Kotou Tauhi Fakafamili Kia Sehova

Ohage ko tona fakaha atu ʼi te kaupepa lahi ʼaeni, ʼe kolua maʼu ʼi te Tohi-Tapu he ʼu tuʼuga pelesepeto, ʼe tokoni atu anai kia koulua pea mo tokolua kiʼi famili. ʼE loto e Sehova ke kotou fiafia. ʼE ina fakapapauʼi mai, kapau ʼe kolua fakamuʼamuʼa tana tauhi, “e fakalahi atu anai te u mea fuli aena [ʼe ʼaoga] kia koutou.” (Mateo 6:33) ʼE ina loto ke kolua liliu ko ʼona kaumeʼa. Kolua toʼo ia te ʼu faigamalie fuli ke kolua fakamalohiʼi ʼakolua felogoʼi pea mo ia. ʼE ko te toe pilivilesio ʼaia ʼe feala ke maʼu e he tahi.—Mateo 22:37, 38.

1 KOTOU FAKAMALOHIʼI ʼAKOTOU FELOGOʼI MO SEHOVA

KOTEA TE MANATU ʼI TE TOHI-TAPU? “E au hage anai kia koutou ko he Tamai, pea e kotou hage anai kia au ko ni foha mo ni ofafine, e folafola [ia Sehova].” (2 Kolinito 6:18) ʼE loto e te ʼAtua ke kolua maʼu he ʼu felogoʼi lelei pea mo ia. Ki te faʼahi ʼaia, ʼe tokoni atu anai te faikole. ʼE ina fakaafe koulua ke kolua “faikole tuʼumaʼu.” (1 Tesalonika 5:17, MN) ʼE fia logo ki ʼakolua manatu pea mo te ʼu meʼa ʼae ʼe kolua hoha ki ai. (Filipe 4:6) Kapau ʼe kolua faikole mo tokolua kiʼi famili, ʼe natou tokagaʼi anai ʼe maʼuli moʼoni te ʼAtua.

ʼO mole gata ʼaki pe takolua palalau ki te ʼAtua, ʼe tonu ke kolua toe fakalogo kia te ia. ʼE kolua fai ia te faʼahi ʼaia ʼaki takolua ako tana Folafola pea mo te ʼu tohi Fakatohi-tapu. (Pesalemo 1:1, 2) Kolua metitasio ki te ʼu meʼa ʼae ʼe kolua ako. (Pesalemo 77:12, 13) Ko takolua fakalogo ʼae ki te ʼAtua, ʼe kau ki ai te taupau ʼo te ʼu fono Fakakilisitiano.—Pesalemo 122:1-4.

Ko te tahi fakamalohiʼi ʼo ʼakolua felogoʼi mo Sehova, ʼe ko takolua palalau ʼo ʼuhiga mo ia. Koia, kapau ʼe kolua fai ia te faʼahi ʼaia, ʼe kolua fakaovi anai kia te ia.—Mateo 28:19, 20.

KOTEA ʼAE ʼE FEALA KE KOLUA FAI?

• Kolua toʼo he temi ke kolua lau ai ia te Tohi-Tapu pea mo faikole

• ʼI tokolua kiʼi famili, kolua fakamuʼamuʼa te ʼu gaue fakalaumalie ʼi te ʼu fakafiafia pea mo te ʼu temi malolō

2 KOTOU FIAFIA ʼI TAKOTOU AKO FAKAFAMILI

KOTEA TE MANATU ʼI TE TOHI-TAPU? “Kotou fakaoviovi ki te Atua, pea e fakaoviovi atu anai ia kia koutou.” (Sakopo 4:8) Kolua fakatuʼutuʼu he polokalama ki te ako fakafamili pea kolua fakaʼapaʼapa ki ai. (Senesi 18:19) Kaʼe ʼe mole gata ai. ʼE tonu ke kolua manatuʼi te ʼAtua ʼi te ʼaho fuli. Kolua fakamalohiʼi te ʼu felogoʼi ʼo tokolua kiʼi famili pea mo te ʼAtua ʼo kolua palalau ʼo ʼuhiga mo ia ʼi te ʼu aluʼaga kehekehe, ‘moka kolua nonofo anai ʼi tokolua ’api, moka kolua fagona anai, moka kolua momoe anai, pea moka kolua ʼaʼala ake anai ʼi takolua momoe.’ (Tetelonome 6:6, 7) Kolua fakatuʼutuʼu ke kolua maʼu ia te manatu ʼa Sosue, ʼae neʼe ina ui fenei: “Ko au mo toku famili, e matou tauhi anai [kia Sehova].”—Sosue 24:15.

KOTEA ʼAE ʼE FEALA KE KOLUA FAI?

• Kolua fai he polokalama ako ʼe alu tahi mo te ʼu meʼa ʼae ʼe ʼaoga kia natou fuli ʼo te famili