Kapite 107

Ko Te Lea Fakatātā ʼo Te Kaitahi ʼo Te ʼOhoana

ʼAKI te ʼu lea fakatātā e lua, neʼe fakahā e Sesu ia te kau sekelipa pea mo te kau pelepitelo pule, pea ʼe nātou fia matehi ia ia. Kae mole heʼeki vave ʼosi te palalau ʼa Sesu ʼo ʼuhiga mo nātou. Neʼe ina toe ʼui age kia nātou te tahi lea fakatātā. ʼAenī:

“Ko te puleʼaga ʼo selo ʼe kua liliu ia ʼo tatau mo he tagata, he hau, neʼe ina fai te kaitahi ki te ʼohoana ʼo tona foha. Pea neʼe ina fekauʼi tana kau tagata kaugana ke ʼolo ʼo pāuiʼi ia nātou ʼaē neʼe fakaafe ki te kaitahi ʼo te ʼohoana, ka neʼe mole nātou fia ʼōmai.”

Ko Sehova ʼAtua ʼe ko te Hau ʼaia ʼaē ʼe ina teuteuʼi te kaitahi ki te ʼohoana ʼo tona ʼAlo, ia Sesu Kilisito. ʼIo, ko te fafine ʼohoana, ʼaē ʼe faʼufaʼu e te toko 144 000 tisipulo fakanofo, ʼe fakatahiʼi anai ia ia kia Sesu ʼi selo. Ko te hahaʼi fakalogo ʼa te Hau ko te kau Iselaele ʼaē neʼe fakahū ki te fuakava ʼo te Lao ʼi te 1513 ʼi muʼa ʼo te temi ʼo Kilisito, ʼo nātou maʼu ai te fealagia ʼaē ke nātou liliu “ko he puleʼaga pelepitelo”. Neʼe ko te temi tonu la ʼaia neʼe fai ai kia nātou te fakaafe ki te kaitahi ʼo te ʼohoana.

Kae, ko te ʼuluaki pāui ʼo ʼuhiga mo nātou ʼaē neʼe fakaafe neʼe mole logologo ʼi muʼa ʼo te fasiga taʼu fakatōlau ʼo te taʼu 29 ʼo totatou temi, ʼi te temi ʼaē neʼe kamata ai te faka mafola e Sesu pea mo tana ʼu tisipulo (te kau kaugana ʼa te hau) ia te Puleʼaga. Kae ko te kau Iselaele ʼaē neʼe logo ki te pāui ʼa te kau kaugana, ʼi te taʼu 29 ʼo aʼu ki te taʼu 33 ʼo totatou temi neʼe mole nātou fia ʼōmai. Koia neʼe toe tuku age ai e te ʼAtua ki te fenua ʼaia neʼe fakaafe he tahi faigamālie, ʼo fēnei tona fakamatala e Sesu:

“Neʼe ina toe fekauʼi foki te tahi kau tagata kaugana, ʼo ʼui maʼana: ‘Koutou fakahā ki te kau fakaafe: “Koʼeni, kua ʼau teuteuʼi taku kaitahi; ko ʼaku vitulo pea mo ʼaku manu sino lelei kua ʼosi matematehi, pea kua tokalelei ia meʼa fuli. Koutou ʼōmai ki te kaitahi ʼo te fakamāu.” ’ ” Ko te lua pāui ʼaia pea ʼe ko te pāui fakaʼosi ki te kau fakaafe neʼe fai ʼi te Penikosite ʼo te taʼu 33, ʼi te hifo ifo ʼa te laumālie maʼoniʼoni ki te kau tisipulo ʼa Sesu ʼo kaku ki te taʼu 36 ʼo totatou temi.

Kae, neʼe toe feiā pe mo te meʼa ʼaia, neʼe tokolahi te kau Iselaele neʼe nātou manukinukiʼi te pāui ʼaia. “Ko nātou, ko te fakamahino ʼaia ʼa Sesu, ʼi tanatou mole tokakaga ʼaē ki te fakaafe, neʼe nātou tahi ʼalu, ko te tahi ki tana gāueʼaga, ko te tahi ki tona koloā; pea ko ʼihi, ʼi tanatou puke tana kau tagata kaugana, neʼe nātou gaohi koviʼi ia nātou ʼaki he agapauʼu pea nātou matematehi.” Pea neʼe hoko atu tana palalau: “Neʼe hāūhāū ai te tuʼi, pea neʼe ina fekauʼi ai tana ʼatu kautau kia nātou, pea neʼe ina fakamole ai te kau fakapō ʼaia pea mo tutu tonatou kolo.” Ko te meʼa ʼaia neʼe hoko ʼi te taʼu 70 ʼo totatou temi, ʼi te maumauʼi ʼo Selusalemi e te kau Loma pea neʼe matematehi ai te kau fai fakapō.

ʼOsi ʼaia, pea fakamatala e Sesu te meʼa neʼe hoko: “Pea hoki ʼui leva maʼana [te hau] ki ʼana tagata kaugana: ‘Ko te kaitahi ʼo te fakamāu kua tokalelei, kae neʼe molemo ʼaoga mai ki ai te kau fakaafe. Koutou ʼolo ʼi te ʼu ala ʼaē ʼe mavae atu ʼi te kolo, pea koutou fakaafe mai ki te kaitahi ʼo te fakamāu ia nātou fuli ʼaē ka koutou maʼu anai.’ ”

Ko te gāue ʼaia, ʼaē ko te tānaki ʼo te hahaʼi neʼe maʼu ʼi te ʼu ala ʼi tuʼa atu ʼo te kolo ʼo te kau fakaafe, neʼe kamata ʼi te taʼu 36 ʼo totatou temi. Ko te ofisie loma ko Kolonelio pea mo tona famili neʼe ko te ʼu ʼuluaki hahaʼi ʼe mole Sutea pea neʼe mole silikosisio ʼaia neʼe tānaki. Ko te tānaki ʼo te hahaʼi ʼaia ʼe mole Sutea, ʼaē ka nātou fetogi te kau ʼuluaki fakaafe ʼaē neʼe fakafisi ki te pāui, neʼe hoholo ʼo aʼu mai ki te 20 sēkulō.

ʼE ko te lolotoga ʼo te 20 sēkulō ʼaē neʼe hoki fonu ai te fale ʼo te fai ʼohoana. ʼOsi ʼaia pea fakamatala e Sesu te meʼa neʼe hoko atu: “Pea ʼi te hū ki loto ʼa te hau ke ina vakaʼi te hahaʼi ʼo te kaitahi, neʼe sio age ia ki te tagata neʼe mole kofu ki he kofu fakamāu. Pea neʼe ʼui maʼana kia te ia: ‘Kautagata, neʼe feafeaʼi tau hū mai ki henī ka mole ʼi ai hou kofu fakamāu?’ Neʼe nofo fakalogologo pe ia. Pea ʼui age ai e te hau ki ʼana tagata fekau: ‘Koutou haʼi ʼona nima mo ʼona vaʼe, pea ke koutou sī ia ia ki te fakapōʼuli ʼo tuʼa. Pea ʼe ko te potu la ʼaia ka ʼi ai anai tana ʼu tagi pea mo tana ʼu makiki nifo.’ ”

Ko te tagata ʼaē ʼe mole hona kofu fakamāu ʼe ina fakatātā te kau kilisitiano loi ʼo te keletiate. Neʼe mole fakamoʼoni te ʼAtua kia nātou ko he kau Iselaele fakalaumālie moʼoni. Neʼe mole ina fai tuʼa tahi he faʼahiga fakanofo ʼo nātou ʼaki tona laumālie maʼoniʼoni ke nātou liliu ko he ʼu maʼu tofiʼa ʼo te Puleʼaga. Koia ʼe laku ai ia nātou ki tuʼa, ki te fakapōʼuli, ʼaia ka fakaʼauha ai anai ia nātou.

ʼO fakaʼosi e Sesu tana lea fakatātā ʼo fēnei: “Heʼe tokolahi te kau fakaafe, kae tokosiʼi ia nātou ʼe fili.” ʼIo, neʼe tokolahi te kau Iselaele neʼe fakaafe ke nātou liliu ko te ʼu koga ʼo te ʼohoana ʼo Kilisito, kae neʼe tokosiʼi ia nātou neʼe fili. Ko te tokolahi ʼo te toko 144 000 ʼaē ʼe nātou maʼu te fakapale ki selo ʼe ko te hahaʼi ʼe mole ko he kau Iselaele. Mateo 22:1-14; Ekesote 19:1-6; Fakahā 14:1-3.

▪ Ko ai ʼaē, ʼi te kamataʼaga, neʼe ko te kau fakaafe ki te kaitahi ʼo te ʼohoana, pea ko ʼanāfea ʼaē neʼe nātou maʼu ai te fakaafe?

▪ Ko te temi fea ʼaē neʼe ʼuluaki fai ai te pāui ki te kau fakaafe, pea ko ai te kau tagata kaugana ʼaē neʼe fakaʼaogaʼi moʼo fai ʼo te pāui ʼaia?

▪ Ko ʼanāfea ʼaē neʼe fai ai te lua pāui, pea, ʼi te ʼosi fai ʼo te pāui ʼaia, ko ai ʼaē neʼe fakaafe?

▪ Ko ai ʼaē ʼe fakatātā e te tagata ʼaē ʼe mole hona kofu fakamāu?

▪ Ko ai te tokolahi ʼaē neʼe pāuiʼi, pea ko ai te tokosiʼi ʼaē neʼe fili?