Koteā Te Tupuʼaga ʼo Te ʼAhiʼahiʼi Te Moʼoni ʼo Te Tohi-Tapu?

Koteā takotou manatu ʼo ʼuhiga mo te Tohi-Tapu? Ko ʼihi ʼe nātou tui mālohi ko te tohi ʼaia ʼe ko he fakahā ʼa te ʼAtua ki te tagata. Ko ʼihi ʼi tanatou manatu ko te tohi ʼaia ʼe ko he tohi noa pe ia. Pea ko ʼihi atu ʼe nātou lotolotolua ʼo ʼuhiga mo te tohi ʼaia. Kapau ʼe koutou lotolotolua ki te haʼuʼaga ʼo te Tohi-Tapu, ʼe ʼi ai te ʼu tupuʼaga maʼuhiga ʼe tonu ke koutou vakaʼi te tohi ʼaia pea mo maʼu he tonu ki te fehuʼi ʼaia.

TALU mai te 18 sēkulō, neʼe fakaʼapaʼapaʼi ʼaupito te Tohi-Tapu ohage ko te Folafola ʼa te ʼAtua ʼi te ʼu fenua ʼo te keletiate. Kae talu mai te 19 sēkulō, tokolahi te kau faiako, pea mo te kau poto, feiā aipe mo te kau teolosia pea mo te kau takitaki ʼo te ʼēkelesia neʼe nātou kamata fakahā ki te hahaʼi fuli te ʼu mahalohalo ʼo ʼuhiga mo te moʼoni ʼo te Tohi-Tapu.

Ko tona fua, ko te fakaʼāgaʼi ʼaē ʼo te Tohi-Tapu kua mafola haʼele ʼo tokolahi ʼe talanoa kiai māʼiape la tanatou mole ʼiloʼi te ʼu fakamatala ʼo te Tohi-Tapu. ʼO mole ʼui ke nātou fakaʼaogaʼi te Tohi-Tapu, tokolahi ʼi te keletiate ʼi te temi nei ʼe nātou falala ki te ʼu filosofia fakatagata. Kae, ko te filosofia ʼo te temi nei neʼe mole ina fakatupu he mālama tokalelei pea mo manuʼia ʼaupito. ʼE ko he tupuʼaga lelei ʼaia ke vakaʼi ai te Tohi-Tapu pea mo sio peʼe ko tana taki ʼe ʼave ki he manuʼia pea ki he fua lelei.

Ko te tahi tupuʼaga ʼaē ʼo te ʼahiʼahiʼi ʼo te moʼoni ʼo te Tohi-Tapu, ko te ʼamanaki taulekaleka ʼaē ʼe ina foaki ki te malamanei. Ohage la, ʼe tala e te tohi ʼo Pesalemo 37:29 ʼo fēnei: “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.” (Fakahā 21:3-5). ʼE lave feafeaʼi kia koutou te ʼu taʼi fakapapau ʼaia? ʼE mahino ia ʼe ko he ʼu tupuʼaga tāfito ke vakaʼi ai te Tohi-Tapu pea mo sio peʼe ko te tohi ʼaia ʼe tau mo he falala.

Ko te nusipepa ʼaenī neʼe ina lagolago tuʼumaʼu te moʼoni ʼo te Tohi-Tapu pea neʼe kua ina tau fakahā pe tona moʼoni. E lahi te ʼu faʼahi ʼe moʼoni ai te Tohi-Tapu pea ʼe feala ʼahiʼahiʼi ʼo tona moʼoni. Ko te ʼu numelo kehekehe ʼo Te Tule Leʼo ʼe tokoni anai kia koutou ʼo ʼuhiga mo te tali ki te ʼu fehuʼi ʼaenī: Ko te ʼu meʼa ʼiloa ʼo te hisitolia ʼāfea ʼe felogoi koa mo te Tohi-Tapu? Ko tana ʼu fakakikite ʼe moʼoni koa? Ko tana ʼu tokoni ʼe ʼaoga koa, peʼe ko te kau ako ʼo te temi nei pea mo te kau filosofia kua nātou fakamoʼoni koa ko te Tohi-Tapu kua ʼosi tona temi fakaʼaoga?

Ko te seokalafia ʼe ko he tahi ʼaenā faʼahi ʼe feala ke koutou ʼahiʼahiʼi ai te moʼoni ʼo te Tohi-Tapu. Ko te ʼu fagana faka pagani ʼe nātou tautau fakafeagai mo te ʼu meʼa faka seokalafia. Ohage la, tokolahi te hahaʼi ʼāfea ʼe nātou fai te ʼu fakamatala ʼo te ʼu folau ʼaē ʼe higoaʼi ko te mālama ʼo te kau mate. ʼO ʼuhiga mo te kau keleka ʼāfea, ko te tohi (A Guide to the Gods) ʼe ina fakamatala: “Neʼe ʼui ko te kele ʼe halafalafa pea ʼe takai e he toe vai ʼaupito ʼaē ko te moana. ʼI tuʼa atu ʼo te fakatuʼutuʼu ʼaē ʼo ʼuhiga mo he mālama ki te temi ka haʼu, ko he kele ʼe mole feala hona gāueʼi ʼe ʼaofi e te fakapōʼuli pea mo te ʼu fuʼu ʼakau ʼe mole honatou ʼu fua.” ʼI te temi ʼaē neʼe ʼiloʼi papau ai ko te talanoa ʼaia ko te fagana pe ia, ko te kau filosofia pagani neʼe nātou fetogi te meʼa ʼaē neʼe nātou higoaʼi ko te mālama ki te temi ka haʼu. ʼE fakamatala e Richard Carlyon: “Ko te koga meʼa lelei neʼe maʼu, ʼi te lalo kele, ʼe pipiki ki te mālama ʼaia te ʼu ʼana kehekehe.” Ia ʼaho nei, ʼe tou ʼiloʼi ko te meʼa ʼaia neʼe ko he tahi pe fagana. ʼE mole ʼi ai he mālama feiā ʼi te lalo kele peʼe ko he ala feiā ʼe maʼu ʼi te temi nei.

ʼE kehekehe ʼosi pe ia mo te ʼu fagana ʼo te hahaʼi ʼāfea, ʼe mole maʼu ʼi te Tohi-Tapu te manatu hāla ʼaē ʼo ʼuhiga mo te kele ʼe halafalafa. ʼE ina fakahā te moʼoni ʼaē neʼe maʼu e te poto fakatagata ʼo ʼuhiga ʼaē ko te kele ʼe ko he meʼa takafuafua ʼe tautau ʼi te noa (Sopo 26:7; Isaia 40:22). Koteā te ʼui ʼo ʼuhiga mo ʼihi fakamatala faka seokalafia ʼe talanoa kiai ʼi te Tohi-Tapu? ʼE ko he ʼu fagana pe, peʼe feala koa ke tou sio ki te ʼu meʼa neʼe hoko moʼoni ia ʼaē ʼe talanoa kiai te Tohi-Tapu, mokā ʼe tou ʼaʼahi te fenua ʼo Esipito ʼi te temi nei, feiā aipe mo te fenua ko Sinaï ʼe takai e te tai, pea mo te fenua ʼo Iselaele ʼo te temi nei?

[Paki ʼo te pasina 3]

“ ʼE ʼi ai te Tahi ʼe maʼuli ʼi ʼoluʼaga ʼo te fuga takafuafua ʼo te kele.”— Isaia 40:22.

“ ʼE ina (...) tautau te kele ʼi te noa.” — Sopo 26:7.