Kei Koutou Manatuʼi Koa?
Neʼe koutou maʼu koa ʼi te ʼu alatike ʼaenī kua hili atu ʼo te Tule Leʼo, hona ʼuhiga tāfito kia koutou? Pea, he koʼe koa ʼe mole koutou fai he sivi ʼo tokotou ʼatamai ʼaki te ʼu fehuʼi ʼaenī ki lalo atu?
▫ Koteā te ʼu fakamoʼoni ʼe ʼiloga mai ai ko te tulivio ʼaē ia ʼaho ʼo Noe neʼe ina tuku te fakaʼiloga maʼuhiga ʼi te hahaʼi fuli?
ʼE mātou fakafuafua ʼe laka ʼi te 500 fagana ʼo te tulivio ʼe fakamatala, pea mo laka ʼi te ʼu telepi e 250 pea mo te atu ʼu hahaʼi. Ko te ʼu fagana fuli ʼaia ʼe teitei tatau fuli. — 15/1, pasina 5.
▫ ʼE feafeaʼi koa te tatau ʼo te ʼu polofeta loʼi ia ʼaho nei pea mo nātou ʼaē ʼi te temi ʼo Selemia?
Ia ʼaho nei ko te ʼu polofeta loʼi ʼe nātou ʼui ʼe nātou fakafofoga te ʼAtua, kae ʼe nātou kaihaʼa te ʼu folafola ʼo te ʼAtua ʼi tanatou faka mafola te akonaki ʼaē ʼe fakamamaʼo ai te hahaʼi mai te moʼoni tāfito ʼo te Tohi-Tapu. ʼE ʼiloga tāfito la te meʼa ʼaia ʼi te faka mafola ʼo te Puleʼaga (Selemia 23:30). — 1/2, pasina 4.
▫ Koteā te maʼua ʼo ʼaē ʼe papitema ʼaki te huafa ʼo te laumālie maʼoniʼoni?
Ko tona ʼuhiga ko ia ʼaē kua papitema ʼe ina fakatotonu ke gāue fakatahi mo te laumālie, ʼo mole ina fai he meʼa ke taʼofi te gāue ʼa te laumālie ʼi te hahaʼi ʼa Sehova. Pea, ʼe tonu ke gāue fakatahi mo te tagata kaugana agatonu mo poto pea mo te kau tagata ʼāfea ʼi te kokelekasio (Hepeleo 13:7, 17; 1 Petelo 5:1-4). — 1/2, pasina 18.
▫ He koʼe koa ko te tauhi ʼo te ʼu fakatātā ʼe fakatupu kovi ki te kau ʼatolasio?
ʼE fakahā e te Tohi-Tapu ko te ʼu fakatātā ko he meʼa ʼe fehiʼa likoliko ki ai ia Sehova ʼAtua pea ʼe mole ʼaoga ki te tokoni ʼonatou ʼaē ʼe fia fakaōvi ki te ʼAtua (Teutalonome 7:25; Pesalemo 115:4-8). Ko Satana ia te Tevolo “neʼe ina fakakiviʼi te ʼu ʼatamai” ʼo te hahaʼi ke mole feala ki te moʼoni hana “fakamālamaʼi nātou”. (2 Kolonito 4:4.) Ko ia ʼaē, ʼe fakaʼapaʼapa ki he fakatātā, ʼe ko he tauhi ia ki te ʼu faʼahi gāue ʼa te ʼu temonio (1 Kolonito 10:19, 20). — 15/2, ʼu pasina 5, 7.
▫ Koteā koa ʼaē ʼe kole e te ʼu kaumeʼa ʼo te ʼāteaina mokā ʼe nātou faikole ʼo ʼuhiga mo te Puleʼaga ʼo te ʼAtua ʼaē ke haʼu (Mateo 6:10)?
ʼE nātou kole ki te Puleʼaga ʼaē ʼi selo ke ina fai he tonu mālohi moʼo faka ʼauha te ʼu faʼahiga puleʼaga fakatagata ʼaē ʼe mole nātou fakahoko ʼanatou fakapapau ʼo ʼuhiga mo te foaki ʼo he tokalelei moʼoni pea mo he ʼu meʼa lelei (Taniela 2:44). — 15/3, pasina 6.
▫ Ko Sakalia, te tāmai ʼa Soane Patita, neʼe liliu koa ia ʼo tuli pea mo gutumate, ohage ko te ʼui mai ʼaē ia Luka 1:62?
Neʼe fakahā e Kapeliele kia Sakalia ʼe mole toe palalau ānai ia, kae neʼe mole ʼina ʼui ʼe tuli ānai ia (Luka 1:18-20). Luka 1:64 ʼe ʼui fēnei: “ ʼI te temi pe ʼaia, neʼe ava ai tona gutu pea neʼe feala ai te gaūgaūe ʼo tona ʼalelo, pea kamata ai tana palalau, ʼo faka kolōlia ki te ʼAtua.” Koia, ʼe mole ʼiloga mai ʼi heni neʼe tuli. Ko te talanoa ʼaē ki te ʼu “kamokamo” ia Luka 1:62, ko tona ʼuhiga ko he ʼu fakaʼilo ʼe fia fakahā e Sakalia. — 1/4, pasina 31.