ʼE Feala Ke Maʼuli Fiafia Tou Famili

1, 2. Kotea ʼae ʼe loto e Sehova ke maʼu e te ʼu famili?

NEʼE fakatapuʼi e Sehova ʼAtua te ʼuluaki tagata mo te ʼuluaki fafine. Neʼe ko te ʼuluaki taumatuʼa ʼaia. Pea ʼe ui mai ʼi te Tohi-Tapu neʼe ina fakatupu te ʼuluaki fafine pea “nee ina aumai leva . . . ki te tagata.” ʼI te lahi ʼo te fiafia ʼo Atama, neʼe ina fai ai te ʼu palalau ʼaeni: “I te faiaga leva aeni, koeni ae e hui ki oku hui pea kakano ki toku kakano!” (Senesi 2:​22, 23) Koia, ʼe ha mai ai ʼe loto e Sehova ke ʼohoana te hahaʼi pea ke natou maʼuli fiafia.

² Meʼa fakaʼofaʼofa foki, he ʼe tokolahi te ʼu famili ʼe mole natou maʼuli fiafia. Kaʼe, ʼe tou maʼu ʼi te Tohi-Tapu he ʼu pelesepeto moʼo tokoni kia natou fuli ʼo te famili ke natou maʼuli fiafia fakatahi.​—Luka 11:28.

TE MEʼA ʼAE ʼE KOLE E TE ʼATUA KI TE ʼU TAGATA ʼOHOANA

3, 4. (1) ʼE tonu ke gaohi feafeaʼi e te tagata tona ʼohoana? (2) He koʼe ʼe tonu ki te taumatuʼa ke nā fefakamolemoleʼaki?

³ ʼE ui ʼi te Tohi-Tapu ʼe tonu ki te tagata ke ʼofa mo fakaʼapaʼapa ki tona ʼohoana. Lau ia Efeso 5:​25-29. ʼE tonu anai ki te tagata ke ina gaohi fakalelei tona ʼohoana ʼaki te ʼofa, ke ina puipui pea mo tokaga fakalelei ki ai. Pea ʼe mole tonu anai ke ina gaohi koviʼi.

⁴ Kaʼe, kotea ʼae ʼe tonu ke fai e te tagata moka fai e tona ʼohoana he ʼu lakahala? ʼE ui fenei ʼi te Tohi-Tapu ki te ʼu tagata ʼohoana: “Kotou haga ʼoʼofa ki ʼokotou ʼohoana, pea ʼaua naʼa kotou iita kovi kia natou.” (Kolose 3:19) ʼU tagata ʼohoana, kotou manatuʼi ʼe kotou toe fai pe la mo koutou ni lakahala. Pea kapau, ʼe kotou loto ke fakamolemole atu te ʼAtua, ʼe tonu foki ke kotou lotofakamolemole ki ʼokotou ʼohoana. (Mateo 6:​12, 14, 15) Koia, ʼe tonu ai ki te taumatuʼa ke nā lotolelei ʼo fefakamolemoleʼaki. Koteʼuhi ʼe feala ke fiafia ai tonā maʼuli fakataumatuʼa.

5. He koʼe ʼe tonu ke fakaʼapaʼapa te tagata ki tona ʼohoana?

⁵ ʼE kole e Sehova ki te ʼu tagata ke natou fakaʼapaʼapa ki ʼonatou ʼohoana. ʼE tonu ki te tagata ke ina fakakaukauʼi lelei te ʼu meʼa ʼae ʼe ʼaoga ki tona ʼohoana ʼi te faʼahi fakasino pea mo te ʼu meʼa ʼe ina logoʼi ʼi tona loto. Ko te aluʼaga ʼaia ʼe maʼuhiga ʼaupito. Koteʼuhi kapau ʼe mole gaohi fakaleleiʼi e te tagata tona ʼohoana, ʼe mole tali anai ia Sehova ki ʼana faikole. (1 Petelo 3:7) ʼE maʼuhiga kia Sehova ia natou fuli ʼae ʼe ʼoʼofa kia te ia. Koia, ʼe ʼofa fakatatau ia Sehova ki te hahaʼi fafine mo te hahaʼi tagata.

6. Kotea te fakaʼuhiga ʼo te ui ʼae ko he taumatuʼa kua nā liliu ko he “kakano ʼe tahi”?

⁶ Neʼe fakamahino e Sesu ko he taumatuʼa “ ʼe mole kei nā toko lua, kaʼe kua nā liliu ko he kakano ʼe tahi.” (Mateo 19:6) Ko tona fakaʼuhiga ʼe tonu ke nā feagatonuʼaki. (Taaga Lea 5:​15-21; Hepeleo 13:4) Pea ʼe tonu ki te taumatuʼa ke nā fetokagaʼaki ʼi te ʼu meʼa ʼae ʼe ʼaoga kia naua ʼi te faʼahi ʼo te ʼu felaveʼi fakasino. (1 Kolonito 7:​3-5) ʼE tonu ke manatuʼi e te tagata “ ʼe mole fehiʼa he tagata ki tona sino, kaʼe ʼe ina fafaga pea mo fakapelepeleʼi.” Koia, ʼe tonu ki te tagata ke ʼofa pea mo tokaga fakalelei ki tona ʼohoana. Pea tahi, ko te faʼahi tafito ʼae ʼe loto ki ai he fafine, ʼe ko te agalelei mo te ʼofa ʼo tona ʼohoana kia ia.​​—Efeso 5:29.

TE MEʼA ʼAE ʼE KOLE E TE ʼATUA KI TE ʼU FAFINE ʼOHOANA

7. He koʼe ʼe ʼaoga ki he famili he pule?

⁷ ʼE ʼaoga ki te ʼu famili takitahi ia he pule. Koteʼuhi ka takitaki e he tahi he famili, ʼe feala kia natou fuli ʼo te famili ke natou gaue fakatahi. ʼE ui fenei ia 1 Kolonito 11:3: “Ko te pule ʼo te tagata fuli ʼe ko Kilisito, pea ko te pule ʼo te fafine ʼe ko te tagata, pea ko te pule ʼo Kilisito ʼe ko te ʼAtua.”

8. ʼE fakaha feafeaʼi e te fafine tana fakaʼapaʼapa lahi ki tona ʼohoana?

⁸ ʼE fai e te ʼu tagata ʼohoana fuli ni lakahala. Kaʼe, ka lagolago te fafine ki te ʼu tonu ʼo tona ʼohoana mo gaue fakatahi mo ia ʼaki he lotolelei, ʼe fua lelei anai ki te famili fuli. (1 Petelo 3:​1-6) ʼE ui fenei ʼi te Tohi-Tapu: “ ʼE tonu ki te fafine ʼohoana ke fakaʼapaʼapa lahi ki tona ʼohoana.” (Efeso 5:33) Kaʼe ʼe feafeaʼi la mo kapau ʼe mole tauhi te tagata ʼohoana kia Sehova? ʼE tonu ke hoko atu pe te lahi ʼo te fakaʼapaʼapa ʼa te fafine ki tona ʼohoana. ʼE ui fenei ʼi te Tohi-Tapu: “ ʼU fafine ʼohoana, kotou fakalogo ki ʼokotou ʼohoana, ke feala ai, mo kapau ʼe mole fakalogo ʼihi ki te folafola, ke natou tafoki mole ʼaki ʼakotou palalau kaʼe ʼaki takotou aga, koteʼuhi ʼe natou sisio mata ki takotou agamaʼa pea mo takotou fakaʼapaʼapa lahi.” (1 Petelo 3:​1, 2) ʼEi, ʼe feala ke tokoni te fafine ki tona ʼohoana ke mahino ki tana tui pea mo fakaʼapaʼapa kia ia, ʼaki hana tuku he faʼifaʼitaki ­lelei.

9. (1) Ka mole manatu tahi te fafine mo tona ʼohoana, kotea ʼae ʼe feala ke ina fai? (2) Kotea te ʼu tokoni ʼe tou maʼu ia Tito 2:​4, 5 ʼo ʼuhiga mo te ʼu fafine?

⁹ Ka mole manatu tahi te fafine mo tona ʼohoana, kotea ʼae ʼe feala ke ina fai? ʼE tonu ke ina fakaha tana manatu ʼaki he aga fakaʼapaʼapa. Tou toʼo te faʼifaʼitaki ʼo Sala. Neʼe palalau ia Sala ki he meʼa neʼe mole leleiʼia e Apalahamo, kaʼe, neʼe ui fenei e Sehova kia Apalahamo: “Fakalogo ki tona leʼo.” (Senesi 21:​9-12, MN ) ʼE mahino papau ia, ʼe tahitahiga anai te toʼo e te tagata ʼohoana he tonu ʼe fakafeagai ki te ʼu pelesepeto ʼi te Tohi-Tapu. Koia ʼae ʼe tonu anai ki te fafine ke lagolago ki tona ʼohoana. (Gaue 5:29; Efeso 5:24) Pea tahi, ko he fafine ʼe fakapotopoto, ʼe tokaga fakalelei anai ki tona famili. (Lau ia Tito 2:​4, 5.) Pea ka tokagaʼi e te tagata mo ʼana fanau tana gaue kinakina maʼa natou, ʼe lahi age anai tonatou ʼofa mo fakaʼapaʼapa kia ia.​​—Taaga Lea 31:​10, 28.

10. Kotea ʼae ʼe ui ʼi te Tohi-Tapu ʼo ʼuhiga mo te tahi nofo pea mo te mavete?

¹⁰ ʼI ʼihi temi, ʼe toʼo e te ʼu taumatuʼa ia he tonu fakavilivili ke nā tahi nofo peʼe ke nā mavete. Kaʼe, ʼe ui ʼi te Tohi-Tapu “ke mole mavae te fafine mai tona ʼohoana” pea “ ʼe mole tonu ki te tagata ke mavae mai tona ʼohoana.” (1 Kolonito 7:​10, 11) ʼE ʼi ai ʼihi aluʼaga faigataʼa, ʼe feala ki he taumatuʼa ke nā tahi nofo. Kaʼe, ʼi muʼa ʼo tanā toʼo te tonu ʼaia, ʼe tonu ke nā fakakaukauʼi lelei. Kotea ʼae ʼe ui ʼi te Tohi-Tapu ʼo ʼuhiga mo te mavete? ʼE fakaha ʼi te Tohi-Tapu ʼe ko te tupuʼaga pe ʼaeni ʼe tahi ʼe feala ai te mavete: Mo kapau neʼe fai e te tagata peʼe ko te fafine he ʼu felaveʼi fakasino mo he tahi ʼe mole ko tona ʼohoana.​​—Mateo 19:9.

TE MEʼA ʼAE ʼE KOLE E TE ʼATUA KI TE ʼU MATUʼĀ

11. Kotea ʼae ʼe ʼaoga tafito ki te ʼu fanau?

¹¹ ʼU matuʼā, kotou toʼo he temi feʼauga ke kotou nonofo ai mo ʼakotou fanau. ʼE ʼaoga ke kotou fakatahi mo ʼakotou fanau. Pea ko te faʼahi tafito ʼae ʼe ʼaoga moʼoni kia natou, ʼe ko takotou tokoni ke natou iloʼi ia Sehova.​​—Tetelonome 6:​4-9.

12. Kotea ʼae ʼe tonu ke fai e te ʼu matuʼā moʼo puipui ʼanatou fanau?

¹² ʼE kua ʼaʼasili age te agakovi ʼi te malama ʼa Satana. ʼE feala anai ki ʼihi fanau ke natou tau mo ni fihifihia, ohage la ko honatou fakaʼalikiʼi. ʼU matuʼā, ʼe tonu ke kotou puipui ʼakotou fanau.a (1 Petelo 5:8) ʼO feafeaʼi? Kotou palalau mo ʼakotou fanau ki te ʼu faʼahiga aluʼaga ʼaia maʼia pe ʼe faigataʼa kia koutou. Kotou fakamahino age pe ʼe feafeaʼi hanatou fakasiosio poto mo fakamamaʼo mai te taʼi faʼahiga hahaʼi ʼaia.

13. ʼE tonu ke akoʼi feafeaʼi e te ʼu matuʼā ʼanatou fanau?

¹³ ʼE moʼoni, ʼe tonu ke akoʼi e te ʼu matuʼā ki ʼanatou fanau te aga ʼae ʼe tonu ke natou fai, koteʼuhi ʼe ko tonatou maua. ʼO feafeaʼi? ʼE ʼaoga te fakatonutonu ki ʼakotou fanau, kaʼe ʼe mole tonu ke fefeka fau peʼe malohi fau tonatou fakatonutonuʼi. (Selemia 30:11) Koia, ʼaua naʼa kotou fakatonutonuʼi natou moka kotou iita. ʼAua naʼa kotou fai ni palalau kia natou ohage ko “he heleta” pea mo fakamamahiʼi natou. (Taaga Lea 12:18) Kotou fakamahino ki ʼakotou fanau ke natou iloʼi pe koʼe ʼe tonu ke natou fakalogo.​​—Efeso 6:4; Hepeleo 12:​9-11; vakaʼi te Fakamahino 30.

TE MEʼA ʼAE ʼE KOLE E TE ʼATUA KI TE ʼU FANAU

14, 15. He koʼe ʼe tonu ke fakalogo te ʼu fanau ki ʼanatou matuʼā?

¹⁴ Neʼe fakalogo tuʼumaʼu ia Sesu ki tana Tamai, maʼia pe la ʼi te ʼu temi faigataʼa. (Luka 22:42; Soane 8:​28, 29) ʼO toe feia pe, ʼe loto e Sehova ke fakalogo te ʼu fanau ki ʼanatou matuʼā.​​—Efeso 6:​1-3.

¹⁵ ʼU fanau, ʼe lagi faigataʼa takotou fakalogo ki ʼakotou matuʼā. Kaʼe, ʼaua naʼa galo kia koutou ka kotou fakalogo, ʼe fiafia te loto ʼo Sehova pea mo ʼakotou matuʼā.b​​—Taaga Lea 1:8; 6:20; 23:​22-25.

16. (1) ʼE faiga feafeaʼi ia Satana ke ina fakaneke te kau tupulaga ke natou fai he meʼa ʼe kovi? (2) He koʼe ʼe maʼuhiga ke kotou kumi hokotou ʼu kaumeʼa ʼe ʼoʼofa ia Sehova?

¹⁶ ʼE feala ke fakaʼaogaʼi e te Tevolo ʼokotou kaumeʼa pea mo ʼihi atu kau tupulaga ke natou fakaneke koutou ke kotou fai he meʼa ʼe kovi. ʼE ina iloʼi ʼe faigataʼa anai takotou tekeʼi te ʼu fakaneke ʼaia. Ohage la, ko te ʼofafine ʼo Sakopo ʼae ko Tina, neʼe ʼi ai ʼona kaumeʼa ʼe mole ʼoʼofa ia Sehova. Pea ʼuhi ko te aluʼaga ʼaia, neʼe tau ia ia mo tona famili mo he ʼu fihifihia. (Senesi 34:​1, 2) Kapau ʼe mole ʼoʼofa ʼokotou ʼu kaumeʼa ia Sehova, ʼe lagi natou fakaneke anai koutou ke kotou fai he meʼa ʼe fehiʼa ki ai ia Sehova. Kapau ʼe kotou fai te meʼa ʼae ʼe kovi, ʼe kotou fakamamahiʼi anai tokotou famili pea mo te ʼAtua. Pea ʼe kotou toe mamahi ai pe foki mo koutou. (Taaga Lea 17:​21, 25) Koia, ʼe maʼuhiga ai ke kotou kumi hokotou ʼu kaumeʼa ʼe ʼoʼofa ia Sehova.​​—1 Kolonito 15:33.

ʼE FEALA KE MAʼULI FIAFIA TOU FAMILI

17. Kotea ʼae ʼe kole e te ʼAtua kia natou fuli ʼo te famili?

¹⁷ Kapau anai ʼe tahi mulimuli ia natou fuli ʼo te famili ki te ʼu fakatotonu ʼa te ʼAtua, ʼe feala ai anai ke natou tekeʼi te ʼu fihifihia. Koia, ʼu tagata ʼohoana, kotou ʼoʼofa mo gaohi fakalelei ʼokotou ʼohoana. ʼU fafine ʼohoana, kotou fakaʼapaʼapa mo fakalogo ki ʼokotou ʼohoana. Kotou faʼifaʼitakiʼi te fafine ʼae ʼe talanoa ki ai ia Taaga Lea 31:​10-31. ʼU matuʼā, kotou akoʼi ʼakotou fanau ke natou ʼoʼofa ki te ʼAtua. (Taaga Lea 22:6) ʼU tamai, kotou takitaki “lelei” tokotou famili. (1 Timoteo 3:​4, 5; 5:8) Pea ʼu fanau, kotou fakalogo ki ʼakotou matuʼā. (Kolose 3:20) ʼAua naʼa galo kia tatou, ʼe tou fai fuli ni lakahala. Koia, ʼe tonu ai ke tou agavaivai mo tou fefakamolemoleʼaki. ʼEi, ʼe feala ke maʼu e natou fuli ʼo te famili ʼi te Tohi-Tapu ni tokoni ʼe foaki age e Sehova.