Te ʼAoga ʼo Te Logo Lelei Ki Te Maʼuli ʼo Te Hahaʼi ʼo Tokotou Kolo
ʼI TE mālamanei, ʼe tou tautau logo ki te manatu ʼaenī: “Ko te ʼu pelesepeto ʼo te Lotu Faka Kilisitiano ʼe mole honatou ʼaoga ʼi te sōsiete faigataʼa ʼaenī.” Kae ʼi te fai palalau ʼa te tagata takitaki Initia ko Mohandas K. Gandhi pea mo te Hau Pilitānia ʼāfea ʼo Initia ko Irwin, neʼe hā ai te kehekehe ʼaupitō ʼo tanā ʼu manatu. Neʼe fehuʼi age e Irwin kiā Gandhi, peʼe ʼi tana manatu, koteā ʼaē kā ina fakatokatoka anai ia te fefihiʼaki ʼa Pilitānia pea mo Initia. Neʼe toʼo e Gandhi te Tohi-Tapu ʼo ina ʼavahi ʼi te kāpite nima ʼo Mateo pea ina ʼui fēnei: “Kā liliu anai tou fenua ʼo felōgoi lelei mo toku fenua ʼuhi ko te ʼu akonaki ʼa Kilisito ʼi tana Akonaki ʼi te Moʼuga, pea hoki feala leva ke tou fakatokatoka ia te ʼu fihifihia ʼo totā ʼu fenua pea mo ʼaē ʼo te mālamanei kātoa.”
ʼE talanoa ia te akonaki ʼaia ki te kumi ʼo te ʼu meʼa fakalaumālie, mo te agamalū, mo te tokalelei, mo te loto manavaʼofa, pea mo te ʼofa ki te faitotonu. ʼE mole tauteaʼi pē ia te fai fakapō kae ʼe toe tauteaʼi mo te ʼita ʼaē ki he tahi, pea mole tauteaʼi pē ia te tono kae ʼe toe fēia foki mo te ʼu holi fakavale. Pea ʼe fakafeagai ki te ʼu hoko māvete ʼa te ʼu taumātuʼa, heʼe mavetevete ai te ʼu loto fale pea mo mamahi ai te ʼu fānau. ʼE ʼui fēnei mai kiā tātou: ‘Kotou ʼoʼofa kiā nātou ʼaē ʼe fehiʼa kiā koutou, kotou foaki kiā nātou ʼe nofo ʼi te faigataʼa, ʼaua naʼa kotou fakamāu ʼaki he aga fefeka, kotou fai ki te hahaʼi ia te ʼu meʼa ʼaē ʼe kotou loto ke fai atu kiā koutou.’ Ko te ʼu tokoni fuli ʼaia, kapau ʼe maʼuliʼi, pea ʼe maʼu ai he ʼu tuʼuga tapuakina. Kapau ʼe lahi ia nātou ʼaē ʼe natou mulimuli kiai ʼi tokotou kolo, pea ʼe lelei anai ia te maʼuli faka kolo!
ʼE faiga e te kau Fakamoʼoni ʼa Sehova ke natou mulimuli ki te faʼahi ʼaia. ʼE akoʼi kiā nātou ʼi te Tohi-Tapu ke natou fakaʼapaʼapa ki te nofo ʼohoana. ʼE natou akoʼi ia tanatou ʼu fānau ʼaki te ʼu pelesepeto faitotonu. ʼE faka maʼuhiga ia te maʼuli faka fāmili. Ko te ʼu fāmili ʼaē ʼe logotahi ʼe ko he tapuakina ʼaia ki tokotou vāhaʼa fale, pea mo tokotou fenua. ʼE lahi te ʼu faʼifaʼitaki ʼi te hisitolia ʼo te ʼu mālohi faka mālamanei neʼe tō ʼuhi ko te māvetevete ʼo te ʼu fāmili pea mo te tuputupu ʼo te ʼu aga heʼeʼaoga. Kapau ʼe lahi ia te ʼu hahaʼi pea mo te ʼu fāmili ʼaē ʼe uga e te kau Fakamoʼoni ʼa Sehova ke natou mulimuli ki te ʼu pelesepeto faka Kilisitiano, pea ʼe siʼisiʼi anai ia te agamālohi ʼa te kau tūpulaga, te aga heʼeʼaoga, pea mo te fai fakapō ʼi tokotou kolo.
Ko te fakapalatahi ʼe ko te fihifihia lahi ʼe maʼu ʼi te ʼu kolo pea mo te ʼu fenua. Kae neʼe ʼui fēnei e te ʼapositolo ko Petelo: “Kua au mahino ko te ʼAtua ʼe mole fakapalatahi; kae ʼi te puleʼaga fuli pē ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.” Pea neʼe tohi fēnei e Paulo: “ ʼE mole he Sutea peʼe ko he Keleka, ʼe mole he kaugana peʼe ko he tahi ʼe ʼāteaina, ʼe mole he tagata peʼe ko he fafine; heʼe ko koutou fuli ʼe ko te meʼa pē e tahi ʼo fakatahi mo Kilisito Sesu.” (Gāue 10:34, 35; Kalate 3:28) ʼE mulimuli ia te kau Fakamoʼoni ʼa Sehova ki te ʼu palalau ʼaia. ʼI tonatou ʼu pilo lalahi, ʼi te ʼu Petele, pea mo te ʼu kōkelekāsio, ʼe māʼuʼuli pea mo gāue fakatahi ai ia te ʼu hahaʼi ʼo te ʼu lanu kehekehe.
ʼI Afelika, ʼe ʼi ai te ʼu telepī ʼe mole feala ai he fakatahitahi kae mole hoko ai he fetauʼaki. Kae ʼi te ʼu fakatahi ʼa te kau Fakamoʼoni ʼa Sehova ʼaē ʼe fai ai, ko te ʼu hahaʼi mai te ʼu telepī kehekehe ʼe natou kakai, mo momoe pea mo tauhi fakatahi ʼi te logotahi pea mo te ʼofa. ʼE punamaʼuli te kau takitaki ʼo te puleʼaga ʼi tanatou sisio ki te faʼahi ʼaia. Neʼe tā ʼi te sulunale ʼi New York, ia te Amsterdam News ʼo te ʼaho 2 ʼo ʼAukusitō 1958, ia te ʼalatike ki te mālohi faka logotahi ʼo te Lotu Faka Kilisitiano moʼoni. Neʼe toʼo ai ia te faʼifaʼitaki ʼo te fakatahi faka mālamanei ʼaē neʼe tou talanoa kiai ki muʼa atu, ʼaē neʼe fakatahitahi ai te kau Fakamoʼoni ʼe teitei toko 250 000 tupu ʼi New York.
“Neʼe fakatahitahi fakafiafia pea mo faʼifaʼitaliha ai ia te kau ʼUli, mo te kau papālagi, pea mo te hahaʼi mai te ʼu fenua Asia, mai te ʼu faʼahiga maʼuli kehekehe pea mo ʼomai mai te ʼu potu fuli pē ʼo te kele. . . . Ko te kau Fakamoʼoni mai te ʼu fenua e toko 120 neʼe natou māʼuʼuli pea mo tauhi fakatahi ʼi te tokalelei, ʼo fakahā ai ki te kau Amelika ʼe mole he meʼa ʼe faigataʼa. . . . Ko te fakatahi ʼaia ʼe ko te faʼifaʼitaki lelei ʼe fakahā ai pe lava feafeaʼi ki te hahaʼi ke natou gāue pea mo māʼuʼuli fakatahi.”
Tokolahi ʼe natou ʼui anai ko te ʼu pelesepeto ʼo te Lotu Faka Kilisitiano ʼe mole honatou ʼaoga ʼi te mālama ʼaenī. Kae neʼe ʼi ai koa he tahi faʼahi neʼe ʼaoga fēia peʼe ʼaoga anai ki te hahaʼi? Ko te ʼu pelesepeto faka Kilisitiano ʼe maʼuhiga moʼoni anai mo kapau ʼe maʼuliʼi ʼi te temi nei ʼi tokotou kolo, pea ʼe ko te tafitoʼaga anai ʼo te logotahi ʼo ‘te ʼu puleʼaga fuli, mo te ʼu telepī, pea mo te hahaʼi’ ʼi te kele kātoa ʼi te pule ʼo te Puleʼaga ʼo te ʼAtua ki te mālamanei.—Fakahā 7:9, 10.
[Paki ʼo te pasina 23]
ʼE gāue fakatahi ia te ʼu hahaʼi ʼo te ʼu lanu kehekehe
[Paki ʼo te pasina 24]
ʼE ʼaoga ia te Lotu Faka Kilisitiano. Neʼe ʼi ai koa he tahi faʼahi neʼe ʼaoga fēia ki te hahaʼi?