Koutou Fakalogo Ki Te Meʼa ʼAē ʼe ʼUi e Te Laumālie
“ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe koutou fia ʼolo ki te faʼahi mataʼu peʼe koutou fia ʼolo ki te faʼahi hema.”—Isaia 30:21.
1, 2. ʼI te hisitolia, koteā ʼaē neʼe fakaʼaogaʼi e Sehova moʼo palalau ki te hahaʼi?
ʼI TE motu ʼo Puerto Rico, ʼe tuʼu ai te foʼi radiotélescope ʼaē ʼe lahi tokotahi ʼi te malamanei, pea neʼe faʼu lelei ke maʼu gafua he ʼu logo mai te lagi. Talu mai ni ʼu taʼu, kua fakaʼamu e te hahaʼi popoto ke nātou maʼu he ʼu logo mai he tahi age faʼahiga maʼuli ʼi te ʼatulaulau, ʼo nātou fakaʼaogaʼi te meʼa gāue lahi ʼaia. Kae neʼe mole heʼeki maʼu he ʼu logo feiā. Kae meʼa fakakata foki, heʼe ʼi ai te ʼu logo ʼe kita maʼu gafua mai te tahi mālama, pea ʼe feala ke tou maʼu fuli te ʼu logo ʼaia ʼi te temi fuli pe—ʼo mole ʼaoga kiai he ʼu meʼa faʼu gataʼa. Ko te Matapuna ʼo te ʼu logo ʼaia ʼe lahi ʼaupito age ʼi he tahi age ia faʼahiga maʼuli ʼaē ʼe maʼu ʼi te ʼatulaulau. Ko ai te Matapuna ʼo te ʼu logo ʼaia, pea ʼe fakahā kia ai te ʼu logo ʼaia? Koteā ʼaē ʼe ʼui e te ʼu logo ʼaia?
2 ʼE fakamatala e te Tohi-Tapu te ʼu ʼaluʼaga kehekehe ʼaē neʼe logo ai te hahaʼi ki he ʼu logo mai te ʼAtua. ʼI ʼihi temi, ko te ʼu logo ʼaia neʼe fakahā e te kau ʼaselo, ʼe ko he ʼu tagata ʼave logo ʼa te ʼAtua. (Senesi 22:11, 15; Sakalia 4:4, 5; Luka 1:26-28) Ia ʼaluʼaga e tolu, neʼe logo ai te hahaʼi ki te leʼo tonu ʼo te ʼAtua. (Mateo 3:17; 17:5; Soane 12:28, 29) Tahi ʼaē meʼa, neʼe palalau te ʼAtua ʼaki te kau polofeta, pea tokolahi ia nātou neʼe nātou tohi tana ʼu folafola ʼaē neʼe tonu ke nātou tala. Ia ʼaho nei, ʼe tou maʼu ʼi te Tohi-Tapu te ʼu fakamatala ʼo te ʼu tuʼuga logo ʼaia, ʼo feiā mo te ʼu akonaki ʼa Sesu pea mo tana kau tisipulo. (Hepeleo 1:1, 2) Ei, neʼe fakahā e te ʼAtua he ʼu logo ki te tagata.
3. He koʼe ʼe foaki mai e te ʼAtua he ʼu logo, pea koteā ʼaē ʼe ina loto ke tou fai?
3 ʼE mole talanoa tāfito te ʼu logo fakaʼatua ʼaia ki te ʼatulaulau. Kae ʼe talanoa tāfito ki te ʼu faʼahi ʼe maʼuhiga age, ʼe ʼaoga ki totatou maʼuli ʼi te temi nei pea mo te ka haʼu. (Pesalemo 19:7-11; 1 Timoteo 4:8) ʼE fakaʼaogaʼi e Sehova tana ʼu logo moʼo fakahā mai tona finegalo pea mo foaki mai kia tatou tana takitaki. ʼE fakahoko ai te ʼu folafola ʼaē neʼe fai e te polofeta ko Isaia, ʼaē neʼe ina ʼui fēnei: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe koutou fia ʼolo ki te faʼahi mataʼu peʼe koutou fia ʼolo ki te faʼahi hema.” (Isaia 30:21) ʼE mole fakamālohiʼi tatou e Sehova ke tou fakalogo ki tana “folafola.” ʼE fakalogo kia tatou peʼe tou fia mulimuli ki te takitaki ʼa te ʼAtua pea mo haʼele ʼi tona ala. Ko te tupuʼaga la ʼaia ʼo te tokoni mai ʼa te Tohi-Tapu ke tou fakalogo ki te ʼu logo ʼaē mai ia Sehova. ʼI te tohi ʼo Apokalipesi, ʼe maʼu tuʼa fitu ai te fakaloto mālohi ʼaenī, ke tou “logo ki te mea e tala e te Laumalie.”—Apokalipesi 2:7, 11, 17, 29; 3:6, 13, 22.
4. Ia ʼaho nei, ʼe tonu koa ke tou ʼamanaki ke palalau fakahagatonu mai te ʼAtua mai te lagi?
4 Ia ʼaho nei, ʼe mole palalau fakahagatonu mai ia Sehova mai te lagi. Ohage pe ko te ʼu temi faka Tohi-Tapu, neʼe tahitahiga tana fai feiā, pea neʼe fai vahavaha ʼi he ʼu sēkulō. ʼI te hisitolia, neʼe lahi age te ʼu meʼa ʼaē neʼe fakaʼaogaʼi e Sehova moʼo palalau ki tana hahaʼi. ʼE toe feiā pe ia ʼaho nei. Tou vakaʼi te ʼu faʼahi e tolu ʼaē ʼe fakaʼaogaʼi e Sehova moʼo palalau kia tatou ʼi te temi nei.
“E Fakamalamai e Te Atua Te Tohi-Tapu Katoa”
5. Koteā te meʼa tāfito ʼaē ʼe fakaʼaogaʼi e Sehova ia ʼaho nei moʼo palalau ki te hahaʼi, pea ʼe ʼaoga feafeaʼi kia tatou?
5 Ko te meʼa tāfito ʼaē ʼe fakaʼaogaʼi e te ʼAtua moʼo palalau ki te hahaʼi ʼe ko te Tohi-Tapu. ʼE haʼu mai te ʼAtua, pea ko meʼa fuli ʼaē ʼe tuʼu ai ʼe fua lelei kia tatou. (2 Timoteo 3:16) ʼE lahi te ʼu faʼifaʼitaki ʼi te Tohi-Tapu ʼo ʼuhiga mo te ʼu hahaʼi neʼe maʼuʼuli moʼoni, pea neʼe nātou fakaʼaogaʼi tonatou loto faʼitaliha moʼo filifili peʼe nātou fakalogo ki te leʼo ʼo Sehova peʼe kailoa. ʼE fakamanatuʼi mai e te ʼu faʼifaʼitaki ʼaia pe koʼe ʼe maʼuhiga ʼaupito ke tou fakalogo ki te meʼa ʼaē ʼe ʼui e te laumālie ʼo te ʼAtua. (1 Kolonito 10:11) ʼE tou toe maʼu ʼi te Tohi-Tapu, te poto ʼaē ʼe ʼaoga kia tatou ʼi te ʼu temi ʼaē ʼe tonu ai ke tou fai he ʼu tonu ʼi totatou maʼuli. ʼE hage ʼe tuʼu te ʼAtua ʼi ʼotatou tuʼa, ʼo ina folafola fēnei mai ki ʼotatou taliga: “Koʼeni te ala. Koutou haʼele ai.”
6. He koʼe ʼe maʼuhiga age te Tohi-Tapu ʼi he tahi age ʼu tohi?
6 ʼE tonu ke tou lau tuʼumaʼu te Tohi-Tapu, ke feala hatatou logo ki te ʼu meʼa ʼaē ʼe ʼui e te laumālie ʼi tona ʼu pasina. Ko te Tohi-Tapu ʼe mole ko he tohi pe ʼe lelei tona ʼu fakamatala, peʼe lahi tona toʼo, ohage ko te ʼatu tohi ʼaē ʼe lava lau e te hahaʼi ia ʼaho nei. Neʼe takitaki e te laumālie te tohi ʼo te Tohi-Tapu pea ʼe maʼu ai te ʼu manatu ʼa te ʼAtua. ʼE ʼui fēnei ia Hepeleo 4:12: “E mauli te folafola a te Atua, pea e gaue, e masilaʼage i te heleta mata lua fuape, e ulu o kaku ki te vaha o te loto mo te laumalie, ki te u hokoga-hui mo te u gakoi-hui, pea e ina fakamau te u fakakaukau mo te u manatu o te loto.” Ka tou lau te Tohi-Tapu, pea ko te ʼu meʼa ʼaē ʼe tuʼu ai ʼe hū loloto ohage ko he heletā, ki tatatou ʼu fakakaukau, pea mo te ʼu meʼa ʼi ʼotatou loto, ʼo ina fakahā mai peʼe feafeaʼi tatatou mulimuli ki te finegalo ʼo te ʼAtua.
7. He koʼe ʼe maʼuhiga ke tou lau te Tohi-Tapu, pea ʼe tau fakaloto mālohiʼi feafeaʼi tatou ki te faʼahi ʼaia?
7 Ko “te u fakakaukau mo te u manatu o te loto,” ʼe feala ke fetogi ʼaki te temi, pea mo te ʼu meʼa ʼaē ʼe hoko ʼi totatou maʼuli—te ʼu meʼa fakafiafia peʼe ko te ʼu faigataʼaʼia. Kapau ʼe mole tou haga ako tuʼumaʼu te Folafola ʼa te ʼAtua, pea ko tatatou ʼu manatu, mo tatatou aga, pea mo te ʼu meʼa ʼaē ʼi tatatou loto, ʼe mole kei mulimuli anai ki te ʼu pelesepeto fakaʼatua. Koia, ʼe tokoni fēnei mai te Tohi-Tapu: “Koutou haga ʼahiʼahiʼi ia koutou ke koutou ʼiloʼi peʼe koutou nonofo ʼi te tui, koutou sivi tuʼumaʼu pe koteā tokotou ʼuhiga totonu.” (2 Kolonito 13:5, MN) Kapau ʼe tou fakalogo tuʼumaʼu ki te meʼa ʼaē ʼe ʼui e te laumālie, pea ʼe tonu ke tou mulimuli ki te tokoni ʼaē ke tou lau te Folafola ʼa te ʼAtua ʼi te ʼaho fuli pe.—Pesalemo 1:2.
8. Koteā te ʼu palalau ʼaē neʼe fai e te ʼapositolo ko Paulo moʼo tokoni kia tatou ke tou sivi ia tatou totonu ʼo ʼuhiga mo te lau ʼo te Tohi-Tapu?
8 ʼE maʼuhiga te fakamanatu ʼaenī kia nātou ʼaē ʼe nātou lau te Tohi-Tapu: Koutou toʼo he temi feʼauga ke koutou mahino ki te meʼa ʼaē ʼe koutou lau! Kapau ʼe tou faiga ke tou muliʼi te tokoni ʼaē ke tou lau te Tohi-Tapu ʼi te ʼaho fuli, pea ʼe mole tonu ke tou lau fakavilivili he ʼu tuʼuga kapite kae mole tou mahino kiai. Logola ʼe maʼuhiga ʼaupito te lau tuʼumaʼu ʼo te Tohi-Tapu, kae ʼe mole tou fai anai te faʼahi ʼaia ʼuhi pe ko he polokalama; kae ʼe tonu ke tou holi moʼoni ke tou ako ʼo ʼuhiga mo Sehova pea mo tana ʼu fakatuʼutuʼu. ʼO ʼuhiga mo te faʼahi ʼaia, ʼe lelei ke tou fakaʼaogaʼi te ʼu palalau ʼaē neʼe fai e te ʼapositolo ko Paulo moʼo sivi ʼo tatou totonu. ʼI tana faitohi ki te ʼu tēhina Kilisitiano, neʼe ina ʼui fēnei: “Ko te tupuaga aia o taku tuutuli ifo ia mua o te Tamai, . . . ke ina tuku atu kia koutou ke malohiʼage tautou fakamalohi te tagata-loto aki tona Laumalie, aki te tui ke afio Kilisito i outou loto; ke koutou tauaka mo fakatafito i te ofa, koteuhi ke koutou mau te malohi ke koutou mahino fakatahi mo te kaigalotu katoa, pe kotea te laulahi, mo te loa, mo te maoluga pea mo te loloto, pea mo iloi te ofa o Kilisito e fakalaka i te poto fuape, koteuhi ke koutou fonu o kaku ki te katoa o te Atua.”—Efeso 3:14, 16-19.
9. ʼE tou lava gāueʼi feafeaʼi pea mo fakaloloto feafeaʼi te holi ʼaē ke tou ako ʼo ʼuhiga mo Sehova?
9 ʼE mahino ia, ko ʼihi ia tatou ʼe mole tou faʼa leleiʼia te lautohi, kae ko ʼihi ʼe lahi tanatou lautohi. Tatau aipe pe koteā totatou ʼaluʼaga takitokotahi, kae ʼe feala ke tou maʼu pea mo tou fakaloloto tatatou holi ʼaē ke akoʼi tatou e Sehova. Neʼe fakamahino mai e te ʼapositolo ko Petelo, ʼe tonu ke tou maʼu te holi ʼaē ki te ʼatamai mālama ʼo te Tohi-Tapu, pea neʼe ina fakamoʼoni mai ʼe tou lava gāueʼi te holi ʼaia. Neʼe ina tohi fēnei: “Ohage ko he ʼu fānau meamea, koutou maʼu he holi mālohi ki te huʼa pipi maʼa ʼo te folafola, ke feala ai hakotou tuputupu ki te fakamaʼuli.” (1 Petelo 2:2, MN) ʼE maʼuhiga ʼaupito ke kita akoʼi ia kita mo kapau ʼe kita fia “maʼu he holi” ki te ako ʼo te Tohi-Tapu. Ohage la, ʼe feala ke tou leleiʼia he meʼa kai foʼou mokā tou kai tuʼa lahi kiai, ʼo toe feiā pe ko tatatou manatu ʼo ʼuhiga mo te lautohi pea mo te ako, ʼe feala ke fetogi, mo kapau ʼe tou akoʼi ia tatou totonu ke tou mulimuli ki he polokalama.
Te “Meʼa Kai ʼi Tona Temi Totonu”
10. Ko ai ʼaē ʼe nātou faʼufaʼu “te tagata kaugana agatonu mo poto,” pea ʼe fakaʼaogaʼi feafeaʼi nātou e Sehova ia ʼaho nei?
10 Ko te tahi faʼahi ʼaē ʼe fakaʼaogaʼi e Sehova moʼo palalau kia tatou ia ʼaho nei, ʼe ko te meʼa ʼaē neʼe talanoa kiai Sesu ia Mateo 24:45-47 (MN). Neʼe talanoa ai ki te kokelekasio ʼo te kau Kilisitiano fakanofo—“te tagata kaugana agatonu pea mo poto” ʼaē neʼe fakanofo ʼaki te laumālie moʼo tufa “te meʼa kai [fakalaumālie] ʼi tona temi totonu.” ʼI tonatou ʼuhiga takitokotahi, ko nātou ʼo te kalasi ʼaia ʼe ko te ʼu “hahaʼi faifekau” ʼa Sesu. Ko nātou ʼaia, mo te “hahai kaugamalie” ʼo “te tahi ʼu ōvi,” ʼe nātou maʼu te fakaloto mālohi pea mo te takitaki. (Apokalipesi 7:9; Soane 10:16, MN) ʼE maʼu ʼi tona temi totonu te tuʼuga meʼa kai ʼaia ʼi te ʼu tohi, ohage ko Te Tule Leʼo, mo te Réveillez-vous ! pea mo te tahi ʼu tohi. ʼE tufa mai te tahi meʼa kai fakalaumālie ʼi te ʼu faiakonaki pea mo te ʼu faʼifaʼitaki ʼaē ʼe fai ʼi te ʼu fakatahi pea mo te ʼu fono.
11. ʼE tou fakahā feafeaʼi ʼe tou tali te meʼa ʼaē ʼe ʼui mai e te laumālie ʼaki “te tagata kaugana agatonu mo poto”?
11 Ko te ʼu logo ʼaē ʼe fakahā mai e “te tagata kaugana agatonu mo poto,” ʼe ina fakaloto mālohiʼi tatatou tui pea mo akoako totatou ʼu fealagia fakakaukau. (Hepeleo 5:14) Ko te ʼu tokoni ʼaia ʼe lagi faka ʼuhiga ki he ʼu faʼahi kehekehe, ke feala hatatou fakaʼaogaʼi kia tatou takitokotahi. ʼI ʼihi temi, ʼe foaki mai mo he ʼu tokoni ʼo ʼuhiga mo he ʼu faʼahi tāfito ʼo tatatou ʼu aga. ʼE tonu ke tou tali feafeaʼi mo kapau ʼe tou fakalogo moʼoni ki te meʼa ʼaē ʼe ʼui e te laumālie ʼaki te kalasi ʼo te kaugana? ʼE tali fēnei e te ʼapositolo ko Paulo: “Koutou talagafua ki outou takitaki pea mo fakalogo kia natou.” (Hepeleo 13:17) ʼE moʼoni, ko te ʼu tagata fuli ʼaē ʼe kau ki te kalasi ʼaia ʼe nātou agahala. Logola tonatou ʼuhiga agahala, kae ʼe fiafia Sehova ʼi te fakaʼaogaʼi ʼo tana ʼu tagata kaugana, ke nātou takitaki tatou ʼi te temi ʼaenī ʼo te fakaʼosi.
ʼE Takitaki Tatou e Totatou Leʼo ʼo Loto
12, 13. (a) Koteā te tahi matapuna ʼaē neʼe foaki mai e Sehova moʼo takitaki tatou? (b) Koteā te meʼa lelei ʼaē ʼe feala ke fai e te leʼo ʼo loto, ohage pe ko tana fai ki te hahaʼi ʼaē ʼe mole nātou maʼu te ʼatamai mālama totonu ʼo ʼuhiga mo te Folafola ʼa te ʼAtua?
12 Neʼe foaki mai e Sehova te tahi matapuna moʼo takitaki ʼo tatou—ko totatou leʼo ʼo loto. Neʼe ina fakatupu te tagata ʼaki te fealagia ʼaē ke ina ʼiloʼi te meʼa ʼaē ʼe lelei pea mo te meʼa ʼaē ʼe kovi. ʼE kau te faʼahi ʼaia ki totatou natula. ʼI tana tohi ki te kau Loma, neʼe fakamahino fēnei e te ʼapositolo ko Paulo: “Pea ko te hahai pagani e mole natou mau te lao, kae natou fai mahani ia mea o te lao, e natou liliu ko te lao kia natoupe, logola e mole natou mau te lao. E natou fakailoilo te gaue a te lao kua tohi i onatou loto; e fakamooni ki ai onatou loto pea e fe’vakaiʼaki te u manatu o valoki, pe e natou haofaki.”—Loma 2:14, 15.
13 ʼI hona faʼahiga ʼaluʼaga, tokolahi ia nātou ʼaē ʼe mole nātou ʼiloʼi ia Sehova, ʼe feala ke mulimuli tanatou ʼu manatu pea mo tanatou ʼu gāue ki te ʼu pelesepeto fakaʼatua ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. ʼE hage ʼe nātou logo ki te kiʼi leʼo ʼi tonatou loto ʼe ina takitaki nātou ki te ala ʼaē ʼe lelei. Kapau ʼe hoko te faʼahi ʼaia kia nātou ʼaē ʼe mole nātou maʼu te ʼatamai mālama totonu ʼo te Folafola ʼa te ʼAtua, pea ʼe tonu ke maʼuhiga age te palalau ʼa te kiʼi leʼo ʼaia ʼi te loto ʼo te kau Kilisitiano moʼoni! ʼE mahino papau ia, ko te leʼo ʼo loto ʼa he Kilisitiano ʼe feala ke ina foaki kia ia he takitaki ʼe lava falala kiai, heʼe fakamaʼa ʼaki te ʼatamai mālama totonu ʼo te Folafola ʼa te ʼAtua, pea ʼe gāue ʼo mulimuli ki te laumālie maʼoniʼoni ʼo Sehova.—Loma 9:1.
14. ʼE lava tokoni feafeaʼi mai totatou leʼo ʼo loto ʼaē neʼe akoʼi ʼaki te Tohi-Tapu, ke tou mulimuli ki te takitaki ʼo te laumālie ʼa Sehova?
14 Ko he leʼo ʼo loto lelei, ʼe akoʼi ʼaki te Tohi-Tapu, ʼe feala ke ina fakamanatuʼi mai kia tatou te ala ʼaē ʼe loto e te laumālie ke tou haʼele ai. ʼI ʼihi temi, ʼe mole lagi talanoa fakahagatonu anai te Tohi-Tapu peʼe ko te ʼu tohi faka Tohi-Tapu, ki he ʼaluʼaga ʼe hoko kia tatou. Kae ʼe lagi fakatokaga mai e totatou leʼo ʼo loto, ke tou tokakaga ki he aga ʼe feala ke fua kovi kia tatou. ʼI te ʼu ʼaluʼaga ʼaia, kapau ʼe mole tou tokagaʼi te meʼa ʼaē ʼe fakatotonu mai e totatou leʼo ʼo loto, pea ʼi tona fakahagatonu, ʼe tou meʼa noaʼi te meʼa ʼaē ʼe ʼui mai e te laumālie ʼo Sehova. ʼI te tahi faʼahi, ka tou ako ke tou falala ki totatou leʼo ʼo loto faka Kilisitiano ʼaē neʼe akoʼi ʼaki te Tohi-Tapu, pea ʼe feala ke tou fai he ʼu tonu fakapotopoto, tatau aipe peʼe mole he meʼa neʼe tohi ʼo ʼuhiga mo te faʼahi ʼaia. Kae ʼe maʼuhiga ʼaupito ke tou manatuʼi, kapau ʼe mole he pelesepeto, mo he lekula, peʼe ko he lao neʼe foaki mai e te ʼAtua, pea ʼe mole lelei ke tou fakakinauʼi totatou ʼu tēhina ke nātou mulimuli ki te ʼu meʼa ʼaē ʼe tali peʼe mole tali e totatou leʼo loto.—Loma 14:1-4; Kalate 6:5.
15, 16. Koteā ʼaē ʼe feala ke fakatupu kovi ki totatou leʼo ʼo loto, pea koteā ʼaē ʼe tou lava fai ke mole hoko te faʼahi ʼaia?
15 ʼE ko he meʼa ʼofa mai te ʼAtua, te leʼo ʼo loto ʼaē ʼe maʼa pea neʼe akoʼi ʼaki te Tohi-Tapu. (Sakopo 1:17) Kae ʼe tonu ke tou puipui te meʼa ʼofa ʼaia mai te ʼu meʼa ʼaē ʼe kovi, kapau ʼe tou loto ke gāue lelei, moʼo puipui tatou. Ko te ʼu agaʼi fenua, mo te ʼu talatuku, pea mo te ʼu agamāhani ʼaē ʼe fakafeagai ki te ʼu lekula ʼo te ʼAtua, ʼe feala mokā tou mulimuli kiai, ke fakatupu kovi ki totatou leʼo ʼo loto pea ke mole kei ina uga tatou ke tou haʼele ʼi te ala ʼaē ʼe lelei. ʼE lagi faigataʼa ai anai hatatou vakavakaʼi fakalelei te ʼu meʼa pea mo feala ai ke tou fakahēʼi ia tatou totonu, ʼo tou faka tui ko te meʼa ʼaē ʼe kovi ʼe ko he meʼa lelei.—Vakaʼi ia Soane 16:2.
16 Kapau ʼe tou haga meʼa noaʼi te ʼu fakatokaga ʼo totatou leʼo ʼo loto, pea ʼe vaivai māmālie anai te kiʼi leʼo ʼaia ʼo aʼu ki te fefeka ʼo totatou loto, peʼe mole kei tou fai te ʼu aga ʼaē ʼe lelei. Neʼe talanoa te tagata fai pesalemo ki te faʼahiga hahaʼi ʼaia, ʼo ina ʼui fēnei: “ ʼE mole kei lave he meʼa ki tonatou loto ohage ko te gako.” (Pesalemo 119:70) Ko nātou ʼaē ʼe mole nātou tokagaʼi te hoha ʼo tonatou leʼo ʼo loto, ʼe mole kei feala hanatou fakakaukau fakalelei. ʼE mole kei takitaki nātou e te ʼu pelesepeto fakaʼatua pea ʼe mole nātou lava fai he ʼu tonu lelei. Kapau ʼe mole tou loto ke hoko kia tatou te faʼahi ʼaia, pea ʼe tonu ke tou fakalogo ki te takitaki ʼo totatou leʼo ʼo loto faka Kilisitiano, tatau aipe peʼe ko he ʼu kiʼi meʼa noa.—Luka 16:10.
Manuʼia Nātou ʼAē ʼe Fakalogo Pea Mo Talagafua
17. ʼE tapuakina feafeaʼi anai tatou ʼi tatatou fakalogo ki ‘te folafola ʼaē ʼe haʼu mai ʼotatou tuʼa,’ pea mo tatatou fakalogo ki totatou leʼo ʼo loto ʼaē neʼe akoʼi ʼaki te Tohi-Tapu?
17 ʼE tapuakina anai tatou e Sehova ʼaki tona laumālie, mo kapau ʼe tou fakamāmāhani ʼo fakalogo ki ‘te folafola ʼaē ʼe haʼu mai ʼotatou tuʼa’—mai te Tohi-Tapu pea mai te tagata kaugana agatonu mo poto—pea mo tou tokagaʼi te ʼu fakamanatu ʼaē ʼe fai mai e totatou leʼo ʼo loto ʼaē neʼe akoʼi ʼaki te Tohi-Tapu. Ki muli age, ʼe hikihiki e te laumālie maʼoniʼoni tatatou fealagia ʼaē ke tou tali pea mo mahino ki te meʼa ʼaē ʼe ʼui mai e Sehova.
18, 19. ʼE fua lelei feafeaʼi kia tatou te takitaki ʼa Sehova ʼi totatou minisitelio pea mo totatou maʼuli?
18 ʼE toe foaki mai e te laumālie ʼo Sehova te mālohi moʼo tauʼi te ʼu faigataʼaʼia, ʼaki te poto pea mo te lototoʼa. Ohage ko te meʼa ʼaē neʼe hoko ki te kau ʼapositolo, ʼe feala ke uga e te laumālie ʼo te ʼAtua tatatou fakakaukau, pea mo tokoni tuʼumaʼu mai kia tatou ke tou mulimuli ki te ʼu pelesepeto ʼo te Tohi-Tapu ʼi tatatou ʼu gāue pea mo tatatou ʼu palalau. (Mateo 10:18-20; Soane 14:26; Gaue 4:5-8, 13, 31; 15:28) Kapau ʼe tou fakaʼaogaʼi te laumālie ʼo Sehova pea mo fakatahi kiai tatatou ʼu faiga, pea ʼe tou maʼu ai anai he ʼu fua lelei, mokā tou fai he ʼu tonu maʼuhiga ʼi totatou maʼuli, pea ʼe tou lototoʼa ai anai moʼo lagolago ki te ʼu tonu ʼaia. Ohage la, ʼe lagi tonu ke koutou fetogi tokotou faʼahiga maʼuli, pea ke lahi age te temi ʼaē ʼe koutou fakaʼaogaʼi ki te ʼu meʼa fakalaumālie. Peʼe lagi tonu anai ke koutou filifili he ʼu meʼa maʼuhiga ʼe nātou fetogi anai tokotou maʼuli, ohage ko te fili ʼo hokotou ʼohoana, peʼe koutou vakaʼi ʼo he gāue ʼe kole atu ke koutou fai, peʼe ko te totogi ʼo hokotou ʼapi. Moʼo fai he ʼu tonu, ʼe mole tonu pe ke koutou mulimuli ki te ʼu meʼa ʼaē ʼi tokotou loto, kae ʼe tonu ke koutou fakalogo ki te meʼa ʼaē ʼe ʼui e te laumālie ʼo te ʼAtua, pea mo koutou maʼuliʼi te ʼu meʼa ʼaē ʼe ina fakatotonu atu.
19 ʼE tou leleiʼia moʼoni te ʼu fakamanatu ʼaia pea mo te ʼu tokoni ʼaē ʼe fai mai e totatou ʼu tēhina, ohage ko te kau tagata ʼāfea. Kae ʼe mole tonu anai ke tou atalitali tuʼumaʼu ke fakahā mai e ʼihi te ʼu meʼa ʼaē ʼe tonu ke tou fai. Kapau ʼe tou ʼiloʼi te aga fakapotopoto ʼaē ʼe tonu ke tou muliʼi, pea mo te ʼu aga ʼaē ʼe tonu ke tou fetogi moʼo fakafiafia ki te ʼAtua, pea ʼe tonu ke tou fai te ʼu faʼahi ʼaia. Neʼe ʼui fēnei e Sesu: “Kapau e koutou iloi te u mea aia, e koutou manuia, kapau e koutou fai ia.”—Soane 13:17.
20. Koteā te ʼu tapuakina ʼaē ka maʼu e nātou ʼaē ʼe fakalogo ki te ‘folafola ʼaē ʼe haʼu mai ʼonatou tuʼa’?
20 Koia, kapau ʼe nātou fia ʼiloʼi peʼe feafeaʼi te fakafiafia ʼo te ʼAtua, pea ʼe mole ʼaoga ki te kau Kilisitiano ke nātou logo ki he leʼo moʼoni mai te lagi, pea mole toe ʼaoga foki ke ʼaʼahi nātou e he ʼaselo. ʼE tapuakinaʼi nātou heʼe nātou maʼu te Folafola ʼa te ʼAtua, pea mo te takitaki ʼofa ʼa te kalasi ʼaē neʼe ina fakanofo ʼi te kele. Kapau ʼe nātou tokagaʼi fakalelei ‘te folafola [ʼaia] ʼaē ʼe haʼu mai ʼonatou tuʼa,’ pea mo nātou mulimuli ki te takitaki ʼo tonatou leʼo ʼo loto ʼaē neʼe akoʼi ʼaki te Tohi-Tapu, pea ʼe nātou maʼu anai he ʼu fua lelei ʼi tanatou fakahoko te finegalo ʼo te ʼAtua. Pea ʼe nātou mamata moʼoni anai ki te fakahoko ʼo te fakapapau ʼaē neʼe fai e te ʼapositolo ko Soane: “Kia ia ae e ina fai te finegalo o te Atua e mauli o talu ai.”—1 Soane 2:17.
Ko He Fakamanatu Nounou
• He koʼe ʼe palalau Sehova ki te tagata?
• He koʼe ʼe ʼaoga kia tatou he polokalama lautohi ʼo te Tohi-Tapu ʼi te ʼaho fuli pe?
• ʼE tonu ke tou tali feafeaʼi te takitaki ʼo te kalasi ʼa te tagata kaugana?
• He koʼe ʼe mole tonu ke tou meʼa noaʼi te ʼu meʼa ʼaē ʼe fakatotonu mai e totatou leʼo ʼo loto ʼaē neʼe akoʼi ʼaki te Tohi-Tapu?
[Paki ʼo te pasina 13]
ʼE mole ʼaoga ke faʼu e te tagata he ʼu meʼa gāue faigataʼa ke ina maʼu ai he ʼu logo mai te ʼAtua
[Haʼuʼaga ʼo te paki]
Courtesy Arecibo Observatory/David Parker/Science Photo Library
[Paki ʼo te pasina 15]
ʼE palalau mai Sehova kia tatou ʼaki te Tohi-Tapu pea mo “te tagata kaugana agatonu mo poto”