Te Tali Ki ʼAkotou ʼu Fehuʼi
◼ Kapau ʼe fia fakaʼaogaʼi e he tehina mo he tuagaʼane ia te Fale ʼo Te Puleʼaga ki tonā ʼohoana, ko te ʼu faʼahi fea ʼaē ʼe tonu ke nā palalau kiai mo te ʼu tagata ʼāfea?
Ko te ʼu ʼohoana ʼaē ʼe fai ʼo mulimuli ki te ʼu pelesepeto ʼo te Tohi-Tapu, ʼe fakakolōliaʼi ai ia Sehova. ʼE moʼoni ia te faʼahi ʼaia, tāfito lā ʼo ʼuhiga mo te ʼu ʼohoana ʼaē ʼe fai ʼi te Fale ʼo Te Puleʼaga, heʼe fakaʼuhiga e te hahaʼi ia te ʼu fono ʼaē ʼe fai ai ko he fakatā ʼo tatatou kautahi. Koia ke “fai ia meʼa fuli ʼi te fakapotopoto pea mo te fakatokatoka,” ʼe lelei ki te kau tagata ʼāfea ke natou fai palalau mo nāua ʼaē ʼe teuteu ʼohoana mokā ʼe nā kole ke nā fakaʼaogaʼi ia te Fale ʼo Te Puleʼaga ki tonā ʼohoana.—1 Ko. 14:40.
Ko he toko lua ʼe nā fia fakaʼaogaʼi ia te Fale ʼo Te Puleʼaga ki tonā ʼohoana, ʼe tonu ke nā tohi tanā kole ki he pepa, ʼo nā momoli ki te ʼu tagata ʼāfea ʼaē ʼe natou faʼufaʼu ia te komitē gāue ʼo te kōkelekāsio ʼaē ʼe fakatahi ʼi te fale fono ʼaia. ʼE tonu ke nā momoli tautonu anai tanā tohi pea ʼe tonu ke nā fakahā anai ʼi tanā tohi ʼaia ia te ʼaho pea mo te hola ʼaē ʼe nā fia fakaʼaogaʼi ai ia te fale fono. ʼE tonu ke nā manatuʼi ʼe mole fetogi anai e te ʼu tagata ʼāfea ia te ʼu ʼaho pea mo te ʼu hola fono, ke feala ke fai ia te fai ʼohoana. Tahi ʼaē meʼa, ko te tehina pea mo te tuagaʼane, ʼe tonu ke lelei tanā aga, ke nā mulimuli lelei ki te ʼu pelesepeto ʼo te Tohi-Tapu pea mo te ʼu lēkula faitotonu ʼa Sehova.
Ke ʼiloʼi papau e nāua ʼaē kā ʼohoana, ʼe nā fakakolōliaʼi anai totatou ʼAtua maʼuhiga, ʼe tonu ke nā felōgoi mo te ʼu tagata ʼāfea ʼo te komitē gāue ʼo te kōkelekāsio, ʼo ʼuhiga mo te ʼu fakatuʼutuʼu ʼohoana ʼi muʼa ʼo hanā fai he tonu. Logolā ko te ʼu tagata ʼāfea ʼe mole natou faiga anai ke tali fakakinau e nāua ʼaē kā ʼohoana ia tanatou ʼu manatu, kae kapau ʼe ʼi ai he meʼa ʼe mole lelei ʼe nā fakatuʼutuʼu kiai, ʼe tonu ke fai he ʼu fetogi. ʼE gata pē ki te musika ʼaē mai tatatou ʼu Mélodies du Royaume peʼe ko tatatou ʼu kātiko ʼaē ʼe tonu pē ke fakatagi. ʼE tonu ke toe fakagafua age e te ʼu tagata ʼāfea ʼo te komitē gāue ʼo te kōkelekāsio mokā ʼe nā loto ke fakamataleleiʼi ia te Fale ʼo Te Puleʼaga peʼe ko te fetogi ʼo te tuʼuʼaga ʼo te ʼu hekaʼaga. Kapau ʼe tonu ke fai he ʼu pāki peʼe puke he ʼata, ʼe mole tonu ke puli ia te ʼaluʼaga fakaʼapaʼapaʼia ʼo te lakaga ʼaia. ʼE lagi fakagafua e te ʼu tagata ʼāfea ke fai he ʼu faʼifaʼitaki ʼo te fai ʼohoana ʼi te Fale ʼo Te Puleʼaga, mo kapau ʼe mole fai ʼi te ʼu temi ʼaē ʼe fai ai te ʼu gāue ʼo te kōkelekāsio. ʼE mole tonu anai ke fakapipiki he ʼu pepa fakaafe ki te laupapa ʼi muli. Kae ʼe feala ke tala fakanounou e te ʼu tagata ʼāfea lolotoga ia te Fono Gāue ki te kōkelekāsio ʼo ʼuhiga mo te fai ʼohoana ʼaē kā fai ʼi te Fale ʼo Te Puleʼaga.
Logolā ʼe mole fakamaʼua kiā nātou fuli ʼaē kā kau ki te fai ʼohoana ko ni hahaʼi kua ʼosi papitemaʼi, kae ʼe mole lelei anai ke kau kiai ni ʼu hahaʼi ʼe fakafeagai ʼaupitō ia tonatou faʼahiga maʼuli mo te ʼu pelesepeto Fakatohi-tapu, peʼe lagaʼi ai he ʼu fehuʼi mai ia nātou ʼaē ʼe kau kiai. ʼE tonu ke takitaki ia te fai ʼohoana e he tagata ʼāfea neʼe hinoʼi, mo kapau ʼe feala. Ko te kau tagata ʼāfea ʼe ko he kau faiako popoto ʼo te Folafola ʼa te ʼAtua, koia ʼe tuha mo nātou ke natou fakahā lelei ia te ʼu pelesepeto Fakatohi-tapu ʼaē ʼe pipiki ki te lakaga maʼuhiga ʼaia.—1 Tim. 3:2.
Mai tona ʼaluʼaga ʼaē ko te fai ʼohoana ʼe malave anai ki te tagata ʼāfea ʼaē ʼe ina fakahoko ia te ʼohoana, ʼe tonu anai ke fakahā ki te tagata ʼāfea ia te ʼu fakatuʼutuʼu ʼo te fai ʼohoana. ʼE fai palalau anai mo nāua ʼaē kā ʼohoana ke ina ʼiloʼi tanā aga ʼi te temi ʼaē ʼe nā fakatahi ai; ʼe tonu anai ke nā palalau faʼifaʼitaliha mo ia pea mo nā palalau ʼaki te moʼoni. Kapau ko te tehina peʼe ko te tuagaʼane neʼe kua ʼohoana ki muʼa atu, ʼe tonu ke ina foaki he fakamoʼoni iā muʼa ʼo te ʼAtua pea mo te puleʼaga kua ʼāteaina ke toe ʼohoana. (Mat. 19:9) ʼE kau kiai tana fakahā ki te tagata ʼāfea ia te pepa ʼaē ʼe tohi lelei ai tana kua māvete.
Kā fai palalau faʼifaʼitaliha pea mo gāue fakatahi ia nāua ʼaē kā ʼohoana mo te ʼu tagata ʼāfea, pea ʼe liliu anai ia te fai ʼohoana ko he lakaga fakafiafia kiā tātou fuli.—Taag. 15:22; Hep. 13:17.