Kua Nātou Fakatuʼutuʼu Moʼo Fai ʼo Te Finegalo ʼo Sehova,
Kapite 2
Tou Fakamoʼoni Ki Te Tuʼulaga Gāue ʼAē Neʼe Hinoʼi e Te ʼAtua Kiā Kilisito
“ ʼI TE kamataʼaga, neʼe fakatupu e te ʼAtua ia te lagi pea mo te kele,” pea ko meʼa fuli ʼaē neʼe ina fakatupu “neʼe lelei ʼaupito.” (Sen. 1:1, 31) Neʼe fakatupu e Sehova ia te tagata, ki he ka haʼu taulekaleka. Kae ko te fakafeagai ʼaē neʼe hoko ʼi Eteni, neʼe ina fakagata faka temi ia te ʼaluʼaga fakafiafia ʼaia ʼa te tagata. Kae neʼe mole fetogi te fakatuʼutuʼu ʼa Sehova ʼo ʼuhiga mo te kele pea mo te malamanei. Heʼe ʼi te temi ʼaē neʼe ina tauteaʼi ia nātou ʼaē neʼe fakafeagai ki tana pule faʼitaliha, neʼe fakakikite e te ʼAtua ia he ʼāteaina maʼa te hahaʼi fakalogo ʼo te hōloga ʼo Atama. ʼE toe fakatuʼu anai ia te tauhi maʼa, pea ʼe fakaʼauha anai e te ʼAtua ia te agakovi pea mo tana ʼu gāue kovi fuli pe. (Sen. 3:15), ʼE toe fakaliliu anai e Sehova ia meʼa fuli ke “lelei ʼaupito” ʼaki ia tona ʼAlo ko Sesu Kilisito. (1 Soa. 3:8) Koia ʼe maʼuhiga ke tou mahino ki te tuʼulaga gāue ʼaē neʼe hinoʼi age e te ʼAtua kiā Kilisito.—Gaue 4:12; Filp. 2:9, 11.
TE TUʼULAGA GĀUE ʼO KILISITO
Ka tou vakavakaʼi ia te tuʼulaga gāue ʼaē neʼe tuku age e te ʼAtua kiā Kilisito, ʼe tou fakatokagaʼi ʼe lahi tona ʼu agaaga. Ko Sesu ʼe ko te tagata ʼaē neʼe ina totogi ia te malamanei, ko te Pelepitelo Lahi, te Pule ʼo te kokelekasio faka Kilisitiano, pea ʼi te temi nei, ʼe ko te Hau ʼo te Puleʼaga ʼo te ʼAtua. Ka tou metitāsioʼi ki te ʼu tuʼulaga gāue kehekehe ʼaia ʼaē ʼe talanoa kiai ia te Tohi-Tapu, ʼe tuputupu ai totatou ʼofa ʼaē ki te ʼu fakatuʼutuʼu ʼa te ʼAtua pea mo tatatou ʼofa ʼaē kiā Kilisito Sesu.
Lolotoga tona minisitelio ʼaē ʼi te kele, neʼe ʼiloga lelei, ʼe ko Kilisito ʼaē ka ina faka fealagia anai ki te hahaʼi fakalogo ke nātou toe tokalelei mo te ʼAtua. (Soa. 14:6) Neʼe ina foaki he totogi moʼo faka ʼāteaina ʼo he tokolahi. (Mat. 20:28) Neʼe mole ina tuku mai pe he faʼifaʼitaki lelei ʼo ʼuhiga mo te pipiki ʼaē ki te ʼAtua, kae neʼe liliu ko ia tāfito ʼaē ka ina faka fealagia anai te fakahoko ʼo te fakatuʼutuʼu ʼa Sehova ʼo ʼuhiga mo te malamanei. ʼE ko ia tokotahi ʼaē ʼe ina lava faka fealagia tatatou toe fakatokatoka mo te ʼAtua. (Gaue 5:31; 2 Ko. 5:18, 19) Ko tona mate faka sākilifisio pea mo tona fakatuʼuake, neʼe ina faka fealagia ki te hahaʼi fakalogo ke nātou maʼu ia he ʼu tapuakina heʼegata ʼi te takitaki ʼo te Puleʼaga ʼo te ʼAtua, ʼaē ʼi selo.
ʼI tona tuʼulaga ʼaē ʼi selo, ʼe toe gāue ia Sesu Kilisito ohage ko he Pelepitelo Lahi. ʼI tona tuʼulaga gāue ʼaia, ʼe feala hana “tali mamahi mo tatou ʼi totatou ʼu vaivaiʼaga,” pea mo ina fakamolemole ia te ʼu agahala ʼo tana ʼu tisipulo ʼaē ʼi te kele. Neʼe fakamahino fēnei e te ʼapositolo ko Paulo: “ ʼE ʼi ai totatou pelepitelo lahi, ʼe mole ko he tahi ʼe hala mo manavaʼofa ki ʼotatou ʼu vaivaiʼaga, kae ko he tahi neʼe ʼahiʼahiʼi ʼi te faʼahi fuli pe ohage ko tatou, kae neʼe mole hana agahala.” Pea ʼe fakaloto mālohiʼi e Paulo ia nātou ʼaē ʼe tui kiā Sesu Kilisito, ke nātou fakaʼaogaʼi kātoa ia te fakatuʼutuʼu ʼaia ʼaē ʼe ina faka fealagia tatatou toe fakatokatoka mo te ʼAtua, ʼo ina ʼui fēnei: “Tou fakaōvi ʼaki te fakahagatonu ki te ʼafioʼaga ʼo te ʼofa makehe . . . [ke tou] maʼu he tokoni ʼi tona temi totonu.”—Hep. 4:14-16, MN; 1 Soa. 2:2.
Tahi ʼaē meʼa, ko Sesu ʼe ko te Pule fonu ʼi te ʼofa ʼo te kokelekasio faka Kilisitiano. Ohage pe ko tana ʼu tisipulo ʼo te ʼuluaki sēkulō, ʼe mole ʼaoga kiā tatou iā ʼaho nei he tagata takitaki. ʼE takitaki tatou e Sesu ʼaki tona laumālie maʼoniʼoni, ia te Tohi-Tapu, pea mo he ʼu tagata tauhi ōvi aga fakapotopoto. Ko te ʼu tagata ʼaia, ʼe fakamāuʼi anai e ia pea mo tana Tāmai ʼaē ʼi selo, ʼo ʼuhiga mo tanatou faʼahiga taupau ia te faga ōvi ʼa te ʼAtua. (Hep. 13:17; 1 Pet. 5:2, 3) ʼI tana lea faka polofeta ʼo ʼuhiga mo Sesu, neʼe ʼui fēnei e Sehova: “Koʼeni! Neʼe au foaki ia ia ko he fakamoʼoni ki te ʼu kūtuga faka puleʼaga, ko he takitaki pea mo he pule ki te ʼu kūtuga faka puleʼaga.” (Isa. 55:4) Neʼe fakamoʼoni e Sesu ko ia ʼaē neʼe ina fakahoko ia te lea faka polofeta ʼaia, ʼi tana ʼui fēnei ki tana ʼu tisipulo: “ ʼAua naʼa fakahigoaʼi koutou ko he ‘kau takitaki,’ heʼe ko te tokotahi pe ʼe ko tokotou Takitaki, ko Kilisito.”—Mat. 23:10, MN.
ʼE ʼiloga te ʼofa ʼa Sesu pea mo tana fia tokoni kiā tatou, ʼi tana fai te fakaafe ʼaenī: “Koutou ʼōmai kiā te au, ia koutou fuli ʼaē ʼe kinakina pea mo mafasia, pea ʼe au fakafimālie anai koutou. Koutou toʼo kiā koutou taku ʼakau ʼamo pea ke koutou ako iā te au, heʼe au agamalū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau ʼamo ʼe mālū pea ko taku kavega ʼe maʼamaʼa.” (Mat. 11:28-30, MN ) Ohage ko tana Tāmai ʼaē ʼi selo, ʼaē ko Sehova ʼAtua, ʼe takitaki e Sesu Kilisito ia te ʼu gāue ʼo te kokelekasio faka Kilisitiano, ʼaki he agamalū pea ʼi hona ʼaluʼaga ʼe ina fakaloto fīmālie anai totatou ʼu nefesi, ʼo liliu ai ko ia te “tauhiovi agalelei.”—Soa. 10:11; Isa. 40:11.
ʼI tana ʼuluaki tohi ki te kau Kolonito, neʼe fakamahino e Paulo te tahi agaaga ʼo te tuʼulaga ʼo Sesu Kilisito, ʼo ina ʼui fēnei: “[ʼE] tonu ke hau ʼo aʼu ki te temi ʼaē ka tuku ai e te ʼAtua tona ʼu fili fuli ki ʼona lalo vaʼe. Kae ka fakalogo anai ia meʼa fuli kiā te ia, pea ko te ʼAlo totonu ʼe toe fakalogo anai mo ia kiā Ia ʼaē neʼe ina tuku ia meʼa fuli kiā te ia, ke liliu te ʼAtua ko meʼa fuape maʼa te hahaʼi fuape.” (1 Ko. 15:25, 28, MN ) ʼI muʼa ʼo tana haʼu ki te kele, ko Sesu, ʼaē neʼe ko te ʼuluaki fakatupu ʼa te ʼAtua, neʼe gāue ʼi selo ko hana “tufuga faiva.” (Taag. 8:22-31) ʼI te temi ʼaē neʼe fekauʼi ifo e te ʼAtua ia Sesu ki te kele, neʼe ina fai ia te finegalo ʼo te ʼAtua ʼi te temi fuli pe. Neʼe ina kātakiʼi ia te ʼahiʼahi fakaʼosi, ʼaē ko te mate agatonu maʼa tana Tāmai. (Soa. 4:34; 15:10) Neʼe fakapale ia ia e te ʼAtua, ʼi tana nofo agatonu ʼo aʼu ki tona mate, ʼo ina fakatuʼuake ki te lagi pea mo ina foaki age te fealagia ʼaē ke nofo Hau ʼi te Puleʼaga ʼaē ʼi selo. (Gaue 2:32-36) ʼI tona tuʼulaga ʼaia, neʼe tuku age e te ʼAtua kiā Kilisito Sesu ia te pilivilesio makehe, ʼaē ko te takitaki ia te ʼu lauʼi afe mo afe kau ʼāselo mālolohi, moʼo fakagata ia te pule fakatagata ʼi te kele, pea mo pulihi ʼi te kele ia te ʼu agakovi fuape. (Taag. 2:21, 22; 2 Tes. 1:6-9; Apk. 19:11-21; 20:1-3) ʼI te temi leva ʼaia, ʼe fakalogo pe anai te kele kātoa ki te takitaki ʼa te Puleʼaga ʼo te ʼAtua ʼaē ʼi selo, ʼaē ka takitaki e Kilisito.—Apk. 11:15.
KOTEĀ TE FAKA ʼUHIGA ʼO TATATOU FAKAMOʼONI KI TONA TUʼULAGA GĀUE?
Ko Sesu Kilisito totatou Faʼifaʼitakiʼaga, ʼe ko he tagata haohaoa. Neʼe fakatotonu age ke ina taupau tatou. Neʼe tuku age e Sehova ʼAtua ia te maʼua maʼuhiga ʼaē ko te Takitaki pea mo Pule ki tana hahaʼi iā ʼaho nei. Koia, ko tatatou fakamoʼoni ki te tuʼulaga gāue ʼaē neʼe tuku age e te ʼAtua kiā Kilisito, ʼe hā ʼaki ai ʼe tou nonofo agatonu kiā Sehova pea ʼe tou haʼele tahi mo tana kautahi ʼaē ʼe haʼele ki muʼa.
ʼI te ʼuluaki sēkulō, ko te ʼu tisipulo ʼa Sesu neʼe nātou fakamoʼoni kātoa ki tona tuʼulaga gāue ʼaē neʼe tuku age e te ʼAtua. Neʼe nātou fakahā ia te faʼahi ʼaia, ʼi tanatou gāue ʼaki he logo tahi ʼi te takitaki ʼa Kilisito, pea mo tanatou fakalogo ki te takitaki ʼaē neʼe ina tuku age kiā nātou ʼaki ia te laumālie maʼoniʼoni pea mo te Tohi-Tapu. (Gaue 15:12-21; Apk. 1:1) ʼO ʼuhiga mo te logo tahi ʼo te kokelekasio faka Kilisitiano fakanofo, neʼe tohi fēnei e te ʼapositolo ko Paulo: “Kae ʼaki tatatou tala te moʼoni pea ʼaki te ʼofa, ke tou tuputupu iā meʼa fuli ʼo ia ʼaē ko te ʼulu, ia Kilisito. Mai ia te ia, ko te sino kātoa, ʼaē ʼe faʼufaʼu tahi pea mo felogoi tahi, ʼaki te ʼu hokoga hui ʼaē ʼe nātou foaki ia meʼa fuli ʼaē ʼe ʼaoga, ʼo mulimuli ki te faʼahiga gāue ʼo te koga takitahi, ki te fua ʼaē ʼe tāu mo feʼauga, ʼe tokoni ki te tuputupu ʼo te sino, ke feala ki te sino ʼaia ke ina lagalaga ia ia ʼi te ʼofa.”—Ef. 4:15, 16, MN.
Ohage ko te sino ʼo te tagata, ʼe lahi te ʼu hahaʼi kehekehe ʼe nātou faʼufaʼu ia te kokelekasio ʼa te kau fakanofo pea mo te “tahi ʼu ōvi.” Ka felogoi tahi ia te ʼu hahaʼi ʼaia pea mo gāue fakatahi fuli ʼi te takitaki ʼa Kilisito, ʼe hoko ai te tuputupu, pea ʼe tou feagaleleiʼaki pea mo felogoi ʼi te ʼofa, ʼaē “ko he noʼo haohaoa ia ki te logo tahi.”—Soa. 10:16; Kol. 3:14; 1 Ko. 12:14-26, MN.
Ko te ʼu meʼa ʼaē ʼe hoko ʼi te malamanei, ʼaē ko te hoko ʼo te ʼu lea faka polofeta ʼa te Tohi-Tapu, ʼe nātou fakamoʼoni ko Sesu Kilisito, talu mai te taʼu 1914, neʼe fakanofo hau ki te Puleʼaga. ʼI te temi nei, ʼe ʼafio ʼi te lotolotoiga ʼo tona ʼu fili. (Pes. 2:1-12; 110:1, 2) Koteā tona faka ʼuhiga maʼa te hahaʼi ʼaē ʼe māʼuʼuli iā ʼaho nei? ʼO ʼuhiga mo tona ʼu fili, ʼe fakahā anai e Sesu tona mālohi ʼi tona tuʼulaga Hau ʼo te ʼu hau, pea mo ʼAliki ʼo te ʼu ʼaliki, mokā ina fakahoko anai kiā nātou ia te tautea fakaʼatua. (Apk. 11:15; 12:10; 19:16) Kae kiā nātou ʼaē ʼe nonofo ʼi te toʼo mataʼu ʼo te ʼAtua, te nofoʼaga ʼo te tapuakina, ʼe ina faka ʼāteaina anai nātou moʼo fakahoko ia te fakapapau ʼaē neʼe fai e Sehova ʼi te kamataʼaga. (Loma 16:20) ʼI meʼa fakafiafia hatatou fakamoʼoni ki te tuʼulaga gāue ʼaē neʼe tuku age e te ʼAtua kiā Kilisito, pea mo hatatou logo tahi ʼi te ʼu ʼaho fakamuli ʼaenī, moʼo fai ia te minisitelio ʼi te malamanei kātoa ʼo mulimuli ki tana takitaki!