Ko Te Maʼuli ʼo Te Kau Faka Mafola ʼo Te Puleʼaga
Neʼe Ina Fakaʼaogaʼi Tona Leʼo ʼo Loto ʼAki Te Tohi-Tapu
NEʼE faikole te hau ʼo Iselaele ko Tavite kia Sehova ke tokoni age ki ai ʼi tana ʼui ʼaē: “Kae kia ʼau, ʼe ʼau haʼele anai ʼi te agatonu. Ke ke taupau ʼau pea ke ke fakahā mai tou ʼofa.” (Pesalemo 26:11) Neʼe ʼofa te ʼAtua ki ai ʼi tana taupau maʼu tana agatonu. Neʼe tapuakina foki e Sehova ia Sesu ʼuhi ko tana fai te finegalo ʼo tana Tāmai ʼaē ʼi selo, pea neʼe Ina tapuakina he tūpulaga ʼi Kolopī neʼe ina fakaʼaogaʼi tona leʼo ʼo loto ʼaki te Tohi-Tapu pea neʼe faiga ʼo fai te finegalo ʼo te ʼAtua. ʼE fakamatala e te tūpulaga ʼaenī:
“ ʼI taku kamata ako te Tohi-Tapu mo te kau Fakamoʼoni ʼa Sehova, neʼe ʼau ako ʼi te faleako Katolika. Pea, neʼe hoha toku leʼo ʼo loto ʼi taku ʼalu ʼaē ki te Misa, koia neʼe ʼau ʼalu ai ki te pule ʼo te faleako (ko he patele), mo te tagata fai tokoni, pea mo te tagata faiako ki taku kalasi pea neʼe ʼau kole age ke nātou fakalelei ʼo faka ʼāteaina ʼau mai te Misa. Logope la kua ʼau ʼāteaina mai te faʼahi ʼaia, kae neʼe faiga fakamālohi ʼihi ke ʼau toe kau ki te Misa. Neʼe tuputupu te ʼu faigataʼaʼia ʼi te hili pe ʼaē ʼo toku papitema ko te Fakamoʼoni ʼa Sehova. Neʼe ʼui mai e taku matuʼa kapau ʼe fakamavae ʼau mai te faleako pea ʼe ina kapu anai ʼau ʼi tomatou ʼapi. Ko tana fakatuʼutuʼu ke ʼau ʼalu ʼo ako ʼi te univelesitē ke feala ai he maʼu ʼo haku gāue lelei ʼi te mālama.
“Ko te pule faiako neʼe ina liuliuga mai te ʼu fakatokaga ʼo ʼuhiga mo ʼaē ʼe mole mulimuli ki te ʼu maʼua ʼo te lotu Katolika. ʼI te temi ʼaē neʼe fai ai te ʼuluaki Misa ʼo te taʼu, neʼe ʼau nono ʼo aʼu ki te fakaʼosi. ʼOsi ʼaia pea ʼau fakatoʼo age ki te tagata faiako (ko he patele) te kaupepa L’école et les Témoins de Jéhovah pea neʼe ʼau ʼui age ko te kaupepa ʼaia ʼa te kau Fakamoʼoni ʼa Sehova, pea ʼe mole feala taku kau ki te Misa. Neʼe ina ʼui mai: ‘ ʼE lelei ke ke kumi he tahi age faleako.’ Neʼe ʼau ʼiloʼi ai ko toku fakamavae ʼaē mai te faleako ʼe fakatupu ʼaki toku fakamavae ʼi toku ʼapi e taku tāmai. Koia, neʼe ʼau faikole ai kia Sehova pea neʼe hoholo atu taku tuku he fakamoʼoni lelei ki te kau faiako.
“Kua hoko mai te temi mālōlō. Pea, ʼi te hili ʼo te temi mālōlō pea hoko mai te temi ako, ʼo toe hoko mai mo te Misa. Neʼe nofo te pule ʼo te faleako pea mo ʼihi ʼu patele ʼi muʼa ʼo te kapela, ʼo nātou fakalogo ki te kofesio. Neʼe teitei pe ke ʼau palalisia ʼi toku mataku. Neʼe ʼau ʼalu ki ai pea neʼe ʼau heka, kae neʼe hoha toku leʼo ʼo loto. ʼI te kamata ʼo te hiva, neʼe fēnei leva taku manatu, ‘Koteā koa te meʼa ʼaē ʼe ʼau fai ʼi henī? Ko toku ʼAtua ko Sehova. ʼE mole feala ke ʼau fula pea mo ʼau kākāʼi ia ia. ʼE mole feala taku heka ʼi henī. ʼE mole ina līaki anai ʼau.’ Neʼe ʼau faikole ke ʼau maʼu he lotomālohi. ʼOsi ʼaia, pea ʼau hū ki tuʼa ʼi te kapela pea neʼe ʼau ʼalu ʼo kau ia nātou ʼaē ʼe talitali ki te kofesio. ʼI taku kaku atu ki te pule faiako, neʼe ʼau ʼui age ki ai: ‘Faiako, ʼe mole feala ke ʼau kofesio.’ Neʼe ina ʼui mai: ‘Neʼe ʼau manatu feiā foki.’ Neʼe ʼau ʼui age ki ai ʼe ʼau tali lelei anai te ʼu ikuʼaga mamahi kae ʼe mole faka fealagia e toku leʼo ʼo loto ke ʼau kau ki te Misa. ʼE mole feala ke ʼau fakafeagai ki te ʼu meʼa ʼaē neʼe ʼau ako ʼi te Tohi-Tapu.
“Neʼe sio mai, mo kata, pea mo ʼui maʼana: ‘ ʼE ʼau leleiʼia koe. Ko koutou fuli te kau Fakamoʼoni ʼe tau mo koutou te fakavikiviki. Kia koe, ʼe ke fakamuʼamuʼa ia te ʼAtua, pea kua ke fakatuʼutuʼu ke ke fakalogo ki tana ʼu lao tatau aipe la he faʼahiga meʼa ʼe feala ke hoko. Ke hoko atu tau fai te faʼahi ʼaia. ʼE lelei ʼaupito te meʼa ʼaē ʼe ke fai. ʼE ʼau fakaʼamu ke hage te kau Katolika katoa ko koe, ʼo tatau tonatou faiva, mo tonatou ʼofa ki te ʼAtua. ʼI te temi nei, kua ke ʼāteaina ʼo mole kei ke kau ki tomatou ʼu maʼua faka lotu.’ ʼI fiafia leva neʼe ʼau mau! Neʼe tapuakina e Sehova taku faiga ʼaē ke ʼau fakaʼaogaʼi toku leʼo ʼo loto ʼaki te Tohi-Tapu.
“ ʼI te ʼaho age ʼaē neʼe ʼui age e te pule faiako ki te kau ako: ‘Ko ʼihi ʼu lotu ʼe tuʼu ki muʼa ia tatou. He koʼe ʼe mole tou hage ko nātou, ʼo faiva, mo loloto totatou ʼofa ki te ʼAtua pea mo tou holi ke tou kaugana kia te ia ʼo laka ʼi te ʼu lotu fuli? Ko te meʼa ʼaenī ʼe ko he meʼa ʼe tonu ke ʼi totatou ʼu loto.’
“Pea neʼe hiki leva te patele ki Loma, pea ko te patele foʼou neʼe mole fakaʼapaʼapa ki taku mole fia kau ʼaē ki te Misa. Neʼe mavae taku matuʼa ʼi te ʼapi, ʼo feala ai ke ʼau ʼāteaina ʼo fakahoko taku fakatuʼutuʼu ʼaē ke ʼau kau ki te minisitelio katoa ʼi te ʼosi maʼu ʼo toku pepa ʼi te faleako.”
Neʼe tapuakina e Sehova te tūpulaga ʼaenī koteʼuhi neʼe ina fakaʼaogaʼi tona leʼo ʼo loto ʼaki te Tohi-Tapu. ʼE ina toe tapuakina anai ia nātou fuli ʼaē ʼe nātou fai tona finegalo.—Tāʼaga Lea 3:5, 6.