. Pea ʼe fakamaʼa anai te ʼaletale mai te agahala ohage ko tona kua ʼosi fakamaʼa mai te agahala ʼaki te vitulo kei mui.’

23 “ ‘ ʼI tau ʼosi fakamaʼa mai te agahala, ʼe ke momoli anai he vitulo kei mui mai te faga manu ʼe heʼe mele mo he ovi tagata heʼe mele ʼe toʼo mai te faga ovi. 24 ʼE ke momoli anai ia naua kia Sehova, pea ʼe li anai ki ai e te kau pelepitelo he masima+ pea ʼe natou momoli leva ko he holokoseta kia Sehova. 25 Lolotoga ʼaho ʼe fitu, ʼe ke momoli anai ʼi te ʼaho fuli he tao tagata ko he molaga ʼo te agahala,+ ʼo toe feia pe mo he vitulo kei mui mai te faga manu pea mo he ovi tagata ʼe toʼo mai te faga ovi. ʼE ke momoli anai ni manu heʼe mele. 26 Lolotoga ʼaho ʼe fitu, ʼe fai anai ni toʼotoʼoga moʼo ʼuʼufi te ʼu agahala ke fakamaʼa ai te ʼaletale pea ke feala ke fakaʼaogaʼi. 27 ʼI te ʼosi ʼo te ʼu ʼaho ʼaia, ʼo kamata atu ʼi te ʼaho valu,+ ʼe momoli anai e te kau pelepitelo ʼakotou* holokoseta mo ʼakotou sakilifisio ʼo te tokalelei* ʼi te ʼaletale. Pea ʼe kotou fakafiafiaʼi anai ia au,’+ ko te ui ʼaia ʼa te Tuʼi ʼAliki ko Sehova.”

44 Neʼe ina toe taki au ki te matapa ʼae ʼi tuʼa ʼo te sagatualio ʼi te potu esite+ pea neʼe mapunu ia.+ 2 Neʼe ui mai leva e Sehova: “ ʼE tuku mapunu anai te matapa ʼaia. ʼE mole tonu ke avahi pea ʼe mole hu ai anai he tahi. Neʼe hu ai ia Sehova te ʼAtua ʼo Iselaele,+ koia ʼe tuku mapunu anai. 3 Kae ʼe heka ai anai te pule ʼo kai te pane ia muʼa ʼo Sehova+ he ʼe ko te pule. ʼE hu anai ʼi te fakamalumaluʼaga ʼo te matapa pea ʼe toe ulu ai ki tuʼa ʼi te matapa pe ʼaia.”+

4 Neʼe ina taki leva au ʼi te matapa ʼo te potu noleto ʼo kaku ki te muʼa fale lotu. Neʼe au sio ai kua fonu te fale lotu ʼo Sehova ʼi te kololia ʼo Sehova.+ Neʼe au punou ai mo tulolo.+ 5 Pea neʼe ui mai e Sehova: “Foha ʼo te tagata, tokaga fakalelei mo sio, mo fagono lelei kia meʼa fuli ʼe au ui atu ʼo ʼuhiga mo te ʼu fakatotonu pea mo te ʼu lao ʼo te fale lotu ʼo Sehova. Sioʼi fakalelei te huʼaga ʼo te fale lotu pea mo te ʼu huʼaga fuli ʼae ki tuʼa ʼo te sagatualio.+ 6 ʼE tonu anai ke ke ui ki te hahaʼi agatuʼu ʼo Iselaele: ‘Koʼeni te folafola ʼa te Tuʼi ʼAliki ko Sehova: “Hahaʼi ʼo Iselaele, kua au fiu ʼi ʼakotou aga fakalialia! 7 Ka kotou fakahu ki toku sagatualio ni matapule ʼe heʼe silikosisio ʼonatou loto mo ʼonatou kakano, ʼe natou ʼulihi toku fale lotu. ʼE kotou momoli taku pane, mo te gako pea mo te toto, kae kua kotou maumauʼi taku fuakava ʼuhi ko ʼakotou aga fakalialia fuli. 8 ʼA foki la takotou mole tokakaga ki ʼaku meʼa taputapu+ kae neʼe kotou fekauʼi ʼihi ke tokakaga ki te ʼu gaue ʼo toku sagatualio.” ’

9 “ ‘Koʼeni te folafola ʼa te Tuʼi ʼAliki ko Sehova: “ ʼE mole feala anai ke hu ki toku sagatualio he matapule ʼe nofo ʼi Iselaele kae ʼe heʼe silikosisio tona loto mo tona kakano.” ’

10 “ ‘Ko te kau Levite ʼae neʼe lituʼa kia te au+ ʼi te temi ʼae neʼe lituʼa mai ai te kau Iselaele ʼo atolasio ki ʼanatou fakatata fakalialia,* ʼe natou utu anai te ʼu fua kovi ʼo tanatou hala. 11 Pea ʼe natou liliu anai ko ni tagata faifekau ʼo toku sagatualio moʼo leʼoleʼo te ʼu matapa ʼo te fale lotu+ mo fakahoko te gaue ʼo te fale lotu. ʼE natou matehi anai te ʼu holokoseta mo te ʼu sakilifisio maʼa te hahaʼi mo tutuʼu ia muʼa ʼo te hahaʼi moʼonatou tauhi. 12 Neʼe natou tauhi ki te hahaʼi ʼo Iselaele ia muʼa ʼo ʼanatou fakatata fakalialia pea natou liliu ai ko he meʼa fakatupu tukia ʼo natou agahala ai.+ Koia neʼe au hiki ai toku nima ʼo fai he fakapapau: ʼe natou utu anai te ʼu fua kovi ʼo tanatou hala,’ ko te ui ʼaia ʼa te Tuʼi ʼAliki ko Sehova. 13 ‘ ʼE mole natou fakaovi mai anai moʼo fakahoko te gaue fakapelepitelo pea ʼe mole natou toe fakaovi anai ki he meʼa ʼe tahi ʼi ʼaku meʼa taputapu peʼe taputapu ʼaupito. ʼE natou ufiufi anai ʼuhi ko te ʼu meʼa fakalialia ʼae neʼe natou fai. 14 Kae ʼe au fakaliliu anai ia natou ko ni tagata ʼe natou fakahoko ʼonatou maʼua ʼi te fale lotu, ke natou tokakaga ki te ʼu gaue ʼae ʼe pipiki ki ai mo te ʼu meʼa fuli ʼae ʼe tonu ke fai ai.’+

15 “ ʼE ui e te Tuʼi ʼAliki ko Sehova: ‘Kae ki te ʼu pelepitelo Levite, te hologa ʼo Satoke,+ ʼae neʼe natou fakahoko te ʼu gaue ʼae ʼe pipiki ki toku sagatualio ʼi te temi ʼae neʼe lituʼa ai te kau Iselaele kia te au,+ ʼe natou fakaovi mai anai moʼoku tauhi pea mo tutuʼu ʼi ʼoku muʼa moʼo momoli te gako+ mo te toto.+ 16 Ko natou ʼaia ʼe hu anai ki toku sagatualio mo fakaovi ki toku laupapa moʼoku tauhi.+ Pea ʼe natou fakahoko anai ʼonatou maʼua ʼae kia te au.+

17 “ ‘Ka natou hu ʼi te ʼu matapa ʼo te malaʼe ʼae ʼi loto, ʼe tonu anai ke natou tui ni teu lino.+ ʼE mole natou tui anai te ʼu meʼa ʼae ʼe fai ʼaki te fuluʼi ovi moka natou fakahoko te gaue ʼi te ʼu matapa ʼo te malaʼe ʼae ʼi loto peʼe ʼi te loto malaʼe. 18 ʼE natou takai anai ʼonatou ʼulu ʼaki he kie lino pea mo tui he vavaʼe loto lino moʼo ʼuʼufi ʼonatou koga loto.+ ʼE mole natou tui anai he meʼa ʼe fakatupu kavakavahia. 19 ʼI muʼa ʼo tanatou olo ki te malaʼe ʼae ʼi tuʼa, te potu ʼae ʼe nonofo ai te hahaʼi, ʼe natou huʼi anai te ʼu teu ʼae neʼe natou fakahoko ʼaki te gaue+ ʼo tuku ʼi te ʼu fale kai* taputapu.+ ʼE natou fetogi anai ke ʼaua naʼa lave te maʼoniʼoni ʼo ʼonatou teu ki te hahaʼi. 20 ʼE mole tonu anai ke natou tele ʼonatou ʼulu+ peʼe tuku ke loloa. ʼE tonu anai ke natou kosi. 21 ʼE mole inu vino anai te kau pelepitelo moka natou hu ki te malaʼe ʼae ʼi loto.+ 22 ʼE mole natou ʼohoana anai mo he fafine vitua peʼe ko he fafine kua mavete mo tona ʼohoana.+ Kae ʼe feala anai ke natou ʼohoana mo he taʼahine kei taupoʼou ʼo te hologa ʼo Iselaele, peʼe ko he fafine neʼe ʼohoana mo he pelepitelo kua mate.’+

23 “ ‘ ʼE natou akoʼi anai ki taku hahaʼi te kehekehe ʼo te meʼa ʼae ʼe taputapu mo te meʼa ʼae ʼe mole taputapu. Pea ʼe natou toe akoʼi age anai te kehekehe ʼo te meʼa ʼae ʼe heʼe maʼa mo te meʼa ʼae ʼe maʼa.+ 24 Ka hoko he faifakamau ʼe natou liliu anai ko ni tuʼi fakamau.+ ʼE natou faifakamau anai ʼo mulimuli ki ʼaku lekula.+ ʼE natou fakalogo anai ki ʼaku lao mo ʼaku fakatotonu ʼo ʼuhiga mo ʼoku ʼaho lalahi fuli+ pea ʼe natou fakamaʼoniʼoniʼi anai ʼaku sapato. 25 ʼE mole natou fakaovi anai ki he tahi kua mate naʼa natou heʼe maʼa. Kae ʼe feala anai hanatou heʼe maʼa mo kapau ko hanatou tamai, hanatou faʼe, honatou foha, honatou ʼofafine, honatou tehina peʼe tokolua heʼeki ʼohoana.+ 26 ʼI te ʼosi fakamaʼa ʼo he pelepitelo, ʼe tonu anai ke talitali ia ʼaho ʼe fitu. 27 ʼI te ʼaho ʼae ʼe hu ai anai ki te koga meʼa taputapu, ʼi te malaʼe ʼae ʼi loto, moʼo fakahoko tana gaue ʼi te koga meʼa taputapu, ʼe ina momoli anai tana molaga ʼo te agahala,’+ ko te ui ʼaia ʼa te Tuʼi ʼAliki ko Sehova.

28 “ ‘Pea koʼeni tonatou tofiʼa: ko au tonatou tofiʼa.+ ʼE mole kotou foaki age anai he kele ʼi Iselaele, he ʼe ko au tonatou tofiʼa. 29 Ko natou ʼae ka natou kai te molaga meʼa kai,+ mo te molaga ʼo te agahala pea mo te sakilifisio fakatokatoka.+ Pea ʼe foaki anai maʼa natou te ʼu meʼa fuli ʼae neʼe tuku keheʼi* ki te ʼAtua ʼi Iselaele.+ 30 ʼE maʼu anai e te kau pelepitelo te ʼu ʼuluaki fua fuli ʼe lelei tukupau ʼo ʼakotou taʼukai, pea mo ʼakotou meʼa ʼofa kehekehe fuli.+ ʼE kotou toe foaki anai ki te pelepitelo takotou ʼuluaki falena.+ Pea ʼe maʼu tapuakina anai ʼokotou famili.+ 31 ʼE mole kai anai e te kau pelepitelo he manulele peʼe ko he faʼahiga manu pe ʼe maʼu atu kua mate pe neʼe hae.’+

45 “ ‘Ka kotou vaevae te fenua ʼo foaki ko he tofiʼa,+ ʼe kotou momoli anai he vahe taputapu ko he meʼa ʼofa kia Sehova ʼe toʼo mai te fenua.+ ʼE fasiga nima* 25 000 anai tona loa mo fasiga nima 10 000 tona laulahi.+ Ko he vahe taputapu anai te koga fenua katoa ʼaia. 2 ʼI loto ʼo te fakafuafua ʼaia, ʼe ʼi ai anai he koga meʼa taputapu ʼe tapa fa tatau, ʼe fasiga nima 500 ki te fasiga nima 500*+ mo ʼona koga meʼa lunaʼia ʼe fasiga nima 50 tona laulahi ʼi ʼona faʼahi takitahi.+ 3 Pea ʼi te kele ʼaia neʼe fakafuafua, ʼae ʼe 25 000 tona loa mo 10 000 tona laulahi, ʼe tuʼu ai anai te sagatualio, ko he meʼa ʼe taputapu ʼaupito. 4 ʼE ko he koga meʼa taputapu anai ʼo te fenua maʼa te kau pelepitelo,+ te kau faifekau ʼo te sagatualio ʼae ʼe fakaovi kia Sehova moʼona tauhi.+ ʼE ko he koga meʼa anai ki ʼonatou ʼapi mo he koga meʼa taputapu ki te sagatualio.

5 “ ‘ ʼE ʼi ai anai he vahe ʼe fasiga nima 25 000 tona loa mo fasiga nima 10 000 tona laulahi maʼa te kau Levite,+ te kau faifekau ʼo te fale lotu. Pea ʼe natou maʼu anai maʼa natou ni fale kai ʼe 20.+

6 “ ‘ ʼE kotou foaki anai maʼa te kolo he vahe ʼe fasiga nima 25 000 tona loa (ʼe tatau mo te meʼa ʼofa taputapu) mo fasiga nima 5 000 tona laulahi.+ ʼE maʼu anai ia e te hahaʼi katoa ʼo Iselaele.

7 “ ‘ ʼE maʼu anai e te pule hona kele ʼi te ʼu faʼahi lualua ʼo te meʼa ʼofa taputapu pea ʼi te ʼu faʼahi lualua ʼo te vahe ʼae neʼe foaki maʼa te kolo. ʼE tuʼu anai ia tafa ʼo te meʼa ʼofa taputapu pea mo te vahe ʼae ʼe maʼu e te kolo. ʼE tuʼu anai ia ʼi te potu uesite mo te potu esite. ʼE tatau anai tona loa mo te loa ʼo te vahe ʼae ʼo te tahi telepi, mai tona tuʼakoi uesite ki tona tuʼakoi esite.+ 8 ʼE ina maʼu anai te kele ʼaia ʼi Iselaele. ʼE mole toe gaohi koviʼi anai taku hahaʼi e ʼoku pule+ pea ʼe natou foaki anai te fenua ki te hahaʼi ʼo Iselaele. Pea ʼe tahi maʼu anai e te telepi tona vahe.’+

9 “Koʼeni te folafola ʼa te Tuʼi ʼAliki ko Sehova: ‘ ʼU pule ʼo Iselaele, kua feʼauga!’

“ ‘Tuku la ʼakotou agamalohi mo agakovi, kae kotou fai te meʼa ʼae ʼe lelei mo totonu.+ Tuku la takotou kaihaʼa te ʼu koloa ʼo taku hahaʼi,’+ ko te ui ʼaia ʼa te Tuʼi ʼAliki ko Sehova. 10 ‘Kotou fakaʼaogaʼi ni meʼa fua ʼe totonu, he efa* ʼe totonu mo he pate* ʼe totonu.+ 11 ʼE tatau anai te efa mo te pate. ʼE fakaʼuhiga anai te pate ki he vahe tahi ki te hogofulu ʼo he homele.* Pea ʼe fakaʼuhiga anai te efa ki he vahe tahi ki te hogofulu ʼo he homele. ʼE mulimuli anai te ʼu fakafuafua ʼaia ki te homele. 12 Ko he sikele*+ ko kela* ʼe 20. Pea ka fakatahiʼi ni sikele ʼe 20, mo sikele ʼe 25, mo sikele ʼe 15, ko he mane* ʼe tahi maʼa koutou.’

13 “ ‘Koʼeni te meʼa ʼofa ʼae ka kotou foaki: ko he vahe tahi ki te ono ʼo te efa ʼi he homele fulumeto ʼe tahi pea mo he vahe tahi ki te ono ʼo te efa ʼi he homele olose ʼe tahi. 14 ʼE mulimuli te fakafuafua ʼo te lolo ki te pate. Ko te vahe tahi ki te hogofulu ʼo he kole* ko te pate ʼe tahi. Pea ko he homele ʼe tahi ko pate ʼe hogofulu koteʼuhi ʼe fakaʼuhiga ni pate ʼe hogofulu ki he homele ʼe tahi. 15 ʼE foaki anai he ovi ʼe tahi ʼi te faga ovi ʼe 200 ʼo Iselaele. ʼE fakaʼaogaʼi fuli anai ki te molaga meʼa kai,+ mo te holokoseta,+ mo te ʼu sakilifisio ʼo te tokalelei,+ ki te fakamolemole ʼo te ʼu agahala ʼa te hahaʼi,’+ ko te ui ʼaia ʼa te Tuʼi ʼAliki ko Sehova.

16 “ ‘ ʼE foaki anai e te hahaʼi fuli ʼo te fenua te meʼa ʼofa ʼaia+ ki te pule ʼae ʼi Iselaele. 17 Kae ko te pule ʼae ka tokaga ki te ʼu holokoseta,+ mo te molaga meʼa kai,+ mo te molaga vino, ʼi te ʼu ʼaho lalahi,+ mo te ʼu tuʼu afiafi ʼo te mahina, mo te ʼu Sapato+ pea mo te ʼu ʼaho lalahi fuli ʼae kua fakatuʼutuʼu ki te hahaʼi ʼo Iselaele.+ Ko ia ʼae ka ina foaki te molaga ʼo te agahala, mo te molaga meʼa kai, mo te holokoseta pea mo te ʼu sakilifisio ʼo te tokalelei ki te fakamolemole ʼo te ʼu agahala ʼa te hahaʼi ʼo Iselaele.’

18 “Koʼeni te folafola ʼa te Tuʼi ʼAliki ko Sehova: ‘ ʼI te ʼuluaki ʼaho ʼo te ʼuluaki mahina, ʼe ke toʼo anai he vitulo kei mui mo heʼe mele mai te faga manu pea ʼe ke fakamaʼa anai te sagatualio mai te agahala.+ 19 ʼE toʼo anai e te pelepitelo he koga ʼo te toto ʼo te molaga ʼo te agahala, ʼo ina vali ki te ʼu kaumatapa ʼo te fale lotu,+ mo te ʼu tuliki ʼe fa ʼo te tolu koga ʼo te ʼaletale, pea mo te ʼu kaumatapa ʼo te matapa ʼo te malaʼe ʼae ʼi loto. 20 ʼE ke toe fai feia pe anai ʼi te ʼaho fitu ʼo te mahina ki he tahi pe ʼe agahala, he neʼe faihala pe neʼe mole ina iloʼi.+ ʼE tonu anai ke kotou fakamaʼa te fale lotu.+

21 “ ‘ ʼI te ʼaho 14 ʼo te ʼuluaki mahina, ʼe kotou fai anai te ʼaho lahi ʼo te Pasikate.*+ ʼE kai ai anai ni pane ʼe hala fakatupu ia ʼaho ʼe fitu.+ 22 ʼI te ʼaho ʼaia, ʼe foaki anai e te pule he vitulo kei mui ko he molaga ʼo te agahala maʼa ia pea mo te hahaʼi fuli ʼo te fenua.+ 23 ʼI te ʼu ʼaho ʼaia ʼe fitu ʼo te ʼaho lahi, ʼe ina foaki anai ʼi te ʼaho fuli he holokoseta maʼa Sehova ko ni vitulo kei mui ʼe fitu ʼe heʼe mele, mo ni ovi tagata ʼe fitu ʼe heʼe mele,+ ʼo toe feia pe mo he molaga ʼo te agahala ko he tao tagata. 24 ʼE ina toe foaki anai he efa ʼe tahi ki te ʼu vitulo kei mui takitahi pea mo he efa ʼe tahi ki te ʼu ovi tagata takitahi ohage ko he molaga meʼa kai, ʼo toe feia pe mo he hine* lolo ʼe tahi ki he efa ʼe tahi.

25 “ ‘ ʼI te ʼaho 15 ʼo te mahina fitu, ʼe feia pe anai tana fai ʼi te ʼu ʼaho ʼe fitu ʼo te ʼaho lahi+ ʼo ʼuhiga mo te molaga ʼo te agahala, mo te holokoseta, mo te molaga meʼa kai pea mo te lolo.’ ”

46 “Koʼeni te folafola ʼa te Tuʼi ʼAliki ko Sehova: ‘ ʼE pupunu anai te matapa ʼo te malaʼe ʼae ʼi loto ʼo te potu esite+ ʼi te ʼu ʼaho gaue ʼae ʼe ono,+ kae ʼe ava anai ʼi te ʼaho ʼo te Sapato mo te ʼaho ʼo te tuʼu afiafi ʼo te mahina. 2 ʼE haʼu anai te pule mai te malaʼe ʼae ʼi tuʼa, ʼo hu ʼi te fakamalumaluʼaga ʼo te matapa+ pea ʼe tuʼu ovi anai ki te kaumatapa. ʼE momoli anai e te kau pelepitelo ia tana holokoseta mo ʼana sakilifisio ʼo te tokalelei. ʼE tulolo anai ʼi te huʼaga, pea hoki alu ai leva ki tuʼa. Kae ʼe mole pupunu anai te matapa ia muʼa ʼo te afiafi. 3 ʼE toe tulolo anai mo te hahaʼi ʼo te fenua ia muʼa ʼo Sehova ʼi te huʼaga ʼo te matapa ʼaia ʼi te ʼu ʼaho ʼo te Sapato peʼe ʼo te tuʼu afiafi ʼo te mahina.+

4 “ ‘ ʼE momoli anai e te pule ia tana holokoseta kia Sehova ʼi te ʼaho ʼo te Sapato, ko ni akeno ʼe ono ʼe heʼe mele mo he ovi tagata ʼe heʼe mele.+ 5 ʼE momoli fakatahi anai te ovi tagata mo tana molaga meʼa kai, ko he efa* ʼe tahi pea mo te meʼa ʼae ʼe feala ke ina momoli ʼaki te ʼu akeno mo foaki he hine* lolo ʼe tahi ki te efa ʼe tahi.+ 6 ʼI te ʼaho ʼo te tuʼu afiafi ʼo te mahina, ʼe momoli anai he vitulo kei mui mo heʼe mele mai te faga manu, mo akeno ʼe ono pea mo he ovi tagata. Ko ni manu ʼe heʼe mele.+ 7 ʼE ina momoli anai he molaga meʼa kai ʼo he efa ʼe tahi ki te vitulo kei mui, he efa ʼe tahi ki te ovi tagata pea mo te meʼa ʼae ʼe ina lavaʼi ki te ʼu akeno. Pea ʼe ina momoli anai he hine lolo ʼe tahi ki te efa ʼe tahi.

8 “ ‘ ʼE hu anai te pule ʼi te fakamalumaluʼaga ʼo te matapa pea ʼe toe hu anai ki tuʼa ʼi te matapa pe ʼaia.+ 9 Pea ka ʼomai te hahaʼi ʼo te fenua kia muʼa ʼo Sehova ʼi te ʼu ʼaho lalahi,+ ko natou ʼae ʼe hu ʼi te matapa ʼo te potu noleto+ moʼo atolasio kia te ia, ʼe natou feulufi anai ki tuʼa ʼi te matapa ʼo te potu saute.+ Pea ko natou ʼae ʼe hu mai ki loto ʼi te matapa ʼo te potu saute, ʼe natou feulufi anai ki tuʼa ʼi te matapa ʼo te potu noleto. ʼE mole toe alu anai he tahi ia natou ʼi te matapa ʼae neʼe hu mai ai ki loto, koteʼuhi ʼe natou feulufi anai ki tuʼa ʼi te matapa ʼae ʼe haga mai kia natou. 10 ʼE fakatahi anai te pule mo natou, pea ʼe hoki hu anai ki loto moka natou feulufi ki loto mo hu ki tuʼa moka natou feulufi ki tuʼa. 11 ʼI te ʼu ʼaho lalahi pea mo te ʼu fakatahi taputapu, ʼe ina momoli anai he molaga meʼa kai ko he efa ʼe tahi ki te vitulo kei mui, he efa ʼe tahi ki te ovi tagata, pea mo te meʼa ʼae ʼe ina lavaʼi ki te ʼu akeno. Pea ʼe ina toe momoli anai he hine lolo ʼe tahi ki te efa ʼe tahi.+

12 “ ‘Kapau ʼe momoli e te pule hana holokoseta+ peʼe ko ni sakilifisio ʼo te tokalelei ko he molaga ʼe ina fai ʼaki he lotolelei maʼa Sehova, ʼe avahi anai ki ai te matapa ʼo te potu esite, pea ʼe ina momoli anai tana holokoseta mo ʼana sakilifisio ʼo te tokalelei ohage pe ko tana fai ʼi te ʼaho ʼo te Sapato.+ Pea ka mavae leva ʼe pupunu anai te matapa.+

13 “ ‘ ʼI te ʼaho fuli, ʼe ke momoli anai he holokoseta maʼa Sehova, ko he akeno ʼe heʼe mele ʼe taʼu tahi.+ ʼE ke fai anai te faʼahi ʼaia ʼi te uhu fuli. 14 ʼE ke toe momoli anai ʼi te uhu fuli he molaga meʼa kai, ko he vahe tahi ki te ono ʼo he efa, mo he vahe tahi ki te tolu ʼo he hine lolo ʼo liligi ki te falena lelei. Ko he molaga meʼa kai ʼe momoli tuʼumaʼu anai maʼa Sehova. ʼE ko he lao ʼo talu ai. 15 ʼI te uhu fuli, ʼe momoli anai te akeno, te molaga meʼa kai pea mo te lolo, ko he holokoseta ʼe fai tuʼumaʼu.’

16 “Koʼeni te folafola ʼa te Tuʼi ʼAliki ko Sehova: ‘Kapau ʼe foaki e te pule ki ʼona foha takitahi he kele ko he tofiʼa, ʼe maʼu anai e ʼona foha te meʼa ʼofa ʼaia. Ko tonatou tofiʼa ʼaia. 17 Kae kapau ʼe ina foaki he meʼa ʼofa ʼi tona tofiʼa ki hana tagata faifekau, ʼe maʼu anai e te tagata faifekau te meʼa ʼofa ʼaia ʼo kaku ki te taʼu ʼae ʼe tala ai te ʼateaina,+ pea ʼosi ʼaia ʼe toe maʼu anai e te pule. ʼE gata pe anai ki ʼona foha ʼae ʼe feala ke natou maʼu ʼo talu ai ia tonatou tofiʼa. 18 ʼE mole toʼo anai e te pule he meʼa ʼi te tofiʼa ʼa te hahaʼi. ʼE mole ina fakamaʼua anai te hahaʼi ke natou mavae ʼi ʼonatou kele. ʼE ina foaki anai ki ʼona foha he tofiʼa ʼi te ʼu meʼa ʼae ʼe ina maʼu, ke mole kapu ai he tahi ʼi taku hahaʼi mai tona kele.’ ”

19 Pea neʼe ina fakahu au ʼi te huʼaga+ ʼae ia tafa ʼo te matapa ʼae ʼe alu ki te ʼu fale kai taputapu ʼa te kau pelepitelo, te ʼu fale ʼae ʼe haga ki te potu noleto.+ Pea neʼe au sio ai ki he koga meʼa ʼi te taupotu, ʼi te potu uesite. 20 Neʼe ina ui mai: “ ʼE haka anai e te kau pelepitelo ʼi te koga meʼa ʼaia te sakilifisio fakatokatoka, mo te molaga ʼo te agahala. Pea ʼe natou fakamoho ai anai te molaga meʼa kai+ ke mole natou ʼave he meʼa ki te malaʼe ʼae ʼi tuʼa, naʼa lave te taputapu ʼo te ʼu meʼa ʼaia ki te hahaʼi.”+

21 Neʼe ina taki au ki te malaʼe ʼae ʼi tuʼa mo ʼave au ki te ʼu tuliki ʼe fa ʼo te malaʼe, pea neʼe au sio leva neʼe ʼi ai te malaʼe ʼi te ʼu tuliki takitahi ʼo te malaʼe ʼae ʼi tuʼa. 22 ʼI te ʼu tuliki ʼe fa ʼo te malaʼe, neʼe toe ʼi ai te ʼu kiʼi malaʼe, neʼe fasiga nima* 40 tona loa mo fasiga nima 30 tona laulahi. Neʼe tatau te ʼu fakafuafua ʼo te ʼu malaʼe ʼaia ʼe fa. 23 ʼI te takafoli ʼo te ʼu malaʼe ʼe fa, neʼe ʼi ai te ʼu tapatapa pea ʼi te ʼu lalo tapatapa ʼaia neʼe teuteuʼi ni koga meʼa moʼo fakamoho ai te ʼu molaga. 24 Neʼe ina ui mai leva: “ ʼE fakamoho e te ʼu tagata faifekau ʼo te fale lotu ia te ʼu sakilifisio ʼa te hahaʼi ʼi te ʼu koga meʼa ʼaia.”+

47 Neʼe ina toe taki au ki te huʼaga ʼo te fale lotu.+ ʼI te potu ʼaia, neʼe au sio ki te tafe mai ʼo te vai mai te lalo huʼaga ʼo te fale lotu ki te potu esite.+ ʼEi, neʼe tuʼu te huʼaga ʼo te fale lotu ʼi te potu esite. Neʼe tafe mai te vai mai te lalo fale lotu, ʼi te faʼahi mataʼu, pea neʼe tafe ki te potu saute ʼo te ʼaletale.

2 Neʼe ina ʼave leva au ki tuʼa ʼi te matapa ʼo te potu noleto+ pea neʼe ina fakafoliʼi au ʼi tuʼa ʼo kaku ki te matapa ʼae ʼe haga ki te potu esite.+ Neʼe au sio ai ki te tafe mai ʼo te vai ʼi te faʼahi mataʼu.

3 ʼI te alu ʼa te tagata ki te potu esite mo he maea ʼi tona nima,+ neʼe ina fakafuafua fasiga nima* ʼe 1 000 pea neʼe ina taki au ke au fakalaka ʼi te vai ʼae neʼe kaku ki ʼoku ponaʼi vaʼe.

4 Neʼe ina toe fakafuafua te tahi ʼu fasiga nima ʼe 1 000 pea neʼe ina taki au ke au fakalaka ʼi te vai ʼae neʼe kaku ki ʼoku tuli.

Neʼe ina toe fakafuafua te tahi ʼu fasiga nima ʼe 1 000 pea neʼe ina taki au ke au fakalaka ʼi te vai ʼae neʼe kaku ki toku koga loto.

5 Neʼe ina toe fakafuafua te tahi ʼu fasiga nima ʼe 1 000 pea neʼe kua liliu ia ko he vai tafe ʼe mole feala ke au fakalaka ai, koteʼuhi ʼi te loloto ʼo te vai neʼe tonu ke au kāuga. Neʼe ko he vai tafe neʼe mole feala ke fakalaka lalo ai.

6 Neʼe ina fehuʼi mai: “Foha ʼo te tagata, neʼe ke sio ki te meʼa ʼaia?”

Pea neʼe ina taki au ʼo toe ʼaumai ki te kauvai ʼo te vai tafe. 7 ʼI taku toe liliu mai, neʼe au sio ai ki ni tuʼuga fuʼu ʼakau ʼi te ʼu kauvai ʼe lua ʼo te vai tafe.+ 8 Neʼe ina ui mai leva: “ ʼE tafe te vai ʼaeni ki te koga meʼa ʼo te potu esite, ʼe hifo ki te Alapa+ ʼo tau ki te tai. Pea ka kaku ki te tai+ ʼe faitoʼo ai te tai. 9 ʼE maʼuʼuli anai ni meʼa maʼuli ʼi te ʼu potu fuli ʼae ʼe tafe ai te vai. ʼE lahi anai ni faʼahiga ika kehekehe he ʼe tafe ai te vai. ʼE faitoʼo anai te tai ʼo maʼuli ai ia meʼa fuli ʼi he potu pe ʼe tafe ai.

10 “ ʼE tutuʼu anai te kau gelu ʼi te kauvai mai Ene-keti+ ʼo kaku ki Ene-ekalaimi, te koga meʼa ʼae ʼe fakamoamoa ai te ʼu kupega. ʼE lahi anai ni faʼahiga ika kehekehe ohage ko te ʼu ika ʼo te Tai Lahi.*+

11 “ ʼE ʼi ai anai ni foʼi vai, kae ʼe mole faitoʼo anai ia. ʼE kona pe ia.+

12 “ ʼE homo anai ʼi te ʼu kauvai ʼe lua ʼo te vai tafe ni faʼahiga fuʼu ʼakau kehekehe ʼe maʼu ai te meʼa kai. ʼE mole fefe anai ʼonatou lau pea ʼe natou foaki tuʼumaʼu anai ʼanatou taʼukai fuli. ʼI te mahina fuli ʼe natou maʼu anai ni fua foʼou he ʼe fakapala e te vai ʼae ʼe tafe mai te sagatualio.+ ʼE fakaʼaogaʼi anai ʼonatou fua ko he meʼa kai pea ko ʼonatou lau ko he faitoʼo.”+

13 Koʼeni te folafola ʼa te Tuʼi ʼAliki ko Sehova: “Koʼeni te fenua ʼae ka kotou foaki ko he tofiʼa ki te ʼu telepi ʼe 12 ʼo Iselaele, pea ʼe vahe lua anai ia Sosefo.+ 14 Ko tokotou tofiʼa ʼaia pea ʼe kotou vahe fakatatau anai. Neʼe au fakapapau ke au foaki te fenua ʼaeni ki ʼakotou kui,+ pea ʼi te temi nei ʼe foaki atu kia koutou te fenua ʼaeni ko he tofiʼa.

15 “Koʼeni te tuʼakoi ʼo te fenua ʼi te potu noleto: ʼE kamata mai te Tai Lahi ʼo alu ʼi te ala ʼo Heteloni+ ki Setate,+ 16 mo Hamate,+ mo Pelota+ pea mo Sipalaimi ʼae ʼi te vaha ʼo te fenua ʼo Tamaso pea mo ʼae ʼo Hamate ʼo kaku ki Hatesele-hatikoni ʼae ʼe ovi ki te tuʼakoi ʼo Havalani.+ 17 Koia ʼe alu anai te tuʼakoi ʼo te tai ʼo kaku ki Hatesale-enoni,+ mai te tuʼakoi ʼo te fenua ʼo Tamaso ʼi te potu noleto pea mo te tuʼakoi ʼo te fenua ʼo Hamate.+ ʼE ko te tuʼakoi ʼaia ʼo te potu noleto.

18 “ ʼE fakalaka te tuʼakoi ʼo te potu esite ʼi te vaha ʼo Havalani mo Tamaso, pea ʼi te tafaʼaki ʼo te Solotane ʼi te vaha ʼo Kileate+ pea mo te fenua ʼo Iselaele. ʼE kotou fakafuafua anai mai te tuʼakoi ʼo kaku ki te tai ʼae ʼe tuʼu ʼi te potu esite.* ʼE ko te tuʼakoi ʼaia ʼo te potu esite.

19 “ ʼE alu anai te tuʼakoi ʼo te potu saute mai Tamale ʼo kaku ki te ʼu vai ʼo Melipa-katesi,+ ʼo kaku ki te Vai Tafe* pea mo kaku ki te Tai Lahi.+ ʼE ko te tuʼakoi ʼaia ʼo te potu saute.

20 “ ʼI te potu uesite ʼe tuʼu ai te Tai Lahi, mai te tuʼakoi ʼo kaku ki he koga meʼa ʼe haga ki Lepo-hamate.*+ ʼE ko te tuʼakoi ʼaia ʼo te potu uesite.”

21 “ ʼE tonu anai ke kotou vaevae te fenua ʼaeni ia koutou, ia te ʼu telepi ʼe 12 ʼo Iselaele. 22 ʼE kotou vavae anai te fenua ko he tofiʼa ia koutou mo te kau matapule ʼae ʼe nonofo mo koutou, pea neʼe maʼu fanau ʼi tanatou maʼuʼuli ʼae mo koutou. ʼE natou hage anai kia koutou ko ni kau Iselaele. ʼE natou maʼu tofiʼa anai ohage pe ko koutou ʼi te ʼu telepi ʼo Iselaele. 23 ʼE kotou foaki anai ki te matapule he tofiʼa ʼi te fenua ʼo te telepi ʼae kua nofo ai,” ko te ui ʼaia ʼa te Tuʼi ʼAliki ko Sehova.

48 “Koʼeni te ʼu higoa ʼo te ʼu telepi ʼae ʼe kamata mai te potu taupotu ʼo te potu noleto: ʼE alu te vahe ʼo Tane+ ʼi te ala ʼo Heteloni ʼo kaku ki Lepo-hamate,*+ mo alu ai ʼo kaku ki Hatesale-enani ʼi te tuʼakoi ʼo te kele ʼo Tamaso ʼi te potu noleto ia tafa ʼo Hamate.+ ʼE kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 2 ʼE pipiki te vahe ʼo Asele+ ki te vahe ʼo Tane, pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 3 ʼE pipiki te vahe ʼo Nefetali+ ki te vahe ʼo Asele, pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 4 ʼE pipiki te vahe ʼo Manase+ ki te vahe ʼo Nefetali, pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 5 ʼE pipiki te vahe ʼo Efalaimi ki te vahe ʼo Manase,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 6 ʼE pipiki te vahe ʼo Lupeni ki te vahe ʼo Efalaimi,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 7 ʼE pipiki te vahe ʼo Suta ki te vahe ʼo Lupeni,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 8 ʼE kotou toʼo anai he meʼa ʼofa ʼe fasiga nima* 25 000 tona laulahi,+ ʼi te tuʼakoi ʼo Suta mai te tuʼakoi ʼo te potu esite ʼo kaku ki te tuʼakoi ʼo te potu uesite. ʼE tatau anai te loa ʼo ʼona tuʼakoi mo te ʼu vahe ʼo te ʼu telepi ʼae ʼe pipiki ki ai, mai te tuʼakoi ʼo tona potu esite ʼo kaku ki te tuʼakoi ʼo tona potu uesite. ʼE tuʼu anai te sagatualio ʼi tona lotomalie.

9 “Ko te meʼa ʼofa ʼae ka kotou toʼo maʼa Sehova ʼe fasiga nima 25 000 tona loa, mo fasiga nima 10 000 tona laulahi. 10 ʼE ko he meʼa ʼofa taputapu anai maʼa te kau pelepitelo.+ ʼE fasiga nima 25 000 anai ʼi te potu noleto, mo fasiga nima 10 000 ʼi te potu uesite, mo fasiga nima 10 000 ʼi te potu esite pea mo fasiga nima 25 000 ʼi te potu saute. ʼE tuʼu anai te sagatualio ʼo Sehova ʼi tona lotomalie. 11 ʼE maʼu anai te vahe ʼaia e te kau pelepitelo ʼae kua fakamaʼoniʼoniʼi ʼo te hologa ʼo Satoke.+ Neʼe natou fakahoko ʼonatou maʼua kia te au pea neʼe mole natou fakamamaʼo mai te meʼa ʼae ʼe lelei ʼi te temi ʼae neʼe fakamamaʼo ai te kau Iselaele mo te kau Levite mai te meʼa ʼae ʼe lelei.+ 12 ʼE natou maʼu anai he vahe ʼi te meʼa ʼofa ʼae neʼe toʼo ʼi te fenua ke liliu ko he meʼa ʼe taputapu ʼaupito. ʼE pipiki anai ki te kele ʼo te kau Levite.

13 “Ia tafa pe ʼo te kele ʼo te kau pelepitelo ʼe maʼu anai e te kau Levite honatou vahe ʼe fasiga nima 25 000 tona loa, mo fasiga nima 10 000 tona laulahi. (ʼE fasiga nima 25 000 anai tona loa katoa mo fasiga nima 10 000 tona laulahi katoa.) 14 ʼE mole tonu anai ke natou fakatau, peʼe fetogi, peʼe foaki ia te vahe ʼaia, ʼae ʼe lelei tukupau ʼo te fenua, he ʼe ko he meʼa taputapu ia maʼa Sehova.

15 “Ko te koga ʼae ʼe kei toe, ʼae ʼe fasiga nima 5 000 tona laulahi ia tafa ʼo te tuʼakoi ʼae ʼe fasiga nima 25 000, ʼe fakaʼaogaʼi anai ki te ʼu gaue mahani ʼo te kolo,+ mo te ʼu nofoʼaga pea mo te ʼu koga meʼa lunaʼia. ʼE tuʼu anai te kolo ʼi tona lotomalie.+ 16 Koʼeni te ʼu fakafuafua ʼo te kolo: ʼE fasiga nima 4 500 te tuʼakoi ʼo te potu noleto, mo fasiga nima 4 500 te tuʼakoi ʼo te potu saute, mo fasiga nima 4 500 te tuʼakoi ʼo te potu esite, pea mo fasiga nima 4 500 te tuʼakoi ʼo te potu uesite. 17 ʼE fasiga nima 250 anai te ʼu koga meʼa lunaʼia ʼo te kolo ʼi te potu noleto, mo fasiga nima 250 ʼi te potu saute, mo fasiga nima 250 ʼi te potu esite pea mo fasiga nima 250 ʼi te potu uesite.

18 “ ʼE tatau anai te loa ʼo te vahe ʼae ʼe kei toe mo te meʼa ʼofa taputapu,+ ʼe fasiga nima 10 000 anai te koga kele ʼae ʼi te potu esite, mo fasiga nima 10 000 te koga kele ʼae ʼi te potu uesite. ʼE tatau anai mo te loa ʼo te meʼa ʼofa taputapu, ʼe fakaʼaogaʼi anai te ʼu fua ʼo te ʼu koga kele ʼe lua ko he meʼa kai kia natou ʼae ʼe gaue maʼa te kolo. 19 ʼE gaueʼi anai e natou ʼae ʼe gaue maʼa te kolo pea ʼe ʼomai mai te ʼu telepi fuli ʼo Iselaele.+

20 “ ʼE tapa fa tatau te meʼa ʼofa katoa ʼae ʼe fasiga nima 25 000 ʼona faʼahi takitahi. ʼE tonu anai ke kotou tuku keheʼi ko he meʼa ʼofa taputapu ʼo feia pe mo te ʼu kele ʼae ʼe maʼu e te kolo.

21 “ ʼE maʼu anai e te pule te meʼa ʼae ʼe toe ʼi te ʼu faʼahi lualua ʼo te meʼa ʼofa taputapu pea mo te ʼu faʼahi lualua ʼo te ʼu kele ʼae ʼe maʼu e te kolo.+ ʼE tuʼu anai te koga ʼaia ʼi te ʼu tuʼakoi ʼe fasiga nima 25 000 tona loa ʼae ʼe tuʼu ʼi te potu esite mo te potu uesite ʼo te meʼa ʼofa. ʼE tatau anai te tuʼakoi ʼo te kele ʼo te pule pea mo te ʼu tuʼakoi ʼo te kele ʼo te ʼu telepi. ʼE tuʼu anai te meʼa ʼofa taputapu pea mo te sagatualio ʼo te fale lotu ʼi tona lotomalie.

22 “ ʼE tuʼu anai te ʼu kele ʼa te kau Levite mo te ʼu kele ʼo te kolo ʼi te vaha ʼo te ʼu faʼahi ʼe lua ʼae ʼe maʼu e te pule. ʼE tuʼu anai te kele ʼo te pule ʼi te vaha ʼo te tuʼakoi ʼo Suta+ mo te tuʼakoi ʼo Pesamino.

23 “Ki te ʼu telepi leva ʼae, ʼe kamata te vahe ʼo Pesamino mai te tuʼakoi ʼo te potu esite ʼo kaku ki te tuʼakoi ʼo te potu uesite.+ 24 ʼE pipiki te vahe ʼo Simeone ki te vahe ʼo Pesamino,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 25 ʼE pipiki te vahe ʼo Isakale+ ki te vahe ʼo Simeone, pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 26 ʼE pipiki te vahe ʼo Sepulone ki te vahe ʼo Isakale,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite.+ 27 ʼE pipiki te vahe ʼo Kate ki te vahe ʼo Sepulone,+ pea ʼe kamata mai te tuʼakoi ʼo te potu esite ʼo kaku ki te tuʼakoi ʼo te potu uesite. 28 ʼE pipiki te tuʼakoi ʼo te potu saute ki te tuʼakoi ʼo Kate pea ʼe kamata anai ʼi Tamale+ ʼo kaku ki te ʼu vai ʼo Melipa-katesi+ ʼo alu ai ki te Vai Tafe*+ ʼo kaku ki te Tai Lahi.*

29 “Ko te vahe ʼaia ʼo te fenua ʼae ka kotou foaki ko he tofiʼa ki te ʼu telepi ʼo Iselaele,+ pea ko ʼonatou vahe ʼaia,”+ ko te ui ʼaia ʼa te Tuʼi ʼAliki ko Sehova.

30 “Koʼeni te ʼu huʼaga ki tuʼa ʼo te kolo: ʼE fasiga nima 4 500 anai te potu noleto.+

31 “ ʼE fakahigoaʼi anai te ʼu matapa ʼo te kolo ki te ʼu telepi ʼo Iselaele. ʼE ʼi ai ni matapa ʼe tolu ʼi te potu noleto: te matapa ʼo Lupeni, mo te matapa ʼo Suta, pea mo te matapa ʼo Levi.

32 “ ʼE fasiga nima 4 500 anai te loa ʼo te potu esite, pea ʼe ʼi ai ni matapa ʼe tolu: te matapa ʼo Sosefo, mo te matapa ʼo Pesamino, pea mo te matapa ʼo Tane.

33 “ ʼE fasiga nima 4 500 anai te potu saute, mo matapa ʼe tolu: te matapa ʼo Simeone, mo te matapa ʼo Isakale, pea mo te matapa ʼo Sepulone.

34 “ ʼE fasiga nima 4 500 anai te loa ʼo te potu uesite, mo matapa ʼe tolu: te matapa ʼo Kate, mo te matapa ʼo Asele, pea mo te matapa ʼo Nefetali.

35 “ ʼE fasiga nima 18 000 anai te takafoli ʼo te kolo. Pea ʼi te ʼaho ʼaia ʼe fakahigoaʼi anai te kolo ʼE Nofo Ai Ia Sehova.”+