Neʼe Fai Koa Kia Koutou He Fakapalatahi?

KOTEĀ ʼaē ʼe tatau ai te agamālohi fakafenua, te fehiʼa ki te lanu, mo te fakakeheʼi, pea mo te tāmateʼi ʼo he lanu? Ko te ʼu fua fuli ʼaia ʼe mafola pe ʼuhi ko te ʼuhigaʼi tagata: te fakapalatahi!

Koteā te faka ʼuhiga ʼo te fakapalatahi? ʼE fakamahino fēnei e te tikisionalio ʼe ko “he manatu neʼe faʼu kae neʼe mole toʼo he temi peʼe mole tokaga ke fakamāu ʼaki te faitotonu.” ʼI totatou ʼuhiga agahala, ʼe feala pe ke tou fakapalatahi. Lagi ʼe koutou manatuʼi te ʼu lakaga ʼaē neʼe koutou fakamāuʼi ai he tahi kae neʼe mole koutou ʼiloʼi tona ʼu ʼaluʼaga fuli. ʼE fakakeheʼi e te Tohi-Tapu te ʼu taʼi manatu fakapalatahi ʼaia mo te faʼahiga fakamāu ʼaē ʼe fai e Sehova ʼAtua. ʼE ʼui fēnei e te Tohi-Tapu: “Ko te sio ʼa te tagata ʼe mole ko te sio ʼa te ʼAtua, ʼuhi ʼe sio te tagata ki te meʼa ʼaē ʼe hā ki te ʼu mata; kae kia Sehova, ʼe sio ia ki te ʼuhiga ʼo te loto.”​—1 Samuele 16:7.

ʼE Fakatupu Mamahi Te Fakapalatahi

ʼE mahino papau ia, ʼi ʼihi temi neʼe feala ke fakamāuʼi hala tatou e he tahi. (Vakaʼi ia Tagata Tānaki 7:​21, 22.) ʼI te agamāhani, neʼe kua fai mai kia tatou fuli te ʼu lau fakapalatahi. Kae, kapau ʼe tou galoʼi fakavilivili te ʼu lau fakapalatahi ʼaia ʼe lagi siʼisiʼi anai te mamahi peʼe mole tou mamahi pe la. Kae ko te taupau ʼo te ʼu taʼi manatu ʼaia ʼaē ʼe feala ai ke fakatupu mamahi. Ko te faʼahi ʼaia ʼe feala ke ina fakahalaʼi tatou ke tou tui ki he loi. Ohage la, ʼuhi ko te fakapalatahi, ko ʼihi hahaʼi ʼe nātou tui moʼoni ʼe feala pe ki he tahi ke mānumānu, peʼe piko, peʼe vale, peʼe fialahi ʼuhi pe heʼe kau ki te faʼahiga kūtuga faka lotu, ki te faʼahiga lanu, peʼe ki he faʼahiga fenua.

Ko te ʼu taʼi manatu hala ʼaia, ʼe lahi ai te hoko ʼo te heʼe faitotonu, te aga fakavale, toe feiā aipe mo te gaohi koviʼi ʼo ʼihi. Ko te toko miliona hahaʼi neʼe mamate ʼi te ʼu fai fakapō, ʼi te ʼu tāmateʼi ʼo he lanu, pea mo te tahi ʼu faʼahiga fakapalatahi.

ʼI te malamanei katoa, neʼe tauʼi e te ʼu puleʼaga te fakapalatahi ʼaki te ʼu lao neʼe mole feala ke maumauʼi, ʼo ʼuhiga mo te ʼāteaina, te fīmālie pea mo te fakatatau ʼo te hahaʼi. Kapau ʼe koutou lau te lao ʼo tokotou fenua, ʼe mahino papau ia ʼe koutou maʼu ai anai he fakatuʼutuʼu peʼe ko he fakatotonu ʼe ina puipui te ʼu meʼa ʼaē ʼe feala ke fai e te hahaʼi, ʼo ʼuhiga mo tonatou lanu, mo tonatou ʼuhigaʼi tagata peʼe fafine, peʼe ko tanatou lotu. Pea tahi ʼaē meʼa, ko te fakapalatahi pea mo te fakakeheʼi ʼo te hahaʼi ʼe tuputupu ʼi te malamanei katoa.

Neʼe fai koa kia koutou he fakapalatahi? Neʼe lau koa ʼe koutou mānumānu, piko, vale, peʼe fialahi ʼuhi pe ko takotou lanu, tokotou taʼu, tokotou ʼuhigaʼi tagata peʼe fafine, tokotou fenua, peʼe ʼuhi ko takotou lotu? Neʼe fakafisi atu koa kia koutou he ʼu faigamālie ki he ako, ki he gāue, ki hokotou ʼapi peʼe ki he tokoni faka puleʼaga ʼuhi ko te fakapalatahi? Kapau koia, ʼe feafeaʼi anai takotou tauʼi?

[Paki ʼo te pasina 3]

Ko te taupau ʼo he fakapalatahi ʼe tupu ai te fehiʼa ki te lanu

[Haʼuʼaga ʼo te paki]

Nina Berman/Sipa Press