Kua Nātou Fakatuʼutuʼu Moʼo Fai ʼo Te Finegalo ʼo Sehova,

Kapite 3

Tou Falala Ki “Te Tagata Kaugana Agatonu Mo Poto”

“KO AI moʼoni te tagata kaugana agatonu mo poto?” Neʼe ko te ʼu ʼuluaki palalau ʼaia ʼaē neʼe fai e Sesu Kilisito ʼi tana lea fakatātā ʼaē ʼe ʼi ai tona faka ʼuhiga faka polofeta. Ko te lea fakatātā ʼaia ʼe kau ki “te fakaʼiloga” ʼaē neʼe ina fakahā mai ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 24:​3, 42-47, MN ) Neʼe ʼui e Sesu ʼe lahi anai te ʼu gāue ʼa “te tagata kaugana” lolotoga te temi fakaʼosi. ʼE fakanofo anai ke ina leʼoleʼo ia te ʼu koloā fakakelekele ʼo te Puleʼaga, pea mo tuku age anai ia te maʼua mamafa ʼaē ko te foaki ʼo te meʼa kai fakalaumālie ki te hahaʼi ʼa te ʼAtua “ ʼi tona temi totonu.” ʼO ʼuhiga mo tona maʼua gāue ʼaia, neʼe toe ʼui fēnei e Sesu: “Fiafia te tagata kaugana ʼaia, mo kapau ʼi te tau mai ʼo tona pule, ʼe ina maʼu mai ia ia ʼe ina fai feiā! ʼE au tala moʼoni atu kiā koutou: ʼE ina fakanofo anai ke pule ki ʼona koloā fuli.”

ʼAki te lea fakatātā ʼaia, ʼe malaga ai te ʼu fehuʼi ʼe maʼuhiga ke tou tali kiai: Ko ai koa ia “te tagata kaugana” ʼaia? Koteā koa tona ʼu “koloā”? Koteā koa totatou tuʼulaga ʼi te lea fakatātā ʼaia? Ko tatatou fia mahino ki te ʼu puani ʼaia ʼe mole ko he fia mahino faka ʼatamai pe. Heʼe ko tatatou mahino kiai pea mo tatatou falala ki “te tagata kaugana agatonu mo poto,” ʼe ʼaoga ki tatatou fai ia te finegalo ʼo Sehova.

KUA ʼILOʼI PEʼE KO AI “TE TAGATA KAUGANA AGATONU MO POTO”

ʼI tana lea fakatātā, neʼe ʼui e Sesu ko “te tagata kaugana” ʼaia ʼe ina tufa anai ia te meʼa kai fakalaumālie ʼaē ʼe ʼaoga. Ko ai ʼaē neʼe hinoʼi e Sesu ʼi te ʼuluaki sēkulō moʼo fafaga ʼo tana ʼu tisipulo? Pea ʼi te taʼu 1914 ʼaē neʼe fakanofo hau ai, ko ai ʼaē neʼe ina maʼu mai ʼe kei agatonu aipe ʼo fai ia te gāue ʼaia? ʼE mahino lelei kiā tatou, ʼe mole ʼi ai he tagata ʼe lava maʼuli talu mai te temi ʼaia ʼo aʼu mai ki totatou temi. Koia, ko “te tagata tauhi ʼapi agatonu, ia ia ʼaē ʼe poto,” ʼe lagi ina fakatātā te kalasi ʼo te kau tisipulo fakanofo ʼa Kilisito, ʼaē ʼe kei māʼuʼuli ʼi te kele, ʼi he temi pe. (Luka 12:​42, MN ) ʼE moʼoni, ʼe fakaʼaogaʼi e Kilisito ia te kalasi ʼaia moʼo foaki ia he ʼu fakamahino ʼo ʼuhiga mo te hoko ʼo te ʼu lea faka polofeta faka Tohi-Tapu, pea mo he ʼu tokoni ʼi tona temi totonu ʼo ʼuhiga mo te maʼuliʼi ʼo te ʼu pelesepeto faka Tohi-Tapu, ʼi totatou maʼuli ʼo te ʼaho fuli. ʼOsi ʼaia, pea ʼe tufa ia te meʼa kai fakalaumālie ʼi te ʼu kokelekasio ʼa te kau Fakamoʼoni ʼa Sehova.​—Isa. 43:10; Kal. 6:⁠16.

Koteā koa ia te ʼu “koloā”? ʼE ko te ʼu meʼa fuli pea mo te ʼu hahaʼi fuli ʼaē ʼe ʼi ai honatou ʼuhiga fakalaumālie, pea neʼe foaki kiā Kilisito ʼi te temi ʼaē neʼe fakanofo hau ai ʼi selo. ʼE kau ai te ʼu pilo tāfito ʼa te kau Fakamoʼoni ʼa Sehova, tanatou ʼu filiale, tonatou ʼu Fale ʼo te Puleʼaga, pea mo tanatou ʼu Fale Fakatahi ʼaē ʼi te malamanei kātoa. ʼE toe kau ki te ʼu “koloā” ʼaia, ia te maʼua ʼaē ko te faka mafola ʼo “te logo lelei ʼo te puleʼaga,” ʼi te kele kātoa pea mo akoʼi ia te hahaʼi ʼaē ʼe nātou tali. ʼE fakaʼaogaʼi e te ʼAtua ia “te tagata kaugana” moʼo tānaki ki te ʼu kokelekasio, ia “te toe hahaʼi tokolahi, . . . mai te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli,” pea ʼe nātou hāo anai ʼi te mamahi lahi. (Luka 12:​42-44; Mat. 24:14; Apk. 7:​9-14, MN ) ʼE lagolago mālohi ia te toe hahaʼi tokolahi ʼaia ki te faka mafola ʼo te logo lelei ʼo aʼu ki te ʼu potu taupotu ʼo te kele. ʼE nātou kau ki te ʼu “koloā” maʼuhiga ʼo Kilisito, pea ʼe ʼofainaʼi ʼaupito e te kalasi ʼo te tagata kaugana, ʼuhi ko tanatou lagolago agatonu pea mo tanatou faʼafai.

TE GĀUE ʼO TE KOLESI PULE

ʼE faiga ia “te tagata kaugana agatonu mo poto” ke ina taupau ia te logo tahi pea mo ina fakatuʼutuʼu ia meʼa fuli “ ʼi te fakapotopoto pea mo te fakatokatoka.” (1 Ko. 14:​40, MN ) Moʼo fai ia te faʼahi ʼaia ʼi te ʼuluaki sēkulō, neʼe filifili he kūtuga ʼi te kau Kilisitiano fakanofo ʼaē neʼe kau ʼi te tagata kaugana agatonu mo poto, ke nātou fakafofoga ia te kalasi ʼaia. ʼI tonatou tuʼulaga ʼaia, neʼe nātou lava fai he ʼu tonu kae ʼe mole nātou fakalavelave ki te kau taupau fakanofo fuli. Mai te kokelekasio ʼaē neʼe kau kiai ʼi Selusalemi, neʼe nātou faʼufaʼu he kolesi pule neʼe ina takitaki ia te ʼu kokelekasio fuli ʼa te kau Kilisitiano fakanofo.

Talu mai te Penikosite ʼo te taʼu 33 ʼo totatou temi, ko te kokelekasio faka Kilisitiano ʼaē neʼe hoki fakatuʼu, neʼe takitaki e te kau ʼapositolo agatonu ʼo te ʼAliki ko Sesu Kilisito. (Gaue 4:​33, 35, 37; 5:​18, 29) ʼI te teitei taʼu 49 ʼo totatou temi, neʼe mole kei tuʼakoi pe ia te kolesi pule ki te kau ʼapositolo ʼa Sesu. ʼI te temi ʼaē neʼe hoko ai te fihi ʼo ʼuhiga mo te silikosisio, ko te kolesi pule neʼe ko “te kau ʼapositolo pea mo te kau tagata ʼāfea ʼaē ʼi Selusalemi.” (Gaue 15:​1, 2, MN ) Ko tanatou gāue neʼe ko te vakavakaʼi ʼo te ʼu fihifihia ʼa te kau Kilisitiano ʼi te ʼu potu fuli pe ʼaē neʼe nātou nonofo ai. Neʼe nātou momoli kiā nātou he ʼu tohi pea mo he ʼu fakatotonu, ʼe ina fakaloto mālohiʼi ia te ʼu kokelekasio pea mo ina faka fealagia ki te ʼu tisipulo ke nātou taupau tanatou logo tahi ʼi tanatou ʼu manatu pea mo tanatou ʼu gāue. Neʼe tapuakinaʼi pea mo fakatuputupu e Sehova ia te ʼu kokelekasio, he neʼe nātou fakalogo ki te takitaki ʼa te kolesi pule.​—Gaue 8:​1, 14, 15; 15:​22-31; 16:​4, 5.

ʼE kei ʼiloga iā ʼaho nei te lelei ʼo te fakatuʼutuʼu ʼaia. Ko te kau Kilisitiano fakanofo ʼaē ʼe nātou faʼufaʼu ia te Kolesi Pule ʼa te kau Fakamoʼoni ʼa Sehova ʼo te temi ʼaenī, ʼe nātou gāue agatonu talu mai ni ʼu lauʼi hogofulu taʼu ʼi te teokalasia. ʼE nātou fai he takitaki fakalaumālie ki te hahaʼi ʼa Sehova, ohage ko tona fai e te kolesi pule ʼi te ʼuluaki sēkulō. Ko te Kolesi Pule ʼo te temi ʼaenī, ʼe kei ina hoko atu tona maʼua ʼaē ko te takitaki ʼo te gāue fai faka mafola, te faʼu ʼa he ʼu tohi ako Tohi-Tapu, pea mo te fakanofo ʼa he ʼu tagata ʼāfea ʼe nātou fai anai he ʼu gāue kehekehe ʼi te kautahi. Ko te ʼu faʼahi ʼaia ʼe ko he tahi ʼu koloā faka hau ʼa Kilisito ʼe tokaga kiai te kūtuga ʼaia iā ʼaho nei. Ohage ko te kau ʼuluaki Kilisitiano, ʼe tou fiafia ʼo ʼuhiga mo te ʼu tēhina ʼaia kua fotufotuʼa ʼi te faʼahi fakalaumālie, ʼi tanatou takitaki pea mo fai tokoni ʼaki ia te Tohi-Tapu ʼo ʼuhiga mo te ʼu faʼahi ʼo te tauhi.

Ohage ko te ʼuluaki sēkulō, ko te ʼu tagata ʼo te Kolesi Pule ʼe ko he ʼu tagata agahala. Kae ʼi te temi muʼa, neʼe fakaʼaogaʼi e Sehova te ʼu tagata agahala moʼo fakahoko ia tona finegalo. Neʼe ina fakatotonu kiā Noe ke ina faʼu he aleka pea mo ina faka mafola ia te fakaʼauha ʼaē neʼe tonu ke hoko ʼi tona temi. (Sen. 6:​13, 14, 22; 2 Pet. 2:5) Neʼe ina hinoʼi ia Moisese ke ina fakamavae Tana hahaʼi mai Esipito. (Ek. 3:10) Neʼe ina takitaki te ʼu tagata agahala ke nātou tohi ia te Tohi-Tapu. (2 Tim. 3:16; 2 Pet. 1:21) ʼO mahino mai, ʼe mole tonu ke tou lākilua ʼo ʼuhiga mo tana kautahi, ʼuhi ko tana fakaʼaogaʼi ʼi te temi nei ia he ʼu tagata agahala moʼo takitaki ia te gāue, ʼaē ko te fai faka mafola pea mo te fai ʼo ni ʼu tisipulo. Kae ʼe tonu ke tou lotomālohi ai, heʼe tou ʼiloʼi kapau ʼe mole lagolago ia Sehova ki te Kolesi Pule, pea ʼe mole feala anai hana fai ia te ʼu gāue fuli ʼaia.

HE KOʼE ʼE TONU KE TOU FALALA KI “TE TAGATA KAUGANA AGATONU MO POTO”?

ʼE lahi te ʼu tupuʼaga ke tou falala ki te kalasi ʼa te tagata kaugana. ʼUluaki, neʼe fakanofo e Sesu ia te kalasi ʼaia ke nātou leʼoleʼo tona ʼu “koloā” fuli, ʼo hā ʼaki mai tana falala kātoa ʼaē kiā nātou.

Lua, ʼe fakatotonu ʼi te Folafola ʼa te ʼAtua ki te kau Kilisitiano, ke nātou lagolago kātoa kiā nātou ʼaē ko te kau takitaki. He koʼe ʼe lelei ke tou lagolago kiā nātou? Heʼe ʼui fēnei e Paulo iā Hepeleo 13:​17 (MN): “Koutou fakalogo kiā nātou ʼaē ʼe nātou takitaki koutou, pea mo koutou talagafua, heʼe nātou leʼoleʼo tuʼumaʼu ʼokotou ʼu nefesi, ohage ko he ʼu tagata ʼe nātou huʼi maʼua anai; koteʼuhi ke nātou fai fakafiafia ia te faʼahi ʼaia kae ke ʼaua naʼa nātou fai ʼaki he loto fītaʼa, heʼe fua kovi anai kiā koutou.” Ki totatou puipui pea mo tatatou lelei fakalaumālie, ʼe tonu ke tou fakalogo pea mo tou talagafua ki te ʼu taupau ʼaē ʼe ‘nātou leʼoleʼo tuʼumaʼu totatou ʼu nefesi.’

Neʼe ʼui fēnei e Paulo iā 1 Kolonito 16:​14 (MN): “Koutou fai ia meʼa fuli ʼaki te ʼofa.” ʼE ko te kalitātē maʼuhiga ʼaia ʼaē ko te ʼofa, ʼaē ʼe fakatafito kiai te ʼu tonu ʼaē ʼe fai ʼo ʼuhiga mo te hahaʼi ʼa te ʼAtua. ʼO ʼuhiga mo te ʼofa, ʼe ʼui fēnei iā 1 Kolonito 13:​4-8 (MN): “Ko te ʼofa ʼe faʼa kātaki pea mo agaʼofa. Ko te ʼofa ʼe mole maheka, ʼe mole laupisi, ʼe mole fialahi, ʼe mole ina fai he ʼu aga ʼe mole mata feʼauga, ʼe mole ina kumi pe te meʼa ʼaē ʼe ʼaoga kiā te ia, ʼe mole ʼita ia. ʼE mole ina tokagaʼi te kovi ʼaē neʼe fai age kiā te ia. ʼE mole fakafiafia ki te heʼe faitotonu, kae ʼe fakafiafia ʼaki te moʼoni. ʼE ina ʼamo ia meʼa fuli, ʼe tui kiā meʼa fuli, ʼe falala kiā meʼa fuli, ʼe ina kātakiʼi ia meʼa fuli. Ko te ʼofa ʼe molemo puli ia ʼi he lakaga.” ʼE tou māʼuʼuli fīmālie, heʼe tou fakalogo ki he takitaki ʼe fakatafito kātoa tana ʼu fakatuʼutuʼu ki te ʼofa. Tahi ʼaē meʼa, ko te takitaki ʼaia ʼe ko he faʼifaʼitakiʼi ʼo te ʼofa ʼo Sehova ki tana hahaʼi.

Ko te kalasi ʼo te tagata kaugana, neʼe ina fakamoʼoni ʼi te ʼu ʼahiʼahi, ʼe lagolago te laumālie ʼa te ʼAtua kiā te ia. Neʼe lahi te ʼu tapuakina ʼaē neʼe maʼu e te kautahi fakakelekele ʼa Sehova ʼo totatou temi, koia ʼe feala ʼaki totatou loto kātoa, ke tou lagolago pea mo falala kātoa kiai.

ʼE FEAFEAʼI HATATOU FAKAHĀ ʼE TOU FALALA KI “TE TAGATA KAUGANA”?

Ko nātou ʼaē neʼe hinoʼi ki he ʼu gāue ʼi te kokelekasio, ʼe nātou fakahā tanatou falala, ʼo nātou tali fakafiafia pea mo fai ʼaki he agatonu ia te ʼu maʼua ʼaia. (Gaue 20:28) ʼI totatou ʼuhiga kau fai faka mafola ʼo te Puleʼaga, ʼe tou faʼafai ʼi te fai faka mafola ʼi te ʼu ʼapi, mo te ʼu ʼaʼahi, pea mo te ʼu ako Tohi-Tapu. (Mat. 24:14; 28:​19, 20) Ke feala he ʼaoga kātoa ia te meʼa kai fakalaumālie lelei ʼaē ʼe tufa mai e “te tagata kaugana agatonu mo poto,” ʼe tou teuteuʼi lelei tatatou ʼu fono pea mo tou kau kiai, ʼo kau kiai mo te ʼu fakatahi lalahi ʼaē ʼe fai ʼi te taʼu fuli. Ka tou fakaʼaogaʼi hotatou temi ki totatou ʼu tēhina ʼi te ʼu fakatahi faka Kilisitiano ʼaia, ʼe tupu ai hatatou fefakaloto mālohi ʼaki ʼe fua lelei ʼaupito kiā tatou.​—Hep. 10:​24, 25.

ʼE toe ʼiloga foki tatatou falala ki “te tagata kaugana agatonu” mo kapau ʼe tou lagolago ki te kautahi ʼa Sehova ʼaki totatou ʼu koloā. (Taag. 3:​9, 10) ʼE tou tokoni fakavilivili ki totatou ʼu tēhina mokā tou sisio ʼe nātou faigataʼaʼia ʼi te maʼuli fakasino. (Kal. 6:10; 1 Tim. 6:18) ʼE tou fai ia te faʼahi ʼaia ʼuhi ko totatou ʼofa fakatautehina moʼoni, ʼo tou vakaʼi tuʼumaʼu he ʼu ʼaluʼaga moʼo fakahā ia tatatou loto fakafetaʼi kiā Sehova pea mo tana kautahi ʼuhi ko tona lotoʼofa ʼaē kiā tatou.​—Soa. 13:⁠35.

ʼE toe feala hatatou fakahā tatatou falala ki te kalasi ʼo te tagata kaugana, ʼo lagolago ki tana ʼu tonu. Tatau aipe peʼe mole tou mahino kātoa ki te tupuʼaga ʼo tana ʼu tonu, kae ʼe tou ʼiloʼi kapau ʼe tou mulimuli kiai pea ʼe fua lelei anai kiā tatou. ʼI ʼihi temi ʼaē neʼe toe fakamahino lelei ai te ʼu fehuʼi maʼuhiga, neʼe tou lagolago ʼaki he loto kātoa ki te ʼu tonu ʼaia. Koia, kua tapuakinaʼi tatou e Sehova heʼe tou fakalogo ki tana Folafola pea mo te kalasi ʼo te tagata kaugana, pea neʼe tou fakahā ai ʼe tou talagafua ki te Pule, ia Sesu Kilisito.

Koia, ʼe tonu ke tou falala kātoa ki “te tagata kaugana agatonu mo poto.” Ko Satana, te ʼatua ʼo te tuʼu ʼo te ʼu faʼahiga meʼa ʼaenī, ʼe ina faigaʼi mālohi ke ina ʼulihi te huafa ʼo Sehova pea mo tana kautahi. (2 Ko. 4:4) ʼAua naʼa tou tui ki tana ʼu kākā. (2 Ko. 2:11) ʼE ina ʼiloʼi ʼe kei toe tona kiʼi temi nounou ʼi muʼa ʼo tona lī ki te vanu, koia ʼaē ʼe ina faigaʼi ai ke ina toho mo ia he tokolahi ʼo te ʼu kaugana ʼa Sehova. (Apk. 12:12) Logola ʼe fakaʼāsili ia te ʼu fai fakahala ʼa Satana, kae ʼe tou faiga anai tatou ke tou toe fakaōvi ʼaupito kiā Sehova, pea mo tou falala kātoa ki te kalasi ʼaē ʼe ina fakaʼaogaʼi moʼo takitaki ʼo tana hahaʼi iā ʼaho nei. ʼE tauʼi e Satana “te toe ʼo te hako [ʼo te fafine]”, ʼaē neʼe hinoʼi ke ina takitaki ia “te gāue ʼaē ko te fakamoʼoni kiā Sesu.” (Apk. 12:​17, MN ) Kapau ʼe tou falala kātoa kiā Sehova pea mo tana ʼu fakatuʼutuʼu, ʼe tou faʼufaʼu anai he foʼi famili logo tahi.