Ko Ai Ia Nātou?

ʼE LOTO e te kau Fakamoʼoni ʼa Sehova ke kotou feʼiloʼiʼaki lelei mo nātou. Neʼe lagi kotou feʼiloʼiʼaki mo ʼihi heʼe ko hokotou vāhaʼa fale, peʼe ko hokotou ʼu kaugā gāue, peʼe lagi neʼe kotou felāveʼi mo nātou ʼi he tahi age ʼu ʼaluʼaga. Neʼe lagi kua kotou sisio kiā nātou ʼi te ala, ʼe natou lolotoga tufa ia tanatou ʼu nusipepa ki te hahaʼi. Pe neʼe lagi kua kotou fai palalau fakanounou mo nātou ʼi tokotou muʼa matapā.

ʼI tona ʼuhiga moʼoni, ʼe fia tōkakaga ia te kau Fakamoʼoni ʼa Sehova kiā koutou pea ʼe natou loto ke kotou māʼuʼuli fiafia. ʼE natou fia faka kaumeʼa mo koutou pea mo fakamahinohino atu pe ko ai ia nātou, pe koteā te ʼu meʼa ʼaē ʼe natou tui kiai, peʼe feafeaʼi te faʼufaʼu ʼo tanatou kautahi pea koteā tanatou manatu ʼo ʼuhiga mo te hahaʼi pea mo te mālamanei ʼaenī ʼe tou māʼuʼuli fuli ai. Moʼo fakahoko ia te faʼahi ʼaia, neʼe natou teuteuʼi ai ia te kaupepa lahi ʼaenī maʼa koutou.

Ko te kau Fakamoʼoni ʼa Sehova ʼe natou hagē pē ko te hahaʼi fuli. ʼE ʼi ai tonatou ʼu fihifihia—faka ekonomika, fakasino pea mo fēia ʼi te faʼahi ʼo te loto. ʼE natou faihala ʼi ʼihi temi, heʼe natou agahala. Kae ʼe natou faiga ke natou tāʼofi ia he ʼu ako mai te ʼu meʼa ʼaē ʼe hoko kiā nātou pea mo natou akoʼi fakamālotoloto ia te Tohi-Tapu moʼo fakahoko ia te ʼu fetogi ʼaē ʼe ʼaoga. Neʼe natou foaki ia tonatou maʼuli ki te ʼAtua moʼo fai tona finegalo, pea ʼe natou faiga ke natou fakahoko fakalelei ia tanatou fakapapau ʼaia. ʼI tanatou ʼu gāue fuli, ʼe natou kumi ia te takitaki ʼo te Folafola ʼa te ʼAtua pea mo tona laumālie māʼoniʼoni.

ʼE maʼuhiga ʼaupitō kiā nātou ke natou fakatafito ia tanatou ʼu akonaki ki te Tohi-Tapu kae mole ki he ʼu manatu fakatagata peʼe faka lotu. ʼE natou manatu tahi mo te ʼapositolo ko Paulo ʼi tana ʼui fēnei ʼaki ia te takitaki ʼa te ʼAtua: “Ke ʼiloʼi ʼe moʼoni te ʼAtua, kae ke ʼiloʼi ʼe loi te tagata fuli pē.” (Loma 3:4, Traduction du monde nouveaua) Kā fai he ʼu akonaki ʼo ʼui ʼe ko he ʼu moʼoni faka Tohi-Tapu, pea ʼe leleiʼia ʼaupitō e te kau Fakamoʼoni ia te aga ʼaē neʼe maʼu e te kau Pelea, ʼi tanatou logo ʼaē ki te fai faka mafola ʼa te ʼapositolo ko Paulo: “Neʼe natou tali fakavilivili te folafola, ʼo natou vakavakaʼi lelei te Tohi-Tapu ʼi te ʼaho fuli pē, peʼe ʼalutahi moʼoni te ʼu meʼa ʼaia.” (Gāue 17:11) ʼE tui ia te kau Fakamoʼoni ʼa Sehova ko te ʼu akonaki faka lotu fuli ʼe tonu ke vakavakaʼi fēia, pe ʼalutahi mo te Tohi-Tapu ʼaē ʼe haʼu mai te ʼAtua, tatau aipē peʼe ko he ʼu akonaki ʼa nātou totonu peʼe ʼa nātou ʼo te ʼu lotu ʼaē. ʼE natou fakaafe—pea mo fakaloto mālohiʼi koutou—mokā kotou fai palalau mo nātou, ke kotou vakavakaʼi ia te faʼahi ʼaia.

ʼE hā mai ai, ʼe tui ia te kau Fakamoʼoni ʼa Sehova ko te Tohi-Tapu ʼe ko te Folafola ʼa te ʼAtua. Kiā nātou, ko te ʼu tohi e 66 ʼo te Tohi-Tapu ʼe haʼu mai te ʼAtua pea ʼe totonu ʼi te faʼahi ʼo te hisitolia. Ko te koga ʼaē ʼe higoaʼi māhani ko te Tauhi Foʼou ʼe natou fakahigoaʼi ko te ʼu Tohi Faka Keleka Faka Kilisitiano, pea ko te Tauhi ʼĀfea ʼe natou fakahigoaʼi ko te ʼu Tohi Faka Hepeleo. Ko tanatou tui ʼe fakatafito ki te ʼu koga ʼaia e lua, te ʼu Tohi Faka Keleka pea mo te ʼu Tohi Faka Hepeleo, pea ʼe natou mulimuli pē ki te ʼu meʼa ʼaē ʼe tohi ai, gata pē mokā faka ʼuhiga ʼihi ʼu kupusiga palalau ki he ʼu meʼa fakatātā. ʼE mahino kiā nātou ʼe lahi ia te ʼu lea faka polofetā ʼi te Tohi-Tapu kua hoko, ko ʼihi ʼe lolotoga hoko nei, pea ko ʼihi ʼe kei ʼamanaki ke fakahoko.

TONATOU HIGOA

Te kau Fakamoʼoni ʼa Sehova? ʼEī, ʼe ko tonatou higoa ʼaia. Ko te higoa ʼaia ʼe ina fakahā ai ʼe natou fakamoʼoni kiā Sehova, ki tona ʼuhiga ʼAtua, pea mo tana ʼu fakatuʼutuʼu. Ko te ʼu kupu “ ʼAtua,” “ ʼAliki,” pea mo “Tupuʼaga”—ohagē ko te ʼu kupu “Pelesitā,” mo “Hau,” pea mo “Senelale”—ʼe ko he ʼu higoa faka tuʼulaga pea ʼe feala ke faka ʼuhiga ki he ʼu hahaʼi kehekehe. Kae ko “Sehova” ʼe ko te huafa ʼo te ʼAtua māfimāfi pea mo te Tupuʼaga ʼo te ʼatulaulau. ʼE fakahā ia te faʼahi ʼaia iā Pesalemo 83:19, ohagē ko tona tuʼu ʼi te Tohi-Tapu ʼaē ko te Bible de Crampon (1905)83:18, NW: “Ke natou ʼiloʼi ko tou huafa, ʼo koe tokotahi, ko SEHOVA, ko koe te Māʼoluga ʼi te kele kātoa.”

Ko te huafa Sehova (peʼe ko Yahvé, ohagē ko tona fakaliliu ʼi te ʼu Tohi-Tapu Katolika Loma La Bible de Jérusalem pea mo te Bible Liénart pea mo ʼihi hahaʼi sivi Tohi-Tapu) ʼe hā teitei tuʼa 7 000 ʼi te ʼu ʼuluaki Tohi Faka Hepeleo. ʼE lahi ia te ʼu Tohi-Tapu ʼe mole tuʼu ai ia te huafa ʼaia kae fetogi ʼaki te kupu “ ʼAtua” peʼe “ ʼAliki.” Kae, māʼiapē lā ʼi te ʼu Tohi-Tapu ʼaia, ʼe feala ke ʼiloʼi e he tahi ia te ʼu vaega ʼi te Faka Hepeleo ʼaē neʼe fakaʼaogaʼi ai te huafa ʼo Sehova, heʼe ʼi te ʼu vaega ʼaia neʼe fetogi ʼaki te ʼu kupu ʼATUA, ʼALIKI pea neʼe tohi ʼaki he ʼu mataʼi tohi mata lalahi. ʼE ʼi ai te ʼu fakaliliu ʼi totatou temi ʼe natou fakaʼaogaʼi ai ia te huafa Sehova peʼe ko Yahvé. ʼE fakaliliu fēnei e te Traduction du monde nouveau iā Isaia 42:8: “Ko au ia Sehova. Koʼenā toku huafa.”

Ko te vaega faka Tohi-Tapu ʼaē ʼe toʼo mai ai e te kau Fakamoʼoni ʼa Sehova ia tonatou higoa ʼe tuʼu ʼi te kāpite 43 ʼo Isaia. ʼE fakatātā ai ia te mālamanei ki he telepinale: ʼE kole ai ki te ʼu ʼatua ʼo te ʼu puleʼaga ke natou foaki ia hanatou kau fakamoʼoni moʼo fakamoʼoni ki tanatou lau ʼaē ʼe natou faitotonu peʼe ke natou fakalogo ki te kau fakamoʼoni ʼa Sehova pea mo natou tali ia te moʼoni. ʼE ʼui fēnei ai e Sehova ki tana hahaʼi: “Ko koutou ko taku kau fakamoʼoni, ko te ʼui ʼaia ʼa Sehova, pea mo taku kaugana ʼaē neʼe au filifili, ke kotou ʼiloʼi ai pea ke kotou tui ai, pea ke kotou mahino ai ko au. ʼI muʼa atu ia au neʼe mole heʼeki faʼu he ʼAtua, pea ʼe mole ʼi ai anai ki muli age. Ko au, ko au ia Sehova, pea ʼe mole he tahi age iā au ʼe ina haofaki.”—Isaia 43:10, 11, Bible de Crampon (1905).

Neʼe ʼi ai te kau fakamoʼoni ʼa Sehova ʼAtua ʼi te kele ʼi te ʼu lauʼi afe taʼu ki muʼa atu ʼo te tupu ʼa Sesu. ʼI te ʼosi fakahā pē ʼaē ʼo ʼihi tagata tui iā Hepeleo kāpite 11, ʼe ʼui fēnei iā Hepeleo 12:1: “Koia, ʼuhi heʼe takatakai tātou e te ʼao lahi ʼo te kau fakamoʼoni, tou liʼaki te ʼu meʼa fuli pē ʼaē ʼe mamafa pea mo te agahala ʼaē ʼe ina tāʼofi gafua ia tātou, pea ke tou lele ʼaki he loto faʼa kātaki ʼi te lele ʼaē kua tuku mai kiā tātou.” Neʼe ʼui fēnei e Sesu iā muʼa ʼo Posio Pilato: “Neʼe au tupu ʼuhi ko te potu ʼaenī, pea neʼe au haʼu ki te mālamanei ʼuhi ko te potu ʼaenī: ko te fakamoʼoni ki te moʼoni.” ʼE fakahigoa ia ia ko “te fakamoʼoni agatonu pea mo moʼoni.” (Soane 18:37; Fakahā 3:14) Neʼe ʼui fēnei e Sesu ki tana kau tisipulo: “ ʼE kotou maʼu anai te mālohi mokā hifo atu anai te laumālie māʼoniʼoni kiā koutou pea ʼe kotou liliu anai ko haku kau fakamoʼoni ʼi Selusalemi, mo Sutea kātoa pea mo Samalia ʼo kaku ki te potu taupotu ʼo te kele.”—Gāue 1:8.

Koia maʼa te toko 6 000 000 tupu hahaʼi iā ʼaho nei, ʼaē ʼe natou tala ia te logo lelei ʼo te Puleʼaga ʼo Sehova ʼaki ia Kilisito Sesu iā fenua e 230 tupu, ʼe tāu mo nātou ke fakahigoaʼi ko te kau Fakamoʼoni ʼa Sehova.

[Kiʼi nota]

[Fakamatala ʼo te pasina 4]

Neʼe natou foaki ia tonatou maʼuli ki te ʼAtua moʼo fai tona finegalo

[Fakamatala ʼo te pasina 4]

ʼE natou tui ko te Tohi-Tapu ʼe ko te Folafola ʼa te ʼAtua

[Fakamatala ʼo te pasina 5]

Te pikipikiga ʼo te huafa pea mo te fai fakamāu ʼi te telepinale

[Fakamatala ʼo te pasina 5]

Ko te toko 6 000 000 tupu kau Fakamoʼoni iā fenua e 230 tupu

[Paki ʼo te pasina 3]

ʼE natou tōkakaga kiā koutou

[Paki ʼo te pasina 4]

Te huafa ʼo te ʼAtua ʼi te lea ʼāfea Faka Hepeleo