Te ʼu Fai ʼOhoana ʼAē ʼe Leleiʼia e Te ʼAtua Pea Mo Te Tagata

“Neʼe ʼi ai te kaitahi ʼo te ʼohoana ʼi Kana . . . pea neʼe fakaafe foki mo Sesu pea mo ʼana tisipulo ki te kaitahi ʼo te ʼohoana.”​—Soane 2:​1, 2, MN.

1. Koteā ʼaē ʼe tou mahino kiai mai te hisitolia ʼo Sesu ʼi Kana?

NEʼE ʼiloʼi e Sesu, mo tana faʼē pea mo ʼihi ʼo tana kau tisipulo ia te fiafia ʼaē ʼe maʼu e te ʼu kaugana ʼa te ʼAtua ʼi he fai ʼohoana fakaʼapaʼapa. Neʼe fakaliliu e Kilisito ke makehe ia te fakafiafia ʼo te fai ʼohoana ʼi tana fakahoko tana ʼuluaki milakulo ʼaē ʼe fakamatala ʼi te ʼu evaselio. (Soane 2:​1-11) Lagi kua kotou kau pea mo fakafiafia ki he ʼu fai ʼohoana ʼa he kau Kilisitiano ʼe natou fia tauhi kiā Sehova, pea ko ni hahaʼi ʼohoana fiafia. Peʼe lagi kotou fakaʼamu ke kotou ʼohoana feiā, peʼe kotou fia tokoni ki hokotou kaumeʼa ki te teuteuʼi ʼo tona ʼohoana ke māui lelei. Koteā ʼaē ʼe kotou lava fai ke māui lelei?

2. Koteā te fakamatala ʼe tou maʼu ʼi te Tohi-Tapu ʼo ʼuhiga mo te ʼohoana?

² Kā teuteu ʼohoana he tagata pea mo he fafine, pea ki te kau Kilisitiano ʼe maʼuhiga ʼaupitō kiā nātou ia te ʼu tokoni ʼa te Folafola ʼa te ʼAtua. (2 Timoteo 3:​16, 17) ʼE mahino ia, ʼe mole talanoa fakahagatonu leva ia te Tohi-Tapu ki te ʼu agaaga fuli ʼo he fai ʼohoana. Pea mole tou punamaʼuli kiai, koteʼuhi ʼe mole tatau te ʼu agaʼi fenua pea mo te ʼu lao faka puleʼaga ʼo te ʼu fenua. Ohage lā, ʼi te temi ʼo te kau Iselaele ʼo te temi muʼa, neʼe mole ʼi ai he ʼu lēkula ki tanatou ʼu fai ʼohoana. ʼI te ʼaho pē ʼo te ʼohoana, neʼe ʼave te taʼahine e te tama ki tona ʼapi peʼe ki te ʼapi ʼo tana tamai. (Senesi 24:67; Isaia 61:10; Mateo 1:24) ʼI tana fai te faʼahi ʼaia, neʼe ina fakahā ʼi muʼa ʼo te kaugamālie kua nā ʼohoana kae neʼe mole nā muliʼi he ʼu lēkula ohage ko te ʼu fai ʼohoana ʼo te temi nei.

3. Ko te toʼotoʼoga fea ʼaē neʼe tokoni kiai ia Sesu ʼi Kana?

³ Neʼe ʼiloʼi e te kau Iselaele mokā fai ia te faʼahi ʼaia, pea kua ʼohoana ia he tama mo he taʼahine. Ki muli age, neʼe lagi natou fai he lafeti, ohage ko tona fakahā iā Soane 2:1. ʼE lahi te ʼu Tohi-Tapu ʼe natou fakaliliu fēnei ia te vaega ʼaia: “Neʼe ʼi ai he ʼohoana ʼi Kana.” Kae ko tona fakaliliu ʼi te lea faka Keleka, ʼe ʼui ko te “kaitahi ʼo te ʼohoana.”a (Mateo 22:​2-10; 25:10; Luka 14:8) ʼE fakahā lelei ʼi te fakamatala, neʼe kau ai ia Sesu pea neʼe tokoni ki he kaitahi ʼa he fai ʼohoana Sutea. Kae ko te puani tāfito, ko te faʼahiga fai ʼohoana ʼo te temi ʼaia ʼe kehekehe mo te ʼu fai ʼohoana ʼo te temi nei.

4. Ko te ʼu faʼahiga fai ʼohoana fea ʼaē ʼe filifili ke fai e ʼihi Kilisitiano, pea koteā tona tupuʼaga?

⁴ ʼE lahi te ʼu fenua ʼi te temi nei, ko te kau Kilisitiano ʼaē kua fakatuʼutuʼu ke natou ʼohoana, ʼe tonu muʼa ke natou mulimuli ki te ʼu lao faka puleʼaga. Kapau kua natou fai tonatou ʼu maʼua ʼaia, pea kua feala leva hanatou ʼohoana. Lagi ko te fakatapu ʼohoana ʼe fai anai e he tuʼi fakamāu, peʼe ko he tagata gāue neʼe hinoʼi e te Puleʼaga moʼo fai ia te faʼahi ʼaia. ʼO toe feiā mo ʼihi, ʼe natou fili ke natou ʼohoana feiā, ʼo lagi natou fakahā pe ki honatou ʼu kāiga peʼe ko honatou ʼu kaumeʼa Kilisitiano ke natou ʼomai ʼo fakamoʼoni ki tonatou ʼaho ʼohoana peʼe ke natou ʼomai ʼo fakafiafia mo te taumātuʼa ki te toʼotoʼoga maʼuhiga ʼaia. (Selemia 33:11; Soane 3:29) Ko ʼihi Kilisitiano ʼe lagi mole natou fia fai he toe lafeti peʼe ko he kaitahi, heʼe lahi anai te ʼu meʼa kā teuteuʼi kiai pea mo totogi kovi. Kae lagi natou fakatuʼutuʼu pe ke fai he kiʼi kai mo honatou ʼu kaumeʼa. ʼE fakalogo pe kiā tātou takitokotahi ia te faʼahi ʼaia, kae tou manatuʼi ko ʼihi Kilisitiano fotufotuʼa ʼe feala ke mole ʼalutahi tanatou ʼu manatu mo ʼaē ʼa tātou.​—Loma 14:​3, 4.

5. He koʼe ʼe loto e te kau Kilisitiano tokolahi ke fai he akonaki mokā natou ʼohoana, pea ko te ʼu manatu fea ʼaē ʼe faka maʼuhigaʼi ai?

⁵ Kaugamālie te ʼu taumātuʼa Kilisitiano ʼe natou loto ke fai he akonaki faka Tohi-Tapu ʼi tonatou ʼohoana.b ʼE ʼiloʼi e nātou ʼaia ko Sehova ʼe ko te Tupuʼaga ʼo te ʼohoana pea ʼi tana Folafola ʼe tuʼu ai te ʼu tokoni lelei ke liliu ai te maʼuli ʼa he taumātuʼa ʼo fua lelei pea mo fiafia. (Senesi 2:​22-24; Maleko 10:​6-9; Efeso 5:​22-33) Pea ko ʼihi taumātuʼa ʼe natou loto ke ʼomai tonatou ʼu kaumeʼa Kilisitiano pea mo kāiga ʼo te moʼoni ʼo kau mo nātou ki te toʼotoʼoga fakafiafia ʼaia. Kae koteā tatatou manatu ki te ʼu tuʼuga lao faka puleʼaga, mo te ʼu pepa, pea mo te ʼu faʼahiga fai ʼohoana ʼo te fenua ʼaē ʼe tou māʼuʼuli ai? Ko te alatike ʼaenī ʼe talanoa anai ki te ʼu ʼaluʼaga ʼe hoko ʼi te ʼu fenua. Ko ʼihi fai ʼohoana ʼe lagi mole tatau mo takotou ʼu fai ʼohoana māhani peʼe mo te fenua ʼaē ʼe kotou nonofo ai. Kae ʼe feala hakotou tāʼofi te ʼu pelesepeto peʼe ko he ʼu ʼaluʼaga ʼe maʼuhiga maʼa te ʼu kaugana ʼa te ʼAtua.

Ko He ʼOhoana Lelei​—Ko He ʼOhoana ʼe Tuha Mo Te ʼu Lao ʼAē ʼe Fakamaʼua Kiai e Te Puleʼaga

6, 7. He koʼe ʼe tonu ke tou mulimuli ki te ʼu lao ʼaē ʼe fakamaʼua mai e te puleʼaga ʼo ʼuhiga mo te ʼu fakatapu ʼohoana, pea ʼe feafeaʼi hatatou fakahā ia tatatou fakalogo kiai?

⁶ Ko Sehova ʼaē neʼe ina fakatuʼutuʼu te ʼohoana, kae ʼe feala pe ki te ʼu puleʼaga fakatagata ke natou fai he ʼu lao ʼo ʼuhiga mo te ʼu meʼa ʼaē ke fai e nātou ʼaē ʼe fia ʼohoana, pea ʼe totonu ia te fakatuʼutuʼu ʼaia. Neʼe ʼui fēnei e Sesu: “Ko mea a Sesale ave kia Sesale, pea mo mea a te Atua ki te Atua.” (Maleko 12:17) Pea neʼe ʼui fēnei e te ʼapositolo ko Paulo: “Ke fakalogo te nefesi fuli pē ki te ʼu pule māʼoluga, heʼe mole ʼi ai he pule mokā neʼe mole fakagafua e te ʼAtua; pea ko te ʼu pule ʼaē ʼe tuʼu ʼe natou tahi tuʼu ʼi tona tuʼulaga ʼuhi pē ko te ʼAtua.”​—Loma 13:​1, MN; Tito 3:1.

⁷ ʼI ʼihi fenua, ʼe ko te ʼu puleʼaga ʼaē ʼe natou fakagafua ke ʼohoana ia te hahaʼi. Koia, kapau ʼaki te ʼu pelesepeto faka Tohi-Tapu kua feala ki he tehina mo he tuagaʼane Kilisitiano ke nā ʼohoana, pea ʼe tonu ke nā mulimuli lelei ki te ʼu lao ʼo te fenua ʼaē ʼe nā nonofo ai. Lagi ʼe fakamaʼua age anai kiā nāua he pepa fakagafua ke nā ʼohoana, ke fakatapu tonā ʼohoana e he tagata gāue ʼo te Puleʼaga, pea ke nā tohi tonā ʼohoana. ʼI te temi ʼaē neʼe fakatotonu ai e Sesale Aukusito ke “tohi” te higoa ʼo te hahaʼi, neʼe fakalogo ia Malia mo Sosefo ki te fakatotonu ʼaia, ʼo nā fagona ai ki Petelehemi ʼo “tohi” tonā ʼu higoa.​—Luka 2:​1-5, MN.

8. ʼE fakahoko feafeaʼi ia te ʼohoana, pea koteā ʼaē ʼe fai e te kau Fakamoʼoni ʼa Sehova moʼo fakahā ia tanatou mahino ki te faʼahi ʼaia?

⁸ Kā fakagafua e te puleʼaga ke ʼohoana he tehina mo he tuagaʼane Kilisitiano, pea ko te ʼohoana ʼaia ʼe leleiʼia e te ʼAtua. Koia, ʼe mole fai liuliuga e te kau Fakamoʼoni ʼa Sehova he ʼohoana ʼaki he ʼu tuʼuga toʼotoʼoga ʼe fakagafua e te puleʼaga, pea ʼe mole natou toe fai tanatou ʼu fakapapau ʼaē neʼe natou fai ʼi tonatou ʼaho ʼohoana, ohage lā ko te ʼu fakamanatu ʼohoana iā taʼu e 25 peʼe 50. (Mateo 5:37) (Ko ʼihi lotu ʼe mole natou tali ia te ʼu fakatuʼutuʼu ʼohoana ki te puleʼaga, heʼe natou ʼui ʼe tonu ke fakatapu e he pātele peʼe ko he takitaki lotu ia te ʼu fai ʼohoana ʼaia, peʼe ke natou tala kua nā liliu ko te taumātuʼa.) ʼE lahi te ʼu fenua, ʼe fakagafua e te puleʼaga ki he minisi ʼa he kau Fakamoʼoni ʼa Sehova ke ina fakatapu te ʼu ʼohoana. Kapau ko he faʼahi ʼe feala, ʼe ina fai anai ʼaki he akonaki ʼo te ʼohoana ʼi te Fale ʼo Te Puleʼaga. Ko te fale ʼaē ʼe fai kiai te tauhi moʼoni pea ʼe tuha ke fai ai he akonaki ʼo ʼuhiga mo te toʼotoʼoga ʼaia, heʼe ko Sehova ʼAtua ʼaē neʼe ina fakatuʼu te ʼohoana.

9. (a) Kapau ko he ʼohoana ki te puleʼaga, koteā ʼaē ʼe lava filifili e he taumātuʼa Kilisitiano ke nā fai? (b) Ko te ʼu ʼaluʼaga fea ʼe tonu anai ki te kau tagata ʼāfea ke natou vakavakaʼi ʼo ʼuhiga mo te ʼu fakatuʼutuʼu ki he fai ʼohoana?

⁹ ʼI ʼihi fenua, ʼe fakamaʼua e te puleʼaga ke fakatapu te ʼu ʼohoana ʼi he pilo ʼo te puleʼaga, ohage lā ko te lameli, peʼe ke fakatapu e he tahi ʼe gāue maʼa te puleʼaga. ʼI te agamāhani, ʼe mulimuli te kau Kilisitiano ki te fakatotonu ʼaia, pea ki muli age ʼi te ʼaho pē ʼaia ʼe natou fai ia te akonaki ʼo te ʼohoana ʼi te Fale ʼo Te Puleʼaga. (ʼE mole natou loto ke hili ni ʼu ʼaho ʼi te temi ʼaē neʼe fai ai te toʼotoʼoga ʼo te ʼohoana e te puleʼaga pea mo te akonaki faka Tohi-Tapu, heʼe ko tonatou ʼohoana neʼe fai ʼi muʼa ʼo te ʼAtua pea mo te tagata, ʼaē ʼe kau ai mo te kokelekasio faka Kilisitiano.) Kapau ko he tehina mo he tuagaʼane ʼe nā teuteu ʼohoana ki te puleʼaga, pea ʼe nā loto ke fai hanā akonaki ʼi he Fale ʼo Te Puleʼaga, ʼe tonu anai ke nā kole fakatomuʼa ki te kau tagata ʼāfea ʼo te Komite Gāue ʼo Te Kokelekasio. ʼO mole gata pē ʼi tanatou tali tanā kole ʼuhi heʼe lelei tonā maʼuli fakalaumālie, kae ʼe toe vakaʼi foki e te ʼu tagata ʼāfea ʼaia peʼe mole tō tonu te ʼaho ʼo te ʼohoana mo te ʼu ʼaho fono pea mo te ʼu fakatuʼutuʼu ʼo ʼuhiga mo te fale fono. (1 Kolonito 14:​33, 40) ʼE natou toe vakaʼi anai mo te ʼu faʼahiga teuteuʼi ʼaē ʼe nā loloto kiai ʼo ʼuhiga mo te fale fono pea mo natou vakaʼi peʼe tala te faʼahi ʼaia ki te kokelekasio.

10. Kapau ʼe fakamaʼua he ʼohoana ki te puleʼaga, ʼe malave feafeaʼi anai te faʼahi ʼaia ki te akonaki ʼo te ʼohoana?

¹⁰ Ko te tagata ʼāfea ʼaē kā ina fai te akonaki ʼo te ʼohoana, ʼe faiga anai ke malave tana akonaki kiā nāua ʼaē ʼe ʼohoana, pea mo fakaloto mālohi ʼi te faʼahi fakalaumālie pea ke tuha mo te toʼotoʼoga. Kapau neʼe nā ʼuluaki ʼohoana ki te puleʼaga, pea ʼe fakahā lelei anai e te tagata ʼāfea neʼe kua nā ʼohoana ʼo mulimuli ki te lao ʼa Sesale. Kapau ʼi te lameli neʼe mole nā fai ai tanā ʼu fakapapau ʼohoana, lagi ʼe nā loto anai ke fai ia te faʼahi ʼaia lolotoga ʼo te akonaki.c Kapau neʼe nā fai te faʼahi ʼaia ʼi te lameli kae ʼe nā toe fia fai ia te faʼahi ʼaia ʼi muʼa ʼo Sehova pea mo te kokelekasio, ʼe nā lava fai kae ʼe tonu ke ʼiloga ki te nofoʼaki neʼe kua nā ʼosi fai ia te faʼahi ʼaia, ʼo nā fakahā neʼe kua ʼosi “fakatahiʼi” nāua.​—Mateo 19:​6, MN; 22:21.

11. ʼI ʼihi fenua, ʼe ʼohoana feafeaʼi he taumātuʼa, pea ʼe malave feafeaʼi ki te akonaki ʼo te ʼohoana?

¹¹ ʼI ʼihi fenua, lagi mole fakamaʼua age he faʼahiga toʼotoʼoga kiā nāua ʼaē kā ʼohoana, ʼo toe feiā ki he tahi ʼe hinoʼi e te puleʼaga ke ina fakatapu ia nāua. ʼE fai te ʼohoana mokā kua nā tohi ʼi te kaupepa ʼa te puleʼaga tonā ʼaho ʼohoana. Pea ki te faʼahi ʼaia, ʼe ʼi ai te pepa fakamoʼoni neʼe tohi tonā ʼaho ʼohoana. Kā kua fai te potu ʼaia, pea kua nā liliu ko te taumātuʼa, heʼe ko te ʼaho ʼaē ʼe tuʼu ʼi te pepa fakamoʼoni ʼe ko te ʼaho ʼaia ʼo tonā ʼohoana. Ohage ko te meʼa neʼe kua tou talanoa kiai, lagi ko te taumātuʼa ʼe nā loto leva ki muli age ke fai honā akonaki faka Tohi-Tapu e he tehina fotufotuʼa fakalaumālie ʼi te Fale ʼo Te Puleʼaga. ʼE ina fakahā anai ki te nofoʼaki kātoa kua ʼohoana te taumātuʼa he neʼe kua tohi tonā ʼaho ʼohoana ʼi te kaupepa ʼo te puleʼaga. ʼE feala ke fai te ʼu fakapapau ʼo te ʼohoana ohage ko tona fakahā ʼi te palakalafe 10 pea mo te nota ʼi te lalo pāsina. Ko nātou ʼaē ʼi te Fale ʼo Te Puleʼaga, ʼe natou fakafiafia anai mo te taumātuʼa pea ʼe ʼaoga anai kiā nātou ia te ʼu lelei ʼo te ʼu tokoni ʼaē ʼe haʼu mai te Folafola ʼa te ʼAtua.​—Hiva ʼa Salomone 3:11.

Te ʼu ʼOhoana ʼi Te Agaʼi Fenua Pea Mo Te ʼu ʼOhoana Ki Te Puleʼaga

12. Koteā te faka ʼuhiga ʼo he ʼohoana ʼi te agaʼi fenua, pea koteā ʼaē ʼe lelei ke fai mokā ʼosi te taʼi fakatapu ʼohoana ʼaia?

¹² ʼI ʼihi fenua, ʼe ko te agaʼi fenua (peʼe ko te telepī) ʼaē ʼe ina faka ʼohoanaʼi te taumātuʼa. ʼE mole tou talanoa ʼi henī ki he tagata mo he fafine ʼe nā māʼuʼuli fakatahi kae heʼeki nā ʼohoana, peʼe nā māʼuʼuli fakatahi heʼe fakagafua e te puleʼaga kae mole heʼeki nā ʼohoana.d ʼI henī, ʼe tou talanoa ki te ʼu ʼohoana ʼaē ʼe fai ʼi te agaʼi fenua. ʼE lagi fai ai he totogi kātoa pea mo he tali ʼo he totogi ʼo he taʼahine, ʼe faka ʼuhiga ai ʼi muʼa ʼo te puleʼaga pea mo te ʼAtua kua nā ʼohoana. Ko te puleʼaga ʼe ina tali te ʼu fakatapu ʼohoana ʼaia ʼi te agaʼi fenua. Ki muli age, ʼi te agamāhani ʼe feala ke tohi te ʼohoana ʼaia, pea mo foaki age ki te taumātuʼa honā kaupepa faka fāmili. Ko te kaupepa fakamoʼoni, ʼe ina puipui te taumātuʼa peʼe ko te fafine, ʼo feiā mo tanā fānau mo kapau ʼe mate tona ʼohoana. Ko te kokelekasio ʼe ina fakaloto mālohiʼi anai ia nātou ʼaē neʼe ʼohoana feiā ke natou foimo tohi tonatou ʼohoana ki te puleʼaga. Tahi ʼaē meʼa maʼuhiga, ʼi te Lao ʼa Moisese, neʼe fakamaʼua ke tohi ia te ʼu ʼohoana pea mo te fānau ʼaē ʼe tupu ake.​—Mateo 1:​1-16.

13. Kā kua ʼosi fai ia te ʼohoana ʼi te agaʼi fenua, koteā ʼaē ʼe lelei ke manatuʼi mokā fai te akonaki ʼo te ʼohoana?

¹³ Kā kua tali e te puleʼaga he ʼohoana ʼa he tagata mo he fafine neʼe fakatapu ʼi te agaʼi fenua, pea kua nā liliu ko te taumātuʼa. Ohage ko te faʼahi neʼe kua tou talanoa kiai, lagi ko te kau Kilisitiano ʼaē neʼe ʼohoana feiā, ʼe lagi natou loto ki honatou akonaki ʼohoana, pea ke natou fai tanatou ʼu fakapapau ʼohoana ʼi te Fale ʼo Te Puleʼaga. Kapau kua hoko te fakatapu ʼaia, pea ko te tehina ʼaē kā ina fai te akonaki, ʼe ina fakahā anai kua nā ʼosi ʼohoana ʼo mulimuli ki te ʼu lao ʼa Sesale. ʼE feala ke fai he akonaki ʼi te ʼu taʼi fai ʼohoana ʼaia. Ko te fai ʼohoana e tahi, pea mo te akonaki faka Tohi-Tapu pē e tahi mokā neʼe fai te ʼohoana ʼi te agaʼi fenua (telepī). Kā ko he faʼahi ʼe fealagia, ko te fakatapu pea mo te akonaki ʼe fai pē anai ʼi te ʼaho e tahi, ʼo fakahā ai te maʼuhiga ʼo te ʼohoana faka Kilisitiano ʼi te lotolotoiga ʼo te hahaʼi.

14. Koteā ʼapē ʼe fai e he Kilisitiano mo kapau ʼe fakagafua ia te ʼohoana ʼi te agaʼi fenua mo te ʼohoana ki te puleʼaga?

¹⁴ ʼI ʼihi fenua ʼaē ʼe fakagafua ai e te puleʼaga ke fakatapu ia te ʼu ʼohoana ʼi te agaʼi fenua, ʼe ʼi ai foki mo te ʼu fakatuʼutuʼu ʼo te ʼohoana ki te puleʼaga. ʼI te agamāhani, ko te tagata gāue ʼa te puleʼaga ʼaē ʼe ina fakatapu te ʼohoana, pea lagi ʼi te fai ʼohoana ʼaia ʼe toe fai mo te ʼu fakapapau ʼohoana pea mo tohi te ʼaho fakatapu ki tonā kaupepa faka fāmili. Ko ʼihi Kilisitiano ʼe natou leleiʼia age te ʼohoana ki te puleʼaga ʼi he ʼohoana ʼi te agaʼi fenua. ʼE mole fakamaʼua e te puleʼaga he ʼu lēkula ke fai te ʼu fai ʼohoana ʼaia e lua; ʼe ina fakagafua lualua. Ko te faʼahi ʼaē neʼe tou vakaʼi ʼi te palakalafe 9 pea mo te palakalafe 10 ʼo ʼuhiga mo te akonaki ʼo te ʼohoana pea mo te ʼu fakapapau, ʼe toe ʼaoga pē foki mokā hili te ʼohoana ki te puleʼaga. Ko te meʼa ʼaē ʼe maʼuhiga tāfito ke ʼohoana te ʼu taumātuʼa ʼaki he fakatuʼutuʼu ʼe leleiʼia e te ʼAtua pea mo te tagata. Kapau kua ʼohoana he taumātuʼa ki te agaʼi fenua, pea ki muli age ʼe nā fia ʼohoana ki te puleʼaga ʼi he lameli (kae ʼe mole ko te Fale ʼo Te Puleʼaga), ʼe tahi fakalogo pē ki te taumātuʼa. Ko te lua ʼohoana ʼaia, ʼe mole pipiki ia ki te kua ʼosi ʼo tonā ʼohoana. Pea ʼi te temi ʼaia, ʼe mole he fihifihia moʼo tāʼofi ke fai he akonaki ʼo te ʼohoana pea mo he kaitahi.​—Luka 20:25; 1 Petelo 2:​13, 14.

Ke Maʼa Ia Te Nofo ʼOhoana

15, 16. ʼE tonu ke hā feafeaʼi te fakaʼapaʼapa ʼi te ʼohoana?

¹⁵ ʼI te temi ʼaē neʼe hoko ai te fihifihia ʼi te fai ʼohoana ʼa te hau Pelesia, ko te tagata pule fai tokoni ko Memukane neʼe ina fai ia te tokoni neʼe feala ke fua lelei​—‘ko te ʼu fafine ʼohoana fuli ʼe natou fakaʼapaʼapa ki ʼonatou ʼohoana.’ (Esitele 1:20) ʼI te ʼu fai ʼohoana ʼa te kau Kilisitiano, ʼe mole tonu leva ke fai ia te taʼi tokoni ʼaia e he hau fakakelekele; ʼe tonu pe ki te ʼu fafine ʼohoana ke natou fakaʼapaʼapa ki ʼonatou ʼohoana. ʼO toe feiā ki te ʼu tagata ʼohoana Kilisitiano, ʼe tonu ke natou ‘fakaʼapaʼapa ki ʼonatou hoa’ pea mo vikiʼi nātou. (Tāʼaga Lea 31:​11, 30; 1 Petelo 3:7) ʼE mole tou faka maʼuhigaʼi anai tatatou nofo faka taumātuʼa mo kapau kua hili kiai ni ʼu taʼu, kae ʼe tonu ke tou foimo kamata atu pē ʼi te ʼaho ʼaē neʼe tou ʼohoana ai.

¹⁶ ʼE mole tonu anai ke gata pe kiā nāua ʼaē ʼe ʼohoana ia te fakahā ʼo te fakaʼapaʼapa ʼi tonā ʼaho ʼohoana. ʼE tonu foki ʼi te akonaki ʼo te ʼohoana ʼaē ka fai e te tagata ʼāfea, ke toe hā ai ia te fakaʼapaʼapa. ʼE tonu ke fai tāfito ia te ʼu tokoni ʼo te akonaki maʼa te taumātuʼa. ʼUhi heʼe maʼuhiga kiā nāua te faʼahi ʼaia, ʼe mole tonu anai ki te tehina ʼaē ʼe ina fai te akonaki ke fakahuahua peʼe ke ina fai ni ʼu palalau ʼe mole tuha mo te toʼotoʼoga ʼaia. ʼE mole ina fai anai ni ʼu tokoni ʼe feala ai ke fakatupu ufiufi ki te taumātuʼa pea mo te nofoʼaki. Kae ʼe faiga anai ke liliu tana akonaki ʼo fakaloto mālohi, pea mo hikihiki te Tupuʼaga ʼo te ʼohoana pea mo Tana ʼu tokoni taulekaleka. ʼE mahino ia, ko te fakaʼapaʼapa ʼo te akonaki ʼo te ʼohoana ʼaē ʼe fai e te tagata ʼāfea, ʼe kau anai ki te lelei ʼo he ʼohoana ʼe ina fakavikiviki ia Sehova ʼAtua.

17. He koʼe ʼe ʼi ai te fakatuʼutuʼu ʼa te puleʼaga ʼi te ʼu fai ʼohoana ʼa te kau Kilisitiano?

¹⁷ ʼI te alatike ʼaenī, ʼe lagi neʼe lahi te ʼu puani kehekehe neʼe kotou fakatokagaʼi ʼo ʼuhiga mo te ʼu fakatapu ʼohoana ʼaē ʼe tali e te puleʼaga. ʼE lagi ʼi tokotou fenua ko ʼihi tokoni neʼe tou vakaʼi ʼe mole fakamaʼua atu anai kiā koutou. Kae ʼe tonu ke mahino fuli kiā tātou, ʼe maʼuhiga ke hā ʼi te ʼu fai ʼohoana ʼa te kau Fakamoʼoni ʼa Sehova ia tanatou fakaʼapaʼapa ki te ʼu lao ʼo te fenua, pea mo te ʼu lao ʼa Sesale. (Luka 20:25) Neʼe fakaloto mālohiʼi fēnei tātou e Paulo: “Kotou liufaki ki te hahaʼi fuli te ʼu meʼa ʼaē ʼe tonu ke kotou foaki kiā nātou: kiā ia ʼaē ʼe ina fakamaʼua mai te tukuhau, te tukuhau; kiā ia ʼaē ʼe ina fakamaʼua mai te maʼua fakapōpula, te maʼua fakapōpula; . . . kiā ia ʼaē ʼe ina fakamaʼua mai te fakaʼapaʼapa, te fakaʼapaʼapa.” (Loma 13:​7, MN ) Ei, ʼe tāu mo te kau Kilisitiano, ʼo kamata ʼi te ʼaho ʼo te ʼohoana, ke natou fakaʼapaʼapa ki te fakatuʼutuʼu ʼaē neʼe fai e te ʼAtua ʼo aʼu mai ki te temi nei.

18. Ko te faʼahi fea ʼo ʼuhiga mo te ʼohoana ʼe tonu ke tou tokagaʼi, pea kofea ʼaē ʼe tou lava maʼu ai he ʼu tokoni ʼo ʼuhiga mo te faʼahi ʼaia?

¹⁸ ʼE lahi te ʼu fai ʼohoana ʼa te kau Kilisitiano ʼe fai ki muli age ia te fakafiafia​—te kaitahi. ʼE tou manatuʼi neʼe kau ia Sesu ʼi te fakafiafia feiā. Kapau ʼe ʼi ai he fakafiafia feiā, ʼe lava tokoni feafeaʼi mai te Tohi-Tapu ke tou ʼiloʼi lelei peʼe tou faka maʼuhigaʼi anai te ʼAtua pea mo vikiʼi ia nāua ʼaē neʼe hoki ʼohoana pea mo te kokelekasio faka Kilisitiano? ʼE tou vakaʼi anai te faʼahi ʼaia ʼi te alatike kā hoa mai.

[Kiʼi nota]

ʼE Kei Kotou Manatuʼi Koa?

• He koʼe ʼe tonu ke tou tokagaʼi te ʼu agaaga ʼo ʼuhiga mo te ʼohoana ʼi te faʼahi faka puleʼaga pea mo fakalaumālie?

• Kapau ʼe ʼohoana he tehina mo he tuagaʼane Kilisitiano ki te puleʼaga, koteā anai te faʼahi ʼe lagi nā loloto anai kiai mokā hili te ʼohoana?

• He koʼe ʼe fai te ʼu akonaki ʼo te ʼohoana ʼi te Fale ʼo Te Puleʼaga?

[Paki ʼo te pasina 8]

Ko te kau Iselaele ʼo te temi muʼa, kā natou ʼohoana neʼe ʼave e te tama ia te taʼahine ki tona ʼapi peʼe ki te ʼapi ʼo tana tamai

[Paki ʼo te pasina 11]

ʼI te ʼosi ʼo te ʼohoana ʼi te agaʼi fenua, ʼe lagi ko te kau Kilisitiano ʼe natou loto anai ke fai he akonaki ʼi te Fale ʼo Te Puleʼaga