Te Faʼahiga Fakaalualu ʼo Te Falā

ʼE ʼaoga kia tatou fuli ia te falā moʼo toʼo ʼaki te ʼu meʼa ʼae ʼe ʼaoga ki totatou famili. (Taaga Lea 30:8) Pea tahi, “ko te falā ʼe ʼaoga ki te puipui.” (Tagata Tanaki 7:12, MN) ʼE lagi faigataʼa takolua palalau ki te falā, kaʼe ʼaua naʼa kolua tuku ia te faʼahi ʼaia ke ina fakatupu he ʼu fihifihia ʼi tokolua maʼuli fakataumatuʼa. (Efeso 4:32) ʼE tonu ki te taumatuʼa ke nā fefalalaʼaki pea mo nā tonu tahi ki te faʼahiga fakaʼaogaʼi ʼo tanā foʼi falā.

1 KOLUA FAKATUʼUTUʼU FAKATOMUʼA

KOTEA TE MANATU ʼI TE TOHI-TAPU? “Pe ko ai ia koutou, mo kapau e loto ia ke ina fau he tule, e mole nofo ifo mua ia ki lalo, o fakafuafua te puli, pea mo sio pe e ina mau he mea ke fakaosi ai ia.” (Luka 14:28) ʼE lelei ke kolua vakavakaʼi fakatahi ia te faʼahiga fakaʼaogaʼi ʼo takolua foʼi falā. (Amosi 3:3) Kolua fakatuʼutuʼu pe kotea ʼae ʼe ʼaoga ke kolua toʼo pea mo te lahi ʼo te falā ʼae ʼe fakaʼaogaʼi ki ai. (Taaga Lea 31:16) ʼE mole tonu pe anai ke kolua toʼo meʼa koteʼuhi ʼe kolua fealagia ia te faʼahi ʼaia. Kolua tokakaga naʼa kolua tuʼu maʼua. Kolua fakaʼaogaʼi pe ia te falā ʼae ʼe kolua maʼu.—Taaga Lea 21:5; 22:7.

KOTEA ʼAE ʼE FEALA KE KOLUA FAI?

• Kapau ʼe kei toe hakolua foʼi falā ʼi te fakaʼosi ʼo te mahina, kolua fakatuʼutuʼu fakatahi pe ʼe kolua fakaʼaogaʼi anai kitea

• Kaʼe kapau ʼe mole toe he foʼi falā, kolua fakatuʼutuʼu ia te ʼu meʼa ʼae ʼe tonu ke fakasiʼisiʼi tona toʼo. Ohage la, kolua fakatuʼutuʼu ke kolua fai takolua kuka ʼi fale kaʼe mole kolua olo ʼo fale kai

2 KOLUA PALALAU FAKAHAGATONU PEA MO AGA FAKAPOTOPOTO

KOTEA TE MANATU ʼI TE TOHI-TAPU? “Koteuhi e ma kumi te mea e lelei, o mole gata pe ia mua o [Sehova], kae ia mua foki o te u tagata.” (2 Kolinito 8:21) Fakaha ki tou hoa pe ko te fia tou totogi pea mo te lahi ʼo te falā ʼae neʼe ke fakaʼaogaʼi.

Felogoʼi mo tou hoa ʼi muʼa ʼo hau fakaʼaogaʼi he falā lahi ki he meʼa. (Taaga Lea 13:10) Kapau ʼe lelei ʼakolua felogoʼi ʼo ʼuhiga mo takolua foʼi falā, ʼe tokalelei anai tokolua maʼuli fakataumatuʼa. Kolua manatuʼi, ko te foʼi falā ʼae ʼe maʼu, ʼe mole ʼa ia pe ʼae ʼe gaue, kaʼe ʼe ʼa te famili.—1 Timoteo 5:8.

KOTEA ʼAE ʼE FEALA KE KOLUA FAI?

• Kolua fakatuʼutuʼu he kiʼi vaega falā ʼe feala ke kolua fakaʼaogaʼi takitokotahi

• ʼAua naʼa kolua atalitali ke hoko he fihifihia, pea hoki kolua palalau ki takolua foʼi falā