Kapite Fitu
He Koʼe Neʼe Fakagafua e Te ʼAtua Te Agakovi?
1, 2. (a) Koteā ʼaē neʼe feala ke hoko kia tatou, mo kanapaula neʼe fakaʼauha atu aipe e Sehova ia Atama mo Eva ʼi Eteni? (b) Koteā te ʼu fakatuʼutuʼu ʼofa neʼe fai e Sehova maʼa tatou?
NEʼE ʼui fēnei e te pateliaka ko Sakopo: “Ko te ʼu ʼaho ʼo toku ʼu taʼu maʼuli, kua liliu ʼo siʼisiʼi pea mo fakatupu hoha.” (Senesi 47:9) ʼO toe feiā pe neʼe ʼui e Sopo, ko te tagata “ ʼe nounou tona maʼuli pea ʼe fonu ʼi te lotohoha.” (Sopo 14:1) Ohage ko nāua ʼaia, tokolahi ia tatou neʼe hoko ki ai te ʼu faigataʼaʼia, mo te ʼu aga heʼe faitotonu, pea mo te ʼu tuʼutāmaki. Kae neʼe mole heʼe faitotonu te ʼAtua ʼi tana tuku ʼaē ke tou tutupu ake. ʼE moʼoni ʼe mole tou maʼu he sino pea mo he fakakaukau haohaoa, pea ʼe mole tou nonofo ʼi te Palatiso ʼaē neʼe nonofo ai ia Atama pea mo Eva ʼi te kamataʼaga. Kae koteā ʼaē neʼe feala ke hoko mo kanapaula neʼe fakaʼauha atu aipe e Sehova ia nāua ʼi tanā talagataʼa? ʼE moʼoni, neʼe feala ke molehi ai te mahaki, te lotomamahi pea mo te mate, kae neʼe toe molehi ai foki mo te tagata. Neʼe mole feala ia ke tou tutupu. Ko Sehova, ʼaki tona manavaʼofa, neʼe ina tuku he temi kia Atama pea mo Eva ke nā maʼu fānau, logola ʼe ko he ʼu fānau agahala. Pea ʼaki ia Kilisito, neʼe fai e Sehova he ʼu fakatuʼutuʼu ke tou toe maʼu te meʼa ʼaē neʼe puli ia Atama—te maʼuli heʼegata ʼi te palatiso ʼi te kele.—Soane 10:10; Loma 5:12.
2 ʼE fakaloto mālohi kia tatou hatatou ʼamanaki ki te maʼuli heʼegata ʼi te mālama foʼou, ʼi te Palatiso, ʼe mole toe maʼu ai anai te mahaki, te lotomamahi pea mo te mate, pea ʼe mole toe maʼu ai anai te hahaʼi agakovi. (Tāʼaga Lea 2:21, 22; Apokalipesi 21:4, 5) Kae ʼe toe fakahā mai e te Tohi-Tapu, tatau aipe kapau ʼe maʼuhiga ʼaupito kia tatou pea mo Sehova totatou hāofaki, kae ʼe ʼi ai te tahi faʼahi ʼe maʼuhiga age.
ʼUhi Ko Tona Huafa Lahi
3. Koteā ʼaē ʼe pipiki ki te fakahoko ʼo te finegalo ʼa Sehova ʼo ʼuhiga mo te kele pea mo te malamanei?
3 ʼE ʼi ai te pikipikiga ʼo te huafa ʼo te ʼAtua pea mo te fakahoko ʼo tona finegalo ʼo ʼuhiga mo te kele pea mo te malamanei. Ko tona huafa ko Sehova ko tona faka ʼuhiga “ ʼE Ina Fakahoko.” ʼE pipiki ki tona huafa tona ʼuhiga Tuʼi ʼAliki ʼo Te ʼAtulaulau, te ʼAtua Lahi ʼaē ʼe ina fai he ʼu fakatuʼutuʼu pea mo ina fakahoko, pea mo ʼAtua ʼo te moʼoni. ʼUhi ko te tuʼulaga ʼo Sehova, ko te tokalelei pea mo te fīmālie ʼo te ʼatulaulau, ʼe nā fakamaʼua ke fakalogo te tagata fuape kia te ia, pea mo foaki kia te ia te fakaʼapaʼapa ʼaē ʼe tāu mo tona huafa pea mo te ʼu faʼahi ʼaē ʼe pipiki kiai.
4. Neʼe koteā te fakatuʼutuʼu ʼa Sehova ʼo ʼuhiga mo te kele?
4 ʼI tana ʼosi fakatupu ia Atama pea mo Eva, neʼe foaki e Sehova kia nāua te gāue. Neʼe ina fakahā lelei age neʼe mole tonu pe ke nā puleʼi te kele katoa—ʼo fakalahi te ʼu tuʼakoi ʼo te Palatiso—kae ke nā toe fakafonu foki ʼaki tonā hōloga. (Senesi 1:28) ʼE iku noa anai koa te fakatuʼutuʼu ʼaia ʼuhi kua nā agahala? ʼE mahino ia, ʼe laukoviʼi anai te huafa māʼoluga ʼo Sehova mo kapau ʼe mole ina fakahoko tana fakatuʼutuʼu ki te kele pea mo te hahaʼi!
5. (a) Kapau ʼe kai e te ʼuluaki taumatuʼa te fuaʼi ʼakau ʼo te ʼiloʼi te meʼa ʼaē ʼe lelei pea mo te meʼa ʼaē ʼe kovi, ko ʼafea ʼaē ka nā mamate ai? (b) Neʼe fakahoko feafeaʼi e Sehova tana ʼu palalau ia Senesi 2:17, pea mo mulimuli pe ki tana fakatuʼutuʼu ʼo ʼuhiga mo te kele?
5 Neʼe fakatokagaʼi age e Sehova kia Atama pea mo Eva, kapau ʼe nā talagataʼa pea mo nā kai ki te fuaʼi ʼakau ʼo te ʼiloʼi ʼo te meʼa ʼaē ʼe lelei pea mo te meʼa ʼaē ʼe kovi, ʼe nā mamate anai ʼi “te ʼaho” ʼaē ka nā kai kiai. (Senesi 2:17) ʼO mulimuli ki tana ʼu palalau ʼaia, neʼe ina fakatūʼa nāua ʼi te ʼaho pe ʼaē neʼe nā agahala ai pea mo ina tautea nāua ki te mate. Kia mata ʼo te ʼAtua, neʼe mamate ia Atama pea mo Eva ʼi te ʼaho pe ʼaia. Kae moʼo fakahoko tana fakatuʼutuʼu ʼo ʼuhiga mo te kele, neʼe fakagafua e Sehova ke nā maʼu hanā fānau ʼi muʼa ʼo tanā mamate. Kae ʼuhi ʼaē kia mata ʼo te ʼAtua ko taʼu e 1 000 ʼe ko he ʼaho e tahi, koia ʼi te mate ʼa Atama ʼi tona taʼu 930, neʼe mole heʼeki katoa “te ʼaho.” (2 Petelo 3:8; Senesi 5:3-5) Koia neʼe agatonu Sehova ʼi te temi ʼaē neʼe ina fakahoko ai te tūʼa, pea ko tana fakatuʼutuʼu ʼo ʼuhiga mo te kele neʼe mole fetogi ʼi tanā mamate. Kae lolotoga he kiʼi temi nounou, ʼe ina tuku te hahaʼi agahala pea mo te hahaʼi agakovi ke nātou maʼuʼuli.
6, 7. (a) ʼO mulimuli kia Ekesote 9:15, 16, he koʼe ʼe fakagafua e Sehova ke haga maʼuʼuli te kau agakovi lolotoga he temi? (b) ʼO ʼuhiga mo Falaone, neʼe fakahā feafeaʼi e Sehova tona mālohi, pea koteā ʼaē neʼe ina faka ʼiloa Tona huafa? (c) Koteā anai ka hoko ʼi te fakaʼosi ʼo te tuʼu agakovi ʼaenī?
6 ʼI te ʼu palalau ʼa Sehova ki te pule ʼo Esipito ʼi te temi ʼo Moisese, ʼe ina fakahā ai pe koʼe neʼe fakagafua e te ʼAtua ke haga maʼuʼuli te kau agakovi. ʼI te temi ʼaē neʼe tapuʼi ai e Falaone te mavae ʼa te ʼu foha ʼo Iselaele mai Esipito, neʼe mole matehi atu aipe e Sehova ia ia. Kae neʼe ina fakahoko te ʼu Tautea e Hogofulu ki te fenua moʼo fakahā tona māfimāfi ʼi hona ʼu ʼaluʼaga fakatalakitupua. ʼI tana tala age kia Falaone te fitu malaʼia, neʼe ʼui age e Sehova kia ia neʼe faigafua pe hana molehi ia ia pea mo tana hahaʼi ʼi te kele. Neʼe ʼui fēnei e Sehova: “Kae koʼeni te tupuʼaga tāfito ʼo taku tuku koe ke ke maʼuli: ke ke sio ki toku mālohi pea ke feala ke kalagaʼi toku huafa ʼi te kele katoa.”—Ekesote 9:15, 16.
7 ʼI te temi ʼaē neʼe faka ʼāteaina ai e Sehova te kau Iselaele, neʼe liliu moʼoni ai tona huafa ʼo ʼiloa ʼaupito. (Sosue 2:1, 9-11) Ia ʼaho nei, hili kiai taʼu e 3 500, ʼe mole heʼeki galoʼi te meʼa ʼaē neʼe ina fai. Neʼe kalagaʼi ai te huafa ʼo Sehova pea mo te moʼoni ʼo ʼuhiga mo Ia ʼaē ʼe ina toʼo te huafa ʼaia. Neʼe fakahā ai te ʼuhiga ʼo Sehova, ko he ʼAtua ʼe ina fakahoko tana ʼu fakapapau pea mo tokoni ki tana ʼu kaugana. (Sosue 23:14) Neʼe ina fakahā ai, ʼuhi ko tona mālohi māfimāfi, ʼe mole he meʼa ʼe feala ke ina tāʼofi tana fakatuʼutuʼu. (Isaia 14:24, 27) Koia ʼe feala ke tou falala, kua ina vave tapuakina tana ʼu kaugana agatonu, mokā ina fakaʼauha anai te tuʼu agakovi katoa ʼo Satana. ʼE mole galo anai ʼi he temi te fakahā ʼaia ʼo te mālohi lahi pea mo te kolōlia ʼo te huafa ʼo Sehova. ʼE heʼegata anai te ʼu tapuakina ʼaē ka tou maʼu.—Esekiele 38:23; Apokalipesi 19:1, 2.
‘Te Loloto ʼo Te Poto ʼo Te ʼAtua!’
8. Koteā te ʼu faʼahi ʼaē ʼe fakaloto mālohiʼi tatou e Paulo ke tou vakaʼi?
8 ʼI tana tohi ki te kau Loma, ʼe fehuʼi fēnei e te ʼapositolo ko Paulo: “ ʼE maʼu koa te heʼe faitotonu ʼi te ʼAtua?” ʼE ina tali fēnei: “Ke ʼaua naʼa hoko ʼi he temi!” Pea neʼe ina faka maʼuhigaʼi te manavaʼofa ʼo te ʼAtua, pea mo ina fakahā pe koʼe neʼe tuku e Sehova ia Falaone ke toe loaloaga age tona maʼuli. ʼE toe ʼui e Paulo ʼe tou hage ko he moʼi kele ʼi te ʼu nima ʼo te tagata faʼu ipu kele. Pea ina ʼui fēnei: “Kapau ko te ʼAtua, logola tana fia fakahā tona hāūhāū pea mo tona mālohi, kae neʼe ina kātakiʼi lahi te ʼu ipu ʼo te hāūhāū ʼaē kua tonu ke fakaʼauha, moʼo fakahā te lahi ʼo tona kolōlia ki te ʼu ipu ʼo te manavaʼofa ʼaē neʼe ina teuteuʼi fakatomuʼa ki te kolōlia, ʼaē ko tatou, ʼaē neʼe ina pāui mai te kau Sutea pea mai te ʼatu puleʼaga, pea koteā ʼaē ka tou ʼui anai?”—Loma 9:14-24.
9. (a) Ko ai “te ʼu ipu ʼo te hāūhāū ʼaē kua tonu ke fakaʼauha”? (b) He koʼe neʼe kātakiʼi fualoa e Sehova te hahaʼi fakafeagai, pea e feafeaʼi tona iku lelei maʼa nātou ʼaē ʼe ʼoʼofa kia te ia?
9 Talu mai te fakafeagai ʼaē ʼi Eteni, ko nātou fuli ʼaē ʼe fakafeagai kia Sehova pea mo tana ʼu lao ʼe ko “te ʼu ipu ʼo te hāūhāū ʼaē kua tonu ke fakaʼauha.” Kae ʼe kei hoko atu e Sehova tana kātaki fualoa. Neʼe vāʼi e te kau agakovi tana ʼu gāue, mo fakatagaʼi tana ʼu kaugana, pea mo nātou matehi tona ʼAlo. ʼAki he loto tāʼofi lahi, neʼe tuku e Sehova he temi feʼauga ki te hahaʼi fuli ke nātou sisio ki te ʼu fua kovi ʼo te talagataʼa ki te ʼAtua pea mo te maʼuli faʼitaliha mai ia te ia. Pea ʼaki te mate ʼo Sesu, neʼe feala ai ke hāofaki te hahaʼi fakalogo pea mo “fakaʼauha te ʼu gāue ʼa te Tevolo.”—1 Soane 3:8; Hepeleo 2:14, 15.
10. He koʼe neʼe kātakiʼi e Sehova te kau agakovi ʼi te ʼu sēkulō e 19 ʼaenī kua hili?
10 ʼI te ʼu sēkulō e 19 tupu talu mai te fakatuʼuake ʼa Sesu, neʼe kātakiʼi pe e Sehova “te ʼu ipu ʼo te hāūhāū,” ʼo mole ina fakaʼauha nātou. Koteā tona tupuʼaga? Koteʼuhi neʼe ina teuteuʼi nātou ʼaē ka fakatahi mo Sesu Kilisito ʼi tona Puleʼaga ʼaē ʼi selo. Ko te toko 144 000, pea ko nātou “te ʼu ipu ʼo te manavaʼofa” ʼaē neʼe talanoa kiai te ʼapositolo ko Paulo. Moʼo faʼufaʼu te kalasi ʼaia ʼaē ka ʼalu ki selo, neʼe ʼuluaki fakaafe e Sehova te ʼu hahaʼi Sutea, pea ki muli age, neʼe ina fakaafe te hahaʼi ʼo te ʼu puleʼaga Senitile. Neʼe mole ina fakakinauʼi he tahi ke tauhi age kia te ia. Kae ia nātou ʼaē neʼe loto fakafetaʼi ki tona fakatuʼutuʼu ʼofa ʼaia, neʼe ina foaki age te pilivilesio ke nātou kaugā hau mo tona ʼAlo ʼi te Puleʼaga ʼi selo. Kua vave ʼosi leva te teuteuʼi ʼo te kalasi ʼaia ʼaē ka ʼalu ki selo.—Luka 22:29; Apokalipesi 14:1-4.
11. (a) Ko te kūtuga fea ʼaē ʼe nātou maʼu te ʼu fua lelei ʼo te kātaki fualoa ʼa Sehova? (b) Koteā anai tona ʼu fua lelei ki te kau mate?
11 Kae ko ai ʼaē ka nonofo anai ʼi te kele? Ko te kātaki fualoa ʼa Sehova neʼe ina toe faka fealagia foki ke tānaki te “toe hahaʼi tokolahi” mai te ʼatu ʼu puleʼaga kehekehe. Kua nātou lauʼi miliona hahaʼi ʼi te temi nei. Neʼe fakapapau e Sehova ko te kalasi fakakelekele ʼaia ʼe hāo anai ʼi te fakaʼosi ʼo te tuʼu ʼaenī, pea ʼe ina maʼu anai te ʼamanaki ʼo te maʼuli heʼegata ʼi te palatiso ʼi te kele. (Apokalipesi 7:9, 10; Pesalemo 37:29; Soane 10:16) ʼI te temi ʼaē kua fakakatofa e te ʼAtua, ko te tokolahi ʼaupito ʼo te kau mate ʼe fakatuʼuake anai, pea ʼe feala anai ke nātou liliu ʼo fakalogo ki te Puleʼaga ʼaē ʼi selo. ʼE fakakikite fēnei e te Folafola ʼa te ʼAtua ia Gaue 24:15: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.”—Soane 5:28, 29.
12. (a) Koteā ʼaē ʼe tou ako ʼo ʼuhiga te fakagafua e Sehova te agakovi? (b) Koteā takotou manatu ʼo ʼuhiga mo te faʼahiga fakatokatoka e Sehova ia te fihi ʼo ʼuhiga mo te pule faʼitaliha ʼi te ʼatulaulau?
12 ʼE heʼe faitotonu koa te faʼahi ʼaia? Kailoa, koteʼuhi ʼi tana tāʼofi tana fakaʼauha te kau agakovi, peʼe ko “te ʼu ipu ʼo te hāūhāū,” ʼe fakahā e Sehova tona manavaʼofa ki te tahi ʼu hahaʼi, ʼo mulimuli ki tana fakatuʼutuʼu. ʼE hā ai te lahi ʼo tona manavaʼofa pea mo tona ʼofa. Pea ʼe lahi te ʼu meʼa ʼe tou ako ʼo ʼuhiga mo Sehova totonu, he neʼe tou maʼu te temi moʼo vakavakaʼi te fakaʼaluʼalu ʼo tana fakatuʼutuʼu. ʼE tou ʼofolele ʼi te ʼu agaaga kehekehe ʼo tona ʼulugaaga—tana faitotonu, tona manavaʼofa, tana kātaki fualoa, tona poto kehekehe. Ko te fakatokatoka poto e Sehova te fihi ʼo ʼuhiga mo tana pule faʼitaliha ʼi te ʼatulaulau—tona maʼua pule—ʼe ina fakamoʼoni anai ʼo talu ai ʼe lelei pe tona pule. ʼE tou ʼui fēnei ohage ko te ʼapositolo ko Paulo: “Siʼi loloto ʼo te koloaʼia pea mo te poto pea mo te ʼatamai mālama ʼo te ʼAtua! Ko ʼana fakamāu ʼe mole feala hona sivisivi pea mole feala ke maʼu tona ʼu ala!”—Loma 11:33.
Te Fealagia Ke Tou Fakahā Tatatou Pipiki Ki Te ʼAtua
13. Ka tou tau mo he ʼu mamahi, koteā ʼaē ʼe feala ke tou fakahā ai, pea koteā ʼaē ka tokoni mai ke tou aga fakapotopoto?
13 Tokolahi te ʼu kaugana ʼa te ʼAtua ʼe nātou nonofo ʼi he ʼu ʼaluʼaga faigataʼa. ʼE kei nātou maʼuli mamahi koteʼuhi ʼe mole heʼeki fakaʼauha e te ʼAtua te agakovi, pea mo fakatuʼu te mālama foʼou ʼaē neʼe ina fakakikite. ʼE tonu koa ke tou ʼiʼita ai? Peʼe tou faka ʼuhiga koa te ʼu ʼaluʼaga ʼaia ko he fealagia ke tou fakamoʼoni mo tatou ʼe gutuloi te Tevolo? ʼE tou maʼu anai he mālohi moʼo fai te faʼahi ʼaia, mo kapau ʼe tou manatuʼi te kole ʼaenī: “Aga fakapotopoto toku foha pea mo fakafiafia toku loto, ke feala haku tali kia ia ʼaē ʼe manukinuki kia te ʼau.” (Tāʼaga Lea 27:11) Ko Satana, ʼaē ʼe manukinuki ki te ʼAtua, neʼe ina ʼui kapau ʼe puli te ʼu koloā ʼa te hahaʼi peʼe nātou tau mo he ʼu mamahi fakasino, ʼe nātou tukugakoviʼi anai te ʼAtua, pea mo laukovi kia te ia. (Sopo 1:9-11; 2:4, 5) ʼE tou fakafiafia te loto ʼo Sehova, mokā tou fakahā ʼe mole moʼoni tana ʼu palalau ʼaia, pea mo tou nonofo agatonu kia Sehova mokā hoko mai he ʼu faigataʼaʼia.
14. Ka tou falala kia Sehova ʼi te ʼu ʼahiʼahi, koteā te ʼu lelei ʼe tou lava maʼu anai?
14 Kapau ʼe tou falala kia Sehova ʼi te ʼu ʼahiʼahi, ʼe tou lava maʼu ai anai he ʼu kalitate maʼuhiga. Ohage la ʼi te ʼu mamahi ʼaē neʼe kātakiʼi e Sesu, “neʼe ina ako te fakalogo” ʼi hona ʼaluʼaga neʼe mole heʼeki hoko ki ai ʼi muʼa atu. ʼO feiā mo tatou, ʼe feala ʼi tatatou ʼu ʼahiʼahi, ke tou ako te kātaki fualoa, te faʼa kātaki, pea mo te loto fakafetaʼi ki te ʼu ala faitotonu ʼa Sehova.—Hepeleo 5:8, 9; 12:11; Sakopo 1:2-4.
15. Ko tatatou kātakiʼi fualoa te ʼu mamahi ʼe lava fua lelei feafeaʼi ki ʼihi?
15 ʼE sioʼi anai ʼatatou ʼu gāue, pea ʼi tanatou sio ki te ʼu meʼa ʼaē ʼe tou kātakiʼi ʼuhi ko tatatou ʼofa ki te faitotonu, ko ʼihi ʼe lagi nātou mahino anai ʼaki te temi, peʼe ko ai te kau Kilisitiano moʼoni ia ʼaho nei. Pea ʼi tanatou fakatahi mo tatou ʼi te tauhi, ʼe feala anai ke nātou maʼu mo nātou te ʼu tapuakina ʼo te maʼuli heʼegata. (Mateo 25:34-36, 40, 46) Pea ʼe loto e Sehova pea mo Sesu ke maʼu e te hahaʼi te tapuakina ʼaia.
16. Koteā te pikipikiga ʼo tatatou faʼahiga faka ʼuhiga ia te ʼu faigataʼaʼia pea mo te logo tahi mo te ʼAtua?
16 ʼE lelei ke tou faka ʼuhiga tatatou ʼu ʼaluʼaga faigataʼa, ohage ko he ʼu fealagia moʼo fakahā tatatou pipiki kia Sehova, pea mo tou kau ki te fakahoko ʼo tona finegalo. Ko tatatou fai feiā ʼe ko he fakamoʼoni ʼaia ʼe tou tuputupu moʼoni ki te logo tahi mo te ʼAtua pea mo Kilisito. Neʼe hūfakiʼi fēnei e Sesu te kau Kilisitiano moʼoni, ʼo ʼui maʼana: “ ʼE ʼau fai te kole, ʼo mole gata ʼaki pe ʼo ʼuhiga mo nātou ʼaenī [te ʼu tisipulo ʼo te temi ʼaia], kae toe ʼuhiga mo nātou ʼaē ʼe nātou tui kia te ʼau, ʼuhi ko tanatou palalau; koteʼuhi ke nātou liliu fuli ʼo tahi, ohage pe ko koe Tāmai ʼe ke tahi mo ʼau, pea ko ʼau ʼe ʼau tahi mo koe, ke toe feiā mo nātou ke nātou tahi mo tāua.”—Soane 17:20, 21.
17. Koteā te fakapapau ʼe tou lava falala kiai mo kapau ʼe tou agatonu kia Sehova?
17 Kapau ʼe tou agatonu kia Sehova, pea ʼe ina fakapale lahi anai ia tatou. ʼE ʼui fēnei e tana Folafola: “Koutou liliu ʼo mālolohi, mo tāʼofi maʼu, ke lahi tuʼumaʼu takotou ʼu gāue ʼi te ʼAliki; heʼe koutou ʼiloʼi ko takotou ʼu gāue ʼe mole vaʼiganoa ʼo ʼuhiga mo te ʼAliki.” (1 Kolonito 15:58) ʼE ina toe ʼui fēnei: “ ʼE mole heʼe faitotonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.” (Hepeleo 6:10) ʼE ʼui fēnei ia Sakopo 5:11: “Koutou sisio, ʼe mātou kalagaʼi ʼe manuʼia ia nātou ʼaē neʼe nātou faʼa kātaki. Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe fakahoko e Sehova, ko Sehova ʼe fonu ʼi te ʼofa pea mo te manavaʼofa.” Koteā te ikuʼaga ʼaē neʼe ina fakahoko maʼa Sopo? “Kae kia Sehova, neʼe ina tapuakiʼi te temi fakaʼosi ʼo Sopo ki muli age, ʼo laka age ʼi te kamata.” (Sopo 42:10-16) Ei, ko Sehova “ ʼe ko ia ʼaē ʼe ina fakapale ia nātou ʼaē ʼe nātou kumi moʼoni ia ia.” (Hepeleo 11:6) Pea ko he fakapale lahi ʼaē ʼe tou ʼamanaki kiai: te maʼuli heʼegata ʼi te palatiso ʼi te kele!
18. Koteā ʼaē ka hoko anai ki te ʼu meʼa ʼaē neʼe tou lotomamahi ai?
18 ʼE pulihi anai e te Puleʼaga ʼa te ʼAtua te ʼu fua kovi fuli ʼaē neʼe hoko ki te malamanei ʼi te ʼu lauʼi sēkulō ʼaē kua hili. ʼE lahi age anai tatatou fiafia ʼi te temi ʼaia ʼi te ʼu mamahi ʼaē ʼe tou tau mo ia ʼi te temi nei. ʼE mole tou toe manatuʼi anai te ʼu faigataʼaʼia ʼaē neʼe tou lotomamahi ai. Ko te ʼu manatu pea mo te ʼu gāue fakaloto mālohi ʼaē ka maʼu anai e te hahaʼi ʼi te ʼaho fuli pe ʼi te mālama foʼou, ʼe nātou pulihi māmālie anai te ʼu manatu fakaloto mamahi ʼo te temi ʼāfea. ʼE ʼui fēnei e Sehova: “ ʼE ʼau fakatupu te ʼu lagi foʼou [ko te Puleʼaga foʼou ʼi selo ʼe pule anai ki te malamanei] pea mo te kele foʼou [ko he sosiete fakatagata faitotonu]; pea ʼe mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto. Kae ke koutou fakafiafia ʼaupito, pea mo loto fiafia ʼo talu ai ʼi te ʼu meʼa ʼaē ʼe ʼau fakatupu.” Ei, ʼi te mālama foʼou ʼa Sehova, ʼe feala anai ke ʼui fēnei e te kau faitotonu: “Kua fakatokatoka te kele katoa, kua tokalelei. Neʼe fakafiafia te hahaʼi ʼaki te ʼu kalaga fakafiafia.”—Isaia 14:7; 65:17, 18.
Fakamanatu
• Logola tana fakagafua te agakovi, neʼe fakahā feafeaʼi e Sehova ʼe tau mo feʼauga ke fakaʼapaʼapaʼi lahi tona huafa?
• Neʼe lava feafeaʼi ʼaki te kātakiʼi e te ʼAtua “te ʼu ipu ʼo te hāūhāū,” ke tou maʼu ai tona manavaʼofa?
• Koteā ʼaē ʼe tonu ke tou faiga ke tou mahino kiai ʼi tatatou ʼu ʼaluʼaga ʼaē ʼe nātou fakamamahiʼi tatou?
[Paki ʼo te pasina 67]
Ko Sehova “neʼe ina tapuakiʼi te temi fakaʼosi ʼo Sopo ki muli age, ʼo laka age ʼi te kamata”