FAʼAHI 5
Te Faʼahiga Taupau ʼo Te Tokalelei Mo ʼAkolua Matuʼā
“Ke kotou kofu . . . te agalelei, mo te fakamalalo, mo te agavaivai, pea mo te kataki.”—Kolose 3:12
Ko te ʼohoana ʼe tupu mai ai he kiʼi famili foʼou. ʼE mahino ia, ʼe ke haga ʼofa anai ki ʼau matuʼā, kaʼe ʼi te temi nei, ko ia ʼae ʼe maʼuhiga age kia koe, ko tou hoa. ʼE lagi faigataʼa ki ʼau matuʼā ia tanā tali ia te faʼahi ʼaia. Kaʼe ʼe feala ke tokoni atu ia te ʼu pelesepeto Fakatohi-tapu ke kolua taupau te tokalelei mo ʼakolua matuʼā pea mo hoko atu te faʼufaʼu ʼo tokolua maʼuli fakafamili.
1 KOLUA TAUPAU HE FAʼAHIGA MANATU ʼE LELEI ʼO ʼUHIGA MO ʼAKOLUA MATUʼĀ
KOTEA TE MANATU ʼI TE TOHI-TAPU? “Fakaapaapa ki tau tamai mo tau fae.” (Efeso 6:2) Tatau aipe pe kua kolua lalahi, ʼe tonu ke kolua fakamaʼuhigaʼi pea mo fakaʼapaʼapaʼi ʼakolua matuʼā. ʼE tonu ke kolua mahino, ʼe kolua takitahi pe mo ʼana matuʼā, pea ʼe tonu ke kolua tokakaga kia naua. “Ko te ofa e mole maheka,” koia ʼaua naʼa kolua femahekaʼaki ʼi te ʼu felogoʼi ʼae ʼe kolua fai mo ʼakolua matuʼā.—1 Kolinito 13:4; Kalate 5:26.
KOTEA ʼAE ʼE FEALA KE KOLUA FAI?
ʼAua naʼa fai e he tahi ia koulua ia te ʼu palalau ʼaeni: “ʼE fatufatuʼi tuʼumaʼu au e tou famili” peʼe ke ui fenei: “ʼE mole he temi, ʼe leleiʼia ai e tau faʼe ia te meʼa ʼae ʼe au fai”
Kolua faiga ke kolua femahinoʼaki
2 KOLUA PALALAU FAKAHAGATONU MOKA ʼE ʼAOGA
KOTEA TE MANATU ʼI TE TOHI-TAPU? “E tonu ai ke mavae leva te tagata i tana tamai mo tana fae, pea ke pipiki leva ia ia ki tona ohoana, pea e na liliu anai ko he sino e tahi.” (Senesi 2:24) ʼI te hili ʼo te ʼohoana, ʼe lagi manatu ʼakolua matuʼā ʼe kei nā puleʼi pe koulua pea mo fai he ʼu tonu ʼe mole nā kau ki ai.
ʼE tonu ke kolua manatu tahi ki te ʼu tuʼakoi kua kolua fai age, ʼaki he agalelei. ʼE feala ke kolua palalau fakahagatonu age kaʼe mole ʼaki he ʼu palalau fefeka. (Taaga Lea 15:1) ʼAki te agavaivai, mo te agamalu pea mo te faʼa kataki, ʼe kolua maʼu anai he ʼu felogoʼi ʼofa mo ʼakolua matuʼā pea ʼe kotou haga “fekatakiaki [anai] i te ofa.”—Efeso 4:2.
KOTEA ʼAE ʼE FEALA KE KOLUA FAI?
Kapau ʼe kolua tokagaʼi ʼe tokaga fau ʼakolua matuʼā ki tokolua maʼuli fakataumatuʼa, kolua toʼo he temi ke kolua palalau ai ki te faʼahi ʼaia
Kolua tonu tahi ki te faʼahiga fakatokatoka ʼo te fihifihia