Ko Te Kau Fai Faka Mafola ʼo Te Puleʼaga
Ko He Maʼuli Faka Famili Fiafia ʼe Ina ʼAumai Te Hahaʼi Ki Te ʼAtua
KO SEHOVA neʼe ina tapuakina ia Sosefo ʼaki he poto lahi pea mo he fakasiosio tonu. (Gaue 7:10) Pea ko te fakasiosio poto ʼaia ʼa Sosefo “neʼe lelei kia mata ʼo Falaone pea mo ʼana kaugana fuli.”—Senesi 41:37.
ʼO toe feiā pe ia ʼaho nei, ʼe foaki e Sehova ki tana hahaʼi te fakasiosio poto pea mo te fakasiosio tonu, mokā nātou ako te Tohi-Tapu. (2 Timoteo 3:16, 17) Ko te poto ʼaia pea mo te fakasiosio tonu ʼaia ʼe nā fakatupu he ʼu fua lelei, mokā tou mulimuli ki te ʼu tokoni ʼaē ʼe fakatafito ki te Tohi-Tapu. ʼI te agamāhani, ko te lelei ʼo tanatou aga, ‘ ʼe lelei kia mata ʼo te hahaʼi ʼaē ʼe nātou sioʼi nātou,’ ohage ko te ʼu meʼa ʼaē ka tou vakaʼi ʼi te ʼu faʼifaʼitaki ʼaenī mai Zimbabwe.
• Neʼe ʼi ai te fafine neʼe vāhaʼa fale mo te kau Fakamoʼoni ʼa Sehova. Logola neʼe mole ina leleiʼia te kau Fakamoʼoni, kae neʼe ina leleiʼia tanatou ʼu faʼahiga aga, pea mo tonatou maʼuli faka famili. Neʼe ina fakatokagaʼi ʼe felogoi lelei te tagata pea mo te fafine, pea neʼe fakalogo lelei tanā fānau. Neʼe ina fakatokagaʼi tāfito te ʼofa mālohi ʼa te tagata ki tona ʼohoana.
ʼI ʼihi fenua ʼo Afelika, ʼe nātou faka tui, kapau ʼe ʼofa he tagata ki tona ʼohoana, pea ʼe mahino ia neʼe fakaʼaogaʼi e te fafine he meʼa fakalauʼakau moʼo “fakalalata” ia ia. Pea neʼe ʼalu te fafine ʼaia ki te fafine Fakamoʼoni, pea ina fehuʼi kia ia: “ ʼE ke lava foaki mai te meʼa fakalauʼakau ʼaē neʼe ke ʼavage ki tou ʼohoana, ke feala ki toku ʼohoana ke ʼofa kia ʼau, ohage ko te ʼofa ʼo tou ʼohoana kia koe?” Pea neʼe tali fēnei e te fafine Fakamoʼoni: “Ei, ʼe ʼau ʼavatu anai ʼapogipogi hoʼatā.”
ʼI te ʼapogipogi ake, neʼe ʼalu te tuagaʼane ki te fafine ʼaia ʼaki tana “meʼa fakalauʼakau.” Neʼe koteā te meʼa ʼaia? Neʼe ko te Tohi-Tapu, pea mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼI tana ʼosi vakaʼi te kapite ʼo te tohi Te ʼAtamai Mālama, ʼaē ko tona kupu tāfito “Ko Te Faʼufaʼu ʼo He Famili ʼe Ina Faka Maʼuhigaʼi Te ʼAtua,” neʼe ina ʼui fēnei ki te fafine: “Koʼeni te ‘meʼa faifakalauʼakau’ ʼaē ʼe ma fakaʼaogaʼi mo toku ʼohoana ke ma felalataʼaki, pea ko te tupuʼaga la ʼaia ʼo tamā feʼofani lahi.” Neʼe kamata ai te ako faka Tohi-Tapu, pea neʼe tuputupu vave te fafine ʼi te faʼahi fakalaumālie, pea neʼe papitema moʼo fakahā kua ina foaki tona maʼuli kia Sehova.
• Neʼe fekauʼi te ʼu pionie makehe e lua ki te kiʼi kokelekasio veliveli, ʼe tuʼu ōvi ki te tuʼakoi ʼo te potu noleto-esite ʼo Zimbabwe pea mo Mozambique, pea neʼe mole nā fai faka mafola ʼi te ʼu ʼapi lolotoga vāhaʼa e lua. Koteā tona tupuʼaga? He neʼe ʼōmai te hahaʼi kiō nāua moʼo fakalogo ki te ʼu meʼa ʼaē neʼe nā fakamatala. ʼE ʼui e te tahi pionie pe koʼe neʼe hoko te faʼahi ʼaia: “ ʼI te vāhaʼa fuli, neʼe ma fai ia kilometa e 15 moʼo fai te ako Tohi-Tapu ʼa te tagata. Neʼe mole faigafua tamā ʼolo ki te koga meʼa ʼaia. Neʼe ma haʼele ʼi te pela, pea neʼe tonu ke ma fakalaka ʼi te ʼu vaitafe ʼe loloto ʼo aʼu ki tomā ʼu kia. Neʼe tonu ke ma ʼamo ʼi tomā ʼulu, tomā ʼu mutuʼi meʼa pea mo tomā ʼu sūlie, moʼo fakalaka ʼi te vaitafe, pea ma toe matuʼu mokā ma tau ki te kau vaitafe.
“Ko te ʼu vāhaʼa fale ʼo te tagata ʼaē neʼe ma fai tana ako, neʼe nātou ōfo ʼi tamā lotomālohi. Ia nātou ʼaē neʼe nātou fakatokagaʼi māua, neʼe ʼi ai te tagata takitaki ʼo te kautahi faka lotu ʼo te kolo. Neʼe ina ʼui ki tana ʼu tisipulo: ‘ ʼE mole koutou fia lotomālohi koa la ohage ko te ʼu tūpulaga ʼaia e lua, ʼaē ko te ʼu Fakamoʼoni ʼa Sehova?’ ʼI te ʼapogipogi ake, ko te tokolahi ʼo tana ʼu tisipulo neʼe nātou ʼōmai ki tomā ʼapi, he neʼe nātou fia ʼiloʼi pe koʼe neʼe ma lotomālohi feiā. Tahi ʼaē meʼa, hili te ʼu vāhaʼa ʼaia e lua, neʼe mole maʼu pe la he temi ke ma fai hamā meʼa kai, he neʼe kaugamālie ʼaupito te hahaʼi ʼaē neʼe ʼōmai kiō māua!”
Neʼe ʼi ai te tagata neʼe ina ʼaʼahi te ʼapi ʼa te ʼu pionie lolotoga te ʼu vāhaʼa ʼaia e lua, neʼe ko te tagata takitaki lotu ʼo te kolo ʼaia. Koutou fakakaukauʼi age muʼa ia te fiafia ʼa te ʼu pionie ʼi tana tali ʼaē ke fai hana ako Tohi-Tapu!