Mokā Pulihi Anai Te Fakapalatahi!

NEʼE ʼui fēnei e te tagata poto ko Albert Einstein, ʼo ʼuhiga mo te mālama agakovi ʼaenī, ʼe faigataʼa age ia te tauʼi ʼo te fakapalatahi ʼi te vaheʼi ʼo he atome. ʼO toe feiā aipe, ko Edward Murrow, te tagata fai sulunale neʼe liliu ʼo ʼiloa lolotoga te Lua Tau Faka Malamanei pea ki muli age neʼe liliu ʼo pule ʼi te Pilō ʼo te ʼu Naunau ʼi Amelika, neʼe ina ʼui “ ʼe mole feala ki he tahi ke ina pulihi te fakapalatahi​—ʼe feala pe ke fakamoʼoni ki te faʼahi ʼaia.”

ʼE moʼoni koa te ʼu fakamatala ʼaia? ʼE mole feala koa ke pulihi te fakapalatahi pea mo te fehiʼa ki te lanu? Koteā te manatu ʼa te ʼAtua ʼo ʼuhiga mo te fakapalatahi?

Ko Te ʼAtua ʼe Mole Fakapalatahi

Ko te Tohi-Tapu ʼe palalau ʼo fakafeagai ki te fakapalatahi. (Tāʼaga Lea 24:23; 28:21) ʼE ʼui e te Tohi-Tapu “ko te poto mai ʼoluga ʼe maʼa ia, pea ʼe tokalelei, agapoto, fakalogo fakalelei, fonu ʼi te manavaʼofa pea mo te ʼu fua ʼe lelei, ʼe mole fakapalatahi ia, ʼe mole malualoi ia.” (Sake 3:​17) Neʼe ʼiloga lelei te taʼi poto ʼaia ʼi te kau tuʼi fakamāu ʼo te Iselaele ʼāfea. Neʼe fakatotonu fēnei age kia nātou: “ ʼE mole tonu ke koutou heʼe faitotonu ʼi te fakamāu. ʼE mole tonu ke koutou fakapalatahi kia ia ʼaē ʼe veliveli, pea ʼe mole tonu ke koutou leleiʼia ia ia ʼaē ʼe lahi.”​—Levitike 19:15.

ʼE tuʼu maʼu pe te manatu ʼa te Tohi-Tapu ʼaē ʼe fakafeagai ki te fakapalatahi pea mo te fakakeheʼi, ko te faʼahi ʼaia neʼe fakahā lelei e Sesu Kilisito pea mo tana ʼu ʼapositolo ko Petelo mo Paulo. Neʼe mole fakapalatahi ia Sesu kia nātou ʼaē “neʼe ʼāhua pea mo mavetevete, ohage he faga ōvi ʼe mole honatou tagata tauhi.” (Mateo 9:​36) Neʼe faiakonaki fēnei: “Tuku takotou fakamāu ʼaki te meʼa ʼaē ʼe hā, kae koutou fakamāu ʼaki he fakamāu ʼe faitotonu.”​—Soane 7:​24.

ʼE fakafimālie tatou e Petelo mo Paulo e ko Sehova ʼAtua totonu ʼe mole fakapalatahi. Neʼe ʼui fēnei e Petelo: “ ʼI te moʼoni, ʼe ʼau mahino ai ko te ʼAtua ʼe mole fakapalatahi, kae ʼi te fenua fuli pe ko te tagata ʼaē ʼe manavasiʼi kia te ia pea mo maʼuliʼi te faitotonu ʼe ina leleiʼia.” (Gāue 10:34, 35) ʼE ʼui fēnei e te ʼapositolo ko Paulo kia tatou: “ ʼE mole fakapalatahi te ʼAtua.”​—Loma 2:​11.

Te Malave ʼo Te Tohi-Tapu Ki Te Hahaʼi

ʼE maʼu e te Tohi-Tapu ia te mālohi ʼaē ke ina fetogi te ʼu ʼulugaaga ʼo nātou ʼaē ʼe nātou tuku ke taki nātou e te Tohi-Tapu. ʼE ʼui fēnei ia Hepeleo 4:​12: “Ko te folafola ʼa te ʼAtua ʼe maʼuli pea ʼe ina fakalogoʼi tana gāue.” ʼAki te tokoni ʼa Sehova, ko he tahi ʼe fakapalatahi ʼe toe feala pe foki ke ina fetogi tana ʼu faʼahiga manatu pea mo liliu ko he tahi ʼe mole fakapalatahi ʼi tana ʼu aga mo te hahaʼi.

Ohage la, tou toʼo te faʼifaʼitaki ʼa Saulo ʼo Talesi. Ohage ko te fakamatala ʼo te Tohi-Tapu, ʼi te tahi temi neʼe fakafeagai mālohi ki te kokelekasio faka Kilisitiano, he neʼe mulimuli ki te ʼu talatisio fefeka faka lotu. (Gāue 8:​1-3) ʼAki te talatisio faka Sutea, neʼe tui papau ia ko te kau Kilisitiano fuli neʼe ko te kau ʼaposita pea mo te ʼu fili ʼo te tauhi moʼoni. Ko tana fakapalatahi neʼe ina taki ia ia ke lagolago ki te tāmateʼi ʼo te kau Kilisitiano. ʼE ʼui e te Tohi-Tapu neʼe “kei mānava ki te tuʼutāmaki pea mo te fakapō ʼo fakafeagai ki te kau tisipulo ʼo te ʼAliki.” (Gāue 9:1) ʼI tana lolotoga fai te meʼa ʼaia neʼe ina ʼui ia ʼe ina fai he tauhi taputapu ki te ʼAtua.​—Vakaʼi ia Soane 16:2.

Kae, ko Saulo ʼo Talesi neʼe feala ke ina pulihi tana fakapalatahi. Neʼe liliu ai mo ia totonu ko he Kilisitiano! Ki muli age, ʼaki tona higoa ko Paulo, neʼe liliu ko te ʼapositolo ʼa Sesu Kilisito, neʼe ina tohi fēnei: “Ia ʼau ʼaē ʼi muʼa atu neʼe ʼau laukovi, neʼe ʼau fakataga, neʼe ʼau fiatuʼu. Kae, neʼe fakahā mai te manavaʼofa, ʼuhi he neʼe ʼau ʼi te fakapōʼuli pea neʼe ʼau fai kae neʼe mole ʼau maʼu te tui.”​—1 Timoteo 1:13.

Neʼe mole gata pe kia Paulo tana haga ʼaē ʼo fetogi tana ʼu faʼahiga manatu. ʼI tana tohi ʼaē kia Tito, te kaugā fai faka mafola evaselio, neʼe fakatotonu e Paulo ki te kau Kilisitiano “ke ʼaua naʼa nātou laukovi ki he tahi, ke ʼaua naʼa nātou liliu ko ni ʼu hahaʼi fuhu, ke nātou popoto, ʼo nātou fakahā he agamālū ki te tagata fuli pe. Mo mātou foki, ʼi te temi ʼaē, neʼe mātou vavale, talagataʼa, hēʼia, popūla ki he ʼu holi pea mo he ʼu faʼahiga lelei kehekehe, ʼo maʼuli ʼi te agakovi pea mo te maheka, mo fakalialia, ʼo mātou fefehiʼaʼaki.”​—Tito 3:2, 3.

Koutou Pulihi Te Fakapalatahi

Ia ʼaho nei, ko te kau Kilisitiano moʼoni ʼe nātou faiga ke nātou muliʼi te tokoni ʼaia. ʼE nātou faigaʼi ke ʼaua naʼa nātou fakamāuʼi te hahaʼi ʼaki pe tanatou ʼu manatu. Ko te aga ʼaia ʼe ina tāʼofi nātou mai te ‘laukovi’ ki te hahaʼi. ʼE nātou leleiʼia te fale fakatautehina ʼi te malamanei katoa, ʼaē ʼe fakalaka age ia ʼi te ʼu tuʼakoi ʼo te mālama ʼaenī ʼo ʼuhiga mo te tauhi fakavale ki he puleʼaga, pea mo te lanu.

Tou vakaʼi te meʼa ʼaē neʼe hoko kia Henrique, te tagata kili ʼuli ʼo Pelesile. Neʼe felāveʼi mo te fakapulepule neʼe fai kia ia, pea neʼe fehiʼa lahi ki te hahaʼi papālagi. ʼE ina fakamahino fēnei: “Ko te ʼu Fakamoʼoni papālagi e lua neʼe ʼōmai ki toku ʼapi ʼo palalau mai ki te huafa ʼo te ʼAtua. ʼI te kamata, neʼe mole ʼau fia fagono he neʼe mole ʼau tui ki te hahaʼi papālagi. Kae neʼe mole tuai pea neʼe ʼau ʼiloʼi ko tanā logo ʼe moʼoni. Koia, neʼe ʼau tali ai te ako Tohi-Tapu. Ko te ʼuluaki fehuʼi ʼaē neʼe ʼau fai, ‘ ʼE kaugamālie koa te hahaʼi kili ʼuli ʼi tokotou ʼēkelesia.’ Neʼe nā tali mai ‘Ei.’ Pea neʼe ina fakahā mai te paki fakaʼosi ʼo te tohi Recueil d’histoires bibliques,a ʼaē ʼe hā ai te ʼu tamaliki ʼe lanu kehekehe. Neʼe tuʼu ai te kiʼi tama kili ʼuli, pea ko te faʼahi ʼaia neʼe ina fakaloto mālohiʼi ai ʼau. Ki muli age, neʼe ʼau ʼaʼahi te Fale ʼo te Puleʼaga ʼa te kau Fakamoʼoni ʼa Sehova, ʼo ʼau sio ai ki te hahaʼi ʼe lanu kehekehe ʼe nātou fefakaʼapaʼapaʼaki. Ko te faʼahi ʼaia neʼe maʼuhiga ʼaupito kia ʼau.”

ʼI te temi nei, ʼi tana kua liliu ko he Fakamoʼoni ʼa Sehova, ʼe fiafia ia Henrique ʼi tana kau ki te fale fakatautehina faka Kilisitiano. ʼE mahino kia ia ko te kolōlia ʼe mole maʼu ia e he tagata. ʼE ina ʼui fēnei: “Ia ʼaho nei, ʼe ʼau fakafetaʼi kia Sehova pea mo Sesu ki te ʼu meʼa fuli ʼaē neʼe nā fai maʼa ʼaku. ʼE ʼau gāue mo te ʼu lauʼi miliona kaugana agatonu ʼa Sehova, mai te ʼu lanu kehekehe, pea mo te ʼu fenua kehekehe, ʼe logo tahi ʼi te fakatuʼutuʼu e tahi.”

ʼI tana tuputupu ake, neʼe tau mo Dario te fakapalatahi. ʼI tona taʼu 16, neʼe ina kamata ako te Tohi-Tapu mo te kau Fakamoʼoni ʼa Sehova. Neʼe ina ʼui fēnei: “ ʼI te lotolotoiga ʼo te kau Fakamoʼoni, neʼe ʼau logoʼi ʼe mole ʼi ai he ʼu manatu ʼo he lanu ʼe lahi age.” Neʼe ōfo ʼi te ʼofa lahi ʼaē neʼe maʼu ai. Neʼe ina tokagaʼi tāfito neʼe maʼu e te hahaʼi ʼe lanu kehekehe tonatou ʼu maʼua ʼi te kokelekasio. ʼI te temi ʼaē ʼe hoko ai kia ia he ʼu faʼahiga fakapalatahi peʼe ko he fakakeheʼi mai te hahaʼi ʼo tuʼa, ʼe manatuʼi e Dario ko Sehova ʼe ʼofa ki te hahaʼi ʼo te ʼu puleʼaga kehekehe, mo te ʼu telepi kehekehe pea mo te ʼu lea kehekehe.

ʼE Lava Feafeaʼi Ke Tou Tauʼi

Ko tatou fuli ʼe tou loto ke faka maʼuhigaʼi tatou pea mo fakaʼapaʼapaʼi tatou. Ko te tupuʼaga la ʼaia ka fakapalatahiʼi tatou ʼe faigataʼa tona tauʼi. ʼE mole puipui tatou e te kokelekasio faka Kilisitiano mai te ʼu fakapalatahi fuli ʼo te mālama agakovi ʼaenī. ʼI te temi fuli pe ʼaē ʼe pule ai ia Satana te Tevolo ki te ʼu meʼa ʼo te mālama, ʼe ʼi ai anai pe te heʼe faitotonu. (1 Soane 5:​19) ʼE fakatokagaʼi fēnei mai ia Fakahā 12:12 kia tatou: “Malaʼia ki te kele pea mo te tai, he kua hifo atu te Tevolo kia koutou, mo tona ʼita lahi, he kua ina ʼiloʼi kua nounou tona temi.” Ko tana fakatuʼutuʼu ʼe mole gata pe ʼi te fakatupu lotovaivai. ʼE fakatatau ia ia ki he manu fekai. ʼE ʼui fēnei mai e te ʼapositolo ko Petelo kia tatou: “Ko tokotou fili, ia te Tevolo, ʼe hage ko he laione ʼe gugulu, ʼe feʼaluʼaki ʼo ina kumi ke ina kai he tahi.”​—1 Petelo 5:8.

ʼE toe ʼui fēnei mai e te Tohi-Tapu kia tatou: “Koia ke koutou fakalogo ki te ʼAtua; kae ke koutou fakafeagai ki te Tevolo, pea ʼe hola mamaʼo anai ia koutou.” (Sake 4:7) Ko te tokoni lelei ʼaia moʼo tauʼi ʼo te fakapalatahi ʼe ko te kumi ʼo te puipui ʼa te ʼAtua, ohage ko tona fai e te Hau ko Tavite: “Ê toku ʼAtua, tuku mai ke ʼau hāo mai te nima ʼo te agakovi, mai te nima ʼo ia ʼaē ʼe aga heʼe faitotonu pea mo agamālohi.” (Pesalemo 71:4) ʼE toe feala pe foki ke tou faikole ohage ko te tagata fai pesalemo, ʼaē neʼe ina ʼui fēnei: “Fakahā mai te ʼofa, Ê ʼAtua, koteʼuhi neʼe kumi e te tagata kelekele ke ina puke fakamālohi ʼau. Neʼe ina tauʼi ʼau ʼi te ʼaho katoa, ʼe ina fakamamahiʼi ʼau.”​—Pesalemo 56:1.

ʼE tali feafeaʼi anai e te ʼAtua ki te ʼu taʼi faikole ʼaia? ʼE tali fēnei e te Tohi-Tapu: “ ʼE ina hāofaki anai te masiva ʼaē ʼe kalaga ki he tokoni, ʼo toe feiā ki ʼaē ʼe lotomamahi pea mo ia ʼaē ʼe mole he tahi ʼe tokoni age kia ia. ʼE ʼofa anai ia kia ia ʼaē ʼe veliveli pea mo ʼaē ʼe masiva, pea ʼe ina hāofaki anai te ʼu nefesi ʼo te kau masiva.” (Pesalemo 72:12, 13) ʼI meʼa lelei foki te ʼiloʼi ʼaē ʼe fakafimālieʼi anai e Sehova ʼi tona temi tonu ia nātou ʼaē ʼe tau mo te heʼe faitotonu!

“ ʼE Mole Nātou Fai Anai He Meʼa ʼe Kovi”

ʼE haga tauʼi pe e te ʼu puleʼaga ʼo te malamanei te fakapalatahi ʼaki tanatou ʼu lao pea mo tanatou ʼu fakatuʼutuʼu. ʼE nātou haga fakapapau pe te fakatatau ʼo te hahaʼi pea mo te faitotonu. Kae ʼe mole feala ia ke nātou fakahoko. (Pesalemo 146:3) ʼE gata pe ki te ʼAtua ʼaē ʼe feala ke ina fakahoko pea mo ina pulihi anai te ʼu faʼahiga fakapalatahi fuli. ʼE ina fetogi anai te malamanei ko he famili e tahi ʼe logo tahi. Ko te “toe hahaʼi tokolahi ʼe mole feala tona lau e he tahi, mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli” ʼe nātou hāo anai ʼi te fakaʼosi ʼo te tuʼu agakovi ʼaenī pea mo nātou fiafia ʼi te maʼuʼuli ʼi te tokalelei.​—Fakahā 7:9, 10.

ʼE pulihi anai e Sehova te ʼu meʼa kovi fuli ʼaē ʼe tupu ʼaki ai te fakapalatahi ʼo ʼuhiga mo te lanu pea mo te haʼuʼaga ʼo he tahi. Koutou fakakaukauʼi muʼa, ʼe mole he tahi anai ʼe gaohi koviʼi. “ ʼE nātou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamanavaheʼi ia nātou.” (Mikea 4:4) Pea ʼe ʼui fēnei ia Isaia 11:9: “ ʼE mole nātou fai anai he meʼa ʼe kovi.”

Kapau ʼe koutou tau mo he fakapalatahi ʼi te temi nei, ko te ʼamanaki taulekaleka ʼaia ʼo te temi ka haʼu, ʼe ina fakaloto mālohiʼi anai tokotou ʼu vāhaʼa mo Sehova. ʼE tokoni anai kia koutou ke koutou tauʼi te ʼu aga heʼe faitotonu ʼo te tuʼu agakovi ʼaenī. ʼI takotou tauʼi te fakapalatahi pea mo koutou sisio ki te temi ka haʼu, koutou muliʼi te tokoni fakapoto ʼaenī ʼo te Tohi-Tapu: “Koutou lototoʼa, pea ke mālohi tokotou loto, ia koutou fuli ʼaē ʼe fakatalitali kia Sehova.”​—Pesalemo 31:⁠24.

[Haʼuʼaga ʼo te paki pasina 4]

U.S. National Archives photo