10 Tuha Mo Te Falala

TONA FAKAʼUHIGA

Ko te hahaʼi ʼae ʼe tuha mo te falala ʼe natou maʼu te falala ʼa ʼanatou matuʼā, ʼonatou kaumeʼa pea mo ʼonatou patolo. ʼE natou fakaʼapaʼapa ki te ʼu lekula, ʼe natou taupau ʼanatou fakapapau pea ʼe natou tala tuʼumaʼu te moʼoni.

TONA MAʼUHIGA

ʼI tona fakahagatonu, kapau ʼe ke fia ʼateaina ʼo laka atu, pea ʼe fakalogo anai ki hau fakaha ʼi te hoholo ʼo te temi ʼe ke tuha mo te falala.

ʼE ui fenei e Sarahi ʼe taʼu 16: “Ko te faʼahiga fai ʼae ʼe lelei ke ke maʼu ai te falala ʼo ʼau matuʼā, ʼe ko tau fakaha ko koe ʼe ko he tahi ʼe fakakaukau poto. Pea ʼe ke iloʼi te meʼa ʼae ʼe tonu ke fai, ʼi te temi ʼae ʼe ke fakatahi ai mo ʼau matuʼā mo ʼae ʼe ke to tokotahi ai.”

PELESEPETO FAKATOHI-TAPU: “Kotou haga sivisivi ia koutou totonu.”—2 Kolonito 13:5.

TE MEʼA ʼAE ʼE FEALA KE KE FAI

Kapau ʼe ke loto ke tuha mo koe te falala ʼo lahi age peʼe ke ke toe maʼu te falala ʼae neʼe kua puli, koʼeni te ʼu tokoni.

Ke ke aga fakahagatonu. ʼE vave pe anai te mole kei falala atu ʼa te hahaʼi ʼuhi ko tau gutu loi. Kae kapau ʼe ke aga fakahagatonu pea ʼe mole ke fufu ʼau lakahala, ʼe ke maʼu anai te falala ʼa te hahaʼi.

’E ui fenei e te tupulaga ko Caiman: “ ʼE faigafua age takita aga fakahagatonu moka ʼe lelei pe ia meʼa fuli. Kae ʼe toe lahi age anai te falala atu ʼa te hahaʼi kia koe, mo kapau ʼe ke aga fakahagatonu aipe moka hoko mai he ʼu aluʼaga faigataʼa.”

PELESEPETO FAKATOHI-TAPU: “ ʼE matou loto ke matou aga fakahagatonu ia meʼa fuli.”—Hep 13:18.

Ke ke tuha mo te falala. ʼI te sivi neʼe fai ʼi Amelika, ko te 78 ki te teau ʼo te hahaʼi gaue pule ʼi te ʼu pilo, ʼe natou ui ko “te kalitate ʼae ʼe maʼuhiga age ʼi te ʼu fakamaʼua kia natou ʼae ʼe hu gaue, ʼe ko hanatou tuha mo te falala.” Ka ke ako ke ke tuha mo te falala ʼe fua lelei anai kia koe ʼi te temi nei pea moka ke lahi anai.

ʼE ui fenei e te finemui ko Sarah: “ ʼE tokagaʼi e ʼaku matuʼā ʼe au iloʼi pe te meʼa ʼae tonu ke au fai pea mo te ʼu gaue ʼo te loto fale. Pea ʼe mole ʼaoga ke nā ui mai tuʼumaʼu pe. Ka lahi taku fakahoko te ʼu faʼahi ʼaia, pea ʼe toe lahi foki mo tana falala mai kia au.”

PELESEPETO FAKATOHI-TAPU: “ ʼE au falala ʼe ke fai anai te meʼa ʼae ʼe au kole atu, pea ʼe au iloʼi ʼe ke fai anai ʼo laka age ʼi te ʼu meʼa ʼae ʼe au ui atu.” —Filemone 21.

Ke ke loto faʼa kataki. ʼE faigafua pe te iloʼi ʼo te tuputupu fakasino ʼa he tupulaga. Kae ki te faʼahi fakakaukau ʼe ʼaoga leva ki ai he temi.”

ʼE ui fenei e te tupulaga ko Brandon: “ ʼE ʼaoga he temi ke falala atu ʼakotou matuʼā pea mo ʼihi. Pea ʼe feala pe ke ke liliu ʼaki te temi ko he tahi ʼe tuha mo te falala mo kapau foki ʼe ke aga fakapotopoto.”

PELESEPETO FAKATOHI-TAPU: “Kotou kofuʼi . . . te kataki fualoa.”—Kolose 3:12.